រោគសញ្ញា ៦ យ៉ាងបង្ហាញថាអ្នកមានផ្ទៃពោះ ដែលស្ត្រីទើបតែរៀបការថ្មីថ្មោងគួរតែដឹង

សម្រាប់ស្ត្រីដែលទើបតែរៀបការថ្មីថ្មោង ច្បាស់ណាស់ប្រាកដជាមិនដឹងថាខ្លួនមានផ្ទៃពោះនោះទេ ព្រោះរោគសញ្ញានៃការមានផ្ទៃពោះដំបូង គឺមានអាការ:ធម្មតាណាស់ ដែលគ្រប់គ្នាស្ទើរតែមិនដឹង។ ទោះជាយ៉ាងណា ប្រសិនបើអ្នកមានរោគសញ្ញា ៦ យ៉ាងនេះ កើតឡើងនោះមានន័យថា អ្នកនឹងជិតក្លាយជាម្តាយគេហើយ។

១.វដ្តរដូវប្រចាំខែមិនមក៖ វាគឺជារោគសញ្ញានៃការមានផ្ទៃពោះទូទៅបំផុត។ ជាធម្មតាស្ត្រីនឹងមករដូវរៀងរាល់ ២១-៣៥ ថ្ងៃម្តង ប៉ុន្តែប្រសិនបើរដូវរបស់អ្នកខកខាន បង្ហាញថាអ្នកអាចមានផ្ទៃពោះ។

២.ក្អួតចង្អោរ៖ រោគសញ្ញានេះជាធម្មតាចាប់ផ្តើមនៅចន្លោះសប្តាហ៍ទី ៤ និងទី ៦ នៃការមានផ្ទៃពោះ ដោយក្អួតចង្អោរជាធម្មតាកើតឡើងនៅពេលព្រឹក។ ប៉ុន្តែរោគសញ្ញានេះក៏អាចកើតឡើងពេញមួយថ្ងៃបានផងដែរ។ ចង្អោរ និងក្អួត គឺបណ្តាលមកពីការផ្លាស់ប្តូរអ័រម៉ូនក្នុងរាងកាយអំឡុងពេលមានផ្ទៃពោះ។

៣.នោមញឹកញាប់៖ រោគសញ្ញានេះជាធម្មតាចាប់ផ្តើមនៅចន្លោះសប្តាហ៍ទី ៤-៦ នៃការមានផ្ទៃពោះ ដោយសារតែបរិមាណឈាមកើនឡើង ធ្វើឱ្យតម្រងនោមត្រូវធ្វើការកាន់តែខ្លាំង និងផលិតទឹកនោមកាន់តែច្រើន។

៤.ឈឺក្បាល៖ រោគសញ្ញានេះជាធម្មតាចាប់ផ្តើមនៅចន្លោះសប្តាហ៍ទី ១ និងទី ២ នៃការមានផ្ទៃពោះ។ នេះគឺដោយសារតែកម្រិតនៃអ័រម៉ូន estrogen និង progesterone កើនឡើង បណ្តាលឱ្យសរសៃឈាមពង្រីក និងបណ្តាលឱ្យឈឺក្បាល។

៥.អស់កម្លាំង៖ រោគសញ្ញានេះជាធម្មតាចាប់ផ្តើមនៅចន្លោះសប្តាហ៍ទី ១-២ នៃការមានផ្ទៃពោះ។ នេះគឺដោយសារតែរាងកាយត្រូវការថាមពលបន្ថែម ដើម្បីគាំទ្រដល់ការលូតលាស់របស់ទារក។

៦.ឈឺសុដន់៖ ពេលចាប់ផ្តើមមានផ្ទៃពោះ វានឹងមានការឈឺចាប់ខ្លាំងនៅបរិវេណខាងក្នុងសុដន់ ហើយទំហំនៃសុដន់នឹងរីកធំជាងមុន ជាមួយនឹងសរសៃប៉ោងនៅលើសុដន់ និងមានស្នាមតូចៗលេចឃើញឡើង កើតនៅតំបន់ក្បាលដោះ លើសពីនេះទៀតក្បាលសុដន់មានភាពរសើប ឬស្រៀវជាដើម៕