ក្រុមហ៊ុនអន្តរជាតិធំៗប្រមាណពាក់កណ្តាលនៅទូទាំងពិភពលោក បានដាក់ផែនការកាត់បន្ថយទំហំការិយាល័យធ្វើការក្នុងរយៈពេល៣ឆ្នាំខាងមុខ ។ ព័ត៌មាននេះបានផ្សព្វផ្សាយដោយ Knight Frank ជាក្រុមហ៊ុនគ្រប់គ្រងអចលនទ្រព្យដ៏ធំមួយលើពិភពលោក ហើយក្រុមហ៊ុននេះបញ្ជាក់ថា ក្រុមហ៊ុននីមួយៗបានសម្របខ្លួនធ្វើការងារពីផ្ទះកាន់តែច្រើនឡើង ចាប់តាំងពីមានជំងឺកូវីដ-១៩ ឆ្លងរាតត្បាត ប៉ុន្តែក្រុមហ៊ុនតូចៗភាគច្រើនមានគម្រោងពង្រីកការិយាល័យធ្វើការរបស់ពួកគេ ។

តាមការស្ទង់មតិរបស់ក្រុមហ៊ុន Knight Frank បង្ហាញថា បណ្តានាយកគ្រប់គ្រងក្រុមហ៊ុនទទួលខុសត្រូវផ្នែកអចលនទ្រព្យចំនួន៣៥០កន្លែងនៅទូទាំងពិភពលោក ដែលមានបុគ្គលិករួមគ្នាសរុប១០លាននាក់ រកឃើញថា ក្រុមហ៊ុនធំៗទាំងនេះកំពុងកាត់បន្ថយកម្រិតកាបូន និងបានកំណត់គោលដៅកាត់បន្ថយទំហំការិយាល័យពី១០% ទៅ២០% ។

អ្នកជំនាញផ្នែកអចលនទ្រព្យរបស់ក្រុមហ៊ុន Knight Frank និយាយថា ៖ «ការប្រើប្រាស់ការិយាល័យមានទំហំតូចជាងមុនជាចំណុចល្អមួយ និងក្លាយជាជម្រើសរបស់ក្រុមហ៊ុនធំៗ ហើយវាមិនមែនជាទីបញ្ចប់របស់ទីផ្សារអចលនទ្រព្យទេ ពីព្រោះអ្វីដែលយើងបានឃើញនេះ គឺជាកង្វះខាតការផ្គត់ផ្គង់ និងតម្លៃជួលអគារការិយាល័យកើនឡើង» ។ ក្រុមហ៊ុនអន្តរជាតិធំៗគ្រោងកាត់បន្ថយទំហំការិយាល័យនេះ បានធ្វើឱ្យគេបារម្ភពីថ្ងៃអនាគតរបស់អគារចាស់ និងអគារស្ថិតក្នុងទីតាំងមិនពេញនិយមផងដែរ ។ ជាមួយគ្នានេះ ទីផ្សារអចលនទ្រព្យពាណិជ្ជកម្មបានប្រឈមនឹងការធ្លាក់ចុះយ៉ាងខ្លាំង ដោយសារអត្រាការប្រាក់កើនឡើង ។

ក្នុងរយៈពេល៣ឆ្នាំកន្លងមកនេះ ក្រុមហ៊ុនជាច្រើនបានផ្អាកការសម្រេចចិត្តរឿងអចលនទ្រព្យរបស់ខ្លួន ដើម្បីរង់ចាំវាយតម្លៃឥរិយាបថការងារក្រោយការរាតត្បាតរបស់ជំងឺកូវីដ ខណៈក្រុមហ៊ុនខ្លះទៀតរង់ចាំឱ្យកិច្ចសន្យាជួលអគារផុតសុពលភាពសិន មុននឹងសម្រេចចិត្តផ្លាស់ប្តូរ ៕ ប្រភព ៖ beartai BRIEF

រដ្ឋធានីណៃពិដោរ៖ ការធ្វើរដ្ឋប្រហាររបស់ពួកយោធាមីយ៉ាន់ម៉ា រឹបអូសអំណាច ពីរដ្ឋាភិបាលស៊ីវិលជាប់ឆ្នោតតាមបែបលទ្ធិប្រជាធិបតេយ្យរបស់លោកស្រី អ៊ោង សានស៊ូជី (Aung San Suu Kyi) កាលពីថ្ងៃទី១ ខែកុម្ភៈ ឆ្នាំ២០២១ បានរុញច្រានប្រទេសអាស៊ានមួយនេះ ឲ្យធ្លាក់ចូលទៅក្នុងសង្គ្រាមស៊ីវិល វាយប្រយុទ្ធគ្នាស្ទើរពាសពេញប្រទេស ហើយឥឡូវ របបសឹកមួយនេះ កំពុងតែបង្កការបំភិតបំភ័យ និង គំរាមកំហែងដល់មេធាវីការពារក្ដីឲ្យអ្នកជាប់ឃុំឃាំងខាងនយោបាយ។

សារព័ត៌មាន CNA មានមូលដ្ឋាន នៅសិង្ហបុរី បានចេញផ្សាយ កាលពីព្រឹក ថ្ងៃព្រហស្បតិ៍ ទី៨ ខែមិថុនា ថា អង្គការសិទ្ធិមនុស្ស បានថ្លែង កាលពីថ្ងៃព្រហស្បតិ៍ (៨ មិថុនា) ថា ក្រុមមេធាវីរបស់មីយ៉ាន់ម៉ា កំពុងតែការពារដល់កូនក្ដី ជាអ្នកជាប់ឃុំឃាំងផ្នែកនយោបាយ នៅក្នុងតុលាការ គ្រប់គ្រងដោយរបបយោធា ក៏កំពុងតែរងការយាយី ហើយថែមទាំងត្រូវបានចាប់ដាក់គុក ដោយអាជ្ញាធររបបយោធានេះ។ សកម្មភាពបែបនេះ កំពុងតែបំភិតបំភ័យ និង គំរាមកំហែងដល់ក្រុមមេធាវីជាច្រើន ឲ្យបញ្ឈប់ទទួលយកសំណុំរឿងរបស់អ្នកជាប់ឃុំឃាំងខាងនយោបាយ។

ក្រុមអង្គការសិទ្ធិមនុស្ស បានអះអាង ថា របបយោធាមីយ៉ាន់ម៉ា តែងតែប្រើប្រាស់ប្រព័ន្ធតុលាការ សម្រាប់ផ្ដួលគូបដិបក្ខ រួមទាំងមេដឹកនាំលទ្ធិប្រជាធិបតេយ្យ លោកស្រី អ៊ោង សានស៊ូជី (Aung San Suu Kyi) និង លោក វីន មីយីន (Win Myint) អតីតប្រធានាធិបតី ត្រូវបានកាត់ទោសឱ្យជាប់ពន្ធនាគារ រយៈពេលវែង ដោយតុលាការ នៃរបបសឹកនេះ។

ក្រុមអង្គការសិទ្ធិមនុស្ស បានបញ្ជាក់ នៅក្នុងរបាយការណ៍មួយ ដោយផ្អែកលើបទសម្ភាសន៍ជាមួយនឹងមេធាវី ចំនួន១៩នាក់ ថា មេធាវីការពារក្តី ធ្វើការ នៅក្នុងតុលាការពិសេស ត្រូវបានបង្កើតឡើង ដោយរបបយោធា សម្រាប់កាត់ទោសបទឧក្រិដ្ឋកម្មផ្នែកនយោបាយ កំពុងតែ ប្រឈមមុខនឹងការយាយី ការបំភិតបំភ័យ និង ការគំរាមកំហែង ពីអាជ្ញាធរ នៃរបបយោធាមីយ៉ាន់ម៉ា។

មេធាវីមួយរូប នៅទីក្រុងយ៉ាំងហ្គោន (Yangon) បានប្រាប់ដល់អង្គការសិទ្ធិមនុស្ស Watchdog ថា «ឥឡូវនេះ នៅក្នុងបន្ទប់សវនាការ ខ្ញុំមានការព្រួយបារម្ភ អំពីការឃុំឃាំងខ្លួនឯង ច្រើនជាជាងការនិយាយ អំការពិត។ មេធាវីគ្រប់គ្នា នៅក្នុងតុលាការ បានដឹងច្បាស់ ថា ខ្ញុំជានរណា… របបយោធា អាចឃុំខ្លួនខ្ញុំ នៅពេលណាក៏បាន ហើយពួកគេអាចនឹងបង្កើតហេតុផលណាមួយ ដែលពួកគេចង់បាន»។

អង្គការឃ្លាំមើលសិទ្ធិមនុស្ស បានលើកឡើង អំពីករណីរបស់លោកស្រីមេធាវី អ៊ីវែត នូ អ៊ោង (Ywet Nu Aung) ត្រូវបានគេរាយការណ៍ ថា ត្រូវបានចាប់ឃុំឃាំង ខណៈលោកស្រី បានចាកចេញពីសវនាការ។ លោកស្រី កំពុងតែធ្វើជាតំណាងឱ្យអតីតប្រធានរដ្ឋ និង ជាសមាជិកគណបក្សរបស់លោកស្រី សានស៊ូជី គឺគណបក្សសម្ព័ន្ធជាតិដើម្បីប្រជាធិបតេយ្យ (NLD)។ លោកស្រី មេធាវីរូបនេះ ត្រូវបានរបបយោធា ចោទប្រកាន់ ពីការជួយផ្តល់ជំនួយហិរញ្ញវត្ថុ ដល់កងជីវពល ប្រឆាំងនឹងរបបយោធាមីយ៉ាន់ម៉ា ហើយក្រោយមក ត្រូវបានកាត់ទោសឲ្យជាប់ពន្ធនាគារ រយៈពេល១៥ឆ្នាំ។

អង្គការឃ្លាំមើលសិទ្ធិមនុស្ស ក្នុងស្រុក បានអះអាង ថា របបសឹកមីយ៉ាន់ម៉ា បានចាប់ខ្លួនមនុស្ស ជាង ២៣ ០០០នាក់ និង ជនរងគ្រោះ ចំនួន ៣ ៦២២នាក់ផ្សេងទៀត ត្រូវបានសម្លាប់ ចាប់តាំងពីការធ្វើរដ្ឋប្រហារយោធា កាលពីថ្ងៃទី១ ខែកុម្ភៈ ឆ្នាំ២០២១ រហូតមក៕

ប្រទេសបង់ក្លាដែស ៖ នៅខែមិថុនា ឆ្នាំ២០២៣ ប្រទេសបង់ក្លាដែសមានសីតុណ្ហភាពជិតស្មើនឹង៤១អង្សារសេ និងធ្វើឱ្យអាកាសធាតុក្តៅខ្លាំងគ្របដណ្តប់នៅតំបន់ជាច្រើនក្នុងប្រទេសនេះ ខណៈកាលពីមុន សីតុណ្ហភាពស្មើតែ៣២អង្សារសេប៉ុណ្ណោះ ។ លើសពីនេះ ពលរដ្ឋភាគច្រើនខ្វះខាតអគ្គិសនីប្រើប្រាស់ទៀតផង ដោយសាររោងចក្រផលិតអគ្គិសនីគ្មានប្រេងឥន្ធនៈគ្រប់គ្រាន់ ។

ការិយាល័យឧតុនិយមបង់ក្លាដែសបានជូនដំណឹងទៅកាន់ពលរដ្ឋថា ប្រទេសបង់ក្លាដែសត្រូវប្រឈមនឹងអាកាសធាតុក្តៅខ្លាំងមួយរយៈទៀត ខណៈការផ្គត់ផ្គង់អគ្គិសនី ក៏ត្រូវកាត់បន្ថយផងដែរ ។ ដូច្នេះ វាជាស្ថានការណ៍ដ៏អាក្រក់មួយសម្រាប់ពលរដ្ឋ ដោយសារពួកគេមិនអាចប្រើប្រាស់កង្ហារបានក្នុងអំឡុងពេលអាកាសធាតុក្តៅខ្លាំង ។ មិនតែប៉ុណ្ណោះ គេបានប្រកាសឱ្យបិទសាលារៀនបឋមសិក្សា នៅខែមិថុនា ឆ្នាំ២០២៣ ផងដែរ ។

លោក Nasrul Hamid រដ្ឋមន្ត្រីក្រសួងថាមពល និងធនធានរ៉ែ បានថ្លែងថា បង់ក្លាដែសអាចកាត់បន្ថយការប្រើប្រាស់អគ្គិសនីរយៈពេល២សប្តាហ៍ទៀត ដោយសារការខ្វះខាតប្រេងឥន្ធនៈ ហើយគេត្រូវផ្អាកការផលិតថាមពលជាច្រើនកន្លែង រួមទាំងរោងចក្រថាមពលធ្យូងថ្មដ៏ធំបំផុតរបស់ប្រទេស ។ អាកាសធាតុក្តៅខ្លាំងបានកើតឡើងស្របពេលប្រទេសបង់ក្លាដែសកាត់បន្ថយការប្រើប្រាស់អគ្គិសនី ដែលធ្វើឱ្យប៉ះពាល់ដល់សេដ្ឋកិច្ចក្នុងរយៈពេលប៉ុន្មានខែចុងក្រោយនេះ ។ លើសពីនេះ វាក៏បានប៉ះពាល់ដល់ឧស្សាហកម្មសម្លៀកបំពាក់ដ៏សំខាន់ ដែលមានសមាមាត្រច្រើនជាង៨០% នៃការនាំចេញទំនិញទៅក្រៅប្រទេស ។

អ្នកជំនាញចង្អុលបង្ហាញថា សីតុណ្ហភាពកើនឡើង ក៏ដូចជារលកកំដៅបានគ្របដណ្តប់នៅតំបន់ជាច្រើនទូទាំងប្រទេសមានរយៈពេលយូរជាងមុន គឺបណ្តាលមកពីបម្រែបម្រួលអាកាសធាតុនៅលើពិភពលោក ។ ហេតុនេះ វាមានចំណែកធ្វើឱ្យពិភពលោកប្រែប្រួលដូចជា ជួបគ្រោះមហន្តរាយញឹកញាប់ ធ្ងន់ធ្ងរ និងយូរជាងមុន ៕

ប្រភព ៖ Tnn earth

បរទេស៖ យោងតាមប្រភពព័ត៌មាន Live Science កាលថ្ងៃទី ៦ ខែមិថុនា បានឱ្យដឹងថា បុរសជនជាតិអូស្ត្រាលីម្នាក់ឈ្មោះ Marcus McGowan ត្រូវបានក្រពើយក្សទឹកប្រៃវាយប្រហារពីខាងក្រោយ ខណៈដែលលោកកំពុងហែលទឹក។

លោក McGowan បាននិយាយថា “ក្រពើយក្សនោះបានវាយប្រហារខ្ញុំដោយត្របាក់ក្បាលរបស់ខ្ញុំ ប៉ុន្តែមិនទាន់ខ្លាំងនោះទេ ភ្លាមនោះដែរខ្ញុំក៏បានប្រើកម្លាំងដៃរបស់ខ្ញុំដើម្បីបើកថ្គាមវា ហើយខ្ញុំក៏បានព្យាយាមត្រឡប់មកឡើងលើគោកវិញដោយជោគជ័យ។
ដូចនេះដៃ និងក្បាលរបស់លោក McGowan ត្រូវបានគេបញ្ជូនទៅមន្ទីរពេទ្យដើម្បីព្យាបាលរបួស ដោយរបួសទាំងនេះនៅកម្រិតស្រាលនៅឡើយទេ បើប្រៀបធៀបទៅនឹងការប្រយុទ្ធជាមួយសត្វក្រពើយក្សដ៏មានឥទ្ធិពលបំផុតមួយនៅលើភពផែនដី។

លោក McGowan ក៏បានបន្តទៀតថា ក្រពើទឹកប្រៃនោះមានប្រវែងប្រហែល ៤-៥ ម៉ែត្រ និងមានទម្ងន់ប្រហែល ៣,៧០០ គីឡូក្រាម។ លោក Paul Gignac អ្នកជំនាញកាយវិភាគវិទ្យានៅសាកលវិទ្យាល័យ Arizona បាននិយាយថា ជាទូទៅក្រពើមានថ្គាមដ៏រឹងមាំ និងកម្លាំងមហាសាល ប៉ុន្តែវាពិតជាអស្ចារ្យណាស់ដែលលោក McGowan បានរួចជីវិត។
នៅក្នុងហេតុការណ៍បែបនេះ មនុស្សអាចរំដោះខ្លួនចេញពីមាត់ក្រពើបាន នៅពេលដែលត្រូវបានវាយប្រហារ រាងកាយរបស់មនុស្សជាធម្មតាបញ្ចេញនូវ adrenaline យ៉ាងច្រើន ដែលបង្កើនចង្វាក់បេះដូង និងអត្រាដកដង្ហើម។ ប្រតិកម្មនេះបង្កើនបរិមាណអុកស៊ីសែនបញ្ជូនទៅសាច់ដុំដោយផ្តល់ឱ្យមនុស្សនូវថាមពលយ៉ាងខ្លាំងដើម្បីទប់ទល់នឹងគ្រោះថ្នាក់បែបនេះ៕ ប្រភព៖vnexpress

ប្រទេសឥណ្ឌូណេស៊ី ៖ ប្រទេសឥណ្ឌូណេស៊ីបានប្រកាសហាមប្រើប្រាស់ផលិតផលផ្លាស្ទិកតែម្តងហើយបោះចោលនៅឆ្នាំ២០២៩ ហើយបណ្តាក្រុមហ៊ុនផលិតទំនិញនានាត្រូវសហការទទួលខុសត្រូវ និងចូលរួមកាត់បន្ថយការប្រើប្រាស់ផ្លាស្ទិកឱ្យបាន៣០% ក្នុងការវេចខ្ចប់ផលិតផល ។

ការប្រកាសហាមប្រើប្រាស់ផ្លាស្ទិកនេះ គឺផ្តោតទៅលើថង់ផ្លាស្ទិកដែលប្រើប្រាស់ចំនួន១លើក, បំពង់, កាំបិត ស្លាបព្រា និងសមផ្លាស្ទិក ។ ជាមួយគ្នានេះ គេក៏ប្រកាសហាមប្រើប្រអប់ផ្លាស្ទិកខ្ចប់ម្ហូបអាហារផងដែរ ។ តាមការស្រាវជ្រាវ និងរបាយការណ៍ជាច្រើនបញ្ជាក់ថា ឥណ្ឌូណេស៊ីជាប្រទេសមួយក្នុងចំណោមប្រទេសផ្សេងទៀត ដែលបានបង្កើតសំរាមផ្លាស្ទិកជាច្រើនលើសលើសនៅលើពិភពលោក ហើយកាលពីឆ្នាំ២០២២ ប្រទេសឥណ្ឌូណេស៊ីបានបង្កើតសំរាមផ្លាស្ទិករហូតដល់១២,៦លានតោន ។

តាមទិន្នន័យពីក្រសួងបរិស្ថានឥណ្ឌូណេស៊ី ដែលបានដកស្រង់ការស្រាវជ្រាវពីក្រុមអ្នកអភិរក្សបរិស្ថាន «Zero Waste Indonesia Alliance» បញ្ជាក់ថា មានត្រឹមតែ៩% ប៉ុណ្ណោះនៃសំរាមផ្លាស្ទិកនៅឥណ្ឌូណេស៊ី ដែលគេបានយកទៅកែច្នៃប្រើប្រាស់ឡើងវិញ ។ ចំណែកសំរាមនៅសល់ជាច្រើនទៀតត្រូវបានគេកប់ចោល ឬទុកចោលធ្វើឱ្យកើតជាតិពុលនៅក្នុងទឹកទន្លេ និងសមុទ្រ ។

កាលពីខែកក្កដា ឆ្នាំ២០១៩ កោះបាលី គឺជាកោះដ៏ល្បីឈ្មោះមួយខាងទាក់ទាញភ្ញៀវទេសចរនៅឥណ្ឌូណេស៊ី បានក្លាយជាទីកន្លែងដំបូងគេដែលហាមការប្រើផ្លាស្ទិកតែម្តងបោះចោល, បំពង់ និងប្រអប់ផ្លាស្ទិក ។ ជាមួយគ្នានេះ កាលពីខែកក្កដា ឆ្នាំ២០២០ ទីក្រុងហ្សាកាតា ក៏បានប្រកាសហាមប្រើថង់ផ្លាស្ទិកដែលប្រើតែម្តងបោះចោលផងដែរ ប៉ុន្តែទីក្រុងនេះនៅតែអនុញ្ញាតឱ្យប្រើប្រាស់បំពង់ កាំបិត ស្លាបព្រា សម និងប្រអប់ផ្លាស្ទិក ។

ឥណ្ឌូណេស៊ីមិនមែនជាប្រទេសតែមួយទេ ដែលមានគោលបំណងឈប់ប្រើប្រាស់ផលិតផលផ្លាស្ទិកតែម្តងបោះចោល ប៉ុន្តែកាលពីឆ្នាំ២០១៨ ប្រទេសម៉ាឡេស៊ី ក៏បាដាក់ផែនការឈប់ប្រើផ្លាស្ទិកផងដែរនៅឆ្នាំ២០៣០ ។ រដ្ឋមន្ត្រីក្រសួងធនធានធម្មជាតិ បរិស្ថាន និងបម្រែបម្រួលអាកាសធាតុម៉ាឡេស៊ី លោក Nick Nazmi Nick Ahmad បានថ្លែងកាលពីខែឧសភា ឆ្នាំ២០២៣ ថា ម៉ាឡេស៊ីមានគោលដៅហាមប្រើថង់ផ្លាស្ទិកសម្រាប់ការលក់រាយគ្រប់អាជីវកម្មនៅទូទាំងប្រទេសនាឆ្នាំ២០២៥ ៕ ប្រភព ៖ Tnn earth