រឿងរ៉ាវអ្នកជំនួញអនឡាញឈ្លោះគ្នាផ្អើលប្រទេសក្លាយជាប្រធានបទក្តៅនាចុងឆ្នាំ២០២៣ពីមិត្តភាពដែលសាងមកជិត១០ឆ្នាំបែរជាមើលមុខគ្នាមិនចំរហូតឈានដល់ការស្បថស្បែ។ ជុំវិញរឿងនេះកញ្ញាជ្រូកព្រៃ អ្នកលេងបណ្តាញសង្គមល្បីឈ្មោះនិងជាអតីតបេក្ខភាព Cambodia’s Got Talent រដូវកាលទី៣ បានបង្ហោះវីដេអូមួយស្តាយមិត្តភាពម៉ាដាមដា ម៉ានីន និងស្រីណៃនិងចង់ឱ្យពួកគេត្រូវគ្នាវិញ ជីវិតមនុស្សម្នាក់មិនយូរទេ ដូច្នេះមានអ្វីដែលអាចផ្សះផ្សាលើកលែងបានគួរតែលើកលែង។

នៅក្នុងវីដេអូដែលបង្ហោះលើបណ្តាញសង្គមទិកតុកកញ្ញា ជ្រូកព្រៃ បាននិយាយថាអ្នកជិតខាងឈ្លោះគ្នាអ្នកណាក៏មើល ដូចជាមើលរឿងក្នុងកុនមើលទៅសប្បាយអីចឹងទៅតែក្នុងរឿងម៉ាដាមដា ទោះបីខ្លួនជាBAឱ្យម៉ាដាមក៏ដោយមិនបានលូកលាន់អីទេ គេឈ្លោះគ្នា ចាំមើលតែប៉ុណ្ណោះដោយខ្លួនចង់ឱ្យអ្នកទាំងនោះត្រូវគ្នាវិញ។ កញ្ញាជ្រូកព្រៃថា ក្នុងជីវិតគឺតែងតែមានការទាស់ទែងគ្នាសូម្បីតែម្តាយហើយនឹងកូនក៏មានរឿងឈ្លោះគ្នាដែរ ក្នុងនោះក៏មានមិត្តភាពដូចគ្នា ហើយខ្លួនក៏ជួបផ្ទាល់ពេលខ្លះមិត្តខ្លះមកដដែលៗតែខ្លួនអត់មើលចំណុចទាំងនោះព្រោះជាមិត្តដោយមើលតែចំណុចល្អៗស្តាយសម្ព័ន្ធភាពព្រោះទម្រាំសាងមកបាន។

ជ្រូកព្រៃ ថាពេលខ្លះយើងអាចសម្រួលគ្នាបានអត់ ឱ្យឱកាសបានអត់ សួរចិត្តខ្លួនឯង កុំឱ្យខុសច្រើនដងនិយាយគ្នាបានសម្រួលគ្នាបានគួរតែសម្រួលព្រោះឃើញការរាប់អានរបស់អ្នកលក់អនឡាញប៉ុន្មានរូបនោះឈានដល់ជិត១០ឆ្នាំហើយ។ កញ្ញា បន្ថែមទៀតថារយៈពេល១០ឆ្នាំវាយូរហើយតែងតែមានការប្រែប្រួលទៅតាមការមានបាន រីកចម្រើន វាតែងតែមាន ជាក់ស្តែងមិត្តភក្តិខ្លួនដូចគ្នាពេលមានបានស្អប់យកតែម្តង ប៉ុន្តែពេលខ្លះយើងនិយាយជាមួយគ្នាទៅព្រោះស្តាយមិត្តភាពដែរព្រោះជីវិតមិនទៀងនោះទេ ដោយចង់ឃើញការសាមគ្គី មិនមែនលើកទ័ពធ្វើបែបនេះទេ ជាមិត្តភក្តិល្អកុំមានចិត្តច្រណែនគ្នា។

ការលើកឡើងចង់ឱ្យម៉ាដាម ដាម៉ានីន និងស្រីណៃ និងអ្នកក្នុងរង្វង់ជម្លោះនេះរបស់កញ្ញាជ្រូកព្រៃ ត្រូវបានអ្នកលេងបណ្តាញសង្គមជាច្រើនបង្ហាញការគាំទ្រចង់ឱ្យអ្នកទាំងនោះវិលមកផ្សះផ្សាគ្នាឡើយវិញក្លាយជាមិត្តភក្តិដូចពីមុនបំភ្លេចរឿងមិនល្អចោល៕

មិនឱ្យខកសន្យាជាមួយអ្នកគាំទ្រ Peypey Dy និង Alex Conan Real ហៅចែតាបារាំង បានចេញ មកLive ទាំងយប់បន្ទាប់ពីក្តៅក្រហាយរឿងម្ចាស់ប្រ៊េនមួយដែលកំពុងមានរឿងល្បីដែលគេស្គាល់ថាជា Madam Da ពីរឿងអតីតកាលបាននិយាយពីតម្លៃខ្លួនក្នុងការប្រូម៉ូតផលិតផលទៅប្រាប់អ្នកដទៃ ខណៈនិយាយដើមតួថាធ្វើខ្លួនមិនស្អាតបាតប៉ុន្តែទារតម្លៃខ្លួនច្រើន។

នៅល្ងាចថ្ងៃទី៧ ធ្នូ ចែតា បានបង្ហោះសារថា «ផ្ញើជូនអ៊ីម្ចាស់Brandដ៏ល្បីម្នាក់ដែលចូលចិត្តបង្កើតសាច់រឿងកុំរៀនខូចមាត់ពេកខ្ញុំមិនទាន់បានទទួលលុយថតអ្នកឯង2xxxxx$នឹងទេអច្ចឹងមុននិយាយប្រយ័ត្នផងព្រោះជញ្ជាំងមានត្រចៀក»។ ក្រោយពីឃើញសារនេះ PeyPey Dy ក៏បានស៊ែរនិងនិយាយថា «ដាក់ទៅខ្លួនចាំមើល និយាយដល់រឿងBAក្តៅដែរហៅឯងទៅជួបចង់ឱ្យធ្វើBA ឯងដាក់តម្លៃទៅ អត់ហ៊ានយក ហើយទៅប្រាប់គេថាឯងស៊ីថ្លៃ
សំខាន់និយាយដើមឯងទៀត ការងារខ្ញុំចរចារជាមួយអ្នកឯងតែ២នាក់ ចាំបាច់ត្រូវដើរប្រាប់គេ?»។ មិនបង្អង់យូរដំដែកទាន់នៅក្តៅបន្តិចក្រោយមកក៏មានការប្រកាសថានឹងLiveប្រាប់មហាជនពីរឿងម្ចាស់ប្រ៊េនចូលចិត្តនិយាយដើមតួដែលធ្វើឱ្យមនុស្សម្នាផ្អើលអស់ត្រៀមចាំមើលការ Live រាប់ម៉ឺននាក់។

នៅក្នុងការLive ចែតាបាននិយាយថាហេតុដែលខ្លួនមានរឿងក្តៅក្រហាយនេះបន្ទាប់ពីម្ចាស់ប្រ៊េនមួយបាននិយាយថាប្រហែលជាមិនបានធ្វើការជាមួយតម្លៃខ្លួន២០ម៉ឺនដុល្លារហើយ បានជាប្រកាន់បក្ខពួក ដែលម្ចាស់ប្រ៊េននោះគេស្គាល់ថាជាម៉ាដាមដា។ អ្នកលេងបណ្តាញសង្គមល្បីឈ្មោះរូបនេះនិយាយថាខ្លួនទទួលស្គាល់ថាម្ចាស់ប្រ៊េនមួយនេះគឺល្អបាញ់លុយឱ្យមុនធ្វើការឱ្យទៅទៀត ហើយដោយខ្លួនធ្វើការល្អ ម្ចាស់ប្រ៊េនមានគម្រោងចង់ជួលប្រូម៉ូតផលិតផលដាច់តែម្តង។ ចែតា ថាខ្លួនបានដាក់តម្លៃធ្វើជាBA ចំនួន៣០ម៉ឺនដុល្លារក្នុង១ឆ្នាំ និងបានចុះឱ្យនៅ សល់២០ម៉ឺនដុល្លារក្នុង១ឆ្នាំ ដោយការដាក់តម្លៃខ្លួននេះម្ចាស់ប្រ៊េនបានសួរថាចុះបានទៀតឬអត់ ដោយរូបគេបានឆ្លើយថាមិនអាចចុះឱ្យបានទៀតទេដោយសារតែផ្សាយផលិតផលឱ្យបានតែម្នាក់ ចាប់ពីពេលនោះមកក៏ស្ងាត់មិនឃើញតបសារ ឆាតក៏មិនឆ្លើយតប។ ក្រោយមករឿងតម្លៃខ្លួន២០ម៉ឺនដុល្លារត្រូវបានអ្នកដទៃដឹងទាំងការចរចារនេះជារឿងពីរនាក់ហើយអ្នកដែលដឹងនិយាយគ្មានខុសតួលេខឡើយ។

ចែតា ថាធ្វើជាម្ចាស់ប្រ៊េនត្រូវមានសច្ចធម៌គោរពឱ្យតម្លៃ ធ្វើជាអ្នកដឹកនាំត្រូវធ្វើជាមនុស្សស្មោះត្រង់មិននិយាយអាក្រក់ពីអ្នកដទៃ និងថាបើគ្មានសមត្ថភាពយករូបខ្លួនធ្វើជាBAទេ គ្មានសិទ្ធិយកតម្លៃរបស់ខ្លួនទៅប្រាប់អ្នកដទៃនោះទេ។

មិនខុសគ្នាប៉ុន្មានឡើយដែលត្រូវបានម្ចាស់ប្រ៊េននិយាយដើម Peypey Dy បាននិយាយថាខ្លួនទើបតែដឹងរឿងថ្មីៗនេះដូចគ្នាបន្ទាប់ពីមានរឿងរ៉ាវផ្ទុះឡើង ដោយកាលពីឆ្នាំ២០២១ម្ចាស់ប៊្រេន ម៉ាដាមដា បានហៅខ្លួនទៅនិយាយពីរឿងការងារ។ បន្ទាប់ពីនិយាយគ្នារួចស្អែកឡើងលោកក៏បានដាក់តម្លៃខ្លួនទៅនូវទឹកប្រាក់ចំនួន១០ម៉ឺនដុល្លារក្នុង១ឆ្នាំនិងបានរៀបរាប់ពីការងារដែលលោកត្រូវធ្វើជូន ប៉ុន្តែការដាក់តម្លៃខ្លួននោះស្ងាត់ឈឹងមិនឃើញតប។

ក្រោយបែកធ្លាយ Peypey Dy ទើបដឹងថា ម្ចាស់ប្រ៊េនគ្មានសមត្ថភាពយករូបលោកហើយថែមទាំងនិយាយដើមលោកថាតម្លៃខ្លួនលោកថ្លៃហើយធ្វើខ្លួនមិនសមរម្យ មិនស្អាតបាតតែទារតម្លៃខ្លួនខ្ពស់៕

ទើបតែត្រូវបានអ្នកស្នេហាវិស័យប្រដាល់គុនខ្មែរកោតសរសើរពីអ្នកចម្រៀងមានចិត្តមោះមុតស្នេហាវិស័យក្បាច់គុនបុរាណខ្មែរ ស្រាប់តែ ឡាច ណុច ជាអតីតបេក្ខភាព Cambodian Idol រដូវកាលទី៤ បែរជាបែកគំនិតធ្វើជាចោរឆក់ខ្សែ-ក ត្រូវសមត្ថកិច្ចឃាត់ខ្លួនបញ្ជូនទៅតុលាការបានសម្រេច។

កាលពីវេលាម៉ោង ២០និង១៥ នាទី ថ្ងៃទី០៤ ខែធ្នូ ឆ្នាំ២០២៣ មានករណីលួចដោយហិង្សាមានស្ថានទម្ងន់ទោស (ឆក់ខ្សែ-ក) មួយកើតឡើង នៅចំណុចផ្លូវលេខ១៩៩ កែង៣៣៨ សង្កាត់ទួលស្វាយព្រៃទី១ ខណ្ឌបឹងកេងកង ខណៈដែល ជនរងគ្រោះកំពុងធ្វើដំណើរតាមផ្លូវ ស្រាប់តែត្រូវបានជនសង្ស័យជិះមកជិត ហើយធ្វើសកម្មភាពឆក់យកខ្សែ-ក បម្រុងជិះគេចខ្លួន។ ជោគវាសនាមិនល្អ ជនសង្ស័យបានទៅបុកជាមួយម៉ូតូមួយគ្រឿងទៀតបណ្ដាលឱ្យដួល បង្កការភ្ញាក់ផ្អើលដល់ប្រជាពលរដ្ឋ និងកម្លាំងមូលដ្ឋានអាវុធហត្ថខណ្ឌបឹងកេងកង ចុះអន្តរាគមន៍ឃាត់ខ្លួនបានជនសង្ស័យភ្លាមៗតែម្តង និងចាប់យកវត្ថុតាង ខ្សែក ០១ខ្សែ ប្រគល់ជូនជនរងគ្រោះវិញផងដែរ។

តាមការបញ្ជាក់របស់ផេកផ្លូវការកងរាជអាវុធហត្ថរាជធានីភ្នំពេញបានឱ្យដឹងទៀតថាជនសង្ស័យឈ្មោះ ឡាច ណុច ភេទប្រុស អាយុ២១ឆ្នាំ មុខរបរ អ្នកចម្រៀងតាមភោជនីយដ្ឋាន បានសារភាពថា ខ្លួនពិតជាបានធ្វើសកម្មភាព ឆក់ខ្សែកពីជនរងគ្រោះ នៅចំណុចខាងលើ ពិតប្រាកដមែន។
បច្ចុប្បន្នជនសង្ស័យ ត្រូវបានកម្លាំងជំនាញការិយាល័យប្រឆាំងបទល្មើសព្រហ្មទណ្ឌ នៃកងរាជអាវុធហត្ថរាជធានីភ្នំពេញ កសាងសុំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់។

ដំណឹងនេះបានធ្វើឱ្យមហាជនមានការចាប់អារម្មណ៍យ៉ាងខ្លាំងបន្ទាប់ពីដឹងថា ឡាច ណុច បែកគំនិតទៅធ្វើរឿងបែបនេះទាំងមួយរយៈមុនបានទៅហាត់ប្រដាល់ថែមទាំងចង់ប្រកួតជាមួយកីឡាករប្រដាល់ថែមទៀតធ្វើឱ្យអ្នកគាំទ្រពោលសរសើរលោកយ៉ាងខ្លាំងតែត្រូវមកសោកស្តាយពីទង្វើរបស់ ឡាច ណុច មកធ្វើជាចោរឆក់ទៅវិញ។

គួរបញ្ជាក់ថា ឡាច ណុច បានធ្វើឱ្យទស្សនិកជនស្គាល់តាមរយៈការប្រកួតប្រជែងក្នុងកម្មវិធីប្រលងចម្រៀងរបស់ស្ថានីយទូរទស្សន៍ហង្សមាស Cambodian Idol រដូវកាលទី៤ជំនាន់ជាមួយម្ចាស់ពាន លីម តិចម៉េង ដោយការប្រកួតរបស់គេឈានដល់វគ្គ Live Show សប្តាហ៍ទី៥។ ឡាច ណុច បានទម្លាយថាខ្លួនគេធ្លាប់ហាត់ប្រដាល់តាំងពីក្មេងប៉ុន្តែធំឡើងមានចិត្តស្រលាញ់ខាងវិស័យសិល្បៈវិញ ខណៈទម្លាយពីប្រវត្តិដ៏កំសត់រស់នៅបែកបាក់គ្រួសារផងដែរដែលធ្វើឱ្យមហាជនអាណិតគេសឹងតែគ្រប់គ្នា៕

ព្រះអង្គដងកើ គឺជាទីសក្ការបូជា ដ៏ល្បីមួយនៅរាជធានីភ្នំពេញ ដែលមានទីតាំងនៅមុខព្រះបរមរាជវាំង ដែលជារឿយៗគេតែងឃើញមានពលរដ្ឋនាំគ្នាទៅបន់ស្រន់ ឬបួងសួងសុំសេចក្តីសុខ និងសុំលាភសក្ការៈជាដើមនៅទីនោះ។

ទាក់ទងនឹងប្រវត្តិព្រះអង្គដងកើនេះ ចាស់ៗពីដើមនិយាយតគ្នាថា៖”ក្នុងសម័យសង្គមរាស្ត្រនិយមនៃព្រះបាទនរោត្តម សីហនុ នៅពេលព្រះអង្គមិនគង់នៅក្នុងព្រះបរមរាជវាំង គេក៏លើកទង់ជាតិឡើងដើម្បីជាសញ្ញាសម្គាល់ថាព្រះរាជាមិនគង់នៅក្នុងព្រះបរមរាជវាំងទេ ។ ក្រោយមកមហាជនខ្មែរយើងនាំគ្នាហៅដងទង់ជាតិនេះថា”ដងកើ។”ក្នុងសម័យដដែលនោះ ពលរដ្ឋខ្មែរយើងមានជំនឿថា មានអ្នកតាចូលសណ្ឋិតនៅដងទង់ជាតិនោះ ហើយនាំគ្នាសាងសង់ព្រះវិហារនិងសាងរូបសំណាកជាតំណាងដងកើ ដោយនាំគ្នាហៅថា “ព្រះអង្គដងកើ”។ដោយឡែកបើនិយាយពីជំនឿបារមីព្រះអង្គដងកើវិញ តាមការលើកឡើងតំណាលតៗគ្នារបស់ចាស់ទុំបាននិយាយាថ៖”កាលដើមឡើយនៅចំណុចមុខព្រះអង្គដងកើនេះ ឱ្យតែរៀងរាល់រាត្រីថ្ងៃសីល ឬ ថ្ងៃពេញបូរមីគេតែងតែសង្កេតឃើញមានទង់ក្រពើអណ្តែតផុសចេញពីផ្ទៃទឹកទន្លេ រួចក៏លិចទៅវិញ ដោយផុសតែមួយភ្លែតៗប៉ុណ្ណោះ។ កាលណោះដែរ ឱ្យតែដល់យប់ថ្ងៃសីល ប្រជារាស្ត្រតែងតែនាំគ្នាទៅឈរមើល និង បួងសួងសុំសេចក្តីសុខមិនដែលខកខាននោះទេ។ ដោយសារតែរាល់ការបន់ស្រន់រមែងបានសម្រេចដូចក្តីបំណងប្រាថ្នា និង ចង់ឱ្យបារមីទង់ក្រពើនោះសណ្ឋិតនៅជារៀងរហូត ទើបប្រជារាស្ត្រក៏បាននាំគ្នាកសាងទង់មួយជានិមិត្តរូប។ ចាប់តាំងពីពេលនោះមកទីនោះ ក៏បានក្លាយទៅជាកន្លែងគោរពសក្ការៈបូជារបស់ប្រជារាស្ត្រខ្មែរ ហើយទង់ក្រពើនោះក៏លែងផុសអណ្តែតចេញពីផ្ទៃទឹកទន្លេទៀតដែរ”។សូមបញ្ជាក់ផងដែរថា ជុំវិញទីសក្ការបូជាព្រះអង្គដងកើ មិនមានឯកសារបញ្ជាក់ច្បាស់លាស់មួយណានោះទេ ទាក់ទងនឹងកន្លែងដ៏ស័ក្កសិទ្ធមួយនេះ៕

ការៀបអាពាហ៍ពិពាហ៍មួយ ដែលអាចចាត់ទុកជាត្រឹមត្រូវតាមលក្ខណៈផ្លូវច្បាប់បានមិនមែនត្រឹមតែរៀបអាពាហ៍ពិពាហ៍តាមប្រពៃណីនោះទេ គឺទាមទារឱ្យបុរស និងនារី ដែលស្ម័គ្រចិត្តយកគ្នាជាប្ដីប្រពន្ធ ទៅចុះកិច្ចសន្យាអាពាហ៍ពិពាហ៍នៅចំពោះមុខមន្ត្រីអត្រានុកូលដ្ឋានខាងលំនៅដ្ឋានរបស់នារី ដោយត្រូវបានចុះក្នុងបញ្ជីអាពាហ៍ពិពាហ៍។

សំបុត្រចុះអាពាហ៍ពិពាហ៍ ឬ “អេតាស៊ីវិល” ជាលិខិតមួយប្រភេទដែលគូស្វាមីភរិយាក្រោយពេលរៀបអាពាហ៍ពិពាហ៍ហើយចាំបាច់ ត្រូវតែទៅសាលាឃុំ ឬសង្កាត់ ដើម្បីសុំចុះឈ្មោះក្នុងបញ្ជីអាពាហ៍ពិពាហ៍នៅចំពោះមុខមន្ត្រីអត្រានុកូលដ្ឋាន។

យោងតាមច្បាប់រដ្ឋប្បវេណីនៃព្រះរាជាណាចក្រកម្ពុជាបានចែងថា អាជ្ញាធរឃុំ ឬសង្កាត់ មានសិទ្ធិចេញសំបុត្រចុះបញ្ជីអាពាហ៍ពិពាហ៍ឱ្យគូស្វាមីភរិយានេះ ត្រូវធ្វើឡើងតាមការស្ម័គ្រចិត្ត ហើយមានការដឹងឮ និងយល់ព្រមពីសាច់ញាតិនៃគ្រួសារទាំងសងខាង ជាពិសេសមានទាល់តែគូស្វាមីភរិយាដែលសុំចុះបញ្ជីអាពាហ៍ពិពាហ៍នេះបានធ្វើកិច្ចសន្យាអាពាហ៍ពិពាហ៍ជាលាយលក្ខណ៍អក្សរជាមុនសិន។

សូមបញ្ជាក់ផងដែរថា អេតាស៊ីវិល នឹងបញ្ជាក់ថាគូរស្នេហ៍ដែលបានរៀបអាពាហ៍ពិពាហ៍តាមប្រពៃណីរួចរាល់ នឹងក្លាយជាប្តីប្រពន្ធស្របតាមច្បាប់។ តែយ៉ាងណាមិញ ការចុះអេតាស៊ីវិលក៏នឹងផ្តល់ផលវិបាកផងដែរប្រសិនបើ ទៅថ្ងៃខាងមុខ រស់នៅមិនចុះសម្រុងគ្នា គូរស្នេហ៍ត្រូវលែងលះគ្នានោះ គឺទាមទារឡើងតុលារការទើបអាចលែងលះគ្នាបាន៕

ប្រភព៖ កូយ ប៊ុណ្ណារ៉ា – Koy Bunnara