បរទេស៖ ក្រុមហ៊ុន Apple ត្រូវបានគេរំពឹងថានឹងបញ្ចេញម៉ូដែល Smart Ring ឆាប់ៗនេះ ដែលមានសមត្ថភាពត្រួតពិនិត្យសុខភាព ដើម្បីប្រកួតប្រជែងជាមួយ Galaxy Ring របស់ Samsung។

កាលពីថ្ងៃទី២១ ខែកុម្ភៈ ឆ្នាំ២០២៤ យោងតាម ET News បានឱ្យដឹងថា ក្រុមហ៊ុន Apple បាននិងកំពុងស្រាវជ្រាវចិញ្ចៀនឆ្លាតវៃជាច្រើនឆ្នាំមកហើយ និងជាម្ចាស់ប៉ាតង់ជាច្រើនដែលទាក់ទងនឹងផលិតផលនេះ។ ទោះជាយ៉ាងណាក៏ដោយ បន្ទាប់ពីលេចធ្លាយព័ត៌មានថា Samsung ហៀបនឹងណែនាំ Galaxy Ring ក្រុមហ៊ុនបច្ចេកវិទ្យារបស់អាមេរិកនេះក៏បានពិចារណាយ៉ាងយកចិត្តទុកដាក់ចំពោះផែនការប្រកាស Apple Ring របស់ខ្លួនផងដែរ និងបានដាក់ពាក្យសុំប៉ាតង់សម្រាប់ឧបករណ៍តាមដានសុខភាពដែលអាចពាក់ម្រាមដៃបាន ដោយគេជឿថាក្រុមហ៊ុនកំពុងរៀបចំផែនការចេញផ្សាយនាពេលខាងមុខនេះ។

បើយោងតាមប្រភពដដែលបានឱ្យដឹងទៀតថា បច្ចុប្បន្នក្រុមហ៊ុន Apple កំពុងត្រួតពិនិត្យសញ្ញាដើម្បីវាយតម្លៃថាតើចិញ្ចៀនឆ្លាតវៃនឹងអាចក្លាយជាជម្រើសជំនួសនាឡិកាឆ្លាតវៃបានដែរឬទេ ដោយសារចិញ្ចៀនអាចពាក់បានយូរ ជាពិសេសសម្រាប់ការត្រួតពិនិត្យក្នុងការគេង។ ទន្ទឹមនឹងនេះដែរ ក្រុមហ៊ុន Samsung ក៏ត្រូវបានគេនិយាយដែរថាគ្រោងនឹងដាក់បង្ហាញ Galaxy Ring នៅក្នុងព្រឹត្តិការណ៍ Galaxy Unpacked នៅចុងខែកក្កដាខាងមុខនេះ រួមជាមួយនឹងស្មាតហ្វូនដែលអាចបត់បាន Galaxy Z Fold6 និង Z Flip6 ។

ផលិតផលនេះគាំទ្រការវាស់កម្រិតអុកស៊ីសែនក្នុងឈាម អេឡិចត្រូតបេះដូង ការត្រួតពិនិត្យការគេង និងជាច្រើនទៀត។ លើសពីនេះ ចិញ្ចៀនក៏អាចគាំទ្រការបង់ប្រាក់ឥតខ្សែ និងការគ្រប់គ្រងឧបករណ៍ឆ្លាតវៃផងដែរ។ Galaxy Ring របស់ Samsung ក៏ត្រូវបានគេនិយាយថាដែរកំពុងស្ថិតក្នុងដំណាក់កាលផលិតគំរូ ហើយត្រូវបានគេរំពឹងថានឹងឈានទៅដល់ការផលិតទ្រង់ទ្រាយធំនៅក្នុងត្រីមាសទីពីរនៃឆ្នាំ ២០២៤ ដោយផលិតផលនេះមាន ៨ ទំហំ និងគាំទ្រ AI ។

គួរបញ្ជាក់ដែរថា បច្ចុប្បន្ននេះ ក៏មានម៉ូដែលចិញ្ចៀនឆ្លាតវៃមួយចំនួននៅលើទីផ្សារផងដែរ ដូចជាចិញ្ចៀន Oura របស់ Amazfit ឬ Helio Ring ជាដើម ដោយទីផ្សារចិញ្ចៀនឆ្លាតវៃសកលអាចនឹងកើនឡើងពី ២០ លានដុល្លារក្នុងឆ្នាំ ២០២៣ ដល់ជិត ២០០ លានដុល្លារក្នុងឆ្នាំ ២០៣១ នេះបើយោងតាមស្ថិតិពី Business Research Insight។ Apple មានវិធីជាច្រើនដើម្បីចូលទៅដល់ផ្នែកទីផ្សារនេះ ឧទាហរណ៍ វាអាចប្រើចិញ្ចៀនដើម្បីគ្រប់គ្រងឧបករណ៍ផ្សេងទៀតដូចជា ស្មាតហ្វូន ប៉ុន្តែអាទិភាពរបស់ក្រុមហ៊ុនគឺការត្រួតពិនិត្យសុខភាព។ ខណៈដែល Samsung ក៏ត្រូវបានគេរំពឹងថានឹងវ៉ាដាច់ដៃគូប្រកួតប្រជែងរបស់ខ្លួន ហើយកំណត់ស្តង់ដារថ្មីសម្រាប់ទីផ្សារចិញ្ចៀនឆ្លាតវៃ៕

ជាការពិតណាស់ នៅកន្លែងធ្វើការ ការប្រាស្រ័យទាក់ទងគ្នាទៅវិញទៅមកគឺជារឿងល្អ ហើយការបើកចំហ ឬការនិយាយប្រាប់មិត្តភក្ដិរួមការងារអំពីខ្លួនអ្នក ក៏ជារឿងល្អដែរពីព្រោះអ្នកនឹងអាចកសាងបណ្ដាញទំនាក់ទំនងការងារកាន់តែទូលំទូលាយ។ ប៉ុន្តែទោះជាយ៉ាងណា រឿងខ្លះក៏មិនគួរនិយាយចេញមកដែរ ព្រោះវាអាចនាំផលអវិជ្ជមានដល់រូបអ្នក។ ដូច្នេះខាងក្រោមនេះ គឺជារឿងមួយចំនួនដែលអ្នកមិនគួរនិយាយអំពីខ្លួនអ្នកនៅកន្លែងធ្វើការ៖

១.រឿងនយោបាយ៖ ការនិយាយរឿងនយោបាយក្នុងកន្លែងធ្វើការគឺមិនល្អនោះទេ ទោះបីជាអ្នកមិនកាន់ជើងខាងណាក៏ដោយ ក៏វាអាចមានបញ្ហាដល់រូបអ្នកដែរ។ មនុស្សម្នាក់ៗប្រកាន់គោលការណ៍ និងជំនឿខុសៗគ្នា ដូច្នេះបើអ្នកមើលស្រាលគោលការណ៍ ឬជំនឿដែលគេប្រកាន់ខ្ជាប់ នោះទំនាក់ទំនងអ្នកនិងមិត្តរួមការងារអាចនឹងមានបញ្ហា។

២.រឿងប្រាក់ខែ៖ ការនិយាយប្រាប់ពីប្រាក់ខែអ្នកឱ្យគេដឹង ឬក៏សួរគេអំពីប្រាក់ខែគឺជារឿងមិនល្អ ដែលវានឹងនាំមកនូវតែភាពអវិជ្ជមានរវាងអ្នកនិងមិត្តរួមការងារអ្នក។ ជាការពិតណាស់ នៅកន្លែងធ្វើការនីមួយៗ គឺមិនមានភាពយុត្តិធម៌ចំពោះរឿងប្រាក់ខែនោះទេ។ ពេលខ្លះ សូម្បីតែមិត្តសម្លាញ់របស់អ្នក នៅពេលដែលអ្នកប្រាប់គ្នាទៅវិញទៅមកអំពីប្រាក់ខែរៀងៗខ្លួនរួច អារម្មណ៍នៃការរាប់អានរបស់អ្នកចំពោះគ្នាអាចនឹងលែងដូចដើម។

៣.រឿងក្នុងបន្ទប់ដេករបស់អ្នកដទៃ៖ នៅកន្លែងធ្វើការ អ្នកគួរជៀសវាងដាច់ខាតការនិយាយអំពីជីវិតផ្លូវភេទ ឬទំនោរផ្លូវភេទរបស់មិត្តរួមការងារ។ គ្មានអ្នកណាម្នាក់សប្បាយចិត្តនឹងស្ដាប់អ្នកនិយាយអំពីជីវិតផ្លូវភេទឯកជនរបស់គេនោះទេ អ្នកអាចគិតអ្វីក៏បានចំពោះអ្នកណាម្នាក់ក៏បាន ប៉ុន្តែទុកតែក្នុងខួរក្បាលអ្នកបានហើយ កុំនិយាយវាអី ព្រោះនឹងនាំមកតែភាពអវិជ្ជមានមកលើរូបអ្នកតែប៉ុណ្ណោះ។

៤.ប្រាប់គេពីអតីតកាលមិនល្អរបស់ខ្លួន៖ គួរកុំប្រាប់គេឯងនៅកន្លែងធ្វើការដឹងពីអតីតកាលមិនល្អរបស់អ្នកឱ្យសោះ។ វាមិនចំណេញអ្វីទេ ប៉ុន្តែផ្ទុយទៅវិញ វានឹងនាំឱ្យគេឯងគិតអវិជ្ជមានមកលើរូបអ្នក ដូច្នេះរឿងអតីតកាលមិនល្អរបស់អ្នក ទុកក្នុងចិត្តអ្នកបានហើយ។

៥.ប្រាប់គេឯងថាអ្នកកំពុងរកការងារថ្មី៖ នៅកន្លែងធ្វើការ បើកាលណាគេដឹងថា អ្នកកំពុងរៀបចំគម្រោងចាកចេញ គឺគ្មានហេតុផលអ្វីដែលគេឯងគ្រប់គ្នាគួរចំណាយពេលជាមួយអ្នកនោះទេ។ ជួនកាល អ្នកបរាជ័យក្នុងការទទួលបានការងារថ្មី ដូច្នេះគួរតែកុំប្រាប់គេឯងឱ្យដឹងអី ត្រូវរង់ចាំរហូតដល់ពេលអ្នកបានការងារនោះសិន បើគេដឹងថាអ្នកស្វែងរកការងារថ្មី ប៉ុន្តែបរាជ័យគេលែងចាត់ទុកអ្នកជាមនុស្សសំខាន់ទៀតហើយ៕

បរទេស៖ ក្រុមហ៊ុនផលិតរថយន្ត VinFast របស់វៀតណាម និង BYD របស់ចិនបានរួមគ្នាបញ្ចុះតម្លៃរថយន្តអគ្គិសនីដើម្បីប្រកួតប្រជែងជាមួយប្រទេសឥណ្ឌូណេស៊ីដែលជាទីផ្សាររថយន្តអគ្គិសនីដ៏ធំបំផុតនៅអាស៊ីអាគ្នេយ៍។
កាលពីថ្ងៃទី២០ ខែកុម្ភៈ ឆ្នាំ២០២៤ យោងតាម Nikkei Asia បានឱ្យដឹងថា ប្រទេសឥណ្ឌូណេស៊ីកំពុងក្លាយជាទីផ្សារដ៏សំខាន់បំផុតសម្រាប់ក្រុមហ៊ុនផលិតរថយន្តអគ្គិសនីជាច្រើន ខណៈដែលប្រទេសនេះអះអាងជំហររបស់ខ្លួនថាជាប្រទេសផលិតនីកែលដ៏ធំបំផុតរបស់ពិភពលោក ដែលជាធាតុផ្សំដ៏សំខាន់នៅក្នុងអាគុយរថយន្តអគ្គិសនី។

ជាមួយនឹងប្រជាជនជាង ២៧០ លាននាក់ ឥណ្ឌូនេស៊ីគឺប្រទេសដែលមានប្រជាជនច្រើនជាងគេទី ៤ របស់ពិភពលោកកំពុងឈរឈ្មោះជាទីផ្សាររថយន្តដ៏ធំបំផុតនៅអាស៊ីអាគ្នេយ៍។ នៅឯពិព័រណ៌រថយន្តអន្តរជាតិឥណ្ឌូណេស៊ីដែលកំពុងដំណើរការកាលពីពេលថ្មីៗនេះ ក្រុមហ៊ុន VinFast បានដាក់បង្ហាញរថយន្ត ៥ កៅអីចំនួន ២ ម៉ូដែលគឺ VFe34 ដែលមានតម្លៃប្រហែល ៣០០ លានរូពី (ប្រមាណ ១៩,០០០ ដុល្លារអាមេរិក) និង VF5 មានតម្លៃ ២៥០ លានរូពី (ប្រមាណ ១៦,០០០ ដុល្លារអាមេរិក)។

ចំពោះក្រុមហ៊ុនចិន BYD វិញក៏បានដាក់បង្ហាញនូវរថយន្តអគ្គិសនី Atto 3 របស់ខ្លួនផងដែរនៅឯការតាំងពិព័រណ៌រថយន្តអន្តរជាតិនៅឥណ្ឌូណេស៊ី ដែលមានតម្លៃ ៥១៥ លានរូពី (ប្រមាណ ៣៣,០០០ ដុល្លារអាមេរិក)។ ទោះជាយ៉ាងណាក៏ដោយ បើយោងតាម Nikkei Asia តម្លៃនេះគឺតិចជាងពាក់កណ្តាលនៃមធ្យមភាគសកលសម្រាប់រថយន្តអគ្គិសនី ប៉ុន្តែវានៅតែមានតម្លៃថ្លៃនៅក្នុងប្រទេសឥណ្ឌូនេស៊ី ដោយសារតែប្រាក់បៀវត្សរ៍ប្រចាំខែរបស់ប្រជាជននៃប្រទេសនេះជាមធ្យមគឺប្រហែល ៣.១៨ លានរូពី (ប្រមាណជាង ២០០ ដុល្លារអាមេរិកប៉ុណ្ណោះ)។

គួរបញ្ជាក់ដែរថា ឥណ្ឌូនេស៊ីគឺជាទីផ្សាររថយន្តដ៏ធំបំផុតនៅអាស៊ីអាគ្នេយ៍។ ដូច្នេះក្រុមហ៊ុន VinFast របស់វៀតណាមគ្រោងនឹងដំឡើងរថយន្តអគ្គិសនីរបស់ខ្លួនចំនួន ៥០,០០០ គ្រឿងនៅឆ្នាំនេះ និង ១០០,០០០ គ្រឿងនៅឆ្នាំក្រោយ។ លោក Zachary Mark Hollis នាយកផ្នែកលក់របស់ VinFast បាននិយាយថា រថយន្តអគ្គិសនីមានអត្ថប្រយោជន៍ជាច្រើនដូចជាមិនចាំបាច់ចាក់សាំង ការថែទាំកាន់តែងាយស្រួល និងស្របតាមនិន្នាការចុងក្រោយបង្អស់៕