ប្រទេសឡាវ ៖ តម្លៃប្រេងឥន្ធនៈកើនឡើងយ៉ាងឆាប់រហ័ស បានធ្វើឱ្យពលរដ្ឋឡាវងាកមកប្រើប្រាស់រថយន្តអគ្គិសនីកាន់តែច្រើនដើម្បីសន្សំសំចៃប្រេង និងកាត់បន្ថយការបំពុលបរិយាកាស ។ ចំណែករដ្ឋាភិបាលឡាវ ក៏បានគាំទ្រឱ្យពលរដ្ឋប្រើប្រាស់រថយន្តអគ្គិសនីផងដែរ ដើម្បីអភិវឌ្ឍន៍ការប្រើថាមពលស្អាតក្នុងផ្នែកដឹកជញ្ជូន, កាត់បន្ថយភាពចាំបាច់នៃការនាំចូលប្រេង និងធានាសុវត្ថិភាពថាមពលកាន់តែខ្លាំង ។

កាលពីឆ្នាំ២០២២ ចំនួនការប្រើប្រាស់យានយន្តអគ្គិសនីនៅឡាវ ស្មើនឹង៣.២០១គ្រឿង ក្នុងនោះរថយន្តអគ្គិសនីស្មើ១.៤២៨គ្រឿង និងម៉ូតូអគ្គិសនីស្មើ១.៧៧៣គ្រឿង ។ បច្ចុប្បន្ន មានស្ថានីយសាកថ្មជាង២០កន្លែងនៅប្រទេសឡាវ និងតំណាងចែកចាយ១៨កន្លែងបានបង្ហាញការចាប់អារម្មណ៍នាំចូលរថយន្តអគ្គិសនីមកលក់នៅទូទាំងប្រទេសឡាវ ។ កាលពីខែមេសា ឆ្នាំ២០២៣ ឡាវបាននាំចូលយានយន្តអគ្គិសនីចំនួន៣.៨៩៥គ្រឿង ក្នុងនោះមានម៉ូតូអគ្គិសនីចំនួន១.៧៧៣គ្រឿង ។

Buavanh Vilavong ជាមន្ត្រីអគ្គនាយកដ្ឋានឧស្សាហកម្ម និងសិប្បកម្ម ដែលស្ថិតក្រោមក្រសួងឧស្សាហកម្ម និងពាណិជ្ជកម្មឡាវ លើកឡើងថា ការប្រើប្រាស់រថយន្តអគ្គិសនីនៅឡាវ គឺជារឿងបន្ទាន់ និងជួយកាត់បន្ថយថវិកាសម្រាប់នាំចូលប្រេង ។ ឡាវត្រូវចំណាយថវិកាច្រើនណាស់សម្រាប់នាំចូលប្រេង គឺស្មើនឹង២០% នៃតម្លៃនាំចូលទំនិញសរុបរបស់ប្រទេស ។ ទោះយ៉ាងណា ប្រទេសឡាវមានសក្តានុពលខ្ពស់ក្នុងការផលិតអគ្គិសនី ដែលជួយជំរុញឱ្យពលរដ្ឋប្រើប្រាស់យានយន្តអគ្គិសនីនៅទូទាំងប្រទេសគឺជារឿងត្រឹមត្រូវ ក្នុងការប្រើប្រយោជន៍ពីធនធានធម្មជាតិដែលមានស្រាប់ និងរក្សាតុល្យភាពពាណិជ្ជកម្ម ។

កាលពីខែកក្កដា ឆ្នាំ២០២៣ ប្រទេសឡាវបាននាំចូលប្រេងម៉ាស៊ូត ស្មើទឹកប្រាក់ប្រមាណ៦៥លានដុល្លារអាមេរិក ខណៈការនាំចូលប្រេងសាំងធម្មតា និងប្រេងសាំង Premium ស្មើទឹកប្រាក់២០លានដុល្លារអាមេរិក ។ ប៉ុន្តែនៅខែសីហា ឆ្នាំ២០២៣ តាមទិន្នន័យផ្លូវការបញ្ជាក់ថា តម្លៃការនាំចូលប្រេងបានធ្លាក់ចុះមកនៅត្រឹម៥៨លានដុល្លារអាមេរិកសម្រាប់ប្រេងម៉ាស៊ូត និង១៧លានដុល្លារអាមេរិកសម្រាប់ប្រេងសាំងធម្មតា និងប្រេងសាំង Premium ដោយសាររដ្ឋាភិបាលឡាវលើកទឹកចិត្តឱ្យពលរដ្ឋប្រើរថយន្តអគ្គិសនី ។

តម្លៃប្រាក់គីបរបស់ឡាវបានធ្លាក់ចុះជាបន្តបន្ទាប់ ស្របពេលតម្លៃប្រេងនៅលើពិភពលោកកើនឡើងខ្ពស់ បានធ្វើឱ្យប៉ះពាល់ដល់ក្រុមហ៊ុនចែកចាយប្រេង ។ ហេតុនេះ ប្រទេសឡាវត្រូវនាំចូលប្រេងពីក្រៅប្រទេស និងទូទាត់ជារូបិយប័ណ្ណបរទេស ហើយលក់ឱ្យអតិថិជនគិតជាប្រាក់គីប ។ លើសពីនេះ ដើម្បីការពារមិនឱ្យការនាំចូលប្រេងធ្លាក់ចុះ រដ្ឋាភិបាលត្រូវធានាថា ក្រុមហ៊ុននាំចូលប្រេងនានានឹងទទួលបានរូបិយប័ណ្ណបរទេសគ្រប់គ្រាន់សម្រាប់ការទិញប្រេងទាំងអស់ ដែលចាំបាច់សម្រាប់អតិថិជនឡាវ ៕ ប្រភព ៖ AEC connect

ប្រទេសថៃ ៖ អ្នកនាង ថាផានី គៀតផៃប៊ូន (Thapanee Kiattipaiboon) មន្ត្រីអាជ្ញាធរទេសចរណ៍ថៃលើកឡើងថា នៅចុងឆ្នាំ២០២៣ វិស័យទេសចរណ៍ប្រទេសថៃបានប្រឈមនឹងផលប៉ះពាល់ចំនួន២ គឺ ៖ ហេតុការណ៍បា.ញ់ប្រហា.រនៅ Siam Paragon និងកើតសង្គ្រា.មកាន់តែធ្ងន់ធ្ងរនៅប្រទេសក្នុងតំបន់មជ្ឈិមបូព៌ា ។ ហេតុការណ៍បា.ញ់ប្រហា.រដែលបង្កឡើងដោយក្មេងប្រុសអាយុ១៤ឆ្នាំ នឹងប៉ះពាល់ដល់វិស័យទេសចរណ៍ថៃរយៈពេលខ្លីទៅលើភ្ញៀវទេសចរចិន ជាពិសេស ក្រុមភ្ញៀវទេសចរមកប្រទេសថៃដោយខ្លួនឯង ។

អ្នកនាង ថាផានី គៀតផៃប៊ូន មន្ត្រីអាជ្ញាធរទេសចរណ៍ថៃបន្តថា ហេតុការណ៍នៅ Siam Paragon ធ្វើឱ្យគ្រប់គ្នាភ័យតក់ស្លុ.ត និងបារម្ភពីហេតុការណ៍កើតឡើង ដោយសារតួលេខការកក់សំបុត្រធ្វើដំណើរពីប្រទេសចិនមកថៃធ្លាក់ចុះ ។ ប៉ុន្តែសម្រាប់អ្នកធ្វើដំណើរមកប្រជុំ និងសិក្ខាសាលានៅប្រទេសថៃ គឺមានតួលេខធម្មតា និងគ្មានការលុបចោលការធ្វើដំណើរទេ ។

សង្គ្រាមនៅប្រទេសអ៊ីស្រាអែលជាមួយក្រុមហាម៉ាស់ គឺជាហេតុការណ៍មួយធ្ងន់ធ្ងរ ហើយជាដំបូង វានឹងប៉ះពាល់ដល់អារម្មណ៍របស់ភ្ញៀវទេសចរមានភាពស្ទាក់ស្ទើរក្នុងការធ្វើដំណើរ ហើយពួកគេរង់ចាំមើលស្ថានការណ៍សិន ។ បច្ចុប្បន្ន មានភ្ញៀវទេសចរអ៊ីស្រាអែលធ្វើដំណើរមកប្រទេសថៃស្មើប្រមាណ១៨ម៉ឺននាក់ ហើយនៅចុងឆ្នាំ២០២៣ ថៃរំពឹងថា ភ្ញៀវទេសចរអ៊ីស្រាអែលនឹងកើនឡើងដល់២០ម៉ឺននាក់ ដោយសារមានជើងយន្តហោះត្រង់រវាងទីក្រុង Tel Aviv ជាមួយភូកេត និងក្រុងបាងកក ហើយនៅមិនទាន់មានការលុបការធ្វើដំណើរទេ ។

ចំណែកលោក ឆាន់ថាថាន់ គុនឆន (Chanthathan Kunchorn) មន្ត្រីទទួលបន្ទុកទេសចរណ៍នៅអាស៊ី និងប៉ាស៊ីហ្វិកខាងត្បូងលើកឡើងថា អាជ្ញាធរទេសចរណ៍ថៃ បានកែសម្រួលផែនការទីផ្សារទេសចរណ៍ជាច្រើនទម្រង់ ដើម្បីទប់ទល់នឹងស្ថានការណ៍គ្រោះថ្នាក់ទាំងអស់ ព្រមទាំងបានត្រៀមផែនការផ្សព្វផ្សាយពីតំបន់ទេសចរណ៍ប្រទេសថៃឱ្យភ្ញៀវទេសចរអាចមកលេងពេញមួយឆ្នាំផងដែរ ។ ប្រទេសថៃមិនចាំបាច់ផ្តោតតែលើទេសចរណ៍តាមរដូវកាលទេ ដើម្បីប្រាកដចិត្តថា នឹងមានភ្ញៀវទេសចរបរទេសមកកម្សាន្តនៅថៃកាន់តែច្រើន និងពេញមួយឆ្នាំ ។

រីឯអ្នកនាង វ៉ាន់ឡាផា ត្រៃសុរ៉ាត (Wanlapa Traisorat) នាយកក្រុមហ៊ុន Asset World Corp. ជឿជាក់ថា នៅត្រីមាសទី៤ ឆ្នាំ២០២៣ វិស័យទេសចរណ៍ថៃនឹងងើបឡើងវិញ ដោយសារចំនួនការកក់បន្ទប់ស្នាក់នៅ និងអត្រាតម្លៃបន្ទប់ក្នុង១យប់ គឺមានចំនួនស្មើគ្នានឹងមុនពេលផ្ទុះជំងឺកូវីដ-១៩ ។ ចំណែកភ្ញៀវទេសចរចិនចាប់ផ្តើមធ្វើដំណើរមកថៃជាបណ្តើរៗហើយ ប៉ុន្តែពួកគេនៅរង់ចាំមើលស្ថានការណ៍ជ្រួលច្របល់លើពិភពលោក ។ ខាងក្រុមហ៊ុនបានសហការជាមួយអាជ្ញាធរទេសចរណ៍ប្រទេសថៃ និងមូលនិធិ «ម៉ែហ្វាហ្លួង» អនុវត្តគម្រោង AWC Stay to Sustain ដើម្បីជំរុញថៃឱ្យក្លាយជាប្រទេសគោលដៅទេសចរណ៍ប្រកបដោយនិរន្តរភាពលំដាប់ពិភពលោក ៕ ប្រភព ៖ 3plus News

ប្រទេសថៃ ៖ មុនកិច្ចប្រជុំសភាតំណាងរាស្ត្រ នៅថ្ងៃទី១១ ខែតុលា ឆ្នាំ២០២៣ ប្រធានសភាតំណាងរាស្ត្របានបើកឱកាសឱ្យសមាជិកជជែកពិភាក្សាពីបញ្ហាផ្សេងៗ ហើយអ្នកនាង ឆាណុក ចាន់ថាថង (Chanok Chanthathong) សមាជិកសភាតំណាងរាស្ត្រមកពីគណបក្សភឿថៃ ប្រចាំខេត្តណងខាយ បានលើកឡើងអំពីបញ្ហាពលករថៃ ដែលរងផលប៉ះពាល់ដោយសារការវា.យប្រហា.រនៅប្រទេសអ៊ីស្រាអែល ដោយពលករថៃទៅធ្វើការនៅអ៊ីស្រាអែល ស្មើនឹង២៥.០០០នាក់ ហើយក្នុងចំនួននេះ ជាពលករមកពីតំបន់ឦសាន ស្មើរហូតដល់១៩.០០០នាក់ ។

អ្នកនាង ឆាណុក ចាន់ថាថង សមាជិកសភាតំណាងរាស្ត្រប្រចាំខេត្តណងខាយ លើកឡើងថា ពលករថៃទៅធ្វើការនៅអ៊ីស្រាអែល ដោយសារពួកគេមានជីវភាពក្រីក្រ ហើយត្រូវខ្ចីប្រាក់គេដើម្បីបានទៅធ្វើការនៅក្រៅប្រទេស ។ ហេតុនេះ អ្នកនាងចង់អំពាវនាវទៅនាយករដ្ឋមន្ត្រីថៃ និងរដ្ឋមន្ត្រីពាក់ព័ន្ធឱ្យជួយទំនាក់ទំនងទៅពួកគេ និងចាត់វិធានការជួយសង្គ្រោះពលករថៃនៅអ៊ីស្រាអែល ។ រដ្ឋាភិបាលគួរតែផ្តល់ប្រាក់ឱ្យក្រុមគ្រួសារស.ពពលករ, ជួយឧបត្ថម្ភពលករគ្មានការងារធ្វើ និងជម្លៀសពួកគេមកប្រទេសថៃវិញ ដើម្បីកាត់បន្ថយការបារម្ភពីពលករថៃនៅអ៊ីស្រាអែល ។

ចំណែកលោក អានុថីន ឆានវីរៈគូន (Anutin Chanvirakul) ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ លើកឡើងថា បច្ចុប្បន្ន លោកបានបញ្ជាទៅនាយកដ្ឋានអភិវឌ្ឍន៍សហគមន៍ធ្វើការស្រាវជ្រាវ និងតាមដានគ្រួសាររបស់ពលករថៃនៅអ៊ីស្រាអែល ដែលរងផលប៉ះពាល់ដោយសារសង្គ្រា.មរួចហើយ ។ លើសពីនេះ លោកក៏បានទំនាក់ទំនងជាមួយក្រសួងការងារផងដែរ ករណីពលករថៃនៅអ៊ីស្រាអែលធ្វើដំណើរមកប្រទេសថៃវិញ ប៉ុន្តែគ្មានការងារធ្វើ ។ ដូច្នេះ យើងនឹងមានវិធានការជួយពួកគេបន្តទៀត ។

រីឯលោក ផីផាត រ៉ាជឆាកិច្ចប្រាកាន (Pipat Ratchakitprakarn) រដ្ឋមន្ត្រីក្រសួងការងារបានលើកឡើងពីការជួយសង្គ្រោះពលករថៃនៅអ៊ីស្រាអែលថា នៅថ្ងៃទី១១ ខែតុលា ឆ្នាំ២០២៣ អ្នករងរបួ.សចំនួន១៥នាក់បានធ្វើដំណើរចាកចេញពីប្រទេសអ៊ីស្រាអែល ហើយមកដល់ថៃនៅថ្ងៃទី១២ ខែតុលា ។ ចំណែកចំនួនអ្នកចុះឈ្មោះសុំធ្វើដំណើរត្រឡប់មកប្រទេសថៃវិញ គឺស្មើនឹង៣.០២៦នាក់ ។ ក្រុមការងារបានត្រៀមយន្តហោះកងទ័ពអាកាស ហើយនឹងទៅដល់អ៊ីស្រាអែល នៅថ្ងៃទី១៥ ខែតុលា ដើម្បីទទួលយកពលករថៃត្រឡប់មកផ្ទះវិញភ្លាមៗ ដែលទទួលបានការអនុញ្ញាតពីអាជ្ញាធរអ៊ីស្រាអែល ៕ ប្រភព ៖ beartaiBRIEF

រដ្ឋធានីតេអ៊ីរ៉ង់៖ អ៊ីរ៉ង់ ចាប់ផ្ដើមអូសទាញសម្ពន្ធមិត្តរបស់ខ្លួន ប្រឆាំងនឹងសហរដ្ឋអាមេរិក ខណៈបញ្ជូនកងនាវាផ្ទុកយន្ដហោះចម្បាំង ទៅកាន់តំបន់ភាគខាងកើតសមុទ្រមេឌីទែររ៉ាណេ នៅក្នុងន័យគំរាមកំហែងដល់រដ្ឋាភិបាលក្រុងតេអ៊ីរ៉ង់ កុំឲ្យពាក់ព័ន្ធនឹងសង្គ្រាមអ៊ីស្រាអែល-ហាម៉ាស់។

ទីភ្នាក់ងារសារព័ត៌មានរបស់ចក្រភពអង់គ្លេស Reuters បានចេញផ្សាយ កាលពីព្រឹក ថ្ងៃពុធ ទី១១ ខែតុលា ថា សហរដ្ឋអាមេរិក បានបញ្ជូនកងនាវាផ្ទុកយន្ដហោះចម្បាំង ទៅកាន់សមុទ្រមេឌីទែររ៉ាណេ ជាសារដ៏សំខាន់បំផុត ទៅកាន់ប្រទេសអ៊ីរ៉ង់ មិនឲ្យចូលខ្លួនមកពាក់ព័ន្ធ នៅក្នុងជម្លោះ រវាងអ៊ីស្រាអែលហាម៉ាស់។

ដោយឡែក រដ្ឋាភិបាលតេអ៊ីរ៉ង់ វិញ បានអូសទាញក្រុមចលនាប្រដាប់អាវុធដ៏មានឥទ្ធិពលបំផុត នៅក្នុងប្រទេសអ៊ីរ៉ាក់ និង ក្រុមឧទ្ទាមហ៊ូធី (Houthi) នៅក្នុងប្រទេសយេមែន ដែលជាសម្ពន្ធភាពដ៏ជិតស្និទ្ធ ជាមួយប្រទេសអ៊ីរ៉ង់ កំពុងតែគំរាមប្រើប្រាស់ដ្រូន និង មីស៊ីល វាយប្រហារ ប្រឆាំងនឹងមូលដ្ឋានកងទ័ពសហរដ្ឋអាមេរិក នៅក្នុងតំបន់មជ្ឈិមបូព៌ា ប្រសិនបើរដ្ឋាភិបាលក្រុងវ៉ាស៊ីនតោន ចេញធ្វើអន្តរាគមន៍ ជួយគាំទ្រដល់ប្រទេសអ៊ីស្រាអែល កំពុងតែធ្វើសង្គ្រាម ប្រឆាំងនឹងកងជីវពលហាម៉ាស់ នៅលើទឹកដីហ្កាហ្សា។

ការគំរាមកំហែងដល់សន្ដិសុខ មកលើមូលដ្ឋានកងទ័ពសហរដ្ឋអាមេរិក បានកើតឡើង ត្រឹមតែប៉ុន្មានថ្ងៃប៉ុណ្ណោះ ក្រោយពេលលោក ចូ បៃដិន ប្រធានាធិបតីអាមេរិក សន្យាបង្កើនការគាំទ្រទ្វេដង ជួយដល់ប្រទេសអ៊ីស្រាអែល ដើម្បីឆ្លើយតបទៅនឹងការវាយប្រហាររបស់ក្រុមហាម៉ាស់។

លោកប្រធានាធិបតី បៃដិន បានប្រកាស អំពីការបង្កើនជំនួយយោធាបន្ថែមទៀត ជួយដល់ប្រទេសអ៊ីស្រាអែល ហើយបានបញ្ជាឲ្យដាក់ពង្រាយកងនាវាផ្ទុកយន្ដហោះចម្បាំង ទៅកាន់តំបន់ភាគខាងកើត នៃសមុទ្រមេឌីទែររ៉ាណេ នៅជិតនឹងប្រទេសអ៊ីស្រាអែល។

ជាប្រតិកម្មប្រឆាំងនោះ ក្រុមចលនាប្រដាប់អាវុធកាតាអ៊ីប ហេសប៊ូលឡាហ៍ (Kataib Hezbollah) នៅក្នុងប្រទេសអ៊ីរ៉ាក់ មានសម្ពន្ធភាពយ៉ាងជិតស្និទ្ធជាមួយអ៊ីរ៉ង់ បានបញ្ជាក់ ថា ពួកគេនឹងប្រើប្រាស់ដ្រូន ហើយមីស៊ីល វាយប្រហារ ប្រឆាំងនឹងមូលដ្ឋាននានារបស់កងទ័ពសហរដ្ឋអាមេរិក ប្រសិនបើរដ្ឋាភិបាលក្រុងវ៉ាស៊ីនតោន ចេញមកធ្វើអន្តរាគមន៍ នៅក្នុងសង្រ្គាម រវាងអ៊ីស្រាអែល និង ហាម៉ាស់។

ស្របគ្នានេះ ក្រុមឧទ្ទាមហ៊ូធី (Houthi) នៅក្នុងប្រទេសយេមែន បានព្រមាន ថាពួកគេនឹងឆ្លើយតបទៅនឹងអន្តរាគមន៍ណាមួយរបស់សហរដ្ឋអាមេរិក ក្នុងតំបន់ហ្កាហ្សា។ ពួកគេនឹងប្រើប្រាស់ដ្រូន មីស៊ីល និង ជម្រើសយោធាផ្សេងៗ វាយប្រហារទៅលើមូលដ្ឋាននានារបស់កងទ័ពសហរដ្ឋអាមេរិក។

ជម្លោះ រវាងអ៊ីស្រាអែល និង កងជីវពលហាម៉ាស់ ចាប់តាំងពីថ្ងៃទី៧ ខែតុលា ឆ្នាំ២០២៣ រហូតមកដល់ថ្ងៃទី១១ ខែតុលា នេះ បានធ្វើឲ្យជនជាតិប៉ាឡេស្ទីន យ៉ាងតិច ៩០០នាក់ស្លាប់ និង ជាង ៤ ៥០០នាក់រងរបួស ខណៈជនជាតិអ៊ីស្រាអែល ជាង ១០០០នាក់ស្លាប់ និង រងរបួស យ៉ាងតិច ២៨០០នាក់។

បើតាមអង្គការសហប្រជាជាតិ បានប៉ាន់ប្រមាណ ថា ប្រជាពលរដ្ឋ ជាង ១៣៧ ០០០ នៅក្នុងចំណោម ១៨៧ ៥០០នាក់ បានរត់ភៀសខ្លួន នៅក្នុងតំបន់ហ្កាហ្សា ដើម្បីស្វែងរកទីជម្រកសុវត្ថិភាព។

ដោយឡែក អ៊ីស្រាអែល កំពុងតែកងទ័ពបម្រុង ជាង ៣០០ ០០០នាក់ សម្រាប់បង្កើនការវាយប្រហារសងសឹក ប្រឆាំងនឹងក្រុមជីវពលហាម៉ាស់ប៉ាឡេស្ទីន នៅក្នុងតំបន់ហ្កាហ្សា៕

បរទេស៖ ថ្មីៗនេះយោងតាមប្រភពព័ត៌មាន BBC ដែលរាយការណ៍នៅថ្ងៃទី១១ ខែតុលាថា ពលរដ្ឋថៃបានស្លាប់ច្រើនជាងគេក្នុងចំណោមជនបរទេសទាំងអស់ ពីសង្គ្រាមអ៊ីស្រាអែល និងហាម៉ាស ដែលចំនួនអ្នកស្លាប់មានរហូតទៅដល់ ១៨ នាក់ និងសហរដ្ឋអាមេរិកមាន ១៤ នាក់។
សង្រ្គាមសាសនារវាងអ៊ីស្រាអែល និងក្រុមហាម៉ាស បានចាប់ផ្តើមតាំងពីចុងសប្តាហ៍មុន បណ្តាលឱ្យមានមនុស្សស្លាប់ជិត ២,០០០ នាក់ ក្នុងនោះជនជាតិអ៊ីស្រាអែលស្លាប់ចំនួន ១,១០០នាក់ ខណៈប្រជាជននៅតំបន់ហ្គាហ្សាមានចំនួន ៨៣០ នាក់បានស្លាប់។ លើសពីនេះ ជនបរទេសជាច្រើនក៏ត្រូវបានសម្លាប់ និងចាប់ធ្វើជាចំណាប់ខ្មាំងផងដែរ។

យោងតាមរបាយការណ៍របស់ BBC បានឱ្យដឹងទៀតថា ថៃគឺជាប្រទេសដែលមានពលរដ្ឋបាត់បង់ជីវិតច្រើនជាងគេនៅក្នុងក្រុមជនបរទេសទាំងអស់ ដោយមានអ្នកស្លាប់រហូតដល់ ១៨នាក់ និងមនុស្ស ១១នាក់ទៀតត្រូវបានចាប់ធ្វើជាចំណាប់ខ្មាំង ខណៈដែលកម្មករថៃជាង ៣០,០០០ នាក់កំពុងស្ថិតនៅក្នុងប្រទេសអ៊ីស្រាអែល ។ ចំណែកជនបរទេសផ្សេងទៀតក៏បានបាត់បង់ជីវិតដែររួមមាន៖
-សហរដ្ឋអាមេរិក ១៤ នាក់ស្លាប់ និងបាត់ខ្លួនជាង ២០ នាក់។
-អង់គ្លេស ១០ នាក់ស្លាប់។
-ប្រទេសកម្ពុជា ស្លាប់ ១ នាក់។
-នេប៉ាល់ ស្លាប់ ១០នាក់។
-អាហ្សង់ទីន ស្លាប់ ៧នាក់ និងបាត់ខ្លួន ១៥នាក់។
-អ៊ុយក្រែន ២ នាក់ស្លាប់។
-បារាំង ស្លាប់ ២នាក់ និងបាត់ខ្លួន ១៤នាក់។
-ចិន ១នាក់បាត់ខ្លួន។
-អៀរឡង់ ១នាក់បាត់ខ្លួន។
-កាណាដា ស្លាប់ ១នាក់ និងបាត់ខ្លួន ២នាក់។
-ប្រទេសអូទ្រីស ឃាត់ខ្លួន ៣នាក់។
-ប្រទេសអ៊ីតាលី បាត់ខ្លួន២នាក់។
-ប្រេស៊ីល បាត់ខ្លួន ៣នាក់ របួសធ្ងន់ ១នាក់។
-និងតង់ហ្សានី បាត់ខ្លួន ២នាក់៕

បរទេស៖ ​ភ្ញៀវ​ទេសចរ​មួយគូបានស្នាក់​នៅ​សណ្ឋាគាររយៈពេលមួយយប់ បន្ទាប់មកនៅពេលភ្ញាក់ពីគេងពួកគេស្រាប់តែឃើញសត្វប្រចៀវចំនួនជាង ២៥០ ក្បាលដេកផ្ងារលើវាំងនន និងខ្លះទៀតហើរជុំវិញបន្ទប់ ដោយម្ចាស់សណ្ឋាគារបដិសេធមិនទទួលខុសត្រូវឡើយ។

ហេតុការណ៍នេះកើតឡើងនៅថ្ងៃទី១០ ខែតុលាថ្មីៗនេះ ដោយប្តីប្រពន្ធមួយគូរបានធ្វើការកក់បន្ទប់សណ្ឋាគារលំដាប់ផ្កាយ ៣ នៅតំបន់ Plzeň ក្នុងសាធារណរដ្ឋឆេក។ មុនពេលចូលគេង ពួកគេមានអារម្មណ៍ថាបន្ទប់ក្តៅទើបបើកបង្អួច ហើយទុកទ្វារចោលតាមសាលធំ ដើម្បីឱ្យខ្យល់ងាយស្រួលចេញចូល។ នៅព្រឹកបន្ទាប់ ពួកគេក៏ឃើញថាមានសត្វប្រចៀវពាសពេញវាំងនន ជញ្ជាំង និងពិដាននៃបន្ទប់ ដោយមានការហោះហើរខ្លះៗ និងបង្កសំលេងរំខានយ៉ាងខ្លាំង។

ភ្ញៀវទេសចរមួយគូនេះក៏បានយក​ទូរស័ព្ទ​ដៃ​ថត​ទុក​ក្នុង​បន្ទប់​យ៉ាង​លឿន រួច​រត់ចេញពីបន្ទប់​​សណ្ឋាគារ​ដើម្បី​សុំ​ជំនួយ។ បន្ទាប់​មក​បុគ្គលិក​សណ្ឋាគារម្នាក់ក៏បានទាក់ទងទៅអជ្ញាធរ​ដើម្បីឱ្យ​មក​ជួយ រួចគាត់ក៏ប្រញាប់​ប្រញាល់ប្រើ​តែ​សំណាញ់​ទៅ​ចាប់​ហ្វូង​ប្រចៀវ​​នោះយ៉ាង​លឿន។ ភ្លាមនោះ ចំនួនសត្វប្រចៀវដែលអាជ្ញាធរចាប់បានមានសរុបចំនួន ២៥៦ ក្បាល ក្នុងនោះមានប្រចៀវងាប់ចំនួន ១១ ក្បាល។

ទោះ​ជា​យ៉ាង​ណា​ក៏ដោយ ​ភ្ញៀវទេសចរទាំង​ពីរ​ក៏បាននិយាយ​ជាមួយ​ម្ចាស់សណ្ឋាគារឱ្យទទួលខុសត្រូវ ប៉ុន្តែចម្លើយគឺថានេះមិនមែនជាកំហុសរបស់សណ្ឋាគារនោះទេ។ ព្រោះសណ្ឋាគារបានចែក​ខិត្តប័ណ្ណ​ឱ្យភ្ញៀវទេសចរគ្រប់គ្នា ដោយសរសេរថាភ្ញៀវ​ទាំង​អស់​ត្រូវ​បាន​ហាម​មិន​ឱ្យ​បើក​បង្អួច​ពេល​យប់ ព្រោះ​ប្រចៀវឬ​សត្វ​ព្រៃ​តូចៗ​អាចនឹង​ចូល​ក្នុង​បន្ទប់គេង នៅពេលដែលភ្ញៀវមិនគោរពតាមកិច្ចព្រមព្រៀង សណ្ឋាគារសូមរក្សាសិទ្ធិ និងមិនទទួលខុសត្រូវឡើយ៕