ប្រទេសព្រុយណេ ៖ កាលពីថ្ងៃទី១០ ខែតុលា ឆ្នាំ២០២៣ នៅសណ្ឋាគារ Empire Brunei លោក សេដ្ឋា ថាវីស៊ីន នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុប្រទេសថៃ បានជួបពិភាក្សាជាមួយនាយកគ្រប់គ្រង Brunei Investment Agency (BIA) នៅប្រទេសព្រុយណេ ក្នុងគោលបំណងជំរុញប្រទេសថៃឱ្យក្លាយជាមជ្ឈមណ្ឌលអាហារហាឡាល ។

លោក សេដ្ឋា ថាវីស៊ីន នាយករដ្ឋមន្ត្រីថៃបានលើកឡើងពីកិច្ចសហការក្នុងផ្នែកមានសក្តានុពលរបស់ប្រទេសថៃ និងព្រុយណេ ។ តាមរយៈការពិភាក្សាជាមួយព្រះមហាក្សត្រព្រុយណេ ពាក់ព័ន្ធនឹងការនាំចេញផលិតផលហាឡាលរបស់ថៃ និងសន្តិសុខស្បៀងអាហារ គឺចាត់ទុកថា វាជាគោលនយោបាយមួយក្នុងចំណោមគោលនយោបាយចម្បងរបស់ថៃ ដើម្បីក្លាយជាមជ្ឈមណ្ឌលអាហារហាឡាល ។ ប្រទេសថៃមានវត្ថុធាតុដើម និងអាចអភិវឌ្ឍន៍បច្ចេកវិទ្យាសម្រាប់ជួយកែលម្អ, ផ្លាស់ប្តូរ និងអភិវឌ្ឍន៍គុណភាពម្ហូបអាហារ (Food Technology) ផងដែរ ។

បើទោះជាស្ថិតក្នុងដំណាក់កាលចាប់ផ្តើមដំបូងក្តី ប៉ុន្តែរដ្ឋាភិបាលថៃប្តេជ្ញាថា នឹងបោះជំហានទៅមុខ ហើយជឿជាក់ថា នឹងមានទីផ្សារនាំចេញយ៉ាងពិតប្រាកដ ។ លើសពីនេះ ប្រទេសព្រុយណេ គឺជាចំណុចតភ្ជាប់សម្រាប់ជនមូស្លីម ដែលធ្វើឱ្យរដ្ឋាភិបាលថៃកាន់តែជឿជាក់ថា ប្រទេសថៃនឹងអាចបន្តកិច្ចសហការនេះ ។

ចំណែកនាយកគ្រប់គ្រង Brunei Investment Agency (BIA) លើកឡើងថា BIA បានត្រៀមចរចាដើម្បីពង្រឹងកិច្ចសហការ ហើយប្រទេសព្រុយណេផ្តល់ភាពសំខាន់លើសន្តិសុខស្បៀងអាហារ ខណៈព្រុយណេទើបបើកប្រទេសក្រោយការឆ្លងរាតត្បាតនៃជំងឺកូវីដ-១៩ ។ ប្រទេសព្រុយណេបានសហការលើការនាំចេញអង្ករជាមួយថៃ ខណៈថៃជាប្រទេសនាំមុខគេផ្នែកកសិកម្ម ។ ដូច្នេះ នាយកគ្រប់គ្រង BIA សង្ឃឹមថា នឹងអាចសហការគ្នាកាន់តែជិតស្និទ្ធក្នុងផ្នែកនេះ ។

លើសពីនេះ ភាគីទាំងពីរក៏បានឯកភាពគ្នាថា នឹងពិភាក្សាជាមួយស្ថាប័នពាក់ព័ន្ធរបស់ប្រទេសទាំងពីរផងដែរ ដើម្បីឱ្យកិច្ចសហការនេះឆ្ពោះទៅមុខលើតំបន់មានសក្តានុពលរួម ។ ប្រទេសព្រុយណេសង្ឃឹមថា នឹងអាចរៀនសូត្រពីបទពិសោធន៍ និងជំនាញនានាពីប្រទេសថៃក្នុងផ្នែកផ្សេងៗបន្តទៀត ។

Brunei Investment Agency (BIA) គឺជាភ្នាក់ងារវិនិយោគដែលបង្កើតឡើងដោយព្រះមហាក្សត្រព្រុយណេ ក្នុងគោលបំណងគ្រប់គ្រងទុនបម្រុងរបស់ព្រុយណេ តាមរយៈការវិនិយោគលើទ្រព្យសម្បត្តិផ្សេងៗរបស់បណ្តាប្រទេសលើពិភពលោក ។ ភ្នាក់ងារនេះស្ថិតនៅក្រោមការគ្រប់គ្រងរបស់រដ្ឋាភិបាលព្រុយណេ ដែលមានក្រសួងហិរញ្ញវត្ថុ និងសេដ្ឋកិច្ចគ្រប់គ្រងដោយផ្ទាល់ និងមានការិយាល័យកណ្តាលនៅបាន់ដាសេរី បេហ្គាវ៉ាន់ ប្រទេសព្រុយណេ ៕ ប្រភព ៖ 3plus News

ប្រទេសថៃ ៖ ពលរដ្ឋរស់នៅខេត្តនគររាជសីម៉ា ប្រទេសថៃ បានសម្លឹងឃើញឱកាសសម្រាប់ដំណាំក្រូចសើច ដែលមានតម្រូវការខ្ពស់នៅលើទីផ្សារទាំងការនាំចេញ និងការកែច្នៃ ។ ហេតុនេះ កសិករក៏បានសម្រេចចិត្តចំណាយដើមទុនដាំដើមក្រូចសើចចំនួន៧ពាន់ដើម និងប្រើប្រាស់ប្រព័ន្ធកសិកម្មឆ្លាតវៃសម្រាប់ថែទាំដំណាំ ។

លោក សុឆាតិ លុងសាំរ៉ូង មានមុខរបរជាអ្នកម៉ៅការសំណង់ ហើយលោកក៏បានសម្រេចចិត្តដាំដើមក្រូចសើចធ្វើជាមុខរបរទី២ បន្ថែមទៀតដើម្បីយកស្លឹកលក់ ដោយការប្រើប្រាស់ប្រព័ន្ធកសិកម្មឆ្លាតវៃជួយថែទាំដំណាំ ។ លោកបានដាំដើមក្រូចសើចចំនួន៧ពាន់ដើមនៅលើផ្ទៃដី០.៣២ហិកតា នៅស្រុកតាខុប ស្រុកប៉ាថុងឆ័យ ខេត្តនគររាជសីម៉ា ហើយលោកប្រាប់ថា លោកបានដំឡើងឧបករណ៍គ្រប់គ្រងការស្រោចទឹកដើមក្រូចសើចដែលទើបដាំថ្មី ហើយការដាំដុះ ត្រូវមានគម្លាតគ្នាពីដើមមួយទៅដើមមួយទៀត ចំនួន៥០សង់ទីម៉ែត្រ ។

លោក សុឆាតិ សង្ឃឹមថា ក្រោយពីបានដាំដុះដំណាំក្រូចសើចរយៈពេល៨ខែ លោកនឹងអាចកាត់ស្លឹករបស់វាលក់បាន ។ លើសពីនេះ អ្នកលក់ពូជដើមក្រូចសើច បានសុំទិញទិន្នផលផលិតទាំងអស់ ហើយលោកជឿថា គ្មានបញ្ហារឿងទីផ្សារទេ ។ លោកថា ៖ «ស្លឹកក្រូចសើចមានតម្លៃថ្លៃគួរសម នៅតាមផ្សារនីមួយៗឃើញថា ស្លឹកក្រូចសើចមានតម្លៃ៥០បាតក្នុង១គីឡូក្រាម ហើយខ្ញុំត្រូវកាត់ស្លឹកនៅជាប់នឹងមែករបស់វាដើម្បីលក់បានថ្លៃ ។ ខ្ញុំបានថែទាំតាំងពីចាប់ផ្តើមដាំ រហូតដល់វាមានអាយុ៨ខែ ទើបកាត់ស្លឹកលក់» ។

លោកបានតាំងចិត្តថា នឹងដាំដើមក្រូចសើចឱ្យបាន១ម៉ឺនដើម ព្រោះលោកសម្លឹងឃើញឱកាសថា ក្រូចសើចអាចនាំចេញ ឬកែច្នៃបាន ហើយបើលោកអាចថែទាំដើមវាបានល្អ គឺលោកអាចកាត់ត្រួយរបស់វាលក់បានមិនក្រោម១០ឆ្នាំទេ ។ ចំណែកការថែទាំដំណាំនេះ លោក សុឆាតិ ប្រាប់ថា តាមធម្មជាតិ ក្រូចសើច ជាដំណាំធុននឹងជំងឺ និងមានសត្វល្អិតយាយីតិចតួច បើធៀបនឹងដំណាំផ្សេងទៀត ។ ទោះយ៉ាងណា ត្រូវប្រយ័ត្នជំងឺផ្សិត និងដង្កូវស៊ីស្លឹក ជាពិសេស ក្នុងអំឡុងពេលដាំដំបូង ដែលដើមរបស់វាមិនទាន់រឹងមាំល្អ គឺត្រូវថែទាំជាពិសេស ៕ ប្រភព ៖ Thai PBS

បរទេស៖ យោងតាមប្រភពព័ត៌មាន Interesting Engineering ដែលបានចុះផ្សាយកាលពីថ្ងៃទី៩ ខែតុលាថា រដ្ឋាភិបាល UAE កំពុងពិចារណាសាងសង់រថភ្លើងល្បឿនលឿន ក្នុងគោលបំណងកាត់បន្ថយពេលវេលា ដោយក្រុមហ៊ុនមានគម្រោងតភ្ជាប់សមុទ្រអារ៉ាប់ជាមួយទីក្រុង Mumbai ប្រទេសឥណ្ឌា។
ដូច្នេះ អ្នកដែលធ្វើដំណើរពី Mumbai ទៅ United Arab Emirates (UAE) នាពេលអនាគតអាចជ្រើសរើសមធ្យោបាយដឹកជញ្ជូនដោយរថភ្លើងឆ្លងកាត់សមុទ្រជំនួសឱ្យការហោះហើរ។ គម្រោងនេះមិនត្រឹមតែបម្រើអ្នកដំណើរដែលចង់ផ្លាស់ប្តូរផ្លូវធ្វើដំណើរប៉ុណ្ណោះទេ ប៉ុន្តែថែមទាំងជួយពង្រីកពាណិជ្ជកម្មជាមួយប្រទេសឥណ្ឌាផងដែរ។ 

សហព័ន្ធអារ៉ាប់រួមរំពឹងថា រថភ្លើងឆ្លងកាត់សមុទ្ររបស់ខ្លួនអាចរត់ក្នុងល្បឿនរហូតដល់ ១,០០០ គីឡូម៉ែត្រក្នុងមួយម៉ោង ខណៈដែលចម្ងាយរវាងទីតាំងទាំងពីរគឺតិចជាង ២,០០០ គីឡូម៉ែត្រ។ ប៉ុន្តែការសាងសង់នៅក្នុងទឹកជ្រៅគឺជាបញ្ហាប្រឈមដ៏សំខាន់មួយ ក្នុងការត្រួសត្រាយផ្លូវរូងក្រោមដីដោយឥដ្ឋស្រអាប់ ហើយគម្រោងនេះក៏ទាមទារទុនវិនិយោគច្រើនផងដែរ យ៉ាងហោចណាស់ក៏រាប់ពាន់លានដុល្លារអាមេរិក។ ទោះជាយ៉ាណាក៏ដោយ បច្ចុប្បន្នក្រុមហ៊ុន National Advisor Bureau Limited នៅក្នុង UAE ក៏កំពុងពិចារណាលើគម្រោងបែបនេះ និងធ្វើរបាយការណ៍លទ្ធភាពច្បាស់លាស់មួយ។

គួរបញ្ជាក់ដែរថា សហព័ន្ធអារ៉ាប់រួមមានភាពល្បីល្បាញសម្រាប់គម្រោងខ្នាតធំដូចជាអគារខ្ពស់កប់ពពករបស់ពិភពលោក និងកោះ Palm Islands ដែលសាងសង់នៅឆ្នេរសមុទ្រឌូបៃ។ ហេតុនេះហើយ នៅក្នុងគម្រោងធំបន្ទាប់ UAE នឹងស្វែងរកការឆ្លងកាត់សមុទ្រអារ៉ាប់ ដោយភ្ជាប់រដ្ឋធានីហិរញ្ញវត្ថុរបស់ឥណ្ឌា Mumbai ជាមួយទីក្រុងកំពង់ផែ Fujairah របស់ខ្លួន។ ផែនការនេះត្រូវបានណែនាំជាលើកដំបូងនៅក្នុងឆ្នាំ ២០១៨ ប៉ុន្តែវាមិនទាន់ដល់ពេលនោះទេ ដោយថ្មីៗនេះ UAE ទើបតែបានស្វែងរកការលើកកម្ពស់ការសាងសង់បន្ថែម៕

ប្រទេសអ៊ីស្រាអែល ៖ ប្រទេសជាច្រើនចាប់ផ្តើមបញ្ជូនយន្តហោះមនុស្សធម៌ទៅកាន់ប្រទេសអ៊ីស្រាអែល ដើម្បីជម្លៀសពលរដ្ឋរបស់ខ្លួនចេញពីតំបន់មានជម្លោះរវាងអ៊ីស្រាអែល និងក្រុមហាម៉ាស់ ក្រោយពីក្រុមហាម៉ាស់បើកប្រតិបត្តិការកងទ័ពវា.យលុ.កមកលើអ៊ីស្រាអែល កាលពីថ្ងៃទី៧ ខែតុលា ឆ្នាំ២០២៣ ។ ការវា.យលុ.កនេះបានបណ្តាលឱ្យពលរដ្ឋអ៊ីស្រាអែលស្លា.ប់ជាង៩០០នាក់ ខណៈពលរដ្ឋប៉ាឡេស្ទីនស្លា.ប់៦២៦នាក់ និងរ.ងរបួ.សសរុបជិត៥.០០០នាក់ ។

រដ្ឋមន្ត្រីក្រសួងការបរទេសប្រទេសម៉ិកស៊ិក ឈ្មោះ អាលិសៀ បាសេណា បានថ្លែងកាលពីថ្ងៃទី៨ ខែតុលា កន្លងមកថា មានជនជាតិម៉ិកស៊ិកចំនួន២នាក់ស្ថិតក្នុងក្រុមចំណាប់ខ្មាំង ដែលក្រុមហាម៉ាស់ចាប់ធ្វើជាចំណាប់ខ្មាំងមួយចំនួន ។ លោក អាន់ដ្រែស ម៉ានូអែល ឡូប៉ែស អូប្រាឌ័រ ប្រធានាធិបតីម៉ិកស៊ិកបញ្ជាក់ថា នឹងមានយន្តហោះមនុស្សធម៌ចំនួន២ជើងទៅកាន់ប្រទេសអ៊ីស្រាអែល ដើម្បីទទួលយកពលរដ្ឋឱ្យត្រឡប់មកប្រទេសវិញ ។ លោកបន្តថា មានពលរដ្ឋម៉ិកស៊ិករស់នៅអ៊ីស្រាអែលប្រមាណ៥.០០០នាក់ ក្នុងនោះពលរដ្ឋចំនួន៣.០០០នាក់ចង់ធ្វើដំណើរមកប្រទេសខ្លួនវិញ ។

ចំណែកប្រទេសឈីលីបានបញ្ជូនយន្តហោះមនុស្សធម៌ទៅកាន់អ៊ីស្រាអែល កាលពីថ្ងៃទី៩ ខែតុលា កន្លងមក ។ ក្រសួងការបរទេសឈីលីបញ្ជាក់ថា មានពលរដ្ឋឈីលី យ៉ាងហោចណាស់ម្នាក់បានបាត់ខ្លួន ក្រោយពីក្រុមហាម៉ាស់វា.យលុ.កអ៊ីស្រាអែល ។ លើសពីនេះ មានភ្ញៀវទេសចរឈីលីនៅអ៊ីស្រាអែលចំនួន១១៣នាក់ និង២៧នាក់ទៀតស្ថិតនៅទឹកដីប៉ាឡេស្ទីន ។

រីឯប្រទេសហុងក្រី និងអាល់បានី ក៏បានជម្លៀសពលរដ្ឋរបស់ពួកគេចេញពីអ៊ីស្រាអែលជាបន្តបន្ទាប់ផងដែរ ហើយគេសង្ឃឹមថា នឹងមានការបញ្ជូនយន្តហោះពិសេសបន្ថែមទៀតទៅកាន់ទីក្រុង Tel Aviv ដើម្បីជួយសង្គ្រោះពលរដ្ឋឱ្យធ្វើដំណើរត្រឡប់មកប្រទេសវិញប្រកបដោយសុវត្ថិភាព ។

ដូចគ្នានេះ ក្រសួងការបរទេសថៃ ក៏បានត្រៀមខ្លួនបញ្ជូនពលរដ្ឋថៃនៅអ៊ីស្រាអែលឱ្យត្រឡប់មកប្រទេសថៃវិញ ប្រសិនបើស្ថានការណ៍ជម្លោះនេះកាន់តែរាលដាលខ្លាំង រហូតធ្វើឱ្យប៉ះពាល់ដល់សុវត្ថិភាពពលរដ្ឋថៃនៅអ៊ីស្រាអែល ។ ពលរដ្ឋថៃដែលស្នាក់នៅប្រទេសអ៊ីស្រាអែល គឺស្មើប្រមាណ៣ម៉ឺននាក់ ក្នុងនោះភាគច្រើនជាពលករធ្វើការផ្នែកកសិកម្ម ។

ក្រសួងការបរទេសថៃបញ្ជាក់ថា មានពលរដ្ឋថៃស្លា.ប់ក្នុងហេតុការណ៍នេះចំនួន១៨នាក់, រ.ងរបួ.ស៩នាក់ និងមានពលរដ្ឋថៃត្រូវឃុំខ្លួនដោយកងកម្លាំងទាហានប៉ាឡេស្ទីន ចំនួន១១នាក់ ។ ក្រៅពីពលរដ្ឋថៃហើយ ក៏មានពលរដ្ឋអ៊ីស្រាអែល, ហ្វីលីពីន, នេប៉ាល់ និងហ្សកហ្ស៊ីផងដែរ ត្រូវបានគេចាប់ឃុំខ្លួន ។

លោកស្រី កាន់ចាណា ផាន់ឆូក អ្នកនាំពាក្យក្រសួងការបរទេសថៃថ្លែងថា ៖ «កងទ័ពអ៊ីស្រាអែលបានសហការជាមួយភ្នាក់ងារពាក់ព័ន្ធក្នុងតំបន់ដើម្បីជម្លៀសពលរដ្ឋប្រទេសផ្សេងៗ រួមទាំងពលករថៃផងដែរចេញពីតំបន់មានគ្រោះថ្នាក់បំផុត ។ យើងបានទទួលការរាយការណ៍ថា មានពលរដ្ឋថៃរាប់រយនាក់បានភៀសខ្លួនទៅកាន់តំបន់មានសុវត្ថិភាពហើយ» ៕ ប្រភព ៖ TNN World