បរទេស៖ យោងតាមស្ថានីយ៍ទូរទស្សន៍ CCTV របស់ចិនដែលបានរាយការណ៍នៅថ្ងៃទី ១៥ ខែតុលាថា បេសកជនពិសេសរបស់លោក Zhuo Xuan នឹងទៅកាន់មជ្ឈិមបូព៌ានៅសប្តាហ៍ក្រោយដើម្បីសម្របសម្រួលជាមួយគ្រប់ភាគីទាំងអស់ក្នុងការជំរុញកិច្ចចរចាសន្តិភាពសម្រាប់ជម្លោះអ៊ីស្រាអែល និងក្រុមហាម៉ាស់ ក៏ដូចជាការពារជនស៊ីវិលធ្វើឱ្យស្ថានភាពស្ងប់ស្ងាត់ឡើងវិញ។

របាយការណ៍របស់ CCTV បានកើតឡើងនៅពេលដែលអ៊ីស្រាអែលបានត្រៀមខ្លួនសម្រាប់ការវាយលុកលើដីប្រឆាំងនឹងក្រុមសកម្មប្រយុទ្ធហាម៉ាសនៅក្នុងតំបន់ហ្គាហ្សា។ មនុស្សជាង ១ លាននាក់នៅភាគខាងជើងនៃតំបន់ហ្កាហ្សាត្រូវបានបញ្ជាឱ្យភៀសខ្លួនមុនពេលការវាយប្រហារ។ ទោះជាយ៉ាងក៏ដោយ ការវាយឆ្មក់របស់ពួកហាម៉ាស លើប្រទេសអ៊ីស្រាអែលកាលពីថ្ងៃទី ៧ ខែតុលាកន្លងទៅ បានបង្កឱ្យមានជម្លោះយ៉ាងខ្លាំង ដែលបណ្តាលឱ្យមនុស្ស ១,៣០០ នាក់ស្លាប់នៅក្នុងប្រទេសអ៊ីស្រាអែលនិងច្រើនជាង ២,២០០ នាក់ស្លាប់នៅក្នុងតំបន់ហ្គាហ្សា។

អ្នកការទូតកំពូលរបស់ទីក្រុងប៉េកាំងលោក Wang Yi បានអំពាវនាវឱ្យសហរដ្ឋអាមេរិក “ដើរតួនាទីស្ថាបនា និងទទួលខុសត្រូវ” នៅក្នុងជម្លោះនេះ ហើយបានជំរុញឱ្យមាន “ការកោះប្រជុំសន្តិភាពអន្តរជាតិឱ្យបានឆាប់តាមដែលអាចធ្វើទៅបាន ដើម្បីឈានដល់ការឯកភាពទូលំទូលាយ”។ លោក Wang ក៏បានបន្តទៀតថា ទីក្រុងប៉េកាំងនឹងដើរតួនាទីយ៉ាងសំខាន់លើបញ្ហាទាំងអស់ក្នុងតំបន់ប៉ាឡេស្ទីន។ ដូច្នេះ ទីក្រុងប៉េកាំងនឹង “ខិតខំប្រឹងប្រែងឥតឈប់ឈរ ដើម្បីធ្វើឱ្យដំណើរការសន្តិភាពមជ្ឈិមបូព៌ាមានដំណើរការល្អឡើងវិញ” នេះបើយោងតាមសេចក្តីថ្លែងការណ៍របស់ក្រសួងការបរទេស។

គួរបញ្ជាក់ដែរថា ចិនគឺជាប្រទេសមហាអំណាចនៃមជ្ឈិមបូព៌ាដែលបានផ្តល់ការគាំទ្រជាច្រើនដល់ក្រុមហាម៉ាសរបស់ប៉ាឡេស្ទីន ខណៈអាមេរិកឈរខាងអ៊ីស្រាអែល ដែលបច្ចុប្បន្នចិននិងសហរដ្ឋអាមេរិកកំពុងសហការគ្នាដើម្បីសម្របសម្រួលអ៊ីស្រាអែល និងក្រុមហាម៉ាស់ឱ្យមានស្ថានភាពស្ងប់ស្ងាត់ឡើងវិញ៕

ប្រព័ន្ធផ្សព្វផ្សាយរបស់ប្រទេសជប៉ុនបានរាយការណ៍កាលពីពេលថ្មីៗនេះថា ចាប់តាំងពីប្រទេសកូរ៉េខាងជើងបានប្រកាសពីការបញ្ចប់នៃជំងឺរាតត្បាតកាលពីខែសីហាឆ្នាំមុន ចំនួននៃការប្រហារជីវិតជាសាធារណៈនៅក្នុងប្រទេសនេះបានកើនឡើងយ៉ាងខ្លាំង។

ហេតុផលនៅពីក្រោយការកើនឡើងភ្លាមៗនៃទោសប្រហារជីវិតនេះបង្ហាញពីសារច្បាស់លាស់មួយ ដើម្បីបង្កការភ័យខ្លាចក្នុងចំណោមប្រជាពលរដ្ឋ និងជំរុញវិធានការរឹតត្បិតប្រឆាំងនឹងការប្រើប្រាស់ និងការផ្សព្វផ្សាយខ្លឹមសារប្រព័ន្ធផ្សព្វផ្សាយរបស់កូរ៉េខាងត្បូង។ ជាមួយនឹងការបន្ធូរបន្ថយនៃឧបសគ្គដែលទាក់ទងនឹងជំងឺរាតត្បាតក្នុងការធ្វើដំណើរ វាត្រូវបានគេយល់ថាបណ្តាញចែកចាយសម្រាប់ប្រព័ន្ធផ្សព្វផ្សាយបែបនេះនឹងពង្រីកដោយជៀសមិនរួច។

យោងតាមរបាយការណ៍ មនុស្សប្រហែល ១០០ នាក់ត្រូវបានប្រហារជីវិតជាសាធារណៈនៅក្នុងឆ្នាំមុន ដែលជាការកើនឡើងគួរឱ្យកត់សម្គាល់ពីចំនួនធម្មតានៃការប្រហារជីវិតប្រហែល១០នាក់ជារៀងរាល់ឆ្នាំមុនពេលការផ្ទុះឡើងនៃកូវីដ១៩។

ត្រលប់ទៅខែធ្នូ ឆ្នាំ២០២០ ប្រទេសកូរ៉េខាងជើងបានបង្កើតច្បាប់ថ្មីមួយដើម្បីហាមប្រាមការមើល ឬចែកចាយខ្លឹមសារប្រព័ន្ធផ្សព្វផ្សាយរបស់កូរ៉េខាងត្បូងទាំងអស់ រួមទាំងរឿងភាគកូរ៉េ និងភាពយន្តផងដែរ។ ឆ្នាំនេះ ក្មេងជំទង់ម្នាក់ត្រូវបានប្រហារជីវិតជាសាធារណៈដោយសារតែមិនគោរពតាមបទប្បញ្ញត្តិនេះ។

ទោះយ៉ាងណាក៏ដោយ មិនមែនការកាត់ទោសជាសាធារណៈទាំងអស់នៅប្រទេសកូរ៉េខាងជើងត្រូវបានចោទប្រកាន់ដោយច្បាស់លាស់នោះទេ ក្នុងនោះ បុរស ៧ នាក់ និងស្ត្រី ២នាក់ត្រូវបានប្រហារជីវិតជាសាធារណៈនៅឆ្នាំនេះដោយមិនដឹងមូលហេតុ។ របាយការណ៍នេះនិយាយទៀតថា មានប្រជាជនកូរ៉េខាងជើងជាច្រើននាក់ ដែលទទួលរងនូវការគេងមិនលក់ ឬជំងឺខ្សោយបេះដូង បន្ទាប់ពីត្រូវបានបង្ខំឱ្យមើលការប្រហារជីវិតជាសាធារណៈ៕

ស្របពេលដែលសង្គ្រាមកំពុងផ្ទុះខ្លាំងនៅតំបន់ហ្គាហ្សា រវាងអុីស្រាអែល និងប៉ាឡេស្ទីន បានជម្រុញឱ្យប្រទេសមហាអំណាចមួយចំនួន បានចូលខ្លួនមកជួយគាំទ្រទាំងសព្វាវុធ និងស្បៀងអាហារជាដើម ដែលភាគច្រើនគេឃើញមានប្រទេសអាមេរិក និងលោកខាងលិច គាំទ្រអុីស្រាអែលពេញទំហឹង ខណៈប៉ាឡេស្ទីនមានតែប៉ុន្មានប្រទេសប៉ុណ្ណោះគាំទ្រ ដែលភាគច្រើនជាប្រទេសកាន់សាសនាអុីស្លាម។ក្នុងនោះគេឃើញមានតែ ប្រទេសអៀរឡង់ តែមួយប៉ុណ្ណោះ ដែលស្ថិតនៅក្នុងសមាជិកសហភាពអឺរ៉ុប ប្រកាសជំហរឈរខាងប៉ាឡេស្ទីន និងគាំទ្រ ឱ្យពិនិត្យឡើងវិញនៅច្បាប់ស្តីពីការបង្កើតរដ្ឋអុីស្រាអែល នៅឆ្នាំ១៩៤៨ ដែលបានធ្វើឱ្យប៉ាឡេស្ទីនដែលជាប្រជាជនម្ចាស់ស្រុក បែរជាត្រូវបាត់បង់ទឹកដី អស់ជាង៨០ភាគរយ។
ការចេញមកឈរខាងប៉ាឡេស្ទីន បានធ្វើឱ្យអៀរឡង់រងទណ្ឌកម្មជាច្រើន ពីប្រទេសអាមេរិក និងបណ្តាប្រទេសនៅលោកខាងលិច។ អ្នកនាំពាក្យរបស់ ប្រទេសអៀរឡង់ បានលើកឡើងថា៖”ហេតុអ្វីប្រទេសមួយទាមទារទឹកដីរបស់ខ្លួនមកវិញ ត្រូវបានចាត់ទុកជាពួកភេវរករ ខណៈដែលអ៊ុយក្រែនក៏ការពារទឹកដីខ្លួន ដូចទៅនឹងប៉ាឡេស្ទីនដែរ តែត្រូវបានគេចាត់ទុកជាជនរងគ្រោះដោយសារសង្គ្រាមទៅវិញ។សូមបញ្ជាក់ផងដែរថា តាំងពីដើមមក ពលរដ្ឋប៉ាឡេស្ទីន យល់ឃើញថាទឹកដីអុីស្រាអែលជារបស់ខ្លួន និងគួរណាស់តែគោរពប្រតិបត្តិសាសនាអុីស្លាម ខណៈដែលពលរដ្ឋអុីស្រាអែល ជាគ្រីស្ទបរិស័ទ ពួកគេយល់ឃើញថា ព្រះយេស៊ូគ្រិស្ត បានចាប់កំណើតនៅលើទឹកដីខ្លួន៕

បរទេស៖ កំពូលតារាបាល់ទាត់ពិភពលោក Cristiano Ronaldo ត្រូវបានតុលាការរបស់ប្រទេសអ៊ីរ៉ង់កាត់ទោសពីបទបំពានលើស្រ្តីម្នាក់ ខណៈដែលលោកបានទៅប៉ះពាល់ស្រ្តីពិការម្នាក់នៅក្នុងប្រទេសអ៊ីរ៉ង់កាលពីថ្ងៃទី ១៤ ខែតុលាកន្លងទៅ។

ព័ត៌មានកក្រើកមួយនេះបានធ្វើឱ្យ​អ្នក​គាំទ្រ​បាល់ទាត់​មាន​ការ​ភ្ញាក់​ផ្អើលយ៉ាងខ្លាំងនៅពេលដែលគេហទំព័រ​​បរទេសមួយ​បាន​រាយការណ៍​ថា ប្រទេសអ៊ីរ៉ង់ និងដាក់​ទណ្ឌកម្មដោយវាយខ្សែតីចំនួន ៩៩ ដងលើខ្សែប្រយុទ្ធ Cristiano Ronaldo។ ដោយភ្លាមៗនោះស្ថានទូតអ៊ីរ៉ង់ប្រចាំទីក្រុងម៉ាឌ្រីដប្រទេសអេស្ប៉ាញបានបដិសេធថា ព័ត៌មានទាំងនេះមិនពិតនោះទេ។

ហេតុការណ៍នេះកើតឡើងនៅពេលដែល Cristiano Ronaldo បានធ្វើដំណើរទៅកាន់ប្រទេសអ៊ីរ៉ង់ដើម្បីជួយក្រុម Al Nasser ក្នុងការប្រកួតពានរង្វាន់ AFC Champions League។ ហើយក៏បានជួបស្ត្រីពិការម្នាក់មានឈ្មោះថា Fatima Hamami ដែលនាងគឺជាអ្នកគាំទ្ររបស់ខ្សែប្រយុទ្ធ Ronaldo និងជាវិចិត្រករជនជាតិអ៊ីរ៉ង់ម្នាក់ Fatima Hamami បានប្រើជើងរបស់នាងដើម្បីគូររូបភាពដ៏ស្រស់ស្អាតជូន Cristiano Ronaldo បន្ទាប់មកខ្សែប្រយុទ្ធវ័យ ៣៨ ឆ្នាំរូបនេះក៏បានឱបថើបស្ត្រីនោះក្នុងគោលបំណងចង់អរគុណប៉ុណ្ណោះ។

ទោះជាយ៉ាងណាក៏ដោយ ប្រទេសអ៊ីរ៉ង់មានច្បាប់មួយគឺថា​ ការឱបរឺប៉ះ​ស្ត្រី​មិន​ទាន់​រៀបនៅទីសាធារណៈការ គឺជាការខុសច្បាប់ និងល្មើសប្រពៃណី ដូច្នេះ Ronaldo និង​ទទួល​ទណ្ឌកម្មពីបទអំពើ សាហាយស្មន់ដោយលួចលាក់​ប្រសិនគាត់​ធ្វើ​ដំណើរ​ទៅ​ប្រទេស​អ៊ីរ៉ង់​ម្ដង​ទៀត។ ដោយប្រភពមួយបានសរសេរថា មេធាវីមួយចំនួន​របស់​អ៊ីរ៉ង់បានដាក់ពាក្យបណ្ដឹងព្រហ្មទណ្ឌអំពីទង្វើដែលប្រទេសមួយនេះយល់ថាល្មើសប្រពៃណី និង ខុសច្បាប់​ហើយប្រព័ន្ធ​តុលាការ​បាន​ចាត់​វិធាន​ការ​យ៉ាង​ឆាប់​រហ័ស ដោយ​កាត់​ទោស​ខ្សែប្រយុទ្ធ​វ័យ ៣៨ ឆ្នាំ​រូប​នេះ​ឱ្យទទួលរងពិន័យវាយនិងខ្សែតីចំនួន ៩៩ ដងផងដែរ។

គួរបញ្ជាក់ដែរថា Cristiano Ronaldo មិនបានទទួល​ទណ្ឌកម្មអ្វីនោះទេ ប៉ុន្តែលោកត្រូវបាន​មន្ត្រី​អ៊ីរ៉ង់ស្នើរឱ្យធ្វើការសុំទោសជាសារធារណៈ ដោយបច្ចុប្បន្នបញ្ហានេះត្រូវបានដោះស្រាយរួចរាល់អស់ហើយ៕

បរទេស៖ បច្ចុប្បន្នខ្សែភាពយន្តរបស់ចិនបានរីកចម្រើនយ៉ាងខ្លាំងគួរឱ្យកត់សម្គាល់ ខណៈខ្សែភាពយន្តហូលីវូដកំពុងធ្លាក់ចុះ ទោះជាយ៉ាងណាក៏ដោយសេដ្ឋកិច្ចក្នុងប្រទេសចិននៅតែស្ថិតក្នុងភាពស្រពិចស្រពិលនៅឡើយទេ។
យោងតាមទិន្នន័យពី Dengta និង Maoyan ដែលជាកម្មវិធីតាមដានប្រអប់សំបុត្រធំពីររបស់ប្រទេសចិន បានឱ្យដឹងថា ខ្សែភាពយន្តចិនទាំងអស់រកចំណូលបាន ២៣.៤៤ ពាន់លានយន់ (ប្រមាណ ៣.២ ពាន់លានដុល្លា) ក្នុងចន្លោះខែមិថុនា និងខែកញ្ញា ដែលជាចំនួនខ្ពស់បំផុតក្នុងប្រវត្តិសាស្ត្រ។ ការលក់សំបុត្រសម្រាប់រដូវក្តៅរវាងខែមិថុនាដល់ខែសីហាបានកើនឡើងដល់កំណត់ត្រា ២០.៦ ពាន់លានយន់ (ប្រមាណ ២.៨ ពាន់លានដុល្លារ) ដោយបានបំបែកកំណត់ត្រារដូវក្តៅក្នុងឆ្នាំ ២០១៩ ចំនួន ១៧.៨ ពាន់លានយន់ (ប្រមាណ ២.៤ ពាន់លានដុល្លារ)។

ដូច្នេះ មនុស្សជាង ៥៧០ លាននាក់បានសម្រុកទៅរោងកុនក្នុងរយៈពេល ៤ ខែចុងក្រោយនេះ ហើយភាគច្រើនប្រមាណ ៦១% គឺជាស្ត្រីដែលមានអាយុចន្លោះពី ២០ ទៅ ២៩ ឆ្នាំ សម្រាប់ខ្សែភាពយន្តកំពូលទាំង ៣ របស់ចិនដូចជា No More Bets, Lost in the Stars, និង Creation។
លោក Stanley Rosen សាស្ត្រាចារ្យផ្នែកវិទ្យាសាស្ត្រនយោបាយ និងទំនាក់ទំនងអន្តរជាតិនៅវិទ្យាស្ថាន USC របស់ US-China បាននិយាយថា ទោះបីជាខ្សែភាពយន្តរបស់ចិនរីកចម្រើនខ្លាំងប៉ុណ្ណាក៏ដោយ ក៏សេដ្ឋកិច្ចនៅក្នុងប្រទេសចិននៅតែស្ថិតក្នុងភាពស្រពិចស្រពិល មានន័យថា សេដ្ឋកិច្ចនៅតែបន្តធ្លាក់ចុះ។

ផលិតផលក្នុងស្រុកសរុបរបស់ប្រទេសចិនបានកើនឡើងត្រឹមតែ ០.៨% នៅក្នុងត្រីមាសទីពីរ បើធៀបនឹងរយៈពេលបីខែមុន។ ទីផ្សារអចលនៈទ្រព្យសំខាន់ៗទាំងអស់ ដែលគ្រួសារចិនរក្សាទុក ៨០% នៃទ្រព្យសម្បត្តិរបស់ពួកគេបានបន្តធ្លាក់ចុះ។ ហើយមនុស្សកំពុងស្តុកទុកសាច់ប្រាក់ចំពេលមានការកើនឡើងនៃភាពមិនច្បាស់លាស់អំពីអនាគត។
លោក Stanley Rosen ក៏បានបន្តទៀតថា ទោះជាយ៉ាងណាក៏ដោយ ខ្សែភាពយន្តលីវូដបច្ចុប្បន្នកំពុងធ្លាក់ចុះបន្តិចម្តងៗ ក្នុងប៉ុន្មានឆ្នាំថ្មីៗនេះ ដោយសារការរឹតបន្តឹងការត្រួតពិនិត្យ ទំនាក់ទំនងទ្វេភាគីកាន់តែអាក្រក់ ការកើនឡើងនូវមនោសញ្ចេតនាជាតិនិយមដែលជំរុញដោយការឃោសនារបស់រដ្ឋ ក៏ដូចជាការប្រកួតប្រជែងពីខ្សែភាពយន្តដែលផលិតក្នុងស្រុកផងដែរ ហេតុនេះហើយទើបធ្វើឱ្យខ្សែភាពយន្តអាមេរិកក្លាយជាភាពយន្តទីពីរនៅលើពិភពលោក ខណៈចិនឈរនៅលំដាប់ទីមួយ នេះបើយោងតាមសារព័ត៌មាន CNN៕