ស្រីស្អាត ឃុន វ៉ាន់លីង ដែលជាអ្នកបង្កើតមាតិកានិងជាអ្នករស់នៅខេត្តសៀមរាបបានធ្វើឱ្យទស្សនិកជនមានការចាប់អារម្មណ៍បន្ទាប់ពីក្លាហានបោះជំហានចូលវិថីសិល្បៈផ្នែកចម្រៀងដោយបានចេញ MV លើកដំបូងហើយ។ ទោះជាយ៉ាងណា លទ្ធផលដែល ឃុន វ៉ាន់លីង ទទួលបានពីស្នាដៃថ្មីនេះរងនូវការវែកញែកពីទស្សនិកជន។

កញ្ញា ឃុន វ៉ាន់លីង បានចេញផ្សាយបទ « Starlight» កាលពីថ្ងៃទី២៤ ខែមីនា ឆ្នាំ២០២៦ ជាមួយនឹងការសម្តែងដ៏ខ្យូតនិងក្បាច់រាំរវើក ហើយប្លង់មួយៗគឺពិតជាមិនចាញ់ MV ដទៃទៀតនោះទេជាមួយនឹងពណ៌ផ្កាឈូកដ៏ស្រស់ស្អាត។ បន្ទាប់ពីបទនេះបានទម្លាក់នៅលើបណ្តាញសង្គមមិនថានៅយូធូប ទិកតុក ហ្វេកប៊ុក នោះទេ ឃុន វ៉ាន់លីង ទទួលនូវមតិប្រតិកម្មចម្រុះពីប្រិយមិត្តអ្នកស្តាប់។

ពួកគេបានបញ្ចេញមតិស្រដៀងៗគ្នាថា ការថតគឺល្អ MV ក៏ល្អ ការរាំក៏ល្អប្រសើរ ប៉ុន្តែទាក់ទងនឹងសំឡេងរបស់ ឃុន វ៉ាន់លីង គឺតឹងនិងត្បៀតបន្តិចដែលធ្វើឱ្យអ្នកស្តាប់ពិបាកស្តាប់។ អ្នកមួយចំនួនបានបង្ហាញថាពួកគេមិនមែនជា Hater នោះទេប៉ុន្តែសំឡេង ឃុន វ៉ាន់លីង គឺពិតជានៅមានកម្រិតនិងចង់ឱ្យរូបនាងអភិវឌ្ឍន៍ជាងនេះទៅទៀតឬអាចជ្រើសរើសនិពន្ធបទណាដែលស័ក្តិសមសម្រាប់សំឡេងរបស់នាង។

ទោះជាយ៉ាងណា អ្នកគាំទ្រមួយចំនួនក៏បានផ្តល់កម្លាំងចិត្តដល់ ឃុន វ៉ាន់លីង ដោយលើកឡើងថាទោះបីមានចំណុចខ្វះខាតប៉ុន្តែរូបនាងពិតជាប្រឹងប្រែងសម្រាប់ការងារមួយនេះ។

កញ្ញា ឃុន វ៉ាន់លីង បានធ្វើឱ្យទស្សនិកជនស្គាល់តាមរយៈការផលិតវីដេអូនានា ទាំងសកម្មភាពប្រចាំ និងដំណើរកម្សាន្តជាពិសេសគឺទាក់ទងនឹងកន្លែងទេសចរណ៍នៅខេត្តសៀមរាបផ្ទាល់តែម្តងដោយសារតែនាងជាកូនអ្នកខេត្តនេះ។ ការចាប់យកអាជីពជាអ្នកចម្រៀងគឺជាដំណើរថ្មីមួយរបស់ ឃុន វ៉ាន់លីង សម្រាប់បម្រើអារម្មណ៍អ្នកគាំទ្រ៕

ដើម្បីអបអរសាទរពិធីបុណ្យចូលឆ្នាំខ្មែរនាពេលខាងមុខឆាប់ៗនេះមានសិល្បករ សិល្បការិនី ជាច្រើនបាននិងកំពុងបញ្ចេញបទចម្រៀងនៅលើទីផ្សារដើម្បីទាក់ទាញអារម្មណ៍ទស្សនិកជន។ មួយក្នុងចំណោមនោះគេបានឃើញកញ្ញា បាន មុន្នីល័ក្ខ និងតារាសម្តែង សន ពិសិដ្ឋ បានចាប់ដៃគូបកស្រាយចម្រៀង Cover ពីសំនៀងដើមលោក ស៊ិន ស៊ីសាមុត និងអ្នកស្រី រស់ សេរីសុទ្ធា។

នៅថ្ងៃទី២៦ ខែមីនា កញ្ញា បាន មុន្នីល័ក្ខ តារាចម្រៀងមានសំឡេងផ្អែមពីរោះរណ្តំនិងតារាសម្តែង សន ពិសិដ្ឋ បានសហការគ្នាលើកដំបូង Cover នូវបទចម្រៀងពីដើមមួយបទមានចំណងជើងថា «រាំកិតជិតកាយ…»។ បទចម្រៀងប្រភេទចង្វាក់រាំវង់នេះបានល្បីមកជាយូរមកហើយតែជាបទលេចធ្លោមួយរបស់តារាចម្រៀង ស៊ិន ស៊ីសាមុត និងអ្នកស្រី រស់ សេរីសុទ្ធា។

ទោះយ៉ាងណា ការអភិវឌ្ឍន៍ពីតារាសម្តែងមកជាតារាចម្រៀងចេញបទជាមួយនឹងតារាចម្រៀងអាជីពលោក សន ពិសិដ្ឋ ត្រូវបានអ្នកលេងបណ្តាញសង្គមមួយមួយចំនួនរិះគន់ដោយចាត់ទុកសំឡេងរបស់លោកធ្វើឱ្យខូចគុណភាពសំឡេងរបស់ បាន មុន្នីល័ក្ខ។ អ្នកប្រើប្រាស់ហ្វេកប៊ុកបានបញ្ចេញមតិថា «ពីរោះណាស់បងច្រៀងតែម្តងនឹងបានហើយ,ច្រៀងមួយបងពិសិដ្ឋខូចសំឡេងអូនអស់ហើយ, ពីរោះណាស់បងឆ្នាំក្រោយមិនបាច់ចេញទៀតទេ»។ មិនត្រឹមតែប៉ុណ្ណោះប្រិយមិត្តខ្លះគិតថាសំឡេងរបស់លោក សន ពិសិដ្ឋ ជា AI ទៀតផង។
ក្រោយទទួលរងនូវមតិសាធារណៈ តារាសម្តែង សន ពិសិដ្ឋ បានចែករំលែកដោយក្តីអន់ចិត្តលាយឡំនឹងការលេងសើចថា «ស្រឡាញ់ចម្រៀង តែចម្រៀងអត់ស្រឡាញ់ខ្ញុំសោះ»។ លោកក៏បានបង្ហាញពីសញ្ញាពេលដែលអានខម្មិនទស្សនិកជនហើយលោកឈឺបេះដូងយ៉ាងខ្លាំង។

ទោះបីជាប្រឈមនឹងមតិរិះគន់ទៅលើសំឡេងក្តី ប៉ុន្តែអ្នកមួយចំនួនក៏បានលើកទឹកចិត្តតារាសម្តែង សន ពិសិដ្ឋ ផងដែរ៕

«ភ្លឺឡើងបាត់ស្នេហ៍», «បេះដូង១០០…» និងបទមួយចំនួនទៀតសុទ្ធតែជាបទចម្រៀងពេញនិយមរបស់តារាចម្រៀង លាង សុផាឡែន បើទោះបីជារំលងផុតជាច្រើនឆ្នាំក្តី។ ជាក់ស្តែងថ្មីៗនេះនៅពេលតារាចម្រៀងរូបនេះជ្រើសរើសបទទាំងនេះមកបកស្រាយម្តងទៀតនៅតែទទួលបានការចាប់អារម្មណ៍ពីទស្សនិកជន។

តាមរយៈវីដេអូដែលបានចែករំលែកនៅលើបណ្តាញសង្គម កញ្ញា លាង សុផាឡែន ដែលបច្ចុប្បន្នជាតារាចម្រៀងក្នុងទ្រនំរស្មីហង្សមាសបានជ្រើសរើសបទ «ភ្លឺឡើងបាត់ស្នេហ៍» មកបកស្រាយឡើងវិញជាចង្វាក់ Acoustic។ បទនេះបកស្រាយដំបូងដោយអ្នកស្រី រស់ សេរីសុទ្ធា ពីស្នាដៃនិពន្ធដោយកវី គង្គ ប៊ុនឈឿន។ ក្រោយមកខ្ទង់ឆ្នាំ២០០៦ បទនេះត្រូវបាន តារាចម្រៀង លាង សុផាឡែន និង សុខ សីឡាលីន បកស្រាយឡើងវិញ ហើយអ្នកមួយចំនួនធំសម្គាល់ថាជាបទថ្មីរបស់ លាង សុផាឡែន។

នៅពេលកញ្ញា លាង សុផាឡែន បានបកស្រាយបទ «ភ្លឺឡើងបាត់ស្នេហ៍» ជាចង្វាក់ Acoustic នេះទទួលបានមតិកោតសរសើរជាច្រើន។ អ្នកមួយចំនួនបានសរសើរពីសម្រស់របស់តារាចម្រៀងរូបនេះនៅតែក្មេងនិងស្អាតដដែល ហើយចាស់តែអ្នកគាំទ្រ។ មតិខ្លះទៀតក៏បានលើកឡើងទៀតថា លាង សុផាឡែន ជាតារាចម្រៀងស្រីម្នាក់ដែលមានសមត្ថភាពច្រៀងបទតុងខ្ពស់ៗជាក់ស្តែងដូចជាបទ បេះដូង១០០ ជាដើម។

នៅពេលវីដេអូនោះបានរីកសាយភាយ ស្របពេលមតិទស្សនិកជននៅតែគាំទ្រនិងស្រលាញ់ កញ្ញា លាង សុផាឡែន បានពោលពាក្យយ៉ាងរំភើបដោយសារតែមើលខម្មិនឃើញថាមហាជនស្រលាញ់ខ្លួន។

គួរឱ្យដឹងថា បទចាស់ៗពីមុនរបស់ លាង សុផាឡែន នៅតែពេញនិយមក្នុងចំណោមអ្នកស្តាប់នាពេលបច្ចុប្បន្ន ប៉ុន្តែយ៉ាងណារយៈពេលប៉ុន្មានឆ្នាំចុងក្រោយនេះកញ្ញា លាង សុផាឡែន ពុំទាន់មានបទផ្សេងទៀតដែលក្តោបឱកាសលើទីផ្សារបាននៅឡើយទេ៕