រាជធានីបាងកក៖ ក្រោយការនិរទេសខ្លួន ដោយខ្លួនឯង អស់រយៈពេល១៧ឆ្នាំ ចាប់តាំងពីអំពីរដ្ឋប្រហារ បណ្ដេញគាត់ចេញពីតំណែង កាលពីអំឡុងឆ្នាំ២០០៦ រហូតមក ឥឡូវនេះ លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្រ្ដីថៃ វិលត្រឡប់មកកាន់ប្រទេសកំណើតវិញហើយ។

សារព័ត៌មាន BBC បានចេញផ្សាយ កាលពីព្រឹក ថ្ងៃអង្គារ ទី២២ ខែសីហា ថា ការវិលត្រឡប់របស់អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា ពីការនិរទេសខ្លួន រយៈពេលជិត២០ឆ្នាំកន្លងមកនេះ តែងតែមានការសន្យាជាញឹកញាប់ ហើយគាត់ក៏ជាឥស្សរជនមួយរូប ត្រូវនិរទេសខ្លួនយ៉ាងយូរបំផុតមួយ នៅក្នុងប្រវត្តិសាស្ត្រថៃ។

មហិច្ឆតាខាងនយោបាយរបស់មហាសេដ្ឋីរូបនេះ នៅក្នុងការវិលត្រឡប់ មកចូលរួមបោះឆ្នោត អស់រយៈពេល២ទសវត្សរ៍កន្លងមកនេះ បានបង្កឱ្យមានប្រតិកម្មយ៉ាងខ្លាំង ពីកងកម្លាំងអភិរក្ស ចាប់ពីរដ្ឋប្រហារយោធា ការកាន់កាប់ក្រសួងរដ្ឋាភិបាល និង អាកាសយានដ្ឋាន រហូតដល់សាលក្រមតុលាការដ៏ចម្រូងចម្រាស ដែលបានបណ្តេញនាយករដ្ឋមន្ត្រីចំនួន៣នាក់ និង ការរំលាយគណបក្សនយោបាយ ដែលគាំទ្រដោយលោក ថាក់ស៊ីន។

ឥឡូវនេះ លោក ថាក់ស៊ីន ត្រឡប់មកវិញហើយ ដោយសន្មត ថា ក្រោយការប្រឆាំងដ៏ស្ងាត់ៗជាមួយសត្រូវរាជានិយមរបស់គាត់ ដើម្បីកុំឱ្យគាត់ចាកចេញពីគុក។ គាត់មានទោសជាប់ពន្ធនាគារ រយៈពេលប្រហែល១០ឆ្នាំ ក្រោមការចោទប្រកាន់បទល្មើសព្រហ្មទណ្ឌនានា ប្រឆាំងនឹងរូបគាត់។ ប៉ុន្ដែគាត់បានអះអាង ថា វាជាហេតុផលខាងនយោបាយ។

លោក ថាក់ស៊ីន ត្រូវគេរំពឹង ថា នឹងត្រូវបានបញ្ជូនបន្ត ចេញពីអាកាសយានដ្ឋាន ដុនមឿង (Don Mueang) ទៅកាន់តុលាការកំពូល ស្ថិតក្នុងទីក្រុងបាងកក ហើយបន្ដចេញពីទីនោះ ប្រហែលជាត្រូវចំណាយពេលមួយយប់ នៅក្នុងមន្ទីរពេទ្យពន្ធនាគារ ប៉ុន្ដែក៏គ្មានអ្នកណាម្នាក់ រំពឹងទុកជាមុន ថា គាត់នឹងត្រូវជាប់ឃុំយូរនោះដែរ៕

អ្នកចូលចិត្តសាកថ្មទូរស័ព្ទពេលយប់ត្រូវបញ្ឈប់ជាបន្ទាន់ ពីព្រោះក្រុមហ៊ុន Apple បានប្រកាសហាមឃាត់ជាផ្លូវការសម្រាប់អ្នកប្រើប្រាស់ទូរស័ព្ទ iPhone គួរចៀសវាងការសាកថ្មទូរស័ព្ទនៅលើគ្រែគេងពេលយប់ ដោយសារវាអាចបង្កគ្រោះថ្នាក់ ។ លើសពីនេះ ការអង្គុយ និងគេងសង្កត់លើទូរស័ព្ទ ក៏មានគ្រោះថ្នាក់ដូចគ្នាដែរ ។

កន្លងមក មានការចុះផ្សាយព័ត៌មានជាច្រើនពាក់ព័ន្ធនឹងការផ្ទុះថ្មទូរស័ព្ទស្មាតហ្វូនក្នុងអំឡុងពេលសាកថ្មនៅលើគ្រែគេង ហើយភាគច្រើនវាបណ្តាលមកពីឧបករណ៍សាកថ្ម និងឌុយភ្លើងគ្មានស្តង់ដារ ដោយសារមនុស្សភាគច្រើនមិនប្រុងប្រយ័ត្ន ហើយពួកគេនៅតែបន្តសាកថ្មពេលយប់ ។ ប៉ុន្តែក្រុមហ៊ុន Apple បានប្រកាសជាផ្លូវការថា វានឹងបង្កឱ្យមានគ្រោះថ្នាក់ បើទោះជាឆ្នាំងសាកថ្មនោះមានស្តង់ដារក្តី ។

សេចក្តីណែនាំសម្រាប់អ្នកប្រើប្រាស់ទូរស័ព្ទ iPhone បានបញ្ជាក់យ៉ាងច្បាស់ថា ការគេងសង្កត់លើទូរស័ព្ទដែលកំពុងសាកថ្ម វាអាចបណ្តាលឱ្យមានភ្លើងឆេះ, ឆក់ខ្សែភ្លើង, រងរបួស និងខូចខាតទូរស័ព្ទ ឬទ្រព្យសម្បត្តិផ្សេងៗ ។ ហេតុនេះ Apple ណែនាំថា គួរសាកថ្មទូរស័ព្ទនៅទីកន្លែងណាមានខ្យល់ចេញ-ចូលល្អ ព្រោះឆ្នាំងសាកអាចក្តៅខ្លាំងពេក ប្រសិនបើសាកវានៅក្រោមភួយ ឬខ្នើយ ។ ក្រុមហ៊ុននេះបញ្ជាក់ថា ៖ «កុំគេងសង្កត់លើឧបករណ៍ភ្ជាប់ជាមួយចរន្តអគ្គិសនី ឬសាកថ្មទូរស័ព្ទនៅក្រោមភួយ, ខ្នើយ ឬសាកថ្មទូរស័ព្ទនៅលើខ្លួនប្រាណ» ។

ក្រៅពីនេះ Apple បានណែនាំថា ពេលកំពុងសាកថ្មទូរស័ព្ទ គួរសាកថ្មនៅទីកន្លែងណាមានខ្យល់អាកាសចេញ-ចូលគ្រប់គ្រាន់ ទាំងទូរស័ព្ទ iPhone និងឧបករណ៍សាកថ្មឥតខ្សែ គឺត្រូវប្រុងប្រយ័ត្នជាពិសេស ។ លើសពីនេះ គេពុំគួរសាកថ្មទូរស័ព្ទនៅក្បែរវត្ថុរាវណាមួយឡើយ និងត្រូវបោះចោលឆ្នាំងសាកមានសភាពមិនល្អ ព្រោះការប្រើប្រាស់ឆ្នាំងសាក ឬខ្សែខូច វាអាចបណ្តាលឱ្យមានភ្លើងឆេះ, ខ្សែភ្លើងឆក់, រងរបួស ឬធ្វើឱ្យទូរស័ព្ទ iPhone និងទ្រព្យសម្បត្តិផ្សេងទៀតខូចខាត ៕ ប្រភព ៖ Bangkok biznews

បរទេស៖ ប្រទេសអូម៉ង់បានបង្ហាញផែនការសាងសង់ទីក្រុងឆ្លាតវៃ Sultan Haitham ដែលមានផ្ទៃដី ១៤.៨ គីឡូម៉ែត្រការ៉េ រួមជាមួយផ្ទះចំនួន ២០,០០០ ខ្នង សាកលវិទ្យាល័យ សាលារៀន បរិក្ខារពេទ្យ និងវិហារឥស្លាម នេះបើយោងតាមប្រភពព័ត៌មាន CNN ដែលបានរាយការណ៍កាលពីថ្ងៃទី ២០ ខែសីហា។

គម្រោងនេះនឹងចាប់ផ្តើមនៅឆ្នាំក្រោយ ហើយរំពឹងថានឹងបញ្ចប់ជាពីរដំណាក់កាលដែល ដំណាក់កាលទី ១ គឺដំណើរការរហូតដល់ឆ្នាំ ២០៣០ នឹងអភិវឌ្ឍតំបន់កណ្តាលទីក្រុងទំហំ ៥ គីឡូម៉ែត្រការ៉េ រួមជាមួយតំបន់លំនៅដ្ឋានចំនួន ៦ ក្នុងចំណោម ១៩ ដែលបានគ្រោងទុក។ ចំពោះដំណាក់កាលចុងក្រោយវិញត្រូវបានគេរំពឹងថានឹងបញ្ចប់នៅឆ្នាំ ២០៤៥។

យោងតាមលោក Bernhard Rettig អ្នកដឹកនាំនៅ SOM ហេដ្ឋារចនាសម្ព័ន្ធឆ្លាតវៃរបស់ Sultan Haitham នឹងត្រូវបានប្រើដើម្បីតាមដានកត្តាបរិស្ថានដូចជាគុណភាពខ្យល់ និងការគ្រប់គ្រងទឹក។ គម្រោងនេះក៏រួមបញ្ចូលផងដែរនូវប្រព័ន្ធគ្រប់គ្រងចរាចរណ៍ដែលប្រើប្រាស់ទិន្នន័យពេលវេលាជាក់ស្តែងពីកាមេរ៉ា និងឧបករណ៍ចាប់សញ្ញាល្បឿន ដើម្បីប្តូរទិសដៅយានយន្ត និងគ្រប់គ្រងលំហូរចរាចរណ៍។

គោលបំណងនៃការបង្កើតទីក្រុងឆ្លារវៃនេះគឺដើម្បីកាត់បន្ថយផលប៉ះពាល់របស់មនុស្សជាអប្បបរមាទៅលើបរិស្ថានវិទ្យា និងលើកទឹកចិត្តដល់កន្លែងផលិតថាមពលពន្លឺព្រះអាទិត្យ ការកែច្នៃទឹកសំណល់ ហេដ្ឋារចនាសម្ព័ន្ធរថយន្តអគ្គិសនី រួមជាមួយផ្ទះសម្បែង។ ប្រទេសអូម៉ង់ក៏បានកំណត់គោលដៅ ៣០% នៃថាមពលអគ្គិសនីដែលផលិតបាននឹងមកពីប្រភពបៃតងនៅឆ្នាំ ២០៣០។

ដូចនេះ ការរចនាទីក្រុងថ្មីគឺសមរម្យបំផុតសម្រាប់សីតុណ្ហភាព ដែលសីតុណ្ហភាពអាចលើសពី ៤៣ អង្សាសេ។ ប្លង់ឌីជីថលបង្ហាញពីផ្លូវដែលមានស្រមោលជុំវិញដោយរចនាសម្ព័ន្ធ។ ឫស្សីមើលទៅហាក់ដូចជាធ្វើពីឥដ្ឋ និងឈើ ផ្លូវ និងអគារត្រូវបានតម្រង់ទិសដើម្បីបង្កើនម្លប់ និងជំរុញឱ្យមានខ្យល់ចេញចូលធម្មជាតិ៕ ប្រភព៖vnexpress

ប្រទេសថៃ ៖ វាជារឿងគួរឱ្យភ្ញាក់ផ្អើលមួយពេលក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិប្រកាសតួលេខសេដ្ឋកិច្ចប្រទេសថៃ នៅត្រីមាសទី២ ឆ្នាំ២០២៣ កើនឡើងត្រឹមតែ១,៨% បើធៀបនឹងរយៈពេលដូចគ្នានៅឆ្នាំ២០២២ ។ សេដ្ឋកិច្ចថៃបានធ្លាក់ចុះពីអត្រា២,៦% នៅត្រីមាសទី១ ឆ្នាំ២០២៣ ហើយវាជាតួលេខខុសឆ្ងាយពីការរំពឹងទុករបស់ទីផ្សារ ។ ចំណែកតួលេខកើនឡើងប្រចាំត្រីមាសវិញ គឺវាកើនឡើងត្រឹមតែ០,២% ឬអាចហៅបានថា ស្ទើរតែមិនកើនឡើង ។ តើមានអ្វីកើតឡើងចំពោះសេដ្ឋកិច្ចប្រទេសថៃ ហេតុអ្វីបានជាធ្លាក់ចុះបែបនេះ ?

សេដ្ឋកិច្ចថៃនៅត្រីមាសទី២ ឆ្នាំ២០២៣ បានកើនឡើងត្រឹមតែ១,៨% ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិរាយការណ៍ថា ដោយសារតែតម្លៃនាំចេញធ្លាក់ចុះ៥,៦% ក្នុងរយៈពេល៣ខែជាប់ៗគ្នា រួមទាំងសន្ទស្សន៍តម្លៃកសិកម្មបានធ្លាក់ចុះនៅត្រីមាសទី២ ឆ្នាំ២០២៣ ក្នុងអត្រា៥,៤% ។ ដូចគ្នានេះ សន្ទស្សន៍ផលិតកម្មឧស្សាហកម្មបានធ្លាក់ចុះ៤,១% អស់ចំនួន៣ត្រីមាសជាប់ៗគ្នាផងដែរ ។

គេសង្កេតឃើញថា តួលេខសេដ្ឋកិច្ចគ្រប់ផ្នែកមិនសូវល្អប៉ុន្មានទេ និងមានសភាពបែបនេះជាបន្តបន្ទាប់ ។ វាជាបញ្ហាដ៏ធំមួយ និងពិបាកសម្រាប់រដ្ឋាភិបាលថ្មី ដែលត្រូវប្រញាប់ដោះស្រាយបញ្ហានេះ និងចេញវិធានការមួយចំនួនដើម្បីជំរុញឱ្យតួលេខសេដ្ឋកិច្ចល្អប្រសើរឡើងវិញ ។

ការគ្រប់គ្រងសេដ្ឋកិច្ចរបស់រដ្ឋាភិបាលថ្មីត្រូវផ្តល់ភាពសំខាន់លើការបង្កើតកំណើនសេដ្ឋកិច្ចឱ្យមានស្ថេរភាព និងដោះស្រាយបញ្ហាឱ្យចំគោលដៅ ។ ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិជឿថា បញ្ហាសេដ្ឋកិច្ចថៃក្នុងវិស័យនាំចេញបន្តធ្លាក់ចុះនេះ នឹងប៉ះពាល់ដល់ការផលិតក្នុងវិស័យឧស្សាហកម្មផងដែរ ។ ដូច្នេះ រដ្ឋាភិបាលថ្មីត្រូវដោះស្រាយបញ្ហានេះ ដោយការពង្រីកទីផ្សារ និងបង្កើនការនាំចេញក្នុងទីផ្សារមានសក្តានុពល ។

ជាមួយគ្នានេះ ប្រទេសថៃត្រូវបង្កើនការទាក់ទាញការវិនិយោគពីក្រៅប្រទេស ជាពិសេស ផ្តោតលើឧស្សាហកម្មគោលដៅ និងឧស្សាហកម្មពាក់ព័ន្ធនឹងការរីកចម្រើនសេដ្ឋកិច្ចថ្ងៃអនាគត ដូចជា ឧស្សាហកម្មបន្ទះឈីប, ឧស្សាហកម្មរថយន្តអគ្គិសនី និងអេឡិចត្រូនិកឆ្លាតវៃ ។ ដូច្នេះ ការគ្រប់គ្រងសេដ្ឋកិច្ចបន្តទៅមុខទៀត ត្រូវផ្តល់ភាពសំខាន់លើការរក្សាវិន័យសារពើពន្ធក្នុងប្រទេស ព្រោះសេដ្ឋកិច្ចពិភពលោកមិនច្បាស់លាស់ ជាពិសេស សេដ្ឋកិច្ចចិន ដែលមានបញ្ហាផ្នែកអចលនទ្រព្យ និងហិរញ្ញវត្ថុ ហើយវានឹងរាលដាលក្លាយជាវិបត្តិសេដ្ឋកិច្ចដែរឬអត់ គឺមិនត្រូវប្រមាថឡើយ ។

ស្ថានការណ៍នយោបាយថៃមានផលប៉ះពាល់ដល់ទំនុកចិត្តការវិនិយោគទុន និងបានដើរមកដល់ចំណុចផ្លាស់ប្តូរម្តងទៀត ។ គណបក្សភឿថៃ និងគណបក្សនយោបាយផ្សេងទៀតចំនួន១១ ដែលទទួលបាន៣១៤សំឡេងនឹងរួមគ្នាបង្កើតរដ្ឋាភិបាល ដោយដាក់ឈ្មោះលោក Srettha Thavisin មកពីគណបក្សភឿថៃ ធ្វើជាបេក្ខជននាយករដ្ឋមន្ត្រីនៅរដ្ឋសភា ដើម្បីធ្វើការបោះឆ្នោតជានាយករដ្ឋមន្ត្រី ។ ហេតុនេះ អ្នកណាក៏ដោយដែលត្រូវបានចាត់តាំងឱ្យដឹកនាំប្រទេស គឺពួកលោកគ្មានពេលវេលារីករាយទេ គឺមានតែបញ្ហាធំៗត្រូវប្រញាប់ដោះស្រាយ និងអភិវឌ្ឍន៍សេដ្ឋកិច្ចឱ្យរីកចម្រើន ៕ ប្រភព ៖ Bangkok biznews

បរទេស៖ យោងតាមសារព័ត៌មាន South China Morning Post (SCMP) បានឱ្យដឹងថា ប្រទេសចិនគ្រោងបាញ់បង្ហោះផ្កាយរណបដោយបំពាក់ខួរក្បាលបញ្ញាសិប្បនិមិត្ត (AI) ក្នុងគោលបំណងនៃការបង្កើតយានអវកាសដែលអាចគ្រប់គ្រងដោយខ្លួនឯងបាន និងជួយឆ្លើយតបទៅនឹងភាពអាសន្នដែលអនុញ្ញាតឱ្យផ្កាយរណបជូនដំណឹងភ្លាមៗដល់អ្នកអវកាសនិកអំពីគ្រោះមហន្តរាយដូចជាការរអិលបាក់ដី ការដួលរលំផ្លូវ ឬតំបន់ដែលរងផលប៉ះពាល់ដោយព្យុះនៅក្នុងលំហ។

លោក Wang Chunhui ដែលជាសហស្ថាបនិក និងជាប្រធានផ្នែកបច្ចេកវិទ្យារបស់ក្រុមហ៊ុនបាននិយាយថា គម្រោងបំពាក់ខួរក្បាល AI (WJ-1A) គឺជាផ្កាយរណបដំបូងរបស់ប្រទេសចិនដែលមានប្រព័ន្ធប្រតិបត្តិការដ៏ឆ្លាតវៃបំផុត នឹងត្រូវបានដាក់ឱ្យដំណើរការក្នុងពេលឆាប់ៗនេះ ។ លោក Wang បានបន្តទៀតថា WJ-1A មានសមត្ថភាពពិសេសក្នុងការគ្រប់គ្រងទិន្នន័យបានភ្លាមៗដើម្បីវិភាគ និងណែនាំ នៅពេលដែលផ្កាយរណបស្ថិតក្នុងគន្លងតារាវិថី។

យោងតាមការបញ្ជាក់របស់ក្រុមហ៊ុន ផ្កាយរណប AI អាចវិភាគលើផ្ទៃដី ១០,០០០ គីឡូម៉ែត្រការ៉េ និងធ្វើការតាមដានវត្ថុថាមវន្តក្នុងរយៈពេលតែប៉ុន្មានម៉ោងប៉ុណ្ណោះ ខណៈដែលផ្កាយរណបប្រពៃណីជាធម្មតាត្រូវការប្រហែល ១៨០ ថ្ងៃសម្រាប់កិច្ចការស្រដៀងគ្នា។ ដូចនេះបច្ចុប្បន្ន ក្រុមហ៊ុនកំពុងធ្វើការជាមួយដៃគូរួមទាំងទីភ្នាក់ងារអវកាស Rwandan និងសាកលវិទ្យាល័យ Sultan Qaboos ក្នុងប្រទេស Oman ដើម្បីស្វែងយល់ពីលទ្ធភាពថ្មីៗនៅក្នុងក្បួនដោះស្រាយដែលបានអនុវត្ត និងជួយពួកគេបណ្តុះបណ្តាលទេពកោសល្យក្នុងវិស័យ AI ។
ក្រុមហ៊ុនក៏មានគម្រោងពង្រីកបណ្តាញ WonderJourney ដល់ផ្កាយរណបចំនួន ២០ នៅចុងឆ្នាំ ២០២៤ ដោយសហការជាមួយដៃគូរបស់ក្រុមហ៊ុន ដើម្បីបង្កើនការគ្របដណ្តប់ និងប្រសិទ្ធភាពទំនាក់ទំនងសាកល៕ ប្រភព៖cafef.com

ប្រទេសថៃ ៖ កាលពីថ្ងៃទី២១ ខែសីហា ឆ្នាំ២០២៣ លោក Chaiwut Thanakmanusorn រដ្ឋមន្ត្រីក្រសួងសេដ្ឋកិច្ច និងសង្គមឌីជីថលប្រទេសថៃ លើកឡើងថា ក្រសួងនឹងដាក់ពាក្យបណ្តឹងទៅតុលាការដើម្បីស្នើឱ្យបិទការប្រើប្រាស់ហ្វេសប៊ុកនៅប្រទេសថៃ ។ ចំពោះមូលហេតុការស្នើសុំបិទហ្វេសប៊ុក ដោយសារកន្លងមក ហ្វេសប៊ុកបានទទួលប្រាក់ការផ្សាយពាណិជ្ជកម្មពីគេហទំព័រក្លែងក្លាយ ដែលពួកគេតែងបញ្ចុះបញ្ចូលឱ្យពលរដ្ឋថៃវិនិយោគទុន រហូតធ្វើឱ្យពលរដ្ឋថៃជាច្រើននាក់ខាតបង់ប្រាក់រាប់លានបាត ។ តាមស្ថិតិបង្ហាញថា ការបញ្ចុះបញ្ចូលឱ្យវិនិយោគក្នុងបណ្តាញសង្គមស្មើប្រមាណជាង៧០% គឺជាការបោកប្រាស់តាមហ្វេសប៊ុក និង៩០% គឺជាការលក់ផលិតផលតាមអនឡាញបោកប្រាស់ ។

លោក Chaiwut បន្តថា កន្លងមក ក្រុមហ៊ុនហ្វេសប៊ុកបានទទួលប្រាក់ពីគេហទំព័រក្លែងក្លាយទាំងនេះ ហើយគ្មានការត្រួតពិនិត្យថា តើគេហទំព័រទាំងនេះត្រឹមត្រូវតាមច្បាប់ ឬក្លែងក្លាយ ប៉ុន្តែហ្វេសប៊ុកបណ្តោយឱ្យគេហទំព័រក្លែងក្លាយបញ្ចុះបញ្ចូលពលរដ្ឋថៃជាច្រើននាក់ ។ បើទោះជាកន្លងមក ក្រសួងសេដ្ឋកិច្ច និងសង្គមឌីជីថលបានប្រមូល URLs ដើម្បីស្នើសុំបិទការប្រើប្រាស់ហ្វេសប៊ុក ប៉ុន្តែពួកគេបានសុំបើកគេហទំព័រឡើងវិញ ហើយវាដូចគ្នានឹងសត្វឆ្មាដេញចាប់កណ្តុរ តែមិនចេះអស់សោះ ។

លោក Chaiwut បន្ថែមថា ក្រសួងនឹងណែនាំឱ្យអ្នកដែលត្រូវគេបោកប្រាស់ទាំងអស់ដាក់ពាក្យបណ្តឹងគេហទំព័រក្លែងក្លាយទាំងរឿងរដ្ឋប្បវេណី និងព្រហ្មទណ្ឌ ហើយក្រសួងនឹងទំនាក់ទំនងទៅសមត្ថកិច្ចដើម្បីប្រមូលភស្តុតាង និងដាក់ពាក្យបណ្តឹងទៅតុលាការ ស្នើឱ្យក្រុមហ៊ុនហ្វេសប៊ុកឈប់ផ្តល់សេវាកម្មនៅប្រទេសថៃបន្តទៀត ។ វាបានរំលោភច្បាប់ឧក្រិដ្ឋកម្មកុំព្យូទ័រ ដោយសារហ្វេសប៊ុកបានសហការជាមួយជនល្មើស ហើយទទួលប្រាក់ផ្សាយពាណិជ្ជកម្មពីជនល្មើសទាំងនេះ ។

លោក Chaiwut បញ្ជាក់ថា ការស្នើសុំបិទហ្វេសប៊ុកនៅប្រទេសថៃ គឺជាការធ្វើតាមតួនាទី ព្រោះកន្លងមក លោកបានប្រទះឃើញការទិញពាណិជ្ជកម្មដើម្បីបោកប្រាស់ពលរដ្ឋថៃយ៉ាងច្រើន ។ ក្រសួងនឹងដំណើរការនៅខែសីហា ឆ្នាំ២០២៣ បន្ទាប់មក តុលាការនឹងសម្រេចថា តើនឹងបិទហ្វេសប៊ុកដែរឬទេ ព្រោះនេះជាអំណាចរបស់តុលាការ ចំណែករឿងថា តើវានឹងប៉ះពាល់ដល់សិទ្ធិអ្នកប្រើប្រាស់ទូទៅដែរឬអត់នោះ គឺត្រូវឱ្យតុលាការជាអ្នកពិចារណា ។ លោកសុំបំពេញតួនាទីជារដ្ឋមន្ត្រីក្រសួងសេដ្ឋកិច្ចដំបូងគេ ដែលប្តឹងហ្វេសប៊ុក ព្រោះក្រុមហ៊ុននេះបានរួមគ្នាប្រព្រឹត្តល្មើសជាមួយជនខិលខូច ហើយវាជាការងារចុងក្រោយផងដែរ មុននឹងលោកចុះចេញពីតំណែងជារដ្ឋមន្ត្រី ៕ ប្រភព ៖ sanook