ប្រទេសកាណាដា ៖ ភ្លៀងធ្លាក់ខ្លាំងបំផុតក្នុងរយៈពេលជាង៤០ឆ្នាំ បានធ្វើឱ្យផ្លូវ ស្ពាន ព្រមទាំងអគារជាច្រើនកន្លែងរងការខូចខាតនៅរដ្ឋ Nova Scotia ប្រទេសកាណាដា ។ ប៉ូលិសបានប្រើប្រាស់ទូកវែងដើម្បីស្វែងរកពលរដ្ឋបាត់ខ្លួនចំនួន៤នាក់ ក្នុងនោះមានកុមារ២នាក់ផងដែរនៅទីក្រុង Bedford ប៉ុន្តែគេមិនទាន់ទទួលបានដំណឹងអ្វីទេ ។

លោក Tim Houston ប្រមុខរដ្ឋមន្ត្រីប្រចាំរដ្ឋ Nova Scotia លើកឡើងថា ទឹកជំនន់បានធ្វើឱ្យផ្លូវជាច្រើនកន្លែង និងប្រព័ន្ធហេដ្ឋារចនាសម្ព័ន្ធផ្សេងទៀតរងការខូចខាត ។ រដ្ឋបានអំពាវនាវឱ្យពលរដ្ឋទាំងអស់ស្ថិតនៅតែក្នុងលំនៅឋានរបស់ខ្លួន និងហាមប្រើប្រាស់រថយន្តក្នុងអំឡុងពេលនេះ ។ អាជ្ញាធរបញ្ជាក់ថា មានពលរដ្ឋបាត់ខ្លួនចំនួន៤នាក់ ក្នុងនោះមានកុមារ២នាក់, មនុស្សចាស់ម្នាក់ និងយុវវ័យម្នាក់ទៀត ដែលពួកគេមានគ្រោះថ្នាក់ដោយសាររថយន្តលិចក្នុងទឹកជ្រៅ ។

អាជ្ញាធរបានប្រកាសឱ្យពលរដ្ឋប្រុងប្រយ័ត្នចំពោះហេតុការណ៍គ្រោះថ្នាក់នៅទីក្រុង Halifax រដ្ឋ Nova Scotia និងតំបន់៤ផ្សេងទៀតដែលស្ថិតនៅជិតគ្នា ។ កាលពីថ្ងៃទី២១ ខែកក្កដា កន្លងមក មានខ្យល់ព្យុះបោកបក់នៅក្នុងតំបន់ទាំងនេះ ដែលធ្វើឱ្យមានភ្លៀងធ្លាក់ខ្លាំង និងទឹកជំនន់ភ្លាមៗ ។

មុននេះ នាយករដ្ឋមន្ត្រីប្រទេសកាណាដា លោក Justin Trudeau បានលើកឡើងថា លោកមានការបារម្ភពីស្ថានការណ៍ទឹកជំនន់នៅរដ្ឋ Nova Scotia ជាខ្លាំង ។ ចំណែករដ្ឋាភិបាលកណ្តាលបានទំនាក់ទំនងយ៉ាងជិតស្និទ្ធជាមួយអាជ្ញាធរមូលដ្ឋាន ព្រមទាំងបានត្រៀមខ្លួនជាស្រេច ដើម្បីជួយសង្គ្រោះពលរដ្ឋក្នុងអំឡុងពេលពួកគេរងគ្រោះដោយសារទឹកជំនន់ ។ លើសពីនេះ រដ្ឋាភិបាលកណ្តាលនឹងរៀបចំក្រុមការងារចុះពិនិត្យមើលទ្រព្យសម្បត្តិខូចខាតក្រោយពីទឹកជំនន់ស្រកផងដែរ ៕ ប្រភព ៖ TNN World

ប្រទេសសិង្ហបុរី បាន​វ៉ា​ដាច់​ប្រទេស​ជប៉ុន ដោយឡើងមកឈរ​នៅ​លើ​កំពូល​តារាង ​នៃ​ចំណាត់ថ្នាក់​លិខិត​ឆ្លងដែន​មាន​ឥទ្ធពល​បំផុត​លើ​ពិភពលោក។

លិខិតឆ្លងដែន​របស់​ប្រទេសសិង្ហបុរី អាច​ធ្វើ​ដំណើរ​ទៅ​កាន់​ប្រទេស​ចំនួន​១៩២​ប្រទេស នៅ​លើ​ពិភពលោក ដោយ​មិន​ត្រូវការ​ទិដ្ឋាការ​ឡើយ។

ខណៈកាលពីឆ្នាំទៅជប៉ុនឈរលេខ១ ដោយអាចធ្វើ​ដំណើរ​ទៅ​កាន់​ប្រទេស​ចំនួន​១៩៣ ដោយមិន​ត្រូវការ​ទិដ្ឋាការ​ ក៏ប៉ុន្តែដោយសារតែវិបត្តិនយោបាយ បានធ្វើឱ្យប្រទេសមួយចំនួន ត្រូវការឱ្យប្រជាជនជប៉ុនស្នើសុំ​ទិដ្ឋាការ​ជាមុនសិន ទើបអាចទីកម្សាន្តនៅប្រទេសពួកគេបាន។

ដោយឡែកកាលដែលសិង្ហបុរីឡើងមកឈរលេខមួយនេះ ក៏ដោយសារតែប្រជាជនសិង្ហបុរី ទទួលបានការវាយតម្លៃខ្ពស់ ទៅលើអត្តចរិក និងមានក្រមសិលធម៌ល្អ អ្វីដែលពិសេសនោះគឺសឹងតែមិនប្រព្រឹត្តិតខុសច្បាប់នៅក្នុងប្រទេសដែលពួកគេបានទៅទស្សនាថែមទៀត។

ដោយឡែកសម្រាប់លិខិតឆ្លងដែនរបស់ប្រទេសកម្ពុជាវិញ ស្ថិតនៅលេខ៨៨ ដោយ​អាច​ធ្វើ​ដំណើរ​ទៅ​កាន់​ប្រទេស​ចំនួន​៥៥ ដោយ​មិន​ចាំបាច់​ត្រូវការ​ទិដ្ឋាការ៕

ប្រភព៖Forbes

ប្រទេសថៃ ៖ ហាងលក់ភេសជ្ជៈជាច្រើនកន្លែងនៅប្រទេសថៃ បានប្រកាសឈប់លក់ភេសជ្ជៈប្រភេទ Mint Chocolate ក្រោយពីភេសជ្ជៈនេះបានល្បីល្បាញនៅក្នុងបណ្តាញសង្គម ។ ពលរដ្ឋថៃជាច្រើននាក់បានប្រកាសឈប់ផឹក Mint Chocolate បន្តទៀត ដោយពួកគេនិយាយថា វាជាភេសជ្ជៈក្បត់មិត្តភក្តិ ក្រោយពី Mint Chocolate មានវត្តមានក្នុងការជជែកពិភាក្សាគ្នារវាងគណបក្សភឿថៃ និងគណបក្សភូមិចៃថៃ ហើយគ្មានវត្តមានគណបក្សកាវក្លៃ ។

ភេសជ្ជៈ Mint Chocolate គឺជាភេសជ្ជៈមួយប្រភេទ ដែលអ្នកនាង Paetongtarn Shinawatra បេក្ខជននាយករដ្ឋមន្ត្រីមកពីគណបក្សភឿថៃ ចូលចិត្តទទួលទាន ។ ភេសជ្ជៈនេះបានក្លាយជាប្រធានបទដែលមានការជជែកគ្នាយ៉ាងខ្លាំងក្នុងបណ្តាញសង្គមថៃ នៅពេលលោក Anutin Charnvirakul ឧបនាយករដ្ឋមន្ត្រី និងរដ្ឋមន្ត្រីក្រសួងសុខាភិបាល ក្នុងឋានៈជាមេដឹកនាំគណបក្សភូមិចៃថៃ បានផឹកភេសជ្ជៈ Mint Chocolate បន្ទាប់ពីការធ្វើសន្និសីទសារព័ត៌មានរួមគ្នារវាងគណបក្សភឿថៃ និងគណបក្សភូមិចៃថៃ ។

ក្រោយពីមានការបង្ហោះរូបភាពគណបក្សភឿថៃ និងគណបក្សភូមិចៃថៃ ទទួលទានភេសជ្ជៈ Mint Chocolate ជាមួយគ្នាប្រកបដោយទឹកមុខរីករាយមក ធ្វើឱ្យពលរដ្ឋថៃជាច្រើននាក់សម្តែងការមិនពេញចិត្តជាមួយគណបក្សភឿថៃ ដែលទៅសហការជាមួយគណបក្សផ្សេង និងខុសពីពាក្យសន្យារបស់គណបក្សនេះជាមួយពលរដ្ឋ កាលពីអំឡុងពេលឃោសនាបោះឆ្នោត ។ ហេតុនេះ ពលរដ្ឋថៃបានប្រតិកម្មជាខ្លាំង និងនាំគ្នាឈប់ផឹក Mint Chocolate បន្តទៀត ។

ក្រោយមក ហាងកាហ្វេជាច្រើនកន្លែងបានបង្ហោះរូបភាពក្នុងបណ្តាញសង្គម និងសរសេរថា សូមប្រកាសថា ហាងនឹងឈប់លក់ភេសជ្ជៈប្រភេទ Mint Chocolate ចាប់ពីពេលនេះតទៅ ហើយគ្មានអតិថិជនត្រូវការវាទៀតទេ ។ រីឯហាង ThinkLab creative space and cafe បានបង្ហោះរូបភាព emoji យំនៅក្នុងបណ្តាញសង្គម ដោយសារតែអតិថិជនឈប់ទិញភេសជ្ជៈនេះ ហើយធ្វើឱ្យមនុស្សជាច្រើននាក់ចូលមកបញ្ចេញយោបល់ ។

ហាងមួយក្នុងចំណោមហាងទាំងអស់ដែលប្រកាសឈប់លក់ភេសជ្ជៈ Mint Chocolate បានផ្តល់ហេតុផលថា ហាងជឿថា ពេលនេះ មនុស្សជាច្រើនមិនចង់ផឹកវាទៀតទេ ។ ដូច្នេះ យើងសូមប្រកាសឈប់លក់ភេសជ្ជៈនេះ ហើយសូមអភ័យទោសយ៉ាងខ្លាំងផងដែរ ។ ដូចគ្នានេះ ហាងមួយឈ្មោះ BANN PU KAN cafe ក៏បានប្រកាសឈប់លក់ Mint Chocolate ផងដែរ ដោយហាងប្រកាសថា ហាងនឹងមិនលក់ Mint Chocolate ចាប់ពីថ្ងៃទី២៣ ខែកក្កដា តទៅ ព្រោះវាជាភេសជ្ជៈក្បត់មិត្តភក្តិ ឬជាភេសជ្ជៈធាក់មិត្តភក្តិទម្លាក់ពីលើទូក ។ ដូច្នេះ ហាងយើងមិនចង់លក់វាទៀតទេ ។

ពាក្យថា «ក្បត់មិត្តភក្តិ» ឬ «ធាក់មិត្តភក្តិទម្លាក់ពីលើទូក» គឺហាងលក់ភេសជ្ជៈនានាចង់សំដៅលើគណបក្សភឿថៃ បែរខ្នងដាក់គណបក្សកាវក្លៃ ហើយគណបក្សនេះងាកទៅសហការជាមួយគណបក្សកាន់អំណាចចាស់វិញ ដើម្បីទទួលបានសំឡេងគាំទ្រឱ្យគណបក្សភឿថៃក្លាយជានាយករដ្ឋមន្ត្រីប្រទេសថៃ ៕ ប្រភព ៖ Thairath

ប្រទេសថៃ ៖ លោក Chaturon Chaisang សមាជិកសភាតំណាងរាស្ត្ររបស់គណបក្សភឿថៃ បានលើកឡើងថា ការជជែកពិភាក្សាគ្នារវាងគណបក្សភឿថៃជាមួយគណបក្សរួមថៃសាងឆាតិ និងគណបក្ស Palang Pracharat គឺគ្មានប្រយោជន៍អ្វីទេ ។ គណបក្សភឿថៃមិនគួរធ្វើបែបនេះ កុំថាឡើយគិតចង់បង្កើតរដ្ឋាភិបាលជាមួយគណបក្សទាំងពីរ ។

គណបក្សកាវក្លៃបានប្រកាសបើកផ្លូវឱ្យគណបក្សភឿថៃដឹកនាំបង្កើតរដ្ឋាភិបាល ក្រោយពីតុលាការធម្មនុញ្ញសម្រេចដកសមាជិកភាពសភារបស់មេដឹកនាំគណបក្សកាវក្លៃ លោក Pita Limjaroenrat ។ គណបក្សកាវក្លៃថែមទាំងបានប្រកាសថា គណបក្សភឿថៃត្រូវដឹកនាំបង្កើតរដ្ឋាភិបាលដោយផ្អែកតាមសំឡេងគាំទ្ររបស់ពលរដ្ឋ និងមិនត្រូវសហការជាមួយគណបក្សផ្តាច់ការចាស់ជាដាច់ខាត ។ ប៉ុន្តែផ្ទុយទៅវិញ គណបក្សភឿថៃបានលែងដៃចោលគណបក្សកាវក្លៃ ហើយគណបក្សភឿថៃបានអញ្ជើញគណបក្សនយោបាយផ្សេងៗមកប្រជុំពិភាក្សារកដំណោះស្រាយបញ្ហានយោបាយនៅប្រទេសថៃ និងស្នើឱ្យគណបក្សទាំងនេះជួយបោះឆ្នោតគាំទ្របេក្ខជននាយករដ្ឋមន្ត្រីមកពីគណបក្សភឿថៃផងដែរ នៅថ្ងៃទី២៧ ខែកក្កដា ឆ្នាំ២០២៣ ។

កាលពីថ្ងៃទី២២ ខែកក្កដា កន្លងមក គណបក្សភឿថៃបានប្រជុំជជែកពិភាក្សាជាមួយគណបក្សនយោបាយចំនួន៣ គឺគណបក្សភូមិចៃថៃ, គណបក្សរួមថៃសាងឆាត និងគណបក្សឆាតផាត់តាណាក្លា ដើម្បីរកដំណោះស្រាយពីការជាប់គាំងនយោបាយនៅប្រទេសថៃ ។ ក្រោយមក នៅថ្ងៃទី២៣ ខែកក្កដា គណបក្សភឿថៃក៏បានអញ្ជើញគណបក្សឆាតថៃ ផាត់តាណា និងគណបក្ស Palang Pracharat មកពិភាក្សារួមគ្នាផងដែរ ។

លោក Chaturon Chaisang សមាជិកសភាតំណាងរាស្ត្ររបស់គណបក្សភឿថៃ បាននិយាយពាក់ព័ន្ធនឹងគណបក្សភឿថៃប្រជុំពិភាក្សាជាមួយគណបក្សនានាថា ៖ «ការពិភាក្សាជាមួយគណបក្សនយោបាយផ្សេងៗ បើតាមគោលការណ៍គណបក្ស វាជារឿងគួរធ្វើ ប៉ុន្តែការពិភាក្សាជាមួយគណបក្សរួមថៃសាងឆាត និងគណបក្ស Palang Pracharat គឺជារឿងដែលគណបក្សភឿថៃមិនគួរធ្វើទេ និងគ្មានប្រយោជន៍ ។ បើគណបក្សភឿថៃពិភាក្សាពីការបង្កើតរដ្ឋាភិបាលជាមួយគណបក្សទាំងពីរនេះ វាកាន់តែមិនគប្បី ដោយសារគណបក្សនយោបាយភាគច្រើនក្នុងចំណោមគណបក្សចំនួន៨ បានប្រកាសយ៉ាងច្បាស់លាស់ក្នុងអំឡុងពេលឃោសនារកសំឡេងឆ្នោតថា ពួកគេនឹងមិនចូលរួមបង្កើតរដ្ឋាភិបាលជាមួយគណបក្សទាំងពីរទេ» ។

លោក Chaturon Chaisang បន្តថា រហូតមកដល់បច្ចុប្បន្ន បើគណបក្សភឿថៃអះអាងថា ស្ថានការណ៍នយោបាយផ្លាស់ប្តូរនោះ ក៏មិនមែនជាហេតុផលដែរ ។ គណបក្សនយោបាយទាំងពីរនេះ គឺជាឧបករណ៍នៃការផ្ទេរអំណាចផ្តាច់ការតាំងពីដើមមក ហើយវាគ្មានអ្វីផ្លាស់ប្តូរទេ ។ នាពេលកន្លងមក ពលរដ្ឋថៃបានបដិសេធមិនបោះឆ្នោតគាំទ្រគណបក្សទាំងពីរនេះទេ ហើយពលរដ្ឋត្រូវការឱ្យមានរដ្ឋាភិបាលប្រជាធិបតេយ្យ និងជារដ្ឋាភិបាលមានការទទួលស្គាល់ពីពលរដ្ឋផងដែរ ៕ ប្រភព ៖ Thai news online  

បរទេស៖ យោងតាមនាយកប្រតិបត្តិ Elon Musk បានប្រកាសកាលពីថ្ងៃទី ២៣ ខែកក្កដា ថា Twitter អាចនឹងទម្លាក់រូបសញ្ញាថ្មីរបស់ខ្លួនដោយប្រើនិមិត្តសញ្ញាដែលឆ្លុះបញ្ចាំងពីម៉ាកយីហោ X Corp។

X Corp គឺជាក្រុមហ៊ុនបច្ចេកវិទ្យាថ្មីរបស់មហាសេដ្ឋី Elon Musk ដែលបានបង្កើតឡើងនៅថ្ងៃទី៩ ខែមីនា ឆ្នាំ២០២៣។ ក្រុមហ៊ុន X Corp មានតួនាទីផ្តល់សេវាធនាគារ ការដើរទិញឥវ៉ាន់ ការផ្ញើសារ ការហៅទូរសព្ទ ការកក់ ការធ្វើដំណើរ ការជួញដូរភាគហ៊ុន និងអ្វីៗជាច្រើនទៀត។ ដូច្នេះ និមិត្តសញ្ញារូបចាបរបស់ Twitter នឹងត្រូវប្តូរក្នុងពេលឆាប់ៗនេះ ប្រសិនបើនិមិត្តសញ្ញា X Corp ថ្មីល្អគ្រប់គ្រាន់ ក្រុមហ៊ុននឹងផ្សាយបន្តផ្ទាល់ទូទាំងពិភពលោកនៅយប់ថ្ងៃទី២៤ ខែកក្កដា នេះតែម្តង។

គោលបំណងដ៏ធំរបស់ Elon Musk ក្នុងការផ្លាស់ប្តូរនិមិត្តសញ្ញានេះ គឺចង់ឱ្យកម្មវិធី Twitter ប្រែក្លាយទៅជា “កម្មវិធីសម្រាប់អ្វីគ្រប់យ៉ាង” ដូចជា WeChat របស់ប្រទេសចិន។ ទោះជាយ៉ាងណាក៏ដោយ បច្ចុប្បន្នលោក Musk កំពុងមានបញ្ហាក្នុងការបញ្ចុះបញ្ចូលអ្នកប្រើប្រាស់ Twitter ធម្មតា ឱ្យទៅប្រើប្រាស់ Twitter Blue វិញ ដោយបង់ប្រាក់សម្រាប់កម្មវិធីដែលមានស្រាប់របស់វេទិកានេះ។

អ្នកប្រើប្រាស់ Twitter ធម្មតា រាប់ពាន់នាក់ត្រូវបានកំណត់ចំពោះការមើលត្រឹមតែ ១,០០០ tweets ក្នុងមួយថ្ងៃប៉ុណ្ណោះ ដែលធ្វើឱ្យអ្នកប្រើប្រាស់ទាំងនោះចង់ចាកចេញពីគេហទំព័រនេះតែម្តង។ ដូចច្នេះ ដើម្បីបញ្ច្រាសនិន្នាការ លោក Musk ក៏បានប្រកាសថាអ្នកប្រើប្រាស់ Twitter Blue អាចទទួលបានចំណែកនៃប្រាក់ចំណូលពីការផ្សាយពាណិជ្ជកម្មពីការបង្ហោះរបស់ពួកគេ៕ ប្រភព៖cafef.com

សត្វទោចថ្ពាល់លឿងត្រូវបានរកឃើញក្នុងឆ្នាំ ២០១០ ដែលមានវត្តមាននៅតាមតំបន់មួយចំនួនក្នុងប្រទេសកម្ពុជា ឡាវ និងវៀតណាម ហើយសត្វទោចថ្ពាល់លឿងអាចស្រែកហៅគ្នារហូតដល់ចម្ងាយពីរគីឡូម៉ែត្រ។

សត្វទោចថ្ពាល់លឿង ប្រើការស្រែកហៅនេះសម្រាប់ការទំនាក់ទំនង ការពារទីជម្រក និងស្វែងរកគូដើម្បីបន្តពូជ។

សត្វទោចថ្ពាល់លឿងធំពេញវ័យនិងបន្តពូជបាននៅអាយុដប់ឆ្នាំហើយអាចមានកូនជារៀងរាល់៣ទៅ៤ឆ្នាំម្តង។ ពួកវាបរិភោគផ្លែឈើជាអាហារ ពេលខ្លះស្លឹកឈើ (ខ្ចី ឬចាស់) ផ្កានិងសត្វល្អិត។ បច្ចុប្បន្នសត្វនេះ ត្រូវបានចុះក្នុង បញ្ចី សត្វ ជិត ផុត ពូជ ( IUCN Red List )។

យោងតាមរបាយការណ៍សិក្សាស្រាវជ្រាវដោយអង្គការសមាគមអភិរក្សសត្វព្រៃប្រចាំកម្ពុជាសត្វទោចថ្ពាល់លឿង មាន ចំនួន ប្រមាណ ១២០០ ក្បាលនៅដែនជម្រកសត្វព្រៃនៅខេត្តមណ្ឌលគិរី។ ប៉ុន្តែតាមទិន្នន័យសិក្សាពីតំបន់ដែនជម្រកសត្វព្រៃនិងឧទ្យានជាតិនៅខេត្តរតនគិរី ចំនួនទោចថ្ពាល់ឡើងបានបង្ហាញវត្តមានជាច្រើនក្រុមដែលវាអាចមានចំនួនច្រើនពាន់ក្បាល។

ក្រុមការងារស្រាវជ្រាវបាននិងកំពុងបន្តការសិក្សាចងក្រងទិន្នន័យ។ សត្វព្រៃទាំងនេះគឺជាសម្បត្តិធម្មជាតិដែល មិនអាចកាត់ថ្លៃបានសម្រាប់ប្រទេសកម្ពុជា និងមានតម្លៃបំផុតសម្រាប់ការអភិរក្សជីវៈចម្រុះរបស់ ពិភព លោក។

ទាំងនៅដែនជម្រកសត្វព្រៃកែវសីម៉ា និងឧទ្យានជាតិវ៉ឺនសៃ សៀមប៉ាងជាប់ព្រំប្រទល់ខេត្តស្ទឹងត្រែង និងខេត្តរតនគិរី ជាទីកន្លែងមួយដែលអ្នកទេសចរអាចមើល ឃើញសត្វទោចថ្ពាល់លឿងបាននិងកំពុងទាក់ទាញភ្ញៀវទេសចរជាតិនិងអន្តរជាតិមកទស្សនាសត្វដ៏កម្រមាននៅលើពិភពលោកនេះហើយប្រជាសហគមន៍ ក៏អាចរកចំណូលបានពីតំបន់ទេសចរណ៍តាមរយ:ការដើរជូនភ្ញៀវទស្សនាសត្វទោចថ្ពាល់លឿង និងសត្វជាច្រើនផ្សេងៗទៀត ៕

ប្រទេសថៃ ៖ កាលពីថ្ងៃទី២៣ ខែកក្កដា កន្លងមក លោក Santi Promphat អនុរដ្ឋមន្ត្រីក្រសួងហិរញ្ញវត្ថុ និងជាលេខាធិការគណបក្ស Palang Pracharat និងលោកThammanat Phromphao សមាជិកសភាខេត្តផាយ៉ាវ ព្រមទាំងលោក Pai Like សមាជិកសភាខេត្តកំផែងភេត បានរួមគ្នាធ្វើសន្និសីទសារព័ត៌មានមួយ ក្រោយពីគណបក្សភឿថៃអញ្ជើញឱ្យគណបក្សនេះពិភាក្សាអំពីការបង្កើតរដ្ឋាភិបាល ។ គណបក្ស Palang Pracharat បានបង្ហាញពីគោលជំហររបស់ខ្លួនយ៉ាងច្បាស់លាស់ក្នុងការដោះស្រាយបញ្ហានយោបាយបច្ចុប្បន្ននៅប្រទេសថៃ ។

លោក Santi Promphat លេខាធិការគណបក្ស Palang Pracharat លើកឡើងថា បច្ចុប្បន្ន យើងចាំបាច់ត្រូវតែដោះស្រាយបញ្ហាប្រទេសជាតិ ព្រោះគិតចាប់ពីបានបោះឆ្នោតរយៈពេល២ខែមក ប្រទេសថៃមិនទាន់អាចបង្កើតរដ្ឋាភិបាលបានទេ ដែលធ្វើឱ្យមានឧបសគ្គដល់ការគ្រប់គ្រងប្រទេស ។ ហេតុនេះ វាបង្កឱ្យមានបញ្ហាជាច្រើនផ្នែកដូចជា សេដ្ឋកិច្ច សង្គម និងស្ថេរភាពផ្សេងៗ ហើយការជជែកគ្នាពិភាក្សារវាងគណបក្ស Palang Pracharat ជាមួយគណបក្សភឿថៃ ចាត់ទុកថា គឺជាឱកាសមួយបង្ហាញនូវគោលជំហររបស់គណបក្សយើង ។

លោកបន្តថា ពួកយើងសូមអរគុណដល់គណបក្សភឿថៃ ដែលបានរួមគ្នាពិភាក្សាអំពីគោលជំហររបស់គណបក្ស ហើយគណបក្ស Palang Pracharat ប្រកាន់នូវការគោរពលទ្ធិប្រជាធិបតេយ្យ ដោយមានព្រះមហាក្សត្រជាប្រមុខដឹកនាំ ដើម្បីឱ្យប្រទេសជាតិមានសុខសន្តិភាព ពលរដ្ឋមានជីវភាពរស់នៅល្អប្រសើរ និងអភិវឌ្ឍន៍ប្រទេសទៅមុខតាមគោលការណ៍ប្រជាធិបតេយ្យ ។ ហេតុនេះ គណបក្សរបស់យើងមិនគាំទ្រគណបក្សនយោបាយណាដែលចង់ធ្វើវិសោធនកម្មច្បាប់មាត្រា១១២ ទេ ហើយគណបក្ស Palang Pracharat បានបញ្ជាក់ជាមួយគណបក្សភឿថៃថា យើងនឹងបដិសេធបើមានវត្តមានគណបក្សកាវក្លៃ ដែលមានគោលនយោបាយធ្វើវិសោធនកម្មច្បាប់មាត្រា១១២ ហើយវាជារឿងដែលគណបក្សយើងទទួលយកមិនបានទេ ។

ចំណែកលោក Thammanat Phromphao សមាជិកសភាខេត្តផាយ៉ាវ បានលើកឡើងថា គណបក្ស Palang Pracharat មានគោលនយោបាយមិនដូចគណបក្សមួយចំនួនទេ ។ បើគណបក្សនោះបានចូលរួមបង្កើតរដ្ឋាភិបាល យើងមើលឃើញថា វានឹងមានបញ្ហាមិនខាន ។ ដូច្នេះ គណបក្សដែលមានគោលនយោបាយខុសគ្នាពីយើង យើងនឹងមិនចូលរួមសហការជាមួយទេ ។ គណបក្ស Palang Pracharat បានបង្ហាញនូវគោលជំហរសំខាន់ គឺគ្មានជម្លោះ ហើយគណៈកម្មការដឹកនាំបក្ស ក៏បានកំណត់គោលជំហរច្បាស់លាស់ផងដែរ ។ គណបក្សយើងនឹងមិនដាក់ឈ្មោះលោក Prawit Wongsuwan មេដឹកនាំគណបក្ស Palang Pracharat ទេ បើសំឡេងគាំទ្ររបស់សមាជិកសភាតំណាងរាស្ត្រនៅក្រោម២៥០សំឡេង ឬពាក់កណ្តាលនៃចំនួនសមាជិកសភា ៕ ប្រភព ៖ Thairath