ពេញមួយឆ្នាំ២០២៣នេះ សម្ព័ន្ធមិត្តធំៗរបស់ BRICS ដែលរួមមានប្រទេសប្រេស៊ីល រុស្សី ឥណ្ឌា ចិន និងអាហ្រ្វិកខាងត្បូង គឺបានចាប់ផ្តើមប្រតិបត្តិការធ្វើឲ្យកក្រើកវិស័យភូមិសាស្រ្តនយោបាយពិភពលោក។ ជាការពិតណាស់ ប្លុកនេះគឺតែងតែមានការជំទាស់ជាហូហែរទាក់ទងទៅនឹងសណ្តាប់ធ្នាប់ពិភពលោក ដែលអាមេរិកបានរៀបចំ។ ក្នុងន័យថា BRICS មានបំណងរួមចំណែកនៅក្នុងការអភិវឌ្ឍទៅវិស័យសេដ្ឋកិច្ចសកលឲ្យបានប្រសើរជាងមុន , របបគំហើញថ្មីៗ និងធានាបាននូរស្ថិរភាពការទូត។

កាលពីពេលកន្លងមកនេះ BRICS គឺតែងតែរិះរកគ្រប់មធ្យោបាយដើម្បីជំរុញគោលដៅ«ពហុប៉ូល» របស់ពួកគេនៅក្នុងប្រព័ន្ធអន្តរជាតិ។ ដូច្នេះហើយ ទាក់ទិនទៅនឹងការវិវត្តនិងកិច្ចសហការណ៍ជាបន្តបន្ទាប់ គឺមានរឿងសំខាន់២ដែល BRICS នឹងបន្តធ្វើដើម្បីឈានដល់ការផ្លាស់ប្តូររូបិយប័ណ្ឌសកល៖

ទស្សនវិស័យរបស់ BRICS គឺបង្កើតឲ្យមានកិច្ចសហប្រតិបត្តិការទ្វេភាគីរវាងចិននិងអាប៊ីសាអូឌីត ដើម្បីរំរុញឲ្យប្រាក់ដុល្លារអាមេរិកចុះខ្សោយជាលំដាប់។ អារ៉ាប់ប៊ីសាអូឌីត គឺជាសម្ព័ន្ធមិត្តតូចមួយនៅក្នុង BRICS ហើយក៏ជាប្រទេសនាំចេញប្រេងដ៏សំខាន់នៅទូទាំងពិភពលោកផងដែរ។ ជាការពិតណាស់ ចិននិងអារ៉ាប់ប៊ីសាអូឌីតគឺបានយល់ព្រមគ្នាដើម្បីផ្លាស់ប្តូររូបីយប័ណ្ឌសកល ដែលជាបេសកម្មជំរុញឲ្យមានការប្រើប្រាស់រូបីយប័ណ្ឌក្នុងស្រុករបស់ខ្លួននៅក្នុងការទិញដូរប្រេង ជៀសជាងប្រើប្រាស់ប្រាក់ដុល្លារអាមេរិក។ ដូច្នេះ វានឹងបន្ថយឥទ្ធិពលប្រាក់ដុល្លារមួយផ្នែកធំទៅលើវិស័យប្រេងកាត ដែលជាហេតុឲ្យប្រាក់នេះចុះខ្សោយបន្តិចម្តងៗនៅទូទាំងសកលលោក។ ទោះជាយ៉ាងណាក៏ដោយ ឥទ្ធិពលនៃការផ្លាស់ប្តូរទីតាំងភូមិសាស្រ្តនយោបាយ ក៏ដូចជាការងាករ៉េរបស់អាប៊ីសាអូឌីតទៅចាប់យកខាងប្លុក BRICS វិញគឺជាចំណុចរសើប ដែលនឹងអាចមានលទ្ធភាពក្នុងការដកប្រាក់ដុល្លារ USA បាន។

ជាមួយនឹង ទំនាក់ទំនងយ៉ាងជិតស្និតរវាងចិននិងអារ៉ាប៊ីសាអូឌីត ក៏បានធ្វើការចុះកិច្ចព្រមព្រៀងទៅលើការផ្លាស់ប្តូររូបីយប័ណ្ឌរយៈពេល៣ឆ្នាំរវាងគ្នា ក្នុងទំហំទឹកប្រាក់សរុបប្រមាណនឹង ៦.៩៣ ពាន់លានដុល្លារ។ ជាងនេះទៅទៀត ការផ្លាស់ប្តូរនេះនឹងធ្វើឲ្យរូបីយប័ណ្ឌចិនទាំងអស់នឹងជួយសម្រួលដល់ប្រជាជាតិទាំង២គឺទាំងចិននិងអារ៉ាប់រួម ក៏ដូចជាបង្កើនបរិមាណ និងលទ្ធភាពនៃការប្រើប្រាស់រូបីយប័ណ្ឌក្នុងស្រុកទាំងអស់នៃតំបន់មជ្ឈិមបូព៌ា។ នៅទីបំផុត វាអាចនឹងមានផលប៉ះពាល់យ៉ាងខ្លាំងដល់ទីផ្សារអន្តរជាតិដែលចរាចរដោយរូបីយប័ណ្ឌដុល្លាររបស់សហរដ្ឋអាមេរិកផងដែរ។

ទោះជាយ៉ាងណាក៏ដោយ ស្ថានការណ៍នេះគឺនៅតែស្ថិតនៅក្នុងភាពស្រពិចស្រពិលនៅឡើយ វាគឺស្ថិតនៅលើកត្តាភូមិសាស្រ្តនយោបាយ និងយុទ្ធសាស្រ្តផ្សេងៗរបស់មហាអំណាចទាំងអស់ ក៏ដូចជាអាមេរិកខំធ្វើយ៉ាងណាដើម្បីរក្សាតុល្យភាពនៃប្រាក់ដុល្លាររបស់ខ្លួនកុំឲ្យបាត់បង់ឥទ្ធិពល ខណៈBRICS វិញក៏ខំព្យាយាមដើម្បីឲ្យរូបីយប័ណ្ឌរបស់ខ្លួនរះឡើងលើឆាកអន្តរជាតិដូចគ្នាផងដែរ៕

ប្រទេសកូរ៉េខាងត្បូង ៖ កាលពីថ្ងៃទី២០ ខែធ្នូ ឆ្នាំ២០២៣ សារព័ត៌មាន Daily Telegraph ប្រទេសអង់គ្លេសបានរាយការណ៍ថា កូនសិស្សកូរ៉េខាងត្បូងចំនួន៣៩នាក់បានដាក់ពាក្យបណ្តឹងតាមផ្លូវច្បាប់ ដើម្បីទាមទារប្រាក់ជំងឺចិត្តចំនួន២០លានវ៉ុនសម្រាប់ពួកគេម្នាក់ៗ ។ ទឹកប្រាក់ចំនួននេះ គឺសម្រាប់ទុកឱ្យពួកគេចាយវាយលើការសិក្សាក្នុង១ឆ្នាំ ដើម្បីប្រឡងចូលសាកលវិទ្យាល័យជាថ្មី ។

ករណីនេះបានកើតឡើងនៅពេលសិស្សទាំងនេះកំពុងតែប្រឡងចូលរៀននៅសាកលវិទ្យាល័យមួយកន្លែង ប៉ុន្តែគ្រូបានប្រាប់ឱ្យពួកគេឈប់ឆ្លើយសំណួរបន្តទៀត ហើយគ្រូក៏បានប្រមូលក្រដាសប្រឡងពីពួកគេ មុនពេលកំណត់៩០វិនាទី ។

មេធាវីល្បីឈ្មោះម្នាក់ដែលធ្វើជាអ្នកតំណាងឱ្យសិស្ស បានលើកឡើងអំពីកំហុសឆ្គងរបស់គ្រូ ដោយសារបានប្រកាសឱ្យការប្រឡងត្រូវបញ្ចប់មុនពេលវេលា ។ ហេតុនេះ វាធ្វើឱ្យសិស្សក្នុងសាលាមួយនៅទីក្រុងសេអ៊ូល ទទួលបានពិន្ទុមិនល្អ ។ កំហុសឆ្គងរបស់គ្រូបានកើតឡើងក្នុងពេលសិស្សកំពុងតែប្រឡងមុខវិជ្ជាភាសាកូរ៉េ ដែលជាមុខវិជ្ជាដំបូងក្នុងថ្ងៃប្រឡង ។

សារព័ត៌មាន Yonhap រាយការណ៍ថា ក្រោយពីបានទទួលស្គាល់កំហុសនេះ ខាងសាលារៀនក៏បានចែកប្រដាសប្រឡងឱ្យសិស្សវិញនៅពេលអាហារថ្ងៃត្រង់ ហើយសាលារៀនក៏អនុញ្ញាតឱ្យពួកគេប្រឡងបន្តទៀតរយៈពេល៩០វិនាទី ។ ប៉ុន្តែសាលាមិនអនុញ្ញាតឱ្យពួកគេផ្លាស់ប្តូរចម្លើយរបស់ខ្លួន ដែលបានឆ្លើយកាលពីពេលមុនទេ ។

ករណីនេះស្រដៀងគ្នានឹងករណីមួយដែលបានកើតឡើងកាលពីឆ្នាំ២០២០ នៅពេលសិស្សកូរ៉េខាងត្បូងរៀននៅសាលារៀនស្ត្រី ព្រមទាំងអាណាព្យាបាលពួកគេបានដាក់ពាក្យបណ្តឹងប្រឆាំងនឹងរដ្ឋាភិបាល ដោយសារការប្រមូលក្រដាសប្រឡងមុនពេលកំណត់៣នាទី ។ វាជារឿងមួយគួរឱ្យចាប់អារម្មណ៍ ពីព្រោះក្រុមសិស្សស្រីបានឈ្នះក្តីនៅពេលនោះ ហើយតុលាការឧទ្ធរណ៍កូរ៉េខាងត្បូងបានកាត់ក្តីឱ្យរដ្ឋាភិបាលសងប្រាក់ទៅក្មេងៗ ប្រមាណ៧លានវ៉ុនក្នុងម្នាក់ ៕

ប្រភព ៖ mgronline

ជប៉ុន៖ រោងចក្រ DAIHATSU ដែលបានបង្កើតឡើងដោយក្រមហ៊ុន Toyota នឹងបញ្ឈប់ការនាំចេញរថយន្តទាំងអស់របស់ខ្លួន សម្រាប់ទីផ្សារទាំងក្នុង និងក្រៅប្រទេស បន្ទាប់ពីការធ្វើតេស្តសុវត្ថិភាពមិនប្រក្រតីរបស់រថយន្ត។

យោងតាមគេហទំព័រអន្តរជាតិ The Japan Times ដែលបានរាយការណ៍នៅថ្ងៃទី២០ ខែធ្នូថា ក្រុមហ៊ុនរថយន្តធំជាងគេរបស់ប្រទេសជប៉ុន Toyota បាននិយាយថា ក្រុមហ៊ុនបុត្រសម្ព័ន្ធរបស់ខ្លួនម៉ាក Daihatsu នឹងបញ្ឈប់រាល់សកម្មភាពអស់នៃការនាំចេញរថយន្តនៅទូទាំងពិភពលោក ដោយសារការរកឃើញបញ្ហារឿងអាស្រូវសុវត្ថិភាពជាមួយនឹងរថយន្តចំនួន ៦៤ ម៉ូដែលរួមទាំងរថយន្តជិត ២០ ដែលត្រូវបានលក់ក្រោមម៉ាកយីហោ Toyota។

រោងចក្រ Daihatsu បានសារភាពថា ខ្លួនបានកែប្រែផ្នែកខាងក្នុងនៃទ្វាររថយន្តនៃម៉ូដែលទាំងអស់ ដោយបំបែកទៅជាទម្រង់មុតស្រួចដែលអាចបង្ករបួសដល់មនុស្សនៅក្នុងរថយន្ត ហើយខ្លួនក៏បានផ្លាស់ប្តូរគ្រឿងបន្លាស់តិចតួចនៅផ្នែកចំហៀងនៃរថយន្តផងដែរ។ ដូច្នេះរថយន្ត Toyota Vios និង Perodua Axia សរុបចំនួន ៨៨,០០០ គ្រឿងសុទ្ធតែត្រូវបានជាប់ពាក់ព័ន្ធនឹងសុវត្ថិភាពក្លែងបន្លំ។
ទោះជាយ៉ាងណាក៏ដោយ ការក្លែងបន្លំការធ្វើតេស្តសុវត្ថិភាពហាក់ដូចជាមានផលវិបាកធ្ងន់ធ្ងរជាងការវាយតម្លៃដំបូងឆ្ងាយណាស់ ក៏ដូចជាអាចធ្វើឱ្យខូចកេរ្តិ៍ឈ្មោះចំពោះគុណភាព និងសុវត្ថិភាពនៃម៉ាកយីហោជប៉ុនផងដែរ។

Daihatsu គឺជាក្រុមហ៊ុនបុត្រសម្ព័ន្ធរថយន្តតូចមួយរបស់ Toyota នឹងផលិតរថយន្តម៉ូដែល Keicar មួយចំនួនដែលមានការពេញនិយមខ្លាំងនៅប្រទេសជប៉ុន។ រឿងអាស្រូវខាងលើក៏បានប៉ះពាល់ដល់ម៉ូដែល Mazda និង Subaru មួយចំនួនដែលលក់ក្នុងទីផ្សារក្នុងស្រុក ក៏ដូចជាម៉ូដែល Toyota និង Daihatsu មួយចំនួននៅក្នុងទីផ្សារបរទេសផងដែរ ដោយសារបញ្ហាទាក់ទងនឹងដំណើរការកិច្ចសហប្រតិបត្តិការអភិវឌ្ឍន៍។

យោងតាមព័ត៌មានពីក្រុមហ៊ុន Daihatsu ក្នុងសន្និសីទសារព័ត៌មាន ក៏បានឱ្យដឹងទៀតថា បច្ចុប្បន្នការដឹកជញ្ជូនរថយន្តទៅកាន់ទីផ្សារបរទេសអាចនឹងត្រូវផ្អាកចាប់ពីពេលនេះតទៅ រហូតដល់រថយន្តត្រូវបានអនុញ្ញាតដោយនិយតករដើម្បីលក់បន្ត។

គួរបញ្ជាក់ដែរថា ម៉ូដែលរថយន្តដែលជាប់ពាក់ព័ន្ធក្នុងរឿងអាស្រូវនេះ គឺភាគច្រើនមាននៅលើទីផ្សារអាស៊ាន ក៏ដូចជាមានលក់ក្នុងប្រទេសមួយចំនួនដូចជា ថៃ ឥណ្ឌូនេស៊ី ម៉ាឡេស៊ី កម្ពុជា និងវៀតណាមផងដែរ ព្រមទាំងអាមេរិកកណ្តាល និងខាងត្បូង ជាមួយនឹងម៉ិកស៊ិក អេក្វាឌ័រ និងប៉េរូ ឈីលី បូលីវី និងអ៊ុយរូហ្គាយទៀតផង៕

ប្រទេសថៃ ៖ ក្រោយពីមានមតិមួយចំនួនរិះគន់ថា ការចូលទស្សនាល្អាង «ណាងណន ឬនាងដេក» នៅខេត្តឈៀងរ៉ាយ ប្រទេសថៃ មានតម្លៃថ្លៃខ្លាំង អាជ្ញាធរឧទ្យានជាតិនេះលើកឡើងថា តម្លៃចូលទស្សនាល្អាង «ណាងណន ឬនាងដេក» ចំនួន៩៥០បាត មិនថ្លៃទេ ។ នៅពេលមានភ្ញៀវទេសចរចូលក្នុងល្អាងម្តងៗ ត្រូវមានភ្នាក់ងារចំនួន៥នាក់ចូលទៅតាមដែរ ដើម្បីការពារសុវត្ថិភាពភ្ញៀវទេសចរ ដោយសារក្នុងល្អាងមានគ្រោះថ្នាក់ ។

លោក ឈុតដេត កុមណុបឆានុត ប្រធានគ្រប់គ្រងតំបន់អភិរក្សទី១៥ បានធ្វើសេចក្តីថ្លែងការណ៍មួយ ស្តីពីតម្លៃចូលទស្សនាល្អាង «ណាងណន ឬនាងដេក» គឺស្មើនឹង៩៥០បាត សម្រាប់ជនជាតិថៃ រីឯជនបរទេស ស្មើនឹង១.៥០០បាត ។ លោកលើកឡើងថា ជាធម្មតា ភ្ញៀវទេសចរអាចចូលទស្សនាក្នុងល្អាងនេះដោយពុំគិតថ្លៃ គឺចាប់ពីមាត់ល្អាងទៅដល់ចំណុចទី១ ដែលមានចម្ងាយផ្លូវប្រមាណ២០០ម៉ែត្រ ។

ចំណែកការចូលទស្សនាក្នុងល្អាង រហូតដល់ចំណុចទី២ និងទី៣ គឺត្រូវធ្វើដំណើរផ្លូវឆ្ងាយ ហើយអាជ្ញាធរត្រូវចាត់កម្លាំងឱ្យជួយការពារសុវត្ថិភាពភ្ញៀវទេសចរយ៉ាងពិសេស ។ ហេតុនេះ ត្រូវមានអ្នកជំនាញ ភ្នាក់ងារសង្គ្រោះបន្ទាន់ និងអ្នកដើរនាំផ្លូវផងដែរ ហើយសរុបមានភ្នាក់ងារចំនួន៥នាក់ ដែលត្រូវដើរចូលល្អាងជាមួយភ្ញៀវទេសចរ ។

អាជ្ញាធរបានកំណត់ចំនួនភ្ញៀវទេសចរចូលក្នុងល្អាង១លើក មិនលើសពី១០នាក់ទេ ហើយមិនលើស២លើក ក្នុង១ថ្ងៃ ។ ការកំណត់បែបនេះ ដើម្បីការពារសុវត្ថិភាព ព្រោះនៅក្នុងល្អាងមានគ្រោះថ្នាក់ ហើយអាជ្ញាធរត្រូវការពារសុវត្ថិភាពឱ្យភ្ញៀវទេសចរយ៉ាងពិសេស ។ ហេតុនេះ តម្លៃចូលក្នុងល្អាងចំនួន៩៥០បាតក្នុងម្នាក់ មិនថ្លៃទេ ព្រោះត្រូវយកប្រាក់ចំនួន៥០០ មកផ្តល់ឱ្យភ្នាក់ងារចំនួន៥នាក់ ។

ចំណែកប្រាក់ចំនួន១៥០បាត នឹងបញ្ចូលក្នុងមូលនិធិអ្នកការពារព្រៃឈើ និងអាជ្ញាធរឧទ្យានជាតិរងរបួស និងស្លា.ប់ ។ រីឯប្រាក់ចំនួន៣០០បាតទៀត នឹងដាក់បញ្ចូលក្នុងមូលនិធិសុខុមាលភាពល្អាង ក្នុងនោះមានការជួសជុលឧបករណ៍ក្នុងល្អាង និងក្រៅល្អាង ។ អាជ្ញាធរបញ្ជាក់ថា មានភ្ញៀវទេសចរបរទេសបានទំនាក់ទំនងសុំចូលក្នុងល្អាងរួចហើយ ដោយពួកគេមិនបារម្ភរឿងតម្លៃទេ ព្រោះវាថោកសម្រាប់ភ្ញៀវទេសចរបរទេស ។

លោក ឈុតដេត កុមណុបឆានុត ប្រធានគ្រប់គ្រងតំបន់អភិរក្សទី១៥ លើកឡើងថា ៖ «ចាប់ពីមាត់ល្អាងណាងណន រហូតដល់ចំណុចទី១ ភ្ញៀវទេសចរអាចចូលទស្សនាបានតាមធម្មតា មិនចាំបាច់ចំណាយប្រាក់ទេ ។ ដូចគ្នានេះ ពួកគេក៏អាចដើរលេងនៅខាងក្រៅល្អាងបានដូចគ្នា ។ ឧទ្យានជាតិ «ណាងណន» និងឧទ្យានជាតិនៅទូទាំងខេត្តឈៀងរ៉ាយ និងផាយ៉ៅ ក៏ដូចជាឧទ្យានជាតិនៅទូទាំងប្រទេសថៃ នឹងរីករាយស្វាគមន៍ទទួលភ្ញៀវទេសចរគ្រប់រូប» ។

គួរបញ្ជាក់ថា កាលពីប៉ុន្មានឆ្នាំមុននេះ ល្អាង «ណាងណន ឬនាងដេក» ធ្លាប់មានប្រវត្តិល្បីល្បាញនៅទូទាំងពិភពលោក ករណីមានហេតុការណ៍ក្មេងៗចំនួន១៣នាក់បានបាត់ខ្លួននៅក្នុងល្អាងអស់ជាច្រើនថ្ងៃ ។ ក្រោយមក ក្រុមអាជ្ញាធរបានជួយសង្គ្រោះពួកគេចេញមកក្រៅវិញដោយសុវត្ថិភាព ៕ ប្រភព ៖ Chiang Mai News

Katie MacRae គឺត្រូវបានគេស្គាល់ជាស្រ្តីវ័យចំណាស់មួយរូប ដែលកាលពីខែមុននេះបានប្រារព្ធខួបកំណើតក្នុងវ័យ ១០៦ឆ្នាំរបស់នាង ហើយវាពិតជាធ្វើឲ្យមនុស្សគ្រប់គ្នាភ្ញាក់ផ្អើលយ៉ាងខ្លាំងបន្ទាប់ពីស្រ្តីរូបនេះបានទម្លាយនូវរឿងរ៉ាវសាមញ្ញៗ៤យ៉ាងនេះសោះ បានធ្វើឲ្យនាងរឹងមាំនិងអាយុវែង។

ដូនចាស់ Katie MacRae កើតនៅចក្រភពអង់គ្លេសក្នុងឆ្នាំ១៩១៧ ខណៈអំឡុងពេលកំពុងផ្ទុះសង្គ្រាមលោកលើកទី១។ បន្ទាប់ពីនាងបានឈប់រៀននៅអាយុ១៥ឆ្នាំ ក៏បានធ្វើការជាលេខានៅស្ថាប័នមួយចំនួនជាហូរហែរ។ នាងនិងស្វាមីក៏បានផ្លាស់ទីលំនៅទៅប្រទេសអូស្រ្តាលីវិញនៅក្នុងឆ្នាំ១៩៦៥ ហើយក៏រស់នៅទីនោះរហូតនៅដល់បច្ចុប្បន្ននេះ។ បន្ទាប់ពីនាងត្រូវបានប្តីស្លា.ប់ចោល ក៏បានទៅរស់នៅក្នុងមណ្ឌលចាស់ជរា ហើយកាលពីពេលថ្មីៗនេះខាងមណ្ឌលក៏បានរៀបចំពិធីខួបកំណើតសម្រាប់អ្នកដែលរស់នៅបានជាង១០០ឆ្នាំដូចជារូបនាង ក៏ដូចជាឲ្យរៀបរាប់ពីរឿងរ៉ាវនៃជីវិតផ្សេងៗ។

នាងក៏បានប្រាប់មកកាន់គេហទំព័រ Business Insider ថា « ដំបូន្មានរបស់ខ្ញុំទៅកាន់មនុស្សគ្រប់គ្នាគឺត្រូវតែរស់នៅដោយបំពេញតម្រូវការខ្លួនឯង ព្រមជាមួយនឹងស្នាមញញឹម និងរីករាយជាមួយនឹងអ្វីដែលចូលមកនៅក្នុងឆាកជីវិត។ ជាមួយគ្នានេះនាងក៏បានចែករំលែកទម្លាប់៤យ៉ាងដែលនាងតែងតែធ្វើជាប្រចាំ។

១ ថែសួនពេញមួយជីវិតរបស់នាង ៖ MacRae បាននិយាយថា “ខ្ញុំចូលចិត្តថែសួន ហើយតែងតែធ្វើតាំងពីខ្ញុំនៅតូចមកម្ល៉េះ”។ នាងក៏បានចូលរួមការប្រកួតប្រជែងធ្វើសួនច្បារតាមដងផ្លូវ ហើយយើងបានឈ្នះរង្វាន់នៅពេលនាងមានអាយុ ១២ ឬ ១៣ ឆ្នាំផងដែរ។ នាងបានបន្តធ្វើសួនច្បារពេញមួយជីវិតរបស់នាង រួមទាំងការដាំរុក្ខជាតិ “ទាំងអស់” នៅមជ្ឈមណ្ឌលចាស់ជរារបស់នាង និងបានឈ្នះការប្រកួតប្រជែង “Best in Grow” ទៀតផង ។ បើយោងទៅលើអ្នកស្រាវជ្រាវម្នាក់ក៏បាននិយាយដែរថា ការថែសួន និងដាំដំណាំផ្សេងៗ វាក៏ជាលំហាត់ប្រាណមួយដែរ មិនត្រឹមតែវាផ្តល់នូវបន្លែធម្មជាតិស្រស់ៗញ៉ាំជាប្រចាំនោះទេ ក៏បានឲ្យសរីរាង្គកាយរបស់យើងទទួលបានវីតាមីន D ពីពន្លឺព្រះអាទិត្យទៀតផង។

២ លេងប៊ូល៖ MacRae គឺនិយមលេងប៊ូលពេញមួយជីវិតបស់នាង ហើយថ្មីៗនេះក៏មានការប្រកួតប៊ូលនៅមណ្ឌលរបស់នាងផងដែរ។ នាងតែងតែលេងវាជាប្រចាំជាមួយនឹងមិត្តចាស់ៗរបស់នាង ហើយនាងបាននិយាយថា៖ «សូម្បីតែអ្នកដើរមិនបាន (ជិះរទេះរុញ)ក៏អាចលេងល្បែងនេះយ៉ាងសប្បាយរីករាយបានដែរ។ ការស្រាវជ្រាវផ្សេងៗបានលើកឡើងថា ការធ្វើលំហាត់ប្រាណជាទៀងទាត់គឺជាគន្លឹះសម្រាប់បង្កើនឲ្យយើងមានសុខភាពល្អ ដោយពុំចាំបាច់ទៅកន្លែងហាត់ប្រាណនោះទេ។ តាមពិត មនុស្សចាស់មួយចំនួនមិនទៅកន្លែងហាត់ប្រាណដោយផ្ទាល់នោះទេ ជំនួសវិញដោយពួកគេដើរច្រើន ឡើងជណ្តើរ និងលេងកីឡាសាមញ្ញផ្សេងៗ ក៏វាដូចគ្នាទៅនឹងការហាត់ប្រាណ ថែមទាំងធ្វើឲ្យរីករាយកាន់តែច្រើនឡើងទៀតផង។

៣ ធ្វើការនិងធ្វើឲ្យខ្លួនឯងរវល់ជានិច្ច៖ MacRae បានធ្វើការជាលេខាស្ទើរតែពេញមួយឆាកជីវិតរបស់នាង ទាំងនៅក្នុងចក្រភពអង់គ្លេស និងអូស្ត្រាលី គឺមានន័យថានាងមិនដែលទុកឲ្យខ្លួនឯងទំនេរចោលនោះទេ។ យោងទៅតាមគេហទំព័រ BI បានលើកឡើងដែរថា ភាពសកម្មនៃខួរក្បាល ត្រូវបានគេទទួលស្គាល់ថាជាវិធីមួយដែលអាចរស់នៅបានយូរ ព្រោះវាស្រដៀងគ្នាទៅនឹងការធ្វើលំហាត់ប្រាណ ព្រមជាមួយនឹងការទទួលទានរបបអាហារល្អៗ។

៤ ត្រូវតែមានស្នាមញញឹមជានិច្ច៖ ដំបូន្មានដ៏ធំបំផុតរបស់ MacRae គឺ “គ្រាន់តែញញឹម សប្បាយចិត្ត និងរីករាយនឹងជីវិត” ដែលនាងតែងតែធ្វើរឿងទាំងនេះទៅកាន់មនុស្សជុំវិញខ្លួនប្រកបដោយសេចក្តីស្រលាញ់ ហើយពិតជាមានសេចក្តីសុខ ហើយកាលណាដែលមានសេចក្តីសុខនឹងបង្កើនអាយុទ្វេដង៕

កូរ៉េខាងត្បូង៖ សិស្សជាង ៩,០០០ នាក់បាននិយាយថា ពួកគេត្រូវបានគេធ្វើបាបនៅក្នុងសាលារៀន ដែលស្មើនឹង ១.៩% នៃអ្នកចូលរួមការស្ទង់មតិតាមអ៊ីនធឺណិត កើនឡើង ០.២% បើប្រៀបធៀបទៅនឹងឆ្នាំមុន។
យោងតាមគេហទំព័រអន្តរជាតិ The Korea Times ដែលបានចេញផ្សាយនៅថ្ងៃទី២០ ខែធ្នូថា សិស្សប្រហែល ១.៩% នៃសិស្សជិត ៤៨៧.០០០ នាក់ ពីថ្នាក់ទី ៤ ដល់ថ្នាក់ទី ១២ ដែលបានស្ទង់មតិបាននិយាយថា ពួកគេត្រូវបានគេធ្វើបាបនៅក្នុងសាលារៀន។ អត្រានេះគឺខ្ពស់ជាងឆ្នាំមុន ០.២% ហើយក៏ជាកម្រិតខ្ពស់បំផុតក្នុងរយៈពេល ១០ ឆ្នាំចុងក្រោយនេះផងដែរ។

ដូច្នេះ បច្ចុប្បន្នអំពើហិង្សាដោយពាក្យសំដីមានចំនួន ៣៧.១% និងអំពើហិង្សាលើរាងកាយមានចំនួន ១៧.៣% រួមទាំងការគំរាមកំហែងមានចំនួន ១៥.១%។ ទោះជាយ៉ាងណាក៏ដោយ អំពើហិង្សាលើរាងកាយបានកើនឡើង ២.៧ ភាគរយបើធៀបនឹងឆ្នាំមុន នេះបើយោងតាមក្រសួងអប់រំកូរ៉េ។ ម៉្យាងវិញទៀត បទពិសោធន៍នៃការគំរាមកំហែងតាមអ៊ីនធឺណិត ដែលបានកើនឡើងកាលពីឆ្នាំមុនបច្ចុប្បន្នបានថយចុះ ២.៦% ខណៈដែលអំពើហិង្សាលើរាងកាយបានកើនឡើងយ៉ាងខ្លាំង។

ទោះជាយ៉ាងណា បច្ចុប្បន្នរដ្ឋាភិបាលកូរ៉េបានបន្ថែមការផាកពិន័យចំពោះអំពើហិង្សាក្នុងសាលា ដូចជាការតម្រូវឱ្យសាលារៀនកត់ត្រាប្រវត្តិរំខានរបស់សិស្សក្នុងរយៈពេល ៤ ឆ្នាំ ជំនួសមកវិញនូវចំនួនពីរដូចពីមុន។ និស្សិតដែលបំពានច្បាប់នឹងមិនមានសិទ្ធិចូលរៀននៅសកលវិទ្យាល័យ ឬពាក្យសុំការងារទេ។ ទិន្នន័យនេះអាចលុបបានលុះត្រាតែមានការយល់ព្រមពីជនរងគ្រោះ។ ទោះជាយ៉ាងណាក៏ដោយ សម្រាប់ជនរងគ្រោះជាច្រើននៃអំពើហិង្សាក្នុងសាលារៀន បាននិយាយថា ការផ្លាស់ប្តូរនេះគឺមិនគ្រប់គ្រាន់នោះទេ។

គួរបញ្ជាក់ដែរថា អំពើហិង្សាក្នុងសាលារៀននៅប្រទេសកូរ៉េខាងត្បូងបានកើតឡើងជារៀងរាល់ឆ្នាំ ដោយតារាល្បីៗជាច្រើននៅកូរ៉េក៏ធ្លាប់បាត់បង់អាជីពដោយសារការចោទប្រកាន់ទាក់ទងនឹងអំពើហិង្សាក្នុងសាលារៀនផងដែរ៕

ប្រទេសចិន ៖ សារព័ត៌មានចិនរាយការណ៍ថា សាច់ញាតិកូនកំលោះបានចងអៀមចុងភៅឱ្យកូនក្រមុំក្នុងថ្ងៃរៀបអាពាហ៍ពិពាហ៍ និងធ្វើឱ្យភ្ញៀវចូលរួមកម្មវិធី ក៏ដូចជាអ្នកលេងបណ្តាញសង្គមនៅប្រទេសចិនរិះគន់យ៉ាងខ្លាំង ។ មនុស្សមួយចំនួនសួរថា តើនាងរៀបការដើម្បីក្លាយជាអ្នកបម្រើខាងប្រុស មែនទេ? ខណៈអ្នកខ្លះទៀតសួរថា តើនាងរង់ចាំធ្វើការងារក្នុងផ្ទះកូនកំលោះឬ? ប៉ុន្តែអ្នកស្រុកនៅក្បែរនោះប្រញាប់ឆ្លើយថា វាមិនមែនដូចការគិតនោះទេ ។

ពិធីអាពាហ៍ពិពាហ៍មួយនៅទីក្រុងយុនហ្វូ ខេត្តក្វាងទុង ប្រទេសចិន បានក្លាយជាការរិះគន់របស់អ្នកលេងបណ្តាញសង្គម ក្រោយពីមានការផ្សព្វផ្សាយវីដេអូបង្ហាញពីសាច់ញាតិកូនកំលោះចងអៀមចុងភៅឱ្យកូនក្រមុំ ។ មនុស្សភាគច្រើននិយាយថា គ្រួសារកូនកំលោះចង់ឱ្យកូនក្រមុំធ្វើការងារក្នុងផ្ទះ នៅពេលនាងចូលមករស់នៅក្នុងគ្រួសារពួកគេ ។

ក្នុងវីដេអូនេះបង្ហាញថា ក្រោយពីកូនក្រមុំចុះពីរថយន្តភ្លាម ខាងបងប្អូនកូនកំលោះ ក៏បានដើរមកឈរព័ទ្ធជុំវិញនាង ហើយពួកគេបានយកអៀមចុងភៅមកពាក់ឱ្យនាងតែម្តង ។ ប៉ុន្តែអ្នកស្រុករស់នៅក្នុងតំបន់ប្រាប់ថា មូលហេតុដែលសាច់ញាតិកូនកំលោះចងអៀមចុងភៅឱ្យកូនក្រមុំបែបនេះ ដោយសារនាងមានផ្ទៃពោះ ហើយអៀមចុងភៅ គឺសំដៅទៅលើក្មេងៗ និងការជូនពរផ្សេងៗផងដែរ ។ ហេតុនេះ ក្រៅពីវាបានការពារទារកនៅក្នុងផ្ទៃហើយ អៀមចុងភៅនៅមានប្រយោជន៍ជាច្រើនទៀត ។

ក្រោយពីបានទស្សនាវីដេអូនេះ នារីម្នាក់និយាយថា ៖ «ខ្ញុំមកពីទីក្រុងយុនហ្វូ នៅពេលខ្ញុំរៀបការ ខ្ញុំក៏ពាក់អៀមចុងភៅដែរ ។ ក្រោយមក ខ្ញុំបានទៅរស់នៅជាមួយស្វាមី ខ្ញុំមិនបានធ្វើការងារផ្ទះទេ» ។ អ្នកលេងបណ្តាញសង្គមម្នាក់ទៀតថា ៖ «ការពាក់អៀមចុងភៅ គឺបង្ហាញឱ្យគេដឹងថា កូនក្រមុំកំពុងតែពរពោះ ។ យើងគ្រប់គ្នាត្រូវប្រយ័ត្ន និងកុំប៉ះពាល់ខ្លួនកូនក្រមុំខ្លាំងពេក» ។

ចំណែកអ្នកលេងបណ្តាញសង្គមផ្សេងទៀតមិនយល់ស្របជាមួយទម្លាប់បែបនេះទេ ដោយពួកគេសួរថា អីចឹង ត្រូវតែប្រកាសឱ្យគេគ្រប់គ្នាដឹងថា កូនក្រមុំកំពុងមានផ្ទៃពោះមុនរៀបការ មែនទេ? ប្រភព ៖ khaosod