ប្រទេសចិន ៖ នៅខែមករា ឆ្នាំ២០២៤ មនុស្សម្នាជាច្រើននាក់បានស្វែងរកទិញផ្កាស្រស់ៗនៅតាមផ្សារលក់ផ្កានៅទីក្រុងក្វាងចូវ ខេត្តក្វាងទុង ប្រទេសចិន ដើម្បីយកផ្កាទាំងនេះមកតុបតែងលម្អលំនៅឋាន និងកន្លែងស្នាក់នៅរបស់ពួកគេមុនពិធីបុណ្យចូលឆ្នាំចិន ។ ក្រៅពីការទិញផ្កាស្រស់នៅតាមផ្សារ ពួកគេក៏អាចដើររកទិញវាបាននៅតាមហាងលក់ផ្កាជាច្រើនទៀត ។

ទីក្រុងក្វាងចូវ ត្រូវបានគេដាក់ឈ្មោះថា «ទីក្រុងផ្កា» ពីព្រោះទីក្រុងនេះ គឺជាទីតាំងផលិតកូនរុក្ខជាតិ និងដាំដុះផ្កាយ៉ាងសំខាន់នៅប្រទេសចិន ។ គេរំពឹងថា ក្នុងឱកាសចូលឆ្នាំចិន ឆ្នាំ២០២៤នេះ ទីក្រុងក្វាងចូវ នឹងអាចលក់ផ្កាស្រស់បានរហូតដល់១៥លានផើង ។

អ្នករស់នៅទីក្រុងក្វាងចូវ បានហៅផ្កាស្រស់ដែលគេដាក់លក់ក្នុងពិធីបុណ្យចូលឆ្នាំចិនថា «ផ្កាចូលឆ្នាំចិន» ។ ផ្កាទាំងនេះភាគច្រើនមានពណ៌ស្វាយ និងពណ៌ក្រហម ដែលពលរដ្ឋចិនចាត់ទុកថា វាជាពណ៌នាំមកនូវសិរីសួស្តី សេចក្តីសុខក្នុងក្រុមគ្រួសារ និងស្រស់ស្អាតជាងពណ៌ផ្សេងទៀត ។ ពិធីបុណ្យចូលឆ្នាំចិន ឆ្នាំ២០២៤ គឺចូលដល់ឆ្នាំនាគ ហើយធ្វើឱ្យផ្លែចេកលក់ដាច់ខ្លាំងជាងផ្លែឈើផ្សេងៗ ។

លោក ហ្វាង ជាម្ចាស់ហាងផ្កាមួយកន្លែងនិយាយថា លោកបានលក់ផ្កាស្រស់ជាច្រើនប្រភេទ និងបញ្ជូនទៅកាន់ខេត្តនានាក្នុងប្រទេសចិន ដូចជា ៖ ខេត្តហ៊ូបេ និងខេត្តស៊ីឈួន ជាដើម ។ ប៉ុន្តែលោកបានលក់ផ្កាដាច់ច្រើនបំផុត គឺនៅខេត្តក្វាងទុង, ហុងកុង និងម៉ាកាវ ។

គេសង្កេតឃើញថា ហាងលក់ផ្កានានាបានដាក់តាំងផ្កាស្រស់ជាច្រើនប្រភេទសម្រាប់ឱ្យអតិថិជនជ្រើសរើស ហើយក្រៅពីនេះ គេក៏បានយកផ្កាមួយចំនួនទៀតមកចងជាបាច់ ឬដាក់ក្នុងផើងតូច-ធំផងដែរ ៕

ហាងកាហ្វេទាំង ៤ ខាងក្រោមដែលត្រូវបានណែនាំដោយមន្ទីរទេសចរណ៍ទីក្រុងហូជីមិញ គឺជាហាងកាហ្វេដ៏គួរឱ្យចាប់អារម្មណ៍បំផុតក្នុងចំណោមហាងកាហ្វេចំនួន ១០០ នៅទីក្រុងហូជីមិញ ដែលភ្ញៀវទេសចរណ៍អាចទស្សនា ក៏ដូចជាថតរូប និងភ្លក់រសជាតិកាហ្វេដ៏ឈ្ងុយឆ្ងាញ់នៅពេលមកដល់ទីក្រុងនេះ។ ដូច្នេះហើយហាងកាហ្វេល្បីៗដែលអ្នកគួរទៅរួមមាន៖

១. Bonjour Café The Art៖ ហាងកាហ្វេនេះមានទីតាំងនៅកាច់ជ្រុងផ្លូវតូចមួយក្នុងសង្កាត់ Tay Thao Dien ដោយមានការរចនាដ៏អស្ចារ្យ មានពណ៌ដ៏រ៉ូមែនទិកដែលជារាជធានីនៃពន្លឺប៉ារីស និងមានពីរជាន់គ្របដណ្តប់ដោយកន្ត្រកផ្កាចម្រុះពណ៌។ ហាងនេះមានផ្ទៃដីល្មមប្រហែល ៧០ m2 ពោរពេញដោយពន្លឺភ្លឺព្រោះមានបង្អួចតូចៗជាច្រើន ហើយភេសជ្ជៈដែលធ្វើឱ្យហាងល្បីគឺទឹកដោះគោកាហ្វេចាហួយ។

២. Lacàph Coffee Experiences Space៖ ហាងនេះបើកដំណើរការដំបូងនៅឆ្នាំ ២០២២ ជាមួយនឹងសម្ភារៈធ្វើពីឈើ ក្បឿងសេរ៉ាមិចពណ៌ខ្មៅ និងសបែបចាស់ ដោយបង្កើតអារម្មណ៍ស្និទ្ធស្នាលជាមួយបង្អួចធំដែលមើលឃើញទីក្រុងដ៏អ៊ូអរ។ ដូច្នេះការប្រមូលផ្តុំភេសជ្ជៈចម្រុះនៅទីនេះក៏ជាអ្វីដែលទាក់ទាញអ្នកចូលចិត្តកាហ្វេផងដែរ។ លើសពីនេះ ហាងកាហ្វេប្រពៃណីនេះត្រូវបានរៀបចំតាមបែបវិទ្យាសាស្ត្រដោយមានជ្រុងដាច់ដោយឡែកសម្រាប់អតិថិជនជជែកកំសាន្ត និងជ្រុងធ្វើការដ៏ស្ងប់ស្ងាត់។

៣. Do Phu Café៖ ហាងកាហ្វេ Do Phu ត្រូវបានបង្កើតឡើងនៅឆ្នាំ ១៩៧៥ គឺជា ហាងបុរាណប្រវត្តិសាស្ត្រដែលមានភាពលេចធ្លោជាមួយនឹងសញ្ញាសរសេរដោយដៃចាស់ នៅពីមុខច្រកចូលមានផ្លាកសញ្ញាសំរិទ្ធដែលមានពាក្យថា “កន្លែងប្រវត្តិសាស្ត្រ ប្រអប់សំបុត្រសម្ងាត់ និងលេណដ្ឋានអណ្តែតទឹករបស់ Saigon Rangers”។ នៅខាងក្នុងហាង មានវត្ថុមានតម្លៃជាច្រើនដូចជាចង្កៀងប្រេងកាត នាឡិកា ទូរស័ព្ទ និងប្រអប់ថតឈើ គឺជាសាក្សីដ៏រស់រវើកនៃពេលវេលាដ៏រុងរឿង។

៤. Mien Dong Thao Café៖ ហាងកាហ្វេ Mien Dong Thao មានទីតាំងនៅក្នុងសួនច្បារដែលមានទំហំរាប់ពាន់ម៉ែត្រការ៉េ។ ហាងនេះពោរពេញទៅដោយដើមឈើពណ៌បៃតងហ៊ុព័ទ្ធដោយសំឡេងទឹកហូរ។ នៅពេលល្ងាច ទីធ្លាសួនច្បារត្រូវបានបំភ្លឺដោយភ្លើងពណ៌លឿងវេទមន្ត បង្កើតជាទេសភាពរ៉ូមេទិក។ យ៉ាងណាមិញ ហាងកាហ្វេនៅសួនច្បារដែលមានដើមឈើច្រើនងាយនឹងមានមូស ដូច្នេះអ្នកទស្សនាអាចយកថ្នាំបាញ់សត្វល្អិតមកដើម្បីជៀសវាងមូសខាំ៕

ពិតជារឿងដែលគួរឱ្យហួសចិត្ត មិននឹកស្មានដល់ បុគ្គលដែលទទួលបានការគោរពស្រលាញ់ពីមហាជនកាលពីឆ្នាំ២០០៥ ដែលគេឱ្យនាមថាជា “Buddha Boy” ត្រូវបានអាជ្ញាធរចាប់ខ្លួនពីបទរំលោភសេពសន្ថវៈទៅលើសិស្សស្រីម្នាក់កាលពីថ្ងៃទី១០ ខែមករាកន្លងទៅ បន្ទាប់ពីរូបលោកព្យាយាមគេចខ្លួនពីការឡោមព័ទ្ធ។

បុរសជនជាតិនេប៉ាល់ ដែលបានតាំងខ្លួនជា “ព្រះពុទ្ធ” ត្រូវបានប៉ូលីសចាប់ខ្លួននោះ មានឈ្មោះថា Ram Bahadur Bomjan អាយុ ៣៣ ដែលត្រូវបានមនុស្សជាច្រើនគោរពនិងជឿថាជាព្រះពុទ្ធចាប់ជាតិ ដោយសារភាពល្បីល្បាញរបស់គាត់កាលពីឆ្នាំ ២០០៥ ក្នុងការអង្គុយធ្វើសមាធិដោយគ្មានចលនាអស់រយៈពេលជាច្រើនខែ និងការធ្វើដំណើរទៅកាន់ព្រៃ រួមទាំងមិនមានការបរិភោគអាហារ ទឹក ភេសជ្ជៈ ឬគេងឡើយ។ ជារៀងរាល់ថ្ងៃមុនការចាប់ខ្លួន ក៏មានមហាជនជាច្រើនប្រហែល ៣,០០០ នាក់ តែងតែបានមកចូលរួមធម្មទេសនារបស់គាត់ផងដែរ។

ទោះជាយ៉ាងណាក៏ដោយបុរសនោះ បច្ចុប្បន្នត្រូវបានប៉ូលីសចាប់ខ្លួននៅគេហដ្ឋានរបស់លោកតែម្តង ជាមួយនឹងការរឹបអូសបានផងដែរនូវ ទូរសព្ទដៃមួយចំនួនធំ កុំព្យូទ័រយួរដៃ និងថេបប្លេត សរុបចំនួន ៥ គ្រឿង និងលុយសុទ្ធចំនួន ២០០,០០០ រូពីនេប៉ាល់ (ប្រហែល ១,៥០០ ដុល្លារអាមេរិក) ដោយប៉ូលីសបាននិយាយថា លោក Bumjan ក៏កំពុងចង់រត់គេចខ្លួនដែរ ប៉ុន្តែគាត់គេចមិនបានសម្រេចនោះទេ។

គួរបញ្ជាក់ដែរថា កាលពីថ្ងៃទី១០ ខែមករា ឆ្នាំ ២០២៤ ប៉ូលីសបានចាប់ខ្លួនលោកពីបទរំលោភសេពសន្ថវៈទៅលើសិស្សស្រីម្នាក់ ដែលជាអ្នកសិក្សានៅវត្តអារ៉ាម ក្នុងតំបន់បារ៉ា ភាគខាងត្បូងនៃ Kathmandu ប្រទេសនេប៉ាល់។
ការចាប់ខ្លួនបុរសជនជាតិនេប៉ាល់ម្នាក់ ដែលមនុស្សគ្រប់គ្នាបានគោរព និងជឿថាគឺជាព្រះពុទ្ធចាប់ជាតិនោះ “Buddha Boy ” គឺបានក្លាយជាប្រធានបទដ៏ចម្រូងចម្រាស់មួយក្នុងសង្គមនេប៉ាល់ផងដែរ។ ទោះបីជាយ៉ាងណា លោក Bumjan មិនមានប្រវត្តិច្បាស់លាស់នោះទេ ដោយសព្វថ្ងៃប៉ូលីសកំពុងធ្វើការស៊ើបអង្គេតបន្ថែមទៀត៕

ប្រទេសចិន ៖ កាលពីថ្ងៃទី៩ ខែមករា ឆ្នាំ២០២៤ គេហទំព័រមួយឈ្មោះ World of Buzz បានចុះផ្សាយពីរឿងរ៉ាវរបស់គូស្វាមី-ភរិយាថ្មីថ្មោង១គូ ដែលធ្វើឱ្យមានមតិរិះគន់យ៉ាងខ្លាំងក្នុងបណ្តាញសង្គមប្រទេសចិន ក្រោយពីរូបភាពអាពាហ៍ពិពាហ៍របស់ពួកគេបានផ្សព្វផ្សាយជាសាធារណៈ ។ គេបានឃើញយ៉ាងច្បាស់ថា កូនកំលោះមិនពេញចិត្តជាមួយកូនក្រមុំទេ ដោយសារតែរូបសម្បត្តិរបស់នាង ។

ពួកគេបានរៀបការនៅទីក្រុងហ្គីចូវ ប្រទេសចិន ហើយបើតាមសារព័ត៌មានចិនឱ្យដឹងថា កូនកំលោះម្នាក់នេះមិនអាចប្រកែកបានទេ ដោយសារគាត់គ្មានជម្រើសច្រើន ។ មុនថ្ងៃចូលរោងការ គាត់បានរងសម្ពាធពីក្រុមគ្រួសារ និងសាច់ញាតិ ដោយពួកគេប្រាប់ថា ៖ «រៀបការល្អហើយ វាល្អជាងការរស់នៅម្នាក់ឯង ។ ដូច្នេះ ចូរជ្រើសយកនូវអ្វីដែលយើងមាន ព្រោះយ៉ាងហោចណាស់ អ្នកទាំងពីរអាចជួយគ្នាធ្វើការដើម្បីអនាគតល្អប្រសើរ ហើយមិនបាច់ចាប់អារម្មណ៍ថា អ្នកផ្សេងនិយាយអ្វីពីយើងទេ» ។

បើទោះជាត្រូវគ្រួសារបង្ខំឱ្យកូនកំលោះរៀបការក្តី ប៉ុន្តែកូនកំលោះដឹងច្បាស់ក្នុងចិត្តពីមូលហេតុពិតប្រាកដដែលធ្វើឱ្យគាត់ពុំអាចប្រកែកបាន ។ ការពិត គឺការស្វែងរកគូស្រករជារឿងមួយពិបាកខ្លាំង ជាពិសេសបំផុត សម្រាប់រូបគាត់ដែលគ្មានប្រាក់ចំណូលច្បាស់លាស់ ហើយធ្វើឱ្យនារីជាច្រើននាក់ប្រកែកមិនព្រមរៀបការជាមួយគាត់ ។ គាត់ប្រាប់ថា មានតែកូនក្រមុំតែម្នាក់គត់ដែលយល់ព្រមទទួលយករូបគាត់ ។

សាច់ញាតិខាងប្រុសតែងដាស់តឿនជានិច្ចថា ការរៀបការជាមួយនារីម្នាក់នេះ វាល្អជាងការនៅលីវ ហើយកូនកំលោះក៏យល់ស្របនឹងការលើកឡើងនេះ ប៉ុន្តែនៅថ្ងៃរៀបការមកដល់ គាត់បែរជាមានទឹកមុខស្រពោន ដោយសារមិនអាចបិទបាំងនូវការគិតក្នុងចិត្តបាន ហើយវាមិនមែនបណ្តាលមកពីកូនក្រមុំតែម្នាក់ទេ ប៉ុន្តែដោយសារគាត់អស់សង្ឃឹមនឹងខ្លួនឯងផងដែរ ។ ផ្ទុយទៅវិញ កូនក្រមុំបែរជាញញឹមយ៉ាងមានក្តីសុខ ។

ចំណែកភ្ញៀវចូលរួមក្នុងពិធីរៀបការបានយល់ពីហេតុផលដែលធ្វើឱ្យកូនកំលោះគ្មានក្តីសុខ ប៉ុន្តែគ្រប់គ្នាបាននៅស្ងៀម ហើយមិននិយាយស្តីអ្វីទេ ដោយបណ្តោយឱ្យអ្នកទាំងពីររៀបការចប់ចុង ចប់ដើម ។ ប៉ុន្តែអ្នកលេងបណ្តាញសង្គមរិះគន់ថា អាចមកពីកូនក្រមុំមានទ្រព្យសម្បត្តិច្រើន ទើបកូនកំលោះត្រូវបង្ខំចិត្តរៀបការជាមួយនាង បើទោះជាកូនកំលោះមិនពេញចិត្តនឹងមុខមាត់នាងក្តី ។

អ្នកខ្លះទៀតនិយាយថា កូនកំលោះគ្រាន់តែគិតពីខ្លួនឯងប៉ុណ្ណោះ និងមិនបានគិតពីអនាគតវែងឆ្ងាយ ។ ម្យ៉ាងទៀត រូបសម្បត្តិរបស់កូនក្រមុំនឹងធ្វើឱ្យកូនកើតមកមិនស្អាតតាមម្តាយ ។ ប៉ុន្តែអ្នកខ្លះទៀតយល់ស្របតាមការសម្រេចចិត្តរបស់គាត់ ហើយនិយាយថា ៖ «រៀបការ គឺជាពិធីសំខាន់មួយរវាងមនុស្ស២នាក់ និងក្រុមគ្រួសារ២ ។ ដូច្នេះ យើងគួរពិចារណាឱ្យបានច្បាស់លាស់សិន មុននឹងសម្រេចចិត្តរៀបការ ហើយបើយើងយល់ព្រមរៀបការដោយខ្វះការទទួលខុសត្រូវ វានឹងខាតបង់ទាំងសងខាង» ៕

បរទេស៖ ក្រសួងសេដ្ឋកិច្ចឥណ្ឌូណេស៊ីនឹងពង្រីកគម្រោងទំនប់ទឹកសមុទ្រដ៏ធំមួយដែលមានតម្លៃ ១០.៥ ពាន់លានដុល្លារ ជុំវិញផ្នែកខាងជើងនៃកោះ Java នៃរដ្ឋធានីហ្សាកាតា ដើម្បីការពារទឹកជំនន់ដែលបណ្តាលមកពីការបាក់ដី នៅពេលដែលទីក្រុងហ្សាការតាលិចលង់ ២៥ សង់ទីម៉ែត្រក្នុងមួយឆ្នាំ ខណៈទឹកជំនន់កើនឡើងដល់ ២០០ សង់ទីម៉ែត្រជារៀងរាល់ឆ្នាំ។

រដ្ឋមន្ត្រីក្រសួងសេដ្ឋកិច្ចលោក Airlangga Hartarto បានប្រកាសនៅក្នុងព្រឹត្តិការណ៍មួយកាលពីថ្ងៃទី១០ ខែមករាថា បច្ចុប្បន្នប្រទេសឥណ្ឌូណេស៊ីកំពុងស្តារឡើងវិញនូវផែនការសាងសង់ទំនប់ទឹកសមុទ្រដ៏ធំនៅក្នុងវិធានការចុងក្រោយបង្អស់ដើម្បីការពារទីក្រុងហ្សាកាតារបស់ខ្លួនពីការលិចក្នុងអត្រាលឿនជាងមុន។ គម្រោងនេះនឹងតម្រូវឱ្យមានការសាងសង់បីដំណាក់កាលបន្តរហូតដល់ឆ្នាំ ២០៤០ ដែលក្នុងនោះ ២ ដំណាក់កាលដំបូងត្រូវការថវិកា ១៦៤.១ ពាន់ពាន់លានរូពី (ប្រមាណ ១០.៥ ពាន់លានដុល្លារអាមេរិក)។

ដូច្នេះហើយ បច្ចុប្បន្នឆ្នេរសមុទ្រភាគខាងជើងនៃកោះ Java កំពុងលិច ដោយលិចប្រហែល ១៥ សង់ទីម៉ែត្រក្នុងមួយឆ្នាំ ខណៈដែលកម្រិតទឹកសមុទ្រនៅតែបន្តកើនឡើងដោយសារតែការប្រែប្រួលអាកាសធាតុ។ អ្នកជំនាញបានព្រមានថា 1/3 នៃរដ្ឋធានីហ្សាកាតា មានហានិភ័យខ្ពស់នៃការលិចទឹកនៅឆ្នាំ ២០៥០ ប្រសិនបើមិនអាចគ្រប់គ្រងបាន។

គួរបញ្ជាក់ដែរថា កោះ Java គឺជាកោះដែលមានប្រជាជនច្រើនជាងគេ នៅក្នុងប្រទេសឥណ្ឌូនេស៊ី ដែលមានប្រជាជនចំនួន ៥០ លាននាក់ដែលរួមចំណែក ២០.៧% នៃផលិតផលក្នុងស្រុកសរុបជាតិ។ ការដួលរលំកំពុងគំរាមកំហែងដល់សួនឧស្សាហកម្មចំនួន ៧០ តំបន់សេដ្ឋកិច្ចពិសេសចំនួន ៥ និងហេដ្ឋារចនាសម្ព័ន្ធអាកាសយានដ្ឋាន ផ្លូវដែក និងកំពង់ផែជាច្រើននៅទីនេះ ដែលបណ្តាលឱ្យខូចខាតដល់ ១៣៤ លានដុល្លារក្នុងមួយឆ្នាំ ដែលអាចកើនឡើងដល់ ៦៤២ លានដុល្លារក្នុងមួយឆ្នាំក្នុងទសវត្សរ៍ក្រោយ។

ទោះជាយ៉ាងណាក៏ដោយ អនាគតនៃគម្រោងទំនប់ទឹកសមុទ្រជុំវិញតំបន់ភាគខាងជើងនៃកោះជ្វា នៅមិនទាន់ដឹងនៅឡើយ។ បញ្ហាគឺថាប្រព័ន្ធទំនប់ទឹកសមុទ្រនេះត្រូវចំណាយពេលប្រហែល ៤០ ឆ្នាំដើម្បីបញ្ចប់។ ដូច្នេះហើយ តើមេដឹកនាំអាចបន្តគម្រោងនេះដល់ទីបញ្ចប់បានទេ? នេះបើយោងតាមរដ្ឋមន្ត្រីការពារជាតិ Prabowo Subianto បានសួរនៅក្នុងសន្និសីទកាលពីថ្ងៃទី ១០ ខែមករា៕