កញ្ញា ឡូរ៉ាម៉ម ដែលជានាយកប្រតិបត្តិ (CEO) ផលិតកម្មបារមី នឹងតំណាងប្រទេសកម្ពុជានិងអាស៊ីចូលរួមធ្វើជាវាគ្មិនម្នាក់ក្នុងកម្មវិធី All That Matters 2023 នាពេលឆាប់ៗនេះនៅឯប្រទេសសិង្ហបុរី ដែលកម្មវិធីនេះប្រមូលផ្តុំទៅដោយនាយកប្រតិបត្តិផ្សេងៗទៀតជាច្រើន។ កម្មវិធីនេះផ្តោតទៅលើការពិភាក្សាលើប្រធានបទជាច្រើនដើម្បីយល់ដឹងកាន់តែច្បាស់ពីវិស័យផ្សេងៗក្នុងតំបន់អាស៊ីប៉ាស៊ីហ្វិក។
តាមការឱ្យដឹងពី CEO នេះផ្ទាល់នៅលើបណ្តាញសង្គមនាយប់ថ្ងៃទី៥ កញ្ញា នាងត្រូវបាន
អញ្ជើញជាកិត្តិយសចូលរួមធ្វើជាវាគ្មិននៅក្នុងកម្មវិធី All That Matters 2023 តំណាងឱ្យប្រទេសកម្ពុជា និងអាស៊ី ដែលនឹងធ្វើឡើងនៅថ្ងៃទី ១១ ដល់ ១៣ ខែ កញ្ញា ២០២៣ ខាងមុននេះនៅ Hilton Singapore Orchard ប្រទេសសិង្ហបុរី។
កម្មវិធីនេះ ផ្តោតទៅលើការពិភាក្សាលើប្រធានបទជាច្រើន ដែលនឹងធ្វើឱ្យអ្នកចូលរួមស្តាប់ បានយល់ដឹងកាន់តែច្បាស់ពីវិស័យផ្សេងៗក្នុងតំបន់អាស៊ីប៉ាស៊ីហ្វិកមានដូចជាវិស័យតន្ត្រី, កីឡា, កីឡាហ្គេមអេឡិចត្រូនិច, Web3, ប្រព័ន្ធឌីជីថល និង ផ្នែកទីផ្សារ។
បន្ថែមពីលើនេះកញ្ញា ឡូរ៉ា ម៉ម ក៏បានបន្ថែមទៀតថាកម្មវិធីនេះនឹងនាំនាងនិងនាយកប្រតិបត្តិក្នុងឧស្សាហកម្មផ្សេងៗ ជំនួបគ្នាដើម្បីពិភាក្សាអំពីអ្វីដែលសំខាន់ចំពោះពួកគេ។
បន្ទាប់ពីទទួលដំណឹងនេះហើយបណ្តាអ្នកគាំទ្រ និងអ្នកសិល្បៈក៏បានចូលរួមអបអរសាទរទៅដល់កញ្ញា ឡូរ៉ា ម៉ម ផងដែរដែលទទួលបានកិត្តិយសពិសេសនេះហើយក៏ជាពេលវេលាមួយដែលនាំឱ្យ CEO រូបនេះនាំឈ្មោះប្រទេសកម្ពុជាបង្ហាញនៅក្នុងកម្មវិធីខាងលើនេះនឹងឱ្យអ្នកចូលរួមស្តាប់ក៏ដូចជានាយកប្រតិបត្តិផ្សេងទៀតបានស្គាល់ពីប្រទេសកម្ពុជាលើប្រធានបទដែលគេពិភាក្សាផងដែរ៕
