ប្រទេសឥណ្ឌា៖ អ្នកបើកបរដឹកជញ្ជូនអាហារជនជាតិឥណ្ឌាម្នាក់ខកចិត្តនឹងការតម្រង់ជួរវែងសម្រាប់ចាក់សាំង ក៏បានប្រើកម្លាំងសេះដើម្បីធ្វើការដឹកជញ្ជូនរបស់គាត់ឱ្យទាន់តម្រូវការរបស់ភ្ញៀវ។

យោងតាមគេហទំព័រអន្តរជាតិមួយដែលបានចុះផ្សាយនៅថ្ងៃទី៣ ខែមករាថា បុរសជនជាតិឥណ្ឌាម្នាក់ដែលជាអ្នកដឹកជញ្ជូនអាហារនៅក្រុមហ៊ុន Zomato បានជិះសេះដឹកម្ហូបជំនួសវិញ បន្ទាប់ពីម៉ូតូរបស់គាត់អស់សាំង ហើយនៅតាមផ្លូវគឺមានការកកស្ទះចរាចរណ៍យ៉ាងខ្លាំងទម្រាំទៅដល់កន្លែងចាក់សាំងត្រូវចំណាយពេលជិត ៣ ម៉ោង។ ដូច្នេះគាត់ក៏សម្រេចចិត្តជិះសេះដើម្បីធ្វើការដឹកជញ្ជូនរបស់គាត់ឱ្យទាន់តម្រូវការរបស់ភ្ញៀវតែម្តង។

រឿងរ៉ាវនេះកើតឡើងនៅក្នុងប្រទេសឥណ្ឌា ដោយថ្មីៗនេះអ្នកនិយមលេងអ៊ីនធឺណិតម្នាក់បានបង្ហោះវីដេអូមួយចែកចាយពេញបណ្តាញសង្គម នឹងមានការចាប់អារម្មណ៍រាប់លាននាក់ផងដែរ។ នៅក្នុងវីដេអូនោះបានបង្ហាញឱ្យឃើញថា បុរសដឹកជញ្ជូនអាហារម្នាក់នោះបានជិះសេះឆ្លងកាត់ផ្លូវដ៏មមាញឹកនៃទីក្រុង Hyderabad ភាគខាងត្បូងប្រទេសឥណ្ឌា ជាមួយនឹងការស្ពាយកាបូបសម្រាប់ដាក់អាហារដ៏ធំនៅពីក្រោយខ្នង។

បុរសដឹកជញ្ជូនបាននិយាយថា ក្រុមហ៊ុនរបស់លោកតម្រូវឱ្យបុគ្គលិកទាំងអស់ ដឹកជញ្ចូនអាហារសម្រាប់ភ្ញៀវឱ្យទាន់ពេលវេលា បើទោះបីជាមានការកកស្ទះចរាចរណ៍ ឬភាពវឹកវរ និងការបិទផ្លូវធ្ងន់ធ្ងរក៏ដោយ ក៏ត្រូវកំណត់ពេល ១០ នាទីដើម្បីដឹកឱ្យដល់ភ្ញៀវផងដែរ។
ក្រុមហ៊ុនដឹកជញ្ចូនអាហារ Zomato ក៏បានបញ្ជាក់ដែរថា និយោជិតរបស់ខ្លួនមិនត្រូវបានផ្តល់រង្វាន់នោះទេ ប្រសិនបើចែកចាយអាហារឱ្យភ្ញៀវមិនទាន់ពេលវេលា និងបានដាក់ទណ្ឌកម្មចំពោះការចែកចាយយឺតទៀតផង។

Zomato និយាយថាទៀតថា ខ្លួនក៏មានគម្រោងដាក់លេខទូរសព្ទនៅលើថង់ចែកចាយផងដែរ ដើម្បីឱ្យមនុស្សអាចរាយការណ៍ពីអ្នកណាម្នាក់ដែលបើកបរក្នុងល្បឿនលឿន ឬបើកបរដោយមិនប្រុងប្រយ័ត្ន និងបើកបរដោយល្បឿនយឺតជាដើម៕

បើកទំព័រឆ្នាំ ២០២៤ មិនទាន់បានប៉ុន្មានថ្ងៃស្រួលបួលផង ជប៉ុនបានជួបគ្រោះមហន្តរាយនិងរឿងរន្ធត់ផ្ទួនៗ ដូចជារញ្ជួយដី ឆេះយន្តហោះ ឆេះតំបន់ពាណិជ្ជកម្មផ្សេងៗ ដែលបណ្តាលឱ្យខូចខាតដល់កន្លែងទេសចរណ៍មួយចំនួនរួមទាំងសំណង់ដែលមានអាយុកាលជាង ១,០០០ ឆ្នាំផងដែរ។ ដូច្នេះ ខេត្តចំនួន ៤ រួមមាន Ishikawa, Niigata, Fukui, និង Gifu សុទ្ធតែជាតំបន់ទេសចរណ៍ដ៏ល្បីល្បាញមួយនៅកណ្តាលប្រទេសជប៉ុនដែលបានរងការខូចខាតយ៉ាងខ្លាំងបន្ទាប់ពីការរញ្ជួយដីកាលពីថ្ងៃទី ១ ខែមករាកន្លងទៅ។

១.ទីសក្ការៈបូជា Keta៖ នៅលើបណ្តាញសង្គម ការរញ្ជួយដីបានធ្វើឱ្យប្រាសាទឈើរង្គោះរង្គើ ហើយដើមឈើជុំវិញនោះបានរលាស់ជាបន្តបន្ទាប់។ ទីសក្ការៈបូជា Keta មានទីតាំងនៅជិតឆ្នេរសមុទ្រ Hakui ក្នុងខេត្ត Ishikawa។ កន្លែងនេះគោរពបូជា Otomi Takamikoto ពី “ទឹកដីនៃព្រះ” – Izumo រួមជាមួយនឹងព្រះជាច្រើនទៀត។

២.ទីសក្ការៈបូជា Onohiyoshi៖ ប្រាសាទដ៏ល្បីល្បាញមួយទៀតនៅ Ishikawa ដែលត្រូវបានរងផលប៉ះពាល់ដោយការរញ្ជួយដីកម្រិត ៧.៦ រ៉ិចទ័រនោះគឺ Onohiyoshi។ Onohiyoshi គឺជាគោលដៅដ៏ទាក់ទាញ ហើយមនុស្សម្នាមកបួងសួងសុំសេចក្តីសុខ និងសន្តិភាពរៀងរាល់ឆ្នាំថ្មី។ ប្រាសាទនេះត្រូវបានសាងសង់ឡើងក្នុងឆ្នាំ ៧៣៣ ដោយគោរពបូជាព្រះ Oyamakui no Kami និង Omononush ។ ទោះជាយ៉ាងណា ថ្មីៗនេះខ្លោងទ្វារនៅប្រាសាទមួយនេះបានដួលរលំនៅចំពោះមុខអ្នកស្រុក និងភ្ញៀវទេសចរតែម្តង។

៣.ផ្សារពេលព្រឹក Wajima៖ ការរញ្ជួយដីកាលពីថ្ងៃទី ១ ខែមករាបានបណ្តាលឱ្យមានអគ្គីភ័យនៅទីតាំងជាច្រើនក្នុងទីក្រុង Wajima។ អគារមួយក្នុងចំណោមអគារដែលត្រូវភ្លើងឆេះនោះគឺផ្សារពេលព្រឹក Wajima ដែលមានអាយុកាល ១ ពាន់ឆ្នាំ។ ភ្លើងបានឆាបឆេះផ្សារវ៉ាជីម៉ាភ្លាមៗបន្ទាប់ពីមានការរញ្ជួយដីនៅម៉ោង ៤ និង ៥០ នាទីរសៀល ។ ដូច្នេះកន្លែងទេសចរដ៏ល្បីល្បាញនេះ បច្ចុប្បន្នត្រូវបានបិទជាបណ្ដោះអាសន្ន ដើម្បីសង្គ្រោះពីផលវិបាកនៃអគ្គិភ័យ។

៤. Higashi Chayagai៖ Higashi Chayagai គឺជាកន្លែងទេសចរដ៏ល្បីល្បាញបំផុតមួយនៅក្នុងប្រទេសជប៉ុន ដែលមានទីតាំងនៅតំបន់ Higashiyama ទីក្រុង Kanazawa។ ទីកន្លែងប្រវត្តិសាស្ត្រនេះក៏ត្រូវបានខ្ទេចខ្ទាំដោយការរញ្ជួយដីកាលពីថ្ងៃទី១ ខែមករាផងដែរ។ ហេតុនេះហើយ បច្ចុប្បន្នដំណើរទេសចរណ៍មួយចំនួនទៅកាន់ប្រទេសជប៉ុន ក៏ត្រូវបានលុបចោល ឬពន្យារពេលផងដែរ៕

ប្រទេសជប៉ុន ៖ គេសង្កេតឃើញថា ប្រទេសជប៉ុនបានជួបហេតុការណ៍គ្រោះរញ្ជួយដីជាច្រើនលើក ប៉ុន្តែហេតុអ្វីពលរដ្ឋជប៉ុនមិនភ័យតក់ស្លុតពេលមានគ្រោះរញ្ជួយដីកើតឡើង? ពលរដ្ឋជប៉ុនគ្រប់រូបបាននៅស្ងៀមស្ងាត់ និងមិនភ័យតក់ស្លុត ហាក់ដូចជាគ្មានរឿងអ្វីកើតឡើង ។ ពលរដ្ឋជប៉ុនគ្រប់រូបបានទទួលការហ្វឹកហាត់តាំងពីកុមារ អំពីវិធីការពារខ្លួន និងអ្នកនៅជុំវិញខ្លួន នៅពេលកើតគ្រោះរញ្ជួយដី ។

កាលពីថ្ងៃទី១ ខែមករា ឆ្នាំ២០២៤ ប្រទេសជប៉ុនបានជួបគ្រោះរញ្ជួយដីដ៏ធំនៅខេត្ត Ishikawa ដែលបណ្តាលឱ្យខូចខាតអស់ជាច្រើនកន្លែង ដូចជា ៖ ផ្លូវចំនួន៤ខ្សែ, រថភ្លើងអាកាស២ខ្សែ, កំពង់ផែ២កន្លែង, ដាច់ចរន្តអគ្គិសនីជាច្រើនកន្លែង និងផ្ទះពលរដ្ឋជាង៣ម៉ឺនខ្នងទៀតបានរងផលប៉ះពាល់ដោយសារគ្រោះរញ្ជួយដី ។ សំណាងល្អ រោងចក្រថាមពលនុយក្លេអ៊ែររបស់ជប៉ុនពុំបានរងផលប៉ះពាល់ទេ ។

ចំណុចមួយគួរឱ្យចាប់អារម្មណ៍ គឺនៅពេលមានគ្រោះរញ្ជួយដីកើតឡើងម្តងៗ ហេតុអ្វីពលរដ្ឋជប៉ុននៅស្ងៀមស្ងាត់ និងមិនភ័យតក់ស្លុត? ចំណុចដំបូង ប្រទេសជប៉ុនបានកើតគ្រោះរញ្ជួយដីជាញឹកញាប់ ព្រោះជប៉ុនស្ថិតនៅក្នុងចំណោមប្រទេសដែលមានបន្ទុះភ្នំភ្លើងច្រើន ។ លើសពីនេះ ជប៉ុនជាប្រទេសមួយដែលមានស្នាមតភ្ជាប់នៃសំបកផែនដីជាច្រើនកន្លែង ហើយស្នាមតភ្ជាប់ទាំងនេះមានចលនាគ្រប់ពេលវេលា ទើបជប៉ុនជួបគ្រោះរញ្ជួយដីញឹកញាប់ និងមានកម្រិតខ្លាំងក្លា ។

ហេតុនេះ នៅពេលប្រទេសជប៉ុនជួបគ្រោះរញ្ជួយដីញឹកញាប់ ទើបធ្វើឱ្យពលរដ្ឋជប៉ុនរស់នៅជាមួយនឹងការប្រុងប្រយ័ត្នខ្លួនគ្រប់ពេលវេលា ហើយពួកគេធ្លាប់បានជួបហេតុការណ៍គ្រោះរញ្ជួយដីជាទម្លាប់ទៅហើយ ។ ប្រទេសជប៉ុនពុំមានវិធីទប់ស្កាត់កុំឱ្យកើតគ្រោះរញ្ជួយដីទេ ប៉ុន្តែអាជ្ញាធរជប៉ុនបានរកវិធីការពារផ្សេងៗដើម្បីឱ្យមានការខូចខាតទ្រព្យសម្បត្តិអស់តិចបំផុត ហើយគេបានអប់រំពលរដ្ឋឱ្យចេះការពារខ្លួនពីគ្រោះរញ្ជួយដី និងគ្រោះថ្នាក់ផ្សេងៗតាំងពីកុមារ ។

ចំណែកមន្ត្រីរាជការជប៉ុន ក៏បានហ្វឹកហាត់ពីវិធីការពារខ្លួនជាប្រចាំផងដែរ ដូចជា ៖ ការរៀនចម្អិនអាហារដើម្បីចែកឱ្យពលរដ្ឋក្នុងអំឡុងពេលមានគ្រោះធម្មជាតិកើតឡើង ។ ប្រព័ន្ធផ្តល់ដំណឹងអំពីគ្រោះថ្នាក់ផ្សេងៗនៅជប៉ុនមានសារៈសំខាន់ខ្លាំងណាស់ គឺមុនពេលកើតហេតុការណ៍ ឬក្នុងអំឡុងកើតហេតុ រដ្ឋាភិបាលជប៉ុនបានប្រកាសជូនដំណឹងទៅកាន់ពលរដ្ឋភ្លាមៗ តាមរយៈវិទ្យុ, ទូរទស្សន៍ រួមទាំងទូរស័ព្ទដៃផងដែរ ។

បើហេតុការណ៍គ្រោះថ្នាក់នេះមិនខ្លាំងក្លាទេ ពលរដ្ឋជប៉ុនតែងតែអង្គុយស្ងៀមធម្មតា និងរង់ចាំឱ្យស្ថានការណ៍ស្ងប់ស្ងាត់ ទើបពួកគេចេញទៅប្រកបអាជីវកម្ម ឬរស់នៅតាមធម្មតាវិញ ។ ពលរដ្ឋជប៉ុនគ្រប់រូបបានទទួលការហ្វឹកហាត់ឱ្យចេះអត់ធ្មត់ ហើយពួកគេពុំបញ្ចេញអាកប្បកិរិយាភ័យខ្លាចឱ្យអ្នកដទៃឃើញទេ ព្រោះនឹងធ្វើឱ្យមនុស្សនៅក្បែរគ្នាមានអារម្មណ៍ភ័យខ្លាចតាមដែរ ។

មន្ត្រីរដ្ឋាភិបាលជប៉ុន និងភ្នាក់ងារឯកជនផ្សេងៗតែងជួយសង្គ្រោះពលរដ្ឋទាំងអស់ដែលរងគ្រោះដោយសារគ្រោះធម្មជាតិ ។ ក្រោយកើតហេតុ រដ្ឋាភិបាលជប៉ុនបានដោះស្រាយបញ្ហាផ្សេងៗជួយពលរដ្ឋភ្លាមៗ ហើយពលរដ្ឋពុំចាំបាច់ភ័យខ្លាចថា ពួកគេគ្មានអាហារបរិភោគ ឬគ្មានជម្រកទេ ។ គ្រោះរញ្ជួយដី និងរលកយក្សស៊ូណាមិ តែងតែកើតឡើងព្រមគ្នានៅប្រទេសជប៉ុន ហើយពលរដ្ឋគ្រប់រូបត្រូវត្រៀមខ្លួនគ្រប់ពេលវេលា ពេលជួបហេតុការណ៍គ្រោះរញ្ជួយដី និងរលកយក្សស៊ូណាមិ ។

បើតាមស្ថិតិបង្ហាញថា ប្រទេសជប៉ុនបានកើតគ្រោះរញ្ជួយដីកម្រិត៥ គឺចាប់ពី៦០លើក ទៅ៧០លើក រីឯគ្រោះរញ្ជួយដីកម្រិត៧ កើតឡើងយ៉ាងតិច១ឆ្នាំម្តង ។ ចំណែកគ្រោះរញ្ជួយដីកម្រិត៨ បានកើតឡើងរៀងរាល់៨ឆ្នាំម្តង ។ សរុបមក ក្នុង១ខែៗ ពលរដ្ឋជប៉ុនបានជួបគ្រោះរញ្ជួយដី ចាប់ពី៥លើក ទៅ៦លើក ដែលវាជាចំនួនមួយខ្ពស់ បើធៀបនឹងប្រទេសផ្សេងទៀត ។ ហេតុនេះ មិនចម្លែកទេ ដែលពលរដ្ឋជប៉ុនអាចការពារខ្លួនបានយ៉ាងល្អនៅពេលកើតគ្រោះរញ្ជួយដីម្តងៗ ៕

បរទេស៖ នៅក្នុងត្រីមាសទី ៤ នៃឆ្នាំ ២០២៣ BYD ដែលជាក្រុមហ៊ុនរថយន្តអគ្គិសនីដ៏ធំនៅប្រទេសចិន បានលក់រថយន្តអគ្គិសនីសុទ្ធចំនួន ៥២៦,០០០ គ្រឿង ខណៈដែលរថយន្ត Tesla លក់បានត្រឹមតែ ៤៨៥,០០០ គ្រឿងប៉ុណ្ណោះ។

យោងតាមគេហទំព័រអន្តរជាតិ CBT News ដែលបានចុះផ្សាយនៅថ្ងៃទី៣ ខែមករាថា ក្រុមហ៊ុនចិនដែលជាដៃគូប្រកួតប្រជែងរបស់ Tesla បានកំពុងផ្លាស់ប្តូរកាន់តែខ្ពស់ និងខ្ពស់ជាងនៅក្នុងឋានានុក្រមពិភពលោក ដោយដាក់សម្ពាធលើក្រុមហ៊ុន Tesla ខណៈដែលក្រុមហ៊ុនអាមេរិកត្រូវពឹងផ្អែកលើការកាត់បន្ថយតម្លៃដើម្បីបង្កើនការលក់។

ដូច្នេះហើយ បើប្រៀបធៀបទៅនឹងឆ្នាំ ២០២២ លទ្ធផលឆ្នាំ ២០២៣ របស់ក្រុមហ៊ុន Tesla គឺខ្ពស់ជាងត្រឹមតែ ៣៨% ប៉ុណ្ណោះ ដែលបង្ហាញថាកំណើនរបស់ក្រុមហ៊ុនកំពុងថយចុះបន្តិច ដោយសារវាចូលទៅក្នុងជំពូកថ្មីដែលមានការប្រកួតប្រជែងខ្លាំង។ សម្រាប់ក្រុមហ៊ុន BYD វិញបានលក់រថយន្តអគ្គិសនីជិត ១.៦ លានគ្រឿងនៅឆ្នាំ ២០២៣ កើនឡើង ៧០% បើធៀបនឹងឆ្នាំ ២០២២។

ទោះជាយ៉ាងណាក៏ដោយ ប្រសិនបើគណនាការលក់ពេញមួយឆ្នាំ Tesla នៅតែវ៉ាដាច់ BYD ដោយក្រុមហ៊ុនអាមេរិកបានលក់រថយន្តអគ្គិសនីសរុបចំនួន ១.៨១ លានគ្រឿងនៅទូទាំងពិភពលោកក្នុងឆ្នាំ ២០២៣ ដែលឈានដល់គោលដៅដែលបានកំណត់ និងខ្ពស់ជាងការព្យាករណ៍របស់អ្នកជំនាញមួយចំនួន រួមទាំង WSJ ផងដែរ ។ ចំណែកទីផ្សាររបស់ក្រុមហ៊ុន Tesla នៅក្នុងប្រទេសចិននៅតែមានស្ថិរភាព ហើយបានកើនឡើងដល់ជិត ១២% ក្នុងរយៈពេល ១១ ខែដំបូងនៃឆ្នាំ ២០២៣ ធៀបនឹង ១១% ក្នុងរយៈពេលដូចគ្នាកាលពីឆ្នាំមុន។

រីឯក្រុមហ៊ុន BYD វិញមិនទាន់លក់រថយន្តនៅអាមេរិកទេ ប៉ុន្តែបច្ចុប្បន្នក្រុមហ៊ុនកំពុងពង្រីកទីផ្សារទូទាំងពិភពលោករួមទាំងអឺរ៉ុបផងដែរ។ BYD បានចាប់ផ្តើមនៅឆ្នាំ ១៩៩៥ ក្នុងនាមជាក្រុមហ៊ុនផលិតថ្ម នឹងបានក្លាយជាម៉ាកឈានមុខគេនៅក្នុងរថយន្តថាមពលថ្មី។ កំណើនរបស់ BYD ឆ្លុះបញ្ចាំងពីការរីកចម្រើនរបស់ប្រទេសចិនក្នុងវិស័យរថយន្តអគ្គិសនី។ ហេតុនេះហើយ ក្រុមហ៊ុនផលិតរថយន្តជាច្រើននៅក្នុងប្រទេសអាស៊ីបូព៌ាក៏កំពុងដើរលឿនជាងគូប្រជែងលោកខាងលិចរបស់ពួកគេក្នុងការនាំយកម៉ូដែលរថយន្តអគ្គិសនីជាមួយនឹងសមត្ថភាពឌីជីថលដ៏ល្អឥតខ្ចោះទៅកាន់ទីផ្សារ៕

ប្រទេសជប៉ុន ៖ នៅដើមឆ្នាំ២០២៤ មានហេតុការណ៍ផ្សេងៗកើតឡើងជាបន្តបន្ទាប់នៅប្រទេសជប៉ុន ដូចជា នៅថ្ងៃទី១ ខែមករា កើតគ្រោះរញ្ជួយដីក្នុងតំបន់ Notojo ខេត្ត Ishikawa ស្ថិតនៅភាគកណ្តាលប្រទេសជប៉ុន និងកើតរលកយក្សស៊ូណាមិនៅតាមឆ្នេរសមុទ្រ ។ ហេតុការណ៍នេះបានបណ្តាលឱ្យពលរដ្ឋជប៉ុនស្លា.ប់ យ៉ាងហោចណាស់ ៦២នាក់ និងមានអ្នករងរបួសជាច្រើនទៀត ។

នៅថ្ងៃទី២ ខែមករា កើតហេតុការណ៍យន្តហោះ២គ្រឿងបុកគ្នាត្រង់ចំណុច Runway C នៅអាកាសយានដ្ឋានអន្តរជាតិ Haneda ក្នុងទីក្រុងតូក្យូ ។ យន្តហោះរបស់ក្រុមហ៊ុនអាកាសចរណ៍ Japan Airlines រៀបនឹងចុះចតនៅអាកាសយានដ្ឋាន Haneda បានបុកគ្នាជាមួយយន្តហោះរបស់ឆ្មាំសមុទ្រជប៉ុន ដែលកំពុងត្រៀមហោះហើរទៅកាន់អាកាសយានដ្ឋាន Niigata ដើម្បីជួយសង្គ្រោះអ្នករងគ្រោះដោយសាររញ្ជួយដី ។ ហេតុការណ៍នេះបណ្តាលឱ្យមនុស្សជិះក្នុងយន្តហោះឆ្មាំសមុទ្រជប៉ុន ចំនួន៥នាក់ស្លា.ប់ រីឯអ្នកដំណើរ និងបុគ្គលិកក្នុងយន្តហោះ Airbus 350 រួចផុតពីគ្រោះថ្នាក់ ។

ចំណែកនៅថ្ងៃទី៣ ខែមករា សារព័ត៌មានជប៉ុនរាយការណ៍ថា មានភ្លើងឆេះក្នុងតំបន់ពាណិជ្ជកម្មក្បែរស្ថានីយ Kokura ដែលជាតំបន់លក់ទំនិញដ៏ល្បីល្បាញ និងបង្កើតឡើងតាំងពីយូរឆ្នាំមកហើយក្នុងទីក្រុង Kitakyushu ខេត្ត Fukuoka ។ ក្នុងបរិវេណនេះមានហាងលក់ទំនិញពាសពេញទាំងអស់ ហើយបណ្តាលឱ្យភ្លើងឆេះរាលដាលទៅបរិវេណជុំវិញយ៉ាងឆាប់រហ័ស ។

សារព័ត៌មានជប៉ុនរាយការណ៍ទៀតថា ភ្លើងបានឆេះចេញពីបរិវេណមួយដែលពេញទៅដោយភោជនីយដ្ឋាន និងស្ថិតនៅឆ្ងាយពីស្ថានីយរថភ្លើង JR ប្រមាណ៣០០ម៉ែត្រ ។ បរិវេណភ្លើងឆេះនេះស្ថិតនៅក្បែរផ្សារ Thanka ដែលផ្សារនេះបានបង្កើតឡើងជាយូរឆ្នាំមកហើយ ។ កន្លងមក ផ្សារនេះធ្លាប់មានភ្លើងឆេះខ្លាំងចំនួន២លើក គឺកាលពីមេសា និងខែសីហា ឆ្នាំ២០២៣ ។

គេរាយការណ៍ថា ភ្នាក់ងារពន្លត់ភ្លើងបានតស៊ូពន្លត់ភ្លើងអស់រយៈពេលជាង៤ម៉ោង ដោយសារភ្លើងឆេះសន្ធោសន្ធៅខ្លាំងពេក ។ ប៉ុន្តែពុំទាន់មានសេចក្តីរាយការណ៍ថា មានអ្នកណាម្នាក់រងរបួស ឬស្លា.ប់ក្នុងហេតុការណ៍នេះទេ ។ រីឯសមត្ថកិច្ចបានប្រកាសឱ្យអ្នករស់នៅក្បែរបរិវេណភ្លើងឆេះប្រញាប់នាំគ្នាជម្លៀសចេញជាបន្ទាន់ ៕