បរទេស៖ អូស្ត្រាលីបានប្រកាសផែនការកាត់បន្ថយអន្តោប្រវេសន៍ពាក់កណ្តាលក្នុងរយៈពេលពីរឆ្នាំខាងមុខ រួមទាំងការរឹតបន្តឹងច្បាប់ទិដ្ឋាការសម្រាប់និស្សិតអន្តរជាតិ។
យោងតាមយុទ្ធសាស្ត្រអន្តោប្រវេសន៍រយៈពេល ១០ ឆ្នាំដែលបានប្រកាសដោយប្រទេសអូស្ត្រាលីនៅថ្ងៃទី ១១ ខែធ្នូថា តម្រូវការវិញ្ញាបនបត្រភាសាអង់គ្លេសសម្រាប់និស្សិតអន្តរជាតិនឹងត្រូវបានលើកឡើងដល់កម្រិតខ្ពស់បំផុត។ ជាពិសេស អ្នកដាក់ពាក្យសុំទិដ្ឋាការសិស្សនឹងត្រូវសម្រេចបាន IELTS ៦.០ ជំនួសឱ្យ ៥.៥ លើសកាលពីមុន។ រីឯអ្នកដាក់ពាក្យសុំទិដ្ឋាការក្រោយឧត្តមសិក្សានឹងត្រូវការសម្រេចបាន IELTS ៦.៥ ជំនួសឱ្យ ៦.០។

លោកស្រី Clare O’Neil រដ្ឋមន្ត្រីក្រសួងមហាផ្ទៃអូស្ត្រាលីបាននិយាយថា៖ «យុទ្ធសាស្ត្ររបស់យើងនឹងនាំឱ្យចំនួនអន្តោប្រវេសន៍ត្រឡប់មកធម្មតាវិញ ខណៈដែលស្ថានភាពអន្តោប្រវេសន៍កាលពីឆ្នាំ ២០២២ និង ២០២៣ កើនឡើងយ៉ាងខ្លាំង» ដែលនេះនឹងអាចធ្វើឱ្យប៉ះពាល់ដល់អនាគតរបស់ប្រទេសអូស្ត្រាលី។ លោកស្រី O’Neil បានបន្តទៀតថាការកើនឡើងនៃអន្តោប្រវេសន៍ភាគច្រើនសុទ្ធតែនិស្សិតអន្តរជាតិ។

កាលពីឆ្នាំមុន ប្រទេសអូស្ត្រាលីបានបង្កើនចំនួនជនអន្តោប្រវេសន៍ដើម្បីជួយអាជីវកម្ម ក៏ដូចជាបំពេញការខ្វះខាតបុគ្គលិក បន្ទាប់ពីជំងឺរាតត្បាត Covid-19 ដោយលំហូរចូលភ្លាមៗនៃពលករបរទេស និងនិស្សិតអន្តរជាតិបានបង្កើនសម្ពាធលើទីផ្សារជួលដែលកំពុងតានតឹងរួចមកហើយ ចំពេលមានការកើនឡើងនៃភាពគ្មានផ្ទះសម្បែងផងដែរ។ ការស្ទង់មតិមួយដែលត្រូវបានចេញផ្សាយដោយ Sydney Morning Herald នៅថ្ងៃទី ១១ ខែធ្នូបាននិយាយថា ចំនួនជនអន្តោប្រវេសន៍នៅក្នុងប្រទេសអូស្រ្តាលីមានទំហំធំពេក ដែលអាចធ្វើឱ្យប៉ះពាល់ដល់អនាគតរបស់ប្រទេសនេះ។

គួរបញ្ជាក់ដែរថា បច្ចុប្បន្នជនអន្តោប្រវេសន៍ និងជនចំណាកស្រុក ក៏ដូចជានិស្សិតអន្តរជាតិបានឈានដល់កម្រិតកំពូលចំនួន ៥១០,០០០ នាក់ក្នុងឆ្នាំ ២០២២-២០២៣។ ទោះជាយ៉ាងណាក៏ដោយ យោងតាមទិន្នន័យបានបង្ហាញថាចំនួននេះនឹងធ្លាក់ចុះដល់ ២៥០,០០០ ក្នុងឆ្នាំ ២០២៤ រហូតដល់ ២០២៦ ដោយសារការរឹតបន្តឹងច្បាប់ទិដ្ឋាការថ្មីរបស់ប្រទេសអូស្ត្រាលីសម្រាប់និស្សិតអន្តរជាតិ និងជនអន្តោប្រវេសន៍៕

ប្រទេសចិន ៖ ក្នុងរយៈពេល៧ខែដំបូងនៃឆ្នាំ២០២៣ (គិតចាប់ពីខែមករា រហូតដល់ខែកក្កដា) ប្រទេសចិនបាននាំចេញរថយន្តអគ្គិសនីថ្មីទៅកាន់តំបន់អឺរ៉ុបកើនឡើងខ្ពស់ទ្វេដង បើធៀបនឹងរយៈពេលដូចគ្នាកាលពីឆ្នាំ២០២២ ។ នេះបើយោងតាមការចុះផ្សាយរបស់សារព័ត៌មានបរទេស កាលពីថ្ងៃទី១១ ខែធ្នូ ឆ្នាំ២០២៣ ។

សារព័ត៌មានចិនរាយការណ៍ថា ក្រុមហ៊ុនផ្តល់សេវាកម្មទិន្នន័យ និងបច្ចេកវិទ្យាផ្នែកហិរញ្ញវត្ថុលំដាប់ពិភពលោក បង្ហាញថា ការនាំចេញរថយន្តអគ្គិសនីថ្មីរបស់ប្រទេសចិន ក្នុងរយៈពេល៧ខែដំបូងនៃឆ្នាំ២០២៣ បានកើនឡើងទ្វេដង បើធៀបនឹងឆ្នាំ២០២២ ខណៈមានតម្រូវការរថយន្តអគ្គិសនីខ្ពស់នៅតំបន់អឺរ៉ុប ។ នេះឆ្លុះបញ្ចាំងឱ្យឃើញពីទំនាក់ទំនងយ៉ាងរឹងមាំរវាងប្រទេសចិន និងសហភាពអឺរ៉ុប (EU) ។

អ្នកវិភាគវាយតម្លៃថា វានឹងមានឥទ្ធិពលដល់ការផលិតរថយន្តថាមពលថ្មី ដែលជាកត្តាមួយជួយដល់ការបម្រែបម្រួលក្នុងរយៈពេលវែង ។ រីឯគណៈកម្មការអឺរ៉ុបបញ្ជាក់ថា ប្រទេសចិនបានរួមចំណែកក្នុងការលក់រថយន្តអគ្គិសនីនៅតំបន់អឺរ៉ុប កើនឡើង៨% នៅឆ្នាំ២០២៣ ។ លើសពីនេះ វានឹងកើនរហូតដល់១៥% ក្នុងរយៈពេល២ឆ្នាំខាងមុខ ពីព្រោះរថយន្តអគ្គិសនីចិនមានតម្លៃថោកជាងរថយន្តអគ្គិសនីដែលផលិតនៅតំបន់អឺរ៉ុប រហូតដល់២០% ។

ចំណែកការធ្វើពាណិជ្ជកម្មរវាងប្រទេសចិន និងតំបន់អឺរ៉ុប ក៏បានកើនឡើងរហូតដល់៨សែន៤ម៉ឺន៧ពាន់៣រយលានដុល្លារអាមេរិកនៅឆ្នាំ២០២២ និងកើនឡើង២,៤% បើធៀបនឹងឆ្នាំ២០២១ ៕ ប្រភព ៖ TV5HD Online

ប្រទេសជប៉ុន ៖ ដើមទំពាំងបាយជូរជប៉ុន «ពូជម៉ាស់ខាត់» បានចេញផ្លែពេញដើម និងមានរសជាតិផ្អែម ហើយវាបានផ្តល់ប្រាក់ចំណូលយ៉ាងច្រើនដល់កសិករជប៉ុន ។ កសិករជប៉ុនបានចំណាយពេលរហូតដល់៣៣ឆ្នាំ ដើម្បីអភិវឌ្ឍន៍ពូជផ្លែទំពាំងបាយជូរប្រភេទនេះ ។ កសិករនិយាយ ផ្លែទំពាំងបាយជូរពណ៌បៃតងគួរឱ្យទទួលទាន ហើយវាជាពូជមួយក្នុងចំណោមពូជបានអភិវឌ្ឍន៍ឡើងដោយជប៉ុន ប៉ុន្តែប្រទេសចិន និងកូរ៉េខាងត្បូងបានយកពូជនេះទៅដាំដុះ ។

លោក យូគិ ណាកាមូរ៉ាក់ អាយុ៣៥ឆ្នាំ ជាម្ចាស់ចម្ការទំពាំងបាយជូរនៅតំបន់ណាកាណុ ប្រទេសជប៉ុន ប្រាប់ថា ផ្លែទំពាំងបាយជូរទាំងនេះដូចគ្នានឹងគូជីវិតរបស់លោកដែរ ។ លោកនឹងនាំចេញផ្លែទំពាំងបាយជូរទៅកាន់ប្រទេសថៃ និងហុងកុង ខណៈផ្លែឈើជប៉ុនទទួលបានការពេញនិយម ប៉ុន្តែពេលទំពាំងបាយជូរម៉ាស់ខាត់ជប៉ុនបានដាក់លក់ គេសង្កេតឃើញមានទំពាំងបាយជូរស្រដៀងគ្នានេះដែរ មកពីប្រទេសកូរ៉េខាងត្បូង និងចិន ដែលបានលក់ក្នុងតម្លៃថោកជាង ។

លោក យូគិ ណាកាមូរ៉ាក់ ម្ចាស់ចម្ការទំពាំងបាយជូរនិយាយថា ៖ «ទិន្នផលផលិតរបស់យើងបានកើនឡើងខ្ពស់ ហើយខ្ញុំបារម្ភពីការនាំចេញ ។ មិនថាយើងបានព្យាយាមយ៉ាងណា តែទិន្នផលរបស់យើងពិបាកលក់ បើមានទំពាំងបាយជូរពូជម៉ាស់ខាត់ចិនប្រជែងជាមួយយើង» ។

សារព័ត៌មាន AFP បានរាយការណ៍តាមប្រភពពីរដ្ឋាភិបាលជប៉ុនថា ប្រទេសចិន និងកូរ៉េខាងត្បូងបានយកគ្រាប់ពូជទំពាំងបាយជូរពីជប៉ុនទៅពង្រីកពូជនៅប្រទេសពួកគេ ទើបធ្វើឱ្យមានទំពាំងបាយជូរមានរូបរាង និងរសជាតិស្រដៀងគ្នាជាមួយទំពាំងបាយជូរម៉ាស់ខាត់ជប៉ុន ។ ហេតុនេះ ទំពាំងបាយជូរម៉ាស់ខាត់របស់ជប៉ុន, ចិន និងកូរ៉េខាងត្បូង បានប្រកួតប្រជែងគ្នាខ្លាំងនៅលើទីផ្សារ ។

ចំណែកម្ចាស់ហាងលក់ផ្លែឈើនៅហុងកុងនិយាយថា អតិថិជនតែងផ្តោតលើតម្លៃជានិច្ច ហើយទំពាំងបាយជូរម៉ាស់ខាត់ជប៉ុន មានតម្លៃថ្លៃជាងទំពាំងបាយជូរចិន រហូតដល់៣ដងឯណោះ ។ បើទោះជាវាមានរូបរាងស្រដៀងគ្នា តែរសជាតិមិនដូចគ្នាទេ ។ អ្នកស្រី Sau ម្ចាស់ហាងលក់ផ្លែឈើនៅហុងកុងនិយាយថា ៖ «អ្នកអាចប្រាប់ពីភាពខុសគ្នាបាន បើយកវាមកប្រៀបធៀបគ្នា ។ អ្នកខ្លះធ្លាប់ទទួលទានទំពាំងបាយជូរជប៉ុន ពួកគេនៅតែនិយមទំពាំងបាយជូរជប៉ុនដូចមុន ។ រីឯអ្នកផ្សេងទៀតបានទិញទំពាំងបាយជូរចិន ព្រោះមានតម្លៃថោកជាង» ។

ទោះយ៉ាងណា ប្រទេសជប៉ុនមិនអាចហាមឃាត់ចិន និងកូរ៉េខាងត្បូង កុំឱ្យដាំដុះទំពាំងបាយជូរពូជម៉ាស់ខាត់បានទេ ព្រោះជប៉ុនបរាជ័យក្នុងការចុះឈ្មោះបញ្ជាក់កម្មសិទ្ធិពូជទំពាំងបាយជូរនៅក្រៅប្រទេសរយៈពេល៦ឆ្នាំ ។ រីឯក្រសួងកសិកម្មកូរ៉េខាងត្បូងបានបញ្ជាក់ទៅកាន់សារព័ត៌មាន AFP ថា កូរ៉េខាងត្បូងអាចដាំទំពាំងបាយជូរម៉ាស់ខាត់ និងលក់បានដោយគ្មានលក្ខខណ្ឌកំណត់ ។ ប៉ុន្តែប្រទេសចិនវិញមិនបាននិយាយអ្វីទេ ពាក់ព័ន្ធនឹងករណីនេះ ។

ក្រសួងកសិកម្មជប៉ុនទទួលស្គាល់ថា ជប៉ុនបានបរាជ័យក្នុងការចុះកម្មសិទ្ធិផ្លែស្តប័ររី, ឈឺរី និងក្រូចពូជថ្មី ដែលមានដើមកំណើតនៅជប៉ុន ប៉ុន្តែគេប្រទះឃើញផ្លែឈើទាំងនេះមាននៅប្រទេសចិន កូរ៉េខាងត្បូង និងអូស្ត្រាលី ។ ជប៉ុនបានអភិវឌ្ឍន៍ពូជផ្លែឈើតាំងពីឆ្នាំ១៩២០ មក ហើយផ្លែឈើ១ប្រភេទដែលល្បីល្បាញនៅលើពិភពលោក គឺផ្លែប៉ោមហ្វូជិ ដែលគេបានដាក់ឈ្មោះតាមភ្នំភ្លើងហ្វូជិ របស់ជប៉ុន ។ ជប៉ុនបានចាប់ផ្តើមកំណត់គោលដៅអភិវឌ្ឍន៍ពូជផ្លែឈើក្នុងប្រទេសរបស់ខ្លួន តាំងពីអំឡុងសង្គ្រាមលោកលើកទី២ មកម៉្លេះ ។

អ្នកស្រាវជ្រាវក្នុងមណ្ឌលស្រាវជ្រាវជប៉ុនបានសាកល្បងដាំពូជផ្លែឈើថ្មីៗជាប្រចាំ ក៏ដូចជាត្រួតពិនិត្យរសជាតិរបស់វាយ៉ាងល្អិតល្អន់ ។ នៅឆ្នាំ២០២០ ប្រទេសជប៉ុនបានរឹតបន្តឹងការគ្រប់គ្រងមិនឱ្យយកគ្រាប់ពូជផ្លែឈើជប៉ុនទៅក្រៅប្រទេស រីឯអ្នកបំពាននឹងទទួលទោសជាប់ពន្ធនាគាររហូតដល់១០ឆ្នាំ និងពិន័យជាប្រាក់ចំនួន១០លានយេន ៕ ប្រភព ៖ TNN World

ប្រទេសចិន៖ ប្រទេសចិនបាននិយាយថាចំនួនភ្ញៀវទេសចរអន្តរជាតិមកទស្សនាបានកើនឡើង ៣៩% ក្នុងរយៈពេលបីថ្ងៃដំបូងនៃខែធ្នូ នៅពេលដែលប្រទេសនេះបានអនុវត្តគោលនយោបាយបន្ធូរបន្ថយទិដ្ឋាការថ្មី។
យោងតាមប្រភពព័តមាន WION បានឱ្យដឹងថា គោលនយោបាយលើកលែងទិដ្ឋាការបានធ្វើឱ្យអ្វីៗកាន់តែងាយស្រួលសម្រាប់ភ្ញៀវទេសចរ និងលើកកម្ពស់វិស័យទេសចរណ៍របស់ប្រទេសចិន។ អ្នកនាំពាក្យលោក Uong Van Ban បាននិយាយថា “នៅពេលអនាគត ក្រសួងការបរទេសនឹងបន្តកែសម្រួលគោលនយោបាយទិដ្ឋាការ ដើម្បីបង្កើតលក្ខខណ្ឌអំណោយផលបន្ថែមទៀតសម្រាប់ការធ្វើដំណើរឆ្លងដែន”។

ដូច្នេះ ក្នុងរយៈពេលបីថ្ងៃដំបូងនៃខែនេះ ភ្ញៀវអន្តរជាតិចំនួន ១៨,០០០ នាក់បានចូលទស្សនាប្រទេសចិន ដែល ៧,០០០ នៃអ្នកទេសចរទាំងនោះមកពីប្រទេសថ្មីដែលគ្មានទិដ្ឋាការ។ លោក Zhu Tian សាស្ត្រាចារ្យនៅសាលាធុរកិច្ចអន្តរជាតិ China Europe International ក្នុងទីក្រុងសៀងហៃ បាននិយាយថា គោលនយោបាយថ្មី “នឹងនាំមកនូវផលប្រយោជន៍ក្នុងរយៈពេលយូរ”។ ម្ចាស់អាជីវកម្មចិនបានសម្តែងសុទិដ្ឋិនិយមចំពោះគោលនយោបាយថ្មីរបស់រដ្ឋាភិបាល ហើយសង្ឃឹមថា “នឹងមានគោលនយោបាយស្រដៀងគ្នាបន្ថែមទៀតនាពេលអនាគត” ។

លោក James Liang សហស្ថាបនិកនៃសេវាកម្មទេសចរណ៍អនឡាញដ៏ធំបំផុតរបស់ប្រទេសចិន Ctrip បាននិយាយថា ការលើកលែងទិដ្ឋាការនឹងមានឥទ្ធិពលក្នុងការលើកកម្ពស់ការនាំចេញសេវាកម្ម ក៏ដូចជាជួយឱ្យសេដ្ឋកិច្ចចិនកាន់តែរីកចម្រើន។ប្រទេសចិនបានចេញគោលនយោបាយលើកលែងទិដ្ឋាការរយៈពេល ១២ ខែសម្រាប់ពលរដ្ឋនៃប្រទេសចំនួន ៥ នៅអឺរ៉ុបរួមមានប្រទេសបារាំង អាល្លឺម៉ង់ អ៊ីតាលី ហូឡង់ អេស្បាញ និងប្រទេសអាស៊ីអាគ្នេយ៍គឺម៉ាឡេស៊ី។

គួរបញ្ជាក់ដែរថា ក្នុងរយៈពេល ៦ ខែដំបូងនៃឆ្នាំនេះ ជនបរទេសបានធ្វើដំណើរចំនួន ៨.៤ លានទៅកាន់ប្រទេសចិនដែលចំនួននេះត្រូវបានចាត់ទុកថា “ទាបពេក” បើប្រៀបធៀបការធ្វើដំណើរចំនួន ៤៨.៨ លានដងក្នុងរយៈពេលដូចគ្នាកាលពីឆ្នាំ ២០១៩។ ដូច្នេះ បន្ថែមពីលើការលើកលែងទិដ្ឋាការ ថ្មីៗនេះ ប្រទេសចិនក៏បានកាត់បន្ថយថ្លៃទិដ្ឋាការទេសចរណ៍ចំនួន ២៥% សម្រាប់ពលរដ្ឋនៃប្រទេសមួយចំនួនទៀត រួមទាំងវៀតណាម ថៃ ជប៉ុន និងហ្វីលីពីន ដើម្បីលើកកម្ពស់វិស័យទេសចរណ៍ផងដែរ៕

តើអ្នកដឹងទេថា ប្រសិនបើអ្នកស្ថិតក្នុងលំហតើរាងកាយរបស់អ្នកទៅជាយ៉ាងណា? នៅពេលដែលមនុស្សស្ថិតក្នុងលំហរាងកាយរបស់មនុស្សនឹងជួបប្រទះនឹងការផ្លាស់ប្តូរមួយចំនួនដូចជា ការបាត់បង់ក្រចក ហើមមុខ ពុកឆ្អឹង និងខ្សោយសាច់ដុំជាដើម ដោយសារតែភាពខុសគ្នារវាងបរិយាកាសផែនដី និងអវកាស។ ដូច្នេះហើយ ខាងក្រោមនេះគឺជាគ្រោះថ្នាក់មួយចំនួនដែលអវកាសយានិកបានជួបប្រទះ៖

១.បាត់បង់ក្រចក៖ យោងតាមស្ថានីយ៍អវកាសអន្តរជាតិ (ISS) និងយានអវកាសជាច្រើនទៀតបានឱ្យដឹងថា នៅពេលដែលអវកាសយានិកដើរលើលំហ អាវអវកាសរបស់ពួកគេក៏ត្រូវបានដាក់សម្ពាធផងដែរ ដើម្បីធានាថាពួកគេមានសុវត្ថិភាព និងមានសុខភាពល្អ។ ទោះជាយ៉ាងណាក៏ដោយ អវកាសយានិកតែងតែជួបប្រទះនឹងការរងរបួសជាច្រើន រួមទាំង onycholysis ដែលជាលក្ខខណ្ឌមួយធ្វើឱ្យបន្ទះក្រចកខាងលើបំបែកចេញពីផ្ទៃក្រចក។ យោងតាម NASA ការរងរបួសដៃគឺជារឿងធម្មតាណាស់ក្នុងចំណោមការហ្វឹកហាត់អវកាសយានិកសម្រាប់សកម្មភាពអវកាស។

២.បាតុភូតនៃការមើលឃើញពន្លឺ៖ ក្នុងអំឡុងពេលកម្មវិធី Apollo អវកាសយានិកជាច្រើនបានរាយការណ៍ថាពួកគេបានឃើញពន្លឺដ៏អាថ៌កំបាំងមួយនៅក្នុងលំហ។ យោងតាមការស្រាវជ្រាវ បានឱ្យដឹងថា ពន្លឺភ្លឹបភ្លែតៗភាគច្រើនជាពណ៌ស និងរាងវែង ដែលជារឿយៗអមដោយអារម្មណ៍នៃចលនា។ ពន្លឺភ្លឹបភ្លែតៗនេះ ត្រូវបានគេជឿថា ជាលទ្ធផលនៃកាំរស្មីលោហធាតុ ឆ្លងកាត់គ្រាប់ភ្នែក របស់អវកាសយានិក ទោះបីជាក្រុមអ្នកស្រាវជ្រាវ មិនទាន់ដឹងពីយន្តការច្បាស់លាស់ក៏ដោយ។ ពន្លឺខ្លះអាចបណ្តាលមកពីអន្តរកម្មអ៊ីយ៉ូដដោយផ្ទាល់នៃកាំរស្មីលោហធាតុជាមួយរីទីណា។

៣.មុខហើម៖ ខណៈពេលដែលនៅលើផែនដី ទំនាញបណ្តាលឱ្យសារធាតុរាវភាគច្រើនរបស់រាងកាយត្រូវបានចែកចាយនៅក្រោមបេះដូង។ ផ្ទុយទៅវិញ បរិយាកាសទំនាញតិចក្នុងលំហ អនុញ្ញាតឱ្យសារធាតុរាវក្នុងខ្លួនបំបែកខ្លួនកាន់តែស្មើគ្នា។ ដូច្នេះនៅពេលដែលអវកាសយានិកហោះហើរទៅកាន់ទីអវកាសជាលើកដំបូង ពួកគេនឹងមានអារម្មណ៍ដូចជាត្រជាក់ ហើយមុខរបស់ពួកគេនឹងហើម ប៉ុន្តែនេះមានរយៈពេលតែពីរបីថ្ងៃប៉ុណ្ណោះ។

៤.ខ្សោយសាច់ដុំ៖ យោងតាមអវកាសយានិក Scott Kelly បាននិយាយថា ដោយសារតែនៅលើលំហយើងមិនបានដើរជាញឹកញាប់ ដូច្នេះបាតជើងរបស់យើងនឹងប្រែជាទន់ដូចជើងទារកទើបនឹងកើត។ រីឯផ្នែកខាងលើនៃជើងរបស់យើងវិញគឺគ្រើមដូចស្បែកក្រពើ ព្រោះយើងប្រើមនុស្សយន្តដើម្បីដើរជុំវិញស្ថានីយអវកាសដោយប្រើគ្រាប់រំកិលតែប៉ុណ្ណោះ។

៥.ពុកឆ្អឹង៖ ការរស់នៅលើស្ថានីយ៍ ISS រយៈពេលយូរអាចបណ្តាលឱ្យរាងកាយបាត់បង់ម៉ាសសាច់ដុំ និងជាលិកាឆ្អឹង ដោយសារតែសាច់ដុំគ្រោងឆ្អឹងមិនត្រូវការទ្រទ្រង់ទម្ងន់នៅក្នុងបរិយាកាសមីក្រូទំនាញ។ ហេតុនេះ ដើម្បីកាត់បន្ថយផលប៉ះពាល់ និងរក្សាសមត្ថភាពដើរនៅពេលត្រឡប់មកផែនដីវិញ អវកាសយានិកត្រូវធ្វើលំហាត់ប្រាណជាប្រចាំ ដូចជាការប្រើម៉ាស៊ីនហាត់ប្រាណជាដើម។ បន្ទាប់ពីត្រលប់មកផែនដីវិញ ពួកគេត្រូវទៅហាត់ប្រាណមួយសន្ទុះ ដើម្បីទទួលបានម៉ាសសាច់ដុំដែលបាត់បង់របស់ពួកគេឡើងវិញ៕

ប្រទេសជប៉ុន ៖ យោងតាមសារព័ត៌មានបរទេសបានចេញផ្សាយ កាលពីថ្ងៃទី១១ ខែធ្នូ ឆ្នាំ២០២៣ ថា អាជ្ញាធរប្រចាំតំបន់ Shibuya ស្ថិតក្នុងទីក្រុងតូក្យូ បានចេញបម្រាមហាមពលរដ្ឋរៀបចំកម្មវិធីឆ្លងឆ្នាំ «Countdown» និងផឹកគ្រឿងស្រវឹងក្នុងតំបន់នេះ ។ អាជ្ញាធរបានប្រកាសបម្រាមនេះដោយសារបារម្ភថា នឹងមានមនុស្សមកចូលរួមក្នុងពិធីនេះច្រើនពេក រហូតដល់កើតគ្រោះថ្នាក់ ។

Shibuya គឺជាតំបន់ទេសចរណ៍ដ៏ល្បីល្បាញមួយនៅទីក្រុងតូក្យូ ប្រទេសជប៉ុន ហើយក្នុងអំឡុងពេលមានពិធីបុណ្យផ្សេងៗ តែងមានមនុស្សម្នាជាច្រើននាក់មកប្រមូលផ្តុំគ្នានៅទីនេះ ប៉ុន្តែមួយរយៈចុងក្រោយ អាជ្ញាធរចាប់ផ្តើមបារម្ភពីសុវត្ថិភាព ដោយសារមានមនុស្សមកប្រមូលផ្តុំគ្នាច្រើនដើម្បីចូលរួមកម្មវិធីឆ្លងឆ្នាំ ទើបអាជ្ញាធរចេញបម្រាមហាមពលររដ្ឋ រួមទាំងភ្ញៀវទេសចរមកឆ្លងឆ្នាំនៅទីនេះ ។ អាជ្ញាធរជប៉ុនប្រកាសថា ហាមពលរដ្ឋទាំងអស់មកប្រមូលផ្តុំគ្នាដើម្បីឆ្លងឆ្នាំ «Countdown» នៅតំបន់ Shibuya ដើម្បីការពារគ្រោះថ្នាក់ផ្សេងៗដែលអាចកើតឡើង ។

នៅថ្ងៃទី៣១ ខែធ្នូ ឆ្នាំ២០២៣ អាជ្ញាធរប្រចាំតំបន់ Shibuya បានហាមពលរដ្ឋទាំងអស់ផឹកគ្រឿងស្រវឹង គិតចាប់ពីម៉ោង៦ល្ងាច ថ្ងៃទី៣១ ខែធ្នូ ឆ្នាំ២០២៣ រហូតដល់ម៉ោង៥ល្ងាច ថ្ងៃទី១ ខែមករា ឆ្នាំ២០២៤ ។ លើសពីនេះ អាជ្ញាធរនឹងសុំការសហការពីហាងលក់ទំនិញនានានៅតំបន់ Shibuya ផងដែរ ដើម្បីកុំឱ្យពួកគេលក់គ្រឿងស្រវឹងក្នុងពេលអាជ្ញាធរកំណត់ ព្រមទាំងបង្កើនកម្លាំងប៉ូលិសគ្រប់គ្រងសណ្តាប់ធ្នាប់សាធារណៈ ។

នៅឆ្នាំ២០២៣ អាជ្ញាធរប្រចាំតំបន់ Shibuya ក៏បានសម្រេចចិត្តលុបចោលកម្មវិធីឆ្លងឆ្នាំ ខណៈកន្លងមក គេបានរៀបចំកម្មវិធីនេះនៅខាងមុខស្ថានីយរថភ្លើង ។ អាជ្ញាធរអះអាងថា យើងត្រូវការពារសុវត្ថិភាពទូទៅ ហើយបើមានពលរដ្ឋមកប្រមូលផ្តុំគ្នាឆ្លងឆ្នាំនៅទីនេះ យើងគ្មានកម្លាំងប៉ូលិសគ្រប់គ្រាន់ដើម្បីការពារសុវត្ថិភាពពួកគេទេ ។

អាជ្ញាធរបញ្ជាក់ថា បើអ្នកណាចង់ទៅតំបន់ Shibuya ដើម្បីថតរូបភាពស្អាតៗនៅផ្លូវបំបែកជា៥ នៅថ្ងៃចុងក្រោយបង្អស់នៃឆ្នាំ២០២៣ ត្រូវប្រញាប់ប្រញាល់បន្តិច ។ អាជ្ញាធរបានស្នើឱ្យហាងលក់ទំនិញនៅផ្លូវបំបែកជា៥ បិទភ្លើងទាំងអស់ ដើម្បីការពារកុំឱ្យពលរដ្ឋមកប្រមូលផ្តុំគ្នានៅតំបន់នេះក្នុងអំឡុងពេលរាប់ថយក្រោយ (Countdown) ៕ ប្រភព ៖ Bangkok biznews

ប្រទេសម៉ិកស៊ិក ៖ នៅដើមខែធ្នូ ឆ្នាំ២០២៣ សារព័ត៌មានបរទេសចុះផ្សាយថា មានមេអំបៅរាប់លានក្បាលបានមកទំនៅតាមដើមឈើនានាក្នុងដែនជម្រកសត្វព្រៃនៅប្រទេសម៉ិកស៊ិក ដោយសារពួកវាគេចពីអាកាសធាតុត្រជាក់ខ្លាំងនៅប្រទេសកាណាដា និងសហរដ្ឋអាមេរិក ។ ហេតុនេះ ប្រទេសម៉ិកស៊ិកបានក្លាយទៅជាជម្រកដ៏កក់ក្តៅរបស់មេអំបៅទាំងនេះ ។

ចំនួនមេអំបៅរាប់លានក្បាលបានធ្វើឱ្យភ្ញៀវទេសចរផ្សេងៗ ដែលមកកម្សាន្តនៅទីក្រុង Cerro Prieto ស្ថិតក្នុងរដ្ឋ Michoacan (ភាគកណ្តាលប្រទេសម៉ិកស៊ិក) សប្បាយរីករាយយ៉ាងខ្លាំង ដោយសារវាជាទិដ្ឋភាពមួយប្លែកភ្នែក និងស្រស់ស្អាតតាមបែបធម្មជាតិ ។ គេសង្កេតឃើញថា ជារៀងរាល់ឆ្នាំ ហ្វូងមេអំបៅនឹងផ្លាស់ប្តូរជម្រករបស់ពួកវា ដោយធ្វើដំណើរក្នុងចម្ងាយផ្លូវរហូតដល់ជាង៣.០០០គីឡូម៉ែត្រពីភាគខាងកើតសហរដ្ឋអាមេរិក និងកាណាដា មករស់នៅតាមព្រៃជាច្រើនកន្លែងនៅភាគកណ្តាល និងខាងលិចប្រទេសម៉ិកស៊ិក ដើម្បីគេចពីអាកាសធាតុត្រជាក់ខ្លាំង ។

ទោះយ៉ាងណា ការធ្វើដំណើរក្នុងផ្លូវដ៏វែងឆ្ងាយលើកនេះ មិនមែនជារឿងងាយស្រួលប៉ុន្មានទេ សម្រាប់មេអំបៅតូចៗ ។ រីឯអ្នកវិទ្យាសាស្ត្រយល់ឃើញថា ចំនួនមេអំបៅបានធ្លាក់ចុះជាបន្តបន្ទាប់ បើគិតចាប់តាំងពីដើមឆ្នាំ១៩៩០ មក ដោយសារការបម្រែបម្រួលអាកាសធាតុ និងការពង្រីកទីក្រុងកាន់តែច្រើន ។ បើតាមរបាយការណ៍របស់ភ្នាក់ងារអន្តរជាតិផ្នែកអភិរក្សធម្មជាតិបង្ហាញថា ចំនួនមេអំបៅទាំងនេះងាយរងគ្រោះថ្នាក់ និងជិតផុតពូជពីផែនដីហើយ ៕ ប្រភព ៖ TNN World