ប្រទេសថៃ ៖ លោក Chaturon Chaisang សមាជិកសភាតំណាងរាស្ត្ររបស់គណបក្សភឿថៃ បានលើកឡើងថា ការជជែកពិភាក្សាគ្នារវាងគណបក្សភឿថៃជាមួយគណបក្សរួមថៃសាងឆាតិ និងគណបក្ស Palang Pracharat គឺគ្មានប្រយោជន៍អ្វីទេ ។ គណបក្សភឿថៃមិនគួរធ្វើបែបនេះ កុំថាឡើយគិតចង់បង្កើតរដ្ឋាភិបាលជាមួយគណបក្សទាំងពីរ ។

គណបក្សកាវក្លៃបានប្រកាសបើកផ្លូវឱ្យគណបក្សភឿថៃដឹកនាំបង្កើតរដ្ឋាភិបាល ក្រោយពីតុលាការធម្មនុញ្ញសម្រេចដកសមាជិកភាពសភារបស់មេដឹកនាំគណបក្សកាវក្លៃ លោក Pita Limjaroenrat ។ គណបក្សកាវក្លៃថែមទាំងបានប្រកាសថា គណបក្សភឿថៃត្រូវដឹកនាំបង្កើតរដ្ឋាភិបាលដោយផ្អែកតាមសំឡេងគាំទ្ររបស់ពលរដ្ឋ និងមិនត្រូវសហការជាមួយគណបក្សផ្តាច់ការចាស់ជាដាច់ខាត ។ ប៉ុន្តែផ្ទុយទៅវិញ គណបក្សភឿថៃបានលែងដៃចោលគណបក្សកាវក្លៃ ហើយគណបក្សភឿថៃបានអញ្ជើញគណបក្សនយោបាយផ្សេងៗមកប្រជុំពិភាក្សារកដំណោះស្រាយបញ្ហានយោបាយនៅប្រទេសថៃ និងស្នើឱ្យគណបក្សទាំងនេះជួយបោះឆ្នោតគាំទ្របេក្ខជននាយករដ្ឋមន្ត្រីមកពីគណបក្សភឿថៃផងដែរ នៅថ្ងៃទី២៧ ខែកក្កដា ឆ្នាំ២០២៣ ។

កាលពីថ្ងៃទី២២ ខែកក្កដា កន្លងមក គណបក្សភឿថៃបានប្រជុំជជែកពិភាក្សាជាមួយគណបក្សនយោបាយចំនួន៣ គឺគណបក្សភូមិចៃថៃ, គណបក្សរួមថៃសាងឆាត និងគណបក្សឆាតផាត់តាណាក្លា ដើម្បីរកដំណោះស្រាយពីការជាប់គាំងនយោបាយនៅប្រទេសថៃ ។ ក្រោយមក នៅថ្ងៃទី២៣ ខែកក្កដា គណបក្សភឿថៃក៏បានអញ្ជើញគណបក្សឆាតថៃ ផាត់តាណា និងគណបក្ស Palang Pracharat មកពិភាក្សារួមគ្នាផងដែរ ។

លោក Chaturon Chaisang សមាជិកសភាតំណាងរាស្ត្ររបស់គណបក្សភឿថៃ បាននិយាយពាក់ព័ន្ធនឹងគណបក្សភឿថៃប្រជុំពិភាក្សាជាមួយគណបក្សនានាថា ៖ «ការពិភាក្សាជាមួយគណបក្សនយោបាយផ្សេងៗ បើតាមគោលការណ៍គណបក្ស វាជារឿងគួរធ្វើ ប៉ុន្តែការពិភាក្សាជាមួយគណបក្សរួមថៃសាងឆាត និងគណបក្ស Palang Pracharat គឺជារឿងដែលគណបក្សភឿថៃមិនគួរធ្វើទេ និងគ្មានប្រយោជន៍ ។ បើគណបក្សភឿថៃពិភាក្សាពីការបង្កើតរដ្ឋាភិបាលជាមួយគណបក្សទាំងពីរនេះ វាកាន់តែមិនគប្បី ដោយសារគណបក្សនយោបាយភាគច្រើនក្នុងចំណោមគណបក្សចំនួន៨ បានប្រកាសយ៉ាងច្បាស់លាស់ក្នុងអំឡុងពេលឃោសនារកសំឡេងឆ្នោតថា ពួកគេនឹងមិនចូលរួមបង្កើតរដ្ឋាភិបាលជាមួយគណបក្សទាំងពីរទេ» ។

លោក Chaturon Chaisang បន្តថា រហូតមកដល់បច្ចុប្បន្ន បើគណបក្សភឿថៃអះអាងថា ស្ថានការណ៍នយោបាយផ្លាស់ប្តូរនោះ ក៏មិនមែនជាហេតុផលដែរ ។ គណបក្សនយោបាយទាំងពីរនេះ គឺជាឧបករណ៍នៃការផ្ទេរអំណាចផ្តាច់ការតាំងពីដើមមក ហើយវាគ្មានអ្វីផ្លាស់ប្តូរទេ ។ នាពេលកន្លងមក ពលរដ្ឋថៃបានបដិសេធមិនបោះឆ្នោតគាំទ្រគណបក្សទាំងពីរនេះទេ ហើយពលរដ្ឋត្រូវការឱ្យមានរដ្ឋាភិបាលប្រជាធិបតេយ្យ និងជារដ្ឋាភិបាលមានការទទួលស្គាល់ពីពលរដ្ឋផងដែរ ៕ ប្រភព ៖ Thai news online  

បរទេស៖ យោងតាមនាយកប្រតិបត្តិ Elon Musk បានប្រកាសកាលពីថ្ងៃទី ២៣ ខែកក្កដា ថា Twitter អាចនឹងទម្លាក់រូបសញ្ញាថ្មីរបស់ខ្លួនដោយប្រើនិមិត្តសញ្ញាដែលឆ្លុះបញ្ចាំងពីម៉ាកយីហោ X Corp។

X Corp គឺជាក្រុមហ៊ុនបច្ចេកវិទ្យាថ្មីរបស់មហាសេដ្ឋី Elon Musk ដែលបានបង្កើតឡើងនៅថ្ងៃទី៩ ខែមីនា ឆ្នាំ២០២៣។ ក្រុមហ៊ុន X Corp មានតួនាទីផ្តល់សេវាធនាគារ ការដើរទិញឥវ៉ាន់ ការផ្ញើសារ ការហៅទូរសព្ទ ការកក់ ការធ្វើដំណើរ ការជួញដូរភាគហ៊ុន និងអ្វីៗជាច្រើនទៀត។ ដូច្នេះ និមិត្តសញ្ញារូបចាបរបស់ Twitter នឹងត្រូវប្តូរក្នុងពេលឆាប់ៗនេះ ប្រសិនបើនិមិត្តសញ្ញា X Corp ថ្មីល្អគ្រប់គ្រាន់ ក្រុមហ៊ុននឹងផ្សាយបន្តផ្ទាល់ទូទាំងពិភពលោកនៅយប់ថ្ងៃទី២៤ ខែកក្កដា នេះតែម្តង។

គោលបំណងដ៏ធំរបស់ Elon Musk ក្នុងការផ្លាស់ប្តូរនិមិត្តសញ្ញានេះ គឺចង់ឱ្យកម្មវិធី Twitter ប្រែក្លាយទៅជា “កម្មវិធីសម្រាប់អ្វីគ្រប់យ៉ាង” ដូចជា WeChat របស់ប្រទេសចិន។ ទោះជាយ៉ាងណាក៏ដោយ បច្ចុប្បន្នលោក Musk កំពុងមានបញ្ហាក្នុងការបញ្ចុះបញ្ចូលអ្នកប្រើប្រាស់ Twitter ធម្មតា ឱ្យទៅប្រើប្រាស់ Twitter Blue វិញ ដោយបង់ប្រាក់សម្រាប់កម្មវិធីដែលមានស្រាប់របស់វេទិកានេះ។

អ្នកប្រើប្រាស់ Twitter ធម្មតា រាប់ពាន់នាក់ត្រូវបានកំណត់ចំពោះការមើលត្រឹមតែ ១,០០០ tweets ក្នុងមួយថ្ងៃប៉ុណ្ណោះ ដែលធ្វើឱ្យអ្នកប្រើប្រាស់ទាំងនោះចង់ចាកចេញពីគេហទំព័រនេះតែម្តង។ ដូចច្នេះ ដើម្បីបញ្ច្រាសនិន្នាការ លោក Musk ក៏បានប្រកាសថាអ្នកប្រើប្រាស់ Twitter Blue អាចទទួលបានចំណែកនៃប្រាក់ចំណូលពីការផ្សាយពាណិជ្ជកម្មពីការបង្ហោះរបស់ពួកគេ៕ ប្រភព៖cafef.com

សត្វទោចថ្ពាល់លឿងត្រូវបានរកឃើញក្នុងឆ្នាំ ២០១០ ដែលមានវត្តមាននៅតាមតំបន់មួយចំនួនក្នុងប្រទេសកម្ពុជា ឡាវ និងវៀតណាម ហើយសត្វទោចថ្ពាល់លឿងអាចស្រែកហៅគ្នារហូតដល់ចម្ងាយពីរគីឡូម៉ែត្រ។

សត្វទោចថ្ពាល់លឿង ប្រើការស្រែកហៅនេះសម្រាប់ការទំនាក់ទំនង ការពារទីជម្រក និងស្វែងរកគូដើម្បីបន្តពូជ។

សត្វទោចថ្ពាល់លឿងធំពេញវ័យនិងបន្តពូជបាននៅអាយុដប់ឆ្នាំហើយអាចមានកូនជារៀងរាល់៣ទៅ៤ឆ្នាំម្តង។ ពួកវាបរិភោគផ្លែឈើជាអាហារ ពេលខ្លះស្លឹកឈើ (ខ្ចី ឬចាស់) ផ្កានិងសត្វល្អិត។ បច្ចុប្បន្នសត្វនេះ ត្រូវបានចុះក្នុង បញ្ចី សត្វ ជិត ផុត ពូជ ( IUCN Red List )។

យោងតាមរបាយការណ៍សិក្សាស្រាវជ្រាវដោយអង្គការសមាគមអភិរក្សសត្វព្រៃប្រចាំកម្ពុជាសត្វទោចថ្ពាល់លឿង មាន ចំនួន ប្រមាណ ១២០០ ក្បាលនៅដែនជម្រកសត្វព្រៃនៅខេត្តមណ្ឌលគិរី។ ប៉ុន្តែតាមទិន្នន័យសិក្សាពីតំបន់ដែនជម្រកសត្វព្រៃនិងឧទ្យានជាតិនៅខេត្តរតនគិរី ចំនួនទោចថ្ពាល់ឡើងបានបង្ហាញវត្តមានជាច្រើនក្រុមដែលវាអាចមានចំនួនច្រើនពាន់ក្បាល។

ក្រុមការងារស្រាវជ្រាវបាននិងកំពុងបន្តការសិក្សាចងក្រងទិន្នន័យ។ សត្វព្រៃទាំងនេះគឺជាសម្បត្តិធម្មជាតិដែល មិនអាចកាត់ថ្លៃបានសម្រាប់ប្រទេសកម្ពុជា និងមានតម្លៃបំផុតសម្រាប់ការអភិរក្សជីវៈចម្រុះរបស់ ពិភព លោក។

ទាំងនៅដែនជម្រកសត្វព្រៃកែវសីម៉ា និងឧទ្យានជាតិវ៉ឺនសៃ សៀមប៉ាងជាប់ព្រំប្រទល់ខេត្តស្ទឹងត្រែង និងខេត្តរតនគិរី ជាទីកន្លែងមួយដែលអ្នកទេសចរអាចមើល ឃើញសត្វទោចថ្ពាល់លឿងបាននិងកំពុងទាក់ទាញភ្ញៀវទេសចរជាតិនិងអន្តរជាតិមកទស្សនាសត្វដ៏កម្រមាននៅលើពិភពលោកនេះហើយប្រជាសហគមន៍ ក៏អាចរកចំណូលបានពីតំបន់ទេសចរណ៍តាមរយ:ការដើរជូនភ្ញៀវទស្សនាសត្វទោចថ្ពាល់លឿង និងសត្វជាច្រើនផ្សេងៗទៀត ៕

ប្រទេសថៃ ៖ កាលពីថ្ងៃទី២៣ ខែកក្កដា កន្លងមក លោក Santi Promphat អនុរដ្ឋមន្ត្រីក្រសួងហិរញ្ញវត្ថុ និងជាលេខាធិការគណបក្ស Palang Pracharat និងលោកThammanat Phromphao សមាជិកសភាខេត្តផាយ៉ាវ ព្រមទាំងលោក Pai Like សមាជិកសភាខេត្តកំផែងភេត បានរួមគ្នាធ្វើសន្និសីទសារព័ត៌មានមួយ ក្រោយពីគណបក្សភឿថៃអញ្ជើញឱ្យគណបក្សនេះពិភាក្សាអំពីការបង្កើតរដ្ឋាភិបាល ។ គណបក្ស Palang Pracharat បានបង្ហាញពីគោលជំហររបស់ខ្លួនយ៉ាងច្បាស់លាស់ក្នុងការដោះស្រាយបញ្ហានយោបាយបច្ចុប្បន្ននៅប្រទេសថៃ ។

លោក Santi Promphat លេខាធិការគណបក្ស Palang Pracharat លើកឡើងថា បច្ចុប្បន្ន យើងចាំបាច់ត្រូវតែដោះស្រាយបញ្ហាប្រទេសជាតិ ព្រោះគិតចាប់ពីបានបោះឆ្នោតរយៈពេល២ខែមក ប្រទេសថៃមិនទាន់អាចបង្កើតរដ្ឋាភិបាលបានទេ ដែលធ្វើឱ្យមានឧបសគ្គដល់ការគ្រប់គ្រងប្រទេស ។ ហេតុនេះ វាបង្កឱ្យមានបញ្ហាជាច្រើនផ្នែកដូចជា សេដ្ឋកិច្ច សង្គម និងស្ថេរភាពផ្សេងៗ ហើយការជជែកគ្នាពិភាក្សារវាងគណបក្ស Palang Pracharat ជាមួយគណបក្សភឿថៃ ចាត់ទុកថា គឺជាឱកាសមួយបង្ហាញនូវគោលជំហររបស់គណបក្សយើង ។

លោកបន្តថា ពួកយើងសូមអរគុណដល់គណបក្សភឿថៃ ដែលបានរួមគ្នាពិភាក្សាអំពីគោលជំហររបស់គណបក្ស ហើយគណបក្ស Palang Pracharat ប្រកាន់នូវការគោរពលទ្ធិប្រជាធិបតេយ្យ ដោយមានព្រះមហាក្សត្រជាប្រមុខដឹកនាំ ដើម្បីឱ្យប្រទេសជាតិមានសុខសន្តិភាព ពលរដ្ឋមានជីវភាពរស់នៅល្អប្រសើរ និងអភិវឌ្ឍន៍ប្រទេសទៅមុខតាមគោលការណ៍ប្រជាធិបតេយ្យ ។ ហេតុនេះ គណបក្សរបស់យើងមិនគាំទ្រគណបក្សនយោបាយណាដែលចង់ធ្វើវិសោធនកម្មច្បាប់មាត្រា១១២ ទេ ហើយគណបក្ស Palang Pracharat បានបញ្ជាក់ជាមួយគណបក្សភឿថៃថា យើងនឹងបដិសេធបើមានវត្តមានគណបក្សកាវក្លៃ ដែលមានគោលនយោបាយធ្វើវិសោធនកម្មច្បាប់មាត្រា១១២ ហើយវាជារឿងដែលគណបក្សយើងទទួលយកមិនបានទេ ។

ចំណែកលោក Thammanat Phromphao សមាជិកសភាខេត្តផាយ៉ាវ បានលើកឡើងថា គណបក្ស Palang Pracharat មានគោលនយោបាយមិនដូចគណបក្សមួយចំនួនទេ ។ បើគណបក្សនោះបានចូលរួមបង្កើតរដ្ឋាភិបាល យើងមើលឃើញថា វានឹងមានបញ្ហាមិនខាន ។ ដូច្នេះ គណបក្សដែលមានគោលនយោបាយខុសគ្នាពីយើង យើងនឹងមិនចូលរួមសហការជាមួយទេ ។ គណបក្ស Palang Pracharat បានបង្ហាញនូវគោលជំហរសំខាន់ គឺគ្មានជម្លោះ ហើយគណៈកម្មការដឹកនាំបក្ស ក៏បានកំណត់គោលជំហរច្បាស់លាស់ផងដែរ ។ គណបក្សយើងនឹងមិនដាក់ឈ្មោះលោក Prawit Wongsuwan មេដឹកនាំគណបក្ស Palang Pracharat ទេ បើសំឡេងគាំទ្ររបស់សមាជិកសភាតំណាងរាស្ត្រនៅក្រោម២៥០សំឡេង ឬពាក់កណ្តាលនៃចំនួនសមាជិកសភា ៕ ប្រភព ៖ Thairath

ជាទូទៅ កម្ពស់មនុស្សចាប់ពី ១.៨០ ម៉ែត្រឡើងទៅត្រូវបានគេចាត់ទុកថាខ្ពស់ណាស់ទៅហើយ ចុះទម្រាំមនុស្សដែលមានកម្ពស់ជិត ៣ ម៉ែត្រទៅវិញ តើខ្ពស់យ៉ាងណាទៅ? ដូច្នេះហើយ ថ្ងៃនេះ KBN News សូមណែនាំប្រិយមិត្តមកស្គាល់កំពូលមនុស្សដែលមានកម្ពស់ខ្ពស់ជាងគេបំផុតនៅលើពិភពលោក៖

១.Sultan Kösen៖ លោក Sultan Kösen គឺជាបុរសដែលកាន់កំណត់ត្រា Guinness ខ្ពស់ជាងគេបំផុតនៅលើពិភពលោក ជាមួយកម្ពស់ ២.៥១ ម៉ែត្រ។ Kösen មានដើមកំណើតនៅប្រទេសទួរគី ដោយបច្ចុប្បន្នគាត់មានអាយុ ៤១ឆ្នាំ នឹងមិនអាចធ្វើការបានដូចគេទេ ព្រោះដោយសារគាត់មិនអាចអង្គុយលើកៅអីកើត ដូច្នេះប្រាក់ចំណូលរបស់គាត់រាល់ថ្ងៃបានមកពីកំណត់ត្រា ដែលលោកបានកាន់តំណែង និងការធ្វើដំណើរជុំវិញពិភពលោក។

២. John Rogan៖ លោក John Rogan ដែលជាជនជាតិអាមេរិក ទទួលបានកំណត់ត្រាសម្រាប់មនុស្សខ្ពស់ជាងគេទីពីរនៅលើពិភពលោក ជាមួយកម្ពស់ខ្ពស់បំផុតគឺ ២,៦៧ ម៉ែត្រ។ លោក John មិនអាចធ្វើដំណើរ ឬដើរបាននោះទេ ដោយបច្ចុប្បន្នគាត់បានទទួលមរណៈភាពហើយ។

៣.Robert Wadlow៖ ជនជាតិអាមេរិកគឺលោក Robert Wadlow ទទួលបានកំណត់ត្រា Guinness World Records សម្រាប់មនុស្សខ្ពស់ជាងគេបំផុតលើលោក ជាមួយកម្ពស់ដ៏គួរឱ្យភ្ញាក់ផ្អើលរបស់គាត់គឺ ២.៦៣ ម៉ែត្រ ប៉ុន្តែជាអកុសលគាត់បានស្លាប់ដោយសារជំងឺក្រពេញភីតូរីស។

៤.Zeng Jinlian៖ ស្ត្រីដែលមានកម្ពស់ខ្ពស់បំផុតលើលោកមិនធ្លាប់មានគឺ Zeng Jinlian ដែលមានដើមកំណើតនៅប្រទេសចិន ជាមួយកម្ពស់ ២,៤៦ ម៉ែត្រ ដោយបច្ចុប្បន្ននាងបានទទួលមរណៈភាពហើយ៕

នៅពេលអ្នកមើលទៅតារាកូរ៉េនោះអ្នកនឹងលួចច្រណែនពីរូបសម្រស់របស់ពួកគេនិងប្រាថ្នាចង់បានភាពស្រស់ស្អាតបែបកូរ៉េដូចគ្នា ជាពិសេសស្ទីលតុបតែងមុខនិងសក់របស់ពួកគេតែម្តងចេញមកមួយៗស្រស់ស្អាតតាមបែបធម្មជាតិ។ ពេលនេះអស់បារម្ភហើយទីតាំងហាងសាឡនទាំង៧នេះនៅក្នុងទីក្រុងសេអ៊ូល ប្រទេសកូរ៉េ អាចជួបលោកបានព្រោះសុទ្ធតែជាហាងដែលជួយឱ្យសម្រស់តារាKpop ល្បីៗមានសម្រស់ទាក់ទាញបន្ថែមពីលើមុខមាត់ធម្មជាតិរបស់ពួកគេ។

១. ហាង BIT & BOOT
ហាងសាឡនមួយនេះមានអថិជនជាតារាល្បីៗជាច្រើនមានដូចជាក្រុម BTS, EXO, Le Sserafim, TWICE, NCT 127, The Boyz, Monsta X, និងតារាផ្សេងទៀត ជាពិសេសហាងនេះបានផ្តល់សេវាកម្មឱ្យក្រុម BTS និង EXO អស់រយៈពេលជាច្រើនឆ្នាំមកហើយ ដូច្នេះអតិថិជននានាអាចទុកចិត្តសេវាកម្មហាងនេះបាន។

២. ហាង KITTS
នេះជាហាងសាឡនល្បីឈ្មោះមួយទៀតនៅក្នុងទីក្រុងសេអ៊ូលដែលផ្តល់សេវាកម្មថ្មីៗនៃពិភព Make Up។ តារាល្បីៗដែលធ្លាប់ទទួលសេវាកម្មពីទីនេះមានដូចជា Winter សមាជិកក្រុម Aespa , Suzy , Sunmi, Tiffany Young សមាជិកក្រុម Girls’ Generation និងក្រុម Red Velvet ។

៣. ហាង OUI OUI ATELIER
សម្រាប់ហាងមួយនេះមានចំណុចពិសេសនោះគឺសម្រាប់អ្នកចង់បានទម្រង់ភ្នែកក្មេងជាងវ័យ ហើយចំណុចនេះក៏បានទាក់ទាញចិត្តតារាស្រី IU , Taeyeon សមាជិកក្រុម Girl’s Generation ផងដែរ។ ក្រៅពីនេះ ហាងនេះធ្លាប់ផ្តល់សេវាកម្មទៅតារាផ្សេងទៀតមានដូចជា ITZY, BoA, និង តារាសម្តែង Seol In-Ah ។

៤. ហាង HOLY
ហាងនេះរក្សានូវអ្វីដែលជាសិល្បៈ និងភាពពេញនិយម ជាមួយស្ទីលY2K ខណៈហាងនេះបានផ្តល់សេវាកម្មញឹកញាប់ឱ្យក្រុមចម្រៀងល្បីឈ្មោះ NewJeans និងតារាផ្សេងទៀតដូចជា Lee Hi និង Crush។

៥ .ហាង NAILTAM2NA
តារាកូរ៉េដែលទទួលសេវាកម្មនៅហាងសាឡននេះមានដូចជា Taeyeon សមាជិក Girls’ Generation , Soyou សមាជិក Sistar, Ailee, Yuna សមាជិក ITZY និង Arin សមាជិក Oh My Girl។

៦. ហាង UNISTELLA
ហាងមួយនេះបានទាញចំណាប់អារម្មណ៍ខ្លាំងពីអតិថិជននោះគេការរចនាម៉ូដក្រចក។ ក្នុងនោះដែរ Jisoo និង Lisa សមាជិកក្រុម Blackpink Hwasa សមាជិក Mamamoo និងតារាសម្តែង Song Kang សុទ្ធតែធ្លាប់ទទួលសេវាកម្មនៅទីនេះ។

៧. ហាង WOOSUN
មិនខុសហាងល្បីឈ្មោះទាំង៦នៅខាងលើនោះទេ ហាងសាឡននេះមានអតិថិជនជាតារាល្បីៗជាពិសេសនៅពីក្រោយមានស្រស់ស្អាតរបស់ក្រុម Blackpink, Irene សមាជិកក្រុម Red Velvet, តារាម៉ូដែល Irene Kim, Sooyoung សមាជិកក្រុម Girls’ Generation, Sandara Park, រួមទាំងតារាមួយចំនួនទៀត៕