យោងតាមរបាយការណ៍របស់គេហទំព័រ Cable.co.uk បង្ហាញថា ប្រទេសកម្ពុជាបានជាប់ចំណាត់ថ្នាក់ទី៥ លើពិភពលោក និងជាប់ចំណាត់ថ្នាក់ទី១ នៅតំបន់អាស៊ាន គឺជាប្រទេសមានតម្លៃអ៊ីនធើណេតចល័ត (Mobile Data) 1 GB ថោកបំផុត ។ ចំណែកប្រទេសឡាវបានជាប់ចំណាត់ថ្នាក់ទី១៤ លើពិភពលោក និងជាប់ចំណាត់ថ្នាក់ទី២ នៅតំបន់អាស៊ាន គឺជាប្រទេសមានតម្លៃអ៊ីនធើណេតចល័ត (Mobile Data) 1 GB ថោកបំផុត ។

របាយការណ៍នេះ គឺជាការប្រៀបប្រៀបគម្រោងទិន្នន័យអ៊ីនធើណេតចល័តចំនួន៥.៦០៣គម្រោងនៅប្រទេសចំនួន២៣៧ ។ គេហទំព័រ Cable.co.uk បានប្រមូលផ្តុំទិន្នន័យ និងធ្វើការវិភាគដើម្បីប្រៀបធៀបតម្លៃអ៊ីនធើណេតចល័តក្នុង 1 GB នៅប្រទេសនានាលើពិភពលោក ។

ចំណែកអ៊ីស្រាអែលជាប្រទេសមានតម្លៃអ៊ីនធើណេតចល័តក្នុង 1 GB ថោកបំផុតលើពិភពលោក ដោយមានតម្លៃត្រឹមតែ០.០២ដុល្លារអាមេរិកប៉ុណ្ណោះ ។ មូលហេតុដែលធ្វើឱ្យសេវាអ៊ីនធើណេតចល័តមានតម្លៃថោកនៅអ៊ីស្រាអែល គឺដោយសារការប្រកួតប្រជែងគ្នាយ៉ាងខ្លាំងក្លារបស់ក្រុមហ៊ុនផ្តល់សេវាកម្មអ៊ីនធើណេតនៅប្រទេសអ៊ីស្រាអែល ។ ដូច្នេះ ទើបធ្វើឱ្យប្រទេសនេះផ្តល់សេវាកម្មទិន្នន័យអ៊ីនធើណេតទ្រង់ទ្រាយធំ ដែលគ្របដណ្តប់ទាំងបណ្តាញ 4G LTE និង 5G ។

ទោះយ៉ាងណា ប្រទេសឡាវបានជាប់ចំណាត់ថ្នាក់ទី១៤ លើពិភពលោក ជាមួយប្រទេសរុស្ស៊ី និងស្រីលង្កា ដោយតម្លៃអ៊ីនធើណេតជាមធ្យមស្មើប្រមាណ០.២៥ដុល្លារអាមេរិកក្នុង 1 GB ។ ចំណែកតម្លៃអ៊ីនធើណេតជាមធ្យមនៅប្រទេសកម្ពុជា ស្មើប្រមាណ០.១២ដុល្លារអាមេរិកក្នុង 1 GB ។ រីឯប្រទេសមីយ៉ាន់ម៉ា, សិង្ហបុរី និងហ្វីលីពីន មិនបានជាប់ចំណាត់ថ្នាក់កំពូលចំនួន៥០ប្រទេសទេ ។

Dan Howdle ជាអ្នកវិភាគពីអ្នកប្រើប្រាស់បណ្តាញអ៊ីនធើណេតប្រចាំ Cable.co.uk លើកឡើងថា វាជារឿងគួរឱ្យរីករាយណាស់ដែលបានឃើញតម្លៃអ៊ីនធើណេតចល័តចុះថោកនៅលើពិភពលោក ហើយប្រទេសភាគច្រើនបានស្នើសុំតម្លៃទាបជាង២ដុល្លារអាមេរិកក្នុង 1 GB ។ ហេតុនេះ វាជាភាពខុសប្លែកគ្នាយ៉ាងខ្លាំងពីអ្វីដែលគេធ្លាប់ឃើញកាលពីឆ្នាំ២០១៩ ៕ ប្រភព ៖ AEC connect

ប្រទេសថៃ ៖ កាលពីថ្ងៃទី៤ ខែតុលា ឆ្នាំ២០២៣ លោក សេដ្ឋា ថាវីស៊ីន នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុប្រទេសថៃ បានថ្លែងក្នុងសិក្ខាសាលាមួយស្តីពី «Thailand Economic Outlook 2024 Change the Future Today» ដែលរៀបចំឡើងដោយសារព័ត៌មានថៃ ថា ការលើកកម្ពស់វិស័យទេសចរណ៍របស់ប្រទេសថៃ រដ្ឋាភិបាលកំពុងតែពិចារណាពន្យារពេលបិទក្លិបរាត្រីនានាដើម្បីជួយជំរុញវិស័យទេសចរណ៍ ។

លោក សេដ្ឋា ថាវីស៊ីន នាយករដ្ឋមន្ត្រីលើកឡើងថា បច្ចុប្បន្ន ប្រទេសថៃមានប្រៀបលើគ្រប់ផ្នែកទាំងអស់ ប៉ុន្តែយើងបានផ្សព្វផ្សាយអំពីតំបន់ទេសចរណ៍ប្រទេសថៃតិចនៅឡើយ និងការរៀបចំព្រឹត្តិការណ៍លំដាប់ពិភពលោក ។ លោកនាយករដ្ឋមន្ត្រីថ្លែងថា ៖ «ប្រសិនបើរដ្ឋាភិបាលធ្វើវិសោធនកម្មច្បាប់ ដោយអនុញ្ញាតឱ្យក្លិបរាត្រីនានាអាចបើកទទួលភ្ញៀវក្នុងរយៈពេល២៤ម៉ោង វាក៏អាចប្រឈមជាមួយបញ្ហាជាច្រើនដូចជា បញ្ហាសង្គម និងបញ្ហាសន្តិសុខ ។ ដូច្នេះ យើងត្រូវគិតឡើងវិញថា តើការបិទក្លិបរាត្រីនៅម៉ោង១ភ្លឺ តើវាគ្រប់គ្រាន់សម្រាប់ការប្រកួតប្រជែងជាមួយទីក្រុងផ្សេងៗនៅទូទាំងពិភពលោកដែរឬទេ ? ក្នុងឋានៈប្រទេសថៃចង់ក្លាយជាមជ្ឈមណ្ឌលទេសចរណ៍ប្រចាំតំបន់អាស៊ាន» ។

លោក សេដ្ឋា ថាវីស៊ីន នាយករដ្ឋមន្ត្រីថៃបន្តថា យើងត្រូវមើលថា តើការបិទក្លិបរាត្រីនៅម៉ោង១ភ្លឺ សមល្មមដែរឬទេសម្រាប់ប្រទេសថៃ ? បើមិនសមល្មមទេ យើងត្រូវតែសាកល្បងគិតជាថ្មី ហើយទទួលស្គាល់ការពិតថា តើយើងគួរតែពន្យារពេលបិទក្លិបរាត្រីដែរឬទេ ? គួបផ្សំនឹងការយកពន្ធផ្សេងៗដែលនឹងធ្វើឱ្យប្រទេសថៃល្អប្រសើរឡើង ។ ហេតុនេះ រដ្ឋាភិបាលបានចាប់ផ្តើមលើកលែងទិដ្ឋាការសម្រាប់ភ្ញៀវទេសចរចិនមុនគេ ។ លើសពីនេះ នៅមានគោលនយោបាយជាច្រើនទៀតដែលត្រូវបង្កើតឡើងមក ដើម្បីគាំទ្រឱ្យប្រទេសថៃក្លាយជាមជ្ឈមណ្ឌលទេសចរណ៍ប្រចាំតំបន់អាស៊ាន និងជាប្រទេសគោលដៅរបស់ភ្ញៀវទេសចរបរទេស ។

លោកនាយករដ្ឋមន្ត្រីបញ្ជាក់ថា រដ្ឋាភិបាលជឿជាក់ថា ប្រសិនបើប្រទេសថៃបានជំរុញគោលនយោបាយនានាឱ្យល្អនោះ គឺវានឹងមានទាំងគុណសម្បត្តិ និងគុណវិបត្តិ ហើយលោកចង់ឱ្យមានការផ្សព្វផ្សាយព័ត៌មានទាំងពីរផ្នែក ។ គ្រប់ស្ថាប័នទាំងអស់អាចជជែកគ្នាត្រង់ទៅត្រង់មក ព្រមទាំងមានការផ្តល់យោបល់ប្រកបដោយភាពច្នៃប្រឌិតផងដែរ ៕ ប្រភព ៖ Bangkok biznews

បរទេស៖ កំពូលតារាបាល់ទាត់របស់ពិភពលោក Lionel Messi បានចំណាយលុយសុទ្ធចំនួន ១០.៨ លានដុល្លារ ដើម្បីទិញផ្ទះដ៏ប្រណិតនៅក្នុងរដ្ឋផ្លរីដាសហរដ្ឋអាមេរិក។បន្ទាប់ពីខ្សែប្រយុទ្ធវ័យ ៣៦ ឆ្នាំរូបនេះបានចុះហត្ថលេខាជាមួយក្លឹប Inter Miami CF កាលពីដើមរដូវក្តៅកន្លងទៅ Messi បានចាប់អារម្មណ៍ភូមិគ្រឹះមួយស្ថិតនៅទីក្រុង Fort Lauderdale ដែលជាតំបន់សម្រាប់អភិជន ឬអ្នកជាន់ខ្ពស់រស់នៅ។

ភូមិគ្រឹះដ៏ទំនើបរបស់ Messi គឺជាវិមានដែលមានទំហំ ១០,៥០០ ម៉ែត្រការ៉េ ក្នុងនោះមានបន្ទប់ទឹកប្រាំបី បន្ទប់គេងប្រាំបួន ក៏ដូចជាមានបន្ទប់ហាត់ប្រាណ កន្លែងស្ប៉ា ការិយាល័យ និងមានសន្តិសុខការពារ ២៤ ម៉ោង ដោយខាងក្រៅផ្ទះជាប់ឆ្នេរសមុទ្រ Bay Colony ដែលមានមាត់ទឹកប្រហែល ១០០ រួមទាំងកន្លែងចតពីរ។

យោងតាមលោក Ron Shuffield ប្រធាននិងនាយកប្រតិបត្តិនៃក្រុមហ៊ុន Berkshire Hathaway HomeServices EWM Realty បាននិយាយថា បន្ទាប់ពី Messi បានទិញភូមិគ្រឹះនៅក្នុងតំបន់នេះរួច ក៏មានមនុស្សជាច្រើនបានទិញលំនៅដ្ឋាននៅក្នុងតំបន់ Fort Lauderdale ផងដែរ មូលហេតុគឺដោយសារក្នុងតំបន់នេះមានតារាល្បីៗជាច្រើននាក់ ដែលពួកគេបានជ្រើសរើសរស់នៅទីនេះដោយសារសុវត្ថិភាព។ទោះជាយ៉ាងណាក៏ដោយ អចលនទ្រព្យក្នុងសហគមន៍ Fort Lauderdale មិនអាចបំពេញតម្រូវការរបស់មនុស្សទាំងអស់នោះទេ មានន័យថាបើពួកគេចង់ទិញគឺតម្រូវឱ្យមានការបោះឆ្នោតជាមុនសិន ហើយសម្រាប់តម្លៃផ្ទះក្នុងតំបន់នោះក៏ឡើងខ្ពស់ផងដែរ៕

ប្រទេសថៃ ៖ សារព័ត៌មាន AFP បានចុះផ្សាយពីហេតុការណ៍បា.ញ់ប្រ.ហា.រនៅ SIAM PARAGON ស្ថិតនៅទីក្រុងបាងកក ប្រទេសថៃ កាលពីថ្ងៃទី៣ ខែតុលា ឆ្នាំ២០២៣ ដែលបង្កឡើងដោយយុវជនអាយុ១៤ឆ្នាំ និងបណ្តាលឱ្យមានអ្នកស្លា.ប់ចំនួន២នាក់ ព្រមទាំងរងរបួស៥នាក់ ។ សារព័ត៌មាន AFP បញ្ជាក់ថា ហេតុការណ៍នេះឆ្លុះបញ្ចាំងឱ្យឃើញពីការគ្រប់គ្រងអាវុធនៅធូររលុង និងមានបញ្ហាជាច្រើនទៀតនៅប្រទេសថៃ ដូចជា សមត្ថកិច្ចថៃប្រមូលប្រាក់តាមរយៈការលក់កាំភ្លើ.ងនៅផ្សារងងឹត និងយុវជនថៃអាចរកទិញកាំភ្លើ.ងដោយខ្លួនឯងយ៉ាងងាយស្រួល ។

ការបា.ញ់ប្រ.ហា.រនេះបានកើតឡើងនៅប៉ុន្មានថ្ងៃមុនខួបគម្រប់១ឆ្នាំ នៃហេតុការណ៍សមត្ថកិច្ចថៃបានបា.ញ់រះក្នុងមជ្ឈមណ្ឌលថែទាំកុមារមួយកន្លែងនៅខេត្តណងប៊ូឡាំភូ ។ ការបា.ញ់រះនៅពេលនោះ បណ្តាលឱ្យកុមារស្លា.ប់ចំនួន២៤នាក់ និងមនុស្សវ័យកណ្តាលស្លា.ប់ចំនួន១២នាក់ ហើយវាជាហេតុការណ៍ដ៏រន្ធត់មួយ និងធ្វើឱ្យពិភពលោកភ្ញាក់ផ្អើលជាខ្លាំង ។ ចាប់តាំងពីកើតហេតុការណ៍បា.ញ់រះកុមាររួចមក រដ្ឋាភិបាលថៃបានសន្យាថា នឹងបង្កើនការគ្រប់គ្រងអាវុ.ធឱ្យបានល្អ ប៉ុន្តែរហូតមកដល់បច្ចុប្បន្ននេះ (ខែតុលា ឆ្នាំ២០២៣) ប្រទេសថៃនៅតែសម្បូរកាំភ្លើ.ង និងកើតហេតុការណ៍បា.ញ់គ្នាស្លា.ប់ចុះផ្សាយតាមព័ត៌មានផ្សេងៗស្ទើររៀងរាល់សប្តាហ៍ ។

ចំណែកលោក Anutin Chanvirakul រដ្ឋមន្ត្រីក្រសួងមហាផ្ទៃលើកឡើងថា នឹងបង្កើនការរឹតបន្តឹងលើការចេញលិខិតអនុញ្ញាតគ្រប់គ្រងអាវុធនានា ខណៈលោកឧត្តមសេនីយ៍ទោ Torsak Sukwimon ស្នងការនគរបាលជាតិ បានអំពាវនាវឱ្យបង្កើនការត្រួតពិនិត្យពលរដ្ឋមានសុខភាពផ្លូវចិត្ត ។ ទោះយ៉ាងណា បណ្តាអ្នកជំនាញដាក់ការសង្ស័យថា តើប្រទេសថៃនឹងអាចអនុវត្តវិធានការរឹតបន្តឹងការប្រើប្រាស់អាវុធបានដែរឬទេ ?

យោងតាមទិន្នន័យពីគេហទំព័រ GunPolicy.org បញ្ជាក់ថា ថៃគឺជាប្រទេសដែលមានអត្រាគ្រប់គ្រងអាវុធខ្ពស់បំផុតក្នុងចំណោមប្រទេសនៅតំបន់អាស៊ាន ក្នុងនោះពលរដ្ឋថៃម្នាក់បានកា.ន់កា.ប់កាំភ្លើ.ង ក្នុងចំណោមពលរដ្ឋចំនួន៧នាក់ ។

ជាមួយគ្នានេះ តាមទិន្នន័យកាលពីឆ្នាំ២០១៩ បង្ហាញថា មានអ្នកស្លា.ប់ដោយសារគ្រា.ប់កាំភ្លើ.ងនៅប្រទេសថៃ ស្មើជិត១.៣០០នាក់ ។ តួលេខនេះចាត់ទុកថា ខ្ពស់ជាងនៅប្រទេសវៀតណាមទៅទៀត ដែលវៀតណាមមានអ្នកស្លាប់ដោយសារគ្រា.ប់កាំភ្លើ.ងចំនួន១៣០នាក់ ខណៈវៀតណាមមានចំនួនពលរដ្ឋច្រើនជាងថៃ រហូតដល់៤០% ៕ ប្រភព ៖ Mono News

ទីក្រុងប៊្រុចសែលស៍៖ ថ្វីត្បិតតែសហភាពអឺរ៉ុប ជាដៃគូពាណិជ្ជកម្មដ៏ធំបំផុតមួយ ជាមួយនឹងប្រទេសចិន ដោយមានទំហំពាណិជ្ជកម្ម រាប់រយពាន់លានដុល្លារអាមេរិក យ៉ាងណាក្ដី ប៉ុន្ដែប្លុកសេរីមួយនេះ ក៏មិនស្ទាក់ស្ទើរ នឹងការធ្វើសង្គ្រាមពាណិជ្ជកម្ម ជាមួយនឹងប្រទេសមហាយក្សអាស៊ីមួយនេះដែរ ព្រោះប្លុកសេរីមួយនេះ មានគោលបំណង ការពារដល់វិស័យឧស្សាហកម្មរបស់ខ្លួន ហើយរដ្ឋាភិបាលប៊្រុចសែលស៍ បានចាប់ផ្ដើមបើកការស៊ើបអង្កេតជាផ្លូវការ លើឧបត្ថម្ភធនរបស់រដ្ឋ សម្រាប់រថយន្ដអគ្គិសនីរបស់ប្រទេសចិន។

សារព័ត៌មាន South China Morning Post មានមូលដ្ឋាន នៅកោះហុងកុង បានចេញផ្សាយ កាលពីថ្ងៃពុធ ទី៤ ខែកញ្ញា ឆ្នាំ២០២៣ ថា រដ្ឋាភិបាលក្រុងប៊្រុចសែលស៍ បានបើកការស៊ើបអង្កេតជាផ្លូវការ ដោយបានអះអាង ថា សហភាពអឺរ៉ុប មានភស្ដុតាងគ្រប់គ្រាន់ ពាក់ព័ន្ធឧបត្ថម្ភធនរបស់រដ្ឋ សម្រាប់រថយន្ដអគ្គិសនីរបស់ចិន ដែលអាចធ្វើឲ្យប៉ះពាល់ដល់វិស័យរថយន្ដរបស់អឺរ៉ុប។ ការឧបត្ថម្ភធនរបស់រដ្ឋចិន សម្រាប់រថយន្ដរបស់ចិន ធ្វើឲ្យការប្រកួតប្រជែង មិនស្មើភាពគ្នា។

ដោយឡែក រដ្ឋាភិបាលក្រុងប៉េកាំង បានថ្កោលទោស ច៉ពោះការស៊ើបអង្កេតនេះ ដោយចាត់ទុក ថា វាជាអាកប្បកិរិយារបស់អ្នកការពារ ទាំងគ្មានការអៀនខ្មាស ហើយចិនថែមទាំងបានព្រមាន ថា ចំណាត់ការរបស់សហភាពអឺរ៉ុប នឹងរំខានដល់ខ្សែសង្វាក់ផ្គត់ផ្គង់របស់ពិភពលោក។

គណៈកម្មការអឺរ៉ុប បានបើកការស៊ើបអង្កេតជាផ្លូវការ លើវិស័យរថយន្តអគ្គិសនីរបស់ប្រទេសចិន កាលពីថ្ងៃពុធ (ទី៤ ខែកញ្ញា) ដោយអះអាង ថា សហភាពអឺរ៉ុប មាន«ភស្តុតាងគ្រប់គ្រាន់រួចមកហើយ” ដែលរដ្ឋាភិបាលក្រុងប៉េកាំង បានផ្តល់ការឧបត្ថម្ភធន ទាំងប្រថុយប្រថាន ហើយវានឹងនាំឲ្យបំផ្លិចបំផ្លាញ ដល់វិស័យឧស្សាហកម្មរបស់សហភាពអឺរ៉ុប។

បើតាមសេចក្តីថ្លែងការណ៍មួយ ត្រូវបានចេញផ្សាយ នៅក្នុងទិនានុប្បវត្តិផ្លូវការរបស់សហភាពអឺរ៉ុប បានបញ្ជាក់ ថា ដោយផ្អែកលើព័ត៌មានសាធារណៈ ការឧបត្ថម្ភធន «បង្កការគំរាមកំហែង ធ្វើឲ្យប៉ះពាល់ដល់ឧស្សាហកម្មរបស់សហភាពអឺរ៉ុប ដែលងាយរងគ្រោះ»។ ដោយផ្អែកលើភស្តុតាង ត្រូវបានរកឃើញ និង ការគាំទ្រភាគច្រើន ត្រូវទទួលបាន នៅក្នុងចំណោមរដ្ឋជាសមាជិករបស់សហភាពអឺរ៉ុប សហជីព អាចនឹងដំឡើងពន្ធលើការនាំចូលរថយន្ត មកពីប្រទេសចិន។

ជាប្រតិកម្មតបតវិញនោះ រដ្ឋាភិបាលក្រុងប៉េកាំង បានស្ដីបន្ទោស ដល់ការស៊ើបអង្កេតរបស់សហភាពអឺរ៉ុប ដោយបានចាត់ទុកចំណាត់ការរបស់ប្លុកសេរីមួយនេះ បង្កការរំខានយ៉ាងខ្លាំង ដល់ខ្សែសង្វាក់ផ្គត់ផ្គង់របស់ពិភពលោក៕

បរទេស៖ យោងតាមរដ្ឋមន្ត្រី Mohsin Naqvi នៃខេត្ត Punjab ភាគខាងកើតប្រទេសប៉ាគីស្ថាន បាននិយាយកាលពីថ្ងៃទី ២ ខែតុលាថា ក្រុមប៉ូលីសរបស់អាជ្ញាធរបានចាប់ខ្លួនមនុស្ស ៨ នាក់ពីបទជួញដូរក្រលៀនចំនួន ៣២៨ ឱ្យទៅអតិថិជនក្នុងតម្លៃរហូតដល់ ១០ លានរូពី (ប្រមាណ ៣៤,០០០ ដុល្លារ) ក្នុងមួយផ្លែ។
លោក Naqvi បានបន្តទៀតថា មេខ្លោងដែលបានធ្វើការវះកាត់តម្រងនោមនោះមានឈ្មោះថា Fawad Mukhtar។ ដើមឡើយលោក Fawad គឺជាគ្រូពេទ្យវះកាត់កែសម្ផស្សម្នាក់នៅមន្ទីរពេទ្យ Lahore General ប៉ុន្តែត្រូវបានបណ្តេញចេញពីការងារ។

ក្រោយមកគាត់បានល្បួងអ្នកជំងឺឱ្យមកវះកាត់តម្រងនោមនៅគ្លីនិកឯកជនមួយក្នុងទីក្រុង Taxila ដែលជាកន្លែងងាយស្រួលក្នុងការធ្វើប្រតិបត្តិការ។ បន្ទាប់មកអាជ្ញាធរបានកត់ត្រាការស្លាប់យ៉ាងហោចណាស់បីនាក់ពីគ្លីនិកនេះ ដោយប៉ូលីសបានចំណាយពេលជិត ២ ខែក្នុងការស៊ើបអង្កេត។ ដូច្នេះហើយ នៅទីបំផុតប៉ូលីសក៏បានចាប់ខ្លួនលោក Fawad រួមទាំងជនខិតខូច ៧ នាក់ទៀតពីបទជួញដូរក្រលៀនដោយខុសច្បាប់ និងដាក់ពន្ធនាគាររហូតដល់ ១០ ឆ្នាំ រួមទាំងពិន័យជាប្រាក់ចំនួន ៣,៤០០ ដុល្លារក្នុងម្នាក់។

គួរបញ្ជាក់ដែរថា ប្រទេសប៉ាគីស្ថានបានហាមឃាត់ការលក់សរីរាង្គមនុស្សតាំងពីឆ្នាំ ២០០៧ ប៉ុន្តែច្បាប់នេះត្រូវបានពង្រឹងនៅក្នុងឆ្នាំ ២០១០។ មុនពេលច្បាប់នេះត្រូវបានអនុម័ត ប៉ាគីស្ថានគឺជាមជ្ឈមណ្ឌលជួញដូរសរីរាង្គសម្រាប់ជនបរទេស និងប្រជាជនប៉ាគីស្ថានណាដែលមានទ្រព្យសម្បត្តិដែលកំពុងស្វែងរកការប្តូរសរីរាង្គ៕
ប្រភព៖vnexpress