រដ្ឋធានីនីយ៉ាមេ (Niamey)៖ គណៈប្រតិភូអ្នកប្រាជ្ញផ្នែកសាសនាអ៊ិស្លាមរបស់ប្រទេសនីហ្សេរីយ៉ា បានជួបជាមួយនឹងមេដឹកនាំរដ្ឋប្រហារយោធា នៅក្នុងប្រទេសនីហ្សេ ស្របពេលសហគមន៍សេដ្ឋកិច្ចរដ្ឋអាហ្វ្រិកខាងលិច (ECOWAS) កំពុងតែស្វែងរកជម្រើសជាច្រើន ដោយរាប់បញ្ចូលទាំងការប្រើប្រាស់កម្លាំងទ័ព ដើម្បីស្ដាររបបគ្រប់គ្រងស៊ីវិលរបស់ប្រទេសនីហ្សេ ឲ្យរស់ឡើងវិញ ទើបក្រុមអ្នកផ្ដួលរំលំរដ្ឋាភិបាលស៊ីវិលតាមបែបលទ្ធិប្រជាធិបតេយ្យ បានអះអាងអំពីការបើកចំហការទូត។

សារព័ត៌មាន Al Jazeera បានចេញផ្សាយ កាលពីថ្ងៃអាទិត្យ ទី១៣ ខែសីហា ថា បើតាមក្រុមអ្នកប្រាជ្ញជាន់ខ្ពស់ផ្នែកសាសនាអ៊ិស្លាម នៅក្នុងប្រទេសនីហ្សេរីយ៉ា ដែលបានជួបចាំមួយនឹងមេដឹកនាំយោធានីហ្សេ នៅក្នុងរដ្ឋធានីនីយ៉ាមេ បានឲ្យដឹង ថា ក្រុមមេដឹកនាំរដ្ឋប្រហារ នៅក្នុងប្រទេសនីហ្សេ បានអះអាង ថា ពួកគេនៅតែបើកចំហផ្លូវការទូត សម្រាប់ដោះស្រាយបញ្ហាប្រឈមមុខដាក់គ្នា ជាមួយនឹងប្លុកអាហ្វ្រិកខាងលិច (អេកូវ៉ាស)។

ជំនួបនេះ បានកើតឡើង ស្របពេលសហគមន៍សេដ្ឋកិច្ចរដ្ឋអាហ្រ្វិកខាងលិច (ECOWAS) កំពុងតែស្វែងរកជម្រើសនានារបស់ខ្លួន នៅក្នុងការស្តាររដ្ឋាភិបាលស៊ីវិលឡើងវិញ នៅក្នុងប្រទេសនីហ្សេ រួមទាំងអន្តរាគមន៍យោធាដ៏មានសក្តានុពល ក្រោយពេលដកតំណែងរបស់លោក មូហាមេដ បាហ្ស៊ូម (Mohamed Bazoum) ប្រធានាធិបតីនីហ្សេ កាលពីខែមុន។ នេះជារដ្ឋប្រហារលើកទី៧ នៅក្នុងតំបន់អាហ្វ្រិកខាងលិច និង អាហ្រ្វិកកណ្តាល នៅក្នុងរយៈពេលបីឆ្នាំកន្លងមកនេះ។

នៅក្នុងសញ្ញារបស់ប្លុកអាហ្រ្វិកខាងលិចមួយនេះ ដែលនៅតែជំរុញឱ្យមានដំណោះស្រាយ ដោយសន្តិវិធីនោះ លោក បូឡា ទីនូប៊ូ (Bola Tinubu) ប្រធាន ECOWAS និង ជាប្រធានាធិបតីនីហ្សេរីយ៉ា កាលពីថ្ងៃសៅរ៍ បានអនុម័តបេសកកម្មមួយ ទៅកាន់រដ្ឋធានីមីយ៉ាមេ ដោយគណៈប្រតិភូរបស់អ្នកប្រាជ្ញអ៊ិស្លាម តាមរយៈការប្តេជ្ញា ជំរុញឲ្យមានការសន្ទនា។

លោក សេក អាប់ឌូលឡាហ៊ី បាឡា លោ (Sheikh Abdullahi Bala Lau) ប្រធានគណៈប្រតិភូអ្នកប្រាជ្ញអ៊ិស្លាម បានបញ្ជាក់ នៅក្នុងសេចក្ដីថ្លែងការណ៍មួយ កាលពីថ្ងៃអាទិត្យ ថា នៅក្នុងជំនួបជាមួយនឹងលោកឧត្ដមសេនីយ៍ អាប់ឌូរ៉ាហាម៉ាណេ ធីឈានី (Abdourahamane Tchiani) មេដឹកនាំរដ្ឋាភិបាលយោធា បានចំណាយពេល ជាច្រើនម៉ោង។ ទ្វាររបស់ពួកគេ នៅតែបើកចំហ សម្រាប់ការទូត និង សន្ដិភាព នៅក្នុងការដោះស្រាយបញ្ហានេះ។

លោក Tchiani មេដឹកនាំរដ្ឋាភិបាលយោធា បានសង្កត់ធ្ងន់ទៅលើទំនាក់ទំនងជាប្រវត្តិសាស្ត្រ រវាងនីហ្សេ និង នីហ្សេរីយ៉ា ដោយអះអាង ថា ប្រទេសទាំង២នេះ មិនត្រឹមតែជាប្រទេសជិតខាងប៉ុណ្ណោះទេ ប៉ុន្ដែប្រទេសទាំង២នេះ ក្លាយជាបងប្អូននឹងគ្នា គួរដោះស្រាយបញ្ហា ដោយមិត្តភាព»៕

បរទេស៖ លោកស្រី Linda Yaccarino នាយកប្រតិបត្តិនៃក្រុមហ៊ុន X បាននិយាយថា ប្រសិនបើជាការពិតការប្រកួតក្នុងទ្រុងរវាង Elon Musk និង Mark Zuckerberg នឹងប្រព្រឹត្តទៅតាមរបៀបកំប្លែង។

Yaccarino បាននិយាយនៅក្នុងបទសម្ភាសន៍ជាមួយ CNBC កាលពីថ្ងៃទី ១០ ខែសីហា ថា “យើងនឹងមើលថាតើការប្រកួតក្នុងទ្រុងពិតជាកើតឡើងឬយ៉ាងណា ប៉ុន្តែខ្ញុំបានមើលការហ្វឹកហាត់របស់ Elon Musk បើដូច្នេះមែន វាអាចជារឿងកំប្លែងទៅវិញទៅមករបស់ Zuckerberg និង Musk”។ លោកស្រីក៏បានបន្តទៀតថា អន្តរកម្មរវាងមហាសេដ្ឋីទាំងពីរ “អាចនឹងបង្កើតឱ្យមានភាពរំភើបក្នុងអាជីវកម្ម” ហើយនេះផ្តល់អត្ថប្រយោជន៍ដល់បណ្តាញសង្គម X។

នៅក្នុងការប្រកាសនៅលើបណ្តាញសង្គម X នៅថ្ងៃទី៨ ខែសីហា លោក Chris Anderson ដែលជាពិធីករកម្មវិធី TED បាននិយាយថាអ្នកទាំងពីរគួរតែអង្គុយនៅក្នុងទ្រុងមួយ ហើយជជែកគ្នាអំពី “របៀបកសាងអនាគតដ៏ល្អប្រសើរ” ជំនួសឱ្យការប្រយុទ្ធគ្នា។ភ្លាមនោះលោក Elon Musk ក៏បានគាំទ្រថា “វាជាគំនិតល្អ ការជជែកដេញដោលអាចចាត់ទុកថាជាកីឡាថ្លៃថ្នូ។ យើងសង្ឃឹមថានឹងអាចផ្សព្វផ្សាយការបំផុសគំនិតនេះដល់នរណាម្នាក់ដែលប្រយុទ្ធដើម្បីបុព្វហេតុដ៏ថ្លៃថ្នូ”។
លោក Walter Isaacson ដែលជាអ្នកសរសេរជីវប្រវត្តិរបស់មហាសេដ្ឋីពិភពលោក Elon Musk ក៏បាននិយាយដែរថា គាត់មិនគិតថាការប្រយុទ្ធនេះនឹងកើតឡើងនោះទេ។

គួររំលឹកដែរថា Musk ធ្លាប់បាននិយាយថាគាត់នឹងចាក់ផ្សាយការប្រកួត ជាមួយ Zuckerberg នៅលើបណ្តាញសង្គម X ប៉ុន្តែបន្ទាប់មកគាត់ក៏បាននិយាយថាគាត់ត្រូវទៅជួបគ្រូពេទ្យប្រហែលជាត្រូវការវះកាត់។ មហាសេដ្ឋីវ័យ ៥២ ឆ្នាំរូបនេះ ក៏បានសារភាពថាគាត់មិនមានគុណសម្បត្តិក្នុងការស៊ូទ្រាំទេ ហើយអាចចាញ់ប្រសិនបើគាត់តស៊ូជាមួយ CEO Meta រយៈពេលយូរ៕ ប្រភព៖vnexpress

ប្រទេសថៃ ៖ សារព័ត៌មានប្រទេសថៃបានចុះផ្សាយថា ព្រះចៅអធិការវត្តស៊ែងធម្មគីរី នៅខេត្តឆាក់ឈឺងសៅ បានបណ្តេញព្រះសង្ឃ លោកនេន និងក្មេងវត្ត ឱ្យចេញពីវត្តទាំងយប់ បន្ទាប់ពីក្រុមព្រះសង្ឃទាំងនេះចោទប្រកាន់ថា ព្រះចៅអធិការវត្តគ្មានតម្លាភាពរឿងប្រាក់បុណ្យកឋិន ហើយព្រះចៅអធិការរូបនេះបានបាត់ខ្លួនពីវត្តអស់រយៈពេលជាច្រើនខែ និងត្រឡប់មកវត្តវិញនៅខែកក្កដា ឆ្នាំ២០២៣ ។ ប៉ុន្តែនៅពេលមានការតវ៉ាទៅព្រះសង្ឃថ្នាក់សង្កាត់ ស្រាប់តែចេញលិខិតបណ្តេញលោកសង្ឃដែលតវ៉ាទាំងអស់ឱ្យចេញពីវត្ត ។

ក្រោយមក ព្រះចៅអធិការវត្តស៊ែងធម្មគីរី ព្រះនាម ព្រះផៃសាន វិសាឡូ បានបកស្រាយថា ព្រះសង្ឃ និងលោកនេន ដែលបានល្បីល្បាញក្នុងប្រព័ន្ធផ្សព្វផ្សាយនេះ បានបើករថយន្តទៅបិណ្ឌបាត្រនៅខេត្តផ្សេងតាំងពីម៉ោង៣ភ្លឺ ហើយបច្ច័យ និងរបស់របរដែលបានមក មិនព្រមបែងចែកឱ្យវត្តទេ ។ ពេលខ្លះ ព្រះសង្ឃទាំងនេះបានយករបស់របរដែលទទួលបានទៅលក់ចែកលុយគ្នា ហើយចៅអធិការវត្តមិនបានបណ្តេញចេញពីវត្តទេ ។ រីឯរឿងប្រាក់បុណ្យកឋិន គឺមានឯកសារបញ្ជាក់ពីចំណូល និងចំណាយច្បាស់លាស់ ។ ចំណែករឿងដែលព្រះសង្ឃទាំងនេះលើកឡើងថា ចៅអធិការវត្តបាត់ខ្លួនអស់ជាច្រើនខែនោះ ដោយសារចៅអធិការវត្តមានជំងឺ ។ ដូច្នេះ ត្រូវការសម្រាកព្យាបាល និងផ្អាកការងារបណ្តោះអាសន្នសិន ។

ព្រះគ្រូសិទ្ធិ ធម្មាថានី ជាព្រះសង្ឃថ្នាក់សង្កាត់ខៅហ៊ិនសន បានចេញលិខិត១ច្បាប់ ចុះថ្ងៃទី៩ ខែសីហា ឆ្នាំ២០២៣ អំពីការបង្កើតគណៈកម្មការត្រួតពិនិត្យមួយ ដើម្បីស្វែងរកខុសត្រូវរវាងព្រះចៅអធិការវត្ត ព្រះនាមព្រះផៃសាន វិសាឡូ និងព្រះសង្ឃព្រះនាម ណុបផាឌុន សុឆាតូ ។ ការប្រជុំរកដំណោះស្រាយបានសម្រេចថា ឱ្យព្រះសង្ឃព្រះនាម ណុបផាឌុន សុឆាតូ, ព្រះសង្ឃ វ៉ាយិ និងព្រះសង្ឃ អនុស័ក្តិ ត្រឡប់ទៅគង់នៅវត្តវិញ ។

ការប្រជុំរកដំណោះស្រាយនេះ មុនដំបូង ការជជែកគ្នារវាងភាគីទាំងសងខាងមិនសូវចូលសាច់រឿងទេ ហើយព្រះសង្ឃចំនួន៣អង្គដែលត្រូវបានបណ្តេញចេញពីវត្ត ត្រូវរងការដាក់សម្ពាធអំពីបញ្ហានាំគ្នាចេញពីវត្តកណ្តាលយប់ រហូតដល់សារព័ត៌មាននានាចុះផ្សាយ ។ ប៉ុន្តែព្រះសង្ឃ ណុបផាឌុន លើកហេតុផលថា មិនមែនព្រះសង្ឃនាំគ្នាចេញពីវត្តកណ្តាលយប់ទេ ប៉ុន្តែព្រះសង្ឃត្រូវបានបណ្តេញចេញពីវត្ត ។

ក្រោយមក ភាគីទាំងសងខាងបានជជែកគ្នាអំពីបញ្ហា និងព្រមព្រៀងថា ព្រះសង្ឃទាំង៣អង្គ និងលោកនេន ត្រូវហាមឃាត់ចេញទៅបិណ្ឌបាត្រនៅតំបន់ផ្សេង ឬបើទៅបំពេញការងារអ្វីមួយ ត្រូវតែជូនដំណឹងទៅព្រះសង្ឃគ្រប់លំដាប់ថ្នាក់ ។ ចំណែកចៅអធិការវត្តស៊ែងធម្មគីរី ព្រះនាម ព្រះផៃសាន វិសាឡូ យល់ព្រមចាកចេញពីវត្តនេះ ហើយទៅគង់នៅវត្តក្នុងខេត្តឆាក់ឈឺងសៅ ៕  ប្រភព ៖ amarin news