បរទេស៖ ស្រាទំពាំងបាយជូរ ២.២ លានលីត្របានហូរនៅតាមដងផ្លូវនៃទីក្រុង Sao Lorenco de Bairro ប្រទេសព័រទុយហ្គាល់ នៅពេលដែលធុងទឹករបស់រោងចក្របានផ្ទុះឡើង។

ធុងស្រាចំនួនពីរនៃរោងចក្រ Levira ក្នុងទីក្រុង Sao Lorenco de Bairro តំបន់ Anadia ភាគខាងលិចប្រទេសព័រទុយហ្គាល់ បានបាក់កាលពីថ្ងៃទី ១០ ខែកញ្ញា ដោយបង្កើតបានជាទឹកជ្រោះពណ៌ក្រហមដ៏ធំហូរចេញពីភ្នំដ៏ចោតចុះមកតាមដងផ្លូវក្នុងទីក្រុងដែលមានមនុស្សរស់នៅ ២,០០០ នាក់។

ឧបទ្ទវហេតុនេះមិនបណ្តាលឱ្យមានអ្នករងរបួស ឬខូចខាតសម្ភារៈដល់មនុស្សនៅក្នុងទីក្រុងនោះឡើយ ប៉ុន្តែអ្នកពន្លត់អគ្គីភ័យ Anadia ត្រូវតែធ្វើការដើម្បីបង្វែរលំហូរទៅកាន់វាលស្រែមួយដើម្បីការពារស្រាពីការហៀរចូលទៅក្នុងទន្លេ Certima ដែលនៅក្បែរនោះ។ បរិមាណស្រាដែលលេចធ្លាយនោះមានច្រើនដែលវាអាចបំពេញអាងហែលទឹកអូឡាំពិកបានយ៉ាងពេញលេញ។

យោងតាមសេចក្តីថ្លែងការណ៍របស់រោងចក្រ Levira បាននិយាយថា “យើងនឹងទទួលខុសត្រូវទាំងស្រុងចំពោះការចំណាយដែលទាក់ទងនឹងការសម្អាត រួមជាមួយការជួសជុល ហើយយើងនឹងប្តេជ្ញាដោះស្រាយស្ថានភាពនេះឱ្យបានលឿនតាមដែលអាចធ្វើទៅបាន” ។ Levira បាននិយាយថា វាមិនច្បាស់ទេថាហេតុអ្វីបានជាធុងស្រាចំនួនពីរនៅរោងចក្រ Levira បានផ្ទុះ។ Levira ក៏បានបន្តទៀតថាស្តុកស្រាដ៏ធំរបស់ខ្លួនគឺទាក់ទងទៅនឹង “វិបត្តិលើសស្តុក” នៃស្រានៅអឺរ៉ុបដោយសារតែតម្រូវការកាត់បន្ថយ។

កាលពីខែមិថុនា គណៈកម្មការអឺរ៉ុបបានទទួលស្គាល់ការផ្គត់ផ្គង់លើសចំណុះ ហើយបាននិយាយថា ខ្លួននឹងគាំទ្រវិធានការដើម្បីបំប្លែងស្រាទៅជាជីវឥន្ធនៈ។ យោងតាមគណៈកម្មការ ការប្រើប្រាស់ស្រានៅ ប្រទេសព័រទុយហ្គាល់ នៅឆ្នាំនេះត្រូវបានគេរំពឹងថានឹងថយចុះ ៣៤% បើធៀបនឹងឆ្នាំ ២០២២។ ដូច្នេះហើយ ការប្រើប្រាស់ស្រាក៏ត្រូវបានព្យាករណ៍ថានឹងធ្លាក់ចុះយ៉ាងខ្លាំងនៅក្នុងប្រទេសអាល្លឺម៉ង់ បារាំង អេស្ប៉ាញ និងអ៊ីតាលីផងដែរ៕
ប្រភព៖vnexpress

បរទេស៖ យោងតាមប្រធានាធិបតីពូទីនបាននិយាយថាមនុស្ស ២៧០,០០០ នាក់បានចូលរួមជាមួយកងទ័ពរុស្ស៊ីក្នុងរយៈពេល ៦-៧ ខែចុងក្រោយនេះក្នុងនាមជាទាហានកិច្ចសន្យាអាជីព។

លោកប្រធានាធិបតី វ្ល៉ាឌីមៀ ពូទីន បាននិយាយនៅឯវេទិកាសេដ្ឋកិច្ចបូព៌ា (EEF) ថា “យើងមានការចល័តផ្នែកខ្លះនៃអ្នកបម្រុងប្រហែល ៣០០.០០០ នាក់ ឥឡូវនេះក្នុងរយៈពេល ៦-៧ ខែកន្លងមកនេះ មនុស្ស ២៧០,០០០ នាក់បានចុះកិច្ចសន្យាដោយស្ម័គ្រចិត្តដើម្បីបម្រើក្នុងកងកម្លាំងប្រដាប់អាវុធ និងអង្គភាពស្ម័គ្រចិត្តនៅថ្ងៃនេះ”។

អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev បានសង្កត់ធ្ងន់ថា “មនុស្សជាង ១,០០០ ទៅ ១,៥០០ នាក់បានមកចុះកិច្ចសន្យាជាមួយកងកម្លាំងប្រដាប់អាវុធរុស្ស៊ីជារៀងរាល់ថ្ងៃ” ដោយអ្នកខ្លះមកពីទុនបម្រុងយោធា ហើយអ្នកខ្លះទៀតក៏ស្ម័គ្រចិត្តចូលបម្រើកងទ័ព។

កន្លងមកកាលពីឆ្នាំមុនមន្ត្រីរុស្ស៊ីបានប្រកាសពីផែនការបង្កើនទំហំកងកម្លាំងប្រដាប់អាវុធលើសពី ៣០% ដល់ ១.៥ លាននាក់ ដោយបានអំពាវនាវឱ្យមនុស្សចូលរួមក្នុងនាមជាទាហានជាប់កិច្ចសន្យាត្រូវបានគេបង្ហោះពាសពេញទីក្រុងរុស្ស៊ី ។ យោងតាមច្បាប់បច្ចុប្បន្ន ពលរដ្ឋរុស្ស៊ីជាបុរសទាំងអស់ដែលមានអាយុពី ១៨-២៧ ឆ្នាំនឹងត្រូវបម្រើយោធារយៈពេល ១២ ខែ ប៉ុន្តែអ្នកជំនាញជាច្រើនជឿថាពេលវេលានេះគឺខ្លីពេកសម្រាប់អ្នកជ្រើសរើសថ្មីដើម្បីធ្វើជាម្ចាស់ឧបករណ៍ទំនើប។ សមាជិកនៃកងកម្លាំងពិសេសរបស់រុស្ស៊ី និងអង្គភាពសព្វាវុធបច្ចេកវិទ្យាខ្ពស់ ភាគច្រើនជាទាហានដែលមានជំនាញវិជ្ជាជីវៈលើកិច្ចសន្យារយៈពេលវែង។

ទោះជាយ៉ាងណាក៏ដោយ ច្បាប់រុស្ស៊ីបច្ចុប្បន្នក៏បានហាមឃាត់ការចល័តទ័ពទៅបំពេញបេសកកម្មប្រយុទ្ធនៅក្រៅទឹកដីខ្លួនដែរ ដែលនេះនាំឱ្យមានការខ្វះខាតកម្លាំងពលកម្មសម្រាប់យុទ្ធនាការនៅ អ៊ុយក្រែន នៅពេលដែលរុស្ស៊ីមិនអាចដាក់ពង្រាយទាហានសម្រាប់ប្រតិបត្តិការនេះ៕
ប្រភព៖vnexpress

ប្រទេសថៃ ៖ សារព័ត៌មានប្រទេសថៃបានបង្ហោះវីដេអូមួយដែលបង្ហាញពីព្រះសង្ឃ១អង្គគង់នៅក្នុងបាត្រដ៏ធំ ហើយព្រះអង្គក៏បានឆាន់ចង្ហាន់, ទឹក និងភេសជ្ជៈឱ្យអ្នកស្រុកមើល ដោយសារព័ត៌មានថៃសរសេរថា ៖ «ព្រះសង្ឃនៅខេត្តរ៉យអេត គង់ឆាន់ចង្ហាន់ក្នុងបាត្រ» ។ នៅពេលគេចែកចាយវីដេអូនេះក្នុងបណ្តាញសង្គមធ្វើឱ្យអ្នកលេងបណ្តាញសង្គមថៃសួរថា តើធ្វើបែបនេះដើម្បីអ្វី ? ចំណែកអ្នកលេងបណ្តាញសង្គមខ្លះទៀតនិយាយថា ធ្វើរហូតដល់ព្រះសង្ឃជាន់ខ្ពស់ តើធ្វើបែបនេះសមរម្យដែរឬទេ ?

បើតាមបុរសម្នាក់ឈ្មោះ ឌែង ប៉ុងខេត អាយុ៦៧ឆ្នាំ រស់នៅស្រុកអាតសាម៉ាត់ ខេត្តរ៉យអេត រៀបរាប់ថា ហេតុការណ៍ព្រះសង្ឃឆាន់ចង្ហាន់នៅក្នុងបាត្រដ៏ធំនេះ បានកើតឡើងកាលពីថ្ងៃទី១១ ខែកញ្ញា ឆ្នាំ២០២៣ ហើយរូបលោកក៏ស្ថិតក្នុងហេតុការណ៍នេះដែរ ។ នៅថ្ងៃនោះ ខេត្តរ៉យអេតបានរៀបចំគម្រោងមួយដើម្បីជួយសង្គ្រោះអ្នកជំងឺសម្រាកនៅលើគ្រែ ហើយក៏បាននិមន្តព្រះសង្ឃមកពីវត្តផ្សេងៗនៅស្រុកអាតសាម៉ាត់ មកចូលរួមក្នុងកម្មវិធី ព្រមទាំងមានការបិណ្ឌបាត្រ និងដង្ហែរបាត្រធំទៅកាន់ភូមិនានា ដើម្បីឱ្យអ្នកស្រុកបានចូលរួមបរិច្ចាគបច្ច័យក្នុងបាត្រធំ ។ ក្រោយមក គណៈកម្មការរៀបចំកម្មវិធីក៏បានយកបាត្រដ៏ធំនេះមកទុកនៅសាលាឆាន់ក្នុងវត្តបានប៉ៅ ដើម្បីយកបច្ច័យ និងសម្ភារផ្សេងៗចេញពីក្នុងបាត្រទៅឧបត្ថម្ភអ្នកជំងឺ ។ ពេលនោះ នៅម៉ោងប្រមាណ១១ថ្ងៃត្រង់ គឺជាពេលព្រះសង្ឃឆាន់ចង្ហាន់ ដូច្នេះ អ្នកភូមិក៏នាំគ្នាប្រគេនចង្ហាន់ដល់ព្រះសង្ឃ ។

ចំណែកព្រះសង្ឃព្រះនាមចាន់ ឬព្រះគ្រូ Ubon Khemaphon អាយុ៦៩ឆ្នាំ និមន្តមកពីស្រុកអាតសាម៉ាត់ បានឃើញបាត្រលោកដ៏ធំនៅក្បែរនោះ ព្រះអង្គក៏និយាយទៅកាន់ញាតិញ៉ោមថា ៖ «បន្តិចទៀត អាត្មានឹងឆាន់ចង្ហាន់ក្នុងបាត្រនេះឱ្យមើល» ។ ពេលនិយាយចប់ ព្រះអង្គក៏ចូលទៅគង់ក្នុងបាត្រដែលមានជម្រៅប្រមាណ៨០សង់ទីម៉ែត្រ ពេលអ្នកស្រុកឃើញបែបនេះ ក៏នាំគ្នាយកទូរស័ព្ទមកថតវីដេអូ ។

លោក ឌែង ប៉ុងខេត រៀបរាប់ទៀតថា ព្រះសង្ឃតាំងចិត្តធ្វើបែបនេះ ព្រោះចង់ឱ្យគេដឹងថា ការឆាន់បាយនៅក្នុងបាត្រលោក គឺត្រូវតែធ្វើបែបនេះ ហើយព្រះអង្គជាព្រះសង្ឃដំបូងគេដែលឆាន់ចង្ហាន់ក្នុងបាត្រពិតប្រាកដ ។ លោកគិតថា ព្រះសង្ឃធ្វើអីចឹង មិនខុសឆ្គងអ្វីទេ ។

ព្រះសង្ឃព្រះនាម Ubon Khemaphon ដែលគង់ឆាន់ចង្ហាន់ក្នុងបាត្រ និងល្បីល្បាញក្នុងបណ្តាញសង្គម មានពុទ្ធដីកាថា ៖ «អាត្មាបានតាំងចិត្តចូលមកគង់ក្នុងបាត្រ ហើយអាត្មាក៏ឆាន់ចង្ហាន់ផ្សេងៗក្នុងបាត្រនេះ ព្រោះអាត្មាធ្លាប់តែឮពាក្យថា ឆាន់បាយក្នុងបាត្រ ប៉ុន្តែពុំទាន់មានព្រះសង្ឃណាមួយគង់ក្នុងបាត្រទេ ។ អាត្មាឃើញតែព្រះសង្ឃដួសបាយចេញពីបាត្រយកមកឆាន់ខាងក្រៅរហូត ។ ដូច្នេះ អាត្មាក៏បានគង់ក្នុងបាត្រ រួចឆាន់បាយឱ្យញាតិញ៉ោមមើល ស្រាប់តែអ្នកស្រុកជាច្រើននាក់យកទូរស័ព្ទមកថតអាត្មា ហើយការធ្វើបែបនេះ អាត្មាគិតថា មិនខុសអ្វីទេ» ។

អ្នកលេងបណ្តាញសង្គមថៃរិះគន់ថា ៖ «ព្រះអង្គលេងដូចកូនក្មេងអីចឹង» ។ ជនជាតិថៃម្នាក់ទៀតថា ៖ «ការធ្វើបែបនេះនឹងធ្វើឱ្យខូចកេរ្តិ៍ឈ្មោះដល់ព្រះពុទ្ធសាសនា» ។ ជនជាតិថៃម្នាក់ទៀតថា ៖ «ព្រះអង្គចង់ល្បី ហើយក៏លេងដូចក្មេងៗ» ។ ជនជាតិថៃម្នាក់ទៀតថា ៖ «ឆាន់បាយធម្មតាៗ ពិភពលោកមិនចងចាំទេ» ។ ជនជាតិថៃម្នាក់ទៀតថា ៖ «មកពីព្រះអង្គចង់ផ្លាស់ប្តូរបរិយាកាស» ។ ជនជាតិថៃម្នាក់ទៀតថា ៖ «មកពីព្រះអង្គចង់ល្បីល្បាញតាមទូរទស្សន៍ដូចគេដែរ» ៕

ប្រភព ៖ amarin news

បរទេស៖ លោក Frank Rubio បានចំណាយពេលច្រើនជាង ៣៥៥ ថ្ងៃនៅក្នុងគន្លងផែនដីទាប ដោយបំបែកកំណត់ត្រាសម្រាប់បេសកកម្មអវកាសវែងបំផុតរបស់អាមេរិក។
យោងតាមអ្នកនាំពាក្យរបស់សមាជិក NASA កាលពីថ្ងៃទី ១២ ខែកញ្ញា បានឱ្យដឹងថា លោក Rubio បានរស់នៅ និងធ្វើការលើស្ថានីយ៍អវកាសអន្តរជាតិ (ISS) ចាប់តាំងពីខែកញ្ញា ឆ្នាំ ២០២២ ពោលគឺលើសពីកំណត់ត្រាមុនរបស់អវកាសយានិក Mark Vande Hei។
បច្ចុប្បន្ន Rubio កំពុងស្ថិតនៅលើលំហដើម្បីឈានដល់ចំណុចសំខាន់មួយទៀតក្នុងរយៈពេលពីរបីសប្តាហ៍។ ដូចដែលបានរំពឹងទុក កប៉ាល់ Soyuz របស់រុស្ស៊ីនឹងនាំគាត់ រួមជាមួយសហការីពីរនាក់របស់គាត់គឺ Sergey Prokopyev និង Dmitri Petelin ត្រឡប់មកផែនដីវិញនៅថ្ងៃទី ២៧ ខែកញ្ញា។ នោះមានន័យថាលោក Rubio នឹងចំណាយពេលយ៉ាងហោចណាស់ ៣៧១ ថ្ងៃនៅក្នុងគន្លងគោចរនៅពេលដែលគាត់បានបញ្ចប់បេសកកម្មរបស់គាត់។ ដូច្នេះហើយ Rubio នឹងក្លាយជាជនជាតិអាមេរិកដំបូងគេដែលចំណាយពេលជាងមួយឆ្នាំក្នុងមីក្រូទំនាញ។

ទោះជាយ៉ាងណាក៏ដោយ បេសកកម្មដំបូងរបស់លោក Rubio មិនត្រូវបានរចនាឡើងដើម្បីបំបែកកំណត់ត្រានោះទេ។ នៅពេលដែល Rubio ចេញដំណើរទៅកាន់ ISS នៅលើនាវា Soyuz របស់រុស្ស៊ី កាលពីថ្ងៃទី ២១ ខែកញ្ញា ឆ្នាំ ២០២២ គាត់ និងសហការីរបស់គាត់បានគិតថា ពួកគេនឹងត្រូវបំពេញបេសកកម្មរយៈពេលត្រឹមតែប្រាំមួយខែប៉ុណ្ណោះ។ ប៉ុន្តែយានអវកាសដែលដឹក Rubio និងសហការីពីរនាក់មើលឃើញការលេចធ្លាយសារធាតុត្រជាក់នៅក្នុងខែធ្នូឆ្នាំដដែល។ បន្ទាប់មកអាជ្ញាធរនៅទីភ្នាក់ងារអវកាសរុស្ស៊ី Roscosmos ក៏បានបញ្ជាក់ថា កប៉ាល់នេះមិនមានសុវត្ថិភាពក្នុងការបញ្ជូនអវកាសយានិកមកផែនដីវិញទេ ហើយចាប់ពីពេលនោះមកនាវា Soyuz ក៏បានជាប់គាំងលើលំហ។

ដូច្នេះហើយ នៅថ្ងៃទី ២៥ ខែកុម្ភៈ ឆ្នាំ ២០២៣ ទីភ្នាក់ងារអវកាសរុស្ស៊ី Roscosmos បានធ្វើការបាញ់បង្ហោះយានអវកាសជំនួស MS-២៣ ដើម្បីចូលចតជាមួយ ISS។ ប្រសិនបើអ្វីៗដំណើរការទៅតាមផែនការលោក Rubio នឹងអាចត្រលប់មកផែនដីវិញនៅថ្ងៃទី ២៧ ខែកញ្ញា ឆ្នាំ២០២៣ នេះ ដែលការស្នាក់នៅលើ ISS មានរយៈពេល ៣៧១ថ្ងៃ ដោយបំបែកកំណត់ត្រាសម្រាប់បេសកកម្មអវកាសវែងបំផុតរបស់អាមេរិក៕
ប្រភព៖vnexpress

កាលពីយប់មិញ  Apple បានបញ្ចេញម៉ូឌែល iPhone15 ជាផ្លូវការ ដោយបានផ្លាស់ប្តូររន្ធសាកមក USB-C វិញ។

ការផ្លាស់ប្តូរនេះ  ក៏ដោយសភាអឺរ៉ុប និងរដ្ឋសមាជិកសហភាពអឺរ៉ុបចំនួន ២៧ បានព្រមព្រៀងគ្នាលើសេចក្តីសម្រេច កំណត់ឱ្យទូរសព្ទចល័ត និងឧបករណ៍អេឡិចត្រូនិកផ្សេងទៀតនៅក្នុងសហភាពអឺរ៉ុប ត្រូវតែប្រើប្រាស់រន្ធសាកថ្មស្តង់ដាតែមួយជាកំហិត ដែលនោះគឺរន្ធសាក Type- C។

ប្រសិនបើ Apple នៅតែជំនះមិនប្រើ USB-C ទេនោះ ផលិត iPhone ទាំងអស់នឹងមិនត្រូវបានដាក់លក់នៅបណ្តាប្រទេសទាំងនោះបានទេ។

សូមបញ្ជាក់ផងដែរថា សម្រាប់ iPhone15 នេះ មានចំនួន៤ម៉ូឌែលគឺ iPhone15, iPhone15 plus, iPhone15 Pro និងiPhone15 Pro Max៕

រដ្ឋធានីជេរូហ្សាឡឹម៖ ស្របពេលស្ថានការណ៍ នៅតំបន់មជ្ឈិមបូព៌ា កំពុងតែលើកកម្ដៅនោះ ប្រធានចារកម្មរបស់អ៊ីស្រាអែល បានចោទប្រកាន់ដល់ប្រទេសអ៊ីរ៉ង់ អំពីការប៉ុនប៉ងវាយប្រហារយ៉ាងរង្គាល មកលើប្រទេសរបស់ខ្លួន ហើយប្ដេជ្ញា ថា នឹងវាយប្រហារសងសឹក ដល់កណ្ដាលរដ្ឋធានីតេអ៊ីរ៉ង់ ។

សារព័ត៌មានរបស់លីបង់ Naharnet (ណាហាណែត) បានចេញផ្សាយ កាលពីថ្ងៃអង្គារ ទី១២ ខែកញ្ញា ថា ប្រធានទីភ្នាក់ងារចារកម្មរបស់អ៊ីស្រាអែល បានព្រមាន ថា អ៊ីស្រាអែល បានត្រៀមខ្លួនរួចរាល់អស់ហើយ សម្រាប់ការវាយប្រហារ នៅកណ្តាលរដ្ឋធានីតេអ៊ីរ៉ង់ (Tehran) ដើម្បីជាការសងសឹកវិញ ប្រសិនបើការប៉ុនប៉ងរបស់អ៊ីរ៉ង់ វាយប្រហារមកលើគោលដៅនានា នៅលើទឹកដីរបស់អ៊ីស្រាអែល និង ជនជាតិជ្វីប នៅជុំវិញពិភពលោក។

ថ្លែងនៅក្នុងសន្និសិទសន្តិសុខមួយ លោក ដេវីដ បានៀ (David Barnea) ប្រធានទីភ្នាក់ងារចារកម្មរបស់អ៊ីស្រាអែល បានបញ្ជាក់ ថា អ៊ីស្រាអែល និង សម្ពន្ធមិត្តរបស់ខ្លួន បានរារាំងដល់ការវាយប្រហារ ចំនួន២៧លើក កាលពីឆ្នាំមុន នៅទ្វីបអឺរ៉ុប អាហ្វ្រិក អាស៊ីអាគ្នេយ៍ និង អាមេរិកខាងត្បូង។

លោកប្រធានទីភ្នាក់ងារចារកម្មរបស់អ៊ីស្រាអែល បានថ្លែងប្រាប់ដល់សន្និសីទមួយ នៅក្នុងសាកលវិទ្យាល័យរេចម៉ែន (Reichman) ថា «ផែនការត្រូវតាមចាប់ បង្កឡើងដោយក្រុមទាំងនេះ បានរៀបចំធ្វើជាមេ និង ដឹកនាំដោយប្រទេសអ៊ីរ៉ង់។ វាដូចទៅនឹងអ្វីដែលយើងនិយាយ គឺអ៊ីរ៉ង់ កំពុងតែព្យាយាម វាយប្រហារបន្ថែមទៀត»។

ប្រធានទីភ្នាក់ងារចារកម្មអ៊ីស្រាអែល រូបនេះ បានសង្កត់ធ្ងន់ ថា «សាររបស់យើង មានកម្លាំងខ្លាំង និង ច្បាស់លាស់ ហើយបានកំណត់គោលដៅរួចអស់ហើយ។ ចូរកុំធ្វើឲ្យមានកំហុសអី អ្នកដែលបានសម្រេចចិត្ត បញ្ជូនក្រុមនោះមក។ ត្រូវតែប្រាកដ ថា ពួកយើងនឹងទៅដល់អ្នកវិញ ហើយយុត្តិធម៌ នឹងត្រូវតែធ្វើ សម្រាប់អ្នកវិញដែរ។ រឿងនេះ ត្រូវបានបង្ហាញឱ្យឃើញ កាលពីអតីតកាល ហើយទៅថ្ងៃពេលអនាគត យើងនឹងបន្តធ្វើទៅមុខទៀត ហើយវានឹងឡើងទៅកម្រិតបន្ទាប់»។

លោក ដេវីដ បានៀ បានបន្ដ ថា អ៊ីស្រាអែល នឹងតាមរកភ្នាក់ងារពាក់ព័ន្ធនឹងការគ្រោងទុក នេះ ព្រមទាំងមេបញ្ជាការ ដែលបានបញ្ជូនពួកគេមក។ តម្លៃទាំងនេះ នឹងត្រូវកំណត់យ៉ាងជ្រៅ នៅក្នុងទីក្រុងតេអ៊ីរ៉ង់ ជាបេះដូងរបស់អ៊ីរ៉ង់»។

អ៊ីស្រាអែល តែងតែចាត់ទុកប្រទេសអ៊ីរ៉ង់ ជាគូសត្រូវដ៏ធំបំផុតរបស់ខ្លួន ដោយលើកឡើង អំពីការអំពាវនាវរបស់អ៊ីរ៉ង់ ជំរុញឱ្យវាយប្រហារបំផ្លិចបំផ្លាញ មកលើអ៊ីស្រាអែល និងការគាំទ្ររបស់ក្រុងតេអ៊ីរ៉ង់ ចំពោះក្រុមសកម្មប្រយុទ្ធអរិភាព នៅតាមព្រំដែនរបស់អ៊ីស្រាអែល។ ជាមួយគ្នានេះ អ៊ីស្រាអែល បានចោទប្រកាន់ដល់ប្រទេសអ៊ីរ៉ង់ ថា ក្រុងតេអ៊ីរ៉ង់ កំពុងតែស្វះស្វែងផលិតអាវុធនុយក្លេអ៊ែរ ប៉ុន្ដែការចោទប្រកាន់នេះ ត្រូវបានអ៊ីរ៉ង់ បដិសេធ។

ជាការតបតវិញនោះ អ៊ីរ៉ង់ បានចោទប្រកាន់ដល់ប្រទេសអ៊ីស្រាអែល អំពីវាយប្រហារយ៉ាងសាហាវជាច្រើនលើក ដោយបានសម្លាប់អ្នកវិទ្យាសាស្ត្រនុយក្លេអ៊ែររបស់ខ្លួន និង ការវាយប្រហារបំផ្លាញរោងចក្រនានា នៅក្នុងប្រទេសអ៊ីរ៉ង់ បើទោះជាអ៊ីស្រាអែល កម្រនឹងធ្វើអត្ថាធិប្បាយទៅលើប្រតិបត្តិការបែបនេះ យ៉ាងណាក្ដី៕