រដ្ឋធានីខាទុម (Khartoum)៖ ការវាយប្រហារគ្នាដណ្ដើមអំណាច រវាងកម្លាំងគាំទ្រមេទ័ពកំពូលចំនួន២រូប នៅក្នុងប្រទេសស៊ូដង់ បានអូសបន្លាយ អស់រយៈពេល៤ខែកន្លមកហើយ រហូតធ្វើឲ្យប្រជាជនរបស់ប្រទេសអាហ្វ្រិកមួយនេះ ជាង១លាននាក់ រត់ភៀសខ្លួន និង ប្រឈមមុខនឹងការអត់អាហារស្លាប់ ហើយឥឡូវនេះ អង្គការសហប្រជាជាតិ ក៏បានប្រកាស អំពីស្ថានការណ៍គ្រប់គ្រងលែងបាន។

ទីភ្នាក់ងារសារព័ត៌មានរបស់បារាំង AFP បានចេញផ្សាយ នៅថ្ងៃពុធ ទី១៦ ខែសីហា ថា អង្គការសហប្រជាជាតិ ហៅកាត់ UN កាលពីថ្ងៃអង្គារ (ទី១៥ ខែសីហា) បានព្រមាន ថា ប្រជាជនស៊ូដង់ ជាង១លាននាក់ បានរត់គេចចេញពីប្រទេសរបស់ពួកគេ ដើម្បីស្វែងរកទីសុវត្ថិភាព នៅក្នុងប្រទេសជិតខាង។ រីឯប្រជាជនរស់ នៅក្នុងប្រទេសអាហ្វ្រិកមួយនេះ កំពុងតែអស់ស្បៀងអាហារ ហើយខ្លះបានស្លាប់ ដោយសារតែកង្វះខាតការថែទាំសុខភាព ខណៈសង្គ្រាមវាយប្រយុទ្ធដណ្តើមអំណាចគ្នា បានអូសបន្លាយ អស់រយៈពេល៤ខែកន្លងមក។

បើតាមទីភ្នាក់ងាររបស់អង្គការសហប្រជាជាតិ បានបញ្ជាក់ នៅក្នុងសេចក្តីថ្លែងការណ៍មួយ ថា «ប្រជាកសិករស៊ូដង់ នឹងជិតអស់ពេលវេលា សម្រាប់ពួកគេដាំដំណាំចិញ្ចឹម។ ទន្ទឹមគ្នានេះ ការផ្គត់ផ្គង់ផ្នែកវេជ្ជសាស្រ្ត ក៏កំពុងតែប្រឈមនឹងកង្វះខាត»។

មន្ត្រីជាន់ខ្ពស់ ស៊ូដង់ បានបញ្ជាក់ ថា ផែនការមួយ គួរតែត្រូវបានដាក់ចេញ ដើម្បីបញ្ចប់ជម្លោះរវាងកងទ័ព និង កងកម្លាំងគាំទ្ររហ័សប៉ារ៉ា (RSF) ចំពេលមានអំពើហិង្សា នៅតែបន្តកើតមានឡើង នៅក្នុងប្រទេសស៊ូដង់។

អនុប្រធានក្រុមប្រឹក្សាអធិបតេយ្យនៃប្រទេសស៊ូដង់ លោក Malik Agar បាននិយាយកាលពីថ្ងៃអង្គារថា រដ្ឋាភិបាលចាំផ្ទះត្រូវតែត្រូវបានបង្កើតឡើង ខណៈដែលការប្រយុទ្ធគ្នារវាងភាគីបានឈានចូលដល់ខែទីប្រាំរបស់ខ្លួន។

លោក ម៉ាលីក អាហ្គា (Malik Agar) អនុប្រធានក្រុមប្រឹក្សាអធិបតេយ្យស៊ូដង់ បានបញ្ជាក់ កាលពីថ្ងៃអង្គារ ថា រដ្ឋាភិបាលចាំផ្ទះ ត្រូវតែបង្កើតឡើង ខណៈការប្រយុទ្ធគ្នា រវាងភាគីជម្លោះទាំង២ បានឈានចូលដល់ខែទី៥។ ទីបំផុត សង្គ្រាមនេះនឹងត្រូវបញ្ចប់ នៅលើតុចរចា»។

សង្គ្រាមវាយប្រយុទ្ធគ្នា នៅក្នុងរដ្ឋាភិបាលយោធាស៊ូដង់ រវាងកម្លាំងរដ្ឋាភិបាលស៊ូដង់ (SAF) ដឹកនាំដោយលោកឧត្ដមសេនីយ៍ អាប់ដែល ហ្វាតតាស អាល់-ប៊ឺរហាន (Abdel Fattah al-Burhan) និង កម្លាំងទាហានប៉ារ៉ាគាំទ្ររហ័ស (RSF) ដឹកនាំដោយលោកឧត្ដមសេនីយ៍ ម៉ូហាមេដ ហាមដាន់ ណាហ្កាឡូ (Mohamed Hamdan Dagalo) ដែលគេហៅជាទូទៅលោក ហេមេដទី (Hemedti) បាន និង កំពុងតែបំផ្លិចបំផ្លាញរដ្ឋធានីខាទុម (Khartoum) និង បង្កហានិភ័យពីការវាយប្រហាររបស់ជនជាតិភាគតិច នៅទីក្រុងដាហ្វួរ (Darfur)។

ជម្លោះ រវាងកងកម្លាំងយោធារបស់ពួកឧត្ដមសេនីយ៍ទាំង២នេះ អាចនឹងធ្វើឲ្យប្រទេសស៊ូដង់ ធ្លាក់ចូលទៅក្នុងសង្រ្គាមស៊ីវិលដ៏រ៉ាំរ៉ៃ ក៏ដូចជា ការបង្កអស្ថិរភាព នៅក្នុងតំបន់។ សង្រ្គាមនេះ បានធ្វើឲ្យប្រជាជន ចំនួន ១ ០១៧ ៤៤៩នាក់ ឆ្លងដែនចេញពីប្រទេសស៊ូដង់ ឆ្ពោះទៅកាន់ប្រទេសជិតខាង។ ជនភៀសខ្លួនទាំងនោះ ភាគច្រើន កំពុងតែតស៊ូនឹងការលំបាក នៃផលប៉ះពាល់ ដោយសារតែសង្រ្គាម និង វិបត្តិសេដ្ឋកិច្ច៕

សិង្ហបុរី៖ សិង្ហបុរីជាប្រទេសមួយនៅអាស៊ីអាគ្នេយ៍មាន WiFi ដែលគ្មានលេខសម្ងាត់ច្រើន ប៉ុន្តែប្រសិនបើអ្នកច្រឡំចូលប្រើដោយមិនដឹងខ្លួន នោះអ្នកត្រូវផ្តន្ទាទោសពិន័យជាប្រាក់ ១០,០០០ ដុល្លារ ឬជាប់ពន្ធនាគាររហូតដល់ ៣ ឆ្នាំ។
ពិសេស នៅពេលធ្វើដំណើរក្នុងប្រទេសសិង្ហបុរី ភ្ញៀវទេសចរនឹងជួបប្រទះនឹងការប្រើ WiFi ឥតគិតថ្លៃជាច្រើនកន្លែង។ ទោះបីជាយ៉ាងណាក៏ដោយ នៅក្នុងប្រទេសនេះ ការភ្ជាប់ Wifi របស់អ្នកដទៃដោយបំពានត្រូវបានចាត់ទុកថាជាការលួចចូល ទោះបីជាភាគីម្ខាងទៀតមិនបានកំណត់ពាក្យសម្ងាត់ក៏ដោយ។

ប្រសិនបើអ្នកធ្វើដំណើរទៅផ្សារទំនើប ព្រលានយន្តហោះ ស្ថានីយ៍រថភ្លើង ឬសារមន្ទីរ ហើយត្រូវបានអ្នកនៅទីនោះអនុញ្ញាតឱ្យភ្ជាប់ WiFi គឺមិនអីនោះទេ។ ប៉ុន្តែចូលចងចាំថា បើអ្នកភ្ជាប់ WiFi ដោយមិនបានសុំការអនុញ្ញាតពីអ្នកដទៃនោះ អ្នកនឹងត្រូវពិន័យហើយ។ ជាក់ស្តែង ច្បាប់នេះមិនត្រឹមតែនៅក្នុងប្រទេសសិង្ហបុរីប៉ុណ្ណោះទេ បើយោងតាម AtlasVPN អ្នកដែលប្រើប្រាស់ WiFi ដែលគ្មានលេខសម្ងាត់របស់នរណាម្នាក់នៅក្នុងចក្រភពអង់គ្លេស អ៊ីតាលី ហុងកុង ឬកាណាដា ក៏ត្រូវបានផាកពិន័យអាស្រ័យលើបទប្បញ្ញត្តិនៃប្រទេស និងទឹកដីនីមួយៗផងដែរ។

ការប្រើប្រាស់វ៉ាយហ្វាយសាធារណៈអាចបណ្តាលឱ្យអ្នកប្រើប្រាស់លេចធ្លាយនូវទិន្នន័យផ្ទាល់ខ្លួន។ ឧក្រិដ្ឋជនតាមអ៊ីនធឺណែតអាចវាយប្រហារបណ្តាញ WiFi សាធារណៈដែលឧបករណ៍ត្រូវបានភ្ជាប់ នឹងកេងប្រវ័ញ្ចព័ត៌មានផ្ទាល់ខ្លួនរបស់អ្នកប្រើប្រាស់ដែលកំពុងចូលប្រើការតភ្ជាប់វ៉ាយហ្វាយសាធារណៈដើម្បីលួចទិន្នន័យអំពីគណនីធនាគារតាមអ៊ីនធឺណែត ឬសេវាកម្មហិរញ្ញវត្ថុសម្រាប់គោលបំណងលួចទ្រព្យសម្បត្តិ និងអ្នកប្រើប្រាស់ blackmail ដោយការផ្លាស់ប្តូរទិន្នន័យផ្ទាល់ខ្លួន។

លើសពីនេះទៀត WiFi សាធារណៈអាចនឹងរីករាលដាលមេរោគដែលអាចធ្វើឱ្យប៉ះពាល់ដល់សន្តិសុខសង្គម។ ឧក្រិដ្ឋជនតាមអ៊ីនធឺណែត ច្រើនតែចូលចិត្តវាយប្រហារបណ្តាញ ដែលត្រូវបានចូលប្រើដោយមនុស្សជាច្រើន។ ដូច្នោះហើយ អ្នកប្រើប្រាស់គួរតែស្វែងយល់ឱ្យច្បាស់ពីប្រភពដើមនៃបណ្តាញ WiFi សាធារណៈដែលពួកគេបានភ្ជាប់ ដោយជៀសវាងការលួចគណនីយពីពពួកសង្គមងងឹត៕ ប្រភព៖cafef.com

រាជធានីបាងកក៖ ចាប់តាំងពីការបោះឆ្នោតសកល កាលពីថ្ងៃទី១៤ ខែឧសភា ឆ្នាំ២០២៣ រហូតមកដល់ពេលនេះ ប្រទេសថៃ នៅតែបន្ដជាប់គាំងខាងនយោបាយ ស្របពេលគណបក្សឆ្ពោះទៅមុខ (Move Forward Party) ហៅកាត់ MFP ដែលមានអាសនៈសភាច្រើនជាងគេ បានប្រកាស មិនបោះឆ្នោត គាំទ្រដល់គណបក្សភឿថៃ ក្រោយពេលអតីតសម្ពន្ធភាពរបស់ខ្លួនងាកទៅចងសម្ពន្ធភាពថ្មី ជាមួយនឹងគណបក្សនយោបាយជាច្រើន គាំទ្រដោយយោធា។

សារព័ត៌មាន Channel News Asia មានមូលដ្ឋាន នៅក្នុងប្រទេសសិង្ហបុរី បានចេញផ្សាយ នៅថ្ងៃពុធ ទី១៦ ខែសីហា ថា គណបក្សឆ្ពោះទៅមុខ (Move Forward Party) ហៅកាត់ MFP ដែលបានឈ្នះការបោះឆ្នោតសកលរបស់ប្រទេសថៃ កាលពីថ្ងៃអង្គារ បានបដិសេធបោះឆ្នោតគាំទ្រគណបក្សភឿថៃ ជាអតីតដៃគូ ដែលកំពុងតែព្យាយាម បង្កើតរដ្ឋាភិបាលថ្មី។ សកម្មភាពបែបនេះនឹងធ្វើឲ្យខូចខាតដល់ទ្រង់ទ្រាយលទ្ធផលបោះឆ្នោត ព្រោះវាប្រឆាំងនឹងឆន្ទៈរបស់សាធារណជន។

គណបក្សឆ្ពោះទៅមុខ បានឈ្នះការបោះឆ្នោតសកល កាលពីថ្ងៃទី១៤ ខែឧសភា ដ៏គួរឲ្យភ្ញាក់ផ្អើល ខណៈគណបក្សភឿថៃ បានឈ្នះលំដាប់លេខ២។ គណបក្សប្រឆាំងដ៏ធំទាំង២នេះ បានផ្ដួលគូប្រជែងដ៏សំខាន់ ដែលជាគណបក្សអភិរក្សនិយម។ ជ័យជម្នះនេះ បានបង្ហាញ ថា ប្រជាជនថៃ បដិសេធនឹងរដ្ឋាភិបាល ដែលដឹកនាំ ឬ គាំទ្រដោយពួកយោធា គ្រប់គ្រប់ប្រទេសថៃ អស់រយៈពេល៩ឆ្នាំកន្លងមកនេះ។

ក្រោយពេលទទួលបានជ័យជម្នះ នៅក្នុងការបោះឆ្នោតសកលរួចមក គណបក្សឆ្ពោះទៅមុខ និង គណបក្សភឿថៃ ក៏បានចងសម្ពន្ធភាពជាមួយនឹងគណបក្ស ចំនួន៦ផ្សេងទៀត ព្យាយាមបង្កើតរដ្ឋាភិបាលចម្រុះថ្មី។ ប៉ុន្ដែសម្ពន្ធភាពរបស់គណបក្សប្រឆាំងដ៏ធំទាំង២នេះ បានដួលរលំទៅវិញ ក្រោយពេលសមាជិកសភា មកពីគណបក្សនយោបាយ គាំទ្រដោយយោធា និង សមាជិកព្រឹទ្ធសភា ដែលត្រូវបានពួកយោធាតែងតាំង មិនបោះឆ្នោតគាំទ្របេក្ខភាពនាយករដ្ឋមន្រ្ដីរបស់លោក ភីថា លីមចារឿនរ៉ាត (Pita Limjaroenrat) មេដឹកនាំគណបក្សឆ្ពោះទៅមុខ ចំនួន២ដង កាលពីខែមុន។

បច្ចុប្បន្ន ប្រទេសថៃ កំពុងតែស្ថិតក្រោមរដ្ឋាភិបាលចាំផ្ទះ អស់រយៈពេល៥ខែកន្លងមកហើយ ខណៈគណបក្សឆ្ពោះទៅមុខ បានប្រកាសមិនគាំទ្រ ដល់បេក្ខភាពនាយករដ្ឋមន្រ្ដី មកពីគណបក្សភឿថៃ។ ដូច្នេះ ការជាប់គាំងខាងនយោបាយរបស់ប្រទេសថៃ អាចនឹងបន្ដអូសបន្លាយ ពេលជាច្រើនខែ បន្ដទៅមុខបន្ថែមទៀត។

លោក ឆៃថាវ៉ាត ធូឡាថុន (Chaithawat Tulathon) អគ្គលេខាធិការ គណបក្សឆ្ពោះទៅមុខ បានថ្លែង ទៅកាន់សន្និសីទសារព័ត៌មាន ថា «ឥឡូវនេះ ការបង្កើតរដ្ឋាភិបាល មិនមែនឆ្លុះបញ្ចាំង អំពីសំឡេងរបស់ប្រជាពលរដ្ឋនោះឡើយ… ហើយវាកំពុងតែបំភ្លៃឆន្ទៈរបស់ប្រជាពលរដ្ឋ នៅក្នុងការបោះឆ្នោត»។

គណបក្សភឿថៃ ដែលមានបទពិសោធន៍ច្រើនខាងនយោបាយ ត្រូវបានក្រុមអ្នករិះគន់ ចោទប្រកាន់អំពីការជំរុញចលនាឆ្ពោះទៅមុខ ដើម្បីធានា ថា គណបក្សនេះ នឹងដឹកនាំរដ្ឋាភិបាល។

គណបក្សភឿថៃ បានលើកឡើង ថា គណបក្សភឿថៃ បានបោះបង់នូវការគាំទ្ររបស់ខ្លួន ដោយសារតែយល់ឃើញ ថា គណបក្សឆ្ពោះទៅមុខ នឹងនៅតែមិនអាចទទួលបានការគាំទ្រពីសភាទាំង២ ដែលប្រឆាំងនឹងការធ្វើវិសោធនកម្មលើមាត្រា១១២ នៃក្រមព្រហ្មទណ្ឌ ហើយត្រូវបានគេស្គាល់ ថា ជាច្បាប់ប្រមាថព្រះមហាក្សត្រ៕

បរទេស៖ ស្ត្រីជនជាតិឥណ្ឌាម្នាក់បានអាក់អន់ចិត្តជាមួយមិត្តប្រុសរបស់ខ្លួន ហើយក៏សម្រេចចិត្តឡើងបង្គោលអគ្គិសនីកម្ពស់ ២៤ ម៉ែត្រ ដោយប៉ុនប៉ងធ្វើអត្តឃាត។ ហេតុការណ៍នេះបានកើតឡើងក្នុងប្រទេសឥណ្ឌា ដោយអ្នកស្រុកភូមិនៅទីនោះបានឱ្យដឹងថា នារីដែលបានឡើងបង្គោលភ្លើងនោះមានឈ្មោះថា Anita ហើយនាងនិងមិត្តប្រុសរបស់នាងបានរស់នៅជាមួយគ្នាអស់រយៈពេលមួយឆ្នាំ បន្ទាប់ពីឈ្លោះប្រកែកគ្នាយ៉ាងក្តៅគគុកជាមួយមិត្តប្រុសរបស់នាង ស្រាប់តែនាងចង់គិតខ្លីបែបនេះតែម្តង។

ភ្លាមនោះដែរ មិត្តប្រុសរបស់នាងក៏បានស្រែកហៅនាងឱ្យមកចុះក្រោមវិញ ប៉ុន្តែទោះជាយ៉ាងណាក៏ដោយការចុះមកក្រោមវិញវាមិនមែនជារឿងងាយស្រួលទេ។ គួរកត់សម្គាល់ថា ការសម្រេចចិត្តដ៏គ្រោះថ្នាក់របស់ស្ត្រីនេះ ប្រឈមនឹងហានិភ័យដល់អាយុជីវិត ដោយសារបង្គោលអគ្គិសនីផ្ទុកតង់ស្យុងខ្ពស់ ដែលអាចបណ្តាលឱ្យឆក់ ឬធ្លាក់ពីកម្ពស់យ៉ាងធ្ងន់ធ្ងរ។ ប៉ុន្តែជាសំណាងល្អវត្តមានអ្នកស្រុកនៅជិតនោះក៏បានជូនដំណឹងភ្លាមៗដល់ប៉ូលីស ហើយក៏បានជួយគ្រប់គ្រងស្ថានការណ៍ឱ្យល្អឡើងវិញ។

វីដេអូនៃព្រឹត្តិការណ៍ដ៏គួរឱ្យភ្ញាក់ផ្អើលនោះបានល្បីពេញបណ្ដាញសង្គម ហើយហេតុការណ៍នេះមិនមែនជាលើកទីមួយនោះទេ។ កាលពីឆ្នាំ ២០១៧ ក៏មានបុរសឥណ្ឌាម្នាក់ស្រវឹងឡើងទៅលើបង្គោលភ្លើងផងដែរ។ បន្ទាប់មកនៅឆ្នាំ២០២០ មាននារីឥណ្ឌាម្នាក់បានឡើងបង្គោលភ្លើងហើយបដិសេធមិនចុះមកក្រោម មូលហេតុដោយសារតែនាងមានសតិមិនសូវល្អ៕ ប្រភព៖thethaiger

រដ្ឋធានីប៉េកាំង៖ ស្របពេលចំនួនការអត់ការងារធ្វើ កំពុងតែកើនឡើង ហើយកំណើនសេដ្ឋកិច្ចកំពុងតែធ្លាក់ចុះនោះ ធនាគារកណ្ដាលរបស់ប្រទេសចិន បានកាត់បន្ថយនូវអត្រាការប្រាក់ ដោយមិនមានការរំពឹងទុកជាមុន សម្រាប់ការជំរុញសេដ្ឋកិច្ចរបស់ខ្លួន ឲ្យងើបឡើងវិញ។

ទីភ្នាក់ងារសារព័ត៌មានរបស់ចក្រភពអង់គ្លេស Reuters បានចេញផ្សាយ កាលពីថ្ងៃអង្គារ ទី១៥ ខែសីហា ថា ធនាគារកណ្ដាលរបស់ប្រទេសចិន កាលពីថ្ងៃអង្គារ បានកាត់បន្ថយអត្រា ដែលជាគោលនយោបាយដ៏សំខាន់ ជាលើកទីពីរ ដោយមិននឹកស្មានដល់ នៅក្នុងរយៈពេល៣ខែកន្លងមកនេះ។ សញ្ញាថ្មីមួយនេះ បង្ហាញ ថា អាជ្ញាធរចិន កំពុងតែបង្កើននូវកិច្ចខិតខំប្រឹងប្រែង បន្ធូរបន្ថយរូបិយវត្ថុ សម្រាប់ជំរុញសេដ្ឋកិច្ចរបស់ខ្លួន ឲ្យស្ទុះងើបឡើងវិញ។

ក្រុមអ្នកវិភាគ បានយល់ឃើញ ថា សកម្មភាពបែបនេះ បានបើកទ្វារចំហ ឆ្ពោះទៅរកការកាត់បន្ថយសក្តានុពល សម្រាប់អត្រាការប្រាក់កម្ចីគោល (LPR) របស់ប្រទេសចិន នៅសប្តាហ៍ក្រោយ។

ក្រុមអ្នកឃ្លាំមើលទីផ្សារ បានអះអាង ថា ការធ្លាក់ចុះកំណើនឥណទាន និង ការកើនឡើងហានិភ័យបរិត្តផរណា នៅក្នុងខែកក្កដា ត្រូវតែមានការវិធានការបន្ធូរបន្ថយរូបិយវត្ថុបន្ថែមទៀត សម្រាប់ទប់ទល់ខ្លួន ពីការធ្លាក់ចុះនេះ ស្របពេលមានហានិភ័យ ចំពោះបណ្ដាក្រុមហ៊ុនអភិវឌ្ឍន៍លំនៅឋានមួយចំនួន និង ការខកខាននូវការទូទាត់ ដោយអ្នកគ្រប់គ្រងទ្រព្យសម្បត្តិឯកជន ក៏ប៉ះពាល់ដល់ទំនុកចិត្តទីផ្សារហិរញ្ញវត្ថុផងដែរ។

លោក ថមមី វូ (Tommy Wu) សេដ្ឋវិទូជាន់ខ្ពស់របស់ប្រទេសចិន នៅធនាគារ Commerzbank (ខមមើសបែងខ៍) បានអះអាង ថា «បញ្ហាទាំងអស់នេះ បន្ថែមទៅលើភាពបន្ទាន់ ដែលក្រុមអ្នកបង្កើតគោលនយោបាយ ត្រូវតែធ្វើសកម្មភាពឱ្យបានឆាប់រហ័ស នៅមុនពេលទំនុកចិត្តរបស់អ្នកប្រើប្រាស់ និង អាជីវកម្ម ធ្លាក់ចុះយ៉ាងខ្លាំង»។

ធនាគារប្រជាជនចិន (PBOC) បានបញ្ជាក់ ថា ធនាគារបានបញ្ចុះអត្រាការប្រាក់ ដល់ប្រាក់យន់ (Yuan លុយចិន) ចំនួន ៤០១ពាន់លានយន់ ឬស្មើនឹង៥៥,២៥ពាន់លានដុល្លារអាមេរិកដែលមានតម្លៃ សម្រាប់ប្រាក់កម្ចី រយៈពេលមធ្យម១ឆ្នាំ (MLF) ដល់ស្ថាប័នហិរញ្ញវត្ថុមួយចំនួនដោយចំណុចគោលចំនួន១៥ ដែលពីមុន២,៦៥ភាគរយ មក២,៥០ភាគរយ។

ធនាគារប្រជាជនចិន បានបញ្ជាក់ នៅក្នុងសេចក្ដីថ្លែងការណ៍មួយ តាមអនឡាញ ថា ការបញ្ចេញសាច់ប្រាក់ គឺទប់ទល់នឹងកត្តាជាច្រើន រួមការបង់ពន្ធ ដើម្បីរក្សាសាច់ប្រាក់របស់ប្រព័ន្ធធនាគារ ឱ្យមានគ្រប់គ្រាន់។

លោក ខេន ចេង (Ken Cheung) ប្រធានយុទ្ធសាស្រ្ដ FX អាស៊ី នៃធនាគារ Mizuho (មីហ្សូហូ) បានបញ្ជាក់ ថា ការកាត់បន្ថយអត្រាគួរឱ្យភ្ញាក់ផ្អើល ក្លាយជាការឆ្លើយតបភ្លាមៗ សម្រាប់គាំទ្រដល់ទិន្នន័យឥណទាន ដែលធ្លាក់ចុះ។ រីឯការងើបឡើងវិញ នៃសេដ្ឋកិច្ចចិន អាចនឹងរងសម្ពាធ ពីការធ្លាក់ចុះប្រាក់យន់ រហូតដល់៧,៣ ក្នុង១ដុល្លារ។

ប្រទេសចិន បានបន្ធូរបន្ថយនូវគោលនយោបាយរូបិយវត្ថុ សម្រាប់ជួយឲ្យសេដ្ឋកិច្ចរបស់ខ្លួនស្ទុះឡើងវិញ ស្របពេលប្រទេសផ្សេងៗទៀត កំពុងតែស្ថិតក្នុងវដ្តរឹតបន្តឹង ខណៈបណ្ដាប្រទេសទាំងនោះ កំពុងតែប្រយុទ្ធនឹងអតិផរណាកើនឡើងខ្ពស់។ ការផ្លាស់ប្ដូរអត្រាការប្រាក់ កាលពីថ្ងៃអង្គារ បានពង្រីកគម្លាតទិន្នផល ជាមួយនឹងសេដ្ឋកិច្ចរបស់បណ្ដាប្រទេសមហាអំណាចផ្សេងៗទៀត ជាពិសេស សហរដ្ឋអាមេរិក ដែលកំពុងតែដាក់សម្ពាធ កាន់តែខ្លាំងឡើង មកលើប្រាក់យន់ និង ហានិភ័យលំហូរចេញ។

ប្រាក់យន់របស់ចិន បានធ្លាក់ចុះប្រហែល៥ភាគរយ ធៀបនឹងប្រាក់ដុល្លារ ហើយរហូតមកដល់ឆ្នាំនេះ ប្រាក់យន់ ក្លាយជារូបិយប័ណ្ណអាស៊ីមួយ មានដំណើរការមិនសូវល្អ។ ប្រាក់យន់ បានជួញដូរ គឺ៧,២៨យន់ នៅក្នុងមួយដុល្លារ ធៀបនឹងការបិទការជួញដូរ កាលពីមុន មានតម្លៃ ៧,២៥យន់។ ធនាគារប្រជាជនចិន បានបញ្ចុះអត្រាការប្រាក់ ដែលជាគោលនយោបាយដ៏សំខាន់ នៅក្នុងមិថុនា ដើម្បីទប់ទល់នឹងសេដ្ឋកិច្ចដ៏ធំនេះ ប៉ុន្ដែទិន្នន័យ នៅតែថយចុះខ្លាំង។

បើតាមសារព័ត៌មាន Al Jazeera បានចេញផ្សាយ កាលពីថ្ងៃសៅរ៍ ទី១២ ខែសីហា ថា ក្រុមមន្រ្ដីសេតវិមានរបស់ប្រធានាធិបតីសហរដ្ឋអាមេរិក បានថ្លែង ថា លោកប្រធានាធិបតី ចូ បៃដិន (Joe Biden) បានបញ្ជាក់ កាលពីថ្ងៃព្រហស្បតិ៍មុន ថា «ប្រទេសចិន កំពុងតែប្រឈមមុខនឹងបញ្ហា ជាមួយនឹងការរុំព័ទ្ធទៅដោយបញ្ហាសេដ្ឋកិច្ច និង សង្គម។ បញ្ហាទាំងនេះ មិនមែនជារឿងល្អនោះឡើយ ព្រោះថា នៅពេលណាមនុស្សអាក្រក់ ប្រឈមមុខនឹងបញ្ហាជាច្រើន ពួកគេនឹងធ្វើអាក្រក់បន្ថែមទៀត។ សេដ្ឋកិច្ចរបស់ប្រទេសចិន មានកំណើនត្រឹមតែ៨ភាគរយ នៅក្នុងមួយឆ្នាំ ហើយត្រូវតែរក្សាកំណើននេះ។ ប៉ុន្ដែឥឡូវ មានកំណើនជិត២ភាគរយ នៅក្នុងមួយឆ្នាំ ដោយនឹកស្មានមិនដល់ អំពីអត្រាកំណើនរបស់ប្រទេសមហាយក្សអាស៊ីមួយនេះ ធ្លាក់បែបនេះឡយ»។

ដោយឡែក ទិន្នន័យរបស់ការិយាល័យស្ថិតិជាតិរបស់ប្រទេសចិន បានបង្ហាញ ថា សេដ្ឋកិច្ចរបស់ចិន បានកើនឡើង ៤,៥ភាគរយ នៅក្នុងត្រីមាសទី១ និង ៦,៣ភាគរយ នៅក្នុងត្រីមាសទី២ ជាមួយនឹងផលិតផលក្នុងស្រុកសរុប (GDP) កើនឡើង ត្រឹមតែ០,៨ភាគរយ ចន្លោះពីខែមេសា ដល់ខែមិថុនា បើធៀបនឹងត្រីមាសមុន ក្រោយការកើនឡើង ២,២ភាគរយ នៅក្នុងត្រីមាសទីមួយ។

សារព័ត៌មានរបស់ចក្រភពអង់គ្លេស BBC បានចេញផ្សាយ កាលពីថ្ងៃទី១១ ខែសីហា ថា ចំនួននិស្សិតទើបនឹងបញ្ចប់ការសិក្សា នៅតាមសាកលវិទ្យាល័យនានា ចំនួន ១១,៥៨លាននាក់ ត្រូវបានគេរំពឹង ថា នឹងសម្រុកចូលទៅក្នុងទីផ្សារការងារ នៅឆ្នាំ២០២៣៕