បើទោះជាការបរិភោគបន្លែផ្តល់ផលប្រយោជន៍ដល់រាងកាយក្តី ប៉ុន្តែបើបរិភោគវាមិនបានត្រឹមត្រូវទេនោះ វានឹងបង្កផលប៉ះពាល់ដល់សុខភាពជំនួសវិញ ។ ជាក់ស្តែង បន្លែមួយចំនួន យើងមិនអាចបរិភោគវាឆៅទេ ព្រោះអាចមានលាយជាមួយសារធាតុគីមី ឬបាក់តេរីផ្សេងៗ ហើយនៅពេលបរិភោគបន្លែទាំងនេះ វាអាចបង្កគ្រោះថ្នាក់ដល់សុខភាពបាន ។ យើងមកមើលថា តើមានបន្លែអ្វីខ្លះដែលមិនគួរបរិភោគឆៅ ហើយគួរបរិភោគបែបណាឱ្យមានសុវត្ថិភាព ។

១-សណ្តែកកួ ៖
គឺជាបន្លែមួយប្រភេទដែលគេប្រើប្រាស់ថ្នាំកម្ចា.ត់សត្វល្អិតច្រើន ហើយថ្នាំទាំងនេះនឹងជ្រាបចូលទៅក្នុងសណ្តែកកួ ។ មុនពេលយកវាទៅបរិភោគ គួរតែលាងទឹកសម្អាតឱ្យស្អាត ហើយត្រាំវាក្នុងទឹកឱ្យបានយូរ ទើបយើងអាចបរិភោគសណ្តែកកួឆៅបាន ។

២-ស្ពៃក្តោប, ផ្កាខាត់ណាត និងផ្កាខាត់ណាខៀវ ៖
អ្នកមានជំងឺក្រពេញទីរ៉ូអ៊ីត (Hypothyroid) មិនគួរបរិភោគទេ ព្រោះវាមានសារធាតុ Goitrogens ដែលរារាំងការផលិតអរម៉ូនទីរ៉ូអ៊ីត ។ ចំណែកមនុស្សទូទៅអាចបរិភោគបន្លែទាំងនេះឆៅបាន ប៉ុន្តែមិនគួរបរិភោគក្នុងបរិមាណច្រើនពេកទេ ។ មុននឹងបរិភោគ ត្រូវយកវាទៅលាងទឹកឱ្យស្អាតដើម្បីការពារថ្នាំកម្ចា.ត់សត្វល្អិត ដែលអាចនៅជាប់ជាមួយបន្លែ ។

៣-សណ្តែកបណ្តុះ ៖
មិនគួរបរិភោគសណ្តែកបណ្តុះឆៅទេ ព្រោះវាអាចមានមេរោគបាក់តេរីនៅលាយជាមួយគ្នា ។ ការលូតលាស់របស់សណ្តែកបណ្តុះ គឺត្រូវការសំណើមដែលធ្វើឱ្យបាក់តេរីអាចធំធាត់យ៉ាងល្អ រួមទាំងសារធាតុធ្វើឱ្យសណ្តែកបណ្តុះមានពណ៌សស្អាតផងដែរ ។ ការយកសណ្តែកបណ្តុះទៅលាងសម្អាតដោយទឹកធម្មតា គឺមិនអាចសម្អាតសារធាតុមេរោគអស់ទេ ដូច្នេះ យើងត្រូវចម្អិនវាដោយទឹកក្តៅឱ្យឆ្អិនដើម្បីកម្ចាត់មេរោគ ។

៤-ទំពាំង និងដំឡូងបារាំង ៖
ទំពាំង និងដំឡូងបារាំង មានសារធាតុ Cyanide ភ្ជាប់គ្នាជាមួយសារធាតុ Hemoglobin ដែលធ្វើឱ្យរាងកាយរបស់មនុស្សខ្វះខាតអុកស៊ីសែន ហើយអាចធ្វើឱ្យយើងបាត់បង់ស្មារតី និងស្លា.ប់បាន ។ ដូច្នេះ យើងគួរតែយកវាទៅស្ងោរប្រមាណ១០នាទី ដើម្បីកាត់បន្ថយសារធាតុពុលរហូតដល់៩០% ។

៥-ផ្ទី ៖
មនុស្សទូទៅអាចបរិភោគផ្ទីឆៅបាន ប៉ុន្តែអ្នកខ្វះខាតជាតិកាល់ស្យូម និងជាតិរ៉ែ មិនគួរបរិភោគផ្ទីឆៅទេ ព្រោះវាមានផ្ទុកអាស៊ីត Oxalic ដែលរារាំងការស្រូបយកជាតិកាល់ស្យូម និងជាតិរ៉ែចូលក្នុងរាងកាយ ។ ចំណែកមនុស្សទូទៅ គួរចៀសវាងបរិភោគវាជាមួយម្ហូបអាហារមានជាតិកាល់ស្យូម និងជាតិដែក ៕ ប្រភព ៖ Maeban

ពិតណាស់ អាហារដែលយើងទទួលទានរាល់ថ្ងៃសុទ្ធតែផ្ទុកជាតិស្ករទាំងអស់។ ការដែលទទួលទានជាតិស្ករច្រើនហួសកំរិតពេក វានឹងនាំឱ្យរាងកាយរបស់យើងឡើងទម្ងន់ កើតជំងឺផ្សេងៗដូចជា ជំងឺធាត់ ជំងឺទឹកនោមផ្អែមប្រភេទ២ និងជំងឺបេះដូង។ ដូចនេះតើអ្នកដឹងទេ? ដើម្បីកាត់បន្ថយជាតិស្ករក្នុងខ្លួនតើយើងត្រូវទទួលទានជាតិស្ករប៉ុន្មានក្រាមក្នុងមួយថ្ងៃ ទើបមិនមានបញ្ហាចំពោះសុខភាព?

យោងតាមការសិក្សាស្រាវជ្រាវដែលបានចេញផ្សាយនៅក្នុងទស្សនាវដ្តីវេជ្ជសាស្ត្ររបស់ចក្រភពអង់គ្លេស បានឱ្យដឹងថា ការទទួលទានជាតិស្ករប្រហែល ២៥ ក្រាម ក្នុងមួយថ្ងៃគឺល្អបំផុតសម្រាប់សុខភាពរាងកាយរបស់យើង នឹងជាស្តង់ដារសម្រាប់ការពារជំងឺធ្ងន់ធ្ងរដូចជាជំងឺបេះដូង និងជំងឺមហារីក។

ដូចនេះ មនុស្សគួរតែកំណត់ការទទួលទានជាតិស្កររបស់ពួកគេឱ្យបានត្រឹមត្រូវតាមរបបអាហារនីមួយៗសម្រាប់ពេលព្រឹក ថ្ងៃ និងល្ងាច។ យោងតាមលោកវេជ្ជបណ្ឌិត MacLeod បានឱ្យដឹងថា អាហារដែលមានជាតិស្ករទាបបំផុតសម្រាប់ពេលព្រឹកគឺ ទឹកដោះគោជូរ គ្រាប់ធញ្ញជាតិ និងផ្លែឈើ។ ចំពោះអាហារថ្ងៃត្រង់វិញយើងគួរតែជ្រើសរើសអាហារដែលមានសុខភាពល្អដូចជាបន្លែបៃតង ត្រីគ្រប់ប្រភេទ សាច់គោ ទ្រូងមាន់ និងប្រូតេអ៊ីនគ្មានខ្លាញ់។
រីឯអាហារសម្រាប់ពេលល្ងាចវិញគឺ សូកូឡាពណ៌ស ទឹកក្រឡុកផ្លែឈើ និងបង្អែមផ្សេងៗ ដែលមានជាតិស្ករតិច។

ដូចនេះសម្រាប់មនុស្សប្រុសគួរទទួលទានជាតិស្ករ ៣៧,៥ ក្រាមក្នុងមួយថ្ងៃ ឬ ៩ស្លាបព្រាកាហ្វេ។ ចំពោះមនុស្សស្រីវិញគួរទទួលទានជាតិស្ករ ២៥ ក្រាមក្នុងមួយថ្ងៃ ឬ ៦ស្លាបព្រាកាហ្វេ ទើបល្អសម្រាប់សុខភាពនិងរាងកាយរបស់យើង៕ ប្រភព៖vnexpress

បញ្ហាមករដូវមិនទៀងទាត់ វាជារឿងដែលអាចកើតមានចំពោះស្ត្រីគ្រប់រូប ព្រោះការមករដូវអាស្រ័យលើឥរិយាបថ និងស្ថានភាពរាងកាយរបស់ស្ត្រីម្នាក់ៗ។ ដូច្នេះហើយខាងក្រោមនេះគឺជាមូលហេតុ ៧ យ៉ាងដែលធ្វើឱ្យរដូវមិនទៀងទាត់ នឹងជាមូលហេតុដែលស្ត្រីគ្រប់រូបត្រូវយកចិត្តទុកដាក់៖

១.មានភាពតានតឹង៖ ការដែលមានភាពតានតឹង ឬស្ត្រេសក៏ជាកត្តាសំខាន់មួយក្នុងការមករដូវមិនទៀងទាត់។ ដោយសារតែភាពតានតឹង អាចធ្វើឱ្យខួរក្បាលបញ្ជូនអ័រម៉ូនខុសប្រក្រតី និងធ្វើឱ្យរាងកាយមិនបញ្ចេញពងអូវុល ព្រមទាំងធ្វើឱ្យវដ្តរដូវមានភាពខុសប្រក្រតី។

២.ទម្ងន់ផ្លាស់ប្តូរយ៉ាងឆាប់រហ័ស៖ នៅពេលដែលរាងកាយរបស់ក្មេងស្រី មានការប្រែប្រួលយ៉ាងឆាប់រហ័សនៃទម្ងន់ ពោលគឺការកើនឡើងឬថយចុះនៃទម្ងន់ភ្លាមៗក្នុងរយៈពេលខ្លី វានឹងធ្វើឱ្យអ័រម៉ូនខុសប្រក្រតីក្នុងខ្លួន ព្រមទាំងនាំឱ្យមានរដូវមិនទៀងទាត់ផងដែរ។

៣.ការលេបថ្នាំ៖ ថ្នាំមួយចំនួនក៏រួមចំណែកដល់ការមករដូវមិនទៀងទាត់ផងដែរ ជាពិសេសថ្នាំប្រឆាំងនឹងជំងឺធ្លាក់ទឹកចិត្ត និងថ្នាំដទៃទៀត ដែលថ្នាំទាំងនេះ រួមចំណែកដល់ការខ្វះរដូវ ឬអាចធ្វើឱ្យរដូវរបស់អ្នកមកញឹកញាប់ខុសធម្មតាទៀតផង។

៤.ការជក់បារី៖ ការជក់បារីធ្វើឱ្យស្ត្រីមានហានិភ័យខ្ពស់ក្នុងការកើតរោគសញ្ញា PMS ហើយវាក៏ធ្វើឱ្យវដ្តរដូវខ្លីជាង និងមានភាពមិនប្រក្រតីច្រើនជាងអ្នកមិនជក់បារី។

៥.ផឹកស្រាក្នុងបរិមាណច្រើន៖ ការប្រើគ្រឿងស្រវឹងច្រើនពេកអាចបង្កើនកម្រិតអ័រម៉ូនអេស្ត្រូសែន និងតេស្តូស្តេរ៉ូន ដែលប៉ះពាល់ដល់ការបញ្ចេញពងអូវុល និងធ្វើឱ្យមានរដូវមិនទៀងទាត់។

៦.ការហាត់ប្រាណច្រើនពេក៖ ការធ្វើលំហាត់ប្រាណខ្លាំងពេក ឬធ្វើលំហាត់ប្រាណជាច្រើនម៉ោងជាប់ៗគ្នា នឹងប៉ះពាល់អវិជ្ជមានដល់អរម៉ូនដែលពាក់ព័ន្ធនឹងការមករដូវ ហើយក៏ធ្វើឱ្យជាតិខ្លាញ់ក្នុងខ្លួនថយចុះក្នុងបរិមាណច្រើនផងដែរ។

៧.ការឆ្លងមេរោគមួយចំនួន៖ ការឆ្លងមេរោគឬជំងឺមួយចំនួនក៏រួមចំណែកដល់វដ្តរដូវរបស់ស្ត្រីផងដែរ ព្រោះមេរោគទាំងនោះនឹងរួមចំណែកដល់ការមិនចេញឈាម ដែលជាហេតុធ្វើឱ្យវដ្តរដូវរបស់ស្ត្រីមិនទៀងទាត់៕ ប្រភព៖sanook