បងប្អូនអ្នកជិះ Prius សូមប្រុងប្រយ័ត្ន! ឥឡូវនេះក្រុមហ៊ុនតូយ៉ូតា បានប្រកាសថា រថយន្ត Prius ប្រមាណជាង ២៤ម៉ឺនគ្រឿង ត្រូវបាន recall ឬ ប្រមូលចូលវិញជាបន្ទាន់ដើម្បីជួសជុល ក្រោយគេបានពិនិត្យឃើញមានបញ្ហាពាក់ព័ន្ធនឹងប្រព័ន្ធបញ្ជារទ្វារខាងក្រោយរបស់វា។ នេះបើតាមការចុះផ្សាយដោយទីភ្នាក់ងារព័ត៌មាន Nippon របស់ជប៉ុន កាលពីថ្ងៃទី២៨ ខែមករា ឆ្នាំ២០២៦។

យោងតាមប្រភពខាងលើ ក្រុមហ៊ុន Toyota Motor Corporation បានប្រកាសប្រមូលរថយន្ត Prius hybrid ប្រមាណ 240,000 គ្រឿង ដែលផលិតរវាងថ្ងៃទី 24 ខែវិច្ឆិកា ឆ្នាំ 2023 និងថ្ងៃទី 4 ខែវិច្ឆិកា ឆ្នាំ 2025 បន្ទាប់ពីរកឃើញបញ្ហាដែលអាចអនុញ្ញាតឱ្យទ្វារក្រោយរបស់វារបើកដោយខ្លួនឯង ក្នុងអំឡុងពេលដែលរថយន្តកំពុងបើកបរលើផ្លូវ។

ក្នុងករណីអាក្រ.ក់បំផុត ទ្វារខាងក្រោយអាចបើកដោយស្វ័យប្រវត្តិ ខណៈពេលដែលរថយន្តកំពុងធ្វើចលនា ដែលទាំងនេះបណ្ដាលមកពី switch របស់វាត្រូវបានបង្កើតឡើងនៅក្នុងខ្សែតែមួយជាមួយកុងតាក់បើក-បិទទ្វារ ដែលជាកំហុសធំមួយ អាចអនុញ្ញាតឱ្យទឹកចូលទៅក្នុងប្រព័ន្ធអគ្គិសនីនៅជិតទ្វារក្រោយនៅពេលលាងសម្អាត ឬមានភ្លៀងធ្លាក់។

រហូតមកដល់ពេលនេះ មានឧបទ្ទវហេតុពីរហើយដែលបានកើតឡើងទាក់ទងនឹងបញ្ហានេះនិងត្រូវបានរាយការណ៍នៅក្នុងប្រទេសជប៉ុន។ បច្ចុប្បន្ន ក្រុមហ៊ុនតូយ៉ូតា កំពុងអនុវត្តការងារនេះដោយមិនគិតថ្លៃសម្រាប់ម្ចាស់រថយន្ត ហើយកំពុងជូនដំណឹងដល់អតិថិជនផ្សេងៗទៀតអំពីការប្រមូលរថយន្តមកវិញ ជាមួយនឹងការណែនាំអំពីរបៀបប្រើប្រាស់បន្ត។

គួរជម្រាបថា រថយន្ត Prius ម៉ូដែល hybrid គឺជារថយន្តដ៏ពេញនិយមបំផុតមួយរបស់ក្រុមហ៊ុន Toyota នៅទូទាំងពិភពលោក។ វាត្រូវបានគេស្គាល់ថាជាប្រភេទរថយន្តដែលសន្សំសំចៃប្រេងឥន្ធនៈ និងការទទួលយកបច្ចេកវិទ្យាកូនកាត់តាំងពីដំបូង។ ទោះជាយ៉ាងណាក៏ដោយ ដូចក្រុមហ៊ុនផលិតរថយន្តផ្សេងៗទៀតដែរ ក្រុមហ៊ុន Toyota បានប្រឈមមុខនឹងការប្រមូលរថយន្តមកវិញជាច្រើនម៉ឺនគ្រឿងក្នុងរយៈពេលប៉ុន្មានឆ្នាំមកនេះ ជាពិសេសពាក់ព័ន្ធនឹងម៉ូដែល និងប្រព័ន្ធផ្សេងៗ ដើម្បីធានាសុវត្ថិភាពដល់អ្នកប្រើប្រាស់៕

ឡាសវីហ្គាស៖ ក្រុមហ៊ុន LG Electronics កាលពីថ្មីៗនេះ បានបើកបង្ហាញនូវរ៉ូបូតក្នុងផ្ទះ ដើរដោយបច្ចេកវិទ្យា AI ជំនាន់ថ្មីមួយប្រភេទ មានសមត្ថភាពបោសជូតផ្ទះ បោកគក់ លាងចាន និងអាចចម្អិនម្ហូបអាហារបានមួយឆ្ងាញ់ ស័ក្តិសមបំផុតសម្រាប់អ្នករស់នៅម្នាក់ឯង ឬមិនចូលចិត្តធ្វើការងារផ្ទះ ទិញតែមួយគ្រឿងនេះទុក ចំណេញពេលចំណេញកម្លាំងតែម្ដង។

តាមរយៈការធ្វើបទបង្ហាញនៅក្នុងកម្មវិធីតាំងពិព័រណ៍គ្រឿងអេឡិចត្រូនិច ប្រចាំឆ្នាំ 2026 នៅទីក្រុងឡាសវេហ្គាស ក្រុមហ៊ុន LG បានឲ្យដឹងថា មនុស្សយន្តមេផ្ទះនេះមានឈ្មោះថា LG CLOiD ដែលជាមនុស្សយន្តក្នុងផ្ទះដំណើរការដោយ AI ថ្មីមួយ ត្រូវបានរចនាឡើងដើម្បីជួយសម្រួលកិច្ចការផ្ទះប្រចាំថ្ងៃ និងជំរុញចក្ខុវិស័យរបស់ក្រុមហ៊ុនអំពីអនាគតដែល «គ្មានការងារផ្ទះ» របស់មនុស្ស។

មនុស្សយន្តឆ្លាតវៃមួយប្រភេទនេះ ត្រូវបានបំពាក់ដោយ ThinQ ដែលជា AI ជំនាន់ចុងក្រោយបង្អស់ អាចរៀនសូត្រពីទម្លាប់រស់ប្រចាំថ្ងៃរបស់មនុស្ស ចេះបត់បែនបាន និងចល័តដោយស្វ័យប្រវត្តិ។ ដូច្នេះមិនថាការងារចម្អិនម្ហូប ដាក់ខោអាវចូលម៉ាស៊ីនបោកគក់ទំនើប បត់ រៀបចំទុកដាក់ និងធ្វើការងារផ្សេងៗទៀតនោះទេ គឺមេផ្ទះតូចនេះអាចធ្វើបានទាំងអស់។

ជាមួយនឹងការរចនាឲ្យមានដៃ២ ជើង២ ម្រាមដៃ១០សម្រាប់ចាប់កាន់ ភ្នែកទាំងគូរដែលអាចស្កេនមើលវត្ថុជុំវិញខ្លួនក្នុងកម្រិត 3D មនុស្សយន្តនេះអាចដើរជៀសវាងឧបសគ្គដោយខ្លួនឯង ហើយពិសេសនោះ អាចធ្វើចលនានិងសកម្មភាពផ្សេងៗដូចជាមនុស្សពិតៗអញ្ចឹង។ កាន់តែពិសេស យើងអាចធ្វើការបញ្ជាទៅលើវាតាមរយៈសម្លេង ឬកម្មវិធីលើទូរស័ព្ទដៃពីចម្ងាយផងដែរ។

យ៉ាងណាសូមបញ្ជាក់ថា បើទោះជាមិនទាន់បានប្រកាសជាផ្លូវការអំពីកាលបរិច្ឆេទចេញលក់ ឬតម្លៃជាក់លាក់របស់រ៉ូបូតថ្មីនេះ ប៉ុន្តែក្រុមហ៊ុន LG បានទាក់ទាញចំណាប់អារម្មណ៍របស់មនុស្សម្នាជាច្រើននៅជុំវិញពិភពលោក ចំពោះការច្នៃបង្កើតបច្ចេកវិទ្យាដ៏អស្ចារ្យក្នុងការផ្លាស់ប្តូររបៀបនៃការរស់នៅរបស់មនុស្សនៅក្នុងជីវិតប្រចាំថ្ងៃ៕

ញូវយ៉ក ៖ ក្រុមហ៊ុនលក់រាយតាមអ៊ីនធឺណិតខ្នាតយក្សរបស់សហរដ្ឋអាមេរិក Amazon កាលពីថ្ងៃពុធនេះបាននិយាយថា ពួកគេត្រៀមនឹងកាត់បន្ថយការងារពីមនុស្សចំនួន ១៦,០០០ នាក់នៅទូទាំងពិភពលោក ដើម្បីធ្វើឲ្យប្រសើរឡើងនូវបច្ចេកវិទ្យា AI ក្នុងការចូលមកបំពេញតួនាទីជំនួសមនុស្ស។ នេះបើតាមការចេញផ្សាយរបស់ BBC នៅថ្ងៃទី២៨ ខែមករា។

បន្ទាប់ពីបានបញ្ឈប់បុគ្គលិកចំនួន ១៤ ០០០ នាក់កាលពីខែ តុលា ២០២៥ មក នៅខែមករា ២០២៦ នេះ ក្រុមហ៊ុនលក់ទំនិញអនឡាញ Amazon បានបន្តកាត់បន្ថយបុគ្គលិកចំនួន ១៦ ០០០ នាក់ថែមទៀត ដោយបញ្ចូលជំនួសវិញនូវបច្ចេកវិទ្យាបញ្ញាសិប្បនិម្មិត ( AI ) ។ អាស្រ័ដោយបច្ចេកវិទ្យាថ្មី Amazon អាចបន្ថយចំណាយទាំងលើកម្មករផង និងបន្ថែមប្រសិទ្ធភាពការងារផង ។

កាលពីខែកក្កដា ដល់ ខែកញ្ញា ២០២៥ Amazon លក់ទំនិញចេញបាន ១៨០,០០០ លានដុល្លារ និង ចំណេញបាន ២១,០០០ លានដុល្លារ។ Amazon បាននិយាយថា ការផ្លាស់ប្តូរនេះគឺជាផ្នែកមួយនៃកិច្ចខិតខំប្រឹងប្រែងកាន់តែទូលំទូលាយ ដើម្បីកាត់បន្ថយស្រទាប់នៃការគ្រប់គ្រង កាត់បន្ថយថ្លៃដើម និងបង្កើនប្រសិទ្ធភាព ខណៈដែលក្រុមហ៊ុនកំពុងពឹងផ្អែកកាន់តែខ្លាំងឡើងលើឧបករណ៍ AI ដើម្បីធ្វើស្វ័យប្រវត្តិកម្មកិច្ចការប្រចាំថ្ងៃ និងដំណើរការធ្វើការសម្រេចចិត្ត។

នាយកប្រតិបត្តិក្រុមហ៊ុនបានអះអាងថា ការរីកចម្រើននៃបញ្ញាសិប្បនិម្មិត ឬ AI អនុញ្ញាតឱ្យក្រុមការងារដំណើរការជាមួយមនុស្សតិចជាងមុន ខណៈពេលដែលវារក្សា ឬបង្កើនផលិតភាពបានច្រើនជាងមនុស្ស។ ទោះបីជាមានការបញ្ឈប់ការងារក៏ដោយ ក្រុមហ៊ុន Amazon បាននិយាយថា ខ្លួននឹងបន្តជួលបុគ្គលិកនៅក្នុងវិស័យកំណើនសំខាន់ៗមួយចំនួន ការគ្រប់គ្រងទិន្នន័យពីចម្ងាយ ការអភិវឌ្ឍAI រួមទាំងតួនាទីលក់រាយ និងភស្តុភារផ្សេងទៀតដែលបានជ្រើសរើស។

ការកាត់បន្ថយការងារនេះ ឆ្លុះបញ្ចាំងពីនិន្នាការកាន់តែទូលំទូលាយនៅទូទាំងសាជីវកម្មរបស់សហរដ្ឋអាមេរិក ដែលក្រុមហ៊ុនធំៗកំពុងកាត់បន្ថយបុគ្គលិក ហើយផ្ដល់ការវិនិយោគយ៉ាងច្រើនលើបច្ចេកវិទ្យា AI ដើម្បីជំរុញប្រសិទ្ធភាព ចំពេលមានភាពមិនប្រាកដប្រជាផ្នែកសេដ្ឋកិច្ច និងសម្ពាធពីវិនិយោគិន ដើម្បីបង្កើនប្រាក់ចំណេញក្នុងក្រុមហ៊ុន៕

ទីក្រុងសេប៊ូ ៖ លោកស្រី Theresa P. Lazaro រដ្ឋមន្ត្រីក្រសួងការបរទេសហ្វីលីពីន មានការភ្ញាក់ផ្អើលយ៉ាងខ្លាំងនៅឯកិច្ចប្រជុំចង្អៀតអាស៊ាន ដោយក្នុងអំឡុងពេលធ្វើសន្និសីទសារព័ត៌មាន លោកស្រីមិនឃើញមានទីភ្នាក់ងារព័ត៌មានណាមួយសួរនាំអំពីជម្លោះរវាងកម្ពុជា-ថៃឡើយ។ លោកស្រីបាននិយាយដោយងឿងឆ្ងល់ថា «តើការប៉ះទង្គិចគ្នារវាងកម្ពុជា និងថៃមិនធំល្មមសម្រាប់ការអើពើទេឬ?»

យោងតាមការចុះផ្សាយរបស់គេហទំព័រព័ត៌មានអន្តរជាតិ The Star លោកស្រី Lazaro បាននិយាយទៅកាន់អ្នកយកព័ត៌មានក្នុងព្រឹត្តិការនៃកិច្ចប្រជុំចង្អៀតអាស៊ានថា “ពួកអ្នកផ្តោតតែលើក្រមប្រតិបត្តិ និងបញ្ហាមីយ៉ាន់ម៉ាប៉ុណ្ណោះ។ ខ្ញុំសង្ឃឹមថាអ្នកនឹងសួរអំពីបញ្ហាផ្សេងទៀត ដូចជាអំពីព្រំដែនថៃ និងកម្ពុជា។ លោកស្រីបានចោ.ទសួរដោយត្រង់ថា តើជម្លោះរវាងកម្ពុជា និងថៃ ដែលបានឆក់យកជីវិតមនុស្សអស់ជាច្រើននាក់ វាមិនធំល្មមទេមែនទេ?

ទោះជាយ៉ាងណា លោកស្រី Lazaro ក៏បានឆ្លៀតគូសបញ្ជាក់ពីតួនាទីដ៏សំខាន់របស់ក្រុមអ្នកសង្កេតការណ៍អាស៊ាន (AOT) ក្នុងការត្រួតពិនិត្យការអនុវត្តបទឈប់បា.ញ់រវាងកម្ពុជានិងថៃ ដោយផ្អែកលើអាណត្តិរបស់ខ្លួនផងដែរ។ ជាមួយគ្នានោះ លោកស្រីរដ្ឋមន្រ្តីបានធ្វើការស្វាគមន៍បន្ថែមទៀត ចំពោះការពង្រីកអាណត្តិរបស់ AOT និងបានកត់សម្គាល់ពីជំហានដែលបានធ្វើឡើងដោយប្រទេសម៉ាឡេស៊ី ដើម្បីធានាបាននូវការផ្លាស់ប្តូរដោយរលូននៃតួនាទីសម្របសម្រួលលើ AOT ទៅឱ្យប្រទេសហ្វីលីពីនជាប្រធានអាស៊ាន”។

គួរបញ្ជាក់ថា ជម្លោះព្រំដែនរវាងកម្ពុជា-ថៃ បានក្លាយជាប្រធានបទសំខាន់មួយនៅក្នុងប្លុកអាស៊ាន បន្ទាប់ពីការប៉ះទង្គិចគ្នាដោយអាវុធពីរជុំបានផ្ទុះឡើងនៅក្នុងខែកក្កដា និងខែធ្នូ។ យ៉ាងណាក៏ដោយ បទឈប់បា.ញ់គ្នានៅថ្ងៃទី ២៧ ខែធ្នូ បច្ចុប្បន្ននៅតែផុយស្រួយខ្លាំង ដោយមានផ្នែកជាងដប់នៃទឹកដីរបស់កម្ពុជាបច្ចុប្បន្នកំពុងស្ថិតនៅក្រោមការកាន់កាប់របស់យោធាថៃ។

ដូចគ្នានេះដែរ គេសង្កេតឃើញមានការប្រឈមមុខដាក់គ្នាជាច្រើនរវាងទាហានជួរមុខនៃប្រទេសទាំងពីរ ហើយយោធាថៃត្រូវបានគេរាយការណ៍ថាកំពុងជីកលេណដ្ឋានបន្ថែមទៀត និងរៀបចំបន្ទាយ ជាពិសេសនៅក្នុងតំបន់ជិតប្រាសាទព្រះវិហារ៕

ប្រទេសថៃ ៖ រោងចក្រផលិតកាំជ្រួចមួយកន្លែងនៅភូមិដងកាក់សា ឃុំរ៉ៃរុត ស្រុកដនជេឌី ខេត្តសុផាន់បុរី ប្រទេសថៃ បានផ្ទុះឆេះយ៉ាងសន្ធោសន្ធៅកាលពីវេលាម៉ោង៧និង១២នាទីព្រឹក ថ្ងៃទី៣០ ខែមករា ឆ្នាំ២០២៦ បណ្តាលឱ្យមនុស្សស្លា.ប់ រងរបួសធ្ងន់ជាច្រើននាក់ និងខូចខាតផ្ទះ១ខ្នង ។ ហេតុការណ៍នេះបង្កការភ័យស្លន់ស្លោយ៉ាងខ្លាំងដល់អ្នករស់នៅក្បែរនោះ និងអ្នកធ្វើដំណើរឆ្លងកាត់ ដោយសារសំឡេងផ្ទុះឮខ្លាំងរហូតដល់៣ស្រុក ។

ក្រោយពីទទួលដំណឹងឆេះរោងចក្រផលិតកាំជ្រួច មជ្ឈមណ្ឌលបង្ការ និងកាត់បន្ថយគ្រោះមហន្តរាយខេត្តសុផាន់បុរី បានបញ្ជូនភ្នាក់ងារពន្លត់ភ្លើង និងក្រុមសង្គ្រោះជាច្រើននាក់ ព្រមជាមួយឧបករណ៍សង្គ្រោះទៅកាន់កន្លែងកើតហេតុដើម្បីគ្រប់គ្រងស្ថានការណ៍ និងជួយជនរងគ្រោះដោយសារភ្លើងឆេះជាបន្ទាន់ ។

បើតាមការព័ត៌មានបឋម ហេតុការណ៍នេះបណ្តាលឱ្យមនុស្សស្លាប់ម្នាក់ និងរងរបួសធ្ងន់ចំនួន៣នាក់ ខណៈក្រុមសង្គ្រោះបានបញ្ជូនមនុស្សរងរបួសទៅកាន់មន្ទីរពេទ្យនៅក្បែរនោះភ្លាមៗ ។ ជាមួយគ្នានេះ ក៏មានការបិទផ្លូវនៅតំបន់ជុំវិញដើម្បីការពារកុំឱ្យកើតគ្រោះថ្នាក់បន្ថែមទៀត និងផ្តល់ភាពងាយស្រួលដល់ភ្នាក់ងារពន្លត់ភ្លើង និងក្រុមសង្គ្រោះគ្រប់គ្រងស្ថានការណ៍ ។

ចំណែកមូលហេតុបណ្តាលឱ្យឆេះរោងចក្រផលិតកាំជ្រួចមិនទាន់ដឹងនៅឡើយទេ និងស្ថិតក្រោមការស៊ើបអង្កេតយ៉ាងលម្អិតពីសមត្ថកិច្ច ថាតើរោងចក្រនេះបានទុកដាក់កាំជ្រួច ឬប្រើប្រាស់កាំជ្រួចត្រឹមត្រូវតាមច្បាប់កំណត់ដែរឬទេ ។ ក្រៅពីនេះ សមត្ថកិច្ចនឹងប្រមូលភស្តុតាង ព្រមទាំងសាក្សីនៅកន្លែងកើតហេតុដើម្បីស្រាវជ្រាវចាត់វិធានការតាមច្បាប់បន្តទៀត ។

មន្ត្រីស្ថាប័នពាក់ព័ន្ធបានជូនដំណឹងឱ្យពលរដ្ឋចៀសវាងធ្វើដំណើរមកក្បែរកន្លែងកើតហេតុ និងសុំឱ្យចូលរួមសហការផងដែរ ប្រសិនបើមានព័ត៌មានបន្ថែម ឬឃើញអ្វីគួរឱ្យសង្ស័យ ត្រូវរាយការណ៍មកអាជ្ញាធរជាបន្ទាន់ដើម្បីសុវត្ថិភាពពលរដ្ឋទាំងអស់ ៕