ប្រទេសនូវែលសេឡង់ ៖ អ្នកនាង Gloriz Gahraman គឺជាសមាជិកសភាតំណាងរាស្ត្រប្រទេសនូវែលសេឡង់ អាយុ៤២ឆ្នាំ មកពីគណបក្ស Green បានប្រកាសលាលែងពីតំណែងជាសមាជិកសភាតំណាងរាស្ត្រ ក្រោយពីមានរូបភាពក្នុងកាមេរ៉ាសុវត្ថិភាពបង្ហាញថា នាងបានលួចកាបូបពីក្នុងហាងលក់សម្លៀកបំពាក់ ចំនួន៣លើក ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១៨ ខែមករា ឆ្នាំ២០២៤ ។

អ្នកនាង Gloriz Gahraman បានលួចកាបូបពីហាងលក់សម្លៀកបំពាក់ចំនួន២កន្លែង នៅទីក្រុង Auckland និងទីក្រុង Wellington ប្រទេសនូវែលសេឡង់ ។ ប៉ុន្តែរហូតមកដល់ខែមករា ឆ្នាំ២០២៤ នេះ នាងពុំទាន់ត្រូវបានគេចោទប្រកាន់នៅឡើយទេ ។

សមាជិកសភាតំណាងរាស្ត្ររូបនេះ បានចេញសេចក្តីថ្លែងការណ៍មួយបញ្ជាក់ថា ទង្វើរបស់នាងបានធ្វើឱ្យពលរដ្ឋនូវែលសេឡង់ខកចិត្តយ៉ាងខ្លាំង ខណៈនាងមានតួនាទីជាសភាតំណាងរាស្ត្រ ។ ហេតុនេះ វាជាទង្វើមួយដែលនាងពុំអាចបកស្រាយបានទេ ដោយសារតែគ្មានហេតុផល ។ ក្រោយពីរូបនាងទទួលបានការត្រួតពិនិត្យជំងឺពីវេជ្ជបណ្ឌិត ទើបនាងដឹងថា ខ្លួននាងមានជំងឺ ។

ចំណែកអ្នកជំនាញផ្នែកសុខភាពផ្លូវចិត្តលើកឡើងថា អាកប្បកិរិយារបស់អ្នកនាង Gloriz Gahraman បានកើតឡើងនៅពេលនាងមានភាពតានតឹង និងពាក់ព័ន្ធជាមួយរបួសផ្លូវចិត្ត ដែលនាងមិនធ្លាប់បានដឹងពីមុន ។

លោក James Shaw មេដឹកនាំគណបក្ស Green លើកឡើងថា អ្នកនាង Gloriz Gahraman បានប្រឈមនឹងភាពតានតឹងខ្លាំងរហូតមក ដូចជា ៖ នាងទទួលបានការគំរាមកំហែងធ្វើបាបរាងកាយ និងមានគេគំរាមសម្លាប់នាងទៀតផង តាំងពីនាងត្រូវបានគេជ្រើសរើសឱ្យធ្វើជាសភាតំណាងរាស្ត្រ ។ ហេតុនេះ វាធ្វើឱ្យនាងប្រឈមនឹងភាពតានតឹងខ្លាំងជាងសភាតំណាងរាស្ត្រផ្សេងទៀត ។

គួរបញ្ជាក់ថា អ្នកនាង Gloriz Gahraman មានដើមកំណើតជាជនជាតិអ៊ីរ៉ង់ ហើយនាងបានធ្វើដំណើរមកជ្រកកោននៅប្រទេសនូវែលសេឡង់តាំងពីនៅក្មេង ។ នាងធ្លាប់បានបង្កើតប្រវត្តិសាស្ត្រកាលពីឆ្នាំ២០១៧ គឺនាងបានក្លាយជាជនភៀសខ្លួនដំបូងគេ ដែលបានជាប់ឆ្នោតធ្វើជាសមាជិកសភាតំណាងរាស្ត្រនូវែលសេឡង់ ៕

បរទេស៖ YouTube បានបញ្ឈប់បុគ្គលិករាប់ពាន់នាក់ បន្ទាប់ពីបរាជ័យក្នុងការប្រកួតប្រជែងជាមួយ TikTok ដោយប្រាក់ចំណូលពីការផ្សាយពាណិជ្ជកម្មធ្លាក់ចុះខ្លាំង។

កាលពីថ្ងៃទី១៨ ខែមករា ឆ្នាំ២០២៤ យោងតាមគេហទំព័រអន្តរជាតិ The New York Times បានរាយការណ៍ថា ក្រុមហ៊ុនមេ Google ដែលមានមូលដ្ឋាននៅសហរដ្ឋអាមេរិកបានប្រកាសពីការបញ្ឈប់បុគ្គលិករាប់ពាន់នាក់នៅក្នុងក្រុមលក់ផ្សាយពាណិជ្ជកម្មរបស់ YouTube ដោយការបញ្ឈប់ការងារទាំងនេះនឹងត្រូវបានអនុវត្តជាសកលតែម្តង។ ដូច្នេះគិតត្រឹមថ្ងៃទី១៧ ខែមករា ឆ្នាំ២០២៤ បុគ្គលិកសរុបចំនួន ៧,១៧៣ នាក់នៅទូទាំងពិភពលោកត្រូវបានបញ្ឈប់ពីការងារសម្រាប់វេទិកា YouTube។

ដោយសារការធ្លាក់ចុះនៃការផ្សាយពាណិជ្ជកម្មកាលពីឆ្នាំមុន គួបផ្សំនឹងការប្រកួតប្រជែងដ៏ខ្លាំងក្លាពីវេទិកាថ្មី TikTok បានបង្ខំឱ្យ YouTube សម្រេចចិត្តកាត់បន្ថយចំនួនបុគ្គលិកដ៏ច្រើនយ៉ាងនេះ។ YouTube គឺជាកម្មវិធីមួយដែលទទួលបានប្រាក់ចំណូលចម្បងរបស់ខ្លួនពីការផ្សាយពាណិជ្ជកម្មមុន និងអំឡុងពេលចាក់វីដេអូឃ្លីប។ ប៉ុន្តែនៅចុងឆ្នាំ ២០២២ អតិផរណា និងអត្រាការប្រាក់កំពុងកើនឡើង ជាលទ្ធផលដៃគូ YouTube ជាច្រើនចង់កាត់បន្ថយការចំណាយលើការផ្សាយពាណិជ្ជកម្ម ដែលធ្វើឱ្យការធ្លាក់ចុះបានកើតឡើង។ ទោះបីជាពេលវេលាបានកន្លងផុតទៅរហូតដល់ដើមឆ្នាំ ២០២៤ ប៉ុន្តែបញ្ហានៃការចំណាយរបស់ YouTube នៅតែមិនត្រូវបានដោះស្រាយបាន។ ដូច្នេះវេទិកានេះបានសម្រេចចិត្តបញ្ឈប់បុគ្គលិកដើម្បីកាត់បន្ថយការចំណាយ។

ទោះជាយ៉ាងណាក៏ដោយ នៅដើមឆ្នាំ ២០២៤ នេះក្រុមហ៊ុនបច្ចេកវិទ្យាជាច្រើនបានប្រកាសពីការបញ្ឈប់បុគ្គលិកជាបន្តបន្ទាប់។ ជាឧទាហរណ៍ វេទិកា Discord បាននិយាយថា ខ្លួននឹងបញ្ឈប់បុគ្គលិក ១៧% ហើយ Amazon ក៏កំពុងកាត់បន្ថយការងាររាប់រយផងដែរ។ សូម្បីតែអ្នកផ្តល់កម្មវិធី Unity ក៏បានប្រកាសថាខ្លួននឹងបញ្ឈប់បុគ្គលិក ២៥% របស់ខ្លួនផងដែរ។

ដំណឹងនៃការបញ្ឈប់ការងារនៅក្រុមហ៊ុនបច្ចេកវិទ្យាមួយចំនួន មិនត្រឹមតែកាត់បន្ថយការចំណាយប៉ុណ្ណោះទេ ប៉ុន្តែដោយសារតែមុខតំណែងមួយចំនួននៅតែអាចប្រើបញ្ញាសិប្បនិម្មិត ឬ AI ដើម្បីធ្វើការជំនួសវិញ។ ក្រុមហ៊ុនជាច្រើនបានដឹងថាពួកគេនឹងត្រូវសាងសង់រចនាសម្ព័ន្ធឡើងវិញទាំងស្រុងដើម្បីឱ្យក្រុមហ៊ុនរបស់ពួកគេបន្តរីកចម្រើនក្នុងពាក់កណ្តាលនៃនិន្នាការបច្ចេកវិជ្ជាដែលប្រែប្រួលខ្លាំងនាពេលបច្ចុប្បន្ននេះ៕

ប្រទេសថៃ ៖ នៅថ្ងៃទី១៩ ខែមករា ឆ្នាំ២០២៤ សមត្ថកិច្ចប្រទេសថៃបានប្រមូលកម្លាំងចូលរំដោះក្មេងស្រីម្នាក់ និងចាប់ខ្លួនមនុស្ស៤នាក់ពាក់ព័ន្ធនឹងករណីថតវីដេអូក្មេងស្រីលក់តាមអនឡាញ តាមសាលដីការបស់តុលាការ ។ ពួកគេបានបង្កើតទីតាំងថតវីដេអូខុសច្បាប់ចំនួន៤កន្លែង ក្នុងនោះមានទីតាំងនៅទីក្រុងបាងកក និងខេត្តប៉ាធុមថានី ។ រីឯក្មេងស្រីដែលពួកគេបបួលមកថតនេះ គឺនាងមានអាយុត្រឹមតែ១៦ឆ្នាំប៉ុណ្ណោះ ។

ជនល្មើសទាំង៤នាក់បានបបួលក្មេងស្រីខាងលើមកថតជារូបភាពសន្លឹក ឬថតវីដេអូ ហើយពួកគេពុំបានបិទបាំងផ្ទៃមុខរបស់នាងទេ ។ បន្ទាប់មក ពួកគេក៏យករូបភាព និងវីដេអូរបស់នាងទៅលក់នៅតាមអនឡាញ ។ ហេតុនេះ សមត្ថកិច្ចបានចោទប្រកាន់ពួកគេពីបទជួញដូរមនុស្ស ។

តាមរយៈការសួនាំក្មេងស្រីរងគ្រោះឱ្យដឹងថា នាងបានជួបមិត្តភក្តិក្នុងក្លិបរាត្រី Heaven នៅម្តុំរាំងស៊ីត ហើយមិត្តភក្តិក៏បបួលនាងមកធ្វើការ និងសន្យាថា នឹងផ្តល់ប្រាក់ឱ្យនាង ។ ប៉ុន្តែនាងមិនដឹងថា ជនល្មើសបានយករូបភាព និងវីដេអូនាងទៅលក់ និងផ្សព្វផ្សាយតាមអនឡាញទេ ។ នាងប្រាប់ថា នៅមានមិត្តរបស់ពួកនាងជាច្រើននាក់ទៀតដែលធ្វើដូចនាងដែរ ។

ចំណែកក្រុមជនល្មើសបានទទួលសារភាពកំហុស ហើយត្រូវសមត្ថកិច្ចចោទប្រកាន់ចំនួន៥ករណី គឺ ៖
១-គ្រប់គ្រងបណ្តាញផ្សព្វផ្សាយអនា.ចា.រក្មេង ដើម្បីស្វែងរកផលប្រយោជន៍ផ្លូ.វ.ភេ.ទសម្រាប់ខ្លួនឯង ឬអ្នកដទៃ
២-បញ្ជូនរូបភាពអា.ស.អា.ភៀ.សរបស់កុមារទៅឱ្យអ្នកដទៃ
៣-ថតវីដេអូដើម្បីលក់, នាំចេញ និងផ្សព្វផ្សាយតាមអនឡាញ
៤-នាំចូល និងផ្សព្វផ្សាយរូបភាពមិនល្អចូលក្នុងប្រព័ន្ធកុំព្យូទ័រ ដែលមនុស្សទូទៅអាចចូលមើលបាន
៥-បានប្រព្រឹត្តបទល្មើសជួ.ញដូ.រមនុស្ស និងកេងប្រវ័ញ្ចខុសច្បាប់លើកុមារ ដើម្បីផលិត ឬផ្សព្វផ្សាយរូបភាពតាមអនឡាញចំពោះបុគ្គលមានអាយុលើស១៥ឆ្នាំ ប៉ុន្តែមិនដល់១៨ឆ្នាំ ។

តាមរយៈការស៊ើបអង្កេតបង្ហាញថា ពួកគេបានបង្កើតវែបសាយវីដេអូអា.សអា.ភៀ.សនៅប្រទេសថៃ និងមានអ្នកតាមដានរហូតដល់ជាង១លាននាក់ ។ ពួកគេបានផលិតវីដេអូអ.នា.ចា.រកុមារ និងលក់តាមអនឡាញក្នុងតម្លៃចាប់ពី១៥០បាត ទៅ៧៩៩បាត ដោយបានបែងចែកសមាជិកជាច្រើនប្រភេទ ដូចជា ៖ សមាជិកប្រចាំថ្ងៃ, សមាជិកប្រចាំខែ និងសមាជិកយូរឆ្នាំ ហើយមានសមាជិកនៅក្នុងក្រុមប្រមាណ១ម៉ឺននាក់ ។ ហេតុនេះ សមត្ថកិច្ចសន្និដ្ឋានថា ពួកគេទទួលបានប្រាក់ចំណូលមិនក្រោម១សែនបាតក្នុង១ខែពីការប្រមូលប្រាក់ពីសមាជិកទាំងនេះ ។

សមត្ថកិច្ចបានបញ្ជូនជនល្មើសទាំង៤នាក់មកកាន់ស្ថាប័នគ្រប់គ្រងស្ថិតនៅក្រោមក្រសួងមហាផ្ទៃ ដើម្បីធ្វើកំណត់ហេតុចាប់ខ្លួន មុនពេលធ្វើសន្និសីទសារព័ត៌មាន ។ លោក Ornsit Samphantharat នាយកស្ថាប័នគ្រប់គ្រងបានសហការជាមួយស្ថាប័នពាក់ព័ន្ធក្នុងការធ្វើសន្និសីទសារព័ត៌មាន ស្តីពីការចាប់ខ្លួនក្រុមជួញដូរមនុស្ស ៕

បរទេស៖ វិស័យថាមពលកកើតឡើងវិញរបស់អូស្ត្រាលីមានការរីកចម្រើនយ៉ាងខ្លាំងដោយសារការរួមបញ្ចូលគ្នានៃបច្ចេកវិទ្យាឈានមុខគេលើពិភពលោក ធនធានធម្មជាតិ យន្តការគោលនយោបាយ និងឱកាសវិនិយោគ។
ថាមពលកកើតឡើងវិញ គឺជាថាមពលដែលបានមកពីធនធានធម្មជាតិតាមរង្វាស់ពេលវេលារបស់មនុស្ស។ ដូច្នេះធនធានដែលអាចកកើតឡើងវិញរួមមាន ពន្លឺព្រះអាទិត្យ ខ្យល់ ចលនាទឹក និងកំដៅក្នុងផែនដី។

អូស្ត្រាលីគឺជាប្រទេសដែលផលិតថាមពលពន្លឺព្រះអាទិត្យដ៏ធំបំផុតរបស់ពិភពលោកជាមួយនឹងថាមពល 1.1 kW (1,166W) ក្នុងមនុស្សម្នាក់ នេះបើយោងតាម វិទ្យាស្ថាន Photovoltaic របស់អូស្ត្រាលីក្នុងឆ្នាំ ២០២២។ លើសពីនេះ ថាមពលខ្យល់ដ៏ទំនើបនៅឆ្នេរសមុទ្រក៏កំពុងលេចចេញជាឧស្សាហកម្មថ្មីមួយនៅក្នុងប្រទេសអូស្ត្រាលីផងដែរ។ ជាងនេះទៅទៀត ឧស្សាហកម្មអ៊ីដ្រូសែននៅក្នុងប្រទេសនេះក៏កំពុងរីកចម្រើនយ៉ាងឆាប់រហ័សជាមួយនឹងបច្ចេកវិទ្យាផលិតកម្មអ៊ីដ្រូសែនកម្រិតខ្ពស់ដែលត្រូវបានបង្កើតឡើងដោយអាជីវកម្ម។

ចំណែកជីវថាមពលក៏ជាតំបន់មួយទៀតដែលអូស្ត្រាលីកំពុងផ្តល់ដំណោះស្រាយបច្ចេកវិទ្យាឈានមុខគេលើពិភពលោក។ បច្ចេកវិជ្ជាទាំងនេះមានចាប់ពីការផលិតសម្ភារៈជីវសាស្ត្រកម្រិតខ្ពស់រហូតដល់ការអភិវឌ្ឍន៍គម្រោងដុតសំរាមដើម្បីបង្កើតអគ្គិសនី។ ចំពោះការផ្ទុកថាមពលវិញក៏ជាបច្ចេកវិទ្យាដ៏សំខាន់មួយសម្រាប់ថាមពលកកើតឡើងវិញ ធ្វើឱ្យប្រសើរឡើងនូវការប្រកួតប្រជែងថាមពលកកើតឡើងវិញ និងជ្រៀតចូលដោយការសម្របសម្រួលការផ្គត់ផ្គង់ថាមពលនៅទូទាំងបណ្តាញ កាត់បន្ថយបន្ទុកខ្ពស់បំផុត និងអនុញ្ញាតឱ្យអ្នកផ្គត់ផ្គង់គ្រប់គ្រងការផ្គត់ផ្គង់ និងតម្រូវការកាន់តែប្រសើរ។

ហេតុនេះហើយ អូស្ត្រាលីមានបំណងចង់ក្លាយជាមហាអំណាចនៃបច្ចេកវិទ្យាថាមពលកកើតឡើងវិញ ដោយសារប្រទេសនេះមានធនធានធម្មជាតិដ៏សម្បូរបែប ដែលស័ក្តិសមសម្រាប់ការអភិវឌ្ឍថាមពលកកើតឡើងវិញ ដោយរដ្ឋាភិបាលអូស្ត្រាលីមានបំណងបង្កើនសមាមាត្រនៃថាមពលកកើតឡើងវិញដល់ ៨២% នៅឆ្នាំ ២០៣០។ ដូច្នេះបច្ចេកវិទ្យាថាមពលកកើតឡើងវិញឈានមុខគេជាច្រើនត្រូវបានបង្កើតឡើងនៅក្នុងប្រទេសនេះ និងបានអនុវត្តទូទាំងពិភពលោក៕