ប្រទេសថៃ ៖ វាជាដំណឹងដ៏រីករាយសម្រាប់ពលរដ្ឋរស់នៅប្រទេសថៃ នៅពេលលោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានបញ្ជាក់ថា រដ្ឋាភិបាលនឹងដំណើរការគម្រោង «ប្រាក់៣០បាតអាចព្យាបាលគ្រប់ជំងឺ» ដើម្បីលើកកម្ពស់ជីវភាពរស់នៅរបស់ពលរដ្ឋថៃគ្រប់រូប ។ បច្ចុប្បន្ន គម្រោងនេះសម្រេចបានជោគជ័យ៨០% ហើយ ជំហានដំបូង រដ្ឋាភិបាលនឹងសាកល្បងគម្រោងនៅខេត្តចំនួន៤ ។

កាលពីថ្ងៃទី១២ ខែវិច្ឆិកា ឆ្នាំ២០២៣ លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានសរសេរសារមួយនៅក្នុងបណ្តាញសង្គម X (Twitter) បញ្ជាក់ថា ៖ «ខ្ញុំបានដំណើរការគម្រោងប្រាក់៣០បាតអាចព្យាបាលគ្រប់ជំងឺ ដើម្បីលើកកម្ពស់ជីវភាពរស់នៅរបស់ពលរដ្ឋគ្រប់រូបនៅទូទាំងប្រទេសថៃឱ្យកាន់តែល្អប្រសើរជាងមុន» ។

សារព័ត៌មានប្រទេសថៃរាយការណ៍ថា លោក សេដ្ឋា ថាវីស៊ីន នាយករដ្ឋមន្ត្រីថៃ ក៏បានភ្ជាប់ជាមួយ Link បទសម្ភាសន៍របស់លោក Suraphong Suebwonglee ក្នុងឋានៈជាលេខាធិការនៃក្រុមប្រឹក្សាអភិវឌ្ឍន៍ប្រព័ន្ធសុខភាពជាតិ អំពីការដំណើរការគម្រោងនេះផងដែរ ។ លោកនាយករដ្ឋមន្ត្រីថៃបញ្ជាក់ថា ពលរដ្ឋអាចប្រើប្រាស់អត្តសញ្ញាណប័ណ្ណសញ្ជាតិថៃតែមួយគត់ ដើម្បីព្យាបាលគ្រប់ជំងឺទាំងអស់នៅប្រទេសថៃ ហើយវាជំរុញដល់គោលនយោបាយរបស់គណបក្សភឿថៃ ។

នេះបញ្ជាក់ថា គម្រោងខាងលើសម្រេចជោគជ័យបាន៨០%ហើយ ដោយជំហានដំបូង រដ្ឋាភិបាលចាប់ផ្តើមអនុវត្តនៅខេត្តចំនួន៤ ហើយនៅឆ្នាំ២០២៤ គម្រោងនេះនឹងរួចរាល់១០០% ។ ដូច្នេះ គេរំពឹងថា នៅថ្ងៃអនាគត អ្នកដែលមានសិទ្ធិប្រើប្រាស់គម្រោងនេះ គឺមន្ត្រីរាជការ និងអ្នកឈ្មោះក្នុងប្រព័ន្ធសន្តិសុខសង្គម ។

គួរបញ្ជាក់ថា គម្រោង «ប្រាក់៣០បាតអាចព្យាបាលគ្រប់ជំងឺ» ឬឈ្មោះជាផ្លូវការគឺ «គម្រោងធានារ៉ាប់រងសុខភាពជាសកល» ឬ «សិទ្ធិកាតមាស» ដែលជាគោលនយោបាយរបស់រដ្ឋាភិបាលថៃ ក្រោមការដឹកនាំរបស់អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា ។ រដ្ឋាភិបាលថៃបានបង្កើតគម្រោងនេះឡើង ក្នុងគោលបំណងឱ្យពលរដ្ឋមានធានារ៉ាប់រងសុខភាព គឺពួកគេអាចទទួលយកសេវាកម្មព្យាបាលជំងឺគ្រប់មុខ ដោយចំណាយប្រាក់ត្រឹមតែ៣០បាតប៉ុណ្ណោះ (ឬស្មើប្រមាណ៣ពាន់រៀល)៕ ប្រភព ៖ khaosod

ប្រទេសថៃ ៖ កសិកររស់នៅភូមិអាំផាវ៉ាន់ ឃុំសាំរាន ស្រុកមឿង ខេត្តខនកែន ប្រទេសថៃ បានសម្តែងក្តីរីករាយដែលរដ្ឋាភិបាលបង្កើតគម្រោងជួយលើកកម្ពស់គុណភាពផលិតកម្មស្រូវរបស់កសិករ ដោយកសិករម្នាក់នឹងទទួលបានប្រាក់ចំនួន១ពាន់បាតសម្រាប់ផ្ទៃដីស្រែ១រ៉ៃ (ឬស្មើប្រមាណ០.១៦ហិកតា) ។ ប៉ុន្តែពួកគេបានសំណូមពរថា សូមរដ្ឋាភិបាលកុំកំណត់ល័ក្ខខ័ណ្ឌច្រើនពេក ហើយរដ្ឋាភិបាលត្រូវគ្រប់គ្រងការចំណាយថ្លៃដើម ដូចជា តម្លៃជីកសិកម្ម និងកត្តាផលិតកម្មឱ្យច្បាស់លាស់ ។

គណៈកម្មការគោលនយោបាយ និងគ្រប់គ្រងស្រូវប្រចាំប្រទេសថៃ បានធ្វើកិច្ចប្រជុំអនុម័តគម្រោងគាំទ្រថ្លៃចំណាយ និងលើកកម្ពស់គុណភាពផលិតកម្មស្រូវរបស់កសិករនៅឆ្នាំ២០២៣ និងឆ្នាំ២០២៤ ក្នុងនោះកសិករម្នាក់នឹងទទួលបានប្រាក់ចំនួន១ពាន់បាតសម្រាប់ផ្ទៃដីស្រែ១រ៉ៃ (ឬស្មើប្រមាណ០.១៦ហិកតា) ហើយកសិករ១គ្រួសារមិនត្រូវមានផ្ទៃដីស្រែលើសពី២០រ៉ៃ (ឬលើស៣ហិកតា) ទេ ។ ការអនុវត្តវិធានការឧបត្ថម្ភប្រាក់ដល់កសិករនេះ គិតពីចាប់ពីថ្ងៃទី១ ខែតុលា ឆ្នាំ២០២៣ រហូតដល់ថ្ងៃទី៣០ ខែកញ្ញា ឆ្នាំ២០២៤ ។

ចំពោះវិធានការឧបត្ថម្ភប្រាក់ដល់កសិករម្នាក់១ពាន់បាត ខាងក្រសួងពាណិជ្ជកម្មថៃនឹងស្នើសុំការអនុម័នៅក្នុងកិច្ចប្រជុំគណៈរដ្ឋមន្ត្រី នៅថ្ងៃទី១៤ ខែវិច្ឆិកា ឆ្នាំ២០២៣ និងចាប់ផ្តើមផ្តល់ប្រាក់ឱ្យកសិករនៅខែវិច្ឆិកា ឆ្នាំ២០២៣ នេះ ។

កាលពីថ្ងៃទី១១ ខែវិច្ឆិកា ឆ្នាំ២០២៣ ក្រុមការងារសារព័ត៌មាន Thairath បានចុះទៅកាន់ភូមិអាំផាវ៉ាន់ ឃុំសាំរាន ស្រុកមឿង ខេត្តខនកែន ដើម្បីសាកសួរមតិយោបល់ពលរដ្ឋអំពីវិធានការឧបត្ថម្ភប្រាក់ដល់កសិករ ។ កសិករភាគច្រើនប្រាប់ថា ការជួយរបស់រដ្ឋាភិបាលជារឿងល្អ បើទោះជាប្រាក់នេះមិនច្រើនក្តី ។ រដ្ឋាភិបាលបានជួយក្នុងការចំណាយដើមទុនផលិតស្រូវ ប៉ុន្តែចង់ឱ្យរដ្ឋាភិបាលគ្រប់គ្រងតម្លៃជីកសិកម្មច្រើនជាង ព្រោះនៅឆ្នាំ២០២៣ កសិករទទួលបានផលស្រូវច្រើន តែតម្លៃជីកសិកម្មកើនឡើង ទើបធ្វើឱ្យការចំណាយដើមទុនកើនឡើងតាមដែរ ។

លោក Nirut Wichai អាយុ៥២ឆ្នាំ ជាកសិកររស់នៅភូមិអាំផាវ៉ាន់ ឃុំសាំរាន ស្រុកមឿង ខេត្តខនកែន និយាយថា គ្រួសារលោកមានផ្ទៃដីស្រែប្រមាណ១៥រ៉ៃ (ឬស្មើប្រមាណជាង២ហិកតា) នៅពេលឮថា រដ្ឋាភិបាលនឹងចែកប្រាក់ឱ្យកសិករម្នាក់១ពាន់បាត លោកសប្បាយចិត្តណាស់ ។ ប្រាក់១ពាន់បាតនេះអាចជួយដល់កសិករបាន វាប្រសើរជាងរដ្ឋាភិបាលមិនបានជួយអ្វីសោះ ។ លោកបន្តថា នៅមានគម្រោង១ទៀត គឺគម្រោងផ្ញើស្រូវ បើនៅឆ្នាំ២០២៣ ស្រូវនៅតែមានតម្លៃធ្លាក់ចុះបែបនេះ លោកនឹងចូលរួមក្នុងគម្រោងផ្ញើស្រូវ ដើម្បីរង់ចាំឱ្យស្រូវឡើងថ្លៃ ទើបលោកយកវាមកលក់ ព្រោះការលក់ស្រូវពេលនេះ នឹងខាតដើមទុនច្រើនណាស់ ។

លោក Nirut Wichai និយាយថា ៖ «បើអាចទៅរួច ចង់ឱ្យរដ្ឋាភិបាលជួយរឿងតម្លៃជីកសិកម្ម ព្រោះបើរដ្ឋាភិបាលគ្រប់គ្រងតម្លៃជីកសិកម្មមិនបានទេ វានឹងបង្កើនការចំណាយដើមទុនឱ្យកសិករ ។ តើឱ្យកសិករទទួលប្រាក់ឧបត្ថម្ភពីរដ្ឋាភិបាលយ៉ាងម៉េចទៅ បើរដ្ឋាភិបាលមិនអាចគ្រប់គ្រងតម្លៃជីបាន វាគ្មានប្រយោជន៍ទេ ។ នៅឆ្នាំ២០២៣ ទិន្នផលស្រូវល្អ ប៉ុន្តែការចំណាយដើមទុនក៏ខ្ពស់ដែរ ។ ទោះយ៉ាងណា ម៉ាស៊ីនប្រមូលផលស្រូវដែលខ្ញុំជួលមក មិនឡើងថ្លៃតាមជីទេ គឺមានតម្លៃដូចឆ្នាំមុន ។ ម៉ាស៊ីនប្រមូលផលស្រូវ នឹងយកថ្លៃចាប់ពី៧០០បាត ទៅ៨០០បាតសម្រាប់ផ្ទៃដីស្រែ១រ៉ៃ» ។

ចំណែកអ្នកស្រី Pong Khuntruk អាយុ៦៨ឆ្នាំ ជាកសិកររស់នៅភូមិ-ឃុំជាមួយគ្នានិយាយថា អ្នកស្រីបានចុះឈ្មោះចូលរួមក្នុងគម្រោងជំនួយរបស់រដ្ឋាភិបាលរួចរាល់ហើយ ។ អ្នកស្រីបានធ្វើស្រែនៅលើផ្ទៃដី៥រ៉ៃ (ឬស្មើប្រមាណ០.៨ហិកតា) សម្រាប់បរិភោគពេញ១ឆ្នាំ ហើយស្រូវនៅសល់ពីការបរិភោគ ទើបយកមកលក់ គឺវាល្អជាងទិញគេមកបរិភោគ ។ ចំណែកគម្រោងចែកប្រាក់ដល់កសិកររបស់រដ្ឋាភិបាលនេះជាការល្អប្រសើរ វាប្រសើរជាងមិនបានជួយអ្វី ។ សូមឱ្យរដ្ឋាភិបាលជួយគ្រប់គ្រងតម្លៃជីកសិកម្មផង ព្រោះនៅឆ្នាំ២០២៣ ជីកសិកម្មមានតម្លៃថ្លៃ ៕ ប្រភព ៖ Thairath

ប្រទេសបារាំង ៖ អាជ្ញាធរបារាំងបានប្រមូលកម្លាំងជួយជម្លៀសពលរដ្ឋចេញពីតំបន់ទឹកជំនន់នៅខេត្ត Pas de Calai ដោយសារខេត្តនេះនៅតែប្រឈមនឹងគ្រោះទឹកជំនន់ខ្លាំងក្លា បើទោះជាភ្លៀងឈប់ធ្លាក់ក៏ដោយ ។

កាលពីថ្ងៃទី១១ ខែវិច្ឆិកា ឆ្នាំ២០២៣ គេសង្កេតឃើញថា ពលរដ្ឋបារាំងដែលរងគ្រោះដោយសារទឹកជំនន់រាប់រយនាក់បាននាំគ្នាជម្លៀសចេញពីលំនៅឋានរបស់ពួកគេនៅខេត្ត Pas de Calai ដែលស្ថិតនៅតំបន់ភាគខាងជើងប្រទេសបារាំង ។

ចំណែកនៅទីក្រុង Blend Decks ដែលមានទីតាំងនៅជិតទីក្រុង Saint-Omer ភ្នាក់ងារសង្គ្រោះបន្ទាន់បានបង្កើនកម្លាំងជួយសង្គ្រោះក្រុមគ្រួសារជាច្រើន ក្នុងនោះមានការជួយប្រមូលសម្ភារៈមានតម្លៃ រួចបញ្ជូនទៅកាន់ទីកន្លែងមានសុវត្ថិភាព ។ ភ្នាក់ងារសង្គ្រោះរាយការណ៍ថា ភ្លៀងបានធ្លាក់យ៉ាងខ្លាំងកាលពីថ្ងៃទី១០ ខែវិច្ឆិកា ឆ្នាំ២០២៣ ហើយធ្វើឱ្យកម្រិតទឹកទន្លេមានកម្ពស់ខ្ពស់លើសច្រាំង និងជន់លិចនៅតំបន់នោះ ។

ទីក្រុង Blend Decks នៅតែស្ថិតក្រោមការប្រកាសពីគ្រោះថ្នាក់ដោយសារទឹកជំនន់ កាលពីថ្ងៃទី១១ ខែវិច្ឆិកា ឆ្នាំ២០២៣ ។ អាជ្ញាធរប្រចាំទីក្រុងនេះបានដាស់តឿនទៅកាន់ពលរដ្ឋថា បើទោះជាភ្លៀងឈប់ធ្លាក់ក៏ដោយ ប៉ុន្តែវានៅតែមានហានិភ័យខ្ពស់ក្នុងការកើតទឹកជំនន់ ៕ ប្រភព ៖ TNN World

បរទេស៖ ប្រទេសជប៉ុនបានកែច្នៃកាកសំណល់អេឡិចត្រូនិចដូចជា ទូរស័ព្ទដៃខូចៗចំនួន ១០,០០០ គ្រឿងទៅជាមាសប្រហែល ២៨០ក្រាម ដែលមានប្រសិទ្ធភាពជាងការជីកយករ៉ែនៅក្នុងព្រៃ ៥៦ ដង។

យោងតាមគេហទំព័រ Nikkei Asia ដែលបានចុះផ្សាយនៅថ្ងៃទី១២ ខែវិច្ឆិកាថា ប្រទេសជប៉ុនមានធនធានធម្មជាតិតិចតួចណាស់ ប៉ុន្តែគឺជាទីផ្សារដ៏មានសក្តានុពលបំផុតមួយសម្រាប់ការជីកយករ៉ែលោហៈក្នុងទីក្រុង មានន័យថាជប៉ុនបានកែច្នៃកាកសំណល់លោហៈកម្រចេញពីបន្ទះសៀគ្វីអេឡិចត្រូនិចទៅជារ៉ែមាស។

យោងតាមក្រសួងបរិស្ថានជប៉ុន បានឱ្យដឹងថា រាល់ទូរស័ព្ទ ១០,០០០ គ្រឿងអាចផ្តល់ទិន្នផលមាសប្រហែល ២៨០ ក្រាម។ ដូច្នេះ ការជីកយករ៉ែមាសពីកាកសំណល់អេឡិចត្រូនិចមានប្រសិទ្ធភាពជាងការជីកយករ៉ែមាសពីធម្មជាតិដល់ទៅ ៥៦ ដង។ នេះបើតាមរោងចក្រ Tanaka Kikinzoku Kogyo ក្នុងទីក្រុង Hiratsuka បានធ្វើការរំលាយសំណល់អេតចាយដែលជាគ្រឿងអេឡិចត្រូនិចនិងទូរស័ព្ទដៃខូចៗ ដើម្បីយកមាសមកធ្វើជាដុំមូល ឬជាគ្រាប់មូល។

លោក Akio Nagaoka ប្រធានមជ្ឈមណ្ឌលនេះបាននិយាយថា “យើងចង់ពង្រីកការប្រមូលសំណល់អេឡិកត្រូនិកមិនត្រឹមតែនៅក្នុងប្រទេសជប៉ុនប៉ុណ្ណោះទេ ថែមទាំងនៅទូទាំងអាស៊ីអាគ្នេយ៍ផងដែរ ដែលជាតម្រូវការសម្រាប់ការកែច្នៃឡើងវិញនូវគ្រឿងអេឡិចត្រូនិកកំពុងកើនឡើង។
បច្ចុប្បន្ន ទិន្នផលនៃការជីកយករ៉ែ ក៏ដូចជាការកំណត់គោលដៅរុករករ៉ែមាសពីស្មាតហ្វូន ឬគ្រឿងប្រើប្រាស់ក្នុងផ្ទះចាស់ៗ និងសំណល់អេតចាយផ្សេងទៀតកំពុងក្លាយជារឿងសំខាន់។ ដូច្នេះ អាជីវកម្មមួយចំនួនកំពុងពង្រីកការប្រមូល និងសមត្ថភាពកែច្នៃលោហៈក្នុងទីក្រុង ដើម្បីបំពេញតម្រូវការដែលកំពុងកើនឡើង។

ហេតុនេះហើយ ទើបវិទ្យាស្ថានជប៉ុនសម្រាប់ការរចនាប្រកបដោយនិរន្តរភាពបានប៉ាន់ប្រមាណថាមាសប្រហែល ៥,៣០០ តោនបានប្រមូលផ្តុំនៅក្នុងប្រទេសជប៉ុន ស្មើនឹង ១០% នៃទុនបម្រុងពិភពលោក។ បច្ចុប្បន្នរដ្ឋាភិបាលរបស់ប្រទេសនេះកំពុងជំរុញការកែច្នៃឡើងវិញនូវមាស និងលោហៈដ៏មានតម្លៃផ្សេងទៀតនៅក្នុងបន្ទះសៀគ្វីរថយន្តអគ្គិសនី ដើម្បីបង្កើនសន្តិសុខសេដ្ឋកិច្ច៕

ប្រទេសឡាវ ៖ លោក Khamjan Wongposi រដ្ឋមន្ត្រីក្រសួងផែនការ និងការវិនិយោគប្រទេសឡាវបានរាយការណ៍ក្នុងកិច្ចប្រជុំទូទៅ លើកទី៦ របស់រដ្ឋសភានីតិកាលទី៩ អំពីប្រធានបទ «ការអនុវត្តផែនការអភិវឌ្ឍសេដ្ឋកិច្ច និងសង្គម ប្រចាំឆ្នាំ២០២៣ និងត្រៀមផែនការទិសដៅសម្រាប់ឆ្នាំ២០២៤» ថា ការរីកចម្រើនយ៉ាងរឹងមាំក្នុងផ្នែកសេវាកម្ម នៅតែជាកត្តាសំខាន់ដើម្បីជំរុញការរីកចម្រើនសេដ្ឋកិច្ចរបស់ឡាវនៅឆ្នាំ២០២៣ និងឆ្នាំ២០២៤ ។ ប្រទេសឡាវរំពឹងថា សេដ្ឋកិច្ចឡាវនឹងស្មើ៤,២% នៅឆ្នាំ២០២៣ និងស្មើ៤,៥% នៅឆ្នាំ២០២៤ ។

ទោះយ៉ាងណា អត្រាការរីកលូតលាស់ដែលប្រទេសឡាវរំពឹងទុកថា ស្មើនឹង៤,២% គឺទាបជាងគោលដៅដែលឡាវបានកំណត់ស្មើរហូតដល់៤,៥% ក្នុងផែនការអភិវឌ្ឍប្រចាំឆ្នាំ២០២៣ ។ ការកើនឡើងនៃថ្លៃដើមផលិតកម្ម និងគ្រោះរាំងស្ងួត បានប៉ះពាល់ដល់ការផលិតថាមពលវារីអគ្គិសនី ដែលជាកត្តាសំខាន់ធ្វើឱ្យអត្រាការលូតលាស់ធ្លាក់ចុះនៅឆ្នាំ២០២៣ ។

ចំណែកអាជីវកម្មលក់ដុំ និងលក់រាយ ការដឹកជញ្ជូន និងសេវាកម្មពាក់ព័ន្ធជាមួយវិស័យទេសចរណ៍ប្រទេសឡាវ គឺចាត់ទុកថា ជាអាជីវកម្មមានដំណើរការល្អបំផុត ។ វិស័យនេះបានកើនឡើង៥,៦% និងមានភាពលេចធ្លោបំផុតទាក់ទងនឹងការរួមចំណែកជាមួយផលិតផលក្នុងស្រុកសរុប (GDP) ស្មើនឹង៣៧,២% ។ បន្ទាប់មក គឺផ្នែកពន្ធ និងគយ, ឧស្សាហកម្ម រួមទាំងកសិកម្ម និងព្រៃឈើ បានកើនឡើង៣,៩%, ៣,៥% និង៣,៤% តាមលំដាប់ ។

លោក Khamjan Wongposi រដ្ឋមន្ត្រីក្រសួងផែនការ និងការវិនិយោគឡាវបានសង្កត់ធ្ងន់អំពីភាពចាំបាច់ក្នុងការរក្សាស្ថេរភាពនយោបាយ និងសណ្តាប់ធ្នាប់សង្គម ដើម្បីឱ្យមានទំនុកចិត្តលើការងារសំខាន់ៗដែលប្រទេសឡាវនឹងទទួលបានជោគជ័យ និងជំរុញផ្នែកសេវាកម្មឱ្យសម្រេចតាមគោលដៅការលូតលាស់នៅឆ្នាំ២០២៤ ផងដែរ ។

នៅឆ្នាំ២០២៤ ប្រទេសឡាវរំពឹងថា ផ្នែកឧស្សាហកម្មនឹងកើនឡើងខ្ពស់បំផុតរហូតដល់៥% បន្ទាប់មក គឺផ្នែកសេវាកម្មនឹងកើនឡើង៤,៨%, ផ្នែកពន្ធ និងគយ នឹងកើនឡើង៣,៩% ហើយផ្នែកកសិកម្មនឹងកើនឡើង២,៦% ខណៈពលរដ្ឋឡាវម្នាក់មានប្រាក់ចំណូលជាមធ្យមចំនួន១.៧៨៧ដុល្លារអាមេរិកក្នុង១ឆ្នាំ ។

ក្រៅពីនេះ រដ្ឋាភិបាលឡាវបានប្រកាសពីគោលដៅថា នឹងកាត់បន្ថយអត្រាអតិផរណានៅឆ្នាំ២០២៤ ក្រោយពីអត្រាអតិផរណាមានកម្រិតខ្ពស់បំផុតអស់រយៈពេលជាច្រើនឆ្នាំ ។ អត្រាអតិផរណាបច្ចុប្បន្ន មាននិន្នាការធ្លាក់ចុះពី៤១,២៦% នៅខែកុម្ភៈ មកស្មើត្រឹមតែ២៥,៦៩% នៅខែកញ្ញា ឆ្នាំ២០២៣ ៕ ប្រភព ៖ AEC connect

បរទេស៖ អាជ្ញាធរអ៊ីស្លង់បានជម្លៀសមនុស្សរាប់ពាន់នាក់ពេញមួយយប់ ដើម្បីចាកចេញពីទីក្រុងមួយ បន្ទាប់ពីមានការរញ្ជួយដីរាប់រយត្រូវបានកត់ត្រា ដែលបង្កឱ្យមានភាពភ័យខ្លាចនៃការផ្ទុះភ្នំភ្លើង។

យោងតាមគេហទំព័រ Euro News ដែលបានចុះផ្សាយកាលពីថ្ងៃទី១២ ខែវិច្ឆិកាថា ថ្មីៗនេះមន្ត្រីអ៊ីស្លង់បានប្រកាសដាក់ប្រទេសក្នុងភាពអាសន្ននៅលើឧបទ្វីប Reykjanes នៃភាគនិរតី បន្ទាប់ពីបានកត់ត្រាការរញ្ជួយដីភូមិសាស្ត្រសំខាន់ៗប្រហែល ៥០០ ចាប់ពីយប់ថ្ងៃទី ១០ ដល់ព្រឹកថ្ងៃទី ១១ ខែវិច្ឆិកា ដែលនេះអាចជាសញ្ញានៃការផ្ទុះកម្អែលភ្នំភ្លើងនៅតំបន់ Sundhnjukagigar នៃឧបទ្វីប។

ដូច្នេះ ប្រជាជនប្រហែល ៤,០០០ ត្រូវបានបញ្ជាឱ្យជម្លៀសចេញពេញមួយយប់ ពីទីក្រុង Grindavik ចម្ងាយប្រហែល ៤០ គីឡូម៉ែត្រភាគនិរតីនៃរដ្ឋធានី Reykjavik ។ ហេតុនេះហើយ រមណីយដ្ឋាន និងទេសចរណ៍ Blue Lagoon ក្នុងតំបន់នេះត្រូវបានបិទតាំងពីដើមសប្តាហ៍ ដើម្បីជៀសវាងហានិភ័យ។ រោងចក្រថាមពលកំដៅក្នុងផែនដី Svartsengi ដែលជាកន្លែងផ្គត់ផ្គង់អគ្គិសនី និងទឹកសំខាន់សម្រាប់អ្នកស្រុកប្រហែល ៣០,០០០ នាក់នៅលើឧបទ្វីប Reykjanes ក៏ត្រូវបានបិទមួយរយៈផងដែរ។

អ៊ីស្លង់ គឺជាប្រទេសដែលមានភ្នំភ្លើងសកម្មបំផុតនៅអឺរ៉ុប នឹងមានទីតាំងត្រួតពិនិត្យសរុបចំនួន ៣៣។ អ្នកជំនាញបាននិយាយថា បរិមាណកម្អែភ្នំភ្លើងដែលបង្ខំដោយបន្ទះភូគព្ភសាស្ត្របាននឹងកំពុងប្រមូលផ្តុំនៅជម្រៅ ៥ គីឡូម៉ែត្រក្នុងរយៈពេលប៉ុន្មានថ្ងៃកន្លងមកនេះ។ នៅយប់ថ្ងៃទី ១០ ខែវិច្ឆិកា សកម្មភាពភូគព្ភសាស្ត្របានកើតឡើងកាន់តែកៀកទៅនឹងដី ហើយកម្អែលភ្នំភ្លើងបានចាប់ផ្តើមផ្លាស់ទីបញ្ឈរ ដោយបង្រួមលើផ្ទៃផែនដី ក្នុងតំបន់រវាង Sundhnjukagigar និង Grindavik ។

យោងតាមមន្ត្រីអ៊ីស្លង់បានព្យាករណ៍ថា ការផ្ទុះកម្អែភ្នំភ្លើងនៅលើឧបទ្វីប Reykjanes អាចនឹងកើតឡើង “នៅប៉ុន្មានថ្ងៃខាងមុខ”។ ដូច្នេះ អ្នកស្រុក Grindavik ត្រូវបានជម្លៀសចេញពេញមួយយប់ បន្ទាប់ពីមន្ត្រីអ៊ីស្លង់បានវាយតម្លៃថា កម្អែលភ្នំភ្លើងអាចនឹងរំកិលចុះក្រោមទៅលើផ្ទៃដី។
គួរបញ្ជាក់ដែរថា ឧបទ្វីប Reykjanes មានការផ្ទុះភ្នំភ្លើងចំនួនបីនៅ Fagradalsfjall ក្នុងខែមីនា ឆ្នាំ ២០២១ និងខែសីហា ឆ្នាំ ២០២២ រួមទាំងខែកក្កដា ឆ្នាំ ២០២៣ ។ ទោះជាយ៉ាងណា ឧប្បត្តិហេតុទាំងបីនេះបានកើតឡើងនៅក្នុងតំបន់ឆ្ងាយពីហេដ្ឋារចនាសម្ព័ន្ធសេដ្ឋកិច្ច និងតំបន់លំនៅដ្ឋាន៕