សហរដ្ឋអាមេរិក ៖ ប្រធានាធិបតីអាមេរិក លោក ចូ បៃឌិន មើលទៅគេចមិនផុតពីរឿងរ៉ាវអាក្រក់ៗទេ ក្នុងអំឡុងពេលលោកធ្វើជាមេដឹកនាំសេតវិមានអស់រយៈពេលជិត៤ឆ្នាំ ។ លើសពីនេះ លោកអាចនឹងចុះចាញ់ក្នុងការបោះឆ្នោតប្រធានាធិបតីអាណត្តិទី២ នៅចុងឆ្នាំ២០២៤ នេះ បើទោះជាគូប្រជែងរបស់លោក គឺលោក ដូណាល់ ត្រាំ មានរឿងក្តីព្រហ្មទណ្ឌនៅតុលាការ ហើយអាចជាប់ពន្ធនាគារក្តី ។

ក្នុងអំឡុងពេលដឹកនាំប្រទេស លោក ចូ បៃឌិន មានតែភាពបរាជ័យ ហើយជនជាតិអាមេរិកនឹងមិនជ្រើសរើសលោកធ្វើជាប្រធានាធិបតីអាមេរិកបន្តទៀតទេ ពីព្រោះលោក ដូណាល់ ត្រាំ បានបង្កការខូចខាតយ៉ាងច្រើននៅសម័យមុន ដោយសារការធ្វើសង្គ្រាមសេដ្ឋកិច្ចជាមួយប្រទេសចិន ។

វិបត្តិដែលលោក ចូ បៃឌិន កំពុងប្រឈមនោះ គឺការចុះចាញ់ក្នុងសង្គ្រាមនៅប្រទេសអ៊ុយក្រែនជាមួយរុស្ស៊ី ខណៈសហរដ្ឋអាមេរិកបានចំណាយប្រាក់រាប់លានដុល្លារអាមេរិកទៅក្នុងសង្គ្រាមនេះ ។ វាជាការវាយតម្លៃខុសខ្លាំងណាស់ ហើយគេរំពឹងថា ការដាក់ទណ្ឌកម្មសេដ្ឋកិច្ចលើរុស្ស៊ី នឹងធ្វើឱ្យអាមេរិក និងអង្គការ NATO ឈ្នះសង្គ្រាម ។ វាជាការចុះចាញ់យ៉ាងខ្លាំងក្នុងសង្គ្រាមរយៈពេល២០ឆ្នាំ នៅប្រទេសអាហ្វហ្គានីស្ថាន ដែលកងទ័ពអាមេរិកបានរត់ចេញពីទីក្រុងកាប៊ុល នាពេលកន្លងមក ។ វាមិនខុសគ្នាពីការរត់គេចពីទីក្រុងសាយហ្គន ពេលចុះចាញ់សង្គ្រាមវៀតណាម នៅឆ្នាំ១៩៧៥ នោះទេ ។

ចុងក្រោយ លោក ចូ បៃឌិន នឹងប្រឈមមុខជាមួយអភិបាលរដ្ឋតិចសាស់ ដែលបានប្រកាសថា នឹងមិនព្រមបើកព្រំដែនឱ្យជនភៀសខ្លួនមកពីអាមេរិកខាងត្បូងចូលក្នុងរដ្ឋតិចសាស់ជាដាច់ខាត ។ អភិបាលរដ្ឋតិចសាស់ លោក Greg Abbott បានពង្រាយកម្លាំងការពារជាតិនៅតាមព្រំដែន ព្រមទាំងមានរបងលួសបន្លា ដើម្បីមិនឱ្យជនភៀសខ្លួនពីអាមេរិកខាងត្បូងឆ្លងកាត់ព្រំដែន ។

លោក ចូ បៃឌិន មានគោលនយោបាយដោះលែងជនភៀសខ្លួនពីព្រំដែនភាគខាងត្បូងប្រទេស រហូតដល់៧លាន២សែននាក់ ។ កាលពីខែធ្នូ ឆ្នាំ២០២៣ មានជនភៀសខ្លួនបានឆ្លងកាត់ព្រំដែនរហូតដល់៣សែននាក់ និងមានបញ្ហាជាច្រើនក្នុងការថែទាំពួកគេ ។

រដ្ឋនៅភាគខាងត្បូងមានព្រំដែនជាប់ជាមួយប្រទេសម៉ិកស៊ិកបានជួបបញ្ហាមិនឈប់ឈរ ដោយសារមិនអាចទប់ស្កាត់ជនភៀសខ្លួនបាន សូម្បីតែនៅសម័យរបស់លោក ដូណាល់ ត្រាំ ដែលមានការសាងសង់របងយ៉ាងវែងក្តី ប៉ុន្តែគេមិនអាចទប់ស្កាត់ជនភៀសខ្លួនអស់ទេ ដោយសារមានបញ្ហាថវិកា និងដីការបស់តុលាការកំពូល ។

វិបត្តិរវាងរដ្ឋតិចសាស់ជាមួយរដ្ឋាភិបាលកណ្តាលស្ទើរតែផ្ទុះឡើង នៅពេលរដ្ឋតិចសាស់ប្រកាសថា ខ្លួននឹងធ្វើជារដ្ឋឯករាជ្យ និងសុំផ្តាច់ខ្លួនចេញពីសហរដ្ឋអាមេរិក ។ កន្លងមក មានមន្ត្រីមកពីគណបក្ស Republican បានគាំទ្រការផ្តាច់ខ្លួននេះ រហូតដល់២៥នាក់ ។

រដ្ឋតិចសាស់គ្រោងប្រារព្ធខួបបុណ្យឯករាជ្យពីប្រទេសម៉ិកស៊ិក ដែលបានកើតឡើងកាលពីថ្ងៃទី២ ខែមីនា ឆ្នាំ១៨៣៧ ។ ហេតុនេះ បើស្ថានការណ៍កាន់តែអាក្រក់ រដ្ឋតិចសាស់អាចឆ្លៀតឱកាសយកថ្ងៃតែមួយនេះដើម្បីផ្តាច់ខ្លួនពីសហរដ្ឋអាមេរិក ។ រដ្ឋតិចសាស់ មានពលរដ្ឋរស់នៅចំនួន៣៤លាននាក់ និងមានទំហំសេដ្ឋកិច្ចធំលំដាប់ទី២ បន្ទាប់ពីរដ្ឋកាលីហ្វ័រញ៉ា ដែលមានពលរដ្ឋចំនួន៤០លាននាក់ ។ ប៉ុន្តែរដ្ឋតិចសាស់មានផ្ទៃដីធំជាង ព្រមទាំងមានធនធានធម្មជាតិ ដូចជា ៖ ប្រេងឥន្ធនៈ និងឧស្ម័នធម្មជាតិ ។

នេះជាវិបត្តិផ្ទៃក្នុងរបស់សហរដ្ឋអាមេរិក ហើយអាចឈានទៅកើតសង្គ្រាមបាន ប្រសិនបើរដ្ឋតិចសាស់ប្រកាសផ្តាច់ខ្លួនចេញពីសហរដ្ឋអាមេរិក ហើយវាអាចធ្វើឱ្យរដ្ឋផ្សេងទៀត ដូចជា ៖ រដ្ឋកាលីហ្វ័រញ៉ា និងរដ្ឋផ្លរីដា ប្រកាសផ្តាច់ខ្លួនដែរ ។ គេចាត់ទុកថា ទឹកដីសហរដ្ឋអាមេរិកមានប្រទេសចំនួន៤៨ នៅរួមគ្នា និងបង្កើតទៅជាសហរដ្ឋ ដោយមានរដ្ឋហាវ៉ៃ និងរដ្ឋអាឡាស្កា ស្ថិតនៅឆ្ងាយពីរដ្ឋផ្សេងៗ ។ ហេតុនេះ វាអាចមានបញ្ហាដូចគ្នាដែរ ដោយសារប្រទេសរុស្ស៊ីកំពុងទាមទារយករដ្ឋអាឡាស្កា ខណៈរុស្ស៊ីបានលក់រដ្ឋនេះឱ្យអាមេរិកក្នុងតម្លៃថោក ។

បើរដ្ឋតិចសាស់ប្រកាសផ្តាច់ខ្លួនពិតមែននោះ ហើយរដ្ឋផ្សេងទៀតដែលមានសេដ្ឋកិច្ចលូតលាស់ខ្លាំងធ្វើតាមដែរនោះ វានឹងធ្វើឱ្យខូចខាតយ៉ាងធ្ងន់ធ្ងរដល់អាមេរិក ។ រីឯអំណាចសេដ្ឋកិច្ច និងប្រភពធនធានធម្មជាតិរបស់អាមេរិក ក៏កាន់តែតិចជាងមុន ។

នយោបាយអាមេរិកគ្រប់គ្រងដោយគណបក្សចំនួន២ គឺគណបក្ស Republicans និងគណបក្ស Democrats គិតចាប់តាំងពីថ្នាក់តំបន់ រហូតដល់ថ្នាក់អភិបាលរដ្ឋ ។ ហេតុនេះ វាបង្កើតបរិយាកាសប្រកួតប្រជែង និងមានបញ្ហាការប្រមូលផ្តុំក្រុមមនុស្ស ដូចជា ៖ ក្រុម Negroes និង Latinos ។

សហរដ្ឋអាមេរិកមានផ្ទៃដីធំទូលំទូលលាយ និងមានពលរដ្ឋរស់នៅមិនក្រោម៣៥០លាននាក់ទេ ឬស្មើប្រមាណ៤% នៃចំនួនពលរដ្ឋនៅលើពិភពលោក ។ អាមេរិកជាប្រទេសមហាអំណាចផ្នែកសេដ្ឋកិច្ច, មានអំណាចខាងអាវុធធ្វើសង្គ្រាម និងមានប្រាក់ដុល្លារគ្រប់គ្រងសេដ្ឋកិច្ចពិភពលោក ។ ទោះយ៉ាងណា អំណាចរបស់អាមេរិកកំពុងតែចុះខ្សោយ ព្រោះត្រូវប្រឈមមុខនឹងក្រុមប្រទេសផ្សេងៗ ដែលបានងាកទៅសេពគប់ជាមួយប្រទេសរុស្ស៊ី និងចិន ។

ការគាំទ្រប្រទេសអ៊ីស្រាអែលក្នុងការធ្វើសង្គ្រាមសម្លាប់ពលរដ្ឋប៉ាឡេស្ទីន បានធ្វើឱ្យអាមេរិកស្ថិតនៅឯកោពីគេ ហើយការចុះចាញ់ក្នុងសង្គ្រាមរវាងប្រទេសអ៊ុយក្រែនជាមួយរុស្ស៊ី បានធ្វើឱ្យការជឿជាក់ក្នុងក្រុមប្រទេសអង្គការ NATO និងអឺរ៉ុបធ្លាក់ចុះ ។

បើរដ្ឋតិចសាស់បំបែកខ្លួនចេញពីអាមេរិកពិតមែន ត្រូវឆ្លើយសំណួរទៅកាន់ពិភពលោកថា ភាពជាអ្នកដឹកនាំពិភពលោកនឹងបញ្ចប់ ហើយគ្មានឱកាសទៀតទេ ។ ចំណុចសំខាន់ មេដឹកនាំប្រទេសក្រោយការបោះឆ្នោត មិនថាលោក ចូ បៃឌិន ឬលោក ដូណាល់ ត្រាំ តើជាបុគ្គលធ្វើឱ្យអាមេរិកល្អប្រសើរឡើង ឬទន់ខ្សោយជាងមុន ឬជាពេលវេលាដួលរលំប្រទេស ដូចហេតុការណ៍ធ្លាប់កើតឡើងនៅទីក្រុងរ៉ូម នាពេលមុននេះ ៕

ជាការពិតណាស់ សម្រាប់ភ្ញៀវទេចរណាដែលចង់ទទួលបានបទពិសោធន៍ធ្វើដំណើរដ៏ល្អបំផុតដែលមិនអាចបំភ្លេចបាន ក៏ដូចជាមិនចង់ខ្ជះខ្ជាយពេលវេលាច្រើន រួមទាំងចង់ស្វែងយល់ពីពិភពលោកកាន់តែច្បាស់ អ្នកអាចទៅទស្សនាកម្សាន្ត និងបង្កើតអនុស្សាវរី នៅកន្លែងកំពូលទាំង ១០ ដូចខាងក្រោមនេះ។ នេះបើយោងតាម National Geographic ដែលបានប្រកាសពីបទពិសោធន៍ធ្វើដំណើរ “ល្អបំផុត” ចំនួន ១០ សម្រាប់ឆ្នាំ ២០២៤ ដែលស្ថិតនៅក្នុងបញ្ជី “គោលដៅដ៏ល្អបំផុតរបស់ពិភពលោក”។ បទពិសោធន៍ទាំងនេះមានចាប់ពីគោលដៅល្បីៗ រហូតដល់កន្លែងដែលមិនសូវស្គាល់។

១.ជិះសេះដើម្បីរុករកសាហ្វារីនៅប្រទេសកេនយ៉ា២.ការរត់ម៉ារ៉ាតុងអូឡាំពិកនៅទីក្រុងប៉ារីសប្រទេសបារាំង៣.ជិះស្គីនៅតំបន់បេតិកភណ្ឌ UNESCO ក្នុងរដ្ឋ Georgia៤.មើលសត្វខ្លាឃ្មុំនៅឧទ្យានជាតិ Katmai រដ្ឋ Alaska សហរដ្ឋអាមេរិក៥.ស្តាប់តន្ត្រីបន្តផ្ទាល់នៅទីក្រុង Kyoto ប្រទេសជប៉ុន៦.ដំណើរកម្សាន្តតាមដងទន្លេ Magdalena ក្នុងប្រទេសកូឡុំប៊ី៧.ជិះស្គីលើផ្លូវលេខ 66 ក្នុងរដ្ឋ New Mexico សហរដ្ឋអាមេរិក៨.ទៅមើលផ្ទាំងគំនូរថ្មនៅប្រទេសអាល់ហ្សេរី៩.មុជទឹកជាមួយត្រីឆ្លាមនៅឆ្នេរ Coral Coast ប្រទេសអូស្ត្រាលី១០.ឡើងលើភ្នំភ្លើងនៅប៉ាណាម៉ា។

សម្រាប់បញ្ជីនៃបទពិសោធន៍ធ្វើដំណើរកំពូលទាំង ១០ ដែលត្រូវបានជ្រើសរើសដោយអ្នករុករក National Geographic អ្នកថតរូប និងអ្នកកែសម្រួល ដើម្បីចងក្រងចំណាត់ថ្នាក់នេះ អ្នកនិពន្ធបានប្រឹក្សាយោបល់ជាមួយអ្នកជំនាញសកលតាំងពីខែមេសាមកម្លេះ ដែលនេះធ្វើឱ្យបញ្ជីនេះកាន់តែមានលក្ខណៈពិសេស ហើយអ្នកទស្សនានឹងមានភាពងាយស្រួលក្នុងការធ្វើដំណើរឱ្យឆាប់ដល់គោលដៅ។

នេះបើយោងតាមអ្នកតំណាងទស្សនាវដ្តីបាននិយាយថា “យើងមិនគ្រាន់តែនិយាយអំពីទីតាំងប៉ុណ្ណោះទេ ប៉ុន្តែផ្តោតលើបទពិសោធន៍ដែលអ្នកអាចធ្វើបាននៅទីនោះ ដោយបង្កើតអនុស្សាវរីល្អឥតខ្ចោះមិនអាចបំភ្លេចបាន”។ លើសពីនេះ បញ្ជីនេះក៏ត្រូវបានចាត់ថ្នាក់តាមលំដាប់លំដោយពីខ្ពស់ទៅទាបផងដែរ ដើម្បីជួយអ្នកអានបង្កើនប្រសិទ្ធភាពអាទិភាពរបស់ពួកគេសម្រាប់ការធ្វើដំណើរ៕

ប្រទេសវៀតណាម ៖ រូបថតអាពាហ៍ពិពាហ៍របស់គូស្នេហ៍១គូនៅទីក្រុងហាណូយ ប្រទេសវៀតណាម ក្នុងអំឡុងពេលសីតុណ្ហភាពក្នុងទីក្រុងនេះបានធ្លាក់ចុះមកនៅត្រឹមតែ៧អង្សារសេ បានធ្វើឱ្យមហាជនភ្ញាក់ផ្អើលយ៉ាងខ្លាំង ជាពិសេស ពេលពួកគេបានឃើញឧបករណ៍នៅខាងក្រោយឆាក ។ ឧបករណ៍ពិសេសដែលគូស្នេហ៍នេះយកមកតុបតែងធ្វើឆាកនោះ គឺជាភួយពណ៌ស ។

សារព័ត៌មានបរទេសផ្សាយថា នារីម្នាក់អាយុ២៦ឆ្នាំ បានទាក់ទាញចំណាប់អារម្មណ៍យ៉ាងខ្លាំងពីមហាជនទូទៅ នៅពេលនាងបង្ហោះរូបថត Pre-Wedding ដ៏សែនកក់ក្តៅជាមួយភួយពណ៌ស ក្នុងរដូវរងានៅទីក្រុងហាណូយ ដែលមានសីតុណ្ហភាពត្រឹមតែ៧អង្សារសេប៉ុណ្ណោះ ។

នាងបានរៀបរាប់ពីរូបថតទាំងនេះថា ៖ «ខ្ញុំ និងប្តី ចង់បានរូបថតយ៉ាងពិសេសសម្រាប់ថ្ងៃអាពាហ៍ពិពាហ៍ ហើយមើលទៅដូចធម្មជាតិ និងជីវិតរស់នៅប្រចាំថ្ងៃ ស្របនឹងទីក្រុងហាណូយមានអាកាសធាតុត្រជាក់ខ្លាំង ។ ហេតុនេះ យើងទាំងពីរនាក់ចង់ថតរូប ដើម្បីចងចាំពីពេលវេលាដ៏ស្រស់ស្អាតក្នុងឱកាសនោះ ។ នេះជាឱកាសដ៏ពិសេស ទើបខ្ញុំជ្រើសយកភួយពណ៌សធំមួយមកធ្វើជាឧបករណ៍តុបតែងឆាក» ។

គូស្នេហ៍នេះចង់ថតយករូបភាពមើលទៅធម្មតាបំផុត ហើយស្និទ្ធស្នាលជាមួយគ្នាទៀតផង ។ នៅពេលពួកគេប្រាប់ពីគំនិតនេះទៅក្រុមថតរូប ក្រុមថតរូបក៏យល់ព្រមថតរូបភ្លាមៗតែម្តង ។ ទោះយ៉ាងណា មុនពេលពួកគេថតរូបនេះ១ថ្ងៃ មានភ្លៀងធ្លាក់យ៉ាងខ្លាំងនៅទីក្រុងហាណូយ ហើយធ្វើឱ្យគ្រប់គ្នាបារម្ភយ៉ាងខ្លាំង ប៉ុន្តែសំណាងល្អ នៅថ្ងៃបន្ទាប់ បរិយាកាសល្អឡើងវិញ ហើយពួកគេអាចថតរូបនៅកណ្តាលថ្ងៃបាន ។

ពេលនោះ បរិវេណនៅជុំវិញកន្លែងថតរូប Pre-Wedding របស់គូស្នេហ៍នេះ គ្មានការធ្វើដំណើរទៅមកទេ ។ ដូច្នេះ វាមិនប៉ះពាល់ដល់អ្នកដទៃឡើយ ហើយគ្រប់យ៉ាងបានដំណើរការទៅយ៉ាងរលូន និងថតរួចរាល់ក្នុងរយៈពេលត្រឹមតែ៣០នាទីប៉ុណ្ណោះ ។

ស្ត្រីជាកូនក្រមុំបន្តថា ៖ «ខ្ញុំ និងប្តី បាននិយាយលេងសើចថា ពួកយើងជ្រើសរើសថ្ងៃដែលត្រជាក់បំផុតសម្រាប់ថតរូប ដើម្បីឱ្យយើងមានការចងចាំសម្រាប់កូនចៅរបស់យើង ។ ពិតហើយ នេះជាលើកដំបូងដែលខ្ញុំ និងស្វាមី បានថតរូបគូបែបនេះ ។ ដូច្នេះ អ្វីគួរឱ្យចាប់អារម្មណ៍បំផុត គឺស្វាមីខ្ញុំបញ្ចេញស្ទាយថតរូបល្អៗ និងដូចអ្នកជំនាញខ្លាំងណាស់ ហើយខ្ញុំមិនធ្លាប់ធ្វើបែបនេះពីមុនទេ» ។

រូបថតរបស់នាងបានទាក់ទាញចំណាប់អារម្មណ៍យ៉ាងខ្លាំងនៅក្នុងបណ្តាញសង្គម ហើយមានអ្នកចូលបញ្ចេញមតិ និងចែកចាយរូបថតអាពាហ៌ពិពាហ៍នេះរាប់ពាន់នាក់ ។ មនុស្សភាគច្រើនចូលចិត្តរូបថតអាពាហ៍ពិពាហ៍គួរឱ្យស្រឡាញ់ និងកក់ក្តៅនេះ ខណៈនៅទីក្រុងហាណូយមានអាកាសធាតុត្រជាក់ខ្លាំង ៕

បរទេស៖ ស្ត្រីជនជាតិទួរគីម្នាក់បានដាក់ពាក្យប្តឹងលែងលះប្តី មូលហេតុគឺដោយសារប្តីកខ្វក់ពេក មិនដែលងូតទឹក ៧-១០ ថ្ងៃជាប់គ្នា និងដុសធ្មេញតែម្តងក្នុងមួយសប្តាហ៍ ធ្វើឱ្យនាងមិនអាចទ្រាំនឹងក្លិនស្អុយបានឡើយ។

កាលពីថ្ងៃទី៣១ ខែមករា ឆ្នាំ២០២៤ យោងតាមគេហទំព័រ Audicity Central បានរាយការណ៍អំពីរឿងរ៉ាវដែលបានកើតឡើងនៅក្នុងប្រទេសទួរគី បន្ទាប់ពីប្រពន្ធបានប្តឹងទៅតុលាការក្រុងដើម្បីសុំលែងលះប្តី ដោយផ្តល់ហេតុផលថាប្តីកខ្វក់ពេក។ ប្រពន្ធបាននិយាយដូច្នេះថា ប្តីពាក់អាវដដែលៗ ៥ ថ្ងៃមកហើយ មិនងូតទឹក ៧-១០ ថ្ងៃជាប់ៗគ្នា ហើយក្នុង ១ ឬ ២ អាទិត្យដុសធ្មេញតែម្តងទេ បណ្តាលឱ្យធុំក្លិនស្អុយខ្លាំងពេក ទ្រាំលែងបានទើបសម្រេចចិត្តទៅតុលាការដើម្បីសុំលែងលះប្តី។បន្ទាប់មក តុលាការក៏បានកោះហៅអ្នកស្គាល់គ្នា ហើយសហការីរបស់ប្តីនាងក៏បានមកផ្តល់សក្ខីកម្មនៅតុលាការ ដោយអ្នករាល់គ្នាបាននិយាយដូចគ្នាអំពីបញ្ហាខ្វះអនាម័យរបស់ស្វាមីនាង។ មិត្តរួមការងារម្នាក់របស់បុរសស្វាមីនោះបាននិយាយនៅក្នុងតុលាការថាក្លិនខ្លួនរបស់បុរសនេះគឺអាក្រក់ខ្លាំងណាស់ ហើយរាល់ពេលដែលយើងធ្វើការជាមួយគ្នា គាត់មានអារម្មណ៍ថាគាត់មិនអាចបន្តនៅក្បែរបុរសដែលជាស្វាមីនាងបានឡើយ។

ទោះបីជាហេតុផលនៃការដាក់ពាក្យសុំលែងលះអាចស្តាប់ទៅចម្លែកក៏ដោយ ប៉ុន្តែយោងទៅតាមច្បាប់ទួរគី តុលាការទទួលស្គាល់ហេតុផលពីរសម្រាប់ការស្នើសុំលែងលះ។ ក្រុមទីមួយគឺជាហេតុផលទូទៅ ហើយក្រុមទីពីរគឺជាហេតុផលពិសេស។ បញ្ហាខ្វះអនាម័យរបស់ស្វាមីធ្លាក់ចូលទៅក្នុងប្រភេទពិសេស ហើយតុលាការបានទទួលយកពាក្យបណ្ដឹងលើកនេះ។ នៅទីបំផុត តុលាការក៏បានសម្រេចឱ្យប្រពន្ធលែងលះប្តី ហើយបានបង្គាប់ឱ្យបុរសដែលជាអតីតស្វាមីនោះប្រគល់ប្រាក់ជាង ១៦,០០០ ដុល្លារអាមេរិកជាសំណង។

គួរបញ្ជាក់ដែរថា នេះមិនមែនជាលើកទីមួយទេដែលការលែងលះត្រូវបានគេប្តឹងជុំវិញបញ្ហាក្លិនខ្លួន និងខ្វះអនាម័យ។ កាលពីឆ្នាំ ២០១៨ បុរសតៃវ៉ាន់ម្នាក់បានប្តឹងលែងលះប្រពន្ធ ដោយសារប្រពន្ធងូតទឹកបានតែម្តងក្នុងមួយឆ្នាំ រីឯករណីមួយទៀតយុវជនឥណ្ឌាម្នាក់ក៏បានសុំលែងលះប្រពន្ធផងដែរ ព្រោះនាងមិនងូតទឹករាល់ថ្ងៃ៕

សារព័ត៌មានបរទេសរាយការណ៍ថា ក្រុមហ៊ុនស្រាវជ្រាវមហាសមុទ្របានបង្ហាញភស្តុតាងថ្មី និងអះអាងថា វាជាបំណែកយន្តហោះរបស់អ្នកនាង Amelia Earhart គឺជាអ្នកបើកយន្តហោះស្រី ដែលព្យាយាមបង្កើតកំណត់ត្រាជាស្ត្រីដំបូងគេហោះហើរនៅជុំវិញពិភពលោកដោយជោគជ័យ ។ ក្រោយមក យន្តហោះរបស់នាងបានបាត់យ៉ាងអាថ៌កំបាំងនៅមហាសមុទ្រប៉ាស៊ីហ្វិក នៅឆ្នាំ១៩៣៧ ។

សារព័ត៌មានរាយការណ៍ថា អ្នកនាង Amelia Earhart បានបើកយន្តហោះប្រភេទ Lockheed 10-E Electra ហើយបានបាត់ខ្លួនយ៉ាងអាថ៌កំបាំងនៅមហាសមុទ្រប៉ាស៊ីហ្វិក នៅឆ្នាំ១៩៣៧ ក្នុងអំឡុងពេលនាងព្យាយាមបង្កើតកំណត់ត្រាជាស្ត្រីដំបូងគេហោះហើរនៅជុំវិញពិភពលោកដោយជោគជ័យ ។ ពេលនោះ នាងបានកំណត់គោលដៅថា នាងនឹងបើកយន្តហោះឆ្លងកាត់មហាសមុទ្រប៉ាស៊ីហ្វិកឱ្យបាន ។

ចាប់តាំងពីពេលនោះមក ក៏មានការសន្និដ្ឋានផ្សេងៗគ្នាអំពីហេតុការណ៍ដ៏អាថ៌កំបាំងនេះថា តើមានអ្វីកើតឡើងជាមួយការបាត់ខ្លួនយ៉ាងអាថ៌កំបាំងរបស់នាង ។ ទោះយ៉ាងណា គ្មានអ្នកណាម្នាក់បានដឹងពីជោគវាសនារបស់នាងទេ ហើយក៏គ្មានអ្នកណាដឹងថា តើយន្តហោះដែលនាងបើកនោះបាត់ទៅណាដែរ?

លោក Tony Romeo គឺជាអ្នកបើកយន្តហោះ និងជាអតីតមន្ត្រីស៊ើបការណ៍សម្ងាត់របស់កងទ័ពអាកាសអាមេរិកបានបង្ហោះរូបភាព Sonar នៅក្នុង Instagram ។ រូបភាពដែលបង្ហោះនេះមិនច្បាស់ទេ ហើយវាមានរូបរាងស្រដៀងគ្នានឹងយន្តហោះ Electra ដែលនាង Amelia Earhart បើកពេលនាងបាត់ខ្លួន ខណៈនាងព្យាយាមបើកយន្តហោះជុំវិញពិភពលោក ។

ការថតរូប Sonar គឺជាឧបករណ៍សម្រាប់គូសផែនទីបាតមហាសមុទ្រ ដោយការប្រើប្រាស់រលកសំឡេងវាស់ចម្ងាយពីបាតសមុទ្រ បន្ទាប់មក ប្រើប្រាស់បច្ចេកវិទ្យារុករកយន្តហោះរបស់នាង Amelia Earhart រហូតដល់ឃើញភាពខុសប្រក្រតីក្នុងមហាសមុទ្រប៉ាស៊ីហ្វិក ។ វាមានជម្រៅ៤.៨៧៧ម៉ែត្រ ហើយគេបារកឃើញវត្ថុលស្រដៀងនឹងយន្តហោះមានទំហំតូច ។

លោក Tony Romeo និយាយថា ៖ «វាអាចជារឿងដ៏រំភើបបំផុត ដែលខ្ញុំធ្លាប់ធ្វើក្នុងជីវិត ។ ខ្ញុំមានអារម្មណ៍ដូចជាកូនក្មេងអាយុ១០ឆ្នាំ ដែលកំពុងតាមរកទ្រព្យសម្បត្តិ» ។ បើវាជាការពិត ការស្វែងរកលើកនេះនឹងភារកិច្ចជោគជ័យគួរឱ្យភ្ញាក់ផ្អើល ប៉ុន្តែកន្លងមក ក៏មានការព្យាយាមជាច្រើនដើម្បីទម្លាយអាថ៌កំបាំងនៃការបាត់ខ្លួនរបស់នាង Amelia Earhart ។

កាលពីឆ្នាំ២០១៨ គេបានវិភាគទៅលើឆ្អឹងដែលបានប្រទះឃើញនៅលើកោះនិកុម៉ារ៉ូរុ នៅមហាសមុទ្រប៉ាស៊ីហ្វិក ហើយលទ្ធផលវិភាគបង្ហាញថា ឆ្អឹងទាំងនេះជាឆ្អឹងរបស់នាង Amelia Earhart ខណៈគេបានរកឃើញឆ្អឹងទាំងនេះនៅឆ្នាំ១៩៤០ ។ ពីដំបូង គេសន្និដ្ឋានថា វាជាឆ្អឹងរបស់មនុស្សប្រុស ប៉ុន្តែក្រោយមក គេក៏បានវិភាគថា វាជាឆ្អឹងមនុស្សស្រី ហើយវាអាចទៅរួចថា នេះជាឆ្អឹងរបស់នាង Amelia Earhart ៕