ប្រទេសហ្វីលីពីន ៖ ប្រធានាធិបតីប្រទេសហ្វីលីពីន លោក Ferdinand Marcos Jr. ត្រូវបានមហាជនរិះគន់យ៉ាងខ្លាំងក្លា ក្រោយពីលោក និងភរិយា ប្រើប្រាស់ឧទ្ធម្ភាគចក្រប្រចាំតំណែងប្រធានាធិបតី ទៅទស្សនាការប្រគំតន្ត្រីដ៏ល្បីល្បាញរបស់អង់គ្លេសឈ្មោះ «Coldplay» នៅខេត្តភាគខាងជើងទីក្រុងម៉ានីល ។

សារព័ត៌មានរ៉យទ័ររាយការណ៍ថា ក្រុមតន្ត្រីល្បីល្បាញរបស់អង់គ្លេសឈ្មោះ «Coldplay» បានមកប្រគំតន្ត្រីនៅប្រទេសហ្វីលីពីន កាលពីថ្ងៃទី១៩ ខែមករា ឆ្នាំ២០២៤ នៅពហុកីឡដ្ឋាន Philippine Arena ដែលមានទំហំធំបំផុតនៅលើពិភពលោក ហើយលោកប្រធានាធិបតីហ្វីលីពីន Ferdinand Marcos Jr. និងភរិយា ក៏បានទៅចូលរួមទស្សនាផងដែរ ។ ប៉ុន្តែអ្វីដែលធ្វើឱ្យមហាជនរិះគន់យ៉ាងខ្លាំងនោះ ដោយសារលោកបានប្រើប្រាស់ឧទ្ធម្ភាគចក្រប្រធានាធិបតីទៅមើលការប្រគំតន្ត្រី ។

ក្រុមសន្តិសុខប្រធានាធិបតីហ្វីលីពីនលើកឡើងថា មានមនុស្សចំនួន៤ម៉ឺននាក់នាំគ្នាធ្វើដំណើរទៅកាន់ពហុកីឡដ្ឋាន Philippine Arena ហើយបណ្តាលឱ្យស្ទះចរាចរណ៍យ៉ាងខ្លាំងនៅតាមផ្លូវ ។ ហេតុនេះ ដោយសារខ្លាចមានគ្រោះថ្នាក់ ទើបលោកប្រធានាធិបតីចាំបាច់ត្រូវជិះឧទ្ធម្ភាគចក្រផ្ទាល់ខ្លួនធ្វើដំណើរទៅកាន់ពហុកីឡដ្ឋាន Philippine Arena ។

ប៉ុន្តែមហាជនទូទៅមិនស្តាប់ការបកស្រាយទេ ហើយពួកគេរិះគន់ថា លោកប្រធានាធិបតីចាយវាយប្រាក់ដែលបានពីការបង់ពន្ធរបស់ពលរដ្ឋ ។ អ្នកប្រើប្រាស់ហ្វេសប៊ុកម្នាក់ឈ្មោះ James Patrick Aristorinas បានសរសេរក្នុងហ្វេសប៊ុក កាលពីថ្ងៃទី២០ ខែមករា ឆ្នាំ២០២៤ ថា ៖ «ការប្រើប្រាស់ទ្រព្យសម្បត្តិរបស់រដ្ឋ ដូចជា ឧទ្ធម្ភាគចក្រប្រចាំតំណែងប្រធានាធិបតី ទៅលើការងារផ្សេងខុសពីការងារប្រទេសជាតិ ចាត់ទុកថា គឺជាការប្រើប្រាស់អំណាចខុសច្បាប់ ឬប្រើប្រាស់ទ្រព្យសម្បត្តិរដ្ឋក្នុងផ្លូវខុស » ។

រីឯអ្នកប្រើប្រាស់ហ្វេសប៊ុកម្នាក់ទៀតនិយាយថា ៖ «យើងបានចំណាយប្រាក់ទៅលើថ្លៃប្រេងឥន្ធនៈឧទ្ធម្ភាគចក្រ និងការរក្សាសុវត្ថិភាព ។ តើអ្នកណាទៅដឹងថា យើងត្រូវចំណាយប្រាក់លើថ្លៃសំបុត្រមើលតន្ត្រីឱ្យគ្រប់គ្នានោះ» ។

គួរបញ្ជាក់ថា លោកប្រធានាធិបតីហ្វីលីពីន Ferdinand Marcos Jr. គឺជាកូនប្រុសរបស់អតីតប្រធានាធិបតី Marcos ជាមេដឹកនាំផ្តាច់ការរបស់ប្រទេសហ្វីលីពីន កាលពីប៉ុន្មានឆ្នាំមុន ។ ប៉ុន្តែមេដឹកនាំផ្តាច់ការរូបនេះត្រូវបានពលរដ្ឋធ្វើការបះបោរពេញប្រទេសដើម្បីប្រឆាំងនឹងការគ្រប់គ្រងរបស់លោក ហើយលោកក៏បានចុះចេញពីអំណាចនៅពេលនោះ ៕

ប្រទេសថៃ ៖ កាលពីថ្ងៃទី២១ ខែមករា ឆ្នាំ២០២៤ សារព័ត៌មានថៃរាយការណ៍ថា មានពលករមីយ៉ាន់ម៉ាម្នាក់ត្រូវបានឈ្មួញកណ្តាលជនជាតិឥណ្ឌា សម្លាប់នៅបន្ទប់ជួលស្ថិតនៅផ្លូវសាកែង៉ាម តំបន់បាងខុនធៀន ទីក្រុងបាងកក ប្រទេសថៃ ហើយបានលាក់ទុកសាកសពក្នុងទូរទឹកកក ។ រីឯឈ្មួញកណ្តាលរូបនេះបានរត់គេចខ្លួនទៅប្រទេសឥណ្ឌាហើយ ។

ក្រោយការចុះត្រួតពិនិត្យនៅកន្លែងកើតហេតុ សមត្ថកិច្ចលើកឡើងថា បុរសមីយ៉ាន់ម៉ាបានស្លាប់នៅក្នុងបន្ទប់ជួល ដែលមានជនជាតិឥណ្ឌាជាឈ្មួញកណ្តាលស្វែងរកពលករមកធ្វើការនៅប្រទេសថៃ បានមកជួលបន្ទប់នេះឱ្យពលករស្នាក់នៅ នៅថ្ងៃទី១៣ ខែមករា ឆ្នាំ២០២៤ ។ នៅក្នុងបន្ទប់ជួល មានជនជាតិមីយ៉ាន់ម៉ាចំនួន៥នាក់ស្នាក់នៅ និងរង់ចាំឱ្យគេបញ្ជូនទៅធ្វើការនៅតាមកន្លែងផ្សេងៗ ។នៅថ្ងៃទី១៨ ខែមករា ឆ្នាំ២០២៤ ជនជាតិមីយ៉ាន់ម៉ា៤នាក់បានចេញពីបន្ទប់ជួលទៅធ្វើការនៅខាងក្រៅ ហើយនៅសល់ជនជាតិមីយ៉ាន់ម៉ាម្នាក់ទៀតពុំទាន់ទទួលបានការងារធ្វើទេ ។ ក្រោយមក ជនជាតិមីយ៉ាន់ម៉ាផ្សេងទៀតបានត្រឡប់មកយកកាបូបនៅបន្ទប់ជួលវិញ ប៉ុន្តែមិនអាចចូលបន្ទប់បាន ពេលនោះ រូបគេក៏ទម្លុះទ្វារចូលក្នុងបន្ទប់ ស្រាប់តែឃើញមិត្តភក្តិខ្លួនត្រូវបានគេសម្លាប់ញាត់ក្នុងទូរទឹកកក ។

សមត្ថកិច្ចឱ្យដឹងថា ជំហានដំបូង ត្រូវរង់ចាំសួរចម្លើយសាក្សីជាជនជាតិមីយ៉ាន់ម៉ាចំនួន៤នាក់សិន ដោយសារសភាពសពត្រូវបានគេកាត់ដៃទាំងពីរ និងមានរបួសនៅត្រង់ពោះ និងជើងផងដែរ ។ ហេតុនេះ សមត្ថកិច្ចជឿថា អ្នកស្លាប់អាចឈ្លោះប្រកែកគ្នាជាមួយឈ្មួញកណ្តាលជនជាតិឥណ្ឌា ដោយសារសមត្ថកិច្ចបានឃើញភាពខុសប្រក្រតីនៅបន្ទប់ដេក, បន្ទប់ទឹក និងចំណុចកើតហេតុ ។

សមត្ថកិច្ចផ្នែកស៊ើបអង្កេតបានប្រមូលភស្តុតាងទាំងអស់ដើម្បីសន្និដ្ឋានថា តើហេតុការណ៍នេះកើតឡើងដោយសារអ្វី? គេរាយការណ៍ថា ឈ្មួញកណ្តាលជនជាតិឥណ្ឌារូបនេះទើបតែចាកចេញពីប្រទេសថៃ ទៅកាន់ទីក្រុងចេនណៃ ប្រទេសឥណ្ឌា កាលពីថ្ងៃទី២០ ខែមករា ឆ្នាំ២០២៤ ។

មិត្តភក្តិរបស់សព និយាយថា អ្នកស្លាប់ឈ្មោះ អាសេខែ អាយុ៣៥ឆ្នាំ ជនជាតិមីយ៉ាន់ម៉ា បានមកស្វែងរកការងារធ្វើនៅប្រទេសថៃ ។ ចំណុចកើតហេតុ គឺជាកន្លែងស្នាក់នៅសម្រាប់ពលករមីយ៉ាន់ម៉ារង់ចាំទៅធ្វើការ ដែលមានលោក SUNDARAVEL PRAGADEESH KUMAR អាយុ២៣ឆ្នាំ ជនជាតិឥណ្ឌា ជាឈ្មួញកណ្តាលស្វែងរកការងារឱ្យពលករនៅប្រទេសថៃ និងមានការិយាល័យនៅសាធុប្រាឌីត ។

ការចាយវាយក្នុងការស្វែងរកការងារនៅប្រទេសថៃ គឺពលករម្នាក់ៗត្រូវចំណាយប្រាក់ចំនួន១៥.០០០បាត និងចំណាយប្រាក់ថ្លៃឯកសារចំនួន៧.០០០បាតទៀត ។ កាលពីថ្ងៃទី១៧ ខែមករា ឆ្នាំ២០២៤ លោក SUNDARAVEL បានមកជួលអគារនេះដើម្បីឱ្យពលករមីយ៉ាន់ម៉ាស្នាក់នៅ ហើយពលករមីយ៉ាន់ម៉ាចំនួន៥នាក់ បានចូលស្នាក់នៅទីនេះ នៅថ្ងៃទី១៨ ខែមករា ។

នៅថ្ងៃ១៩ ខែមករា ឈ្មួញកណ្តាលជនជាតិឥណ្ឌាបានមកទទួលពលករមីយ៉ាន់ម៉ា ចំនួន៤នាក់ទៅធ្វើការ ហើយនៅសល់ពលករមីយ៉ាន់ម៉ាម្នាក់ស្នាក់នៅក្នុងបន្ទប់ម្នាក់ឯង ។ ក្រោយមក មិត្តភក្តិរបស់អ្នកស្លាប់បានទូរស័ព្ទមកជជែកជាមួយអ្នកស្លាប់ជាធម្មតា ប៉ុន្តែឃើញបើកញើសពេញខ្លួន ហើយពួកគេក៏វីដេអូខលទៅឈ្មួញកណ្តាលជនជាតិឥណ្ឌាផងដែរ ដោយឈ្មួញកណ្តាលប្រាប់ថា កំពុងតែមកទទួលអ្នកស្លាប់ទៅធ្វើការ ។

បន្ទាប់មក មិត្តភក្តិរបស់អ្នកស្លាប់ មិនអាចទាក់ទងអ្នកទាំងពីរបានទេ (គឺឈ្មួញកណ្តាលជនជាតិឥណ្ឌា និងពលករមីយ៉ាន់ម៉ា) ទើបពួកគេធ្វើដំណើរមករកមិត្តរបស់ខ្លួននៅបន្ទប់ជួល ហើយឃើញមិត្តស្លាប់ក្នុងសភាពបែបនេះ ៕

បរទេស៖ វ៉ាក់សាំង mRNA ដែលជាវ៉ាក់សាំងមានប្រសិទ្ធភាពខ្ពស់ក្នុងការការពារជំងឺមហារីកស្បែក ត្រូវបានគេរំពឹងថានឹងមានលក់ជាផ្លូវការនៅឆ្នាំ ២០២៥ បន្ទាប់ពីត្រូវបានអនុម័តដោយនិយតករអាមេរិក និងអឺរ៉ុប។

កាលពីថ្ងៃទី២០ ខែមករា ឆ្នាំ២០២៤ ទីភ្នាក់ងារគ្រប់គ្រងឱសថរបស់សហរដ្ឋអាមេរិក និងអឺរ៉ុបបានអនុម័តការព្យាបាលដោយ mRNA (mRNA-4157) រៀងៗខ្លួនជាមួយនឹងថ្នាំមហារីកទូទៅ Keytruda (pembrolizumab) សម្រាប់ការព្យាបាលបន្ថែមលើអ្នកជំងឺ melanoma។

កាលពីមុនក្រុមហ៊ុនឱសថចំនួនពីរ Merk និង Moderna បានបង្ហាញលទ្ធផលដ៏ជោគជ័យពីការសិក្សាគ្លីនិកដំណាក់កាលទី 2b ដោយចៃដន្យ។ ការសាកល្បងត្រូវបានអនុវត្តលើអ្នកជំងឺដែលមានហានិភ័យខ្ពស់នៃការកើតឡើងវិញនៃជំងឺមហារីកស្បែក (ដំណាក់កាលទី III/IV) បន្ទាប់ពីការវះកាត់ដុំសាច់ទាំងស្រុង។

លទ្ធផលបានបង្ហាញថាការព្យាបាលជាមួយ mRNA-4157 រួមបញ្ចូលគ្នាជាមួយ pembrolizumab បានធ្វើឱ្យប្រសើរឡើងនូវការរស់រានមានជីវិតរបស់អ្នកជំងឺកាត់បន្ថយហានិភ័យនៃការកើតឡើងវិញឬការស្លាប់ចំនួន ៤៩% និងហានិភ័យនៃការរីករាលដាល ៦២% បើប្រៀបធៀបទៅនឹងការប្រើប្រាស់ pembrolizumab តែម្នាក់ឯង។

លោក Kyle Holen អនុប្រធានជាន់ខ្ពស់នៃក្រុមហ៊ុន Moderna បាននិយាយថា “នេះគឺជាការបង្ហាញដំបូងនៃប្រសិទ្ធភាពនៃការព្យាបាលជំងឺមហារីកដែលមានមូលដ្ឋានលើ mRNA” ដោយបន្ថែមថាវ៉ាក់សាំងនេះអាចនឹងមាននៅក្នុងឆ្នាំ ២០២៥។

វ៉ាក់សាំងការពារមហារីក mRNA ខុសពីវ៉ាក់សាំងធម្មតា ដោយសារការផ្តោតសំខាន់លើការការពារនៃវ៉ាក់សាំង ជាជាងការប្រើប្រាស់ថ្នាំផ្ទាល់ខ្លួន ឬវះកាត់ ដើម្បីបណ្តុះបណ្តាលប្រព័ន្ធការពាររបស់អ្នកជំងឺក្នុងការប្រយុទ្ធប្រឆាំងនឹងជំងឺមហារីក។ ដើម្បីទទួលបានវ៉ាក់សាំងមួយដូស អ្នកជំនាញនឹងយកគំរូដុំសាច់ និងជាលិកាដែលមានសុខភាពល្អរបស់អ្នកជំងឺ តម្រៀប DNA និង RNA ប្រៀបធៀបកម្រិតផ្សេងៗគ្នាដើម្បីកំណត់អត្តសញ្ញាណការផ្លាស់ប្តូរ និងប្រើប្រាស់វាជាអង់ទីហ្សែនសម្រាប់វ៉ាក់សាំង។

តាមរយៈវ៉ាក់សាំង អ្នកស្រាវជ្រាវព្យាយាមបង្កើតការឆ្លើយតបនៃប្រព័ន្ធភាពស៊ាំប្រឆាំងនឹងប្រូតេអ៊ីនមិនធម្មតានៃកោសិកាមហារីក។ ប្រូតេអ៊ីនទាំងនេះនឹងរៀបចំជាពិសេស ដើម្បីឱ្យប្រព័ន្ធភាពស៊ាំរៀនពីរបៀបសម្គាល់កោសិកាមហារីកផ្នែកផ្សេងៗនៃរាងកាយ។
គួរបញ្ជាក់ដែរថា Moderna មិនមែនជាក្រុមហ៊ុនតែមួយគត់ដែលមានគោលបំណងបង្កើតវ៉ាក់សាំងការពារមហារីកនោះទេ។ កាលពីខែមិថុនា ឆ្នាំ២០២៣ BioNTech បានសហការជាមួយក្រុមហ៊ុន Merck បានទាក់ទាញការយកចិត្តទុកដាក់ជាមួយនឹងវ៉ាក់សាំងរបស់ខ្លួនដើម្បីការពារ ក៏ដូចជាព្យាបាលជំងឺមហារីកសួតដំណាក់កាលចុងក្រោយផងដែរ៕

ប្រទេសចិន៖ ស្ថានទូតចិនប្រចាំទីក្រុងសេអ៊ូល បានស្នើឱ្យប្រជាពលរដ្ឋមានការប្រុងប្រយ័ត្នពីគ្រោះថ្នាក់នៃការវះកាត់កែសម្ផស្សក្នុងប្រទេសកូរ៉េខាងត្បូង ចាប់ពីហានិភ័យនៃការស្លាប់ រហូតដល់ការផ្លាស់ប្តូរមុខធំៗ ដែលធ្វើឱ្យពិបាកក្នុងការឆ្លងកាត់ការត្រួតពិនិត្យអន្តោប្រវេសន៍។

យោងតាមទិន្នន័យ Statista បាននិយាយថា ប្រទេសកូរ៉េខាងត្បូងគឺជាគោលដៅដ៏ពេញនិយមបំផុតមួយរបស់ពិភពលោកសម្រាប់ទេសចរណ៍វេជ្ជសាស្រ្ត ដោយបានពិនិត្យអ្នកជំងឺបរទេសក្នុងទសវត្សរ៍កន្លងមក ដែលភាគច្រើនមកពីប្រទេសចិន និងសហរដ្ឋអាមេរិក។

ទោះជាយ៉ាងណា ក្នុងរយៈពេលប៉ុន្មានឆ្នាំចុងក្រោយនេះ ជនបរទេសជាច្រើនបានមកកូរ៉េខាងត្បូងដើម្បីធ្វើការវះកាត់កែសម្ផស្ស ហើយមនុស្សមួយចំនួនបានជាប់ពាក់ព័ន្ធក្នុងវិវាទផ្នែកវេជ្ជសាស្រ្ត និងបរាជ័យក្នុងការវះកាត់ ហើយសូម្បីតែការស្លាប់ក៏បានកើតឡើងផងដែរ»។ នេះបើយោងតាមទីភ្នាក់ងារសារព័ត៌របស់កូរ៉េខាងត្បូង បានឱ្យដឹងថា កំណត់ត្រានេះកើតឡើងបន្ទាប់ពីការស្លាប់របស់ស្រ្តីជនជាតិចិនម្នាក់ក្នុងខែមករា នៃឆ្នាំ២០២៤ បន្ទាប់ពីបានទទួលការវះកាត់បបូរមាត់បីដងនៅគ្លីនិកវះកាត់កែសម្ផស្សមួយក្នុងតំបន់ Gangnam នៃរដ្ឋធានី។

ដូច្នេះហើយ ស្ថានទូតចិនបច្ចុប្បន្នបានស្នើឱ្យប្រជាពលរដ្ឋមានការប្រុងប្រយ័ត្នជាមួយនឹងការផ្សាយពាណិជ្ជកម្ម ក៏ដូចជាយល់ដឹងពីហានិភ័យ ហើយត្រូវជ្រើសរើសអន្តរការីដោយប្រុងប្រយ័ត្ន និងពិនិត្យមើលភាពស្របច្បាប់នៃស្ថាប័នវេជ្ជសាស្ត្រ ឬគ្រូពេទ្យវះកាត់ ចុះហត្ថលេខាលើកិច្ចសន្យាច្បាស់លាស់ និងការរក្សាកំណត់ត្រាពេញលេញ។

ស្ថានទូតបានបន្ថែមថា “ប្រសិនបើមានការផ្លាស់ប្តូរដ៏សំខាន់នៅក្នុងរូបរាងក្រោយការវះកាត់របស់អ្នក ឬប្រសិនបើអ្នកកំពុងស្ថិតក្នុងដំណាក់កាលនៃការជាសះស្បើយក្រោយការវះកាត់ អ្នកគួរតែនាំយកវិញ្ញាបនបត្រវះកាត់មកជាមួយនៅពេលអ្នកចាកចេញពីប្រទេស” ដែលនេះនឹងជួយជៀសវាងបញ្ហានៅពេលឆ្លងកាត់នីតិវិធីអន្តោប្រវេសន៍។

គួរបញ្ជាក់ដែរថា កូរ៉េខាងត្បូងមានគ្រូពេទ្យវះកាត់កែសម្ផស្សចំនួន ២,៧១៨ នាក់ក្នុងឆ្នាំ ២០២២ ហើយប្រទេសចិនមានគ្រូពេទ្យវះកាត់កែសម្ផស្សប្រហែល ៣,០០០ នាក់ នេះបើយាងតាមសមាគមអន្តរជាតិនៃការវះកាត់កែសម្ផស្ស៕

ជាការពិតណាស់ សិល្បៈក្បាច់គុនតែងតែមានទំនាក់ទំនងយ៉ាងជិតស្និទ្ធជាមួយវប្បធម៌ និងការពង្រីកឥទ្ធិពលរបស់ប្រជាជាតិនីមួយៗ ខណៈបច្ចុប្បន្នប្រជាជាតិជាម្ចាស់កំពុងខិតខំអភិរក្ស និងបង្ហាញក្បាច់គុនរបស់ខ្លួនទៅកាន់ពិភពលោកតាមរយៈការប្រកួតកីឡាអូឡាំពិក កីឡាស៊ីហ្គេម ការប្រកួតក្នុងសហព័ន្ធ ឬការប្រកួតមិត្តភាពជាដើម។ ខាងក្រោមនេះគឺជាក្បាច់គុនល្បីៗចំនួន ១០ ដែលមានប្រភពចេញពីប្រទេសនៃសមាជិកអាស៊ាន។

១.ប្រទេសកម្ពុជា៖ យើងគ្រប់គ្នាដឹងហើយថា កម្ពុជាមានសិល្បៈនៃការធ្វើសង្រ្គាមដែលមានប្រវត្តិជាង ១០០០ ឆ្នាំទៅហើយ ដែលបានឆ្លាក់នៅប្រាសាទអង្គរវត្តនិងប្រាសាទផ្សេងៗទៀតជាច្រើនកន្លែង។ ដូច្នេះក្បាច់គុណបុរាណខ្មែរល្បីៗមានដូចជា ល្បុក្កតោ, ក្បាច់គុណដំបង, បោកចំបាប់,និងប្រដាល់សេរី។

២.ប្រទេសប្រ៊ុយណេ៖ វប្បធម៌របស់ប្រ៊ុយណេភាគច្រើនបានមកពីប្រភពម៉ាឡេស៊ី ដែលជាទឹកដីគ្របដណ្តប់លើប្រជុំកោះម៉ាឡេ។ ដូច្នេះ ក្បាច់គុណដ៏ល្បីប្រចាំប្រទេសប្រ៊ុយណេគឺ Silat Brunei ដែលជាសិល្បៈក្បាច់គុនជនជាតិដើមពី Nusantara និងតំបន់ជុំវិញភូមិសាស្ត្រនៃអាស៊ីអាគ្នេយ៍។

៣.ប្រទេសឥណ្ឌូនេស៊ី៖ ឥណ្ឌូនេស៊ីមានក្បាច់គុនបុរាណមួយដែលត្រូវបានគេស្គាល់ថា pencak silat។ ក្បាច់គុននេះមានប្រវត្តិយូរអង្វែងណាស់មកហើយ ដែលមានតាំងពីសម័យបុរាណមកម្លេះ។

៤.ប្រទេសម៉ាឡេស៊ី៖ ក្បាច់គុនបុរាណរបស់ប្រទេសម៉ាឡេស៊ីវិញមានឈ្មោះថា Silat Melayu គឺជាសិល្បៈប្រយុទ្ធនៃការការពារខ្លួន និងការរស់រានមានជីវិតដែលមានឫសគល់នៅក្នុងប្រជុំកោះម៉ាឡេ។

៥.ប្រទេសមីយ៉ាន់ម៉ា៖ ក្បាច់គុនភូមា នៅលោកខាងលិច ជាធម្មតាត្រូវបានគេស្គាល់ដោយពាក្យថា Lethwei។ ក្បាច់គុនបុរាណមួយនេះ គឺបង្ហាញឡើងតាមរយៈចម្លាក់នៅតាមប្រាសាទមួយចំនួននៃតំបន់ប្រវត្តិសាស្ត្របាកាន ពោលគឺកើតមានតាំងពីសម័យចក្រភពបាកានរបស់ជនជាតិភូមាមកម្ល៉េះ។

៦.ប្រទេសឡាវ៖ ឡាវត្រូវបានគេស្គាល់ថាជាប្រទេសដ៏ចំណាស់មួយ ប្រទេសនេះមានក្បាច់គុនបុរាណមួយហៅថា Muay Lao ជាប្រដាល់ក្បាច់ឡាវប្រើជើង កណ្ដាប់ដៃ កែង និងជង្គង់ ស្រដៀងនឹង Muay Thai មកពីប្រទេសថៃដែរ។ Muay Lao ត្រូវបានគេបន្សល់ទុកជាច្រើនជំនាន់ដោយផ្អែកលើស្មារតីដើម្បីនិរន្តរភាព ភាពរឹងមាំរបស់ជនជាតិ និងរក្សាប្រពៃណី។

៧.ប្រទេសហ្វីលីពីន៖ ហ្វីលីពីនក៏ជាប្រទេសមួយដែលគេស្គាល់ថាមានក្បាច់គុនដ៏ល្បីល្បាញហៅថា Kinamutay។ Kinamutay ពាក់ព័ន្ធនឹងការប្រើដៃរបស់មនុស្សម្នាក់ដើម្បីច្របាច់ និងធ្វើឱ្យខូចខាតស្ទើរតែគ្រប់ផ្នែកនៃរាងកាយ រួមទាំងភ្នែក ក្រលៀន ក្បាលសុដន់ និងអ្វីៗជាច្រើនទៀត។ ក្បាច់គុននេះត្រូវបានគេស្គាល់ថា ជាក្បាច់គុនសាហាវបំផុត។

៨.ប្រទេសសិង្ហបុរី៖ ប្រទេសនេះមានសិល្បៈក្បាច់គុនចម្រុះ ឬហៅថា MMA គឺជាកីឡាប្រយុទ្ធហ្វឹកហាត់វាយសម្រុកដោយថាមពល និងភាពជាក់លាក់ ទប់ទល់នឹងការគ្រប់គ្រង និងការវាយលុកដោយភាពរហ័សរហួនបំផុត។

៩.ប្រទេសថៃ៖ ប្រទេសថៃមានក្បាច់ដ៏ល្បីល្បាញមួយដែលគេហៅថា Muay Thai។ ក្បាច់គុននេះគឺមិនគ្រាន់តែជាកីឡាឬសិល្បៈក្បាច់គុនសម្រាប់អ្នកទស្សនាប៉ុណ្ណោះទេ វាត្រូវបានបញ្ចូលយ៉ាងជ្រៅក្នុងវប្បធម៌ និងសង្គមថៃ ដែលឆ្លុះបញ្ចាំងពីស្មារតីនៃការតាំងចិត្ត ការតស៊ូ និងភាពធន់របស់ប្រជាជនថៃ។

១០.ប្រទេសវៀតណាម៖ សិល្បៈក្បាច់គុនរបស់វៀតណាមមានឈ្មោះថា Vovinam។ ក្បាច់គុននេះផ្អែកលើគោលការណ៍ “រឹង និងទន់” ពាក់ព័ន្ធនឹងការប្រើវាយ កែង ទាត់ ជង្គង់ និងចលនាចំបាប់ ក៏ដូចជាប្រើអាវុធ ដាវ កាំបិត កំណាត់ ក្រញ៉ាំជើង និងកង្ហារ ដែលបម្រើជាឧបករណ៍ហ្វឹកហាត់សម្រាប់ ឈានដល់ការគ្រប់គ្រងល្អបំផុតនៃរាងកាយ និងចិត្ត៕

ក្នុងកិច្ចប្រជុំមួយស្តីពី «World Economic Forum 2024» នៅទីក្រុងដាវ៉ូស ប្រទេសស្វីស ដែលមានមន្ត្រីរដ្ឋាភិបាល និងក្រុមហ៊ុនឯកជនមកពីជុំវិញពិភពលោក បានមកចូលរួមជជែកពិភាក្សាអំពីបញ្ហាសំខាន់ៗផ្នែកសេដ្ឋកិច្ច ។ វាជាការពិភាក្សាគ្នាអំពីការកំណត់ទិសដៅរបស់ពិភពលោកផ្នែកសេដ្ឋកិច្ចថា តើគួរតែដើរតាមផ្លូវណា?

ក្នុងកិច្ចប្រជុំនេះដែរ គេបានពិភាក្សាថា តើបច្ចេកវិទ្យា AI នឹងផ្តល់ផលប្រយោជន៍ផ្នែកសេដ្ឋកិច្ច និងសង្គមដូចម្តេចខ្លះ? ហើយមានប្រព័ន្ធផ្សព្វផ្សាយជាច្រើនបានសាកសួរទៅកាន់មន្ត្រីដែលមកចូលរួមក្នុងកិច្ចប្រជុំនេះ ។

សារព័ត៌មានរ៉យទ័របានលើកឡើងពីលទ្ធផលស្ទង់មតិរបស់ CEO មកពីស្ថាប័នចំនួន៤.៧០០ ដែលបានចូលរួមកិច្ចប្រជុំនៅទីក្រុងដាវ៉ូស បង្ហាញថា CEO ប្រមាណ៤៥% ជឿជាក់ថា ស្ថាប័នដែលពួកគេកំពុងគ្រប់គ្រងនោះអាចនឹងរលំរលាយបានដោយសារបច្ចេកវិទ្យា AI ។ ហេតុនេះ ពួកគេជឿថា AI នឹងបង្កបញ្ហាផ្នែកសុវត្ថិភាពរបស់ស្ថាប័ន រួមទាំងការផ្សាយព័ត៌មានលាក់បាំងរបស់ AI ផងដែរ ។ រីឯ CEO ប្រមាណ៧៥% ជឿជាក់ថា រយៈពេល៣ឆ្នាំទៀត បច្ចេកវិទ្យា AI នឹងចូលមកផ្លាស់ប្តូរវិធីធ្វើការរបស់មនុស្ស ។

ក្រុមហ៊ុន Meta ដែលជាក្រុមហ៊ុនផ្តល់សេវាកម្មហ្វេសប៊ុក ដែលបានផ្សាយពាណិជ្ជកម្មមកកាន់អ្នកប្រើប្រាស់យ៉ាងចំគោលដៅ ហាក់ដូចជាពួកគេបានស្តាប់ឮអ្នកប្រើប្រាស់ជជែកគ្នា ក៏បានមកចូលរួមប្រជុំនៅទីក្រុងដាវ៉ូសផងដែរ ។

នាយកគ្រប់គ្រងផ្នែកអាជីវកម្មអន្តរជាតិរបស់ក្រុមហ៊ុន Meta យល់ឃើញថា បច្ចេកវិទ្យា AI នឹងធ្វើឱ្យការជ្រើសរើសវិធីផ្សាយពាណិជ្ជកម្មងាយស្រួលជាងមុន និងផ្សាយចំក្រុមគោលដៅទៀតផង ។ ដូច្នេះ នៅឆ្នាំ២០២៤ ក្រុមហ៊ុន Meta នឹងប្រើប្រាស់ AI ក្នុងផ្នែកផ្សាយពាណិជ្ជកម្ម ។ វាជាការរកប្រាក់ចំណូលពីការប្រើប្រាស់បច្ចេកវិទ្យា AI ។

ទោះយ៉ាងណា មានក្រុមហ៊ុនដែលមានគម្រោងទទួលប្រាក់ចំណូលពីការប្រើប្រាស់បច្ចេកវិទ្យា AI ដោយផ្ទាល់ គឺក្រុមហ៊ុន OpenAI ដែលផ្តល់សេវាកម្ម ChatGPT នាពេលបច្ចុប្បន្ន ក្រោយពីមានមតិរិះគន់កាលពីចុងឆ្នាំ២០២៣ ។

ចំណែក CEO របស់ក្រុមហ៊ុន Microsoft បានលើកឡើងក្នុងកិច្ចប្រជុំនៅទីក្រុងដាវ៉ូសថា ៖ «ខ្ញុំសប្បាយចិត្ត ហើយខ្ញុំគ្មានបញ្ហាអ្វីទេជាមួយការងារគ្រប់គ្រង» ។ CEO ក្រុមហ៊ុន Microsoft បន្តថា លោកយល់ស្របជាមួយក្រុមហ៊ុន OpenAI ដែលងាកមកស្វែងរកប្រាក់ចំណូលពិតប្រាកដ ខណៈកាលពីមុន ក្រុមហ៊ុននេះមិនស្វែងរកប្រាក់ចំណូលទេ ៕