ក្រុមហ៊ុន Apple គ្រោងនឹងអភិវឌ្ឍកាសស្តាប់ត្រចៀកជំនាន់ថ្មី AirPods Pro 3 ដែលអាចនឹងចេញនៅឆ្នាំ ២០២៥ ដោយបន្ថែមមុខងារថ្មីជាច្រើនទៀតនៅក្នុងកាស AirPods Pro 3។ ដូច្នេះហើយមុខងារថ្មីដែល Apple អាចនឹងអភិវឌ្ឍបន្ថែមនៅក្នុងកាសមានដូចជា៖

១.ការរចនាបានផ្លាស់ប្តូរ៖ យោងតាមលោក Mark Gurman បានបង្ហាញថាកាសស្តាប់ត្រចៀក AirPods Pro 3 នឹងមានការរចនាឡើងវិញបន្តិច ប៉ុន្តែនៅតែរក្សាការរចនាដែលងាយស្រួលប្រើដដែលទេ ដោយស្រោម និងកាសនឹងត្រូវផ្លាស់ប្តូរការរចនាដែលអាចងាយស្រួលប្រើជាងមុន។

២.គុណភាពសំឡេងកាន់តែប្រសើរ៖ AirPods Pro 3 ក៏នឹងមានការកែលម្អប្រព័ន្ធសំឡេងផងដែរ ដោយបន្ថែមពីលើប្រព័ន្ធ ANC ដែលនឹងភ្ជាប់ជាមួយមុខងារផ្តោតអារម្មណ៍ ដើម្បីប្រើជាមួយ Vision Pro ដោយគេរំពឹងថាគុណភាពសំឡេងនឹងកាន់តែល្អប្រសើរជាងមុន។

៣.ប្រើបន្ទះឈីបថ្មី៖ សម្រាប់ AirPods Pro 2 កាលពីមុនបានប្រើបន្ទះឈីប H2 ប៉ុន្តែសម្រាប់ម៉ូដែលថ្មីនេះវិញ វាត្រូវបានគេរំពឹងថានឹងប្រើប្រាស់បន្ទះឈីប H3 ជាមួយនឹងល្បឿនកាន់តែប្រសើរជាងមុន ក៏ដូចជាគាំទ្រការបញ្ជាដោយសំឡេងបានល្អជាងមុន រួមជាមួយនឹងការកាត់បន្ថយការប្រើប្រាស់ថាមពល និងអាចដំឡើងប្រព័ន្ធត្រួតពិនិត្យគុណភាពសំឡេង។

៤.បន្ថែមប្រព័ន្ធសម្រាប់វាស់កម្រិតនៃការស្តាប់របស់មនុស្ស៖ ដូចដែលយើងបានដឹងហើយថា Apple កំពុងបង្កើត AirPods ដើម្បីអាចវាស់ស្ទង់សុខភាព ជាពិសេសអ្នកដែលមានបញ្ហានៃការស្តាប់។ ដូច្នេះ កាសជំនាន់ថ្មីនេះអាចនឹងត្រូវបានកែលម្អដើម្បីសាកល្បងការស្តាប់ និងអាចរាយការណ៍ពីសុខភាពការស្តាប់បាន រួមទាំងការលុបបំបាត់សំលេងរំខានពីខាងក្រៅ។ ហេតុនេះហើយ ការសង្កត់ធ្ងន់លើការស្តាប់ រួមទាំងការកែសម្រួលនេះ បានធ្វើឱ្យកាសជំនាន់ថ្មី AirPods Pro 3 កាន់តែមានផាសុកភាពជាងមុន។

៥.បន្ថែមប្រព័ន្ធវាស់សីតុណ្ហភាពរាងកាយ៖ ក្រៅពីការវាស់សំឡេងក៏មានការប្រើវាស់សីតុណ្ហភាពដែលកាសអាចប្រើបានផងដែរ។ នេះបើយោងតាមលោក Ming-Chi Kuo បានរាយការណ៍អំពីមុខងារថ្មីមួយរបស់ Health ដែលនឹងមានមុខងារវាស់សីតុណ្ហភាពជា Biometric Sensor ក្នុងបញ្ហាជាច្រើនរួមមាន សីតុណ្ហភាព កម្រិតជីពចរ ហើយវាក៏ត្រូវបានគេរំពឹងថានឹងដាក់ឱ្យដំណើរការនៅខែកញ្ញា ក្នុងឆ្នាំ ២០២៥ ផងដែរ៕

បុរសដែលទទួលទានម្ទេសក្នុងកម្រិតមធ្យមអាចធ្វើឱ្យមុខងារផ្លូវភេទប្រសើរឡើង និងកាត់បន្ថយហានិភ័យនៃជំងឺមហារីកក្រពេញប្រូស្តាត នេះបើយោងតាមការសិក្សាមួយចំនួនរបស់សហរដ្ឋអាមេរិក។ អាហារដែលយើងញ៉ាំមានតួនាទីសំខាន់ក្នុងដំណើរឈាមរត់ពេញរាងកាយ ហេតុនេះហើយប្រសិនបើយើងបន្ថែមម្ទេសពីលើម្ហូបអាហារ វានឹងផ្តល់អត្ថប្រយោជន៍ជាច្រើនចំពោះសុខភាព រួមទាំងផ្នែកសរីរវិទ្យាផងដែរ។ ដូច្នេះខាងក្រោមនេះគឺជាអត្ថប្រយោជន៍ពេលបុរសទទួលទានម្ទេសក្នុងកម្រិតល្មម៖

១.ធ្វើឱ្យប្រសើរឡើងនូវចរន្តឈាម៖ ម្ទេសមានផ្ទុកសារធាតុ Capsaicin ដែលអាចធ្វើឱ្យប្រសើរឡើងនូវចរន្តឈាម រួមទាំងកាត់បន្ថយសម្ពាធឈាម និងកម្រិតកូឡេស្តេរ៉ុល ក៏ដូចជាធ្វើឱ្យលំហូរឈាមក្នុងរាងកាយកាន់តែប្រសើរ និងកាន់តែងាយស្រួលសម្រាប់បុរសក្នុងការសម្រេចបាន និងរក្សាការឡើងរឹងរបស់លិង្គ។ លើសពីនេះ Capsaicin ក៏ជួយកាត់បន្ថយការរលាកដែលមានប្រយោជន៍សម្រាប់សុខភាពផ្លូវភេទផងដែរ។

២.បង្កើនចំណង់ផ្លូវភេទ៖ យោងតាមការសិក្សាឆ្នាំ ២០១៥ របស់សាកលវិទ្យាល័យ Grenoble Alpes ប្រទេសបារាំង ដែលមានអ្នកចូលរួមជាង ១០០ នាក់ បានបង្ហាញថា បុរសដែលចូលចិត្តអាហារហឹរ ភាគច្រើនត្រូវបានផ្សារភ្ជាប់ជាមួយនឹងមុខងារផ្លូវភេទកាន់តែប្រសើរឡើង។

៣.កាត់បន្ថយភាពតានតឹង៖ យោងតាមការសិក្សាជាច្រើនបានបង្ហាញថាជាតិហឹរនៃម្ទេសអាចកាត់បន្ថយការថប់បារម្ភ និងកាត់បន្ថយភាពតានតឹងយ៉ាងមានប្រសិទ្ធភាព ព្រោះរសជាតិហឹរជួយជំរុញខួរក្បាលឱ្យបញ្ចេញអរម៉ូន endorphins ធ្វើឱ្យអារម្មណ៍កាន់តែរីករាយ កាត់បន្ថយភាពតានតឹង និងជួយបន្ថយហានិភ័យនៃជំងឺធ្លាក់ទឹកចិត្ត។

៤.ការពារជំងឺមហារីកក្រពេញប្រូស្តាត៖ យោងតាមការសិក្សាឆ្នាំ ២០០៦ ដោយសាកលវិទ្យាល័យកាលីហ្វ័រញ៉ាសហរដ្ឋអាមេរិក បានបង្ហាញថា សារធាតុ capsaicin របស់ម្ទេសអាចជួយការពារការលូតលាស់នៃកោសិកាមហារីកក្រពេញប្រូស្តាត ហើយថែមទាំងមានសមត្ថភាពសម្លាប់ពួកវាទៀតផង៕

បរទេស៖ គិតត្រឹមពាក់កណ្តាលខែវិច្ឆិកា ប្រទេសម៉ាឡេស៊ីបានស្វាគមន៍ភ្ញៀវអន្តរជាតិចំនួន ២៦ លាននាក់ ដែលជាចំនួនខ្ពស់បំផុតនៅអាស៊ីអាគ្នេយ៍ ដោយចំណាត់ថ្នាក់លេខ ២ គឺប្រទេសថៃដែលមានចំនួន ២៣.៤ លាននាក់។

យោងតាមស្ថិតិចុងក្រោយរបស់នាយកដ្ឋានអន្តោប្រវេសន៍ម៉ាឡេស៊ី បានឱ្យដឹងថា ក្នុងរយៈពេល ១១ ខែដំបូងនៃឆ្នាំនេះ ភ្ញៀវទេសចរអន្តរជាតិចំនួន ២៦ លាននាក់បានមកទស្សនាប្រទេសនេះ ដែលធ្វើឱ្យម៉ាឡេស៊ីក្លាយជាប្រទេសដែលស្វាគមន៍ភ្ញៀវអន្តរជាតិច្រើនជាងគេនៅអាស៊ីអាគ្នេយ៍។ រីឯប្រទេសថៃវិញបានជាប់ចំណាត់ថ្នាក់លេខ ២ មានភ្ញៀវទេសចរ ២៣,៤ លាននាក់តាមពីក្រោយដោយសិង្ហបុរីមានជាង ១១,៣ លាននាក់ និងវៀតណាមជាប់ចំណាត់ថ្នាក់លេខ ៤ ក្នុងបញ្ជីដែលមានអ្នកទស្សនា ១១,២ លាននាក់។

រដ្ឋមន្ត្រីក្រសួងទេសចរណ៍ សិល្បៈ និងវប្បធម៌ លោក Datuk Seri Tiong King Sing សង្ឃឹមថា ចំនួនអ្នកទេសចរនឹងបន្តកើនឡើង បន្ទាប់ពីម៉ាឡេស៊ីបានអនុវត្តគោលនយោបាយគ្មានទិដ្ឋាការសម្រាប់ភ្ញៀវទេសចរចិន និងឥណ្ឌា ចាប់ពីថ្ងៃទី ១ ខែធ្នូ។ក្នុងចំណោមភ្ញៀវអន្តរជាតិចំនួន ២៦ លាននាក់ទៅកាន់ប្រទេសម៉ាឡេស៊ី ភ្ញៀវទេសចរសិង្ហបុរីមានចំនួនច្រើនជាងគេដែលមានចំនួនជាង ១២.៦ លាននាក់។ បន្ទាប់មកគឺប្រទេសឥណ្ឌូណេស៊ីមានចំនួន ៣,១ លាននាក់ ថៃមានភ្ញៀវទេសចរ ២ លាននាក់ ចិនមានភ្ញៀវ ១,៤ លាននាក់ ប្រ៊ុយណេមាន ៩០ ម៉ឺននាក់ និងឥណ្ឌាមាន ៧៨ ម៉ឺននាក់។

គួរបញ្ជាក់ដែរថា ក្នុងឆ្នាំ ២០១៩ ប្រទេសម៉ាឡេស៊ីបានស្វាគមន៍ភ្ញៀវអន្តរជាតិចំនួន ២៦.១ លាននាក់ មុនពេលធ្លាក់ចុះ ៨៣.៤% មកនៅត្រឹម ៤.៣៣ លាននាក់ក្នុងឆ្នាំ ២០២០ នៅពេលដែលការរាតត្បាតបានផ្ទុះឡើង។ នៅឆ្នាំ ២០២១ វិញប្រទេសនេះបានស្វាគមន៍ដំណើរទស្សនកិច្ច ១៣០,០០០ និងកើនឡើងម្តងទៀតដល់ ១០.១ លាននៅឆ្នាំ ២០២២៕

ប្រទេសបារាំង ៖ អាជ្ញាធរបារាំងបានបង្កើនការជួសជុលព្រះវិហារចាស់មួយឈ្មោះ «Notre Dame» ឱ្យបានរួចរាល់ ដើម្បីឱ្យព្រះវិហារនេះបើកដំណើរឡើងវិញនៅឆ្នាំ២០២៤ ។ ក្រៅពីការជួសជុលព្រះវិហារ គេឃើញអាជ្ញាធរបានលើកសត្វមាន់ដ៏ធំ១ក្បាលដែលផលិតឡើងពីមាសដាក់នៅលើកំពូលព្រះវិហារនេះ ដើម្បីបង្ហាញទិសដៅខ្យល់ កាលពីថ្ងៃទី១៦ ខែធ្នូ ឆ្នាំ២០២៣ ។

ការបំពាក់នូវបច្ចេកវិទ្យាថ្មីនេះចាត់ទុកថា គឺជាការអភិរក្សព្រះវិហារមានអាយុចំណាស់មួយ ខណៈព្រះវិហារនេះបានរងការខូចខាតដោយសារភ្លើងឆេះ កាលពីថ្ងៃទី១៥ ខែមេសា ឆ្នាំ២០១៩ ។ អាជ្ញាធរបារាំងបញ្ជាក់ថា នឹងបើកដំណើរការព្រះវិហារនេះឡើងវិញ នៅថ្ងៃទី៨ ខែធ្នូ ឆ្នាំ២០២៤ ។

លោក ហ្វីលីប ចន ជាភ្នាក់ងារអភិរក្សព្រះវិហារនិយាយថា ៖ «ការបំពាក់នូវបច្ចេកវិទ្យាសត្វមាន់បង្ហាញផ្លូវ គឺជាការអភិរក្សព្រះវិហារ ដែលគេបានដាក់វានៅលើកំពូលសរសេរមានកម្ពស់៩៦ម៉ែត្រ ។ ដូច្នេះ នៅពេលពលរដ្ឋបារាំង និងមនុស្សគ្រប់គ្នាធ្វើដំណើរឆ្លងកាត់ទីនេះ ពួកគេនឹងមើលឃើញសត្វមាន់ស្រស់ស្អាតយ៉ាងច្បាស់នៅក្រោមកំដៅថ្ងៃ» ។

សត្វមាន់បង្ហាញទិសដៅខ្យល់នេះត្រូវបានផលិតឡើងពីមាស និងទទួលបានការប្រោសព្រំទឹកមន្តពីលោក ឡូរ៉ង អូលរីស គឺជាអាចារ្យប្រចាំទីក្រុងប៉ារីស ក្នុងអំឡុងពេលធ្វើពិធី កាលពីថ្ងៃទី១៦ ខែធ្នូ ឆ្នាំ២០២៣ ។

កាលពីពាក់កណ្តាលខែធ្នូ ឆ្នាំ២០២៣ ប្រធានាធិបតីប្រទេសបារាំង លោក អេមម៉ានូអែល ម៉ាគ្រង បានចុះមកត្រួតពិនិត្យការជួសជុលព្រះវិហារ Notre Dame ហើយលោកលើកឡើងថា ការជួសជុលព្រះវិហារនេះនឹងរួចរាល់តាមការកំណត់ ។ យើងនឹងបើកដំណើរការព្រះវិហារឡើងវិញ ក្នុងរយៈពេល១២ខែខាងមុខយ៉ាងពិតប្រាកដ ។

គេត្រូវការកម្មករប្រមាណ៥០០នាក់ក្នុង១ថ្ងៃៗ ដើម្បីបង្កើនការជួសជុលព្រះវិហារ Notre Dame ជាថ្មី ។ នៅដើមឆ្នាំ២០២៤ ក្រុមការងារនឹងចាប់ផ្តើមធ្វើតេស្តការជ្រាបទឹកនៅលើដំបូលព្រះវិហារ បន្ទាប់មក ពួកគេនឹងបំពាក់នូវវត្ថុសិល្បៈ, រូបចម្លាក់ និងសម្ភារៈផ្សេងទៀតដាក់នៅតាមទីតាំងដូចដើមវិញ ៕ ប្រភព ៖ TNN World

ប្រទេសបារាំង ៖ ការផ្លាស់ប្តូរទីលំនៅអាចជាការឈានទៅរកជីវិតដ៏ល្អប្រសើររបស់មនុស្សជាច្រើននាក់ ប៉ុន្តែសម្រាប់ជនភៀសខ្លួនដែលមកធ្វើការនៅប្រទេសបារាំង ពួកគេកំពុងប្រឈមនឹងការធ្វើវិសោធនកម្មច្បាប់របស់បារាំង ហើយមិនដឹងថា តើវានឹងកើតឡើងនៅពេលណាទេ ។

កាលពីថ្ងៃទី១១ ខែធ្នូ ឆ្នាំ២០២៣ សភាតំណាងរាស្ត្របារាំងបានបដិសេធការធ្វើវិសោធនកម្មច្បាប់ជនអន្តោប្រវេសន៍ ដែលស្នើឡើងដោយប្រធានាធិបតីបារាំង លោក អេមម៉ានូអែល ម៉ាគ្រង ។ ការធ្វើវិសោធនកម្មច្បាប់នេះ គឺអាចដកលិខិតអនុញ្ញាតធ្វើការរបស់ជនបរទេស និងបណ្តេញពួកគេចេញពីប្រទេសបារាំងបាន ករណីពួកគេប្រព្រឹត្តទង្វើខុសច្បាប់ណាមួយ ។ ទោះយ៉ាងណា ការបដិសេធនេះមិនបានធ្វើឱ្យការធ្វើវិសោធនកម្មច្បាប់ត្រូវបានគេលុបចោលទេ ។

លោក ស៊ូឡេម៉ាណេ ប័ររី ជនជាតិហ្គីណេ អាយុ២០ឆ្នាំ ដែលគ្មានលិខិតអនុញ្ញាតធ្វើការនៅប្រទេសបារាំង និយាយថា វាកាន់តែលំបាកខ្លាំងឡើង និងធ្វើឱ្យជនបរទេសធ្វើការនៅបារាំងជាច្រើននាក់ព្រួយបារម្ភ ។ លោកថា ៖ «ការពិត វាជាការងារមួយដែលខ្ញុំចូលចិត្តធ្វើ ព្រោះខ្ញុំតែងភ្ញាក់ពេលព្រឹកព្រលឹមស្រាប់ហើយ ។ ការងារនេះជាការប្រើប្រាស់កម្លាំងកាយ ហើយខ្ញុំបានសម្រេចចិត្តធ្វើនំ ព្រោះវាជាការងារល្អបំផុតលើពិភពលោក» ។

បុរសជនជាតិហ្គីណេម្នាក់នេះកំពុងតែប្រឈមនឹងប៉ូលិសបារាំងចាប់បញ្ជូនចេញពីប្រទេសបារាំង ហើយបដិសេធការស្នើសុំលិខិតអនុញ្ញាតធ្វើការរបស់គាត់ រហូតដល់២លើក ។ ម្ចាស់ហាងនំបានដាក់ពាក្យស្នើសុំធ្វើការតាមអនឡាញ និងស្នើឱ្យលោក ស៊ូឡេម៉ាណេ ប័ររី អាចរស់នៅប្រទេសបារាំងបន្តទៀត ដោយបញ្ជាក់ថា ជនភៀសខ្លួន គឺជាធនធានមនុស្សមានតម្លៃ ។ លើសពីនេះ ម្ចាស់ហាងនំបានសំណូមពរទៅកាន់រដ្ឋាភិបាលបារាំង ដែលកំពុងត្រួតពិនិត្យជនបរទេសគ្មានលិខិតអនុញ្ញាតធ្វើការ ដើម្បីឱ្យពួកគេធ្វើការដោយស្របច្បាប់នៅបារាំង ។

រីឯអ្នកស្រី ជូលៀត ហិកណាត ជាមេធាវីនិយាយថា ៖ «យើងបានទាមទារនៅតុលាការអស់រយៈពេល២ឆ្នាំហើយ តែគ្មានការលើកឡើងពីករណីនេះទេ ។ បើនិយាយអំពីឋានៈជាពលរដ្ឋបារាំង តាមគំនិតខ្ញុំ គឺតុលាការពុំបានពិចារណាទេ» ។

ការធ្វើវិសោធនកម្មច្បាប់ជនអន្តោប្រវេសន៍ គឺជាកូនសោរសំខាន់ដែលប្រធានាធិបតីបារាំង លោក អេមម៉ានូអែល ម៉ាគ្រង ព្យាយាមបង្ហាញឱ្យឃើញថា លោកកាន់តែរឹតបន្តឹងច្បាប់ជាងមុន ដើម្បីទទួលយកជនបរទេសមកធ្វើការនៅបារាំង និងជួយជំរុញសេដ្ឋកិច្ចជាតិផងដែរ ៕ ប្រភព ៖ TNN World

បរទេស៖ ស្ត្រីម្នាក់ឈ្មោះ Jessica Vincent បានទិញថូកែវចំណាស់មួយនៅហាងជជុះ ក្នុង Hanover County រដ្ឋ Virginia សហរដ្ឋអាមេរិកក្នុងតម្លៃ ៣.៩៩ ដុល្លារ ប៉ុន្តែត្រូវបានគេស្គាល់ថាជាថូដ៏កម្រមួយរបស់ស្ថាបត្យករអ៊ីតាលីដ៏ល្បីល្បាញ Carlo Scarpa និងត្រូវបានលក់ដេញថ្លៃក្នុងម្លៃជាង ១០ ម៉ឺនដុល្លារអាមេរិក។

យោងតាមគេហទំព័រអន្តរជាតិ USA Today ដែលបានចុះផ្សាយនៅថ្ងៃទី១៨ ខែធ្នូថា ស្ត្រីដើរទិញឥវ៉ាន់ម្នាក់នៅរដ្ឋ Virginia បានប្រទះឃើញថូកែវចំណាស់មួយក្នុងហាង thrift បន្ទាប់មកនាងក៏ទិញវាក្នុងតម្លៃត្រឹមតែ ៣.៩៩ ដុល្លារអាមេរិកប៉ុណ្ណោះ។ នៅថ្ងៃដដែរនោះ Vincent បានប្រទះឃើញ M តូចមួយនៅខាងក្រោមថូ ហើយគិតថាវាអាចតំណាងឱ្យ Murano ដែលជាកោះអ៊ីតាលីដ៏ល្បីល្បាញសម្រាប់គ្រឿងកញ្ចក់របស់វា។

ថូដ៏កម្រនោះមានពណ៌ ក្រហម និងពណ៌ទឹកសមុទ្រដែលអាចប្រែពណ៌នៅក្នុងស្ថានភាពល្អឥតខ្ចោះ ធ្វើឱ្យនាងគិតថាថូនេះអាចមានតម្លៃ ១,០០០ ទៅ ២,០០០ ដុល្លារ។ បន្ទាប់មកស្ត្រីម្នាក់នោះក៏បានរៀនអំពីថូតាមអ៊ីនធឺណិត ហើយអ្នកដែលចូលចិត្តវត្ថុបុរាណបានចង្អុលបង្ហាញថា ថូរបស់នាងគឺស្រដៀងនឹងស្នាដៃរបស់ស្ថាបត្យករអ៊ីតាលីដ៏ល្បីល្បាញម្នាក់គឺលោក Carlo Scarpa ។

ដូច្នេះហើយ នៅថ្ងៃបន្ទាប់ Vincent ក៏បានផ្ញើរូបភាពនៃថូទៅមជ្ឈមណ្ឌលដេញថ្លៃ Wright ហើយប្រធានមជ្ឈមណ្ឌល Richard Wright បានទាក់ទងទៅនាងភ្លាមៗតែម្តង ដោយប្រធានមជ្ឈមណ្ឌលនោះ បាននិយាយថា៖ «ពេលគាត់បានឃើញរូបថតនោះ គាត់គិតថាវាអស្ចារ្យណាស់។
មិនយូរប៉ុន្មាន ថូកែវដ៏ចំណាស់របស់ Vincent ក៏ត្រូវបានលក់ដេញថ្លៃក្នុងតម្លៃ ១០៧,១០០ ដុល្លារអាមេរិក បន្ទាប់ពីវាត្រូវបានគេកំណត់ថាជាផ្នែកមួយនៃស្នាដៃសិល្បៈបុរាណ និងជាវត្ថុដ៏កម្រមួយរបស់ស្ថាបត្យករក្នុងទសវត្សរ៍ឆ្នាំ ១៩៤០៕