ប្រទេសចិន ៖ វាបានល្បីល្បាញម្តងទៀតក្រោយពីសារព័ត៌មានបរទេសបានចុះផ្សាយពីរូបភាពមួយគួរឱ្យចាប់អារម្មណ៍នៅលើរថយន្តក្រុងប្រទេសចិន ខណៈរឿងរ៉ាវនេះធ្លាប់ល្បីល្បាញម្តងហើយកាលពីឆ្នាំ២០២០ ។ ប៉ុន្តែវាបានល្បីល្បាញម្តងទៀតនៅហុងកុង និងតៃវ៉ាន់ ក្នុងឆ្នាំ២០២៤ ។

សារព័ត៌មានបរទេសបានបង្ហោះរូបភាពនេះ និងសរសេរថា វាជាវិធីសាស្ត្រដែលមគ្គុទ្ទេសក៍ទេសចរម្នាក់បានធ្វើនៅលើរថយន្តក្រុង ដែលមានអ្នកដំណើរសុទ្ធតែជាមនុស្សចាស់ ។ ការធ្វើបែបនេះដើម្បីកាត់បន្ថយសំឡេងឡូឡារបស់អ្នកដំណើរ ហើយមគ្គុទ្ទេសក៍ទេសចរពុំចាំបាច់ហាមឃាត់ពួកគេដោយផ្ទាល់ ។ មគ្គុទ្ទេសក៍ទេសចរខាងលើនិយាយថា នៅពេលខ្លួនចែកម៉ាស់បិតមុខទៅឱ្យអ្នកដំណើរម្នាក់១ ស្រាប់តែសំឡេងឡូឡាក្នុងរថយន្តបាត់អស់ ហើយអ្នកដំណើរមិនរញ៉េរញ៉ៃទៀតផង ។

មគ្គុទ្ទេសក៍ទេសចរបន្តថា រយៈពេលត្រឹមតែ១៥នាទី ទៅ៣០នាទីប៉ុណ្ណោះ អ្នកដំណើរចាស់ៗទាំងអស់បានសម្រាកលង់លក់ ដើម្បីឱ្យផ្ទៃមុខរបស់ពួកគាត់ស្រស់ស្អាត ។ ពួកគាត់បានសម្រាកលក់យ៉ាងស្ងៀមស្ងាត់ ហើយមគ្គុទ្ទេសក៍ទេសចរលែងថ្លង់ដូចមុន ។

ក្រោយពីសារព័ត៌មានបរទេសបង្ហោះរូបភាពអ្នកដំណើរបិតម៉ាស់នៅលើមុខបែបនេះ ធ្វើឱ្យមនុស្សជាច្រើននាក់សរសើរមគ្គុទ្ទេសក៍ទេសចររូបនេះ អំពីវិធីដោះស្រាយបញ្ហានៅពេលជួបអ្នកដំណើរអាយុច្រើនជិះរថយន្ត ព្រោះនៅពេលស្ត្រីចាស់ៗនៅរួមគ្នា ពួកគេនឹងជជែកគ្នាដោយសំឡេងខ្លាំងៗ និងដើរទៅមកគ្មានសណ្តាប់ធ្នាប់ ។ អ្នកលេងបណ្តាញសង្គមម្នាក់និយាយថា ៖ «ទិញម៉ាស់តែ១ប្រអប់ប៉ុណ្ណោះ ហើយតម្លៃក៏មិនថ្លៃដែរ ប៉ុន្តែអាចចែកឱ្យអ្នកដំណើរបិតមុខបានច្រើននាក់» ។

អ្នកខ្លះទៀតនិយាយថា ៖ «វាជាគំនិតល្អមួយ ហើយគេអាចប្រើប្រាស់វិធីនេះនៅពេលចូលឆ្នាំចិន ឆ្នាំ២០២៤» ។ អ្នកខ្លះទៀតថា ៖ «វាជាការជួយឱ្យពិភពលោកនៅស្ងប់សុខ ហើយអាចជួយឱ្យអ្នកដទៃបាត់ថ្លង់ដោយសារសំឡេងឡូឡាផងដែរ» ៕

ក្រុមអ្នកវិទ្យាសាស្ត្របានប្រកាសអំពី “មេរោគ Zombie” ដែលតោងជាប់ក្នុងដុំទឹកកអាយុកាលជិត ៥០ ០០០ ឆ្នាំថាអាចនឹងលេចចេញមក ក្រោយពីការរលាយបន្តិចម្តងៗនៃដុំទឹកកតំបន់ប៉ូលអាក់ទិក។

ការកើនឡើងនៃកម្តៅគឺកំពុងតែរីករាលដាល ព្រោះតែសកម្មភាពផ្សេងៗរបស់មនុស្សសព្វថ្ងៃដូចជា ការកាប់បំផ្លាញព្រៃឈើ ការបំពុលបរិស្ថានជាដើម ដែលធ្វើឲ្យរលាយដុំទឹកកតំបន់ប៉ូល។ លើសពីនេះ គឺឃើញថាមានការបើកឧស្សាហកម្មមួយចំនួននៅតំបន់ប៉ូល ដូចជាការជីកយករ៉ែនៅស្រទាប់ក្រោមបំផុតនៃដុំទឹកកក ដែលភាគច្រើនមាននៅក្នុងប្រទេសកាណាដា ស៊ីបេរី និងអាឡាស្កា ក៏ដូចជាមានការដឹកជញ្ជូនដុំទឹកកតំបន់ប៉ូលយកទៅលក់នៅក្នុងស្រុកបានតម្លៃយ៉ាងកាក់កប ព្រោះថាអ្នកអាចដាក់ទឹកដោះគោជូរនៅក្នុងដុំទឹកកនោះ ហើយវានៅតែអាចបរិភោគបានរហូតដល់ទៅ ៥០ ០០០ឆ្នាំក្រោយ។

មេរោគ Zombie បុរាណត្រូវបានរកឃើញរួចហើយនៅតំបន់ស៊ីបេរី ដែលគេបានពិសោធន៍ឃើញថាមានអាយុ ៤៨ ៥០០ ឆ្នាំ។ មេរោគ Zombie នេះគ្រាន់តែជាឈ្មោះហៅក្រៅប៉ុណ្ណោះ ព្រោះវាត្រូវបានគេស្គាល់ថាជាពូជ អតិសុខុមប្រាណ Methuselah ។ មេរោគនេះគឺមានឥទ្ធិពលឆ្លងដល់សារពាង្គកាយមនុស្ស ក៏ដូចជាធ្វើឲ្យមានផ្ទុះជំងឺអាសន្នរោគមួយដ៏សាហាវឆ្លងនៅទូទំាងសកលលោក។

ក្រុមអ្នកវិទ្យាសាស្រ្តក៏បានកំណត់អត្តសញ្ញាណរួចហើយថាមេរោគ Zombie នេះនឹងបណ្តាលឲ្យមនុស្សឆ្លងជំងឺមួយចំនួនពីមេរោគ pox និងវីរុស Herpes ដែលនឹងធ្វើឲ្យកើតពងបែក ដំបៅ និងរលួយនៅលើស្បែក។ អ្វីដែលកាន់តែបារម្ភនោះគឺមេរោគនេះនឹងឆ្លងពីមនុស្សម្នាក់ទៅម្នាក់ ហើយក្រុមអ្នកវេជ្ជសាស្រ្តគឺត្រូវតែរកវ៉ាក់សាំងដើម្បីទប់ស្កាត់ដូចទៅនឹងការឆ្លងរាតត្បាតនៃជំងឺកូវីដ១៩ដែរ។

ជាមួយនឹងការព្យាករណ៍ក៏បានបង្ហាញទៀតថានៅត្រឹមឆ្នាំ២០៤០ សមុទ្រអាកទិកនឹងគ្មានដុំទឹកកកទៀតទេ ដោយសារការការរលាយដុំទឹកកកព្រោះតែការកើនឡើងនៃកម្តៅ រួមបញ្ចូលជាមួយនឹងឧស្សាហកម្មមនុស្សនៅតំបន់អាក់ទិក ដូចជាការដឹកជញ្ជូនដុំទឹកកក និងការជីកយករ៉ែនៅទីនោះ។

ប្រតិបត្តិការរុករករ៉ែដ៏ធំកំពុងត្រូវបានគេគ្រោងទុកនៅតំបន់អាក់ទិច ដោយប្រតិបត្តិការចោះចូលទៅក្នុងស្រទាប់ដ៏ជ្រៅនៃដុំទឹកកដើម្បីទាញយកប្រេង និងរ៉ែ។ ជាមួយគ្នានេះ ប្រតិបត្តិការទាំងនោះនឹងបញ្ចេញបរិមាណដ៏ច្រើននៃមេរោគដែលកប់ខ្លួននៅក្នុងនោះ។ អ្នករុករករ៉ែប្រៀបដូចជាអ្នកគាស់ផ្នូរមេរោគនោះឲ្យងើបឡើងមកអ៊ីចឹង ដែលវានឹងបង្កគ្រោះមហន្តរាយដល់មនុស្សនៅទូទាំងភពផែនដី៕

ប្រទេសមីយ៉ាន់ម៉ា ៖ ជាងឈើនៅទីក្រុង Tonggo រដ្ឋ Rakhine ប្រទេសមីយ៉ាន់ម៉ា បានប្រឹងប្រែងផលិតកង់ពីឈើដើម្បីធ្វើជាយានជំនិះសម្រាប់ធ្វើដំណើរ ក្នុងអំឡុងពេលមីយ៉ាន់ម៉ាកើតសង្គ្រាមនៅក្នុងប្រទេស ហើយស្របពេលប្រេងឥន្ធនៈមានតម្លៃថ្លៃ និងពិបាករកទិញផងដែរ ។ ហេតុនេះ ពលរដ្ឋមីយ៉ាន់ម៉ាភាគច្រើននិយមជិះកង់កាន់តែច្រើន ។

សង្គ្រាមរវាងកងទ័ពអារ៉ាកានជាមួយកងទ័ពមីយ៉ាន់ម៉ា បានប្រព្រឹត្តទៅអស់រយៈពេលជាច្រើនខែ ហើយធ្វើឱ្យប៉ះពាល់ដល់ជីវភាពរស់នៅរបស់ពលរដ្ឋក្នុងតំបន់ជាច្រើន ។ គេឃើញថា មនុស្សភាគច្រើនបានស្វែងរកវិធីផ្សេងៗ ដើម្បីធ្វើឱ្យជីវិតពួកគេអាចរស់នៅប្រសើរឡើង ។

ចាប់ពីថ្ងៃទី១២ ខែមករា ឆ្នាំ២០២៤ អ្នកលេងបណ្តាញសង្គមនៅប្រទេសមីយ៉ាន់ម៉ាបានចែកចាយរូបភាពកង់១គ្រឿង និងមានបុរសវ័យកណ្តាលម្នាក់ជិះកង់នេះ ។ ប៉ុន្តែអ្វីដែលធ្វើឱ្យមនុស្សគ្រប់គ្នាចាប់អារម្មណ៍នោះ គឺវត្ថុទាំងអស់ដែលគេយកមកផលិតជាកង់សុទ្ធតែជាបន្ទះឈើ ។ ទោះយ៉ាងណា រូបភាពកង់ដែលគេចែកចាយនេះពុំបានបញ្ជាក់លម្អិតច្រើនទេ គ្រាន់តែប្រាប់ថា វាជាកង់ផលិតឡើងពីស្នាដៃរបស់ជាងឈើម្នាក់នៅរដ្ឋ Rakhine ។

កាលពីថ្ងៃទី២០ ខែមករា ឆ្នាំ២០២៤ Myanmar Pressphoto Agency បានសម្ភាសន៍ម្ចាស់កង់ឈើ និងយកព័ត៌មានលម្អិតមកចុះផ្សាយថា អ្នកផលិតកង់ឈើ១គ្រឿងនេះ ឈ្មោះ កូ សរមិនធូន រស់នៅទីក្រុង Tonggo ខេត្ត Tonggo ស្ថិតនៅចំណុចកណ្តាលនៃរដ្ឋ Rakhine ។

លោក កូ សរមិនធូន បាននិយាយប្រាប់ Myanmar Pressphoto Agency ថា មូលហេតុដែលលោកផលិតកង់ឈើនេះ ដោយសារលោកមើលឃើញថា ស្ថានការណ៍ប្រយុទ្ធគ្នាបានកើតឡើងនៅរដ្ឋ Rakhine ហើយធ្វើឱ្យការធ្វើដំណើររបស់ពលរដ្ឋមីយ៉ាន់ម៉ាទៅកាន់ទីកន្លែងផ្សេងៗជួបការលំបាកយ៉ាងខ្លាំង ដោយសារការដាក់ប៉ុស្តិ៍ត្រួតពិនិត្យមនុស្សចេញ-ចូល ។ លើសពីនេះ ផ្លូវជាច្រើនកន្លែងត្រូវបិទ ហើយគេហាមរថយន្ត និងម៉ូតូឆ្លងកាត់ផងដែរ ។

កត្តាសំខាន់ គឺតម្លៃប្រេងឥន្ធនៈនៅមីយ៉ាន់ម៉ាបានឡើងថ្លៃ ហើយការខ្វះខាតប្រេង គឺជាឧបសគ្គសំខាន់ក្នុងការធ្វើដំណើរតាមរថយន្ត និងម៉ូតូ ។ ហេតុនេះ មនុស្សភាគច្រើនបានធ្វើដំណើរដោយកង់ ហើយធ្វើឱ្យតម្លៃកង់កើនឡើងជាបន្តបន្ទាប់ ។

លោក កូ សរមិនធូន បន្តថា កត្តាទាំងនេះហើយ ទើបធ្វើឱ្យលោកព្យាយាមបង្កើតកង់ឈើដោយដៃឡើងមក ដោយពឹងផ្អែកលើចំណេះដឹងដែលលោកមាន និងស្វែងរកវត្ថុដែលងាយស្រួលរកផងដែរ ។ ហេតុនេះ លោកក៏ធ្វើកង់ឈើ១គ្រឿងនេះ ហើយវត្ថុស្ទើរទាំងអស់ដែលលោកយកមកធ្វើ គឺលោកប្រើប្រាស់បន្ទះឈើ ។ ប៉ុន្តែច្រវ៉ាក់របស់វា លោកបានយកពីគ្រឿងយន្តចាស់ និងយកកៅស៊ូចាស់មករុំព័ទ្ធជុំវិញកង់ ដើម្បីឱ្យងាយស្រួលជិះនៅតាមផ្លូវ ។

លោកបន្ថែមថា ក្រោយពីរូបភាពកង់ឈើរបស់លោកបានល្បីល្បាញក្នុងបណ្តាញសង្គម ធ្វើឱ្យបច្ចុប្បន្ននេះ មានមនុស្សជាច្រើនទាក់ទងមកលោក ដើម្បីឱ្យលោកផលិតកង់ឈើបែបនេះឱ្យបានច្រើនគ្រឿងថែមទៀត ។ ប៉ុន្តែលោកប្រាប់ថា ការផលិតកង់នីមួយៗត្រូវសិក្សាឱ្យបានលម្អិត និងចំណាយពេលវេលាផងដែរ ។

ទោះយ៉ាងណា នៅក្នុងខ្លឹមសារដែលផ្សព្វផ្សាយដោយ Myanmar Pressphoto Agency ពុំបានបញ្ជាក់ឱ្យបានលម្អិតថា តើដើមទុនក្នុងការផលិតកង់ឈើនេះត្រូវចំណាយអស់ប្រាក់ប៉ុន្មានទេ ៕

គេសង្កេតឃើញថា គ្រោះថ្នាក់ចរាចរណ៍នៅតាមដងផ្លូវភាគច្រើនបានកើតឡើងដោយសារការផឹកស្រាស្រវឹង និងបើកបរនៅតាមផ្លូវ ក្នុងនោះមានមនុស្សជាច្រើននាក់បានស្លាប់ចោលក្រុមគ្រួសារ និងបងប្អូន ដែលបង្កឡើងដោយសារពួកស្រវឹងហើយបើកបរ ។ ហេតុការណ៍គ្រោះថ្នាក់នេះបានបណ្តាលឱ្យសាច់ញាតិអ្នកស្លាប់មានវិប្បដិសារីអស់មួយជីវិត ព្រោះការបាត់បង់បង្គោលគ្រួសារ ហើយពួកគេត្រូវធ្លាក់ទៅក្នុងសភាពលំបាក ។

នៅទីបំផុត កូនចៅពុំបានរៀនសូត្រចប់ចុងចប់ដើម និងគ្មានអនាគតល្អប្រសើរ ដោយសារឪពុក-ម្តាយពួកគេបានស្លាប់ចោលទាំងគ្មានកំហុស ដែលកើតឡើងដោយសារការបើកបររបស់ពួកស្រវឹងមួយចំនួន ។ តើយើងគួរបន្ទោសអ្នកណាចំពោះការស្លាប់របស់មនុស្សម្នានៅតាមផ្លូវជាបន្តបន្ទាប់? តើស្ថាប័នណាមួយជាអ្នកទទួលខុសត្រូវចំពោះគ្រួសារអ្នកស្លាប់?

លោកវេជ្ជបណ្ឌិត ព្រីឆា សិរិថងថាវ៉ន មកពីមន្ទីរពេទ្យសិរិរ៉ាជ ប្រទេសថៃ លើកឡើងថា ៖ «ការផឹកស្រាពុំបានផ្តល់ប្រយោជន៍អ្វីទេ ពីព្រោះនៅពេលផឹកស្រាចូលក្នុងរាងកាយ ពេលដំបូង វានឹងធ្វើឱ្យអ្នកនោះបាត់បង់ការគ្រប់គ្រងស្មារតី ។ លើសពីនេះ ការផឹកស្រាជាទម្លាប់នឹងបណ្តាលឱ្យយើងកើតជំងឺផ្សេងៗដូចជា ជំងឺខួរក្បាល, បេះដូង និងតម្រង់នោម» ។

លោកបន្តថា ៖ «ការផឹកស្រាជាប្រចាំនឹងធ្វើឱ្យប៉ះពាល់ដល់ខួរក្បាល គឺការចងចាំចុះខ្សោយ និងបណ្តាលឱ្យតានតឹងផ្លូវចិត្តទៀតផង ។ ពេលខ្លះ អ្នកផឹកស្រាតែងតែគិតថា នឹងមានអ្នកណាម្នាក់មកធ្វើបាបខ្លួន ។ លើសពីនេះ វាអាចបណ្តាលឱ្យសម្ពាធឈាមឡើងខ្ពស់, រលាកតម្រងនោម និងធ្វើឱ្យមានឈាមហូរក្នុងប្រព័ន្ធរំលាយអាហារ» ។

លោកបន្ថែមថា ៖ «ការផឹកស្រា មិនត្រឹមតែធ្វើឱ្យខូចសុខភាពរាងកាយប៉ុណ្ណោះទេ ប៉ុន្តែគ្រោះថ្នាក់ចរាចរណ៍ផ្សេងៗដែលបានកើតឡើងនៅក្នុងពិធីបុណ្យតូច-ធំ គឺភាគច្រើនបណ្តាលមកពីការផឹកស្រាស្រវឹង រួចបើកបរ ។ ហេតុនេះ វាបណ្តាលឱ្យបាត់បង់ជីវិតមនុស្ស និងទ្រព្យសម្បត្តិយ៉ាងច្រើន» ។

លោកបញ្ជាក់ថា ការផឹកស្រាបានបំផ្លាញគ្រប់ផ្នែកទាំងអស់ដល់រាងកាយ ដូចជា ៖ វាធ្វើឱ្យរាងកាយចុះខ្សោយ, មិនអាចគ្រប់គ្រងខ្លួនឯងបាន, មានក្លិននៅជាប់ខ្លួន និងខ្វះទំនុកចិត្តពីមនុស្សនៅជុំវិញខ្លួន ។ ហេតុនេះ យើងគួរតែបញ្ឈប់ការផឹកស្រាឱ្យបាន ។

ចុងក្រោយ លោកវេជ្ជបណ្ឌិត ព្រីឆា សិរិថងថាវ៉ន បានផ្តាំផ្ញើទៅកាន់អ្នកផឹកស្រា និងក្រុមអ្នកផឹកស្រាទាំងអស់ថា ត្រូវតែគិតដល់គ្រោះថ្នាក់ផ្សេងៗដែលនឹងកើតឡើង ហើយពួកគេពុំត្រូវបើកបរយានជំនិះក្នុងពេលស្រវឹងទេ ដើម្បីសុវត្ថិភាពអ្នកធ្វើដំណើរនៅតាមផ្លូវ ។ ចំណុចសំខាន់ សង្គមជាតិត្រូវហាមឃាត់ផ្ទាំងឃោសនាស្រាបៀរនៅតាមផ្លូវ ព្រោះផ្ទាំងឃោសនាស្រាបៀរទាំងនេះនឹងជំរុញឱ្យអ្នកបើកបរចង់ផឹកស្រា ៕