ទន្ទឹមនឹងលោក រស់ រាជ្ជសាល បានចូលទៅនៅក្នុងផ្ទះរបស់លោកស្រី ទ្រី ដាណា ដើម្បីត្រៀមក្នុងថ្ងៃមង្គលស្រាប់តែមានឧកញ៉ាម្នាក់បានបោះសម្តីថាចូលទៅនៅផ្ទះគេមាន២វាលី ទេគេsaveរូបទុកហើយពេលចេញវិញតវ៉ាមិនបានទេ។ ពាក្យសម្តីនេះបានធ្វើឱ្យជំទាវ ចន ច័ន្ទលក្ខណា នៅមិនសុខលូកមាត់ជំនួសសាមីខ្លួនថា កុំគិតជួសអ្នកដទៃត្រូវគិតពីខ្លួនឯងធ្វើយ៉ាងម៉េចឱ្យគ្រួសារប្តីប្រពន្ធនិងកូនខ្លួនឯងរស់ឱ្យមានក្តីសុខទៅ។

ថ្ងៃទី៣០ វិច្ឆិកា មានគណនីហ្វេកប៊ុកមួយឈ្មោះថា ឧកញ៉ា ភិរម្យ វិចិត្រដារ៉ា បានបង្ហោះថា «ចូលទៅនៅផ្ទះគេមាន២វាលី ទេ!គេ saved រូបទុកហើយ ពេលចេញវិញតវ៉ាមិនបានទេ
(សូមជូនពរអោយមានសុភមង្គល)»។ ពាក្យសម្តីនេះត្រូវបានគេដឹងថាឧកញ៉ារូបនេះសម្តៅទៅអនាគតស្វាមីលោកស្រី ទ្រី ដាណា គឺលោក រស់ រាជ្ជសាល ដែលបានរើចូលផ្ទះគូដណ្តឹងខ្លួនកាលពីថ្ងៃទី២៩ ដើម្បីត្រៀមថ្ងៃមង្គលដែលនឹងប្រពឹត្តទៅឆាប់ៗនេះ។

យ៉ាងណាមិញ ពាក្យសម្តីខាងលើនេះបានធ្វើឱ្យជំទាវ ចន ច័ន្ទលក្ខិណា ដែលជាប្រធានសមាគមសិល្បករកម្ពុជា បានបោះសម្តីទៅវិញជំនួសសាមីខ្លួនថា «មនុស្សស្រលាញ់គ្នាដល់ថ្នាក់សម្រេចចិត្តចូលរស់នៅជាមួយគ្នាគឺមិនគិតផលអវិជ្ជមាននាថ្ងៃអនាគតទេ បើគ្រាន់តែឈានជើងចូលហើយចាប់ផ្តើមគិតដល់ថ្ងៃឈានជើងចេញនោះគេមិនហៅថា ការសម្រេចចិត្តជ្រើសយកការសាងសុភមង្គលក្នុងជីវិតគូទេ បើច្បាប់ស្រូបទាញ គឺ ការគិតអវិជ្ជមានគឺនិងទាញផលអវិជ្ជមាន (សម្រាប់តែសាមីខ្លួនផ្ទាល់) ខ្ញុំមិនធ្លាប់រៀនច្បាប់ស្រូបទាញទេ តែជាបទពិសោធន៍ខ្លួនខ្ញុំផ្ទាល់ បូករួមការឆ្លងកាត់ការសិក្សាពេលកំពុងជួបបញ្ហាធំៗ បើយើងដាក់ចិត្តអស់សង្ឃឹម ពិបាកចិត្ត ផ្តោតតែលើបញ្ហាគិតថាគ្មានវិធីដោះស្រាយនោះបញ្ហានិងដោះស្រាយមិនចេញ ព្រោះយើងមិនបានផ្តោតលើការរកវិធីដោះ គិតតែផ្តោតលើការអស់សង្ឃឹម»។

ជំទាវរូបនេះបន្តទៀតថា «បញ្ហាផ្សេងៗកាន់តែចូលមកធ្វើឱ្យយើងកាន់តែពិបាកចិត្តលើសដើម តែបើយើងដាក់ចិត្ត ជួបបញ្ហាមួយ យើងដោះមួយ ជួបពីរ យើងដោះពីរ ហើយគិតថាគ្មានបញ្ហាណាធំ ហើយ និងទ័លច្រកដោះមិនបានជាងសេចក្តីស្លាប់នោះទេ នោះអារម្មណ៍ផ្លូវចិត្តនិងធូរស្រាល ហើយខួរក្បាលក៏ទូលាយស្រស់ថ្លាគិតរកច្រកចេញដោយសំរួល ការមើលមនុស្សក៏ដូចគ្នា បើគិតគេក្នុងផ្លូវមិនល្អ នោះ យើងនិងឃើញចំណុចមិនល្អរបស់គេ»។

អតីតតារាសម្តែងដ៏ល្បីឈ្មោះរូបនេះសង្កត់ធ្ងន់ទៀតថា «កុំគិតជួសអ្នកដទៃ ត្រូវគិតពីខ្លួនឯង ធ្វើយ៉ាងម៉េចឱ្យគ្រួសារប្តីប្រពន្ធនិងកូនខ្លួនឯងរស់ឱ្យមានក្តីសុខ ចិត្តគំនិត ទង្វើ និង សកម្មភាពត្រូវមានស្របគ្នា»។

គួរបញ្ជាក់ផងដែរថា លោកស្រី ទ្រី ដាណា និងលោក រស់ រាជ្ជសាល បានភ្ជាប់ពាក្យជាមួយគ្នានៅថ្ងៃទី៩ ខែវិច្ឆិកា ឆ្នាំ២០២៣ ដែលធ្វើឱ្យមហាជនភ្ញាក់ផ្អើលពេញប្រទេស ខណៈអ្នកទាំងពីរសម្រេចចិត្តដឹកដៃគ្នារៀបចំពិធីមង្គលការនៅថ្ងៃទី៣ ខែធ្នូ នេះ៕

មហិច្ឆតានិងការស្រមៃចង់ឱ្យគ្រាប់ស្វាយចន្ទីកម្ពុជា ល្បីល្បាញលេចធ្លោរ និងទទួលស្គាល់ជាអន្តរជាតិ ជាពិសេសក្លាយជាអ្នកផ្គត់ផ្គង់ដ៏ធំបំផុតនៅក្នុងពិភពលោកដែលជាក្តីសុបិន្តរបស់កម្ពុជានាពេលខាងមុខនេះ។ នេះបើយោងតាមការបកស្រាយ និងវត្ថុបំណងរបស់ក្រសួងកសិកម្ម សមាគមដាំដំណាំស្វាយចន្ទី អ្នកជំនាញមកពីគំរោង GIZ របស់អាល្លឺម៉ង់ និងតំណាងសហគមអឺរ៉ុបបានលើកឡើងស្រដៀងៗគ្នាថា អនាគតកម្ពុជានឹងឈានមុខគេ ហើយក្លាយជាជើងឯកដែលអាចផ្គត់ផ្គង់គ្រាប់ស្វាយចន្ទីនៅលើទីផ្សារអន្តរជាតិទូទាំងពិភពលោក។

ភាគីតំណាងក្រសួងកសិកម្ម លោកជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្មរុក្ខាប្រមាញ់និងនេសាទ បានមានប្រសាសន៍ថា កត្តាសក្តានុពលគឺកម្ពុជាមានដីដែលសមស្របដាំដុះចន្ទី មានរហូតដល់ 2.8 លានហិចតានៅទូទាំងប្រទេស ហើយបច្ចុប្បន្ន ផ្ទៃដីដាំដុះស្វាយចន្ទីមានស្រាប់មានចំនួន ៧០ម៉ឺនហិចតាប៉ុណ្ណោះដែលមានជាង១១ម៉ឺនហិកតានៅក្នុងខេត្តកំពង់ធំ។ ជាលទ្ធផលស្វាយចន្ទីបានផ្តល់ទិន្នផលគ្រាប់ស្វាយចន្ទីស្រស់ មានរហូតដល់ជាង១លានតោន ហើយទីផ្សារនាំចេញដ៏ធំបំផុតរបស់កម្ពុជា៩០% គឺជាប្រទេសវៀតណាម ដែលទទួលទិញគ្រាប់ស្វាយចន្ទីស្រស់នៅសើមយកទៅសំងួត លក់បន្តទៅទីផ្សាអន្តរជាតិ ចំពោះកម្ពុជាបច្ចុប្បន្នលទ្ធភាពសំងួតមានត្រឹមតែ៥%តែប៉ុណ្ណោះ។ ជាការឆ្លើយតប រាជរដ្ឋាភិបាលនិងក្រសួងកសិកម្មបានផ្តល់មូលធន១០០លានដុល្លារដើម្បីពង្រីកលទ្ធភាពកែច្នៃ សំងួត នៅតាមមូលដ្ឋាន កែច្នៃ មុននិងលក់គ្រាប់ឆៅ ក្នុងគោលបំណងរកប្រភពចំណូលជូនសេដ្ឋកិច្ចកម្ពុជា កាត់បន្ថយបន្តិចម្តងៗពីការលក់គ្រាប់សើមទៅទីផ្សារ។

យុទ្ធសាស្ត្រពង្រាយមន្ត្រីកសិកម្មចុះដល់ឃុំស្រុក ជួយសម្របសម្រួលដល់ការដាំដុះ និងរៀបចំចងក្រងជាសមាគមដាំដុះ ជួយបង្រៀនកសិករយល់ដឹងពីការធ្វើកសិកម្មបែបទំនើប។ អ្វីដែលកាន់តែពិសេស ក្រសួងកសិកម្មនិងអគ្គីសនីកម្ពុជាបានសហការបញ្ចុះថ្លៃអគ្គីសនី៥០% រាល់ការសំងួតនៅពេលយប់ ដើម្បីជួយកាត់បន្ថយការចំណាយលើថ្លៃអគ្គីសនី និងបង្កើនផលចំណេញជូនសិប្បកម្មកែច្នៃស្វាយចន្ទី ទាំងអស់ផងដែរ។

តំណាងសមាគម លោក ស៊ុយ កុកធាន អនុប្រធានសមាគមស្វាយចន្ទី ក៏មានក្តីសុបិន្តមិនខុសពីក្រសួងកសិកម្ម និងរាជរដ្ឋាភិបាលផងដែរ គឺចង់ឃើញ គ្រាប់ស្វាយចន្ទីកម្ពុជា ក្លាយជាអ្នកផ្គត់ផ្គង់គ្រាប់ស្វាយចន្ទីដ៏ធំំបំផុតនៅលើពិភពលោក នេះបើតាមការរៀបរាប់ពីតំណាងប្រធានសមាគមស្វាយចន្ទីកម្ពុជា។

លោកប្រធានសមាគមបានលើកឡើងថា បើទោះជាយើងប្រឈមនិងបញ្ហារបំរែបំរួលអាកាសធាតុកន្លងមកក្តី និងដើមស្វាយចន្ទីមួយចំនួនខូចខាត តែជាលទ្ធផល ការដាំដុះជាថ្មី ពូជចន្ទី អឹម ២៣ របស់កម្ពុជា មានការកើនឡើងជាគំហុក ដោយការដាំដុះពូជ អឹម ២៣ របស់កម្ពុជាបានផ្តល់នូវទិន្នផលខ្ពស់ គ្រាប់ធំៗ គុណភាពឆ្ងាញ់ជាងគ្រាប់ស្វាយចន្ទីដែលដាក់លក់នៅលើទីផ្សារអន្តរជាតិ។

លោកបានបញ្ជាក់ផងដែរថា បច្ចុប្បន្នយើងមានសមាជិកសមាគមចន្ទីសរុប៤២ទីតាំងប្រមូលផ្តុំនិងចែកចាយបន្ត ហើយជាមួយនិងការជួយមូលធុនពីរដ្ឋាភិបាល លទ្ធភាពនៃការទិញគ្រាប់ស្វាយចន្ទីពីកសិករ កែច្នៃចន្ទី មានការកើនឡើងស្របតាមគោលដៅដែលគ្រប់គ្នាចង់បាន ព្រោះការលក់ស្វាយចន្ទីដែលស្ងួតទទួលបានថ្លៃខ្ពស់ជាងលក់ទាំងគ្រាប់សើម។ សមាគមក៏មានរៀបចំ កិច្ចសន្យាទិញលក់រវាងអ្នកដាំដុះ និងអ្នកកែច្នៃ និងជួយធានាលទ្ធភាព នៃការដាំដុះបានច្រើនជាងមុន ប្រសិទ្ធិភាពខ្ពស់។

ក្រឡេកមកមើលតំណាងសហគមអឺរ៉ុបវិញ លោក BRYAN FORANARI ប្រធានផ្នែកកិច្ចសហប្រតិបត្តិការរបស់សហភាពអឺរ៉ុប(EU) បានលើកឡើងថាគ្រាប់ចន្ទីកម្ពុជា នឹងឈានមុខគេនៅទីផ្សាអឺរ៉ុប ដោយបច្ចុប្បន្នកម្ពុជាទទួលបានសិទ្ធិចែកចាយនៅទីផ្សារលក់ផលិតផលកសិកម្មនៅអឺរ៉ុប ដោយមិនបង់ពន្ធ និងមិនមានកំណត់កូតានាំចេញឡើយ។តែអ្វីដែលបញ្ហាប្រឈមនោះគឺ ផលិតផលកម្ពុជាត្រូវតែអនុលោមទៅតាមបទដ្ឋានស្តង់ដាគុណភាពអនាម័យ បរិមាណផលិត ឱ្យស្របទៅតាមការចង់បាននិងលក្ខខណ្ឌនានានៅទីផ្សារអឺរ៉ុប ហើយកន្លងមកកម្ពុជាបានធ្វើដោយជោគជ័យ និងកំពុងតែបន្តធ្វើ។ ដោយឡែកបញ្ហាប្រឈមមួយចំនួនត្រូវបានចូលរួមគ្នាជួយដោះស្រាយ ដោយមានកិច្ចការសហការបច្ចេកទេសពីគំរោង GIZ របស់អាល្លឺម៉ង់ និងក្រសួងកសិកម្ម សមាគមដាំស្វាយចន្ទី សិប្បកម្មកែច្នៃស្វាយចន្ទី ហើយជាលទ្ធផលកម្ពុជាមានលទ្ធភាពកែច្នៃក្នុងស្រុកជាបណ្តើរៗ និងអាចនាំចេញទៅលក់លើទីផ្សារអន្តរជាតិ ក្រៅពីវៀតណាម ដោយនាំចេញគ្រាប់ស្វាយចន្ទីស្ងួត កែច្នៃរួចទៅកាន់ប្រទេសចិន ជប៉ុន ឡាវ និងអារ៉ាប់រួមផងដែរ។

ដោយការជឿជាក់យ៉ាងមុតមាំ កម្ពុជាពិតអាចធ្វើបាន បើទោះបីជាសុបិន្តនោះហាក់ដូចជាធំធេងក៏ពិតមែន ហើយដើម្បីសម្រេចក្តីសុបិន្តរួម កម្ពុជាក្លាយជាស្តេចគ្រាប់ស្វាយចន្ទី រឺជាជើងឯកផ្គត់ផ្គង់ស្វាយចន្ទី នៅលើឆាកអន្តរជាតិបាន អាស្រ័យដោយមានការសហការពីគ្រប់ភាគីទាំងអស់ រួមគ្នាសម្រេចការដាំដុះអោយបានច្រើន កែច្នៃផលិតនាំចេញ ដោយផ្តើមពីការបង្កើនលទ្ធភាពដាំដុះច្រើនជាងមុន។ លទ្ធភាពកែច្នៃសំងួតតាមបច្ចេកទេសផ្តល់ជូនបានច្រើនជាងមុន រឺឯបញ្ហាទីផ្សាគឺមិនមានបញ្ហាឡើយ ពោលគឺរង់ចាំតែផលិតផលរបស់កម្ពុជាផលិតបានតែប៉ុណ្ណោះ។

ឆ្លើយតបជាមួយថា តើកម្ពុជាអាចសម្រេចមហិច្ឆតា ក្លាយជាអ្នកនាំចេញដ៏ធំជាងគេលើពិភពបានដែររឺទេ? លោកតំណាង គំរោងកិច្ចសហប្រតិបត្តិការអាល្លឺម៉ង់ GIZ បានរំលឹកផងដែរថា កន្លងមកប្រទេសវៀតណាមទទួលបានចំណាត់ថ្នាក់លេខ១ជាអ្នកចែកចាយគ្រាប់ស្វាយចន្ទីដ៏ធំបំផុតនៅលើទីផ្សាស្វាយចន្ទី ហើយគ្រប់គ្នាបានដឹងរួចហើយថាគ្រាប់ស្វាយចន្ទីដែលវៀតណាមនាំចេញ គឺ៩០ភាគរយ ស្មើនិងជិត១លានតោន បានទិញគ្រាប់ស្វាយចន្ទីសើមស្រស់ ពីកម្ពុជា រួចកែច្នៃនាំចេញលក់ទៅក្រៅប្រទេស ក្រោមស្លាកផលិតផលប្រទេសវៀតណាម។

លោកតំណាង GIZ អាល្លឺម៉ង់ មានជំនឿយ៉ាងមុតមាំថាកម្ពុជាពិតជាអាចធ្វើទៅបាន គ្រាន់តែមានបញ្ហាប្រឈមសម្រាប់កម្ពុជាបន្តិច តែមិនមានអ្វីដែលកម្ពុជាមិនអាចធ្វើទៅបានទេ។ កន្លងមកកម្ពុជាជាប្រទេសដែលដាំដុះប្រមូលផលបានរហូតជាង១លានតោនបរិមាណច្រើនជាងគេ នៅក្នុងតំបន់អាស៊ី អាគ្នេយ៍ រួចស្រេចទៅហើយ ហើយការកែច្នៃក៏បានចាប់ផ្តើមដំណើរការហើយ។

សរុបកត្តាអំណោយផល មហិច្ឆតាសម្រេចក្តីសុបិន្តកម្ពុជានិងក្លាយជាជើងឯកជំនួសប្រទេសវៀតណាម កាន់តែខិតជិតបន្តិចម្តងៗ ខណៈបច្ចុប្បន្នប្រទេសវៀតណាម កាត់បន្ថយការដាំដុះស្វាយចន្ទីក្នុងស្រុក ហើយបើកម្ពុជាមានលទ្ធភាពពង្រីកការកែច្នៃក្នុងស្រុកកើនឡើងជាលំដាប់ ការច្នៃដោយសំងួតស្វាយចន្ទីយកលក់នៅទីផ្សាអន្តរជាតិ ប្រាកដណាស់នឹងកើតមានឡើងនាពេលអនាគតដ៏ខ្លីខាងមុខ ក្រុមហ៊ុនវិនិយោគទុនបរទេស នឹងតំឡើងរោងចក្រកែច្នៃលើទឹកដីកម្ពុជាជាក់ជាមិនខាន។ កម្ពុជាមានផ្ទៃដីសមស្របដាំដុះដំណាំចន្ទីមានរហូតដល់ជាង 2,8លានហិចតា ដែលបច្ចុប្បន្នកម្ពុជាបានប្រមូលផលមានជាងមួយលានតោនរួចជាស្រេចទៅហើយ៕

វាជាប្រវត្តិសាស្រ្តថ្មីមួយនិងជាគំរូដល់កូនខ្មែរគ្រប់រូប ស្ត្រីខ្មែរម្នាក់ដែលត្រូវបានគេស្គាល់ថា ចុងភៅណាក់ កាលពីពេលថ្មីៗនេះបានទទួលពានរង្វាន់អូស្ការ តាមរយៈស្នាដៃនិពន្ធសៀវភៅមុខម្ហូបខ្មែរប្រចាំព្រះបរមរាជវាំង មានចំណងជើងថា«សោយ SAOY» ដែលត្រូវបានជាប់ជាសៀវភៅមុខម្ហូបល្អបំផុតដាច់គេឆ្នាំ២០២៣ ក្នុងចំណោមសៀវភៅមុខម្ហូបល្អផ្សេងៗទៀតមកពីជាង២០០ប្រទេសលើពិភពលោក។

កាលពីថ្ងៃទី២៩ ខែវិច្ឆិកា ឆ្នាំ២០២៣នេះ នៅឯប្រទេសអារ៉ាប់ប៊ីសាអូឌីតបានលេចនូវវត្តមានកូនខ្មែរមួយរូបនៅលើឆាកអន្តរជាតិ គឺអ្នកនាង រស់ រតនៈ ហៅថាចុងភៅណាក់ ប្រធានមណ្ឌលសិល្បៈម្ហូបអាហារខ្មែរ ដោយអ្នកនាងបាននាំយកសៀវភៅមួយក្បាលរាយនាមមុខម្ហូបខ្មែរចំនួន៦០មុខប្រចាំនូវក្នុងព្រះបរមរាជវាំង ទៅឲ្យគណៈកម្មាការ Gourmand Award ធ្វើការវាយតម្លៃ រហូតទទួលបាននូវលទ្ធផលស្ទើរតែមិននឹកស្មានដល់ថា សៀវភៅមួយក្បាលនេះត្រូវបានជ្រើសរើសជាសៀវភៅមុខម្ហូបល្អដាច់គេក្នុងចំណោមសៀវភៅមុខម្អូបល្អៗទាំងអស់នៅលើពីភពលោក។

តាមរយៈការអះអាងរបស់អ្នកនាងរស់ រតនៈបានបង្ហាញថា សៀវភៅ«សោយ‍»ដែលជាស្នាដៃនិពន្ធរបស់អ្នកនាងអាចយកឈ្នះសៀវភៅមុខម្អូបល្អផ្សេងៗ រហូតទទួលបានពានរង្វាន់ពិភពលោកបែបនេះ គឺទទួលតាមរយៈ៣ផ្នែកសំខាន់ៗគឺ ទី១បានលើផ្នែក Over Best Cook Book គឺមានន័យថានៅក្នុងចំណោមប្រទេសដែលការបោះពុម្ពដោយខ្លួនឯង។ ទី២ គឺ Best in Region មានន័យថាសៀវភៅមុខម្ហូបល្អបំផុតនៅក្នុងតំបន់អាស៊ី។ និងពិសេសជាងគេទី៣នោះគឺ Gastro diplomacy ការប្រើប្រាស់ម្ហូបអាហារជាកម្លាំងទន់ដើម្បីផ្សព្វផ្សាយអំពីសិល្បៈវប្បធម៌តាមរយៈការចម្អិន។

គួរបញ្ជាក់ផងដែរថា សៀវភៅ«សោយ SAOY» គឺបានបោះពុម្ពទាំងជាភាសាខ្មែរនិងភាសាអង់គ្លេស នៅក្នុងសៀវភៅនោះផងដែរគឺបានរៀបរាប់យ៉ាងលម្អិតពីម្ហូបអាហារ ដែលហៅថា «ព្រះក្រយ៉ា» របស់ខ្សែរាជវង្សខ្មែរនៅក្នុងព្រះបរមរាជវាំង ចន្លោះឆ្នាំ១៩៥០¬ដល់១៩៧០ ដែលបានចងក្រងទុកយ៉ាងល្អបំផុតដោយ សម្តេចព្រះរាជកន្និដ្ឋា-នរោត្តម-រស្មីសោភ័ណ ដើម្បីបន្សល់ទុកឲ្យខ្មែរជំនាន់ក្រោយនិងពិភពលោកទាំងមូល។ សៀវភៅនេះផងដែរ គឺបានសបញ្ជាក់ពី រសជាតិ ភាពប្រណិត ភាពច្នៃប្រឌិត ក៏ដូចជារួមបញ្ចូលពីសិល្បៈរប្បធម៌ របៀបចម្អិនព្រះក្រយ៉ាទាំង៦០មុខក្នុងព្រះបរមរាជវាំង ព្រមជាទាំងបានរៀបរាប់នូវគ្រឿងផ្សំ និងរូបថតនៃមុខម្ហូបនីមួយៗទៀតផង។

ទំាងនេះហើយគឺជាមោទនភាពរបស់ជាតិខ្មែរ ដូច្នេះក្នុងនាមយើងជាកូនខ្មែរគ្រប់រូបគួរតែចូលរួមផ្សព្វផ្សាយនិងបន្តលើកស្ទួយសិល្បៈវប្បធម៌របស់យើង ក៏ដូចជាធ្វើការគាំទ្រឲ្យបានច្រើនបន្ថែមទៀតតាមរយៈសៀវភៅ «សោយ SAOY» ដែលជាស្នាដៃនិពន្ធរបស់ស្ត្រីខ្មែរដ៏គួរឲ្យគោរពកោតសរសើរមួយរូបនេះផងដែរ៕

ថ្មីៗនេះប្រមុខរាជរដ្ឋាភិបាលកម្ពុជាបានចេញសេចក្ដីសម្រេច ស្ដីពីការបង្កើតក្រុមការងារចម្រុះ ទទួល និងដោះស្រាយបណ្ដឹងគ្រប់មុខសញ្ញា នៅភូមិគ្រឹះសម្ដេចធិបតី ហ៊ុន ម៉ាណែត និងលោកស្រីបណ្ឌិត ពេជ ចន្ទមុន្នី។

ក្រុមការងារចម្រុះនេះ មានភារកិច្ចចាំបាច់ដូចខាងក្រោម៖

• ទទួលពាក្យបណ្ដឹងតវ៉ាផ្សេងៗ នៅមុខភូមិគ្រឹះសម្តេចមហាបវរធិបតី នាយករដ្ឋមន្ត្រី និងលោកជំទាវបណ្ឌិត នៅរាជធានីភ្នំពេញ និងខេត្តកណ្តាល រួចបញ្ជូនទៅជំនាញពាក់ព័ន្ធ ឬធ្វើរបាយការណ៍គោរពស្នើសុំគោលការណ៍ ដឹកនាំ ឬពិនិត្យសម្រេចដ៏ខ្ពង់ខ្ពស់ពីសម្ដេចមហាបវរធិបតី នាយករដ្ឋមន្ត្រី នៃព្រះរាជាណាចក្រកម្ពុជា
• សហការជាមួយអាជ្ញាធរមានសមត្ថកិច្ចពាក់ព័ន្ធគ្រប់ជាន់ថ្នាក់ទាំងអស់ ទប់ស្កាត់ក្រុមអ្នកតវ៉ាដែលមានមនុស្សច្រើននាក់ ក្នុងបំណងមកដាក់ពាក្យបណ្ដឹងតវ៉ាផ្សេងៗ ជូនសម្ដេចមហាបវរធិបតី នាយករដ្ឋមន្ត្រី និងលោកជំទាវបណ្ឌិត ដោយព្យាយាមពន្យល់អំពីនីតិវិធីជូនក្រុមអ្នកតវ៉ា ឱ្យយល់អំពីច្បាប់ និងឯកសារផ្សេងៗដែលពាក់ព័ន្ធ
• ទប់ស្កាត់រាល់ការញុះញង់ពីក្រុមឆ្លៀតឱកាសដែលកេងចំណេញមកលើក្រុមអ្នកតវ៉ា
• អនុប្រធាន និងសមាជិក ក្រុមការងារចម្រុះត្រូវចូលរួមប្រជុំតាមការអញ្ជើញរបស់ប្រធានក្រុមការងារ៕

នាថ្មីៗនេះ គេឃើញមានការចែករំលែតៗគ្នា នៅលើបណ្តាញសង្គម ទាក់ទងនឹងកុមារាម្នាកក់ មានអាយុត្រឹមតែ៦ឆ្នាំ តែបែរជាមានជំងឺទឹកនោមប្រៃជាប់ខ្លួន គួរឱ្យអណិត។

កុមារាម្នាក់នោះមានឈ្មោះថា កែវ​ សិរីយុទ្ធ​ ហៅអាចិន អាយុ៦ឆ្នាំ រស់នៅជាមួយម្ដាយឪពុក នៅបន្ទប់ជួលម្ដុំគួងហុងបឹងត្របែក ។

ដោយគ្មានប្រាក់ព្យាបាលជំងឺ និងចង់ជួយសម្រាលបន្ទុកអ្នកម្តាយផង កុមារា កែវ​ សិរីយុទ្ធ​ បានចេញដើរលក់ម្ជូរនៅតាមផ្លូវ ជារៀលរាល់យប់ ដើម្បីបានប្រាក់បន្តិចបន្តួចជួយម្តាយ។

ហេតុដូច្នេះ ប្រសិនបើបងប្អូនបានឃើញប្អូនប្រុសម្នាក់នេះ ដើរលក់នៅតាមផ្លូវ សូមមេត្តាជួយទិញ ដើម្បីឱ្យគ្នាមានប្រាក់យកទៅជួយម្តាយ និងដើម្បីព្យាបាលជំងឹផងដែរ។

សូមបញ្ជាក់ផងដែរថា កត្តាដែលបង្កឱ្យមានជម្ងឺទឹកនោមប្រៃ គឺអាចកើតឡើងដោយឯកឯង ឬដោយសារតែជម្ងឺអ្វីម្យ៉ាង ដូចជា ការខូចតម្រង់នោម ជាដើម៕

រូបភាពរក្សាសិទ្ធដោយ៖ បង ម៉េង អ្នកសារព័ត៌មាន