Angelina Jolie ថ្កោលទោសសកម្មភាពអ៊ីស្រាអែល ខណៈតារាល្បី២៥០ដាក់លិខិតទៅកាន់ប្រធានាធិបតីអាម៉េរិក

តារាសម្តែងហូលីវូដដ៏ល្បីល្បាញ លោកស្រី Angelina Jolie ដែលជាបេសកជនពិសេស រអង្គការសហប្រជាជាតិទទួលបន្ទុកជនភៀសខ្លួន (UNHCR) បានសម្តែងការរិះគន់យ៉ាងខ្លាំងទៅលើអ៊ីស្រាអែលចំពោះសកម្មភាពយោធារបស់ខ្លួននៅក្នុងតំបន់ហ្គាហ្សា។ ការអត្ថាធិប្បាយរបស់តារាហូលីវូដរូបនេះគូសបញ្ជាក់ពីចំនួនមនុស្សស្លាប់ និងការហៅទីក្រុង Gaza ថាជា “គុកបើកចំហរអស់រយៈពេលជិតពីរទសវត្សរ៍”។

នៅក្នុងសេចក្តីថ្លែងការណ៍មួយដែលបានបង្ហោះនៅលើ Instagram លោកស្រី Angelina Jolie បានថ្កោលទោសថាជា “ការទម្លាក់គ្រាប់បែកដោយចេតនានៃប្រជាជនដែលជាប់គាំង” នៅក្នុងតំបន់ដែលមានប្រជាជនប៉ាឡេស្ទីនយ៉ាងក្រាស់ក្រែល។ លោកស្រីបានចោទប្រកាន់មេដឹកនាំពិភពលោកអំពី “ភាពស្មុគស្មាញនៅក្នុងឧក្រិដ្ឋកម្មទាំងនេះ” សម្រាប់ភាពស្ងៀមស្ងាត់របស់ពួកគេ និងទាមទារបទឈប់បាញ់ក្នុងភាពជាមនុស្សធម៌។

ការថ្លែងការនេះធ្វើឡើងបន្ទាប់ពីការទម្លាក់គ្រាប់បែកដ៏ធំរបស់កងទ័ពអ៊ីស្រាអែលទៅលើជំរំជនភៀសខ្លួន Jabalia ដែលបានបណ្តាលឱ្យមានអ្នកស្លាប់និងរបួសយ៉ាងច្រើនសន្ធឹកសន្ធាប់ដល់ប្រជាជនប៉ាឡេស្ទីន រហូតដល់ ១០០០ នាក់ត្រូវភៀសខ្លួន។ នៅថ្ងៃទី ៧ ខែតុលា អ៊ីស្រាអែលបានប្រកាសសង្រ្គាម ហើយបានចាប់ផ្តើមវាយប្រហារតំបន់ហ្គាហ្សា ដោយបានសម្លាប់ប្រជាជនប៉ាឡេស្ទីនជាង ៩,០០០ នាក់ រួមទាំងកុមារជាង ៣,០០០ នាក់។

ជាមួយគ្នានេះដែរ តារាល្បីៗជិត ២៥០ នាក់រួមទាំង Ben Affleck, Gigi Hadid, Jessica Chastain និង Drake ដែលជាផ្នែកមួយនៃ Artists4Ceasefire បានចុះហត្ថលេខាលើលិខិតមួយទៅកាន់ប្រធានាធិបតីអាម៉េរិក បៃដិន ដោយអំពាវនាវឱ្យមានបទឈប់បាញ់នៅក្នុងការទម្លាក់គ្រាប់បែករបស់អ៊ីស្រាអែលនៅហ្គាហ្សា។ លិខិតនេះសង្កត់ធ្ងន់លើជំហររួបរួមរបស់ក្រុមក្នុងនាមជាសិល្បករ និងអ្នកតស៊ូមតិដែលរងផលប៉ះពាល់យ៉ាងខ្លាំងដោយការបាត់បង់ជីវិតទាំងនៅក្នុងប្រទេសអ៊ីស្រាអែល និងប៉ាឡេស្ទីន។

ក្នុងលិខិតនោះបានគូសបញ្ជាក់អំពីស្ថានភាពមនុស្សធម៌ដ៏អាក្រក់នៅហ្គាហ្សា ដោយបានសង្កត់ធ្ងន់លើតួនាទីការទូតដ៏សំខាន់របស់រដ្ឋាភិបាលសហរដ្ឋអាម៉េរិកក្នុងការបញ្ចប់ទុក្ខលំបាកប្រជាជននិងច្បាប់អន្តរជាតិ។ សិល្បករជាច្រើនបានបង្ហាញពីបំណងប្រាថ្នាដ៏មុតមាំក្នុងការទប់ស្កាត់ការបង្ហូរឈាមបន្ថែមទៀត ហើយប្តេជ្ញាថានឹងមិននៅស្ងៀមចំពោះវិបត្តិដែលកំពុងកើតមាននោះទេ។

ទន្ទឹមនឹងតារាល្បីៗថ្កោលទោសសកម្មភាពអ៊ីស្រាអែល ក្នុងនោះក៏មានតារាហូលីវូដជាច្រើននាក់ក៏បាននិយាយគាំទ្រអ៊ីស្រាអែលផងដែរ ដូចជា Justin Bieber ជាដើម៕