សំ លីដា ម្ចាស់ពាន Cambodian Idol Junior រដូវកាលទី២ បានទម្លាក់បទថ្មីរបស់ខ្លួនមានចំណងជើងថា «កុំបំភ្លេចគុណគ្រូ» ដែលជាបទចម្រៀងមួយបទពោរពេញដោយអត្ថន័យនិងកំពុងឆាបឆក់បេះដូងទស្សនិក ជាមួយនឹងទឹមដមសំឡេងដ៏ពីរោះរណ្តំរបស់ម្ចាស់ពានវ័យក្មេងរូបនេះ។ លើសពីនេះទស្សនិកជនក៏បានពោលសរសើរទៅដល់ទឹកដៃអ្នកនិពន្ធនិងលើកទឹកចិត្តឱ្យផលិតបទចម្រៀងប្រភេទនេះឱ្យបានកាន់តែច្រើនព្រោះមានប្រយោជន៍ដល់សង្គម។  គេចាំបានថាកាលពីដើមខែធ្នូ ឆ្នាំ២០២៣ តារាចម្រៀងវ័យក្មេង សំ លីដា បានធ្វើឱ្យមហាជនចាប់អារម្មណ៍យ៉ាងខ្លាំងបន្ទាប់ពីបង្ហើរសំឡេងក្នុងបទចម្រៀងមានចំណងជើងថា «ម្តេចយកប្រពន្ធចោលអូន» ដែលជាសំនៀងដើមរបស់កញ្ញា អ៊ីវ៉ា រហូតដល់ម្ចាស់បទចែករំលែកនៅលើបណ្តាញសង្គមរបស់ខ្លួន និងបានកោតសរសើរទឹកដមក្រអួនក្រអៅរបស់ សំ លីដា ដូចគ្នា។

ជាមួយគ្នានេះដែរ ម្ចាស់ពាន Cambodian Idol Junior រដូវកាលទី២ រូបនេះបានធ្វើឱ្យទស្សនិកជនចាប់អារម្មណ៍ជាថ្មីបន្ទាប់ពីផលិតកម្មរស្មីហង្សមាសបានទម្លាក់បទថ្មីរបស់ សំ លីដា កាលពីយប់ថ្ងៃទី២៥ មករា មានចំណងជើងថា «កុំបំភ្លេចគុណគ្រូ» ដែលត្រូវនឹងសំឡេងនាងយ៉ាងខ្លាំង ដែលជាការនិពន្ធទំនុកច្រៀង និង ទំនុកភ្លេងដោយ លោក THO MEET។
ទឹកដមសំឡេងដ៏ពីរោះរណ្តំរបស់ សំ លីដា និងបទចម្រៀងដែលពោរពេញដោយអត្ថន័យពីគុណបំណាច់របស់គ្រូបង្រៀនទៀតកាន់តែធ្វើឱ្យទស្សនិកជនពេញចិត្តយ៉ាងខ្លាំងទៅលើបទចម្រៀងនេះ។

អត្ថន័យបទនេះបានលើកឡើងពីទឹកចិត្តគ្រូបង្រៀនដែលជាឪពុកម្តាយទីពីររបស់យើងទោះបីជាសិស្សខុសយ៉ាងណាប៉ុន្តែគ្រូនៅតែមានក្តីសន្តោស និងកុំឱ្យយើងបំភ្លេចគុណគ្រូ ហើយនៅពេលឃើញសិស្សល្អ គ្រូមិនដែលទាមទារអ្វីពីសិស្សនោះទេ។ បទចម្រៀងនេះក៏បានដាស់ស្មារតីដែរថានៅពេលជួបគ្រូទោះមិនមានអ្វីត្រឹមលើកដៃសំពះជម្រាបសួរក៏គ្រូសប្បាយចិត្តហើយ។

«កុំបំភ្លេចគុណគ្រូ» ពីតារាចម្រៀងវ័យក្មេង សំ លីដា និពន្ធដោយលោក THO MEET ត្រូវបានទស្សនិកជនលើកសរសើរថា «បទចម្រៀងល្អ មានប្រយោជន៍ដល់សង្គម សុំលើកទឹកចិត្តឱ្យផលិតបទចឹងៗទៀត ,បទចម្រៀងមានអត្ថន័យល្អហើយអ្នកច្រៀងរឹតតែពីរោះថែមទៀត អរគុណដល់អ្នកនិពន្ធដែលបាននិពន្ធបទចម្រៀងអប់រំ , ចម្រៀងចាក់ដោតសិស្សខ្លះជួបគ្រូសឹងតែដើរបុក, ពីរោះ មានន័យខ្លាំងណាស់, ស្រលាញ់សម្លេងមួយនេះណាស់»៕

បេក្ខនារី ឌី បញ្ញាវិមាលា Miss Grand សៀមរាបប្រាសាទបេងមាលា បានក្លាយជាម្ចាស់ជ័យលាភីក្នុងការប្រកួតប្រចាំខេត្តក្នុងចំណោមបេក្ខភាព១៥នាក់។ នៅក្នុងវគ្គសំណួរចម្លើយTOP5 ឌី បញ្ញាវិមាលា បានជ្រើសរើសយកសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាគំរូសម្រាប់តួនាទីរបស់ស្រ្តីក្នុងការអភិវឌ្ឍន៍សង្គមជាតិ និងវិស័យអប់រំ។

នៅយប់ថ្ងៃទី២៥ មករា កម្មវិធីប្រកួត Miss Grand សៀមរាប បានរកឃើញម្ចាស់ជ័យលាភីហើយដើម្បីតំណាងខេត្តនេះហើយនិងត្រៀមក្នុងការប្រកួតថ្នាក់ជាតិនាពេលខាងមុខដោយបានទៅលើកញ្ញា ឌី បញ្ញាវិមាលា Miss Grand សៀមរាប ប្រាសាទបេងមាលា ដែលមានអាយុ១៨ឆ្នាំ កម្ពស់ ១.៧២ម៉ែត្រ។
នៅក្នុងវគ្គសំណួរចម្លើយ TOP5 បញ្ញាវិមាលា បានផ្តល់ចម្លើយថា «សម្រាប់រូបនាង ស្រ្តីពិតជាមានចំណែកខ្លាំងបំផុតសម្រាប់ការចូលរួមអភិវឌ្ឍន៍សង្គមជាតិ និងវិស័យអប់រំនៅក្នុងប្រទេសកម្ពុជា។ ស្រ្តីគឺជាផ្នែកមួយកាន់តែធ្វើឱ្យសង្គមកាន់តែអស្ចារ្យ ហើយស្រ្តីក៏បានចូលរួមយ៉ាងសកម្មនៅក្នុងសង្គមផងដែរ។ ក្នុងនាមនាងជាប្រជាជនខ្មែរមួយរូប នាងសូមលើកយកសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន មកធ្វើជាគំរូដ៏ឧត្តុងឧត្តមនៃការជួយសង្គ្រោះជនរងគ្រោះនៃព្រះរាជាណាចក្រកម្ពុជាគ្រប់រូបដោយមិនប្រកាន់ភ្ជាប់និន្នាការនៃការរើសអើងពូជសាសន៍ឬពណ៌សម្បុរណាមួយឡើយ។ ហើយនាងសូមចូលរួមលុបបំពាក់ពាក្យថា ស្រ្តីបង្វិលចង្រា្កនមិនជុំ»។

ឌី បញ្ញវិមាលា បន្តទៀតថា «សព្វថ្ងៃស្រ្តីក៏អាចធ្វើការងារដូចជាបុរសបានដែរ ដោយបុរសក៏អាចធ្វើបានស្រ្តីក៏អាចធ្វើបានដូចគ្នា ហើយនាងសូមជំនួសដោយពាក្យថា ស្ត្រីគឺជាមាតានៃពិភពលោក ស្រ្តីគឺជាសរសៃឈាមនៃពិភពលោក បើសង្គមណាលុបបំបាត់ការងាររបស់ស្រ្តីមានន័យថា សង្គមនោះនឹងបាត់បង់ដៃម្ខាងរបស់ខ្លួនហើយ»។

ការផ្តល់ចម្លើយខាងលើរបស់ ឌី បញ្ញាវិមាលា បានយកឈ្នះបេក្ខនារីផ្សេងទៀតដោយលំដាប់រងទី១បានទៅលើ MGSR ប្រាសាទបាយ័ន លំដាប់រងទី២ MGSR ប្រាសាទភិមានអាកាស លំដាប់រងទី៣ MGSR ប្រាសាទប្រែរូប និងលំដាប់រងទី៤ MGSR ប្រាសាទបន្ទាយស្រី

គួរបញ្ជាក់ថា ឌី បញ្ញាវិមាលា គឺជាម្ចាស់មកុដពីកម្មវិធី Miss Teen International Cambodia 2021 និងបានតំណាងប្រទេសកម្ពុជាទៅប្រកួតនៅប្រទេសឥណ្ឌាក្នុងកម្មវិធី Miss Teen International ដោយបានជាប់ Top10 ក្នុងការប្រកួតផងដែរ៕

កាលពីរសៀលថ្ងៃទី២១ ខែមករា ឆ្នាំ២០២៤ មានការភ្ញាក់ផ្អើលយ៉ាងខ្លាំងបន្ទាប់ពីតារាចម្រៀង និងសម្តែង កែវ ពិសី ហៅ រតនៈ ពិសី ត្រូវបានកម្លាំងការិយាល័យព្រហ្មទណ្ឌកម្រិតធ្ងន់បញ្ជូនខ្លួនទៅតុលាការពីបទរំលោភលើទំនុកចិត្តនិងមិនបំពេញកាតព្វកិច្ច ចំពោះឧបករណ៍ដែលអាចជួញដូរបាន(សែកស្អុយ)ចំនួន១៩ ២០០ដុល្លារ។ ខណៈពេលនេះ រតនៈ ពិសី ត្រូវតុលាការសម្រេចឃុំខ្លួនដាក់ពន្ធនាគារព្រៃស.ម២ បណ្តោះអាសន្នហើយ។ នេះបើតាមការចុះផ្សាយរបស់សារព័ត៌មានក្នុងស្រុកមួយ។

ការឃាត់និងបញ្ជូនខ្លួនតារាសម្តែង កែវ ពិសី ហៅរតនៈ ពិសី ធ្វើឡើងដោយយោងតាមពាក្យបណ្ដឹងរបស់ឈ្មោះ ផាន់ សូរិយា ភេទស្រីអាយុ៣១ឆ្នាំដោយបានប្តឹងចោទប្រកាន់ឈ្មោះ កែវ ពិសី ពីបទរំលោភលើទំនុកចិត្តនិងមិនបំពេញកាតព្វកិច្ចចំពោះឧបករណ៍ដែលអាចជួញដូរបានប្រព្រឹត្តនៅចំណុចរាជធានីភ្នំពេញកាលពីថ្ងៃទី ១៣ ខែ មេសាឆ្នាំ ២០២៣ ។

យោងទៅតាមដីកាបញ្ជាឱ្យចូលខ្លួនពីឯកឧត្តម ច្រឹង ខ្មៅ ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញកាលពីថ្ងៃទី១៨ ខែមករា ឆ្នាំ២០២៤បានបញ្ជាក់ថា កែវ ពិសី ភេទស្រី អាយុ២៧ឆ្នាំ ជនជាតិខ្មែរ ម្ចាស់ក្រុមហ៊ុន ELI KP TRADING CO LTD មានអាសយដ្ឋានបច្ចុប្បន្ន ផ្ទះលេខ១៩ ផ្លូវលេខ៥ ភូមិបន្លាស្អិត សង្កាត់ឈ្មួញ ខណ្ឌសែនសុខ រាជធានីភ្នំពេញ ។

គួរបញ្ជាក់ផងដែរថា តារាចម្រៀង និងសម្តែង កែវ ពិសី ធ្លាប់ត្រូវបានសមត្ថកិច្ចកោះហៅឱ្យចូលបំភ្លឺជុំវិញករណីចេញសែកគ្មានសាច់ប្រាក់ សែកស្អុយតាមពាក្យបណ្ដឹងរបស់ជនរងគ្រោះដែលបានដាក់ចូលទៅនាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិកាលពីថ្ងៃទី២០ ខែកញ្ញា និងថ្ងៃទី៣០ ខែតុលា ឆ្នាំ២០២៣ កន្លងទៅ។

ជុំវិញជំពាក់ប្រាក់ និងការចេញសែកស្អុយ រតនៈ ពិសី ក៏បានអះអាងកន្លងមកនេះថានាងក៏ចាញ់បោកគេដូចគ្នាដែលមានអ្នកជំពាក់ប្រាក់នាងគេចវះមិនព្រមសងរាប់ម៉ឺនដុល្លារទៅលើការលេងតុងទីន។ ក្នុងនោះដែរ រតនៈ ពិសី ក៏ធ្លាប់បានបញ្ជាក់នាពេលកន្លងមកថានាងបានដាក់ពាក្យបណ្តឹងអ្នកជំពាក់លុយនោះដូចគ្នា។

តារាចម្រៀង និងសម្តែង រតនៈ ពិសី ជាអ្នកសិល្បៈស៊ិចស៊ីមួយរូបមានកេរ្តិ៍ឈ្មោះគួរសម និងលេចមុខតាមកញ្ចក់ទូរទស្សន៍នានាផងដែរ៕