ប្រទេសចិន៖ ប្រទេសចិនបានប្រកាសពីមហិច្ឆតារបស់ខ្លួនក្នុងការអភិវឌ្ឍន៍បច្ចេកវិទ្យាបន្ទះឈីបខួរក្បាលជាមួយនឹងចំណុចប្រទាក់ខួរក្បាល-កុំព្យូទ័រ ដែលស្រដៀងគ្នាទៅនឹងអ្វីដែល Neuralink របស់ Elon Musk កំពុងស្វែងរក។

កាលពីថ្ងៃទី ២៩ ខែមករា ឆ្នាំ២០២៤ គេហទំព័ររបស់ក្រសួងឧស្សាហកម្ម និងបច្ចេកវិទ្យាព័ត៌មានរបស់ប្រទេសចិន (MIIT) បានបង្ហោះឯកសារដែលពិពណ៌នាអំពីផែនការដ៏សំខាន់មួយក្នុងការលើកកម្ពស់បច្ចេកវិទ្យាទំនើប។ MIIT បាននិយាយថា ខ្លួនកំពុងរៀបចំសម្រាប់របកគំហើញបច្ចេកវិទ្យាថ្មីរាប់រយ ដោយបង្កើត “ផលិតផលដែលលេចធ្លោ” នៅឆ្នាំ ២០២៥។

គោលដៅរបស់ប្រទេសចិនគឺដើម្បីធ្វើឱ្យខួរក្បាលគណនាគំរូសរសៃប្រសាទ និងបច្ចេកវិទ្យាពាក់ព័ន្ធមានភាពងាយស្រួលក្នុងការប្រើប្រាស់ និងមានសុវត្ថិភាព។ ផ្នែកដែលរំពឹងទុកនៃការអនុវត្តគឺការស្តារនីតិសម្បទាផ្នែកវេជ្ជសាស្រ្ត យានជំនិះគ្មានអ្នកបើកបរ និងការពិតនិម្មិត។ បើយោងតាម Business Insider បានឱ្យដឹងថា ប្រទេសចិនក៏កំពុងពន្លឿនការអភិវឌ្ឍបច្ចេកវិទ្យាដូចជា បន្ទះឈីប GPU និងកុំព្យូទ័រ quantum ផងដែរ ដោយមហិច្ឆតារបស់ពួកគេគឺចង់ក្លាយជាប្រទេសត្រួសត្រាយផ្លូវក្នុងវិស័យទាំងនេះនៅឆ្នាំ ២០២៧។

បច្ចុប្បន្ន ប្រទេសចិនបាននិងកំពុងស្រាវជ្រាវយ៉ាងស្ងៀមស្ងាត់ដើម្បីបង្កើតឧបករណ៍ទំនាក់ទំនងខួរក្បាល-កុំព្យូទ័រ រួមទាំងម៉ូដែលដែលអាចប្រកួតប្រជែងជាមួយបន្ទះឈីបខួរក្បាល Neuralink របស់ Elon Musk ផងដែរ។ រដ្ឋាភិបាលចិនក៏បានឧបត្ថម្ភមន្ទីរពិសោធន៍មួយដើម្បីស្រាវជ្រាវខួរក្បាល-កុំព្យូទ័រនៅក្នុងទីក្រុងធានជីន ដែលមានអ្នកវិទ្យាសាស្ត្រចំនួន ៦០ នាក់ធ្វើការនៅទីនេះទៀតផង។

យោងតាមទីភ្នាក់ងារព័ត៌មាន Bloomberg ក៏បានឱ្យដឹងដែរថា ចំណុចប្រទាក់ខួរក្បាល-កុំព្យូទ័រត្រូវបានបង្កើតឡើងជាច្រើនទសវត្សរ៍មកហើយ ដោយមានក្រុមហ៊ុនជាច្រើនបានចូលរួម ប៉ុន្តែមានរបកគំហើញតិចតួចណាស់។ ដោយបន្ទះឈីបខួរក្បាល Neuralink របស់ Elon Musk ដែលបង្កើតឡើងក្នុងឆ្នាំ ២០១៧ គឺជាក្រុមហ៊ុនមួយក្នុងចំណោមក្រុមហ៊ុនដែលទាក់ទាញការចាប់អារម្មណ៍បំផុត។

ឧបករណ៍ Neuralink មានអេឡិចត្រូតច្រើនជាង ១,០០០ ដែលច្រើនជាងការផ្សាំផ្សេងទៀត។ វាកំណត់គោលដៅណឺរ៉ូននីមួយៗ ខណៈដែលឧបករណ៍ជាច្រើនផ្តោតលើក្រុមណឺរ៉ូន។ ប្រសិនបើគំរូរបស់ Neuralink ដំណើរការបានល្អ វានឹងនាំមកនូវប្រសិទ្ធភាពកាន់តែច្រើន។ គោលដៅដំបូងរបស់ Elon Musk គឺបង្កើតឧបករណ៍នេះ ដើម្បីអនុវត្តនីតិវិធីប្តូរសរីរាង្គ ហើយក្រុមដំបូងដែលក្រុមហ៊ុនកំណត់គោលដៅគឺមនុស្សពិការភ្នែក ឬពិការការស្តាប់។ ទោះជាយ៉ាងណាក៏ដោយ គោលដៅបន្ថែមទៀតគឺថា ឧបករណ៍នេះនឹងដឹងពីមហិច្ឆតានៃការបញ្ចូលខួរក្បាលមនុស្សជាមួយនឹង AI ៕

ប្រទេសថៃ ៖ បើគេក្រឡេកមើលទៅអតីតកាលកាលពីជាង៣០ឆ្នាំមុន មនុស្សគ្រប់គ្នានឹងចងចាំយ៉ាងច្បាស់ពីតារាសម្តែងស្រីឈ្មោះ ពិន ចារុនីសុខសាន់ (ហៅនាងឆ្មាព្រៃ) ថា នាងគឺជាតារាសម្តែងដ៏ល្បីល្បាញម្នាក់នៅប្រទេសថៃ ។ នាងបានសម្តែងភាពយន្តជាច្រើនរឿង រហូតដល់ទស្សនិកជនជាច្រើននាក់ចូលចិត្តការសម្តែងរបស់នាងយ៉ាងខ្លាំង ។

រហូតមកដល់ពេលបច្ចុប្បន្ន តារាសម្តែងជើងចាស់ម្នាក់នេះបានទំនេរពីការងារសម្តែងភាពយន្តហើយ ដោយនាងបានត្រឡប់ទៅរស់នៅស្រុកកំណើតក្នុងខេត្តសមុទ្រសង់ក្រាម ។ នាងបានរស់នៅក្នុងផ្ទះឈើដ៏ធំមួយតាមមាត់ប្រឡាយ «ខេវអម» ហើយសម្រាប់មនុស្សភាគច្រើនដែលបានឃើញនាងរស់នៅបែបនេះ ពួកគេនិយាយដូចៗគ្នាថា នេះជាជីវិតដូចក្នុងក្តីសុបិន ដោយសារនាងបានរស់នៅតាមមាត់ប្រឡាយយ៉ាងសាមញ្ញ ។

ផ្ទះរបស់អ្នកនាង ពិន ចារុនី គឺមិនមែនសម្រាប់រស់នៅតែម្យ៉ាងទេ ប៉ុន្តែនាងបានយកទីនេះធ្វើជារីសតសម្រាប់ទទួលភ្ញៀវទេសចរផងដែរ ដោយនាងដាក់ឈ្មោះថា «Jarunee Riverville» ។ នាងលើកឡើងថា ការយកផ្ទះធ្វើជារីសតបែបនេះ គឺដើម្បីផ្តល់បទពិសោធន៍ឱ្យភ្ញៀវទេសចរអាចមកសម្រាកលំហែរនៅតាមមាត់ប្រឡាយ និងទទួលយកបរិយាកាសបែបធម្មជាតិ ។

មនុស្សភាគច្រើនធ្លាប់បានទស្សនាភាពយន្តជាច្រើនរឿងដែលនាង ពិន ចារុនី សម្តែង ហើយនាងត្រូវបានគេចាត់ទុកថា គឺជាតារាសម្តែងលំដាប់កំពូលប្រចាំប្រទេសថៃទៀតផង ។ រយៈពេលក្រោយមកទៀត ទស្សនិកជនក៏បានទស្សនាភាពយន្តរបស់នាងផងដែរ ហើយសមត្ថភាពសម្តែងរបស់នាងនៅតែពូកែដូចមុន និងមិនប្រែប្រួលឡើយ ។

នៅពេលអ្នកនាង ពិន ចារុនី ត្រូវបានគេអញ្ជើញមកធ្វើជាភ្ញៀវកិត្តិយសក្នុងកម្មវិធី «Club Friday Show» នាងបានរៀបរាប់ពីរឿងរ៉ាវក្នុងជីវិតរបស់ខ្លួន ព្រមទាំងប្រាប់ពីសេចក្តីស្នេហាក្នុងចិត្តផងដែរ ។ នាងនិយាយថា វាជាលើកដំបូងហើយដែលនាងបានមកអង្គុយជជែកគ្នាពីរឿងរ៉ាវផ្ទាល់ខ្លួនបែបនេះ គឺពេលនាងបានឈានជើងចូលក្នុងវិស័យសិល្បៈលើកដំបូងឃើញថា មានអ្នកតាមស្រឡាញ់ និងទិញរបស់របរឱ្យនាងគ្រប់យ៉ាង ។ នាងបន្តថា នាងធ្លាប់ឈឺចិត្តដោយសារតារាឯកប្រុស ហើយជីវិតពេលនោះ គឺដូចពិភពលោកជិតរលាយអីចឹង ។

បន្ទាប់មក នាងក៏បានជួបមនុស្សជាទីស្រឡាញ់ម្នាក់ទៀតជាតារាសម្តែងដូចគ្នា ហើយនាងគិតថា នាងជាគូជាមួយអ្នកនោះពិតប្រាកដ ។ ប៉ុន្តែត្រូវបានភរិយារបស់គេកាន់កាំភ្លើងមករង់ចាំនាងដល់ផ្ទះ ។ ក្រោយមក មានតារាសម្តែងម្នាក់ទៀតបានតាមស្រឡាញ់នាង ហើយនាងក៏ចូលចិត្តរូបគេដែរ រហូតដល់រូបគេប្រគល់ចិញ្ចៀន១វង់ឱ្យនាង ។ ប៉ុន្តែនាងបានឃើញតារាស្រីម្នាក់ទៀតពាក់ចិញ្ចៀនដូចនាងដែរ ទើបនាងដឹងថា បុរសម្នាក់នេះជាព្រាននារី និងឱ្យចិញ្ចៀនទៅនារីគ្រប់គ្នា ។

នាងបន្តថា នាងធ្លាប់មានគ្រោះថ្នាក់ក្រឡាប់រថយន្ត ហើយនាងបានបាក់ឆ្អឹងខ្នង និងសម្រាកព្យាបាលនៅមន្ទីរពេទ្យ ។ រហូតមកដល់បច្ចុប្បន្ននេះ គ្រោះថ្នាក់ក្រឡាប់រថយន្តនៅថ្ងៃនោះ បានបណ្តាលឱ្យប្រព័ន្ធរំលាយអាហាររបស់នាងដំណើរការមិនប្រក្រតី ។ ក្រៅពីនេះ នាងធ្លាប់បានធ្វើអត្តឃាតខ្លួនឯងចំនួន៣លើក ដោយការញ៉ាំថ្នាំដេកលក់ ព្រោះតូចចិត្តនឹងជីវិតគ្រួសារ ៕

សហរដ្ឋអាមេរិក ៖ មនុស្សភាគច្រើនចូលចិត្តចិញ្ចឹមសត្វឆ្កែ និងឆ្មា ហើយពួកគេស្រឡាញ់វាខ្លាំងដូចជាកូនម្នាក់អីចឹង ។ ប៉ុន្តែឆ្កែ និងឆ្មាមានអាយុខ្លី គឺឆ្មាមានអាយុជាមធ្យម ចាប់ពី១២ឆ្នាំ ទៅ២០ឆ្នាំ រីឯឆ្កែពូជធំៗមានអាយុជាមធ្យម ចាប់ពី១២ឆ្នាំ ទៅ២៣ឆ្នាំ ខណៈឆ្កែតូចៗមានអាយុជាមធ្យម ចាប់ពី១៥ឆ្នាំ ទៅ១៦ឆ្នាំ ប៉ុណ្ណោះ ។ ហេតុនេះ ធ្វើឱ្យអ្នកស្រឡាញ់ឆ្កែ-ឆ្មាទាំងឡាយសោកស្តាយយ៉ាងខ្លាំង នៅពេលពួកវាត្រូវងាប់មុនអាយុ ឬដល់ពេលអស់អាយុ ។

សារព័ត៌មាន BBC បានរាយការណ៍កាលពីខែធ្នូ ឆ្នាំ២០២៣ ថា គេបានរកឃើញថ្នាំពន្យារអាយុសម្រាប់សត្វឆ្កែ និងឆ្មា ហើយថ្នាំពន្យារអាយុឆ្កែ មានឈ្មោះថា «LOY» នឹងជួយឱ្យឆ្កែពូជធំៗមានអាយុវែងជាងមុន ១០ឆ្នាំ ។ រីឯថ្នាំពន្យារអាយុឆ្មា ឈ្មោះ «AIM» នឹងជួយឱ្យឆ្មាមានអាយុវែងជាងមុន រហូតដល់៣០ឆ្នាំ ។

ក្រុមហ៊ុនស្រាវជ្រាវ និងផលិតថ្នាំពន្យារអាយុឆ្កែ និងឆ្មា ដោយជោគជ័យនោះ គឺក្រុមហ៊ុនរបស់អាមេរិកឈ្មោះ Loyal for Dogs ។ ថ្នាំពន្យារអាយុនេះមាន៣ប្រភេទ គឺ ៖ LOY–001, LOY–002 និង LOY–003 ហើយថ្នាំនេះអាចជួយពន្យារអាយុឆ្កែស្ទើរគ្រប់ពូជ ។ ថ្នាំនេះនឹងមានប្រសិទ្ធភាពរារាំងមុខងាររបស់អរម៉ូនបន្តពូជមួយប្រភេទឈ្មោះថា «lnsulin Growth Factor-1» ដែលមានឥទ្ធិពលចំពោះភាពជរា និងអាយុជីវិតរបស់សត្វ ។

គណៈកម្មការចំណីអាហារ និងឱសថ (FDA) របស់អាមេរិកបានអនុម័តឱ្យគ្លីនិកសាកល្បងថ្នាំប្រភេទ LOY–001 ក្រោយពីការពិចារណាទិន្នន័យបឋមបង្ហាញថា ថ្នាំនេះមានកត្តាគាំទ្រវាគ្រប់គ្រាន់ថា វាមានប្រសិទ្ធភាពពិតប្រាកដ ។ LOY–001 គឺជាថ្នាំចាក់ពន្យារអាយុសម្រាប់ឆ្កែពូជធំៗ ដែលមានអាយុចាប់ពី៧ឆ្នាំឡើងទៅ ដោយគេត្រូវចាក់វា រៀងរាល់៣ខែ ទៅ៦ខែ ។

រីឯថ្នាំ LOY–002 និង LOY–003 គឺជាថ្នាំគ្រាប់សម្រាប់ឱ្យឆ្កែ និងឆ្មា ស៊ីជារៀងរាល់ថ្ងៃ ។ គេរំពឹងថា គណៈកម្មការចំណីអាហារ និងឱសថ (FDA) នឹងអនុម័តឱ្យលក់ចែកចាយថ្នាំប្រភេទ LOY–001 នៅឆ្នាំ២០២៦ ឬ២ឆ្នាំទៀត ។

ចំណែកថ្នាំ AIM សម្រាប់ពន្យារអាយុឆ្មា គឺជាថ្នាំផលិតឡើងដោយសាស្ត្រាចារ្យ Toru Miyazaki ជាអ្នកជំនាញផ្នែកភាពស៊ាំមកពីសាកលវិទ្យាល័យតូក្យូ ប្រទេសជប៉ុន ។ ការផលិតថ្នាំនេះ គឺសម្រាប់ការពារ និងព្យាបាលរោគតម្រងនោម ដែលជំងឺនេះបានកើតឡើងជាញឹកញាប់លើសត្វឆ្មា១ ក្នុងចំណោមឆ្មា៣ក្បាល ។ ហេតុនេះ វាជាមូលហេតុចម្បងដែលធ្វើឱ្យឆ្មាត្រូវងាប់មុនអាយុ ។ ជំងឺតម្រងនោមតែងកើតឡើងនៅពេលឆ្មាអាយុប្រមាណ១០ឆ្នាំ ដោយសារឆ្មាមានអាយុច្រើន ទើបធ្វើឱ្យប្រសិទ្ធភាពច្រោះកាកសំណល់អន់ថយ ។

ហេតុនេះ សត្វឆ្មាដែលកើតជំងឺតម្រងនោម វានឹងផឹកទឹកញឹកញាប់ខុសពីធម្មតា ហើយវានោមក្នុងបរិមាណច្រើន ឬអត់នោមតែម្តង ។ រីឯទម្ងន់របស់វាស្រកចុះ, មានដំបៅនៅលើមាត់ ហើយការដកដង្ហើមរបស់វាមានក្លិនស្អុយ ។ ជាទូទៅ ឆ្មាកើតជំងឺតម្រងនោម គឺវាមានអាយុមិនដល់១៥ឆ្នាំ ទេ ។

ថ្នាំពន្យារអាយុឆ្មា «AIM» គឺជាម៉ូលេគុលប្រូតេអ៊ីនដែលមានក្នុងឈាមរបស់សត្វជាច្រើនប្រភេទ ដោយវានឹងរារាំងការស្លាប់នៃកោសិកាឈាមសប្រភេទ Macrophages ។ បើតាមលទ្ធផលសាកល្បងបឋមបង្ហាញថា ឆ្មាមានជំងឺធ្ងន់ធ្ងរ បែរជាបានធូរស្រាលឡើងវិញ ។ បច្ចុប្បន្ន គេបានសាកល្បងថ្នាំពន្យារអាយុឆ្មា «AIM» នៅគ្លីនិក ហើយគេសង្ឃឹមថា ថ្នាំនេះនឹងទទួលបានការអនុម័តឱ្យដាក់លក់នៅឆ្នាំ២០២៥ ៕

ប្រទេសជប៉ុន៖ រដ្ឋាភិបាលនៃខេត្ត Tokushima ប្រទេសជប៉ុនបានរងការរិះគន់យ៉ាងខ្លាំង ចំពោះការទិញតុក្កតាសិ..ចតម្លៃ ២,៨០០ ដុល្លារអាមេរិក សម្រាប់ការតាំងពិពណ៌នៅអាកាសយានដ្ឋានដោយជឿថាវានឹងមានប្រសិទ្ធភាពក្នុងការទាក់ទាញភ្ញៀវទេសចរ។កាលពីថ្ងៃទី៣០ ខែមករា ឆ្នាំ២០២៤ យោងតាមកាសែត Mainichi Shimbun ដែលជាកាសែតធំមួយនៅក្នុងប្រទេសជប៉ុន បានរាយការណ៍ថា រដ្ឋាភិបាលខេត្ត Tokushima បានចំណាយប្រាក់ចំនួន ២,៨០០ ដុល្លារដើម្បីទិញតុក្កតាមួយ ដែលត្រូវបានគេស្គាល់ថា ជាតុក្កតាប្រើសម្រាប់ថតរឿងអាសអាភាស ដើម្បីយកមកផ្សព្វផ្សាយទេសចរណ៍នៅក្នុងទីក្រុង។

តុក្កតានេះត្រូវបានបង្ហាញនៅក្នុងការតាំងពិពណ៌ទេសចរណ៍មួយនៅអាកាសយានដ្ឋាន Tokushima Awaodori មុនពេលការរាតត្បាតដែលបានស្វាគមន៍ភ្ញៀវទេសចរជាច្រើនពីកន្លែងផ្សេងទៀតទៅកាន់ខេត្ត។ Tokushima មានទីតាំងនៅលើកោះ Shikoku ដែលជាកោះតូចបំផុតក្នុងចំណោមកោះសំខាន់ៗទាំងបួននៅក្នុងប្រទេសជប៉ុន។ ការតាំងពិព័រណ៌នេះមានគោលបំណងផ្សព្វផ្សាយសិល្បៈនៃការជ្រលក់ពណ៌ឥន្ទ្រាលើក្រណាត់ប្រពៃណីរបស់ខេត្ត និងផលិតផលជ្រលក់ពណ៌ Indigo ត្រូវបានផ្សព្វផ្សាយឱ្យក្លាយជាផលិតផលពិសេសមួយនៅក្នុងស្រុក ដើម្បីទាក់ទាញភ្ញៀវឱ្យមកទស្សនា និងទិញទំនិញ។

ទោះជាយ៉ាងណា មន្ត្រីខេត្តបានសម្រេចយកសម្លៀកបំពាក់ប្រពៃណីប្រចាំស្រុករបស់ខ្លួន ទៅពាក់លើដងខ្លួនតុក្កតាសិ.ច ដោយគាត់គិតថាវានឹង “ផ្គាប់ចិត្តហ្វូងមនុស្ស”។ ផ្ទុយទៅវិញការសម្រេចចិត្តនេះ បានធ្វើឱ្យមនុស្សមួយចំនួនរិះគន់ថា ទោះបីជាតុក្កតានេះទាក់ទាញភ្ញៀវទេសចរច្រើនក៏ដោយ ប៉ុន្តែវាមានតម្លៃថ្លៃណាស់ ប្រសិនបើទិញច្រើន វានឹងខ្ជះខ្ជាយលុយ ហើយមិនសមរម្យចំពោះបទដ្ឋានសង្គមឡើយ។ ដូច្នេះហើយ រដ្ឋាភិបាលក៏សម្រេចរក្សាទុកតុក្កតានេះនៅក្នុងឃ្លាំងរបស់ខេត្ត ហើយមិនត្រូវបានគេយកមកប្រើប្រាស់ម្តងទៀតទេ ចាប់តាំងពីយុទ្ធនាការផ្សព្វផ្សាយសិល្បៈនៃការជ្រលក់ពណ៌ indigo មក។

គួរបញ្ជាក់ដែរថា នេះមិនមែនជាលើកទីមួយទេដែលមន្ត្រីជប៉ុនបង្កភាពចម្រូងចម្រាសដោយការទិញរបស់ចម្លែកៗជាមួយមូលនិធិសាធារណៈ។ នៅខែឧសភា ឆ្នាំ ២០២១ មន្ត្រីនៅទីក្រុងឆ្នេរសមុទ្រ Noto ត្រូវបានគេរិះគន់ថាបានចំណាយប្រាក់ជិត ១៧០,០០០ ដុល្លារពីមូលនិធិសង្គ្រោះ Covid-19 ដើម្បីទិញរូបសំណាកយក្សមួយ។ មន្ត្រីនៅក្នុងទីក្រុងបាននិយាយថា រដ្ឋាភិបាលបានអនុញ្ញាតឱ្យប្រើមូលនិធិដើម្បីផ្សព្វផ្សាយទេសចរណ៍ ដូច្នេះ “គិតថាវានឹងល្អក្នុងការបង្កើតអ្វីមួយដែលមិនមានផលប៉ះពាល់”៕

ថ្មីៗនេះមានហេតុការណ៍ដ៏គួរឲ្យភ្ញាក់ផ្អើលមួយនៅឯប្រទេសថៃ ដោយកីឡាករជំនាញលោតឆ័ត្រយោងជនជាតិអង់គ្លេសម្នាក់បានបាត់បង់ជីវិតភ្លាមៗ ដោយហេតុថាឆ័ត្រយោងរបស់គាត់មិនដំណើរការ ពោលគឺវាមិនអាចគ្រលាស់ឆ័ត្របាន ក្នុងអំឡុងពេលដែលគាត់ព្យាយាមបើកនៅពេលទម្លាក់ខ្លួនចុះមក។

យោងតាមគេហទំព័រ The Independent បានឲ្យដឹងថា បុរសម្នាក់នេះត្រូវបានគេកំណត់អត្តសញ្ញាណថាមានឈ្មោះ Nathy Odinson អាយុ ៣៣ ឆ្នាំ ជាអ្នកជំនាញលោតឆ័ត្រយោងជនជាតិអង់គ្លេស។ មុនពេលដែលលោតចុះមក លោកក៏បានចែករំលែករូបថតនិងវីដេអូដ៏ស្រើបស្រាលរបស់លោកនៅលើគេហទំព័រ Facebook ផងដែរ ដែលមានអ្នកតាមដានជាង១០.០០០នាក់។

ហេតុការណ៍នេះកើតឡើងនៅវេលាម៉ោង៧និង៣០នាទីយប់ ថ្ងៃទី២៧ ខែមករា ឆ្នាំ២០២៤ ដោយសមត្ថកិច្ចថៃបានរកឃើញសាកសពបុរសម្នាក់នេះនៅលើដីរួចទៅហើយ ក្រោយពីគេដឹងថាគាត់បានលោតឆ័ត្រយោងលើអគារកម្ពស់ ២៩ ជាន់ នៅទីក្រុងផាតាយ៉ា ប្រទេសថៃ។

ភ្នាក់ងារស៊ើបអង្កេតថៃបានលើកឡើងថា ឆ័ត្រយោងនោះទំនងជាដំណើរការខុសប្រក្រតី ទើបធ្វើឲ្យគ្រលាស់វាឡើងមិនបាន ជាហេតុបណ្តាលឲ្យលោកធ្លាក់ស្លាប់ភ្លាមៗបែបនេះ។

គួរបញ្ជាក់ដែរថា បុរសអង់គ្លេសម្នាក់នេះ គឺជាអ្នកមានបទពិសោធន៍ផ្នែកលោកឆ័ត្រយោងម្នាក់ ហើយនាពេលកន្លងមក លោកក៏ធ្លាប់បានលោតក្នុងប្រទេសជាច្រើន រួមទាំងចក្រភពអង់គ្លេស បារាំង ស្វីស ព័រទុយហ្គាល់ អាហ្វ្រិកខាងត្បូង និងថៃជាដើម ហើយតែងតែបានថតវីដេអូបង្ហាញពីសកម្មភាពផ្សេងៗមុននឹងលោកបន្តបេសកម្មឆ័ត្រយោងផងដែរ៕

បរទេស៖ ក្រសួងទេសចរណ៍ និងបុរាណវិទ្យាអេហ្ស៊ីបកំពុងអនុវត្តគម្រោងមួយដើម្បីអភិវឌ្ឈប្រាសាទពីរ៉ាមីត Menkaure ប៉ុន្តែត្រូវបានអ្នកនិយមលេងអ៊ីនធឺណិតជាច្រើនរិះគន់ ដោយពួកគេបាននិយាយថា ការជួសជុលអភិវឌ្ឈនេះនឹងអាចបាត់បង់រូបរាងដើមរបស់ប្រាសាទ។កាលពីថ្ងៃទី៣០ ខែមករា ឆ្នាំ២០២៤ យោងតាមវីដេអូមួយដែលត្រូវបានគេចែកចាយនៅលើបណ្ដាញសង្គម Facebook បានទាក់ទាញការរិះគន់យ៉ាងខ្លាំងពីអ្នកជំនាញក៏ដូចជាអ្នកនិយមលេងអ៊ីនធឺណិតមួយចំនួន។ ដោយក្នុងវីដេអូនោះបង្ហាញឱ្យឃើញថា កម្មកររាប់សិបនាក់កំពុងរើដុំថ្មក្រានីតធំៗ និងជួសជុលតួខាងក្រៅរបស់ពីរ៉ាមីតឱ្យដូចទៅនឹងសភាពដើមរបស់វាដែលត្រូវបានសាងសង់ឡើងដំបូង។

ក្រសួងទេសចរណ៍ និងបុរាណវិទ្យាអេហ្ស៊ីប បាននិយាយថា ខ្លួនបានសហការជាមួយគណៈប្រតិភូជប៉ុន ដើម្បីអនុវត្តគម្រោងស្តារសម្បកថ្មក្រានីតនៃពីរ៉ាមីត Menkaure តូចបំផុតទាំងបីនៅ Giza ក្នុងគោលបំណងស្តាររូបរាងដើមរបស់ប្រាសាទពីរ៉ាមីត។

ទោះជាយ៉ាងណា ការជួសជុលនេះត្រូវបានមនុស្សចំនួនមិនពេញចិត្តហើយក៏បញ្ចេញមតិថា មិនអាចទៅរួច ព្រោះការជួសជុលនេះមិនមែនស្តារឱ្យដូចដើមទេ គឺអាចបំផ្លាញឱ្យបាត់បង់សភាពដើមវិញទេ។ អ្នកខ្លះក៏ខំមិនថា តាមគោលការណ៍អន្តរជាតិទាំងអស់ គឺគេហាមឃាត់លើការជួសជុលនិងការធ្វើអន្តរាគមន៍បែបនេះ។

លោក Ibrahem Badr អ្នកជំនាញការស្ដារ និងអភិរក្សជនជាតិអេហ្ស៊ីប ក៏បានបង្ហាញនៅលើ X ថា “នេះគឺជាករណីធ្ងន់ធ្ងរ” វាចាំបាច់ក្នុងការពិចារណាដោយប្រុងប្រយ័ត្ននូវអនុសញ្ញាអន្តរជាតិស្តីពីការស្តារ និងព្យាបាលវត្ថុបុរាណ។

គួរបញ្ជាក់ដែរថា ការជួសជុលនេះនឹងចំណាយរយៈពេល ៣ ឆ្នាំ រួមទាំងការស្រាវជ្រាវ ការវាស់វែង ការស្កែនឡាស៊ែរ និងចុងក្រោយការសាងសង់សែលថ្មដែលដឹកនាំដោយលោក Mostafa Waziri មេដឹកនាំនៃឧត្តមក្រុមប្រឹក្សាបុរាណវិទ្យាអេហ្ស៊ីប។ លោក Waziri បានពិពណ៌នាថា “ដំណើរការនៃការស្តារស្រទាប់ថ្មនេះគឺជាគម្រោងនៃសតវត្ស ហើយក៏ជាអំណោយរបស់អេហ្ស៊ីបដល់ពិភពលោកក្នុងសតវត្សទី ២១ ផងដែរ”។

ប្រាសាទពីរ៉ាមីតមានអាយុកាលតាំងពី ៤,៥០០ ឆ្នាំមុន ហើយជាផ្នូររបស់ស្តេច Pharaoh Menkaure ដែលគ្រប់គ្រងរាជវង្សទី ៤ នៃប្រទេសអេហ្ស៊ីប។ បច្ចុប្បន្នពីរ៉ាមីតមានកម្ពស់ ៦១ ម៉ែត្រ ដោយកាលពីមុនមានកម្ពស់ជាង ៦៥ ម៉ែត្រ។ កំរាលថ្មខាងក្រៅចំនួន ១៦ ជាន់គឺថ្មក្រានីតក្រហម ៧ ជាន់នៅដដែល រីឯជាន់ខាងលើត្រូវបានគ្របដោយថ្មកំបោរពណ៌ស។ ហេតុនេះហើយ គម្រោងជួសជុលសំបកខាងក្រៅនឹងចំណាយពេលប្រហែល ៣ ឆ្នាំ ដែលនឹងរួមបញ្ចូលការស្កេនឡាស៊ែរ និងឯកសារជាច្រើន មុនពេលប្លុកថ្មក្រានីតណាមួយត្រូវបានផ្លាស់ប្តូរ៕

មហាសេដ្ឋីកំពូលរបស់ពិភពលោក គឺលោក Hui Ka Yan ជនជាតិចិន វ័យ៦៥ឆ្នំា ស្ថាបនិកក្រុមហ៊ុនអភិវឌ្ឍអចលនទ្រព្យយក្សចិន China Evergrande Group កំពុងត្រូវបានគេរឹបអូសក្រុមហ៊ុន ព្រោះបានជំពាក់បំណុលវ័នកររហូតដល់ ៣០០ពាន់លានដុល្លារ ខណៈរូបគាត់កំពុងស្ថិតក្រោមការស៊ើបអង្កេតពីបទឧក្រិដ្ឋកម្មទៀត។

ក្រុមអភិវឌ្ឍអចលនទ្រព្យចិន China Evergrande Group គឺជាក្រុមហ៊ុនដែលជំពាក់បំណុលគេច្រើនបំផុតលើពិភពលោក និងបានជំពាក់បំណុលរហូតដល់ជាង ៣០០ ពាន់លានដុល្លារអាមេរិក។ តាមរយៈក្រុមហ៊ុននេះក៏បានធ្វើឲ្យវិស័យអចលនទ្រព្យក្នុងប្រទេសចិនកំពុងជួបការលំបាកកាន់តែខ្លាំងឡើង ខណៈដែលបំណុលខ្លួនជំពាក់វ័នករតាំងពីឆ្នាំ ២០២១ មកម្លេះ។

កាលពីថ្ងៃទី២៩ ខែមករានេះ តុលាការហុងកុងបានបញ្ជាឱ្យរំលាយក្រុមហ៊ុនអចលនទ្រព្យយក្សចិន China Evergrande Group ដែលជាការផ្លាស់ប្តូរមួយទំនងជានឹងធ្វើឱ្យមានការរង្គោះរង្គើទីផ្សារហិរញ្ញវត្ថុប្រទេសចិន ខណៈដែលរដ្ឋាភិបាលព្យាយាមទប់ទល់នឹងវិបត្តិដែលកាន់តែយ៉ាប់យឺននេះ។

តាមរយៈសេចក្តីសម្រេចរបស់តុលារការហុងកុងដោយបានគូសបញ្ជាក់ថា “វាដល់ពេលហើយ” ព្រោះក្រុមហ៊ុន Evergrande បានដួលរលំជាង ១៨ ខែមកហើយ ក្នុងការស្វែងរកដំណោះស្រាយវិបត្តិខ្លួនឲ្យមានប្រសិទ្ធភាពជាងនេះ។ ការសម្រេចរំលាយក្រុមហ៊ុនអភិវឌ្ឍន៍ចិនដ៏ធំ ព្រមទាំងបានរឹបអូសយកទ្រព្យសម្បត្តិដែលមាននៅសល់ក្នុងក្រុមហ៊ុនប្រមាណ ២៤០ ពាន់លានដុល្លារ។

ដំណើរការនៃការរំលាយក្រុមហ៊ុនយក្សនេះនឹងផ្តល់នូវផលប៉ះពាល់មួយចំនួនទៅលើប្រតិបត្តិការរបស់ក្រុមហ៊ុន ដូចជាឧស្សាហកម្មធំៗរបស់ក្រុមហ៊ុនរួមទាំងរថយន្តអគ្គីសនី សេវាកម្មអចលនទ្រព្យ គម្រោងផ្ទះល្វែង ការទូទាត់សងប្រាក់ទៅកាន់អតិថិជនវិញជាដើម ហើយវាគឺកាន់តែធ្លាក់ទៅក្នុងស្ថានភាពដ៏គួរឲ្យស្មុគ្រស្មាញ។

ទោះជាយ៉ាងណា ប្រទេសចិនឥឡូវនេះកំពុងប្រឈមមុខនឹងសេដ្ឋកិច្ចជាប់គាំងខ្លាំង ដែលទីផ្សារអចលនទ្រព្យរយៈពេល៩ឆ្នាំចុងក្រោយនេះគឺមានសភាពកាន់តែធ្ងន់ធ្ងរ។ រីឯទីផ្សារភាគហ៊ុនរយៈពេល៥ឆ្នាំនេះ គឺកំពុងតែធ្លាក់ទាបទៅៗ។ ដូច្នេះផលប៉ះពាល់ទៅលើទីផ្សារផ្សេងៗក្នុងប្រទេសចិនជាបន្តបន្ទាប់នេះ អាចនឹងបំផ្លាញដល់កិច្ចខិតខំប្រឹងប្រែងរបស់រដ្ឋាភិបាលក្នុងការស្តារកំណើនសេដ្ឋកិច្ចឡើងវិញផងដែរ៕