ប្រទេសស៊ុយអែត ៖ ប្រទេសស៊ុយអែតត្រៀមដាក់ឱ្យដំណើរការនាវាអគ្គិសនីអាចហោះបានជាលើកដំបូងនៅលើពិភពលោក ដោយនាវានេះនឹងប្រើប្រាស់សម្រាប់ការដឹកជញ្ជូនសាធារណៈនៅទីក្រុង Stockholm នៅឆ្នាំ២០២៤ ។ បើតាមអ្នកផលិតនាវាអគ្គិសនីឱ្យដឹងថា អ្នកដំណើរអាចកាត់បន្ថយពេលវេលាការធ្វើដំណើរពី៥៥នាទី មកនៅត្រឹមតែ២៥នាទីប៉ុណ្ណោះ ។

នាវាអគ្គិសនីមានឈ្មោះថា Candela P-12 បានទទួលការរចនាម៉ូដ និងផលិតឡើងដោយក្រុមហ៊ុនបច្ចេកវិទ្យានៅប្រទេសស៊ុយអែត ឈ្មោះ Candela Technology AB ។ នាវានេះមានប្រវែងសរុប១២ម៉ែត្រ និងអាចដំណើរការបានដោយសារថាមពលថ្មទំហំ២៥២គីឡូវ៉ាត់ម៉ោង និងអាចផ្ទុកអ្នកដំណើរបានរហូតដល់៣០នាក់ ។

ក្រុមហ៊ុនផលិតនាវាលើកឡើងថា នាវានេះនឹងអាចហោះនៅលើផ្ទៃទឹកក្នុងល្បឿនពី៤៦គីឡូម៉ែត្រ ទៅ៥៦គីឡូម៉ែត្រក្នុង១ម៉ោង ។ រីឯការសាកថ្មនាវា១លើក អាចធ្វើដំណើរបានប្រមាណ៩២គីឡូម៉ែត្រ ។

Gustav Hasselskog ជានាយកគ្រប់គ្រងក្រុមហ៊ុននិយាយថា នាវាអាចហោះបានដោយសារបច្ចេកវិទ្យាមួយហៅថា Hydrofoils ។ បច្ចេកវិទ្យានេះអាចធ្វើឱ្យនាវាហោះនៅលើផ្ទៃទឹក និងជួយឱ្យនាវាអាចធ្វើដំណើរបានលឿន ។ លើសពីនេះ នាវាអគ្គិសនី Candela P-12 ប្រើប្រាស់ថាមពលតិចជាងនាវាទូទៅ ។

ក្រុមហ៊ុនផលិតនាវាបញ្ជាក់ថា នាវានេះបានបំពាក់ម៉ាស៊ីនចំនួន២គ្រឿង និងគ្រប់គ្រងដោយប្រព័ន្ធកុំព្យូទ័រ ដែលអាចទប់ស្កាត់ចលនានាវាបានរហូតដល់១០០លើកក្នុង១វិនាទី ។ ដូច្នេះ វាអាចជួយកាត់បន្ថយអាការៈពុលនាវារបស់អ្នកដំណើរបាន ។ នាវាអគ្គិសនីនឹងដំណើរការចាប់ពីឆ្នាំ២០២៤ តទៅ ហើយវានឹងធ្វើដំណើរពីជាយក្រុង Ekerer ទៅកាន់ទីក្រុង Stockholm ។ ជាធម្មតា គេបានចំណាយពេលធ្វើដំណើរចំនួន៥៥នាទី ប៉ុន្តែបើធ្វើដំណើរតាមនាវាអគ្គិសនី នឹងចំណាយពេលត្រឹមតែ២៥នាទីប៉ុណ្ណោះ ។

Gustav Hasselskog នាយកគ្រប់គ្រងក្រុមហ៊ុនប្រាប់ថា ៖ «បច្ចុប្បន្ន មានការកកស្ទះចរាចរណ៍នៅតាមបណ្តាទីក្រុងជាច្រើន ខណៈការធ្វើដំណើរតាមផ្លូវទឹក គឺជាវិធីធ្វើដំណើរតាំងពីសម័យបុរាណមកម៉្លេះ ប៉ុន្តែការធ្វើដំណើរតាមផ្លូវទឹកមានចំនួនតិចតួចនៅឡើយ ។ នាវា Candela P-12 នឹងជួយឱ្យអ្នកដំណើរទាំងអស់អាចធ្វើដំណើរពីទីក្រុងមួយទៅកាន់ទីក្រុងមួយទៀតយ៉ាងឆាប់រហ័ស» ៕

នៅថ្ងៃទី៣០ ខែវិច្ឆិកា តារាសម្តែង Kathryn Bernardo បានបង្ហោះនៅលើ Instagram ថាជីវិតគូរយៈពេល១១ឆ្នាំជាមួយមិត្តប្រុស Daniel Padilla ដែលជាស្នេហាដំបូងរបស់នាងត្រូវបញ្ចប់ ដោយអ្នកទាំងពីរបានបែកគ្នាមួយរយៈហើយទីបំផុតពួកគេមិនអាចវិលទៅរកសភាពដើមបាន។ ការបែកគ្នានេះដែរតារាសម្តែងល្បីឈ្មោះរូបនេះសង្ឃឹមថាអ្នកគាំទ្រទទួលយកការបែកបាក់របស់ពួកគេខណៈអ្នកគាំទ្រ រួមទាំងអ្នកសិល្បៈហ្វីលីពីនច្រើនរូបសុទ្ធតែបង្ហាញការសោកស្តាយចំពោះចំណងស្នេហ៍នេះដែលឈានដល់ថ្ងៃប្រេះឆា។

តាមខ្លឹមសារដែល Kathryn បង្ហោះមានអត្ថន័យថា « Daniel អ្នកបានផ្តល់ឱ្យខ្ញុំ ១១ ឆ្នាំដ៏ស្រស់ស្អាត។ សេចក្តីស្រឡាញ់របស់ខ្ញុំនឹងតែងតែត្រូវបានគេស្រឡាញ់។ ខ្ញុំនឹងដឹងគុណជានិច្ច» ។ ចំណែកឯ Daniel បានឆ្លើយតបនៅលើ Instagram ផ្ទាល់ខ្លួនរបស់លោកជាមួយនឹងរូបថតរបស់អ្នកទាំងពីរដោយបានអរគុណដល់ Kathryn ដែលបានចំណាយពេលវេលាស្រលាញ់គ្នាជាមួយលោកដោយរំលឹកថា ទោះលំបាកយ៉ាងណាក៏ពួកគេទាំងពីរគួរតែព្យាយាមទន្ទឹងរង់ចាំថ្ងៃអនាគតជានិច្ច។

ការប្រកាសបែកគ្នានេះដែរ មិត្តក្នុងចង្កោមសិល្បៈ និងអ្នកគាំទ្រទាំងក្នុងនិងក្រៅជាច្រើនមានការសោកស្តាយចំពោះរឿងស្នេហារបស់តារាសម្តែងទាំងពីររូបនេះ មិនគួរឈានដល់ចំណុចនេះព្រោះស្នេហារបស់ពួកគេតែងតែទទួលបានការកោតសរសើរពីមជ្ឈដ្ឋានជុំវិញខ្លួន។

តារាសម្តែង Kathryn Bernardo មានអាយុ២៧ ឆ្នាំត្រូវបានទស្សនិកជនស្គាល់តាមរយៈតួនាទីជាច្រើនក្នុងខ្សែភាពយន្តជាច្រើនហើយអ្នកគាំទ្រកម្ពុជាភាគច្រើនស្គាល់នាងតាមរយៈរឿង វាសនានាង ម៉ារ៉ា និង ក្លារ៉ា ។ តារាស្រីរូបនេះត្រូវបានគេចាត់ទុកថាជាសិល្បការិនីមួយរូបក្នុងវិស័យកម្សាន្តហ្វីលីពីនដែលមានអ្នកគាំទ្រច្រើនទាំងក្នុងនិងក្រៅប្រទេស។
Daniel Padilla មានអាយុ២៨ ឆ្នាំគឺជាតារាសម្តែង ម៉ូដែល និងជាតារាចម្រៀងហើយលោកគឺជាស្នេហាដំបូងរបស់ Kathryn ដោយអ្នកទាំងពីរបានស្រលាញ់គ្នាពេលធ្វើការជាមួយគ្នាក្នុងរឿងភាគទូរទស្សន៍ Growing Up ឆ្នាំ២០១១-២០១២ និងបានបន្តសហការគ្នាសម្តែងក្នុងរឿងជាច្រើនទៀត។ ក្នុងឆ្នាំ២០១៦ អ្នកទាំងពីរបានទទួលពានរង្វាន់ Blue Star ក្នុងប្រភេទតារាបរទេសដែលមានប្រជាប្រិយបំផុតផ្នែកតារាសម្តែង៕

ប្រទេសថៃ ៖ កាលពីថ្ងៃទី២៥ ខែវិច្ឆិកា ឆ្នាំ២០២៣ អាជ្ញាធរប្រចាំក្រុងប៉ាតាយ៉ា ខេត្តឈុនបុរី ប្រទេសថៃ បានប្រមូលកម្លាំងចុះត្រួតពិនិត្យក្រុមអ្នកប្រកបអាជីវកម្មនៅតាមឆ្នេរសមុទ្រមួយចំនួន និងនៅតំបន់ក្បែរគ្នា ក្នុងគោលបំណងរៀបចំសណ្តាប់ធ្នាប់ឡើងវិញ និងកំណត់មិនឱ្យពួកគេយកប្រាក់ថ្លៃសេវាកម្មពីភ្ញៀវទេសចរក្នុងតម្លៃខ្ពស់ពេក ។

ការចុះត្រួតពិនិត្យនេះ បន្ទាប់ពីអាជ្ញាធរបានទទួលពាក្យបណ្តឹងពីភ្ញៀវទេសចរថា មានក្រុមអ្នកប្រកបអាជីវកម្មមួយចំនួនបានតម្រៀបកៅអីអង្គុយលើសពីចំនួនដែលអាជ្ញាធរក្រុងប៉ាតាយ៉ាកំណត់ ហើយធ្វើឱ្យភ្ញៀវទេសចរមិនអាចប្រើប្រាស់ទីកន្លែងសាធារណៈបានទេ ។ លើសពីនេះ នៅថ្ងៃបុណ្យទានផ្សេងៗ អ្នកប្រកបអាជីវកម្មបានយកថ្លៃសេវាខ្ពស់ជាងថ្ងៃធម្មតាទៀតផង ។តាមរយៈការចុះត្រួតពិនិត្យនៅតាមតំបន់ឆ្នេរសមុទ្រឃើញថា អ្នកប្រកបអាជីវកម្មខ្លះបានយកកៅអីមកដាក់ជាជួរនៅតាមឆ្នេរខ្សាច់ និងមានចំនួនលើសពីការកំណត់របស់អាជ្ញាធរ ។ រីឯភ្ញៀវទេសចរដែលមកកម្សាន្តនៅឆ្នេរនេះ ពួកគេចង់យកក្រណាត់ ឬកន្ទេលមកក្រាលអង្គុយលេង គឺពិបាករកកន្លែងទំនេរណាស់ ។ ហេតុនេះ ភ្ញៀវទេសចរបានប្តឹង និងសំណូមពរឱ្យអាជ្ញាធរដាស់តឿនក្រុមអ្នកលក់ដូរទាំងនេះឱ្យគោរពតាមការព្រមព្រៀងគ្នាជាមួយអាជ្ញាធរ ។

អាជ្ញាធរលើកឡើងថា ក្រុងប៉ាតាយ៉ាបានបន្ថែមម៉ោងផ្តល់សេវាកម្ម ឬបន្ថែមម៉ោងលក់ដូរដល់ពួកគេរួចហើយ ។ ដូច្នេះ ពួកគេត្រូវតែផ្តល់ភាពងាយស្រួលដល់ភ្ញៀវទេសចរផងដែរ ។ អាជ្ញាធរបន្តថា អ្នកប្រកបអាជីវកម្មខ្លះបានយកថ្លៃសេវាពីអតិថិជនលើសពីចំនួនដែលក្រុងប៉ាតាយ៉ាកំណត់ ដូចជា តម្លៃជួលកៅអីអង្គុយស្មើនឹង៥០បាត ប៉ុន្តែពួកគេបានដំឡើងថ្លៃរហូតដល់១០០បាត ។

ចំណែកអ្នកប្រកបអាជីវកម្មផ្សេងទៀត បើអតិថិជនបង់ប្រាក់ថ្លៃកៅអីត្រឹមតែ៥០បាត ពួកគេនឹងកាត់បន្ថយពេលវេលាឱ្យខ្លីជាងមុន ហើយបើអតិថិជនចង់អង្គុយនៅលើកៅអីបន្ត ត្រូវតែបង់ប្រាក់ឱ្យពួកគេបន្ថែម ។ ហេតុនេះ វាជាទង្វើមួយខុសពីគោលការណ៍កំណត់របស់ក្រុងប៉ាតាយ៉ា ។

ចុងក្រោយ អាជ្ញាធរថៃបញ្ជាក់ថា ប្រសិនបើភ្ញៀវទេសចរប្រទះឃើញការយកថ្លៃសេវាកម្មខ្ពស់បែបនេះ អាចថតរូបភាពទុកធ្វើជាភស្តុតាងដើម្បីប្តឹងមកកាន់អាជ្ញាធរក្រុងប៉ាតាយ៉ា ហើយអាជ្ញាធរនឹងបញ្ជាឱ្យបិទការរកស៊ីរយៈពេល១៥ថ្ងៃ ៕

វៀតណាម៖ អ្នកទេសចរជាច្រើនមានការមិនពេញចិត្តនឹងអនាម័យបរិស្ថាននៅឈូងសមុទ្រ Ha Long របស់ប្រទេសវៀតណាម ដោយនិយាយថាកន្លែងនេះមានមនុស្សច្រើនពេក ដែលធ្វើឱ្យមានសំរាមកកកុញនៅលើទឹក។

យោងតាមប្រភពព័ត៌មាន Vnexpress ដែលបានចុះផ្សាយកាលពីថ្ងៃទី៣០ ខែវិច្ឆិកាថា ឈូងសមុទ្រ Ha Long គឺមានទេសភាពដ៏គួរឱ្យចាប់អារម្មណ៍ ប៉ុន្តែអ្វីដែលគួរឱ្យព្រួយបារម្ភបំផុតនោះគឺថង់នីឡុង និងដបប្លាស្ទិករាប់មិនអស់អណ្តែតជុំវិញទឹក។ អ្នកទេសចរជាច្រើនបាននិយាយថា ទេសភាព និងប្រជាជនវៀតណាមទាំងអស់គឺអស្ចារ្យណាស់ ប៉ុន្តែការយល់ដឹងរបស់ពួកគេអំពីការការពារបរិស្ថានគឺអន់ណាស់។ អ្នកទេសចរក៏បាននិយាយទៀតថា ពួកគេពិតជាសោកស្ដាយណាស់ នៅពេលដែលពួកគេឃើញទិដ្ឋភាពនៃសំរាមនៅឈូងសមុទ្រ Ha Long របស់ប្រទេសវៀតណាមប្រែទៅជាបែបនេះ។

លោក Hoang Phuc ម្ចាស់កប៉ាល់នៅឈូងសមុទ្រ Ha Long បាននិយាយថា សំរាមទាំងអស់នេះភាគច្រើនគឺចេញពីមាត់ទន្លេ Cua Van និង Bai Tu Long ត្រូវបានរុញចូលទៅក្នុងឈូងសមុទ្រ។ វត្ថុអណ្តែតចេញពីមហាសមុទ្រប៉ាស៊ីហ្វិកក៏រសាត់ចូលតំបន់ស្នូលនៃឈូងសមុទ្រ Ha Long ដូច្នេះការដកសំរាមមិនអាចធានាបាន ១០០% នោះទេ។ លើសពីនេះ សំរាមពីតំបន់លំនៅដ្ឋានដែលត្រូវបោះចោលក្នុងសមុទ្រ ឬត្រូវខ្យល់បោកបក់ក៏ជាផ្នែកមួយនៃមូលហេតុដែរ។ លោក Hoang Phuc បានបន្តទៀតថា យើងតែងតែសម្អាតសំរាម ក៏ដូចជាកៀរគរបុគ្គលិកទៅប្រមូលសំរាមនៅកន្លែងទស្សនាកម្សាន្ត និងកន្លែងហែលទឹករបស់អ្នកទេសចរ ប៉ុន្តែវានៅតែមាន។ ម្ចាស់កប៉ាល់រូបនេះបានបន្ថែមថា យើងគួរតែច្នៃប្រឌិតបច្ចេកវិទ្យាប្រមូលសំរាម ជំនួសឱ្យវិធីសាស្ត្រដោយដៃបច្ចុប្បន្ន។

ហេតុនេះហើយ យោងតាមមន្ត្រីនៃគណៈគ្រប់គ្រងឈូងសមុទ្រ Ha Long បានឱ្យដឹងថា ការប្រមូលសំរាមនៅឈូងសមុទ្រ Ha Long បច្ចុប្បន្នត្រូវបានរៀបចំជាពីរតំបន់ រួមមានតំបន់ឆ្នេរដែលគ្រប់គ្រងដោយទីក្រុង Ha Long និងតំបន់ខាងក្រៅ។ ដូច្នេះបញ្ហាសំរាមកកកុញនៅឈូងសមុទ្រ Ha Long ត្រូវបានកាត់បន្ថយខ្លះហើយ ដោយសំរាមនៅក្នុងឆ្នេរសមុទ្រហាឡុងបច្ចុប្បន្ន “មិនស្ថិតក្នុងកម្រិតនៃការផ្ទុកសំរាមលើសទម្ងន់ដូចមុនទេ”។គួរបញ្ជាក់ដែរថា គិតត្រឹមថ្ងៃទី ២០ ខែវិច្ឆិកា ចំនួនភ្ញៀវទៅទស្សនាឈូងសមុទ្រ Ha Long ត្រូវបានប៉ាន់ប្រមាណថាមានចំនួន ២.៣ លាននាក់ ដោយពេញមួយឆ្នាំត្រូវបានគេប៉ាន់ប្រមាណថានឹងឈានដល់ ២.៥ លានដង បើប្រៀបនឹងឆ្នាំ ២០១៥ (ប្រមាណ ២.៦ លានទស្សនា) និងឆ្ងាយជាងឆ្នាំ ២០១៩ (ជិត ៤.៥ លានអ្នកទស្សនា) ៕

ប្រទេសថៃ ៖ បរិយាកាសពិធីជប់លៀងស្វាប្រចាំឆ្នាំនៅខេត្តលុបបុរី ប្រទេសថៃ ពោរពេញទៅដោយសភាពអ៊ូអរ ខណៈភ្ញៀវទេសចរថៃ និងភ្ញៀវទេសចរបរទេសជាច្រើននាក់បានធ្វើដំណើរមកចូលរួមក្នុងពិធីនេះ ។ ប៉ុន្តែពលរដ្ឋ និងអ្នកប្រកបអាជីវកម្មនៅក្នុងតំបន់បានបង្ហាញក្តីបារម្ភពីផលប៉ះពាល់ដោយសារសត្វស្វា ។

ពិធីជប់លៀងស្វានៅឆ្នាំ២០២៣ គឺជាពិធីជប់លៀងបុហ្វេ ដើម្បីឱ្យស្វាមានអាហារស៊ីគ្រប់គ្រាន់ ។ គេបានរៀបចំអាហាររហូតដល់១០មុខ ក្នុងនោះមានបន្លែ និងផ្លែឈើជាច្រើនប្រភេទ ដូចជា ស្ពៃ, ទុរេន, ឪឡឹក និងទំពាំងបាយជូរ ។ លើសពីនេះ ក៏មានទឹកផ្លែឈើ និងនំថៃមួយចំនួនទៀតដែលស្វាចូលចិត្តស៊ីទៀតផង ។

អ្នកស្រី គ្រីស វៀល ជាភ្ញៀវទេសចរបរទេសនិយាយថា ៖ «ពួកស្វាចូលចិត្តស៊ីស្វាយជាងគេ គឺលំដាប់ទី១» ។ រីឯលោក ខេតធី វៀល ជាស្វាមីរបស់អ្នកស្រី គ្រីស វៀល និយាយថា ៖ «ខ្ញុំគិតថា ផ្លែចេក គឺលំដាប់ទី២ បន្ទាប់មក តាសក់ ។ បើពួកស្វាធំៗមិនចូលចិត្តស៊ីផ្លែឈើណាមួយ ពួកវានឹងទុកផ្លែឈើនោះនៅខាងៗ ហើយបណ្តោយឱ្យស្វាតូចៗស៊ី» ។

ពិធីជប់លៀងស្វា ត្រូវបានគេរៀបចំឡើងនៅថ្ងៃអាទិត្យ ក្នុងសប្តាហ៍ចុងក្រោយនៃខែវិច្ឆិកា ជារៀងរាល់ឆ្នាំ ។ សម្រាប់ឆ្នាំ២០២៣ គេបានរៀបចំពិធីជប់លៀងស្វាចំនួន៤ពេល រួមមាន ៖ នៅវេលាម៉ោង១០ព្រឹក, ម៉ោង១២ថ្ងៃត្រង់, ម៉ោង២រសៀល និងម៉ោង៤ល្ងាច ។ ចំណែកការចំណាយប្រាក់សម្រាប់រៀបចំពិធីជប់លៀងស្វា គឺស្មើប្រមាណ៣សែនបាត ។

ពិធីជប់លៀងស្វានៅខេត្តលុបបុរី គឺជាវិធានការមួយដើម្បីលើកកម្ពស់វិស័យទេសចរណ៍នៅប្រទេសថៃ ព្រមទាំងផ្តល់ប្រាក់ចំណូលឱ្យពលរដ្ឋរស់នៅក្នុងតំបន់ ក៏ដូចជាជំរុញអាជីវកម្មនានាពាក់ព័ន្ធនឹងវិស័យទេសចរណ៍ផងដែរ ។

នៅពេលរដ្ឋាភិបាលថៃព្យាយាមរៀបចំកម្មវិធីផ្សេងៗដើម្បីទាក់ទាញភ្ញៀវទេសចរជាតិ និងអន្តរជាតិ ប៉ុន្តែពលរដ្ឋរស់នៅក្នុងតំបន់បានបង្ហាញការបារម្ភអំពីចំនួនស្វាកើនឡើង ដោយសារប៉ះពាល់ដល់ការរស់នៅរបស់ពួកគេ ។ គេបានព្យាយាមពន្យារកំណើតស្វា ដើម្បីដោះស្រាយបញ្ហាចំនួនស្វាកើនឡើងតាំងពីឆ្នាំ២០១៨ មកម៉្លេះ ប៉ុន្តែស្វាទាំងនេះពុំបានថយចុះទេ ។

លោក ផុងសាថន ក្រងឡាំជីក ជាបុគ្គលិកក្រុមហ៊ុនដឹកជញ្ជូនក្នុងតំបន់និយាយថា ៖ «ពេលខ្លះ អតិថិជនមិនហ៊ានមកទេ ព្រោះពួកគេខ្លាចស្វាដណ្តើមរបស់របរ ។ យើងរងផលប៉ះពាល់ខ្លាំងណាស់ ប៉ុន្តែយើងត្រូវយល់ព្រមទទួលយកនូវស្ថានភាពបែបនេះ ។ យើងដឹកភ្ញៀវតាំងពីឆ្នាំ១៩៩៨ រហូតមកដល់បច្ចុប្បន្ន យើងនៅតែរងផលប៉ះពាល់ដដែល» ៕

ប្រទេសថៃ ៖ លោក Phongphon Yodmuangcharoen អ្នកនាំពាក្យក្រសួងថាមពលថៃលើកឡើងថា តម្លៃអគ្គិសនីចាប់ពីខែមករា រហូតដល់ខែមេសា ឆ្នាំ២០២៤ គឺមិនលើសពី៤,២០បាតក្នុង១គីឡូវ៉ាត់ ។ តួលេខនេះជាតួលេខដែលបានស្នើសុំ ចំណែកតម្លៃអគ្គិសនីជាក់ស្តែង គឺអាស្រ័យលើផ្នែកគ្រប់គ្រងរបស់ក្រសួងថាមពល ។ នេះបើតាមការចុះផ្សាយរបស់សារព័ត៌មានថៃ នៅថ្ងៃទី៣០ ខែវិច្ឆិកា ឆ្នាំ២០២៣ ។

លោក Phongphon លើកឡើងថា ៖ «លោក Peeraphan Saleerathaviphak ឧបនាយករដ្ឋមន្ត្រី និងរដ្ឋមន្ត្រីក្រសួងថាមពលបានជំរុញឱ្យក្រុមការងារស្វែងរកវិធីបញ្ចុះតម្លៃអគ្គិសនីឱ្យពលរដ្ឋនៅទូទាំងប្រទេស ហើយលោកនឹងព្យាយាមធ្វើឱ្យតម្លៃអគ្គិសនីធ្លាក់ចុះច្រើនជាងនេះទៀត ។ ហេតុនេះ តម្លៃអគ្គិសនីអាចស្មើប្រមាណ៤,២០បាតក្នុង១គីឡូវ៉ាត់ តាមរយៈការប្រើប្រាស់វិធានការជាច្រើនដើម្បីជួយសម្រួលតម្លៃអគ្គិសនីនៅប្រទេសថៃ» ។

លោក Peeraphan Saleerathaviphak ឧបនាយករដ្ឋមន្ត្រី និងរដ្ឋមន្ត្រីក្រសួងថាមពលបានបញ្ជាក់ថា ពលរដ្ឋថៃទាំងអស់ដែលប្រើប្រាស់អគ្គិសនីមិនចាំបាច់ទទួលបន្ទុកបង់ថ្លៃអគ្គិសនីខ្ពស់ រហូតដល់វិលមុខនោះទេ ។ គម្រោងបញ្ចុះតម្លៃអគ្គិសនីជូនពលរដ្ឋ ក្នុងគោលបំណងកុំឱ្យប្រឈមមុខនឹងការប្រតិកម្មក្រោយពិធីបុណ្យចូលឆ្នាំសកលនាពេលខាងមុខ ។

ទោះយ៉ាងណា វិធានការនេះគ្រាន់តែជាការជួយសម្រាលបន្ទុកក្នុងជីវភាពរស់នៅរបស់ពលរដ្ឋប៉ុណ្ណោះ ។ ក្រសួងថាមពលបញ្ជាក់ថា ការកែលម្អរចនាសម្ព័ន្ធឧស្ម័នធម្មជាតិ គឺជាកត្តាចម្បងពាក់ព័ន្ធនឹងការបញ្ចុះតម្លៃអគ្គិសនី ហើយវានឹងគាំទ្រថាមពលអគ្គិសនីស្អាតរយៈពេលយូរបន្តទៀត ៕

ប្រទេសវៀតណាម ៖ សារព័ត៌មាន Reuters រាយការណ៍ថា លោក Wang Yi មន្ត្រីទូតជាន់ខ្ពស់របស់ចិនបានធ្វើដំណើរទស្សនកិច្ចនៅប្រទេសវៀតណាម នាថ្ងៃទី៣០ ខែវិច្ឆិកា ឆ្នាំ២០២៣ ។ ប៉ុន្តែសារព័ត៌មាន Reuters មិនទទួលបានការបកស្រាយពីក្រសួងការបរទេសវៀតណាម និងចិនទេ ។

យោងតាមប្រភពព័ត៌មានពីជនជាតិវៀតណាម២នាក់និយាយថា ៖ «លោក Wang Yi នឹងចូលរួមក្នុងកិច្ចប្រជុំរវាងរដ្ឋាភិបាលវៀតណាម និងចិន នៅទីក្រុងហាណូយ នៅថ្ងៃទី១ ខែធ្នូ ឆ្នាំ២០២៣» ។

ប្រទេសចិនមានទំនាក់ទំនងយ៉ាងរឹងមាំជាមួយវៀតណាមផ្នែកការទូត តាំងពីឆ្នាំ១៩៥០ មកម៉្លេះ បើទោះជាកើតមានសង្គ្រាមរយៈពេលខ្លី នៅឆ្នាំ១៩៧៩ ក្តី ។ លើសពីនេះ ចិនគឺជាដៃគូពាណិជ្ជកម្មដ៏ធំបំផុតរបស់វៀតណាម និងជាប្រទេសនាំចូលដ៏សំខាន់សម្រាប់ផ្នែកផលិតវៀតណាម ។

នៅថ្ងៃទី២៧ ខែវិច្ឆិកា ឆ្នាំ២០២៣ រដ្ឋមន្ត្រីក្រសួងពាណិជ្ជកម្មចិនដែលបានទៅធ្វើទស្សនកិច្ចនៅវៀតណាម សន្យាថា នឹងបើកទីផ្សារចិនសម្រាប់ផលិតផលកសិកម្មវៀតណាម ខណៈប្រទេសទាំងពីរព្យាយាមជំរុញទំនាក់ទំនងពាណិជ្ជកម្មឱ្យកាន់តែស៊ីជម្រៅ ។ នេះបើតាមការលើកឡើងរបស់មន្ត្រីក្រសួងឧស្សាហកម្ម និងពាណិជ្ជកម្មវៀតណាម ។

កាលពីខែតុលា ឆ្នាំ២០២៣ សារព័ត៌មាន Reuters រាយការណ៍ថា ប្រធានាធិបតីចិន លោក ស៊ី ជិនពីង អាចនឹងធ្វើដំណើរទៅកាន់ទីក្រុងហាណូយ ហើយពេលនោះ គម្រោងធ្វើដំណើរអាចនៅចុងខែតុលា ឬដើមខែវិច្ឆិកា ឆ្នាំ២០២៣ ។ ប៉ុន្តែមន្ត្រីទូតប្រចាំទីក្រុងហាណូយ ចំនួន៣រូបបាននិយាយនាពេលបន្ទាប់ថា ដំណើរទស្សនកិច្ចនេះនឹងពន្យារពេលរហូតដល់ខែធ្នូ ឆ្នាំ២០២៣ ។

ពាណិជ្ជកម្មទ្វេភាគីរវាងវៀតណាម និងចិន បានកើនឡើង៥,៥% នៅឆ្នាំ២០២២ ស្មើនឹងទឹកប្រាក់១៧៥.៥០០លានដុល្លារអាមេរិក ខណៈការដឹកជញ្ជូនពីចិនមកកាន់វៀតណាម ស្មើនឹង៦៧% ។ នេះបើតាមការបញ្ជាក់របស់ក្រសួងឧស្សាហកម្ម និងពាណិជ្ជកម្មវៀតណាម ៕