មីយ៉ាន់ម៉ា៖ ថ្មីៗនេះយោងតាមប្រភពព័ត៌មាន ABC NEWS ដែលបានរាយការណ៍នៅថ្ងៃទី១០ ខែតុលាថា យោធាមីយ៉ាន់ម៉ាត្រូវបានចោទប្រកាន់ពីបទទម្លាក់គ្រាប់បែកលើជំរុំភៀសខ្លួននៅរដ្ឋ Kachin ភាគខាងជើង ដែលបានសម្លាប់មនុស្សជាង ៣០ នាក់ក្នុងនោះមានកុមារ ១៣ នាក់ និងមនុស្សប្រហែល ៦០ នាក់ទៀតរងរបួស។
អ្នកនាំពាក្យសន្តិសុខជាតិបាននិយាយថា មនុស្សពេញវ័យ ១៩ នាក់និងកុមារ ១៣ នាក់មកពីជំរុំត្រូវបានសម្លាប់ដោយការវាយប្រហារតាមអាកាសដែលបានកើតឡើងប្រហែលម៉ោង ១១ យប់នាថ្ងៃទី ៩ ខែតុលា។ ទោះជាយ៉ាងណាក៏ដោយ ព័ត៌មានលម្អិតពីការវាយប្រហារដោយទម្លាក់គ្រាប់បែកភ្លាមៗនេះ បច្ចុប្បន្ននៅមិនទាន់មាននរណាដឹងច្បាស់នោះទេ ហើយរឿងនេះនឹងធ្វើការស៊ើបអង្កេតជាបន្ត នេះបើយោងតាមគេហទំព័រ Kachin News Group។

សព្វថ្ងៃ ប្រទេសមីយ៉ាន់ម៉ានៅតែស្ថិតក្នុងភាពចលាចលចាប់តាំងពីយោធាបានផ្តួលរំលំរដ្ឋាភិបាលជាប់ឆ្នោតរបស់លោកស្រី Aung San Suu Kyi ក្នុងខែកុម្ភៈ ឆ្នាំ ២០២១ ដែលបង្កឱ្យមានការប្រឆាំងយ៉ាងទូលំទូលាយ។ រដ្ឋាភិបាលយោធាកាលពីឆ្នាំមុនបានបង្កើនការប្រើប្រាស់ការវាយប្រហារតាមផ្លូវអាកាសក្នុងការប្រយុទ្ធប្រឆាំងនឹងសត្រូវពីរគឺ កងកម្លាំងការពារប្រជាជនគាំទ្រលទ្ធិប្រជាធិបតេយ្យប្រដាប់អាវុធរបស់លោកស្រី Aung San Suu Kyi និងក្រុមជនជាតិភាគតិចដូចជា Kachin ដែលបានប្រយុទ្ធប្រឆាំងជាមួយក្រុមយោធាកាលពីឆ្នាំ ២០២១ ផងដែរ។

ជនជាតិ Kachin គឺជាក្រុមជនជាតិភាគតិច ដែលមានសមត្ថភាពផលិតអាវុធផ្ទាល់ខ្លួនមួយចំនួន។ ពួកគេក៏មានសម្ព័ន្ធភាពជាមួយកងជីវពលប្រដាប់អាវុធនៃកងកម្លាំងគាំទ្រលទ្ធិប្រជាធិបតេយ្យដែលត្រូវបានបង្កើតឡើងដើម្បីប្រយុទ្ធប្រឆាំងនឹងការគ្រប់គ្រងរបស់កងទ័ពយោធា។
គួររំលឹកដែរថា កាលពីខែតុលាឆ្នាំ ២០២២ កន្លងទៅ ក្រុមយោធាបានធ្វើការវាយប្រហារតាមអាកាស នៅជិតភូមិមួយក្នុងសង្កាត់ Hpakant ដែលជាតំបន់ភ្នំដាច់ស្រយាលចម្ងាយ ១៦៧ គីឡូម៉ែត្រ ភាគពាយព្យនៃឡៃហ្សា។ ការវាយប្រហារនេះបានសម្លាប់មនុស្សដល់ទៅ ៨០ នាក់ រួមទាំងមន្រ្តី ទាហាន Kachin និងតារាចម្រៀង តន្ត្រីករ សហគ្រិនជីករ៉ែត្បូង និងជនស៊ីវិលដទៃទៀត៕

រដ្ឋធានីមូស្គូ៖ ដោយសារតែពិភពលោក កំពុងតែផ្ដោតការចាប់អាម្មរណ៍យ៉ាងខ្លាំង ទៅលើប្រទេសអ៊ីស្រាអែល កំពុងតែធ្វើសង្គ្រាម ជាមួយកងជីវពលហាម៉ាស់ នោះ ស្រាប់តែទីភ្នាក់ងារចារកម្មរបស់ចក្រភពអង់គ្លេស បានរាយការណ៍ អំពីរុស្ស៊ី កំពុងតែពង្រឹងភាពជាដៃគូ ជាមួយនឹងអ៊ីរ៉ង់ ដោយបានបង្កើននូវការលុកលុយ នៅក្នុងប្រទេសអ៊ុយក្រែន។

សារព័ត៌មានអារ៉ាប់អន្ដរជាតិ Al Arabiya News បានចេញផ្សាយ នៅថ្ងៃអង្គារ ទី១០ ខែតុលា ថា ក្រសួងការពារជាតិអង់គ្លេស បានបញ្ជាក់ នៅក្នុងការធ្វើបច្ចុប្បន្នភាពព័ត៌មានសង្គ្រាមរបស់ខ្លួន ថា «ភាពឯកោជាលក្ខណៈអន្តរជាតិរបស់រុស្ស៊ី បានបង្ខំឱ្យរដ្ឋាភិបាលក្រុងមូស្គូ ងាកទៅរកកិច្ចខិតខំប្រឹងប្រែងខាងគោលនយោបាយការបរទេសរបស់ខ្លួន ឆ្ពោះទៅរកភាពជាដៃគូ ដែលមិនសូវចង់បាន កាលពីមុន ដើម្បីទទួលបានការគាំទ្រ ទាំងផ្នែកការទូត សេដ្ឋកិច្ច និង យោធា។ ជំនួយយោធារបស់អ៊ីរ៉ង់ សម្រាប់សង្គ្រាមរបស់រុស្ស៊ី នៅអ៊ុយក្រែន រួមមាន ដ្រូនរាប់រយគ្រឿង និង គ្រាប់កាំភ្លើងធំ។ ដ្រូនរបស់អ៊ីរ៉ង់ ក្លាយជាអាវុធដ៏សំខាន់ សម្រាប់យុទ្ធនាការវាយប្រហារពីចម្ងាយរបស់រុស្ស៊ី នៅលើទឹកដីរបស់អ៊ុយក្រែន។

បើតាមរបាយការណ៍ស៊ើបការណ៍សម្ងាត់របស់ចក្រអង់គ្លេស បានបញ្ជាក់ថា«ឥឡូវនេះ ការរៀបចំនេះ ត្រូវបានពង្រីក សម្រាប់ការដាក់បញ្ចូលគ្រឿងផ្គុំ និង ផលិតដ្រូន ក្រោមអាជ្ញាប័ណ្ណ នៅក្នុងរោងចក្រមួយ ស្ថិតក្នុងប្រទេសរុស្ស៊ី។ ជាមួយគ្នានេះ ទំនាក់ទំនង ការទូត និង សេដ្ឋកិច្ច រវាងរុស្ស៊ី និង អ៊ីរ៉ង់ ក៏កំពុងតែពង្រឹងផងដែរ»។

របាយការណ៍ស៊ើបការណ៍សម្ងាត់របស់ចក្រអង់គ្លេស បានបន្ដ ថា «ការចូលរួមរបស់រុស្ស៊ី ជាមួយនឹងអ៊ីរ៉ង់ តាមរយៈវេទិកាពហុជាតិសាសន៍ នឹងកើនឡើងយ៉ាងពិតប្រាកដ ក្រោយការចូលរួមរបស់អ៊ីរ៉ង់ នៅក្នុងអង្គការសហប្រតិបត្តិការសៀងហៃ កាលពីពេលថ្មីៗនេះ និង ការអញ្ជើញក្រុងតេអ៊ីរ៉ង់ ឱ្យចូលរួម នៅក្នុងវេទិកាសេដ្ឋកិច្ចរបស់ប្លុក BRICS ។

ប្រទេសអ៊ីរ៉ង់ បានអះអាង កាលពីពេលថ្មីៗនេះ ថា រុស្ស៊ី បានបោះទុនវិនិយោគ ជាមួយនឹងទំហំទឹកប្រាក់ ចំនួន ២,៧៦ពាន់លានដុល្លារ នៅក្នុងប្រទេសអ៊ីរ៉ង់ ចន្លោះពីឆ្នាំ២០២២-២០២៣។ ទំនាក់ទំនងសេដ្ឋកិច្ច ទំនងជាមានភាពស៊ីជម្រៅខ្លាំង ព្រោះរុស្ស៊ី កំពុងតែស្វែងរកការនូវកាត់បន្ថយទណ្ឌកម្ម ក្រោយការហ៊ុមព័ទ្ធសេដ្ឋកិច្ច ពីលោកខាងលិច និង សម្ពន្ធមិត្ត ពាក់ព័ន្ធនឹងសង្គ្រាម នៅអ៊ុយក្រែន៕

សហរដ្ឋអាមេរិក៖ បុរសថែសួនម្នាក់នៅរដ្ឋមីនីសូតាក្នុងប្រទេសសហរដ្ឋអាមេរិក បានបង្កើតកំណត់ត្រាពិភពលោកថ្មីមួយ បន្ទាប់ពីដាំផ្លែល្ពៅដែលមានទម្ងន់ប្រមាណ ១,២៤៧ គីឡូក្រាម។
លោក Travis Gienger មកពីទីក្រុង Anoka រដ្ឋ Minnesota បានឈ្នះក្នុងការប្រកួតជើងឯកទម្ងន់ល្ពៅពិភពលោកលើកទី ៥០ ដែលធ្វើឡើងនៅទីក្រុង Half Moon Bay នៃរដ្ឋកាលីហ្វ័រញ៉ាកាលពីថ្ងៃទី ៩ ខែតុលាកន្លងទៅ។ លោក Gienger អាយុ ៤៣ ឆ្នាំបាននិយាយបន្ទាប់ពីឈ្នះថា “អ្វីគ្រប់យ៉ាងគឺលើសពីការរំពឹងទុករបស់ខ្ញុំ ខ្ញុំមានអារម្មណ៍ថាអស្ចារ្យណាស់”។

លោក Gienger ក៏បានបន្តទៀតថា គាត់បានដាំដុះល្ពៅអស់រយៈពេលជិត ៣០ ឆ្នាំមកហើយ ដោយគាត់បានដាំវានៅលើដីខាងក្រោយផ្ទះរបស់គាត់ នឹងស្រោចទឹកចំនួន ១២ ដងក្នុងមួយថ្ងៃ។
លោក Gienger បានដាំល្ពៅតាំងពីគាត់នៅក្មេងមកម្លេះ ដែលត្រូវបានបំផុសគំនិតដោយឪពុករបស់គាត់។ បច្ចុប្បន្ន Gienger ក៏ជាគ្រូបង្រៀនផ្នែកទេសភាព និងសាកវប្បកម្មនៅមហាវិទ្យាល័យបច្ចេកទេស Anoka ផងដែរ។

Gienger បានចូលរួមដំបូងតាំងពីឆ្នាំ ២០២០ ក្នុងការប្រកួតល្ពៅប្រចាំឆ្នាំរបស់ Half Moon Bay ហើយបានឈ្នះការប្រកួតល្ពៅយក្សចំនួន ៣ ដងក្នុងចំណោមការប្រកួតល្ពៅយក្សធំៗចំនួន ៤ របស់ទីក្រុង ដូច្នេះជើងឯកឈ្នះរង្វាន់នឹងទទួលបានទឹកប្រាក់ ៣០,០០០ ដុល្លារ។
ទោះជាយ៉ាងណាក៏ដោយ កាលពីឆ្នាំមុនគាត់ក៏បានបង្កើតកំណត់ត្រាថ្មីមួយនៅអាមេរិកសម្រាប់ការដាំល្ពៅផងដែរ ដែលល្ពៅរបស់គាត់នៅពេលនោះមានទម្ងន់ ១,២២៦ គីឡូក្រាម នេះបើយោងតាមអង្គការកំណត់ត្រាពិភពលោកហ្គីណេស៕

ប្រទេសអ៊ីស្រាអែល ៖ ហេតុការណ៍វា.យប្រហា.រមកលើប្រទេសអ៊ីស្រាអែលដោយក្រុមហាម៉ាស់ បានបណ្តាលឱ្យពលរដ្ឋមកពី២២ប្រទេស ត្រូវស្លា.ប់, បាត់ខ្លួន និងក្លាយជាចំណាប់ខ្មាំង ។ ក្នុងចំណោមពលរដ្ឋទាំងនេះ ក៏មានពលរដ្ឋមកពីបណ្តាប្រទេសក្នុងតំបន់អាស៊ានផងដែរ ។

នៅថ្ងៃទី១០ ខែតុលា ឆ្នាំ២០២៣ សារព័ត៌មាន Al Jazeera បានចុះផ្សាយពីស្ថានការណ៍ជម្លោះរវាងប្រទេសអ៊ីស្រាអែល និងក្រុមហាម៉ាស់ ដោយបញ្ជាក់ថា មានជនបរទេសត្រូវបានគេសម្លា.ប់, បាត់ខ្លួន និងត្រូវគេចាប់ធ្វើជាចំណាប់ខ្មាំង សរុបចំនួន២២ប្រទេសក្នុងអំឡុងពេលការវាយប្រហារ ។ ហេតុនេះ វាបានបណ្តាលឱ្យមនុស្សស្លា.ប់ជាង៩០០នាក់ ហើយភាគច្រើន គឺជាជនជាតិអ៊ីស្រាអែល ។

ខាងក្រោមនេះ គឺជាជនបរទេសដែលត្រូវគេសម្លា.ប់, បាត់ខ្លួន និងក្លាយជាចំណាប់ខ្លាំង ៖
១-ជនជាតិថៃ ស្លា.ប់ចំនួន១៨នាក់ និងត្រូវគេចាប់ជាចំណាប់ខ្មាំងចំនួន១១នាក់
២-អាមេរិក ស្លា.ប់ចំនួន១១នាក់ និងបាត់ខ្លួនជាច្រើននាក់
៣-នេប៉ាល់ ស្លា.ប់ចំនួន១០នាក់
៤-អាហ្សង់ទីន ស្លា.ប់ចំនួន៧នាក់ និងបាត់ខ្លួន១៥នាក់
៥-អ៊ុយក្រែន ស្លា.ប់ចំនួន២នាក់
៦-បារាំង ស្លា.ប់ចំនួន២នាក់ និងបាត់ខ្លួន១៤នាក់
៧-រុស្ស៊ី ស្លា.ប់ចំនួន១នាក់ និងបាត់ខ្លួន៩នាក់
៨-អង់គ្លេស ស្លា.ប់ចំនួន១នាក់ និងបាត់ខ្លួន១នាក់
៩-កាណាដា ស្លា.ប់ចំនួន១នាក់ និងបាត់ខ្លួន៣នាក់
១០-កម្ពុជា ស្លា.ប់ចំនួន១នាក់
១១-អាល្លឺម៉ង់ ត្រូវបានគេចាប់ធ្វើជាចំណាប់ខ្មាំងជាច្រើននាក់
១២-ប្រេស៊ីល បាត់ខ្លួន៣នាក់
១៣-ឈីលី បាត់ខ្លួន២នាក់
១៤-អ៊ីតាលី បាត់ខ្លួន២នាក់
១៥-ប៉ារ៉ាហ្គាយ បាត់ខ្លួន២នាក់
១៦-ប៉េរូ បាត់ខ្លួន២នាក់
១៧-តង់ហ្សានី បាត់ខ្លួន២នាក់
១៨-ម៉ិកស៊ិក ត្រូវបានគេចាប់ធ្វើជាចំណាប់ខ្មាំងចំនួន២នាក់
១៩-កូឡុំប៊ី ត្រូវបានគេចាប់ធ្វើជាចំណាប់ខ្មាំងចំនួន២នាក់
២០-ហ្វីលីពីន បាត់ខ្លួន៦នាក់ និងត្រូវបានគេចាប់ធ្វើជាចំណាប់ខ្មាំងចំនួន១នាក់
២១-ប៉ាណាម៉ា បាត់ខ្លួន១នាក់
២២-អៀរឡង់ បាត់ខ្លួន១នាក់

ជំហានដំបូង ស្ថានទូតប្រទេសថៃប្រចាំនៅទីក្រុង Tel Aviv នឹងបញ្ជូនពលករថៃចំនួន១៥នាក់ឱ្យត្រឡប់មកប្រទេសថៃវិញ នៅថ្ងៃទី១១ ខែតុលា ឆ្នាំ២០២៣ តាមរយៈយន្តហោះអាកាសចរណ៍អ៊ីស្រាអែល (Israel Airlines) ជើងហោះហើរ LY 083 ។ យន្តហោះដំបូងនេះនឹងមកដល់អាកាសយានដ្ឋានសុវណ្ណភូមិក្នុងទីក្រុងបាងកក នៅថ្ងៃទី១២ ខែតុលា ។

លើសពីនេះ ប្រទេសថៃនឹងរៀបចំយន្តហោះបន្ថែមទៀត ហើយសង្ឃឹមថា យន្តហោះបន្ទាប់នឹងមកដល់ប្រទេសថៃ នៅថ្ងៃទី១៨ ខែតុលា ។ ស្ថានទូតថៃបញ្ជាក់ថា មានពលរដ្ឋថៃចំនួន៣.២២៦នាក់សុំត្រឡប់មកប្រទេសកំណើតវិញ ៕ ប្រភព ៖ Amarin News

ប្រទេសថៃ ៖ ក្រុមហ៊ុនប្រេងឥន្ធនៈប្រទេសថៃលើកឡើងថា សង្គ្រាមរវាងប្រទេសអ៊ីស្រាអែល និងក្រុមហាម៉ាស់ នឹងមិនធ្វើឱ្យប៉ះពាល់ដល់បរិមាណប្រេងនៅលើពិភពលោកទេ ប្រសិនបើសង្គ្រាមនេះមិនរាលដាលកាន់តែខ្លាំង ។ បើទោះជានៅដំណាក់កាលដំបូង តម្លៃប្រេងនឹងកើនឡើងខ្ពស់ក្តី ប៉ុន្តែវានឹងធ្លាក់ចុះវិញ ហើយប្រទេសថៃមានថាមពលប្រើប្រាស់គ្រប់គ្រាន់ មិនគួរបារម្ភទេ ។

លោក អាត់ថាភូន រឺកភីប៊ុន (Atthaphon Rerkphibun) នាយកប្រតិបត្តិក្រុមហ៊ុន PTT លើកឡើងថា ការផ្ទុះសង្គ្រាមនៅប្រទេសអ៊ីស្រាអែលជាមួយក្រុមហាម៉ាស់ លោកយល់ឃើញថា វានឹងមិនប៉ះពាល់ដល់បរិមាណប្រេងនៅលើពិភពលោកទេ ដោយសារមិនមែនជាតំបន់ផលិតប្រេង ប៉ុន្តែវានឹងប៉ះពាល់ដល់ផ្លូវចិត្តជនរងគ្រោះមួយចំនួន ។ លោកបន្តថា តម្លៃប្រេងបានកើនឡើងភ្លាមៗប្រមាណពី៣ដុល្លារ ទៅ៤ដុល្លារអាមេរិកក្នុង១ធុង ប៉ុន្តែចុងក្រោយ តម្លៃប្រេងនឹងធ្លាក់ចុះវិញ ហើយតម្លៃនេះនៅតែខ្ពស់ជាងតម្លៃនៅមុនអំឡុងពេលកើតសង្គ្រាមនៅអ៊ីស្រាអែល ប្រមាណ២ដុល្លារអាមេរិកក្នុង១ធុង ។

ទោះយ៉ាងណា សម្រាប់ក្រុមហ៊ុនប្រេងឥន្ធនៈរបស់ថៃ (PTT) បើហេតុការណ៍សង្គ្រាមមិនបានអូសបន្លាយ ឬរីករាលដាលខ្លាំងជាងបច្ចុប្បន្ននោះទេ គឺចាត់ទុកថា មិនគួរឱ្យបារម្ភទេ ។ ប៉ុន្តែក្រុមហ៊ុន PTT បានត្រៀមខ្លួនស្វែងរក និងគ្រប់គ្រងថាមពល ព្រោះក្រុមហ៊ុនបានវិនិយោគក្នុងផ្នែកបម្រុងទុកថាមពលឱ្យបានគ្រប់គ្រាន់សម្រាប់ប្រើប្រាស់នៅប្រទេសថៃ ដូចជា ប្រេង និង Gas ។ ហេតុនេះ ពលរដ្ឋថៃមិនចាំបាច់បារម្ភទេ ព្រោះប្រទេសថៃមានថាមពលប្រើប្រាស់គ្រប់គ្រាន់ ។

លោក អាត់ថាភូន រឺកភីប៊ុន នាយកប្រតិបត្តិក្រុមហ៊ុន PTT បន្ថែមថា ចំពោះហេតុការណ៍អាក្រក់បំផុតនោះ លោកគិតថា ឱកាសកើតឡើងមិនច្រើនទេ ។ ដូច្នេះ សម្រាប់ការស្វែងរកថាមពលផ្សេងៗ ខាងក្រុមហ៊ុន PTT បានធ្វើពាណិជ្ជកម្មនៅទូទាំងពិភពលោក ដែលធ្វើឱ្យក្រុមហ៊ុនមានលទ្ធភាពរកប្រភពផលិតប្រេងនៅជុំវិញពិភពលោក ។ ហេតុនេះ បើនៅតំបន់មួយចំនួនមានបញ្ហា ដូចជា តំបន់មជ្ឈិមបូព៌ា ក្រុមហ៊ុន PTT អាចស្វែងរកប្រេងពីតំបន់ផ្សេងមកជំនួសបាន ហើយក្រុមហ៊ុនក៏បានតាមដានស្ថានការណ៍នៅអ៊ីស្រាអែលជាប្រចាំផងដែរ ៕ ប្រភព ៖ mgronline