បរទេស៖ អត្រាគ្មានការងារធ្វើនៅសកលលោកអាចនឹងកើនឡើងប្រមាណជាង ៥% ប្រហែល ២ លាននាក់នៅឆ្នាំ ២០២៤ ដែលពួកគេអាចនឹងស្វែងរកការងារធ្វើក្នុងរយៈពេល ១២ ខែខាងមុខ នេះបើយោងតាមបាយការណ៍ World Employment and Social Outlook Trends 2024 របស់អង្គការពលកម្មអន្តរជាតិដែលបានរាយការណ៍កាលពីថ្ងៃទី១០ ខែមករា។
ភាពក្រីក្រក្នុងការស្វែងរកការងារធ្វើនៅតែបន្តកើតមាន ដោយសារចំនួនកម្មករដែលរស់នៅក្នុងភាពក្រីក្រខ្លាំងរកចំណូលតិចជាង ២.១៥ ដុល្លារក្នុងមួយថ្ងៃ កើនឡើងប្រហែល ១ លាននាក់ក្នុងឆ្នាំ ២០២៣។ ហើយចំនួនកម្មករដែលរស់នៅក្នុងភាពក្រីក្រជាមធ្យមគឺរកប្រាក់ចំណូលបានតិចជាង ៣.៦៥ ដុល្លារក្នុងមួយថ្ងៃ កើនឡើង ៨.៤ លាននាក់កាលពីឆ្នាំមុន។
ដូច្នេះ ក្នុងពាក់កណ្តាលទសវត្សរ៍រយៈពេល ៣០ ឆ្នាំមកនេះសេដ្ឋកិច្ចពិភពលោកកំពុងស្ថិតនៅលើផ្លូវសម្រាប់កំណើនយឺត ដោយកត់សម្គាល់ថា បណ្តាប្រទេសដែលមានជាងគេបំផុតនៅលើពិភពលោកគឺមានកម្រិតជីវភាពធ្លាក់ចុះ ដោយសារតែអតិផរណាធ្លាក់ចុះនៅក្នុងសេដ្ឋកិច្ចសំខាន់ៗជាច្រើន។
ទីភ្នាក់ងារអង្គការសហប្រជាជាតិបាននិយាយថា ការថយចុះកម្រិតជីវភាពដែលបណ្តាលមកពីអតិផរណាគឺ “ទំនងជាមិនវិលត្រលប់មកវិញយ៉ាងឆាប់រហ័សនោះទេ” ។ អង្គការអន្តរជាតិខាងការងារ (ILO) ក៏បានបញ្ជាក់ដែរថា មានភាពខុសប្លែកគ្នាយ៉ាងខ្លាំងរវាងប្រទេសដែលមានប្រាក់ចំណូលខ្ពស់ និងទាប។ ខណៈពេលដែលអត្រាចំនួនអ្នកអត់ការងារធ្វើ ឬអ្នកដែលកំពុងស្វែងរកការងារធ្វើក្នុងឆ្នាំ ២០២៣ គឺ ៨.២ ភាគរយនៅក្នុងប្រទេសអ្នកមាន ហើយ ២០.៥ ភាគរយនៅក្នុងប្រទេសក្រីក្រ។
ទោះជាយ៉ាងណាក៏ដោយ អគ្គនាយកអង្គការ ILO លោក Gilbert Houngbo បានព្រមានថា “ការធ្លាក់ចុះកម្រិតជីវភាព និងផលិតភាពខ្សោយ រួមជាមួយនឹងអតិផរណាជាប់លាប់ បង្កើតលក្ខខណ្ឌសម្រាប់វិសមភាពកាន់តែខ្លាំង និងធ្វើឱ្យខូចដល់កិច្ចខិតខំប្រឹងប្រែងដើម្បីសម្រេចបាននូវយុត្តិធម៌សង្គម។ លោកបានកត់សម្គាល់ថា បើគ្មានយុត្តិធម៌សង្គមធំជាងនេះទេ យើងនឹងមិនមានការងើបឡើងវិញដោយនិរន្តរភាពឡើយ។ ដូច្នេះ លោកក៏បានអំពាវនាវឱ្យបញ្ហាប្រឈមរបស់កម្លាំងពលកម្មជារួមត្រូវដោះស្រាយឱ្យបានលឿន និងមានប្រសិទ្ធភាព៕
