បរទេស៖ ក្រុមហ៊ុនអាកាសចរណ៍អឺរ៉ុប Destinus បានបង្ហាញគំរូយន្តហោះអ៊ីដ្រូសែន Destinus3 ដំបូងរបស់ខ្លួននៅក្នុងកម្មវិធី Paris Air Show កាលពីថ្ងៃទី ២០ ខែមិថុនា។
យោងតាម Interesting Engineering ដែលបានរាយការណ៍នៅថ្ងៃទី ២១ ខែមិថុនា បានឱ្យដឹងថា ក្រុមហ៊ុន Destinus មានគោលបំណងផលិតយន្តហោះដែលដើរដោយថាមពលអ៊ីដ្រូសែន ដែលមានសមត្ថភាពដឹកអ្នកដំណើររវាងទីក្រុង Frankfurt និង Shanghai ក្នុងរយៈពេលតិចជាង ៣ ម៉ោង ដោយសន្សំបាន ៨ ម៉ោងបើធៀបនឹងយន្តហោះទូទៅ។

ថាមពលអ៊ីដ្រូសែនត្រូវបានជ្រើសរើសធ្វើជាឥន្ធនៈ ដោយសារសមត្ថភាពនៃថាមពលរបស់វាខ្ពស់ជាង ៣ ដងនៃប្រេងកាតដែលប្រើជាទូទៅក្នុងយន្តហោះសព្វថ្ងៃនេះ។ លើសពីនេះក្រុមហ៊ុន Destinus ក៏បានរចនាឧបករណ៍ដុតក្រោយ ដែលមានសមត្ថភាពខ្ពស់ផ្តល់នូវកម្លាំងរុញច្រានបន្ថែមទៀតនៅពេលចាំបាច់។

Destinus គ្រោងនឹងបើកដំណើរការក្រុមហ៊ុនអាកាសចរណ៍ពាណិជ្ជកម្មអ៊ីដ្រូសែនដំបូងជាផ្លូវការនៅចន្លោះឆ្នាំ ២០៣០ និង ២០៣២។ មកទល់នឹងពេលនេះ Destinus បានសាកល្បងការហោះហើរដោយជោគជ័យជាមួយនឹងយន្តហោះគំរូដំបូងរបស់ខ្លួនគឺ Destinus3 ដែលជាយន្តហោះប្រវែង ៤ ម៉ែត្រ នឹងមានសមត្ថភាពផ្ទុកអ្នកដំណើរបានរហូតដល់ ៤០០ នាក់។
បន្ថែមពីលើឥន្ធនៈអ៊ីដ្រូសែនក្រុមហ៊ុន Destinus ក៏នឹងណែនាំប្រព័ន្ធស្វ័យប្រវត្តិថ្មីជាមួយនឹងយន្តហោះគំរូ Destinus3។ ការហោះហើរដោយប្រើអ៊ីដ្រូសែនរាវជាឥន្ធនៈត្រូវបានគេរំពឹងថានឹងចាប់ផ្តើមអនុវត្តបណ្តើរៗនៅដើមឆ្នាំក្រោយ នៅក្នុងដំណាក់កាលដំបូងក្រុមហ៊ុន Destinus នឹងព្យាយាមហោះហើរនៅពាក់កណ្តាលទីពីរនៃ ២០២៤ ៕ ប្រភព៖vnexpress

ប្រទេសថៃ ៖ កាលពីថ្ងៃទី២១ ខែមិថុនា កន្លងមក គណៈកម្មាធិការរៀបចំការបោះឆ្នោតប្រទេសថៃ បានប្រកាសទទួលសមាជិកសភាតំណាងរាស្ត្រចំនួន៥០០នាក់ ហើយគេសង្កេតឃើញថា ក្នុងថ្ងៃដដែលនេះ លោក ប្រាយុទ្ធ ចាន់អូចា ជានាយករដ្ឋមន្ត្រី និងរដ្ឋមន្ត្រីក្រសួងការពារជាតិ បានធ្វើដំណើរមកបំពេញការងាររបស់លោកនៅវិមានរដ្ឋាភិបាល ប្រកបដោយបរិយាកាសស្ងៀមស្ងាត់ ។

តាមសេចក្តីរាយការណ៍ព័ត៌មានពីវិមានរដ្ឋាភិបាលឱ្យដឹងថា នៅអគារទីបញ្ជាការធំដែលមានការិយាល័យរបស់លោកឧបនាយករដ្ឋមន្ត្រី និងរដ្ឋមន្ត្រីប្រចាំការិយាល័យនាយករដ្ឋមន្ត្រី នៅពេលមុននេះ ក៏មានការប្រមូលសម្ភារៈប្រើប្រាស់ផ្ទាល់ខ្លួនចេញផងដែរ ។ ប៉ុន្តែនៅការិយាល័យធ្វើការរបស់លោក Prawit Wongsuwan ឧបនាយករដ្ឋមន្ត្រី ដែលបានយកត្រីនាគមកចិញ្ចឹមនោះ គេរាយការណ៍ថា មិនទាន់បានរើចេញទេ ។

ក្នុងវិមានរដ្ឋាភិបាល គ្មានសម្ភារៈប្រើប្រាស់ផ្ទាល់ខ្លួនច្រើនទេ ចំណែកព្រះពុទ្ធរូបដែលលោក ប្រាយុទ្ធ ចាន់អូចា តម្កល់សម្រាប់គោរពបូជាក្នុងការិយាល័យធ្វើការរបស់លោកនោះ គេបានដឹកជញ្ជូនទៅកាន់លំនៅឋានរបស់លោករួចរាល់ហើយ ។ រីឯឯកសារសំខាន់ផ្សេងៗដែលមិនប្រើប្រាស់ត្រូវបានគេកម្ទេចចោល ខណៈគេប្រមូលទុកឯកសារខ្លះទៀត ដើម្បីត្រៀមប្រគល់ការិយាល័យធ្វើការទៅឱ្យនាយករដ្ឋមន្ត្រីថ្មី ។

គេរាយការណ៍ទៀតថា លោក ប្រាយុទ្ធ ចាន់អូចា នៅតែធ្វើការងារបន្តទៀតរហូតដល់គណៈរដ្ឋមន្ត្រីថ្មីចូលមកបំពេញតួនាទីជាផ្លូវការ ។ ការប្រមូលសម្ភារៈចេញក្រៅការិយាល័យនេះ ក្រោយពីមានសេចក្តីរាយការណ៍ថា លោក Wissanu Krea-ngam ឧបនាយករដ្ឋមន្ត្រីបានប្រកាសកំណត់ពេលវេលាឱ្យកិច្ចប្រជុំគណៈរដ្ឋមន្ត្រីជ្រាបថា នឹងមានការជ្រើសរើសប្រធានសភានៅថ្ងៃទី១៣ ខែកក្កដា ព្រមទាំងតែងតាំងគណៈរដ្ឋមន្ត្រី នៅថ្ងៃទី២១ ខែកក្កដា ឆ្នាំ២០២៣ ៕ ប្រភព ៖ sanook

រដ្ឋធានីវ៉ាស៊ីនតោន៖ ក្រោយការបាត់ទំនាក់ទំនងជាមួយនឹងនាវាមុជទឹក Titan ដឹកក្រុមអ្នកទេសចរ ជាមហាសេដ្ឋី ទៅទស្សនាកប៉ាល់ទីតានិក (Titanic) ដែលបានលិច នៅក្នុងអំឡុងឆ្នាំ១៩១២ នៅភាគខាងជើង នៃមហាសមុទ្រអាត្លង់ទិកនោះមក សហរដ្ឋអាមេរិក និង កាណាដា បានដឹកនាំការរុករកនេះ ដោយរួមទាំងបារាំង និង ចក្រភពអង់គ្លេស ផងដែរ ហើយក្រុមអ្នកជួយសង្គ្រោះ នៅតែមានក្ដីសង្ឃឹម ក្រោយការរកឃើញសំឡេងមួយ នៅក្រោមទឹកសមុទ្រ។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃព្រហស្បតិ៍ ទី២២ ខែមិថុនា ថា មន្រ្ដីឆ្មាំសមុទ្ររបស់សហរដ្ឋអាមេរិក បានបញ្ជាក់ ថា ក្រុមអ្នកជួយសង្គ្រោះ កំពុងតែស្វែងរកនាវាមុជទឹក Titan ដែលបានបាត់ នៅភាគខាងជើង នៃមហាសមុទ្រអាត្លង់ទិក។ ការរុករកនេះ កំពុងតែផ្តោតទៅលើតំបន់ដែលរកឃើញសំឡេង នៅខាងក្រោមទឹកសមុទ្រ។

លោក ជេមី ហ្វ្រែដេរីក (Jamie Frederick) កាពីតែន នៃកងឆ្មាំសមុទ្រសហរដ្ឋអាមេរិក បានបញ្ជាក់ កាលពីថ្ងៃពុធ ថា អាជ្ញាធរសហរដ្ឋអាមេរិក និង កាណាដា នៅតែមិនទាន់ដឹង ថា សំឡេងនៅក្រោមទឹកសមុទ្រដ៏ជ្រៅនោះ ជាអ្វីនៅឡើយ។ ប៉ុន្ដែក្រុមអ្នកជួយសង្គ្រោះ នៅតែមានក្តីសង្ឃឹម នៅក្នុងការជួយសង្គ្រោះដល់មនុស្ស ចំនួន៥នាក់ នៅក្នុងនាវាមុជទឹក Titan ដែនបានធ្វើដំណើរទៅកាន់ទីដែលកប៉ាល់ទីតានិក បានលិច ហើយនៅមុនពេលបាត់ទំនាក់ទំនង ជាមួយនាវាមុជទឹកនោះ កាលពីថ្ងៃអាទិត្យ។

លោកកាពីតែន នៃកងឆ្មាំសមុទ្រសហរដ្ឋអាមេរិក បានប្រាប់ដល់ក្រុមអ្នកយកព័ត៌មាន ថា នៅពេលអ្នកស្ថិតក្នុងដំណាក់កាលស្វែងរក ហើយជួយសង្គ្រោះដល់មនុស្ស អ្នកតែងតែមានក្តីសង្ឃឹម នៅក្នុងចិត្តជានិច្ច។ នេះជាមូលហេតុរបស់យើងត្រូវតែធ្វើអ្វីៗ ដែលយើងអាចធ្វើបាន។ យន្តហោះរបស់កាណាដា ដំបូងគេ បានរកឃើញសំឡេង កាលពីថ្ងៃអង្គារ ហើយសំឡេងនោះ នៅតែបន្ដឮ រហូតមកដល់ថ្ងៃពុធ។

លោក ជេមី ហ្វ្រែដេរីក កាពីតែន នៃកងឆ្មាំសមុទ្រសហរដ្ឋអាមេរិក បានបន្ថែម ថា ប្រតិបត្តិការយានរុករកពីចម្ងាយ (ROV) ត្រូវបានផ្លាស់ប្តូរទីតាំង សម្រាប់ការព្យាយាមស្វែងរកប្រភពដើម នៃសំឡេងនោះ។ ចំណែកក្រុមនាវិក កំពុងតែស្វែងរក នៅក្នុងតំបន់រកឃើញសំឡេង ហើយសកម្មភាពរុករកនេះ កំពុងតែបន្ត។

លោក កាល់ ហាតស្វ៊ៀល (Carl Hartsfield) ជាអ្នកជំនាញ នៃគ្រឹះស្ថាន Woods Hole Oceanographic (វូដ ហូល អូសៀណូហ្ក្រាហ្វីក) ដែលពាក់ព័ន្ធនឹងប្រតិបត្តិការនេះដែរ បានបញ្ជាក់ ថា សំឡេងនៅក្រោមទឹកសមុទ្រនោះ ជាសំឡេងដ៏សង័្សយមួយ។ ប៉ុន្ដែក្រុមអ្នកវិទ្យាសាស្ត្រ កំពុងតែស្វែងរក ថាតើវាជាសំឡេងអ្វីឲ្យប្រាកដ?

គេហទំព័ររបស់ក្រុមហ៊ុន OceanGate (អូសៀនហ្គេត) បានផ្សព្វផ្សាយ ថា បេសកកម្ម ទៅកាន់កប៉ាល់ទីតានិក គឺមនុស្សម្នាក់ៗ ត្រូវចំណាយលុយ រហូតដល់ចំនួន ២៥០ ០០០ដុល្លារអាមេរិក។ ចំណែកការចាប់ផ្ដើមដំណើរ នឹងចាកចេញពី St. John (សេនស៍ ចន) ស្ថិតក្នុងខេត្តកោះញូវហ្វោនឡែនដ៍ (Newfoundland ) ប្រទេសកាណាដា ហើយការធ្វើដំណើរនេះ នឹងមានចម្ងាយប្រហែល៦៤០គីឡូម៉ែត្រ ចូលទៅក្នុងមហាសមុទ្រអាត្លង់ទិក ឆ្ពោះទៅកាន់ទីកន្លែង ដែលកប៉ាល់ទីតានិក បានលិច។

នៅពេលនាវា ស្ថិតនៅលើផ្ទៃទឹក ដែលធ្វើដំណើរទៅដល់កន្លែងរបស់កប៉ាល់ទីតានិក បានលិចនោះ គឺអាចអាស្រ័យទៅលើអាកាសធាតុផងដែរ។ ជាតាមធម្មតា នាវាមុជទឹក អាចនឹងចំណាយពេល១០ម៉ោង ទើបមុជទឹកទៅដល់កន្លែងកប៉ាល់ទីតានិក ដែលបានលិចនោះ។

ក្រុមអ្នកទេសចរជាមហាសេដ្ឋី ធ្វើដំណើរតាមនាវាមុជទឹក Titan ដែលបានបាត់ទំនាក់ទំនងនោះ មានចំនួន៥នាក់ រួមមាន ទី១-លោក សាហ្សាដា ដាវូដ (Shahzada Dawood) ជាមហាសេដ្ឋីអង់គ្លេស ដើមកំណើតប៉ាគីស្ថាន, ទី២-កូនប្រុសរបស់គាត់ គឺលោក ស៊ូឡេម៉ាន់ អាយុ១៩ឆ្នាំ, ទី៣-លោក ហាមីស ហាឌីង (Hamish Harding) ជាមហាសេដ្ឋីជនជាតិអង់គ្លេស, ទី៤-លោក ផលហេនរី ហ្កាហ្សេឡេត (Paul-Henri Gargeolet) អាយុ៧៧ឆ្នាំ ជាអ្នកស្រាវជ្រាវជនជាតិបារាំង និង ទី៥-លោក ស្ដុកថុន រូស (Stockton Rush) ជាស្ថាបនិក និង ជានាយកប្រតិបត្ដិ OceanGate (អូសៀនហ្គេត) ជាក្រុមហ៊ុន មានមូលដ្ឋាន នៅសហរដ្ឋអាមេរិក។

លោក ជេមី ហ្វ្រែដេរីក ប្រធានកងទ័នាវាឆ្មាំសមុទ្រសហរដ្ឋអាមេរិក បានប្រាប់ដល់ក្រុមអ្នកកាសែត កាលពីវេលាម៉ោង១៧ ថ្ងៃអង្គារ វេលាក្នុងតំបន់ ថា នាវាមុជទឹក Titan ដែលបានបាត់នោះ មានអុកស៊ីសែន ប្រហែល៤០ម៉ោង។ ប៉ុន្ដែរហូតមកដល់ថ្ងៃពុធ វេលាដដែលនេះ គឺនាវាមុជទឹកនោះ នឹងនៅសល់អុកស៊ីសែន ប្រហែលត្រឹមតែ១៦ម៉ោង។ ចំណែកចំណីអាហារ និង ទឹក នៅក្នុងនាវាមុជទឹកនោះ ត្រូវបានគេជឿ ថា វាស្ថិតក្នុងកម្រិតមួយប៉ុណ្ណោះ។

ជាមួយគ្នានេះ លោកកាពីតែន នៃកងឆ្មាំសមុទ្រសហរដ្ឋអាមេរិក ក៏បានគូសបញ្ជាក់ អំពីការលំបាក សម្រាប់ការស្វែងរកនាវាមុជទឹក Titan ដែលបានបាត់ នៅក្នុងផ្ទៃទឹកដ៏ធំល្វឹងល្វើយ នៃមហាសមុទ្រអាត្លង់ទិក។ រីឯទីបញ្ជាការបង្រួបបង្រួម ត្រួតពិនិត្យប្រតិបត្តិការនេះ កំពុងតែនាំយកនូវទ្រព្យសម្បត្តិ កាន់តែច្រើន រួមទាំងនាវា យន្តហោះជាច្រើនគ្រឿង និង ប្រតិបត្តិការយានរុករកពីចម្ងាយ (ROV)។

លោក ជេមី ហ្វ្រែដេរីក កាពីតែន នៃកងឆ្មាំសមុទ្រសហរដ្ឋអាមេរិក បានបន្ដ ថា «យើងក៏ត្រូវការកត្តាលក្ខខណ្ឌអាកាសធាតុ ដែលផ្លាស់ប្តូរជានិច្ច ចរន្ត និង ការពង្រីកតំបន់ស្វែងរក ជារៀងរាល់ម៉ោង។ ករណីនេះមានការស្មុគស្មាញខ្លាំងបំផុត ទាក់ទងនឹងបញ្ហានេះ ព្រោះវាមានទីតាំងស្ថិតនៅឆ្ងាយបំផុត ហើយត្រូវតែសុំសម្របសម្រួលជាច្រើន ជាមួយនឹងបណ្ដាទីភ្នាក់ងារ និង ប្រទេសផ្សេងៗទៀត ស្របពេលសហរដ្ឋអាមេរិក និង កាណាដា កំពុងតែដឹកនាំការស្វែងរក រួមទាំង ចក្រភពអង់គ្លេស និង បារាំង ផងដែរ៕

ប្រទេសឥណ្ឌា ៖ រដ្ឋាភិបាលឥណ្ឌាបានលើកឡើងថា រដ្ឋយ៉ាងតិចចំនួន២ ស្ថិតនៅភាគខាងជើងប្រទេសឥណ្ឌា មានពលរដ្ឋស្លា.ប់ដោយសារអាកាសធាតុក្តៅខ្លាំង ។ ពលរដ្ឋឥណ្ឌាបានស្លា.ប់ចំនួន១៦៦នាក់ហើយ ហើយពលរដ្ឋជាង៦០០នាក់បានធ្លាក់ខ្លួនឈឺជាបន្តបន្ទាប់ ។ លើសពីនេះ អាកាសធាតុក្តៅបានធ្វើឱ្យដាច់ចរន្តអគ្គិសនីផងដែរ ខណៈបច្ចុប្បន្ននេះ អគ្គិសនីនៅប្រទេសឥណ្ឌាប្រើប្រាស់មិនគ្រប់គ្រាន់ស្រាប់ទៅហើយ ។

សារព័ត៌មាន BBC បានរាយការណ៍ថា សីតុណ្ហភាពក្នុងរដ្ឋ Uttar Pradesh បានកើនឡើងរហូតដល់៤៧អង្សារសេ កាលពីពាក់កណ្តាលខែមិថុនា ឆ្នាំ២០២៣ ។ ចំណែកសីតុណ្ហភាពនៅតំបន់ផ្សេងទៀតក្នុងរដ្ឋ Uttar Pradesh ស្មើនឹង៤២អង្សារសេ ។ អាជ្ញាធរឥណ្ឌាបានដាស់តឿនឱ្យមនុស្សចាស់ស្ថិតនៅក្នុងលំនៅឋានរបស់ខ្លួន ។

ចំណែកមន្ទីរពេទ្យធំជាងគេនៅរដ្ឋ Uttar Pradesh ពោរពេញទៅដោយអ្នកជំងឺដោយសារអាកាសធាតុក្តៅ រហូតដល់មិនអាចទទួលព្យាបាលអ្នកជំងឺបន្ថែមទៀត ។ រីឯមន្ទីរពេទ្យនៅតំបន់ផ្សេងវិញ ក៏បានព្យាបាលអ្នកជំងឺជាច្រើននាក់ផងដែរ គឺសុទ្ធតែឈឺដោយសារអាកាសធាតុក្តៅទាំងអស់ ។ ជាធម្មតា នៅតំបន់ភាគខាងជើងប្រទេសឥណ្ឌានឹងប្រឈមអាកាសធាតុក្តៅខ្លាំង ចាប់ពីខែឧសភា ដល់ខែមិថុនា ។ អ្នកជំនាញលើកឡើងថា ប្រទេសឥណ្ឌាកាន់តែមានអាកាសធាតុក្តៅខ្លាំង ហើយមានរយៈពេលយូរជាងមុន ។

ចាប់តាំងពីខែមេសា ឆ្នាំ២០២៣ ប្រទេសឥណ្ឌាបានចាប់ផ្តើមទទួលរងអាកាសធាតុក្តៅ គឺវាលឿនជាងពេលធម្មតាទៅទៀត ។ អាកាសធាតុក្តៅខ្លាំងបានបណ្តាលឱ្យពលរដ្ឋជាង១០នាក់ស្លា.ប់ដោយសារជំងឺដាច់សរសៃឈាមខួរក្បាល ។ លើសពីនេះ មានពលរដ្ឋជាច្រើននាក់ទៀតបានធ្លាក់ខ្លួនឈឺ និងចូលព្យាបាលនៅមន្ទីរពេទ្យក្នុងរដ្ឋ Maharashtra ៕ ប្រភព ៖ TNN World

ប្រទេសចិន ៖ លោកស្រី Mao Ning អ្នកនាំពាក្យក្រសួងការបរទេសចិនបានចេញសេចក្តីប្រកាសមួយពាក់ព័ន្ធនឹងករណីប្រធានាធិបតីអាមេរិក លោក ចូ បៃដិន បាននិយាយថា មេដឹកនាំប្រទេសចិន លោក ស៊ី ជិនពីង ជាមេដឹកនាំផ្តាច់ការ ។ លោកប្រធានាធិបតីអាមេរិកបាននិយាយបែបនេះក្នុងពិធីជប់លៀងបរិច្ចាគប្រាក់សម្រាប់គណបក្សប្រជាធិបតេយ្យ កាលពីថ្ងៃទី២០ ខែមិថុនា កន្លងមក ។

ប្រធានាធិបតីអាមេរិក លោក ចូ បៃដិន បានថ្លែងថា ហេតុផលដែលប្រធានាធិបតីចិន លោក ស៊ី ជិនពីង មិនពេញចិត្តយ៉ាងខ្លាំងនៅពេលលោក ចូ បៃដិន បញ្ជាឱ្យគេបាញ់បាឡុងស៊ើបការណ៍របស់ចិន ដែលក្នុងបាឡុងនោះបំពាក់ឧបករណ៍ស៊ើបការណ៍ ហើយលោក ស៊ី ជិនពីង មិនដឹងថា បាឡុងហោះទៅដល់ណាទេ ។ ដូច្នេះ វាគួរឱ្យខ្មាសអៀនណាស់សម្រាប់មេដឹកនាំផ្តាច់ការដែលមិនដឹងថា មានរឿងអ្វីកើតឡើង ។

ចំណែកលោកស្រី Mao Ning អ្នកនាំពាក្យក្រសួងការបរទេសចិនបញ្ជាក់ថា ការលើកឡើងរបស់លោក ចូ បៃដិន បែបនេះ គឺជារឿងគ្មានប្រយោជន៍ និងខ្វះភាពទទួលខុសត្រូវយ៉ាងខ្លាំង ។ ដូច្នេះ ពាក្យសម្តីនេះចាត់ទុកថា ជាការញុះញង់នយោបាយដោយបើកចំហ និងរំលោភលើសីលធម៌ការទូត ។

ករណីបាឡុងចិនហោះចូលដែនអាកាសរបស់សហរដ្ឋអាមេរិកនោះ បានកើតឡើងកាលពីខែកុម្ភៈ ឆ្នាំ២០២៣ ហើយគេសង្ស័យថា វាជាបាឡុងស៊ើបការណ៍ ។ ប៉ុន្តែប្រទេសចិនបញ្ជាក់ថា វាជាបាឡុងសម្រាប់ពិនិត្យមើលអាកាសធាតុប៉ុណ្ណោះ ដែលបានហោះចេញក្រៅប្រទេសចិន ។ ហេតុការណ៍កើតឡើងនាពេលនោះបានធ្វើឱ្យលោក Anthony Blinken រដ្ឋមន្ត្រីក្រសួងការបរទេសអាមេរិក ត្រូវពន្យារពេលការធ្វើដំណើរទៅប្រទេសចិន ។

ទំនាក់ទំនងរវាងសហរដ្ឋអាមេរិក និងចិនមានភាពរង្គោះរង្គើជាមួយគ្នាជាបន្តបន្ទាប់ ដូចជា រឿងសង្គ្រាមពាណិជ្ជកម្មរវាងអាមេរិក និងចិន ក្នុងជំនាន់អតីតប្រធានាធិបតីអាមេរិក លោក ដូណាល់ ត្រាំ ដោយចិនអះអាងថា តៃវ៉ាន់ជាទឹកដីមួយផ្នែករបស់ប្រទេសចិន ។ ចំណែកអាមេរិកបានបាញ់បាឡុងចិន ព្រោះសង្ស័យថា វាជាបាឡុងស៊ើបការណ៍សម្ងាត់ ហើយកន្លងមក ប្រទេសទាំងពីរបានបង្ហាញឥរិយាបថចង់ចរចាជាមួយគ្នា ប៉ុន្តែរហូតមកដល់ពេលនេះ ទំនាក់ទំនងរវាងប្រទេសទាំងពីរមិនទាន់ល្អប្រសើរឡើយ ៕ ប្រភព ៖ Mono News

បរទេស៖ យោងតាមរបាយការណ៍របស់អង្គការឧតុនិយមពិភពលោក (WMO) និងទីភ្នាក់ងារផ្លាស់ប្តូរអាកាសធាតុ Copernicus (C3) របស់សហភាពអឺរ៉ុបកាលពីថ្ងៃទី ១៩ ខែមិថុនា បានឱ្យដឹងថា ទ្វីបអឺរ៉ុបគឺជាទ្វីបដែលមានកំដៅលឿនបំផុត នឹងឡើងកំដៅខ្លាំងជាងទ្វេដងនៃមធ្យមភាគរបស់ពិភពលោកចាប់តាំងពីទសវត្សរ៍ឆ្នាំ ១៩៨០។
បច្ចុប្បន្ន ទ្វីបនេះបានជួបប្រទះនូវរដូវក្តៅបំផុតរបស់ខ្លួនក្នុងកំណត់ត្រាថ្មី ដោយមានប្រទេសចំនួន ៦ ដែលត្រូវរងគ្រោះដោយសារការឡើងកម្តៅដូចជា ប្រទេសបារាំង អាល្លឺម៉ង់ អ៊ីតាលី ព័រទុយហ្គាល់ អេស្ប៉ាញ និងចក្រភពអង់គ្លេសបានជួបប្រទះឆ្នាំដ៏ក្តៅបំផុតលើសប្រវត្តិសាស្ត្ររបស់ខ្លួន។

លោក Petteri Taalas អគ្គលេខាធិការរបស់អង្គការឧតុនិយមពិភពលោក (WMO) បាននិយាយថា “នៅអឺរ៉ុប សីតុណ្ហភាពខ្ពស់បានធ្វើឱ្យគ្រោះរាំងស្ងួតកាន់តែធ្ងន់ធ្ងរ និងរីករាលដាល នាំឱ្យមានភ្លើងឆេះព្រៃខ្លាំង និងបង្កើតជាតំបន់ភ្លើងធំទីពីរក្នុងប្រវត្តិសាស្ត្រ ហើយក៏បានបណ្តាលឱ្យមនុស្សរាប់ពាន់នាក់ស្លាប់ដោយសារកំដៅទៀតផង” ។ នៅក្នុងឆ្នាំ ២០២៣ នេះដែរកំដៅខ្លាំងបានបណ្តាលឱ្យមនុស្សស្លាប់ជាង ១៦,០០០ នាក់ទូទាំងពិភពលោក ខណៈដែលអាកាសធាតុមានការប្រែប្រួលយ៉ាងខ្លាំងគួរឱ្យកត់សម្គាល់។

ទោះជាយ៉ាងណាក៏ដោយ របាយការណ៍នេះក៏បានលើកឡើងពីចំណុចវិជ្ជមានដែលថាថាមពលខ្យល់ និងពន្លឺព្រះអាទិត្យនឹងបង្កើតបាន ២២.៣% នៃថាមពលអគ្គិសនីរបស់សហភាពអឺរ៉ុបនៅឆ្នាំ ២០២៣ ដែលលើសពីឧស្ម័នហ្វូស៊ីល (២០%) ។ លោក Leslie Mabon សាស្ត្រាចារ្យផ្នែកប្រព័ន្ធថាមពលបាននិយាយថា “របាយការណ៍នេះបានបញ្ជាក់ពីរឿងពីរដែលយើងដឹងរួចមកហើយគឺទីមួយ ការប្រែប្រួលអាកាសធាតុដែលកំពុងប៉ះពាល់យ៉ាងធ្ងន់ធ្ងរដល់ទ្វីបអឺរ៉ុប និងទីពីរគឺយើងក៏មានដំណោះស្រាយរួចហើយទាក់ទងទៅនឹងបច្ចេកវិទ្យាអគ្គិសនីឥតខ្សែដែលធ្វើឡើងដោយថាមពលពន្លឺព្រះអាទិត្យ នឹងកំពុងអភិវឌ្ឍផងដែរ៕ ប្រភព៖vnexpress

ប្រទេសថៃ ៖ កាលពីថ្ងៃទី២០ ខែមិថុនា កន្លងមក រដ្ឋាភិបាលថៃបានជូនដំណឹងទៅកាន់ពលរដ្ឋថា ត្រូវត្រៀមខ្លួនទប់ស្កាត់នឹងបាតុភូតអេលនីណូដែលនឹងកើតមានឡើងនៅខែកក្កដា ឆ្នាំ២០២៣ ។ បាតុភូតនេះនឹងបង្កឱ្យភ្លៀងធ្លាក់តិចជាងមុន មានគ្រោះរាំងស្ងួត សីតុណ្ហភាពកើនឡើង និងធ្វើឱ្យទិន្នផលដំណាំកសិកម្មខូចខាតផងដែរ ។

លោក ស៊ុមផន អាយុ៤១ឆ្នាំ ជាកសិករធ្វើស្រែម្នាក់រស់នៅស្រុកផិម៉ាយ ខេត្តនគរាជសីម៉ា រៀបរាប់ថា នៅឆ្នាំ២០២៣ នេះ លោកបានចំណាយដើមទុនទិញស្រូវពូជផ្កាម្លិះមកដាំដុះនៅលើផ្ទៃដីចំនួន៣រ៉ៃ ហើយបច្ចុប្បន្ន វាបានដុះលូតលាស់ជាបណ្តើរៗហើយ ។ ប៉ុន្តែលោកក៏ចាប់ផ្តើមជួបបញ្ហាគ្មានភ្លៀងធ្លាក់ ដែលបណ្តាលឱ្យដើមស្រូវដែលបានដាំដុះទាំងអស់ខ្វះខាតទឹកជាខ្លាំង ដោយសារក្នុងស្រែរបស់លោកគ្មានទឹកហូរឆ្លងកាត់ទេ ។ លោកបន្តថា លោកមានតែរង់ចាំឱ្យទឹកភ្លៀងធ្លាក់មកតាមរដូវកាលប៉ុណ្ណោះ ហើយប្រសិនបើរយៈពេល១ខែ ទៅ២ខែទៀត នៅតែគ្មានភ្លៀងធ្លាក់នោះ វានឹងធ្វើឱ្យដំណាំស្រូវទាំងអស់របស់លោកខូចខាតជាមិនខាន ។

លោក ស៊ុមផន បន្ថែមទៀតថា លោកក៏មិនបានដាក់ផែនការទប់ស្កាត់នឹងគ្រោះរាំងស្ងួតទេ ពីព្រោះកាលពីប៉ុន្មានឆ្នាំកន្លងមក គ្មានបញ្ហាគ្រោះរាំងស្ងួតទេ ហើយនៅស្រុករបស់លោកតែងមានភ្លៀងធ្លាក់គ្រប់រដូវ ។ ប៉ុន្តែនៅឆ្នាំ២០២៣ នេះ ក្រោយពីរដ្ឋាភិបាលបានប្រកាសប្រាប់កសិករឱ្យត្រៀមខ្លួនទប់ស្កាត់បាតុភូតអេលនីណូ ឬគ្មានភ្លៀងធ្លាក់នៅពាក់កណ្តាលខែកក្កដា ឆ្នាំ២០២៣ លោកក៏មានកង្វល់ជាខ្លាំង ហើយខ្លាចថា សំណាបរបស់លោកនឹងងា.ប់ទាំងអស់ ។ ម្យ៉ាងទៀត លោកមិនដឹងថា ត្រូវបូមទឹកពីណាមកដាក់ក្នុងស្រែទេ ព្រោះស្រែរបស់លោកគ្មានប្រភពទឹក ។ ហេតុនេះ មានតែបណ្តោយឱ្យសំណាបងា.ប់ប៉ុណ្ណោះ ៕ ប្រភព ៖ News Work Point