ប្រទេសប៉េរូ ៖ គេឃើញសត្វឆ្កែជាច្រើនក្បាលត្រូវបានម្ចាស់របស់វានាំមកចូលរួមក្នុងពិធីប្រកួតសម្លៀកបំពាក់ឆ្កែ ដើម្បីស្វាគមន៍ពិធីបុណ្យ Halloween ។ ពិធីប្រកួតនេះបានរៀបចំឡើងនៅទីក្រុងខាឡាអូ ដែលស្ថិតនៅតំបន់ភាគខាងលិចប្រទេសប៉េរូ ដើម្បីស្វែងរកសត្វឆ្កែណាមានសម្លៀកបំពាក់ស្រស់ស្អាតបំផុត ។

អ្នកស្រី ឡុយសា អូចេដា បាននាំឆ្កែមកចូលរួមក្នុងពិធីប្រកួតនិយាយថា ៖ «ខ្ញុំមិនបានទិញសម្លៀកបំពាក់នេះទេ ពីព្រោះវាជារបស់ស្វាមី និងកូនប្រុសខ្ញុំ ។ ចំណែកមួករបស់វាវិញ គឺខ្ញុំបានធ្វើពីក្រដាស ហើយត្រង់នេះជាអាលុយមីញ៉ូម» ។

ក្នុងពិធីប្រកួតនេះ ឆ្កែជាច្រើនក្បាលត្រូវបានម្ចាស់របស់វាតែងខ្លួន និងឱ្យស្លៀកសម្លៀកបំពាក់ជាច្រើនប្រភេទ ដូចជា ឈុតកូនក្រមុំ និងឈុត Super Hero ជាដើម ហើយពួកវាបានដើរបង្ហាញរាងឱ្យអ្នកមកចូលរួមទស្សនា ដើម្បីទទួលបានពានរង្វាន់សម្លៀកបំពាក់ឆ្កែស្រស់ស្អាតបំផុត ។ សំឡេងទះដៃ គឺជាការសម្រេចចិត្តរបស់អ្នកចូលរួមថា តើឆ្កែមួយណានឹងទទួលបានជ័យជម្នះដំបូងគេចំនួន៣ក្បាល បន្ទាប់មក គេនឹងផ្តល់ចំណីឆ្កែជារង្វាន់សម្រាប់ពួកវា ។

លោក រ៉ាម៉ន ការ៉េ អភិបាលក្រុងឡាប៉ុនតា ដែលបានមកចូលរួមក្នុងពិធីប្រកួតសម្លៀកបំពាក់ឆ្កែដែរនោះលើកឡើងថា ៖ «ការប្រកួតនេះបានជួយឱ្យពួកយើងអាចសម្រេចចិត្តរួមគ្នា និងបង្កើនទំនាក់ទំនងជាមួយគ្នា ។ យើងឃើញថា កន្លងមក សមាជិកក្រុមគ្រួសារនីមួយៗបានចេញទៅបំពេញការងារ, ទៅរៀននៅសាកលវិទ្យាល័យ ឬធ្វើការងារផ្សេងៗ ហើយពួកគេស្ទើរតែគ្មានពេលវេលាមកជួបជុំគ្នា និងចំណាយពេលថ្ងៃអាទិត្យ ដើម្បីសប្បាយរីករាយជាមួយក្រុមគ្រួសារនោះទេ» ៕ ប្រភព ៖ TNN World

ប្រទេសឥណ្ឌា ៖ យោងតាមសារព័ត៌មាន AFP បានចុះផ្សាយថា យ៉ាងហោចណាស់ មានមនុស្សស្លា.ប់ចំនួន១៣នាក់ និងរងរបួ.សប្រមាណ៥០នាក់ទៀត ដោយសារហេតុការណ៍រថភ្លើងដឹកអ្នកដំណើរចំនួន២ខ្សែបានបុកគ្នា កាលពីថ្ងៃទី២៩ ខែតុលា ឆ្នាំ២០២៣ នៅតាមផ្លូវរវាងទីក្រុង Alamanda និងទីក្រុង Kantakapalle ស្ថិតក្នុងរដ្ឋ Andhra Pradesh ប្រទេសឥណ្ឌា ។

ក្រសួងរថភ្លើងឥណ្ឌាបានបញ្ជាក់ក្នុងសេចក្តីថ្លែងការណ៍ថា គ្រោះថ្នាក់នេះបានកើតឡើងនៅពេលខ្សែរថភ្លើងទី១ បានបញ្ឈប់ដំណើរការភ្លាមៗ ដោយសារតែដាច់ខ្សែភ្លើង ទើបបណ្តាលឱ្យរថភ្លើងខ្សែទី២ ដែលធ្វើដំណើរមកពីទិសដៅផ្ទុយគ្នាបុកតែម្តង ។ ហេតុនេះ វាបណ្តាលឱ្យទូរភ្លើងរបស់ខ្សែរថភ្លើងទី១ ដែលកំពុងចតនោះធ្លាក់ពីលើផ្លូវដែក ហើយតាមការស៊ើបអង្កេតជំហានដំបូងបង្ហាញថា វាជាកំហុសឆ្គងរបស់មនុស្ស ។

នាយករដ្ឋមន្ត្រីប្រទេសឥណ្ឌា លោក Narendra Modi ថ្លែងថា លោកបានសួរនាំពីហេតុការណ៍នេះជាមួយរដ្ឋមន្ត្រីក្រសួងរថភ្លើងរួចហើយ ហើយលោករដ្ឋមន្ត្រីបញ្ជាក់ថា ក្រសួងនឹងជួយសង្គ្រោះដល់អ្នករងផលប៉ះពាល់ទាំងអស់ ។ ចំណែកអាជ្ញាធរក្នុងតំបន់ឱ្យដឹងថា អ្នកដំណើរដែលជិះនៅលើរថភ្លើងទាំងពីរខ្សែនេះ គឺស្មើប្រមាណជាង៩០នាក់ ។

ប្រទេសឥណ្ឌាមានបណ្តាញផ្លូវដែកដ៏ធំស្ថិតក្នុងលំដាប់ទី៤ នៅលើពិភពលោក និងតែងតែទទួលរងការរិះគន់រហូតមក ពាក់ព័ន្ធនឹងការខ្វះខាតវិធានការស្តង់ដារសុវត្ថិភាពសម្រាប់អ្នកដំណើរ និងបណ្តាលឱ្យកើតហេតុការណ៍រថភ្លើងបុកគ្នាជាញឹកញាប់ក្នុងរយៈពេលប៉ុន្មានឆ្នាំកន្លងមក ។ ចំណែកហេតុការណ៍អាក្រក់បំផុតបានកើតឡើងកាលពីឆ្នាំ១៩៨១ គឺរថភ្លើងបានធ្លាក់ចេញពីផ្លូវដែក ខណៈពេលកំពុងបើកឆ្លងស្ពាននៅរដ្ឋផិហាន និងបណ្តាលឱ្យមនុស្សស្លា.ប់រហូតដល់៨០០នាក់ ។

កាលពីខែមិថុនា ឆ្នាំ២០២៣ មានហេតុការណ៍រថភ្លើងចំនួន៣ខ្សែបុកគ្នានៅរដ្ឋអូរិសា និងឆក់យកជីវិតមនុស្សអស់ជិត៣០០នាក់ ។ លើសពីនេះ នៅខែសីហា ឆ្នាំ២០២៣ មានមនុស្សស្លា.ប់យ៉ាងតិច៩នាក់ ដោយសារភ្លើងឆេះទូររថភ្លើងរបស់រថភ្លើងមួយខ្សែដែលចតនៅតំបន់ខាងត្បូងប្រទេសឥណ្ឌា នៅពេលអ្នកដំណើរព្យាយាមឆុងតែផឹក ។ ចំណែកនៅដើមខែតុលា ឆ្នាំ២០២៣នេះ មានអ្នកស្លាប់៤នាក់ទៀត ក្រោយពីរថភ្លើងបានធ្លាក់ចេញពីផ្លូវដែកនៅរដ្ឋផិហាន ៕ ប្រភព ៖ Nation Online

ភាគរយនៃជនបរទេសនៅក្នុងប្រទេសកូរ៉េខាងត្បូងនឹងលើសពី ៥% នៃចំនួនប្រជាជនជាលើកដំបូងនៅឆ្នាំ២០២៤ ដែលធ្វើឱ្យប្រទេសនេះក្លាយជា «ប្រទេសពហុវប្បធម៌ និងពហុវប្បធម៌»បើយោងតាមនិយមន័យរបស់ OECD (The Organization for Economic Cooperation and Development)។ នេះគឺក្នុងអត្រាមួយដែលលឿនជាងប្រទេសជប៉ុនដែលមានប្រមាណ ២.៣៨% ដែលទទួលយកពលករបរទេសមុនកូរ៉េខាងត្បូង។

យោងតាមក្រសួងយុត្តិធម៌ និងក្រសួងមហាផ្ទៃ នៅថ្ងៃទី២៧ ខែតុលា ចំនួនជនបរទេសសរុបដែលរស់នៅក្នុងប្រទេសកូរ៉េ គិតត្រឹមដំណាច់ខែកញ្ញា មានចំនួន ២.៥១៤លាននាក់ ស្មើនឹង ៤.៨៩% នៃចំនួនប្រជាជនសរុប ៥១.៣៧លាននាក់។ នេះរួមបញ្ចូលទាំងអ្នកស្នាក់នៅរយៈពេលវែងចំនួន ១.៩៥ លាននាក់ដែលមានទិដ្ឋាការ និងចំនួន ៥៥៧,០០០នាក់ អ្នកស្នាក់នៅរយៈពេលខ្លីតិចជាង ៩០ ថ្ងៃ។

ចំណែកនៃជនបរទេសដែលស្នាក់នៅក្នុងប្រទេសបានធ្លាក់ចុះមកត្រឹម ៣.៧៩% ក្នុងឆ្នាំ ២០២១ ដោយសារជំងឺកូវីដ-១៩ ប៉ុន្តែចំនួនបានត្រឡប់មកវិញរហូតដល់ ៤.៣៧% កាលពីឆ្នាំ២០២២។ នៅឆ្នាំ២០២៣នេះវាជិតដល់ទៅ ៥% ដោយសារចំនួនពលករបរទេសចូលប្រទេសតាមរយៈប្រព័ន្ធអនុញ្ញាតការងារបានកើនឡើង។ មន្ត្រីមកពីក្រសួងរដ្ឋបាលសាធារណៈបាននិយាយថា “ដោយសារការកើនឡើងនៃចំនួននិស្សិត និងកម្មករអន្តរជាតិចាប់តាំងពីជំងឺកូវីដ-១៩ ចំណែកនៃជនបរទេសដែលមានឯកសារត្រូវបានគេរំពឹងថានឹងលើសពី ៥% នៃចំនួនប្រជាជនជាលើកដំបូងនៅឆ្នាំក្រោយ” ។

កម្រិតកំណត់ជនបរទេស ៥% ដើម្បីកំណត់ប្រទេសពហុជាតិសាសន៍ និងពហុវប្បធម៌ ត្រូវបានប្រើនៅក្នុងស្ថិតិជំរឿន និងដោយអង្គការអន្តរជាតិ។ តាមពិតទៅ ប្រទេសកូរ៉េខាងត្បូងគឺជាប្រទេសពហុវប្បធម៌ និងពហុជាតិសាសន៍ដំបូងគេបង្អស់នៅក្រៅទ្វីបអឺរ៉ុប និងអាម៉េរិកខាងជើង។ ប្រទេសជប៉ុនដែលបានចាប់ផ្តើមទទួលយកពលករបរទេសនៅឆ្នាំ ១៩៨៩ នៅតែមានប្រជាជនកំណើតពីបរទេសត្រឹមតែ ២.៣៨% ដែលមានន័យថាចំនួន ២.៩៩ លាននាក់ក្នុងចំណោម ១២៥.៤១ លាននាក់។

ជាមួយនឹងអត្រាកំណើតទាបដែលមិនធ្លាប់មានពីមុនមក និងចំនួនប្រជាជនវ័យចំណាស់ អត្រាលំហូរពលករបរទេសចូលមកក្នុងប្រទេសកូរ៉េត្រូវបានរំពឹងថានឹងកើនឡើង។ អ្នកជំនាញនិយាយថា វាជារឿងចាំបាច់ក្នុងការជួសជុលប្រព័ន្ធនេះ ដោយសារប្រទេសកូរ៉េកំពុងក្លាយជាប្រទេសពហុជាតិសាសន៍ និងពហុវប្បធម៌ដំបូងគេនៅអាស៊ី។ «ជនបរទេស ៥%មានន័យថា អ្នកស្រុកនឹងជួបជនបរទេស ឬមនុស្សមកពីវប្បធម៌បរទេសគ្រប់ពេលវេលា និងទីកន្លែងណាមួយ រួមទាំងសាលារៀន កន្លែងធ្វើការ និងតាមដងផ្លូវ ហើយកូរ៉េខាងត្បូងគឺជាប្រទេសដំបូងគេនៅអាស៊ីដែលឈានដល់ដំណាក់កាលនេះ»។

សាស្ត្រាចារ្យផ្នែកសុខុមាលភាពសង្គមនៃសាកលវិទ្យាល័យមួយបាននិយាយថា ការក្លាយជាប្រទេសពហុជាតិសាសន៍ និងពហុវប្បធម៌ មានន័យថា យ៉ាងហោចណាស់មនុស្សម្នាក់ក្នុងចំណោមអ្នកស្រុក ២០នាក់គឺជាជនបរទេស ជនអន្តោប្រវេសន៍ជំនាន់ទី២ ឬជាពលរដ្ឋធម្មជាតិ។ អ្នកខ្លះប្រកែកថា ប្រសិនបើអ្នករាប់បញ្ចូលជនអន្តោប្រវេសន៍គ្មានឯកសារចំនួន ៤២៩,០០០នាក់នៅក្នុងប្រទេសនោះ កូរ៉េខាងត្បូងប្រហែលជាមានចំនួន ៥% នៃជនបរទេសរួចទៅហើយ។ ប្រសិនបើជនអន្តោប្រវេសន៍គ្មានឯកសារត្រូវបានរាប់បញ្ចូលនោះ ភាគរយកើនឡើងដល់ ៥.៧២%។

នេះដោយសារតែប្រទេសកូរ៉េអនុញ្ញាតឱ្យកម្មករ និងកូនចៅជំនាន់ទី ២ របស់ពួកគេស្នាក់នៅក្នុងប្រទេសតាមទិដ្ឋាការជនរួមជាតិ ហើយចំនួនកុមារដែលកើតចេញពីអាពាហ៍ពិពាហ៍អន្តោប្រវេសន៍កំពុងកើនឡើងយ៉ាងឆាប់រហ័ស។ ប្រជាជនចំណាកស្រុកដែលមានផ្ទៃខាងក្រោយរួមបញ្ចូលទាំងពលរដ្ឋដែលមានសញ្ជាតិ ជនអន្តោប្រវេសន៍ជំនាន់ទីពីរ និងជនបរទេសដែលបច្ចុប្បន្នជាអ្នករស់នៅពីកំណើត។

យោងតាមអង្គការ OECD ភាគរយនៃអ្នកដែលមានប្រវត្តិចំណាកស្រុកនៅកូរ៉េខាងត្បូងមាន ៤.៣% ក្នុងឆ្នាំ ២០២១។ ក្នុងចំណោមប្រទេស OECD ទាំងអស់ លុចសំបួ (៧៣.៦%) អ៊ីស្រាអែល (៥៨.១%) ស្វីស (៥៤.១%) អូស្ត្រាលី (៥២.៦%) ហើយនូវែលសេឡង់ (៤៩.២%) មានភាគហ៊ុនខ្ពស់បំផុតនៃចំនួនប្រជាជនចំណាកស្រុក។ ប្រទេសទាំងនេះបានលើកទឹកចិត្តយ៉ាងសកម្មលើការធ្វើអន្តោប្រវេសន៍ជាគោលនយោបាយមួយ។ ម៉្យាងវិញទៀត សហរដ្ឋអាម៉េរិកមានប្រជាជនចំណាកស្រុកចំនួន ២៦.២% ខណៈដែលសហភាពអឺរ៉ុបជាមធ្យមមាន ២១.៤%។ ចំណែកឯប្រទេស ម៉ិកស៊ិកមាន (២%) ជប៉ុន (២.៥%) ទួគីយ៉េ (៣%) និងប៊ុលហ្គារី (៣.៨%) មានប្រជាជនអន្តោប្រវេសន៍តិចបំផុតក្នុងចំណោមប្រទេសទាំងអស់។

ចំណែកជនបរទេសដែលរស់នៅក្នុងប្រទេសកូរ៉េកើនឡើងយ៉ាងឆាប់រហ័ស អ្នកខ្លះព្រួយបារម្ភថាប្រទេសនេះអាចដើរតាមគន្លងនៃប្រទេសផ្សេងទៀតដែលបានស្វាគមន៍ពលករបរទេស និងជួបប្រទះភាពតានតឹងផ្នែកសង្គម និងវប្បធម៌។ នេះអាចនាំឱ្យមានជម្លោះសង្គមដូចជាពាក្យបណ្តឹងដែលជនបរទេសទទួលបានអត្ថប្រយោជន៍ធានារ៉ាប់រងសុខភាពជាតិ ការរើសអើងនៅក្នុងសាលារៀន និងជម្លោះសាសនា។

ប្រធានសមាគមគាំទ្រគ្រួសារពហុវប្បធម៌កូរ៉េបាននិយាយថា ប្រសិនបើចំនួនជនចំណាកស្រុកលើសពី ៥ ភាគរយពួកគេនឹងមានផលប៉ះពាល់សេដ្ឋកិច្ច និងវប្បធម៌យ៉ាងសំខាន់ក្នុងនាមសមាជិកនៃសង្គម ដូច្នេះហើយការទទួលយកភាពចម្រុះនៃវប្បធម៌គឺមានសារៈសំខាន់បំផុត៕

ប្រទេសថៃ ៖ សារព័ត៌មានថៃបានចុះផ្សាយថា មានក្រុមក្មេងស្ទាវនៅទីក្រុងប៉ាតាយ៉ាបាននាំគ្នាជិះម៉ូតូនៅតាមផ្លូវ និងកាន់ដំបងដេញវាយភ្ញៀវទេសចរបរទេសដោយគ្មានមូលហេតុ ។ បើតាមកាមេរ៉ាសុវត្ថិភាពបង្ហាញថា ហេតុការណ៍នេះបានកើតឡើងនៅតាមផ្លូវមួយកន្លែងនៅក្នុងភូមិទី១០ ឃុំណងព្រឺ ស្រុកបានឡាម៉ុន ខេត្តឈុនបុរី ប្រទេសថៃ ។

អ្នកឃើញហេតុការណ៍នេះរៀបរាប់ថា ហេតុការណ៍ក្មេងស្ទាវវាយភ្ញៀវទេសចរបរទេសតែងកើតឡើងជាប្រចាំ ហើយក្មេងស្ទាវបង្កហេតុ គឺជាក្រុមដដែលៗ ។ ពួកគេបាននាំគ្នាជិះម៉ូតូពី២គ្រឿង ទៅ៣គ្រឿង ហើយអ្នកអង្គុយពីក្រោយនឹងប្រើដំបងសំពងមកលើភ្ញៀវទេសចរបរទេសដែលកំពុងដើរនៅតាមផ្លូវដោយគ្មានមូលហេតុ ឬគ្មានគំនុំពីមុន ។ ក្រោយពីក្រុមក្មេងស្ទាវវាយភ្ញៀវទេសចរបរទេសរួចហើយ ពួកគេក៏គេចខ្លួនបាត់អស់ ។

អ្នកឃើញហេតុការណ៍បន្តថា ចំណែកភ្ញៀវទេសចរបរទេសមិនបានទៅដាក់ពាក្យបណ្តឹងទេ បើទោះជាពួកគេមានរបួសស្នាមនៅលើខ្លួនប្រាណដោយសារការវាយក៏ដោយ ។ ភ្ញៀវទេសចរទាំងនេះគ្រាន់តែនិយាយថា ពួកគេមិនចង់មានបញ្ហានៅប្រទេសថៃ ។

ស្ត្រីឃើញហេតុការណ៍និយាយថា ៖ «ក្រុមក្មេងស្ទាវទាំងនេះនាំគ្នាលួចមកបង្កហេតុ ហើយនៅពេលពួកគេបានវាយតប់ភ្ញៀវទេសចរបរទេសរួចហើយ ពួកគេក៏រត់គេចខ្លួនបាត់តែម្តង ។ ប៉ុន្តែរយៈពេលចាប់ពី២ថ្ងៃ ទៅ២ថ្ងៃក្រោយមក ពួកគេក៏ចាប់ផ្តើមមកបង្កហេតុម្តងទៀត ហើយថ្ងៃខ្លះ ពួកគេបានវាយតប់មកលើភ្ញៀវទេសចរទៀតផង ដោយគ្មានរឿងហេតុអ្វីសោះ ។ ក្រុមក្មេងស្ទាវទាំងនេះមានអាយុចាប់ពី១០ឆ្នាំ រហូតដល់១៨ឆ្នាំ» ។

ចុងក្រោយ ស្ត្រីឃើញហេតុការណ៍នេះចង់ផ្តាំផ្ញើទៅសមត្ថកិច្ចថៃតាមចាប់ក្មេងស្ទាវមួយក្រុមនេះយកទៅអប់រំ ដើម្បីឱ្យពួកគេផ្លាស់ប្តូរនិស្ស័យអាក្រក់ ពីព្រោះនាងបារម្ភថា បើមិនអប់រំពួកគេទេ ភ្ញៀវទេសចរបរទេសនឹងមិនហ៊ានមកដើរលេងនៅតំបន់នេះទៀតទេ ។ ចំណុចសំខាន់ វានឹងប៉ះពាល់ដល់មុខមាត់វិស័យទេសចរណ៍របស់ប្រទេសថៃថែមទៀត ៕ ប្រភព ៖ Mono News

សម្រាប់ថ្ងៃខួបកំណើតមិនត្រឹមតែអាចរៀបចំកម្មវិធីជប់លៀងជាមួយគ្រួសារ មនុស្សជាទីស្រលាញ់ប៉ុណ្ណោះទេតែថ្ងៃនោះអ្នកអាចធ្វើអំពើសប្បុរសនាឱកាសនេះបានដូចគ្នាតាមការគិតរបស់បុគ្គលម្នាក់ៗ។ ជាក់ស្តែង តារាចម្រៀង STEP ជាដើមក្នុងឱកាសថ្ងៃខួបកំណើតរបស់ខ្លួន លោកបានដឹកដៃស្រីស្អាត SK ទៅចែករំលែកក្តីស្រលាញ់នៅមណ្ឌលកុមារព្រៃជុំធ្វើរឿងដ៏គួរឱ្យសរសើរ។

លោក STEP បានឃ្លាតឆ្ងាយពីអាជីពសិល្បៈមួយរយៈពេល ដោយទើបវិលត្រឡប់មកវិញជាមួយរសជាតិថ្មីនៅក្នុងផលិតកម្ម GenMusix ដែលកុលសម្ព័ន្ធរបស់ រស្មីហង្សមាស កាលពីខែកញ្ញា កន្លងមកនេះ។ បន្ទាប់ពីចាប់ផ្តើមប្រឡូកអាជីពសិល្បៈវិញ តារាចម្រៀង STEP ចាប់ផ្តើមសកម្មភាពរបស់ខ្លួនជាបន្តបន្ទាប់ខណៈលោកក៏នឹងចូលរួមកម្មវិធីប្រគំតន្រ្តីរបស់តារាចម្រៀង ជី ដេវីត នាពេលឆាប់ៗខាងមុខនេះដូចគ្នា។

អ្វីដែលកាន់តែចាប់អារម្មណ៍នៅលើបណ្តាញសង្គមរបស់ STEP នាពេលថ្មីៗនេះលោកបានចែករំលែករូបភាពនាថ្ងៃខួបកំណើតគម្រប់ខួប២៩ឆ្នាំ ដោយបានដឹកដៃកញ្ញា SK ចែករំលែកក្តីស្រលាញ់ជាមួយកុមារនៅមណ្ឌលកំព្រាព្រៃជុំ ដែលមានទីតាំងនៅខេត្តកំពង់ស្ពឺ។

តាមការឱ្យដឹងពីតារាចម្រៀងរូបនេះបានរៀបរាប់ថា នេះគឺជាលើកទី១ហើយសម្រាប់លោកដែលកាត់នំខួបកំណើតនៅមណ្ឌលកុមារកំព្រាជាបទពិសោធន៍ថ្មីមួយសម្រាប់លោកហើយក៏ជាភាពរីករាយមួយដែរ។ STEP បានឱ្យដឹងទៀតថា មណ្ឌលនេះមានកុមារកំព្រាសរុបមានចំនួន៦៥នាក់ស្រី២៣នាក់ដោយរូបគេភ្ជាប់មកជាមួយអំណោយបន្តិចបន្តួចពីសប្បុសជនរួមជាមួយការចែករំលែកក្តីស្រលាញ់ទៅកាន់ក្មេងកំព្រាទាំងនោះប្រកបដោយក្តីស្រលាញ់ពោរពេញដោយស្នាមញញឹមនិងជំរុញឱ្យកុមារនៅទីនោះចាប់ក្តីស្រមៃរបស់ខ្លួន។

បើតាមប្រភពព័ត៌មានបានឱ្យដឹងថា មណ្ឌលកុមារកំព្រាព្រៃជុំជាទូទៅកុមាររស់នៅទីនេះភាគច្រើនត្រូវឪពុកម្តាយបោះបង់ចោលមានអាយុចាប់ពី៧ខែ ហើយក្នុងមណ្ឌលនេះចំណាយអង្ករអស់ពី១៤ ទៅ១៦ប៉េក្នុងមួយខែហើយការខ្វះខាតក្នុងមណ្ឌលកុមារកំព្រានេះគឺតម្រូវការហូបចុកប្រចាំថ្ងៃ និងសម្ភារៈចាំបាច់មួយចំនួនទៀត។ ក្រៅពីចិញ្ចឹមមើលថែយកចិត្តទុកដាក់នៅមណ្ឌលនេះក៏មានការអប់រំបង្រៀនទូទៅដូចជាអក្សរសាស្រ្តខ្មែរ អង់គ្លេស រួមទាំងសិល្បៈរបាំប្រពៃណីខ្មែរជាដើម៕