អ្នកគាំទ្រទើបតែសោកស្តាយចំណងស្នេហ៍គូស្នេហ៍ហ្វីលីពីនមួយគូបែកគ្នាក្រោយពីទាក់ទងគ្នាបាន១១ឆ្នាំស្រាប់តែថ្មីៗនេះគូស្នេហ៍ហ្វីលីពីនមួយគូទៀតក៏ប្រកាសចែកផ្លូវគ្នាបន្ទាប់ពីមានទំនាក់ទំនងស្នេហារហូតទៅដល់១២ឆ្នាំឯណោះ ដែលធ្វើឱ្យអ្នកគាំទ្រមានការសោកស្តាយយ៉ាងខ្លាំង។

កាលពីថ្ងៃទី ២៣ ធ្នូ តារាសម្តែង Kim Chiu បានបង្ហោះនៅលើបណ្តាញសង្គមរបស់ខ្លួនប្រាប់ទៅអ្នកគាំទ្រថាចំណងស្នេហា១២ឆ្នាំរបស់នាងនិងមិត្តប្រុសតារាសម្ដែង Xian Lim បានឈានដល់ទីបញ្ចប់ហើយ។ ជាមួយគ្នានេះ តារាសម្តែងកូនកាត់អាម៉េរិក ហ្វីលីពីន Xian Lim បានលុបវីដេអូភាគច្រើនរបស់ខ្លួនរួមទាំងវីដេអូជាមួយអតីតមិត្តស្រីចេញពីប៉ុស្តិ៍ឆាណែល YouTube របស់គេផងដែរមុនពេលខាងស្រីប្រកាសជាសាធារណៈ។

តារាសម្តែង Kim Chiu បាននិយាយលើបណ្តាញសង្គមថា “យើងសូមអរគុណអ្នកគាំទ្ររបស់យើងទាំងអស់សម្រាប់ការស្រឡាញ់និងការគាំទ្ររបស់ពួកគេ ប៉ុន្តែឥឡូវនេះយើងសុំសម្តែងការដឹងគុណចំពោះភាពស្មោះត្រង់របស់យើង ហើយផ្តល់ឱ្យយើងនូវភាពឯកជនដែលយើងត្រូវការនៅពេលយើងចាប់ផ្តើមជំពូកថ្មីនៃជីវិតរបស់យើង” ។ ទន្ទឹមនឹងសំណេរនេះតារាសម្តែងស្រីរូបនេះក៏ភ្ជាប់ជាមួយរូបផ្អែមល្ហែមរបស់ខ្លួនជាមួយមិត្តប្រុស Xian Lim ជារូបភាពពណ៌សខ្មៅផងដែរ។

ក្រោយពីអតីតមិត្តស្រីប្រកាសប្រាប់អ្នកគាំទ្របញ្ចប់ទំនាក់ទំនងរយៈពេល១២ឆ្នាំរបស់ពួកគេ ងាកទៅកាន់តារាសម្តែង Xian Lim ក៏បានបង្ហោះលើបណ្ដាញសង្គមដើម្បីសម្ដែងការដឹងគុណដល់អតីតមិត្តស្រី Kim Chiu កាលពីថ្ងៃទី២៤ ធ្នូ ដោយបានអរគុណចំពោះក្តីស្រលាញ់របស់មិត្តស្រីក្នុងទំនាក់ទំនងរបស់ពួកគេកន្លងមកនេះ និងជូនពរអតីតមិត្តស្រីខ្លួនមានសុភមង្គល និងសេចក្តីស្រឡាញ់ដែលអតីតមិត្តស្រីចង់បាន។

តារាសម្តែង Xian Lim មានអាយុ៣៤ឆ្នាំ និងតារាសម្តែង Kim Chiu មានអាយុ៣៣ឆ្នាំ បានចាប់ផ្តើមទាក់ទងគ្នាក្នុងឆ្នាំ ២០១២ និងបានបញ្ជាក់ថាពីទំនាក់ទំនងជាសាធារណក្នុងឆ្នាំ២០១៨។ អ្នកទាំងពីរធ្លាប់បានចាប់ដៃគូសម្តែងក្នុងរឿងភាគបែបមនោសញ្ចេតនាបែបកំប្លែង «My Binondo Girl» ដែលចាក់ផ្សាយពីឆ្នាំ ២០១១ ដល់ ២០១២ , ភាពយន្ត «Must Date a Playboy រួមទាំងរឿងមួយចំនួនទៀត៕

នាឡិកាម៉ាកល្បីៗក្នុងឆ្នាំ ២០២៣ នេះភាគច្រើនគឺសុទ្ធតែជាផលិតផលរបស់ Apple, Samsung, និង Huawei ដោយផលិតផលទាំងនេះមានការរចនាដ៏ស្រស់ស្អាត ទម្ងន់ស្រាល មុខងារឆ្លាតវៃជាច្រើន និងថាមពលថ្មល្អ។ ដូច្នេះហើយ ខាងក្រោមនេះគឺជាម៉ាកនាឡិកាឆ្លាតវៃល្បីៗចំនួន ៥ ប្រចាំឆ្នាំ ២០២៣៖

១. Huawei Watch GT4៖ នាឡិកាដៃ Huawei មានការរចនាថ្មីទាំងស្រុង បើប្រៀបធៀបទៅនឹងជំនាន់មុន ដែលវាមានជម្រើសទំហំពីរគឺ 46 និង 41 mm។ នាឡិកានេះដំណើរការលើប្រព័ន្ធប្រតិបត្តិការ HarmonyOS នឹងអាចប្រើបានជាមួយ Android 8.0 ឬ iOS 13.0 ឬខ្ពស់ជាងនេះក៏បាន។ ផលិតផលនេះដែរក៏មុខងារដូចជាវាស់ស្ទង់សុខភាព ចង្វាក់បេះដូង សីតុណ្ហភាពស្បែក ការគេង និងកម្រិតស្ត្រេស រួមជាមួយមុខងារ Stay Fit ដើម្បីតាមដានកាឡូរីដែលបានប្រើប្រាស់ និងទទួលទានក្នុងពេលថ្ងៃផងដែរ។ ហេតុនេះហើយ Huawei Watch GT4 ជាទូទៅវាមានតម្លៃប្រមាណ ២២៧ ដុល្លារអាមេរិក។

២. Samsung Galaxy Watch6៖ នាឡិកាថ្មីរបស់ Samsung មានពីរកំណែដែលមានការកំណត់រចនាសម្ព័ន្ធសមមូល និងមានការរចនាម៉ូតខុសៗគ្នា។ ស្ដង់ដារ Galaxy Watch6 មានទំហំ 40 និង 44 mm ដែលលក្ខណៈពិសេសនៃការវាស់ស្ទង់សុខភាពគឺមិនខុសពីមុននោះទេ ដូចជាការវាស់ចង្វាក់បេះដូង កម្រិតអុកស៊ីសែនក្នុងឈាម ជំនួយការធ្វើលំហាត់ប្រាណ ឧបករណ៍ចាប់សញ្ញា BIA ដើម្បីវាស់សន្ទស្សន៍រាងកាយ និងការត្រួតពិនិត្យគុណភាពនៃការគេង ក៏ដូចជាមានមុខងារកំណត់តំបន់អត្រាបេះដូងផ្ទាល់ខ្លួនបន្ថែម ដែលជួយវិភាគសមត្ថភាពរាងកាយរបស់មនុស្សម្នាក់ៗ។ ទោះជាយ៉ាងណា ផលិតផលនេះដំណើរការ WearOS ថ្មី ហើយអាចប្រើបានតែជាមួយស្មាតហ្វូន Android ប៉ុណ្ណោះ នឹងមានតម្លៃជាទូទៅ ២៨៥ ដុល្លារអាមេរិក។

៣. Apple Watch Series៖ Apple Watch Series គឺជាម៉ាកនាឡិកាស៊េរី 9 ដែលមានទំហំ និងគុណភាពបង្ហាញដូចគ្នាទៅនឹងកំណែចាស់ ប៉ុន្តែអេក្រង់មានពន្លឺអតិបរមាទ្វេដងរហូតដល់ 2,000 nits។ នាឡិកានេះមានមុខងារជំនួយសុខភាពដូចជា ការត្រួតពិនិត្យការគេង ការវាស់ចង្វាក់បេះដូង និងការវាស់អុកស៊ីហ្សែនក្នុងឈាម។ ដូច្នេះហើយម៉ូដែលនេះជាទូទៅមានតម្លៃ ៤២៨ ដុល្លារអាមេរិក។

៤.Coros Pace 3៖ ផលិតផលនេះមានទម្ងន់ស្រាល និងមិនមានការផ្លាស់ប្តូរច្រើននោះទេបើប្រៀបធៀបទៅនឹងជំនាន់មុន។ Coros Pace 3 គឺមានឧបករណ៍ចាប់សញ្ញាសុខភាពជំនាន់ថ្មីជួយវាស់ចង្វាក់បេះដូង SpO2… កាន់តែត្រឹមត្រូវ។ បន្ថែមពីលើរបៀបហ្វឹកហ្វឺនដែលធ្លាប់ស្គាល់ ឧបករណ៍នេះមានសកម្មភាពថ្មីៗដូចជា ការរត់លើដី ជិះស្គី… និងអង្គចងចាំខាងក្នុង 4 GB ដើម្បីចាក់តន្ត្រី រីឯបន្ទះឈីប Dual-band GPS ក៏ជួយក្នុងការកំណត់ទីតាំងត្រឹមត្រូវជាងមុនផងដែរ។ ហេតុនេះហើយ នាឡិកាឆ្លាតវៃ Coros Pace 3 ជាទូទៅមានតម្លៃ ២៥៥ ដុល្លារអាមេរិក។

៥. Amazfit Cheetah Pro៖ ម៉ូដែលទំនើបបំផុតនៅក្នុងបន្ទាត់ Cheetah របស់ Amazfit មានការរចនារូបរាងតូច និងស្ព័រជាងមុន គែមទីតានីញ៉ូមជួយការពារអេក្រង់ និងមានទម្ងន់ 34 ក្រាម។ ផលិតផលនេះគាំទ្ររបៀបហ្វឹកហ្វឺនកីឡាចំនួន 150 ផ្សេងៗគ្នា និងមុខងារវាស់ស្ទង់សុខភាពដូចជា អត្រាបេះដូង, SpO2, ការត្រួតពិនិត្យការគេង… Cheetah Pro ក៏គាំទ្រអ្នកបណ្តុះបណ្តាលនិម្មិត AI ផងដែរ ដើម្បីជួយបង្កើតរបបបណ្តុះបណ្តាលដែលសមស្របជាមួយបុគ្គលម្នាក់ៗ ដែលជាទូទៅវាមានតម្លៃ ២៨៤ ដុល្លារអាមេរិក៕

ប្រទេសប៉េរូ ៖ ប៉ូលិសប្រឆាំងគ្រឿងញៀននៅប្រទេសប៉េរូ (Peru) ជាប្រទេសស្ថិតនៅអាមេរិកខាងត្បូង បានតែងខ្លួនជា Santa Claus ដើម្បីចូលទៅកាន់កន្លែងស្នាក់នៅ និងជួញដូរថ្នាំញៀនមួយកន្លែងក្នុងទីប្រជុំជនមួយស្ថិតនៅភាគខាងជើងទីក្រុងលីម៉ា ហើយប៉ូលិសចាប់ខ្លួនជនសង្ស័យបានចំនួន២នាក់ ។ ការបង្ក្រាបថ្នាំញៀននេះ គឺក្នុងគោលបំណងជួយឱ្យអ្នករស់នៅក្នុងទីប្រជុំជននៅឆ្ងាយពីថ្នាំញៀនក្នុងអំឡុងពិធីបុណ្យគ្រិស្តម៉ាស ។

កាលពីថ្ងៃទី២៣ ខែធ្នូ ឆ្នាំ២០២៣ ក្រុមប៉ូលិសប្រឆាំងគ្រឿងញៀនបាននាំគ្នាស្លៀកសម្លៀកបំពាក់ Santa Claus ឆ្មក់ចូលឆែកឆេរផ្ទះមួយកន្លែងក្នុងតំបន់ហួរ៉ាល់ ដែលនៅឆ្ងាយពីទីក្រុងលីម៉ា ទៅទិសខាងជើងប្រមាណ៧០គីឡូម៉ែត្រ ។ គេជឿថា វាជាកន្លែងស្នាក់នៅ និងចែកចាយថ្នាំញៀនដ៏ធំក្នុងតំបន់នេះ ។

នៅពេលប៉ូលិសសម្រុកចូលក្នុងផ្ទះស្នាក់នៅ ជនសង្ស័យឆ្ងល់ថា ហេតុអ្វីបានជាពួក Santa Claus សម្រុកចូលក្នុងផ្ទះរបស់ពួកគេ? ក្រោយមក ប៉ូលិសបានរឹបអូសយកវត្ថុតាងមួយចំនួន ព្រមទាំងកញ្ឆាមានទម្ងន់ជាង២០គីឡូក្រាម និងបញ្ជូនជនសង្ស័យទៅកាន់ស្ថានីយប៉ូលិសដើម្បីចាត់វិធានការតាមផ្លូវច្បាប់ ។

ប៉ូលិសលើកឡើងថា ពួកគេនាំគ្នាតែងខ្លួនជា Santa Claus ចូលចាប់ក្រុមជួញដូរថ្នាំញៀន ដើម្បីកុំឱ្យពួកគេដឹងខ្លួនមុន ។ នេះចាត់ទុកថា វាប្រតិបត្តិការមួយទទួលបានជោគជ័យយ៉ាងខ្លាំង ហើយវាដូចគ្នានឹងឱ្យ Santa Claus មកកម្ចា.ត់ជនខិលខូច ជំនួសឱ្យ Santa Claus ដើរចែកកាដូឱ្យក្មេងៗ ដោយសារពួកគេបានជួញដូរថ្នាំញៀនក្នុងអំឡុងពិធីបុណ្យគ្រិស្តម៉ាស ។ ដូច្នេះ អ្នករស់នៅក្នុងតំបន់នេះនឹងមានសុវត្ថិភាព និងនៅឆ្ងាយពីថ្នាំញៀនក្នុងអំឡុងបុណ្យគ្រិស្តម៉ាស នៅឆ្នាំ២០២៣ ។

ប៉ូលិសម្នាក់ប្រាប់ថា ៖ «ពួកគេបានតែងខ្លួនធ្វើជា Santa Claus បែបនេះ ដើម្បីកុំឱ្យក្រុមជួញដូរថ្នាំញៀនមានការសង្ស័យ ហើយប៉ូលិសអាចចុះត្រួតពិនិត្យនៅគ្រប់តំបន់ផងដែរ ដោយគ្មានអ្នកណាដឹងថា ពួកគេជាប៉ូលិសទេ» ។

កន្លងមក ក្នុងពិធីបុណ្យសំខាន់ៗ ប៉ូលិសប៉េរូ តែងតែស្លៀកសម្លៀកពាក់ឱ្យដូចគ្នានឹងពិធីបុណ្យនោះ ដើម្បីចាប់ខ្លួនជនសង្ស័យ និងចាប់សមាជិកជួញដូរថ្នាំញៀន ។ ជាក់ស្តែង កាលពីថ្ងៃទី៣១ ខែតុលា ឆ្នាំ២០២៣ ប៉ូលិសជាច្រើននាក់បានស្លៀកពាក់ជាបិសាច និងស្លៀកពាក់ឱ្យដូចអ្នកសម្តែងកុន ដើម្បីចាប់ខ្លួនក្រុមជួញដូរថ្នាំញៀនមួយក្រុម ៕

ប្រទេសថៃ ៖ កាលពីថ្ងៃទី២៥ ខែធ្នូ ឆ្នាំ២០២៣ លោក Srettha Thavisin នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានបង្ហោះសារមួយនៅក្នុងបណ្តាញសង្គម X (ឬ Twitter) អំពីស្ថានការណ៍ទឹកជំនន់នៅបណ្តាខេត្តភាគខាងត្បូងប្រទេសថៃ ។ លោកបានបង្ហាញការបារម្ភថា ៖ «សូមផ្តាំផ្ញើក្តីកង្វល់របស់ខ្ញុំទៅកាន់បងប្អូនដែលរស់នៅខេត្តភាគខាងត្បូង ដោយសារបច្ចុប្បន្ននេះ មានភ្លៀងធ្លាក់ជាបន្តបន្ទាប់ធ្វើឱ្យទឹកលិចផ្ទះសម្បែងពលរដ្ឋ និងខូចខាតទ្រព្យសម្បត្តិអស់ជាច្រើន» ។

លោក Srettha Thavisin នាយករដ្ឋមន្ត្រីថៃលើកឡើងថា ៖ «ខ្ញុំបានចាត់តាំងឱ្យលោក Kriang Kalptinan អនុរដ្ឋមន្ត្រីក្រសួងមហាផ្ទៃប្រទេសថៃ ដែលលោកទទួលខុសត្រូវលើនាយកដ្ឋានបង្ការ និងកាត់បន្ថយគ្រោះមហន្តរាយ ដើម្បីតាមដានស្ថានការណ៍នេះឱ្យបានដិតដល់ និងជួយសង្គ្រោះពលរដ្ឋគ្រប់រូបដែលរងគ្រោះដោយសារទឹកជំនន់នៅខេត្តណារ៉ាធិវ៉ាត និងខេត្តយ៉ាឡា» ។

លោកនាយករដ្ឋមន្ត្រីថៃបន្តថា ចំណែកភ្នាក់ងារគ្រប់គ្រងទឹកប្រចាំខេត្តភាគខាងត្បូង ក៏បានជូនដំណឹងឱ្យពលរដ្ឋនាំគ្នាជម្លៀសចេញពីតំបន់ទឹកជំនន់ផងដែរ ព្រមទាំងទំនាក់ទំនងទៅកាន់ភ្នាក់ងារពាក់ព័ន្ធទាំងជនស៊ីវិល និងកងទ័ព ឱ្យជួយសង្គ្រោះបងប្អូនទាំងអស់ក្នុងការដឹកជញ្ជូនទ្រព្យសម្បត្តិពួកគេទៅរកកន្លែងមានសុវត្ថិភាព ។

លោកនាយករដ្ឋមន្ត្រីបញ្ជាក់ថា លោកក៏បានបញ្ជាបន្ថែមទៅកាន់ការិយាល័យឧតុនិយមឱ្យតាមដានព័ត៌មានអាកាសធាតុ នៅខែធ្នូ ឆ្នាំ២០២៣ នេះ ដោយសារប្រទេសថៃមានអាកាសធាតុត្រជាក់លាយឡំជាមួយទឹកភ្លៀង ។ ចុងក្រោយ លោកនាយករដ្ឋមន្ត្រីថា បើពលរដ្ឋណាម្នាក់ត្រូវការជំនួយ គឺពួកគេអាចទាក់ទងមកកាន់ភ្នាក់ងារពាក់ព័ន្ធក្នុងតំបន់គ្រប់ពេលវេលា ៕

វៀតណាម៖ កាលពីថ្ងៃទី២៥ ខែធ្នូ យោងតាមគេហទំព័រក្នុងស្រុករបស់ប្រទេសវៀតណាម បានឱ្យដឹងថា អត្រាការប្រាក់សម្រាប់ប្រាក់បញ្ញើរយៈពេល ១-២ ខែគឺត្រឹមតែ ១.៩% ប៉ុណ្ណោះក្នុងមួយឆ្នាំ ធ្លាក់ចុះ ០.៣% ដែលនេះគឺជាអត្រាការប្រាក់ទាបបំផុតនៅលើទីផ្សារនាពេលបច្ចុប្បន្នផងដែរ។

បច្ចុប្បន្ន អត្រាការប្រាក់សន្សំខ្ពស់បំផុតនៅធនាគារ Vietcombank គឺ ៤.៨% ក្នុងមួយឆ្នាំសម្រាប់រយៈពេលវែង ១២ ខែ ឬច្រើនជាងនេះ។ ដូច្នេះហើយ បច្ចុប្បន្នអត្រាការប្រាក់ទាបបំផុតលើប្រាក់បញ្ញើតាមកាលកំណត់នៅធនាគារនេះគឺ ២.២% ក្នុងមួយឆ្នាំ សម្រាប់លក្ខខណ្ឌ ១-២ ខែ។ ប្រសិនបើអតិថិជនដាក់ប្រាក់សន្សំសម្រាប់រយៈពេល ១២ ខែ ឬច្រើនជាងនេះ អត្រាការប្រាក់គឺ ៥% ក្នុងមួយឆ្នាំ ហើយខ្ពស់បំផុតគឺ ៥.៣% ក្នុងមួយឆ្នាំសម្រាប់រយៈពេល ២៤ ខែ។

ទន្ទឹមនឹងនេះ ធនាគារ VietinBank និង BIDV ក៏អនុវត្តតារាងអត្រាការប្រាក់បញ្ញើដូចគ្នា ជាមួយនឹងអត្រាការប្រាក់រយៈពេលខ្លី ១-២ ខែ ២.៣% ក្នុងមួយឆ្នាំផងដែរ។ អតិថិជនដាក់ប្រាក់រយៈពេលវែង អត្រាការប្រាក់នឹងកើនឡើងពី ៣-៦ ខែដល់ ២.៩% ក្នុងមួយឆ្នាំ។ ហេតុនេះហើយ អត្រាការប្រាក់ខ្ពស់បំផុតនៅធនាគារទាំងពីរនេះគឺ ៥.៣% ក្នុងមួយឆ្នាំ នៅពេលដែលអតិថិជនដាក់ប្រាក់សម្រាប់រយៈពេល ២៤ ខែ ឬច្រើនជាងនេះ។

គួរបញ្ជាក់ដែរថា អត្រាការប្រាក់បញ្ញើបានឈានដល់កម្រិតទាបថ្មីសម្រាប់ការសន្សំ ដូច្នេះនៅក្នុងវិស័យធនាគារភាគហ៊ុនរួមគ្នា អត្រាការប្រាក់ក៏កំពុងធ្លាក់ចុះឥតឈប់ឈរ។ ភាពខុសគ្នានៃអត្រាការប្រាក់រវាងធនាគារពាណិជ្ជដែលគ្រប់គ្រងដោយរដ្ឋ និងភាគហ៊ុនរួមគ្នាក៏បានរួមតូចផងដែរ ជំនួសឱ្យការស្ថិតនៅកម្រិត ២-៣ ភាគរយពីមុនមក ប៉ុន្តែឥឡូវនេះវាតិចជាង ២ ភាគរយ។

ជាឧទាហរណ៍ អត្រាការប្រាក់បញ្ញើខ្ពស់បំផុតសម្រាប់រយៈពេល ១២ ខែនៅធនាគារមួយចំនួនឥឡូវនេះគឺប្រហែល ៥.៧៥% ក្នុងមួយឆ្នាំ មានតែ ០.៩៥ ភាគរយប៉ុណ្ណោះដែលខ្ពស់ជាងអត្រាការប្រាក់ទាបបំផុតនៅធនាគារ Vietcombank សម្រាប់រយៈពេលដូចគ្នា៕

ប្រទេសអង់គ្លេស ៖ សារព័ត៌មានរបស់អង់គ្លេស Daily Mail បានរាយការណ៍កាលពីថ្ងៃទី២៥ ខែធ្នូ ឆ្នាំ២០២៣ ថា តុលាការកំពូលនៅទីក្រុង Manchester បានកាត់ទោសអតីតមន្ត្រីពន្ធនាគារម្នាក់ឱ្យជាប់ពន្ធនាគាររយៈពេល៣ឆ្នាំ ក្រោយពីនាងមានទំនាក់ទំនងផ្លូវ.ភេ.ទជាមួយអ្នកទោសប្រុស ។

នាង Joanne Hunter ជាអតីតមន្ត្រីពន្ធនាគារ អាយុ២៨ឆ្នាំ មានទំនាក់ទំនងស្នេហាជាមួយអ្នកទោសប្រុសម្នាក់ឈ្មោះ Connor Willis ក្នុងពន្ធនាគារមួយកន្លែងស្ថិតនៅទីក្រុង Salford ។ ក្នុងអំឡុងពេលនាងមានទំនាក់ទំនងជាមួយអ្នកទោសប្រុសនោះ នាងតែងតែផ្ញើរូបសិ.ចស៊ីរបស់នាងឱ្យអ្នកទោសមើលជាប្រចាំ ។ លើសពីនេះ នាងក៏បានលួចដឹកជញ្ជូនកញ្ឆាខុសច្បាប់ផងដែរ ។

នាង Joanne Hunter បានចូលបំពេញការងារជាមន្ត្រីពន្ធនាគារ ចាប់ពីខែធ្នូ ឆ្នាំ២០១៨ ។ នៅឆ្នាំ២០២០ ខាងពន្ធនាគារទទួលដំណឹងថា នាងបានលួចបញ្ជូនរបស់របរឱ្យអ្នកទោស បន្ទាប់មក ពន្ធនាគារបានហៅនាងមកសាកសួរ ។ នាងនិយាយថា នាងពិតជាមានទំនាក់ទំនងស៊ីជម្រៅជាមួយអ្នកទោសប្រុស និងផ្ញើរូបសិ.ចស៊ីឱ្យអ្នកទោសនោះមើលទៀតផង ។

ក្រៅពីនេះ នាងបានទទួលយកវត្ថុពីស្ត្រីមិនស្គាល់ឈ្មោះម្នាក់នៅផ្សារទំនើប ហើយនាងយកវត្ថុនេះទៅឱ្យអ្នកទោសប្រុសឈ្មោះ Connor Willis ។ អ្នកទោសប្រុសបានផ្តល់ប្រាក់ឱ្យនាង ចាប់ពី២៤១ដុល្លារ ទៅ៣៦១ដុល្លារអាមេរិក ដើម្បីតបស្នងនាងដែលបានលួចយកវត្ថុនេះមកឱ្យខ្លួន ។ ប៉ុន្តែនាង Joanne Hunter បដិសេធមិនព្រមទទួលយកប្រាក់នេះទេ ។

មេធាវីការពារក្តីរបស់នាង Joanne Hunter បានព្យាយាមការពារនាងថា នាងមិនធ្លាប់មានសង្សារ ឬទំនាក់ទំនងស្នេហាជាមួយអ្នកណាម្នាក់ទេពីមុនមក ដោយសារនាងផ្តោតទៅលើការសិក្សា និងធ្វើការប៉ុណ្ណោះ ។ ហេតុនេះ នាងជានារីសុភាពរាបសារម្នាក់ ទើបធ្វើឱ្យនាងក្លាយជាជនរងគ្រោះ ។

ទោះយ៉ាងណា ចៅក្រមមិនយល់ស្របជាមួយនឹងលើកឡើងរបស់មេធាវីទេ ដោយចៅក្រមបញ្ជាក់ថា ទង្វើរបស់នាងបានធ្វើឱ្យមិត្តរួមការងារ និងអ្នកទោសផ្សេងទៀតមានគ្រោះថ្នាក់ ។ នាងគួរតែដើរតួជាមន្ត្រីល្អមួយរូបនៅក្នុងប្រព័ន្ធច្បាប់ មិនមែនអាត្មានិយមបែបនេះទេ ៕

ប្រទេសចិន ៖ ក្រុមអ្នកស្រាវជ្រាវចិនមកពីសាកលវិទ្យាល័យ Nankai បានបង្ហាញសម្លៀកបំពាក់ដើរដោយថាមពលពន្លឺព្រះអាទិត្យប្រកបដោយប្រសិទ្ធភាពខ្ពស់ ។ សម្លៀកបំពាក់ប្រភេទនេះអាចជួយគ្រប់គ្រងសីតុណ្ហភាពរាងកាយមនុស្ស និងធ្វើឱ្យអ្នកស្លៀកវាមានអារម្មណ៍សប្បាយរីករាយ បើទោះជាពួកគេស្ថិតនៅកន្លែងមានសីតុណ្ហភាពប្រែប្រួលក៏ដោយ ។

សម្លៀកបំពាក់ដើរដោយថាមពលពន្លឺព្រះអាទិត្យនេះ ពុំចាំបាច់ពឹងផ្អែកលើថាមពលពីខាងក្រៅទេ លើកលែងតែពន្លឺព្រះអាទិត្យ ។ ម្យ៉ាងទៀត វាខុសគ្នាពីសម្លៀកបំពាក់អាចគ្រប់គ្រងកំដៅ ដែលគេបានបង្ហាញនាពេលមុននេះ គឺនៅត្រង់វាអាចបង្កើតភាពកក់ក្តៅ និងភាពត្រជាក់តាមរយៈឧបករណ៍អគ្គិសនី ដែលអាចផ្លាស់ប្តូរសីតុណ្ហភាពដោយប្រើប្រាស់វិធីចំនួន២ ក្នុងរយៈពេលពេញ១ថ្ងៃ ។

ការស្រាវជ្រាវមួយចេញផ្សាយក្នុងទស្សនាវដ្តីវិទ្យាសាស្ត្រ កាលពីថ្ងៃទី១៥ ខែធ្នូ ឆ្នាំ២០២៣ ថា ឧបករណ៍អគ្គិសនីអាចគ្រប់គ្រងសីតុណ្ហភាពបានរយៈពេល២៤ម៉ោង ក្រោយពីវាបានទទួលថាមពលពន្លឺព្រះអាទិត្យត្រឹមតែ១២ម៉ោង ។ ក្រៅពីនេះ ឧបករណ៍អគ្គិសនីអាចរក្សាសីតុណ្ហភាពស្បែករបស់មនុស្សឱ្យនៅកម្រិតល្មម គឺក្នុងចន្លោះពី៣២អង្សារសេ ទៅ៣៦អង្សារសេ បើទោះជាសីតុណ្ហភាពនៅខាងក្រៅប្រែប្រួលក្តី ។

ការស្រាវជ្រាវបង្ហាញទៀតថា ឧបករណ៍ថ្មីនេះអាចជួយឱ្យអ្នកស្លៀកសម្លៀកបំពាក់នេះមានអារម្មណ៍សប្បាយរីករាយគ្រប់ពេលវេលា ហើយវាក៏អាចជួយការពារជីវិតមនុស្សនៅក្នុងបរិយាកាសអាក្រក់ផងដែរ ដូចជា ៖ នៅក្នុងលំហ ឬនៅលើភពផ្សេង ជាដើម ៕