ប្រទេសថៃ ៖ អ្នកប្រើប្រាស់ហ្វេសប៊ុកជនជាតិថៃម្នាក់ឈ្មោះ «Num tip» បានបង្ហោះរូបភាពជណ្តើរយន្តខូចនៅត្រង់បរិវេណឡើងទៅកាន់ជាន់ទី២ ក្នុងផ្សារទំនើបល្បីមួយកន្លែងនៅតំបន់បាងណា (Bang Na) ទីក្រុងបាងកក ។ ប៉ុន្តែសំណាងល្អ មិនមានអ្នកណាម្នាក់មានគ្រោះថ្នាក់ទេ ។

ចំណែកអ្នកប្រើប្រាស់ហ្វេសប៊ុកម្នាក់ទៀតឈ្មោះ «Natnathakrit Khajorndechasak» ក៏បានបង្ហោះរូបភាព និងវីដេអូហេតុការណ៍ជណ្តើរយន្តខូចផងដែរ ដើម្បីជាការដាស់តឿនដល់ពលរដ្ឋថៃ និងភ្ញៀវទេសចរដែលមកកាន់ផ្សារទំនើបនេះឱ្យប្រយ័ត្នខ្លួន ។ អ្នកលេងហ្វេសប៊ុករូបនេះនិយាយថា ៖ «យើងត្រូវប្រុងប្រយ័ត្នគ្រប់ពេលវេលា ហើយខ្ញុំកំពុងតែជជែកជាមួយអតិថិជន ស្រាប់តែជណ្តើរយន្តបាក់នៅចំពោះមុខតែម្តង ។ វាល្អហើយដែលបងប្រុសម្នាក់នោះលោតឡើងមកខាងលើទាន់ពេលវេលា» ។

វាជាហេតុការណ៍មួយគួរឱ្យភ្ញាក់ផ្អើលបំផុតដែលបានកើតឡើងក្នុងផ្សារទំនើបមួយកន្លែងនៅប្រទេសថៃ ដោយសារតែជណ្តើរយន្តក្នុងផ្សារនេះគ្មានសុវត្ថិភាពសម្រាប់អ្នកប្រើប្រាស់ រហូតធ្វើឱ្យមនុស្សនៅក្បែរនោះតក់ស្លុត ព្រោះឃើញជណ្តើរយន្តបាក់នៅចំពោះមុខ ។ ក្រោយមក ភ្នាក់ងារជំនាញក៏បានមកត្រួតពិនិត្យរកមូលហេតុដែលបណ្តាលឱ្យជណ្តើរយន្តបាក់ផងដែរ ។

ក្រោយពីព័ត៌មាននេះបានបង្ហោះក្នុងបណ្តាញសង្គមមិនយូរប៉ុន្មាន ក៏មានអ្នកលេងបណ្តាញសង្គមជាច្រើននាក់ចូលមកបញ្ចេញយោបល់ និងបានចែកចាយព័ត៌មាននេះប្រមាណ២,៣ពាន់លើក ។

គួរបញ្ជាក់ថា កាលពីថ្ងៃទី២៩ ខែមិថុនា កន្លងមក មានស្ត្រីម្នាក់បានជាប់ជើងក្នុងជណ្តើរយន្តនៅអាកាសយានដ្ឋានដនមឿង ប្រទេសថៃ ខណៈរូបនាងបម្រុងធ្វើដំណើរទៅខេត្តនគរស្រ៊ីថាម៉ារ៉ាជ ហើយបណ្តាលឱ្យនាងដាច់ជើងខាងឆ្វេងភ្លាមៗ ដែលធ្វើឱ្យអ្នកឃើញហេតុការណ៍នេះភ័យយ៉ាងខ្លាំង ។

ដូចគ្នានេះ កាលពីថ្ងៃទី១៩ ខែមិថុនា ក៏មានគ្រោះថ្នាក់ដោយសារជណ្តើរយន្តនៅអាកាសយានដ្ឋានដនមឿងផងដែរ ដោយអ្នកប្រើប្រាស់ TikTok ម្នាក់ឈ្មោះ zjbambam បានបង្ហោះហេតុការណ៍កូនប្រុសរបស់ខ្លួនកៀបជើងក្នុងជណ្តើរយន្ត ដែលបណ្តាលឱ្យរងរបួសជើង និងដេរអស់១១ថ្នេរ ៕ ប្រភព ៖ Thairath

បរទេស៖ ក្រុមហ៊ុន Goldman Sachs របស់អាមេរិក បានព្យាករណ៍ថា ឥណ្ឌានឹងក្លាយជាមហាអំណាចសេដ្ឋកិច្ចទីពីររបស់ពិភពលោកនៅឆ្នាំ ២០៧៥ ដោយវ៉ាដាច់អាល្លឺម៉ង់ ជប៉ុន និងសហរដ្ឋអាមេរិក។
យោងតាមរបាយការណ៍ចុងក្រោយរបស់ Goldman Sachs (USA) ក្នុងឆ្នាំ ២០៧៥ បានឱ្យដឹងថា GDP របស់ប្រទេសចិននឹងកើនឡើងដល់ ៥៧ ម៉ឺនលានដុល្លារ និងជាសេដ្ឋកិច្ចដ៏ធំបំផុតនៅលើពិភពលោក។ ខណៈដែលប្រទេសឥណ្ឌាមាន ៥២.៥ ម៉ឺន លានដុល្លារ និងសហរដ្ឋអាមេរិកមាន ៥១.៥ ម៉ឺនលានដុល្លារ។

បច្ចុប្បន្នឥណ្ឌាគឺជាប្រទេសដែលមានសេដ្ឋកិច្ចធំជាងគេទីប្រាំរបស់ពិភពលោកដែលមានផលិតផលក្នុងស្រុកសរុបចំនួន ៣.៥ ម៉ឺនលានដុល្លារ ដោយតាមពីក្រោយសហរដ្ឋអាមេរិក ចិន អាល្លឺម៉ង់ និងជប៉ុន។ ក្រុមហ៊ុន Goldman Sachs ក៏បានពន្យល់ទៀតថា បន្ថែមពីលើចំនួនប្រជាជនដ៏ច្រើនសន្ធឹកសន្ធាប់ ឥណ្ឌាក៏មានភាពជឿនលឿនជាច្រើននៅក្នុងរបកគំហើញ បច្ចេកវិទ្យា ផលិតភាពការងារ និងការវិនិយោគផងដែរ។

លោក Santanu Sengupta សេដ្ឋវិទូនៅក្រុមហ៊ុន Goldman Sachs របស់អាមេរិក បាននិយាយថា “ក្នុងរយៈពេលពីរទសវត្សរ៍ខាងមុខ អនុបាតភាពអាស្រ័យរបស់ឥណ្ឌានឹងស្ថិតក្នុងចំណោមកម្រិតខ្ពស់បំផុតបើប្រៀបធៀបទៅនឹងសេដ្ឋកិច្ចផ្សេងទៀតនៅក្នុងតំបន់” ។ លោកក៏បានបន្តទៀតថា គន្លឹះក្នុងការបង្កើនសក្តានុពលពីកំណើនប្រជាជនយ៉ាងឆាប់រហ័សគឺការបង្កើនអត្រាចូលរួមនៃកម្លាំងពលកម្ម ដែលនេះគឺជាគន្លឹះសម្រាប់ប្រទេសឥណ្ឌាក្នុងការបង្កើនសមត្ថភាពផលិតកម្ម កំណើនសេវាកម្ម និងហេដ្ឋារចនាសម្ព័ន្ធ។

រដ្ឋាភិបាលឥណ្ឌាបច្ចុប្បន្នកំពុងផ្តល់អាទិភាពដល់ការអភិវឌ្ឍន៍ហេដ្ឋារចនាសម្ព័ន្ធ ជាពិសេសការកសាងផ្លូវ និងផ្លូវដែកថ្មី។ គោលដៅថវិកានាពេលថ្មីៗនេះរបស់ពួកគេគឺដើម្បីបន្តកម្មវិធីកម្ចីគ្មានការប្រាក់រយៈពេល ៥០ ឆ្នាំជាមួយរដ្ឋាភិបាល ដើម្បីជំរុញការវិនិយោគលើហេដ្ឋារចនាសម្ព័ន្ធ។ ដូច្នេះហើយ ក្រុមហ៊ុន Goldman Sachs ជឿជាក់ថា នេះគឺជាពេលវេលាដ៏ត្រឹមត្រូវសម្រាប់វិស័យឯកជនក្នុងការរៀបចំទំហំផលិតកម្ម និងសេវាកម្ម ដើម្បីបង្កើតការងារបន្ថែម និងស្រូបយកកម្មករយ៉ាងច្រើន។

ជាមួយគ្នានេះដែរ ក្រុមហ៊ុន S&P Global និង Morgan Stanley ក៏ធ្លាប់បានព្យាករណ៍ថា ប្រទេសឥណ្ឌាកំពុងស្ថិតនៅលើផ្លូវដើម្បីក្លាយជាប្រទេសដែលមានសេដ្ឋកិច្ចធំជាងគេទី ៣ របស់ពិភពលោកនៅឆ្នាំ ២០៣០។ ផលិតផលក្នុងស្រុកសរុបរបស់ឥណ្ឌាក្នុងត្រីមាសទី ១ បានកើនឡើង ៦.១% ពីមួយឆ្នាំទៅមួយឆ្នាំ លើសពីការព្យាករណ៍របស់ Reuters ៥% ហើយកំណើនសេដ្ឋកិច្ចឆ្នាំនេះត្រូវបានគេប៉ាន់ប្រមាណថាមានរហូតដល់ ៧,២%៕ ប្រភព៖vnexpress

ប្រទេសថៃ ៖ កាលពីថ្ងៃទី១១ ខែកក្កដា ឆ្នាំ២០២៣ លោក ប្រាយុទ្ធ ចាន់អូចា បានប្រកាសចូលនិវត្តន៍នយោបាយ ព្រមទាំងលាលែងចេញពីសមាជិកគណបក្ស «រួមថៃសាងឆាតិ» ។ លោកបានផ្តាំផ្ញើទៅកាន់សមាជិកគណបក្សបន្តធ្វើសកម្មភាពនយោបាយឱ្យរឹងមាំ និងការពារជាតិ សាសនា ព្រះមហាក្សត្រ ព្រមទាំងមើលថែទាំពលរដ្ឋថៃបន្តទៀត ។ លើសពីនេះ លោកក៏បានសូមឱ្យប្រជាពលរដ្ឋជឿជាក់ និងគាំទ្រសកម្មភាពការងាររបស់គណបក្ស «រួមថៃសាងឆាតិ» ផងដែរ ។

លោក ប្រាយុទ្ធ ចាន់អូចា បានថ្លែងអំណរគុណដល់សំឡេងគាំទ្រពីពលរដ្ឋក្នុងការបោះឆ្នោតជ្រើសរើសសមាជិកសភាតំណាងរាស្ត្រកន្លងមក រហូតធ្វើឱ្យគណបក្ស «រួមថៃសាងឆាតិ» ទទួលបានសំឡេងច្រើនស្ថិតក្នុងលំដាប់ទី៣ របស់ប្រទេសថៃ ហើយគណបក្សនេះទទួលបានអាសនៈក្នុងសមាជិកសភាតំណាងរាស្ត្រចំនួន៣៦រូប ។ ហេតុនេះ ចាត់ទុកថា វាជាចំនួនមិនតិចទេ សម្រាប់គណបក្សនយោបាយទើបបង្កើតថ្មី ។

ក្នុងឋានៈលោកជានាយករដ្ឋមន្ត្រីប្រទេសថៃ ដែលកាន់តំណែងអស់រយៈពេល៩ឆ្នាំមកហើយ លោក ប្រាយុទ្ធ ចាន់អូចា បញ្ជាក់ថា លោកបានបំពេញការងារដោយការព្យាយាម និងអស់ពីសមត្ថភាពដើម្បីការពារជាតិ សាសនា ព្រះមហាក្សត្រ និងផលប្រយោជន៍របស់ពលរដ្ឋ ។ លោកទទួលបានជោគជ័យលើផ្នែកជាច្រើនដូចជា ការអភិវឌ្ឍហេដ្ឋារចនាសម្ព័ន្ធ, ការបង្កើនល្បឿនវិនិយោគពីក្រៅប្រទេសក្នុងតំបន់សេដ្ឋកិច្ច, គាំទ្រការស្រាវជ្រាវ និងអភិវឌ្ឍន៍ និងការទប់ស្កាត់ជំងឺឆ្លងរាតត្បាត ជាដើម ។

លោក ប្រាយុទ្ធ ចាន់អូចា បន្តថា លោកបានប្រឹងប្រែងយ៉ាងខ្លាំងដើម្បីធ្វើឱ្យប្រទេសជាតិរឹងមាំគ្រប់វិស័យ មានស្ថេរភាព សន្តិភាព និងពុះពរគ្រប់ឧបសគ្គទាំងក្នុងប្រទេស និងក្រៅប្រទេស រហូតសម្រេចបានគោលដៅគ្រប់ផ្នែក ។ ចុងក្រោយ លោកបានផ្តាំផ្ញើទៅកាន់រដ្ឋាភិបាលថ្មីឱ្យខិតខំអភិវឌ្ឍន៍ប្រទេសថៃបន្តទៀត ៕ ប្រភព ៖ beartai BRIEF

ប្រទេសថៃ ៖ នៅថ្ងៃទី១១ ខែកក្កដា លោក Pita Limjaroenrat ក្នុងឋានៈជាមេដឹកនាំគណបក្ស និងបេក្ខជននាយករដ្ឋមន្ត្រីមកពីគណបក្សកាវក្លៃ បានបង្ហោះវីដេអូមួយថា មុនពេលបោះឆ្នោតនាយករដ្ឋមន្ត្រី នាថ្ងៃទី១៣ ខែកក្កដា ឆ្នាំ២០២៣ សូមផ្តល់ឱកាសឱ្យប្រទេសថៃមានរដ្ឋាភិបាលទទួលបានសំឡេងភាគច្រើនស្របតាមឆន្ទៈរបស់ពលរដ្ឋ និងប្រជាធិបតេយ្យ ។

លោក Pita Limjaroenrat បញ្ជាក់ថា កាលពីថ្ងៃទី១៤ ខែឧសភា ឆ្នាំ២០២៣ គឺជាថ្ងៃដែលបងប្អូនពលរដ្ឋបង្ហាញពីឆន្ទៈរបស់ខ្លួនតាមរយៈសន្លឹកឆ្នោត ដោយបានជ្រើសយកគណបក្សកាវក្លៃក្នុងសំឡេងឆ្នោតដ៏ច្រើនលើសលប់ ហើយធ្វើឱ្យយើងក្លាយជាគណបក្សលំដាប់ទី១ ក្នុងសភាតំណាងរាស្ត្រ និងមានសមាជិកសភាតំណាងរាស្ត្រចំនួន១៥២នាក់ ។

នេះបញ្ជាក់ឱ្យឃើញថា ពលរដ្ឋនៅទូទាំងប្រទេសត្រូវការឱ្យប្រទេសថៃមិនដូចពេលមុន ហើយខ្ញុំ និងគណបក្សកាវក្លៃបាននាំមុខបង្កើតរដ្ឋាភិបាល ។ យើងបានរួបរួមគណបក្សនយោបាយចំនួន៨ ឬស្មើ៧២% នៃអ្នកមានសិទ្ធិបោះឆ្នោត ។ ជាធម្មតា រដ្ឋាភិបាលចម្រុះដឹកនាំដោយគណបក្សកាវក្លៃនឹងបានដឹកនាំប្រទេស និងដោះស្រាយបញ្ហារបស់ពលរដ្ឋ ប៉ុន្តែមកដល់ថ្ងៃទី១១ ខែកក្កដា គឺរយៈពេលជិត២ខែហើយក្រោយការបោះឆ្នោត ដែលការបោះឆ្នោតជ្រើសរើសនាយករដ្ឋមន្ត្រីទើបតែមកដល់ ហើយយើងត្រូវរង់ចាំការសម្រេចចិត្តរបស់សមាជិកព្រឹទ្ធសភាថា តើការបង្កើតរដ្ឋាភិបាលនឹងស្របតាមឆន្ទៈរបស់ពលរដ្ឋដែរឬអត់ ?

ថ្ងៃនេះ ច្បាស់លាស់ថា ប្រទេសថៃស្ថិតក្នុងនយោបាយមិនប្រក្រតី ហើយអំណាចជាអ្នកតំណាងឱ្យពលរដ្ឋតាមរយៈការបោះឆ្នោតបានរលំម្តងហើយម្តងទៀត ដោយសារផ្លូវច្បាប់ ។ ភាពមិនប្រក្រតីនេះបណ្តាលមកពីរដ្ឋធម្មនុញ្ញឆ្នាំ២០១៧ ហើយនៅថ្ងៃនេះ វានៅជាមួយយើងដោយមិនអាចបដិសេធបាន ។ ប៉ុន្តែនេះជាឱកាសរបស់ប្រទេសថៃ ដែលពួកគេនឹងត្រឡប់មករកភាពប្រក្រតីខាងនយោបាយម្តងទៀត ដោយផ្តល់ឱកាសឱ្យប្រទេសថៃមានរដ្ឋាភិបាលស្របច្បាប់ និងឈានទៅដោះស្រាយបញ្ហាប្រទេសថៃតាមតម្រូវការរបស់ពលរដ្ឋ ដោយផ្តល់ឱកាសឱ្យប្រទេសថៃវិលមកកាន់មាគ៌ានយោបាយសភាដែលពលរដ្ឋជឿទុកចិត្ត និងអាចដាក់ក្តីសង្ឃឹមបាន ។

យើងត្រូវផ្តល់ឱកាសឱ្យប្រទេសថៃឆ្ពោះទៅរកលទ្ធភាពថ្មីៗ ប្រាក់ឈ្នួលសមរម្យ សេដ្ឋកិច្ចរីកចម្រើន បង្កើតសង្គមមួយដែលមនុស្សមានសិទ្ធិស្មើគ្នា និងមានច្បាប់គ្រប់គ្រងសិទ្ធិសេរីភាព ។ ការបោះឆ្នោតជ្រើសរើសនាយករដ្ឋមន្ត្រីថៃ នឹងប្រព្រឹត្តនាថ្ងៃទី១៣ ខែកក្កដា ឆ្នាំ២០២៣ ដែលវាមិនមែនជាការជ្រើសរើសលោក Pita Limjaroenrat ហើយមិនមែនជាការជ្រើសរើសគណបក្សកាវក្លៃ ប៉ុន្តែជាការជ្រើសរើសដើម្បីបញ្ជាក់ថា ប្រទេសថៃត្រូវឆ្ពោះទៅមុខតាមបែបប្រជាធិបតេយ្យ ដូចគ្នានឹងប្រទេសប្រកាន់លទ្ធិប្រជាធិបតេយ្យនៅទូទាំងពិភពលោក ។

នេះជាភារកិច្ចរួមគ្នារបស់យើងទាំងអស់ក្នុងឋានៈជាសមាជិករដ្ឋសភា អ្នកកាន់អំណាចជំនួសពលរដ្ឋថៃនៅទូទាំងប្រទេស ។ ក្នុងឱកាសនេះ ខ្ញុំសូមផ្តាំផ្ញើទៅកាន់សមាជិកសភា និងសមាជិកព្រឹទ្ធសភាគ្រប់រូបថា លោកអាចមិនចូលចិត្តគោលនយោបាយរបស់យើង ប៉ុន្តែពួកលោកអាចពិនិត្យមកលើខ្ញុំបាន វាយប្រហារខ្ញុំបាន ហើយអាចបោះឆ្នោតទម្លាក់ខ្ញុំចេញពីតំណែងក៏បាន ប៉ុន្តែការបោះឆ្នោតឱ្យរដ្ឋាភិបាលមានសំឡេងភាគច្រើន គឺជាការផ្តល់ឱកាសឱ្យប្រទេសថៃឆ្ពោះទៅមុខ ។

ក្នុងឱកាសនេះ ខ្ញុំសូមផ្តាំទៅកាន់ពលរដ្ឋថា យើងបានឆ្លងកាត់ការបោះឆ្នោតរួចហើយ ប៉ុន្តែបេសកកម្មមិនទាន់បញ្ចប់ទេ ។ ហេតុនេះ ការផ្លាស់ប្តូរប្រទេសមិនអាចកើតឡើងទេ បើគ្មានរដ្ឋាភិបាលទទួលសំឡេងភាគច្រើន ដែលនឹងដឹកនាំប្រទេសទៅថ្ងៃអនាគត ។ ខ្ញុំត្រៀមខ្លួនធ្វើជានាយករដ្ឋមន្ត្រីថៃរបស់អ្នកគ្រប់គ្នា មិនថាលោកនឹងជ្រើសរើសគណបក្សណា មានគំនិតផ្នែកនយោបាយបែបណា និងចង់បានសង្គមបែបណា គឺខ្ញុំនឹងធ្វើជានាយករដ្ឋមន្ត្រីគ្រប់គ្រងប្រទេសថៃ ដើម្បីសម្រេចក្តីសុបិនរបស់ពលរដ្ឋគ្រប់គ្នា ។

បើនេះជាអ្វីដែលលោកចង់ឃើញ សូមផ្តល់ឱកាសឱ្យប្រទេសថៃបានឆ្ពោះទៅមុខគ្រប់គ្រងដោយរដ្ឋាភិបាលចម្រុះចំនួន៨គណបក្ស ដែលដឹកនាំដោយនាយករដ្ឋមន្ត្រីឈ្មោះ Pita Limjaroenrat ៕ ប្រភព ៖ matichon