មន្ទីរពេទ្យមិត្តភាពខ្មែរ-សូវៀត ហៅមន្ទីរពេទ្យរុស្សី បានច្រានចោលថាមិនពិតបន្ទាប់ពីមានស្រ្តីម្នាក់បង្ហោះនៅលើបណ្តាញសង្គមដែលខាងមន្ទីរពេទ្យធ្វើឱ្យឪពុកស្រ្តីនោះបាត់បង់ជីវិត និងបានបំភ្លឺថាខាងមន្ទីរពេទ្យប្រឹងជួយអ្នកជំងឺអស់ពីសមត្ថភាពហើយ។ ការបកស្រាយពីខាងមន្ទីរពេទ្យ រួមជាមួយក្រសួងសុខាភិបាលគ្រួសារនៃស.ពអ្នកជំងឺមិនអាចទទួលយកការបកស្រាយនេះបានឡើយ។ ខណៈលោក ខាំ ភូរិ បានលើកឡើងថាក្រសួងសុខាភិបាលគួរឈរនៅខាងពលរដ្ឋ និងស៊ើបអង្កេតករណីនេះឱ្យបានច្បាស់លាស់ និងលើកឡើងទៀតថាលិខិតមួយសន្លឹកការពារខ្លួនឯងគឺដូចដុតកំហឹងគ្រួសារស.ព។
នៅព្រឹកថ្ងៃទី៣០ មករា លោក ខាំ ភូរិ ផលិតករនិងជាអ្នកនិពន្ធបានលើកឡើងយ៉ាងដូច្នេះថា «ក្រសួងសុខាភិបាល គួរឈរខាងពលរដ្ឋ ហើយស៊ើបអង្កេតឱ្យបានច្បាស់លាស់លើករណីនានាដែលពលរដ្ឋបានស្នើសុំឱ្យជួយ។ ការផ្តល់នូវយុត្តិធម៌ដល់គ្រួសារជនរងគ្រោះ ការកែលម្អស្ថាប័នសុខភាពខ្មែរឡើងវិញ អាចស្តាប់សំឡេងពេលរដ្ឋខ្លះបាន។ អ្នកជួបទើបយល់ពីអារម្មណ៍ឈឺចាប់ ខ្ញុំខ្លួនឯងក៏ធ្លាប់ជួបដែរ»។
លោក ខាំ ភូរិ បន្តទៀតថា «លិខិតបកស្រាយមួយសន្លឹក ដែលបានការពារខ្លួនឯង គឺជាការដុតកំហឹងដល់គ្រួសារជនរងគ្រោះទៅវិញទេ ការទទួលស្គាល់ហេតុការណ៍ពិត ដាក់វិន័យដល់មន្ត្រីខ្លួនដែលធ្វើខុស ការបកស្រាយដោយទទួលយកទាំងខុស និងត្រូវ ទើបជាការជួសជុលផ្លូវចិត្តដល់គ្រួសាររងគ្រោះពិតប្រាកដ»។
នៅយប់ថ្ងៃទី២៩ មករា នៅលើផេករបស់មន្ទីរពេទ្យរុស្សី បានចេញលិខិតមួយសន្លឹក ស្រាយបំភ្លឺ និងច្រានចោលទៅលើករណី Facebook មានឈ្មោះ SreyPich Thou (Laboon) ដែលជាកូនស្រីរបស់បុរសដែលស្លាប់ ដោយខាងមន្ទីរពេទ្យអះអាងថា អ្នកជំងឺមានសភាព ធ្ងន់ធ្ងរខ្លាំងខាងក្រុមគ្រូពេទ្យបានព្យាយាមជួយសង្គ្រោះអស់ពីលទ្ធភាព ក្រោយពីបានធ្វើការពិនិត្យ និងវិភាគលទ្ធផលបាន បង្ហាញថាអ្នកជំងឺមានដាច់សរសៃឈាមខួរក្បាលបណ្តាលឲ្យហូរឈាមក្នុងខួរក្បាលធ្ងន់ធ្ងរ។
លិខិតដដែលបានបញ្ជាក់ទៀតថា «ក្រុមគ្រូពេទ្យផ្នែកសង្គ្រោះបន្ទាន់ បានពិភាក្សាជាមួយក្រុមគ្រូពេទ្យផ្នែកឯកទេសវះកាត់ខួរក្បាល និងបានពន្យល់អំពីស្ថានភាពធ្ងន់ធ្ងររបស់អ្នកជំងឺ ដែលហួសពីលទ្ធភាពក្នុងការជួយសង្គ្រោះតាមមធ្យោបាយ វេជ្ជសាស្រ្តផ្សេងៗរួមទាំងការវះកាត់ខួរក្បាលផងដែរ។ ប៉ុន្តែក្រុមគ្រួសារអ្នកជំងឺបានសម្រេចចិត្តសុំយក អ្នកជំងឺទៅព្យាបាលបន្តនៅប្រទេសវៀតណាម។ បន្ទាប់មកក្រុមគ្រួសារអ្នកជំងឺបានទំនាក់ទំនងមកផ្នែក រថយន្តសង្គ្រោះបន្ទាន់របស់មន្ទីរពេទ្យ ដើម្បីពិភាក្សាអំពីការបញ្ជូនអ្នកជំងឺបន្តទៅព្យាបាលនៅប្រទេស វៀតណាម ប៉ុន្តែក្រុមគ្រួសារអ្នកជំងឺបានសម្រេចចិត្តជ្រើសរើសយកសេវារថយន្តសង្គ្រោះបន្ទាន់ខាងក្រៅ ដោយខ្លួនឯង ហើយមន្ទីរពេទ្យបានសម្របសម្រួលអនុញ្ញាតអោយចេញទៅព្យាបាលបន្តនៅប្រទេស វៀតណាម»។
យ៉ាងណាមិញជុំវិញការស្រាយបំភ្លឺនេះប្រជាពលរដ្ឋ រួចទាំងគ្រួសារនៃសពមិនអាចទទួលយកបាននូវការស្រាយបំភ្លឺពីខាងមន្ទីរពេទ្យនោះទេ។ គណនី SreyPich Thou បានលើកឡើងចំពោះលិខិតបំភ្លឺថាបើស្ថាប័ននៅតែគាំទ្រ បុគ្គលិកនិងកិត្តិយសស្ថាប័នខ្លួនជាជាងទទួលយកការពិត មិនឃើញទទួលស្គាល់ហើយយកមកកែតម្រូវ ព្រោះតែការមានៈនេះហើយទើបបងប្អូនអស់ជំនឿចិត្ត និងមានជនរងគ្រោះច្រើនបែបនេះ៕
