ប្រទេសអូស្ត្រាលី៖ សត្វសេកឡូរីរាប់រយក្បាលបានធ្លាក់ពីលើមេឃយ៉ាងអាថ៌កំបាំងនៅក្នុងប្រទេសអូស្ត្រាលីកាលពីសប្តាហ៍មុន ធ្វើឱ្យអ្នកវិទ្យាសាស្ត្រមានការភ័ន្តច្រឡំយ៉ាងខ្លាំង។

កាលពីដើមខែកុម្ភៈ ឆ្នាំ២០២៤ នេះយោងតាមគេហទំព័រអន្តរជាតិមួយបានឱ្យដឹងថា កាលពីសប្តាហ៍មុន នៅលើមេឃនៃរដ្ឋ New South Wales ប្រទេសអូស្ត្រាលី មានបាតុភូតចម្លែកមួយបានកើតឡើង ដោយគេប្រទះឃើញសត្វស្លាបរាប់រយក្បាល ជាពិសេសសត្វសេកឡូរី ស្រាប់តែធ្លាក់ពីលើមេឃយ៉ាងអាថ៌កំបាំង ដែលអ្នកវិទ្យាសា្តស្ត្រគិតថាប្រហែលជាមានជំងឺឆ្លងអ្វីមួយកើតឡើងចំពោះសត្វស្លាបទាំងនេះ ដោយមិនមែនជាបាតុភូតធម្មជាតិដែលមនុស្សភាគច្រើនប៉ាន់ស្មាននោះទេ។

បើយោងតាមក្រុមអ្នកវិទ្យាសាស្ត្ររបានកំណត់ថានេះប្រហែលជា “រោគសញ្ញាខ្វិនរបស់សត្វសេក” ដែលជាមេរោគ lorikeet paralysis Syndrome (LPS)។ មេរោគនេះបានរីករាលដាលយ៉ាងឆាប់រហ័សចំពោះសត្វស្លាបហើយអាចបណ្តាលឱ្យមានរោគសញ្ញាដូចជា ខ្វិន បាត់បង់សមត្ថភាពហោះហើរ និងបាត់បង់ជីវិត។ ចំនួនសត្វសេកដែលរងផលប៉ះពាល់កំពុងកើនឡើងគួរឱ្យព្រួយបារម្ភ ដែលធ្វើឱ្យអាជ្ញាធរអូស្ត្រាលី និងអ្នកវិទ្យាសាស្ត្រស្វែងរកមូលហេតុភ្លាមៗ។ ទោះជាយ៉ាងណា មូលហេតុនៃជំងឺនេះមិនទាន់ត្រូវបានកំណត់ច្បាស់លាស់នៅឡើយទេ។ យ៉ាងណាមិញ អ្វីដែលច្បាស់លាស់នោះគឺថា ជំងឺនេះមានសក្ដានុពលក្នុងការឆ្លងរាលដាលដល់សត្វស្លាបដទៃទៀត និងសូម្បីតែមនុស្ស។

លោក David Phalen សាស្ត្រាចារ្យផ្នែកសុខភាពសត្វព្រៃ និងអភិរក្សនៅសកលវិទ្យាល័យ Sydney ដែលធ្វើការលើគម្រោង Lory Parrot Paralysis Syndrome បាននិយាយថា ជំងឺនេះត្រូវបានគេរកឃើញជាលើកដំបូងនៅក្នុងឆ្នាំ ២០១០ ហើយប៉ះពាល់ដល់សត្វស្លាបនៅក្នុងតំបន់រវាងទីក្រុង Bundaberg ក្នុងរដ្ឋ Queensland និង Grafton ក្នុងរដ្ឋ New South Wales ប៉ុណ្ណោះ។ លោក David ជឿថា ជំងឺនេះអាចកើតចេញពីការទទួលទានផ្លែស្វាយច្រើនពេក ហើយស្រវឹងដោយសារតែជាតិស្ករនៅក្នុងផ្លែឈើ។

ទោះជាយ៉ាងណា ក្រុមអ្នកស្រាវជ្រាវបានធ្វើតេស្តរកជាតិអាល់កុល ប៉ុន្តែមិនបានរកឃើញជាតិអាល់កុលនៅក្នុងខ្លួនរបស់សត្វស្លាបទេ ដោយសញ្ញាដែលអ្នកវិទ្យាសាស្ត្របានឃើញមិនត្រូវគ្នានឹងការពុលស្រាទេ។ ហេតុនេះហើយ ប្រឈមមុខនឹងស្ថានភាពបន្ទាន់ អ្នកវិទ្យាសាស្ត្រមកពីសាកលវិទ្យាល័យស៊ីដនី និងអង្គការការពារសត្វកំពុងធ្វើការស្វែងយល់ពីរបៀបបញ្ឈប់ការរីករាលដាលនៃជំងឺនេះ។ វិធានការមួយចំនួនត្រូវបានដាក់ឱ្យដំណើរការ រួមទាំងការរក្សាជម្រកបក្សីឱ្យស្អាត ការផ្តល់របបអាហារមានតុល្យភាព និងការកំណត់ទំនាក់ទំនងរវាងបក្សីដែលមានសុខភាពល្អ និងឈឺ។

គួរបញ្ជាក់ដែរថា ការស្លាប់របស់សត្វសេកជាច្រើននៅក្នុងប្រទេសអូស្ត្រាលីគឺជាការប្រកាសអំពីសារៈសំខាន់នៃការការពារជីវចម្រុះ។ យើងត្រូវដឹងថាសត្វទាំងអស់ មិនថាធំ ឬតូច គឺមានតួនាទីសំខាន់ក្នុងប្រព័ន្ធអេកូឡូស៊ីរបស់យើង ហើយនៅពេលដែលប្រភេទសត្វមួយត្រូវបានវាយប្រហារដោយជំងឺ វាក៏ប៉ះពាល់ដល់ប្រព័ន្ធអេកូឡូស៊ីរបស់យើងទាំងមូលផងដែរ៕

សហរដ្ឋអាមេរិក ៖ ពន្ធនាគារនៅអាមេរិកបានតម្រូវឱ្យអ្នកទោសមានតួនាទីថែទាំឆ្មាអនាថា ឬឆ្មាដែលគេបោះបង់ចោល ដើម្បីរង់ចាំឱ្យអ្នកស្រឡាញ់សត្វយកឆ្មាទាំងនេះទៅចិញ្ចឹម ។ អ្នកទោសត្រូវសម្អាតខ្លួនប្រាណឆ្មា, កាត់ក្រចក, ជូតត្រចៀក, ផ្តល់ទឹក និងចំណីឱ្យវាស៊ី ។ ក្រោយពីអ្នកទោសបានថែទាំឆ្មារួចមកឃើញថា ឆ្មាទាំងនេះបានធ្វើឱ្យពួកគេស្ងប់អារម្មណ៍, មានភាពទទួលខុសត្រូវ ហើយត្រូវក្រោកពីព្រលឹមជារៀងរាល់ថ្ងៃ ។

នៅអាមេរិកមានពន្ធនាគារឃុំឃាំងអ្នកទោសជាច្រើនកន្លែង ហើយពន្ធនាគារភាគច្រើនបានរៀបចំឱ្យអ្នកទោសមើលថែទាំឆ្មា និងឆ្កែ ដែលពួកវាពុំទទួលបានការថែទាំយ៉ាងល្អ ឬអាចត្រូវគេធ្វើបាបពីមុន មុនពេលសត្វទាំងនេះមានអ្នកទទួលយកទៅចិញ្ចឹម ។

ពន្ធនាគារមួយកន្លែងឈ្មោះ «Pendleton Correctional Facility» បានរៀបចំគម្រោង FORWARD និងបានយកឆ្មាគ្មានម្ចាស់ពីមជ្ឈមណ្ឌលថែទាំឆ្មាមកកាន់ពន្ធនាគារ ដើម្បីឱ្យអ្នកទោសថែទាំរាល់ថ្ងៃ ។ អ្នកទោសមានតួនាទីថែទាំឆ្មា ចំនួន៦ម៉ោងក្នុង១ថ្ងៃ ហើយពួកគេនឹងទទួលបានថ្លៃឈ្នួល ចំនួន២០សេនក្នុង១ម៉ោង ។

តួនាទីរបស់អ្នកទោស គឺធ្វើការងារគ្រប់យ៉ាងដូចគ្នានឹងអ្នកចិញ្ចឹមឆ្មាទូទៅធ្វើដែរ ។ ពួកគេត្រូវផ្តល់ក្តីស្រឡាញ់, ថែទាំ, ផ្តល់ទឹក និងចំណី, កាត់ក្រចកឆ្មា, ជូតត្រចៀក, ផ្លាស់ប្តូរដីខ្សាច់ឱ្យឆ្មា និងសម្អាតសម្ភារៈឆ្មា ។ រីឯបញ្ហាសុខភាពឆ្មា ខាងពន្ធនាគារនឹងបញ្ជូនគ្រូពេទ្យសត្វ មកមើលថែដោយផ្ទាល់ ។

ជាមួយគ្នានេះ ឆ្មាទាំងអស់ក៏បានជួយអ្នកទោសវិញដែរ ដូចជា ៖ ជួយព្យាបាលអ្នកទោស, បង្កើនជំនាញ, យល់ពីការឈឺចាប់របស់អ្នកដទៃ, បង្កើនការទទួលខុសត្រូវ, មើលឃើញពីតម្លៃរបស់ខ្លួនឯង និងចេះគោរពគ្នាទៅវិញទៅមក ។ ដូច្នេះ Soft Skills ទាំងនេះនឹងធ្វើឱ្យអ្នកទោសបានកែប្រែខ្លួនឡើងវិញ និងកាត់បន្ថយការប្រព្រឹត្តខុសម្តងទៀត នៅពេលពួកគេចេញពីពន្ធនាគារ ។

ការថែទាំឆ្មា គឺជាកិច្ចការមួយជួយឱ្យអ្នកទោសបានត្រៀមខ្លួនពេលទៅបំពេញការងារនៅខាងក្រៅ ពីព្រោះការចិញ្ចឹមសត្វ គឺទាមទារឱ្យមានការត្រៀមខ្លួន និងភាពទទួលខុសត្រូវមួយកម្រិត ។

អ្នកទោសម្នាក់បានចូលរួមក្នុងគម្រោងថែទាំឆ្មា និយាយថា គាត់ចាប់ផ្តើមធ្វើការនៅម៉ោង៧ព្រឹក ដោយចូលទៅក្នុងបន្ទប់ឆ្មា និងថែទាំពួកវា ។ ក្រោយមក គាត់បានប្រាប់ឱ្យប្រពន្ធមកទទួលឆ្មានេះទៅចិញ្ចឹមនៅផ្ទះ ។ រីឯអ្នកទោសម្នាក់ទៀតប្រាប់ថា ឆ្មាទាំងនេះបានធ្វើឱ្យគាត់ត្រូវក្រោកពីព្រលឹមជារៀងរាល់ថ្ងៃ ព្រោះវាត្រូវការគាត់ ហើយគាត់ក៏ត្រូវការវាដែរ ។

សត្វឆ្មារស់នៅក្នុងពន្ធនាគារ នឹងទទួលបានការថែទាំយ៉ាងយកចិត្តទុកដាក់ ហើយវាមានភាពជិតស្និទ្ធជាមួយមនុស្សកាន់តែខ្លាំង ព្រោះមុននេះ ឆ្មាមួយចំនួនត្រូវបានគេធ្វើបាប ។ ឆ្មារស់នៅក្នុងពន្ធនាគារ នឹងមានឱកាសបានទៅរស់នៅជាមួយគ្រួសារចិត្តល្អ ឬរស់នៅជាមួយអ្នកស្រឡាញ់សត្វ ។ អ្នកទោសនិយាយថា ពួកគេចង់ចិញ្ចឹមឆ្មាឱ្យបានល្អ និងចង់ឱ្យអ្នករស់នៅក្រៅពន្ធនាគារដឹងថា ឆ្មាទាំងនេះកំពុងរង់ចាំអ្នកយកទៅចិញ្ចឹម ៕

ជារៀងរាល់ឆ្នាំ គេសង្កេតឃើញនៅតាមបណ្តោយឆ្នេរសមុទ្រអាត្លង់ទិក មានសត្វអណ្តើកសមុទ្ររាប់សែនក្បាលបានហែលទឹកមកពងនៅឆ្នេរនេះ បន្ទាប់ពីពងរួច ពួកវាក៏ហែលទឹកសមុទ្រទៅកាន់កន្លែងឆ្ងាយៗពីឆ្នេរ ។ ប៉ុន្តែមានកូនអណ្តើកសមុទ្រត្រឹមតែ១ប៉ុណ្ណោះដែលនៅរស់រានមានជីវិត ក្នុងចំណោមកូនអណ្តើកចំនួន១.០០០ក្បាល ហើយកូនអណ្តើកទាំងនេះបានធំឡើង និងក្លាយជាមេបាអណ្តើកបន្តទៀត ។

ក្រោយពីកូនអណ្តើកញាស់ចេញពីពងមក ពួកវាត្រូវប្រញាប់ធ្វើដំណើរចុះទឹកសមុទ្រ ខណៈពួកវាមានខ្លួនតូចៗ និងពុំសូវរឹងមាំ ។ ក្នុងអំឡុងពេលធ្វើដំណើរចុះទឹកសមុទ្រ កូនអណ្តើកត្រូវទទួលរងនូវការយាយីពីសត្វជាច្រើន ដូចជា ៖ បក្សីសមុទ្រ, ក្តាម និងត្រីឆ្លាម ។ លើសពីនេះ កូនអណ្តើកអាចត្រូវបានសត្វផ្សេងទៀតរំខានតាំងពីពួកវានៅក្នុងពង ដូចជា ៖ ក្តាម, សត្វ Raccoon និងស្រមោច ។

បច្ចុប្បន្ន គេចាត់ទុកថា អណ្តើកសមុទ្រ គឺជាសត្វដ៏កម្រមួយប្រភេទ និងជិតផុតពូជពីផែនដី ។ ហេតុនវ ប្រទេសនានានៅលើពិភពលោក បានងាកមកចាប់អារម្មណ៍នឹងចំនួនអណ្តើកសមុទ្រធ្លាក់ចុះ និងជិតផុតពូជនាពេលឆាប់ៗនេះ ។

ការរៀបចំកម្មវិធីផ្សេងៗរបស់មនុស្ស ក៏អាចគំរាមដល់ការពងរបស់អណ្តើកសមុទ្រផងដែរ ពីព្រោះសម្ភារៈផ្សេងៗដែលយើងទុកនៅលើខ្សាច់ ដូចជា ៖ កៅអី, ឆ័ត្រ, ធុងទឹក, ប្រដាប់ចូកខ្សាច់ ឬសំរាមគរចោលនៅលើខ្សាច់ បើសម្ភារៈទាំងនេះស្ថិតនៅកន្លែងបង្កាត់ពូជរបស់អណ្តើក, សំបុកអណ្តើក និងកន្លែងពងរបស់អណ្តើក វានឹងរារាំងដល់ការពងរបស់ពួកវា ។ រីឯកូនអណ្តើកដែលទើបញាស់ចេញមក ក៏ពិបាកធ្វើដំណើរចុះទឹកសមុទ្រដែរ ។

លើសពីនេះ ប្រាសាទខ្សាច់ (Sandcastle) ឬរណ្តៅខ្សាច់ ដែលយើង និងកូនចៅរបស់យើងនាំគ្នាធ្វើនៅលើឆ្នេរសមុទ្រនោះ ក៏អាចបង្កបញ្ហាដល់កូនអណ្តើកដូចគ្នា ។ ហេតុនេះ មុនពេលត្រឡប់ទៅផ្ទះវិញ យើងគួរតែបំផ្លាញប្រាសាទខ្សាច់ ឬពំនូកខ្សាច់ទាំងនេះជាមុនសិន ព្រោះមិនមែនគ្រប់ប្រាសាទខ្សាច់ គ្រប់ពំនូកខ្សាច់ និងគ្រប់រណ្តៅខ្សាច់ សុទ្ធតែត្រូវបានទឹកសមុទ្ររំលាយចោលទាំងអស់ទេ ។

ចំណែកកូនអណ្តើកវិញ រណ្តៅខ្សាច់តូចៗដែលយើងជីកលេងនោះ អាចក្លាយជារណ្តៅដ៏ជ្រៅសម្រាប់ពួកវា ។ ដូចគ្នានេះ ប្រាសាទខ្សាច់របស់យើង គឺមានភាពដូចគ្នានឹងកំពូលភ្នំ Everest ដ៏ធំសម្រាប់កូនអណ្តើក និងធ្វើឱ្យពួកវាពិបាកធ្វើដំណើរឆ្លងកាត់ ។

កាលពីឆ្នាំ២០១៩ សារព័ត៌មានបានចុះផ្សាយថា កូនអណ្តើកតូចៗដែលទើបញាស់ចេញមក ពួកវាមិនអាចធ្វើដំណើរទៅកាន់ទឹកសមុទ្របានទេ ដោយសារពួកវាបានញាស់នៅជិតប្រាសាទខ្សាច់ដ៏ធំ ដែលស្ថិតនៅឆ្នេរ Bonita នៅរដ្ឋផ្លរីដា សហរដ្ឋអាមេរិក ។ មហាជនទូទៅ ពេលបានឃើញកូនអណ្តើកទាំងនេះហើយនាំគ្នាអាណិតពួកវាយ៉ាងខ្លាំង ។

សរុបមក ចូរកុំបង្កបញ្ហា ឬឧបសគ្គដល់ការពង និងការធំលូតលាស់របស់អណ្តើកសមុទ្រឱ្យសោះ ព្រោះសកម្មភាពតូចតាចដែលយើងបានធ្វើនៅលើឆ្នេរសមុទ្រ វានឹងបង្កគ្រោះថ្នាក់ដល់កូនអណ្តើកទើបញាស់ ។ ហេតុនេះ ពេលយើងទៅលេងនៅឆ្នេរសមុទ្រ ឬតំបន់ទេសចរណ៍ធម្មជាតិផ្សេងៗ ចូរកុំបោះចោលកាកសំណល់តូច-ធំ ព្រោះសំរាមទាំងនេះនឹងធ្វើឱ្យសត្វសមុទ្រមានគ្រោះថ្នាក់ ៕

ប្រទេសជប៉ុន៖ ត្រីបាឡែនឃាតករចំនួន ១០ ក្បាលត្រូវបានជាប់គាំងក្នុងសមុទ្រទឹកកកនៅភាគខាងជើងនៃកោះ Hokkaido របស់ប្រទេសជប៉ុន។

កាលពីថ្ងៃទី៦ ខែកុម្ភៈ ឆ្នាំ២០២៤ យោងតាម CNN បានឱ្យដឹងថា ត្រីបាឡែនឃាតករប្រមាណ ១០ ក្បាលត្រូវបានប្រទះឃើញជាប់គាំងក្នុងទឹកសមុទ្រទឹកកក ដោយពួកវាកំពុងព្យាយាមរកកន្លែងដើម្បីដកដង្ហើម ប៉ុន្តែមន្ត្រីឆ្នេរមិនអាចជួយពួកវាបានទេ ដោយត្រូវរង់ចាំរហូតដល់ទឹកកករលាយសិន។

ហេតុការណ៍នេះបានកើតឡើងកាលពីថ្ងៃអង្គារ ដោយអ្នកនេសាទក្នុងតំបន់បានប្រទះឃើញត្រីបាឡែនជាប់គាំង ហើយក៏បានជូនដំណឹងដល់អាជ្ញាធរឆ្នេរសមុទ្រនៅរ៉ាស៊ូភ្លាមៗ។ ទោះជាយ៉ាងណា មន្ត្រីឆ្នេរបាននិយាយថា ពួកគេមិនអាចជួយត្រីបាឡែនបានទេ ដោយសារតែទឹកកកក្រាស់ពេក។ មន្ត្រីឆ្នេរក៏បានបន្តទៀតថា ពួកគេគ្មានជម្រើសអ្វីក្រៅពីរង់ចាំឱ្យទឹកកករលាយនោះទេ។ លើសពីនេះ កង្វះខ្យល់នៅក្នុងតំបន់នោះបានរារាំងទឹកកកមិនឱ្យផ្លាស់ទីទៅកន្លែងណាផ្សេងទៀតឡើយ ដូច្នេះក្រុមត្រីបាឡែននេះប្រហែលជាអាចបាត់បង់ជីវិត ប្រសិនបើពួកវាហែលទៅឆ្ងាយមិនកើត។

យោងតាមរូបភាពយន្តហោះគ្មានមនុស្សបើករបស់ក្រុម Wildlife Pro LLC ដែលជាអង្គការការពារសត្វក្នុងស្រុក បានបង្ហាញឱ្យឃើញថា ត្រីបាឡែនឃាតករបានជាប់ក្នុងរន្ធតូចៗ ដែលពួកវាកំពុងតស៊ូក្នុងគម្លាតតូចចង្អៀតមួយរវាងលំហូរទឹកកក។ អង្គការនេះបាននិយាយថា ខ្លួនបានជួបប្រទះត្រីបាឡែនដែលជាប់គាំងនៅក្នុងសមុទ្រទឹកកកបែបនេះជាច្រើលើកហើយ ខណៈពេលកំពុងធ្វើការស្រាវជ្រាវលើសមុទ្រ នេះបើយោងតាមសេចក្តីថ្លែងការណ៍នៅលើ Facebook ។ បុគ្គលិក Wildlife Pro LLC ដែលថតវីដេអូ ក៏បាននិយាយដែរថា “កាលពីមុនយើងបានឃើញត្រីបាឡែនឃាតករប្រហែល ១៣ ក្បាលជាប់គាំងក្នុងរន្ធទឹកកកផងដែរ” ពួកគេហាក់ដូចជាពិបាកដកដង្ហើមខ្លាំងណាស់។

គួរបញ្ជាក់ដែរថា នេះមិនមែនជាលើកទីមួយទេ ដែលត្រីបាឡែនឃាតករបានជាប់គាំងក្នុងសមុទ្រទឹកកក។ កាលពីឆ្នាំ ២០០៥ ត្រីបាឡែនឃាតករមួយក្រុមក៏បានជាប់នៅក្នុងទឹកកកដែលរសាត់ចេញពីឆ្នេរសមុទ្រនៃទីក្រុង ហើយក្រោយមកពួកវាក៏បានស្លាប់ ដោយសារកង្វះខ្យល់នៅក្នុងតំបន់នេះ ធ្វើឱ្យទឹកកកដែលជាប់គាំង Orcas គឺនៅទ្រឹង។ ដូច្នេះហើយ ទឹកកកសមុទ្រតែងតែក្របដណ្តប់ឆ្នេរកោះហុកកៃដូរៀងរាល់រដូវរងា ហើយវាគឺជាទឹកកកសមុទ្ររយៈទទឹងទាបបំផុតក្នុងពិភពលោក ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ កម្រិតបានធ្លាក់ចុះដោយសារការឡើងកំដៅផែនដីកើនឡើង៕

វៀតណាម៖ វៀតណាមគឺជាទីផ្សារដែលមានការធ្លាក់ចុះធំបំផុតនៅក្នុងតំបន់អាស៊ីអាគ្នេយ៍រហូតដល់ ២៥% កាលពីឆ្នាំ ២០២៣។ នេះយោងតាមសមាគមក្រុមហ៊ុនផលិតរថយន្តអាស៊ីអាគ្នេយ៍ (AAF) បានឱ្យដឹងថា ទីផ្សាររថយន្តសំខាន់ៗចំនួន ៧ នៅអាស៊ីអាគ្នេយ៍រួមមាន ឥណ្ឌូនេស៊ី ថៃ ម៉ាឡេស៊ី ហ្វីលីពីន វៀតណាម សិង្ហបុរី និងមីយ៉ាន់ម៉ា បានលក់រថយន្តសរុបជាង ៣.៣៥ លានគ្រឿង ដែលជាការថយចុះ ២.១% បើធៀបនឹងឆ្នាំ ២០២២។

ដូច្នេះហើយ ទីផ្សារឈានមុខគេពីរក្នុងតំបន់គឺឥណ្ឌូណេស៊ី និងថៃ ដែលប្រទេសទាំងពីរនេះមានការថយចុះត្រឹមតែ ៤% និង ៨.១% រៀងគ្នា។ ខណៈប្រទេសវៀតណាមវិញមានការថយចុះរហូតដល់ ២៥% គឺជាទីផ្សារដែលមានការធ្លាក់ចុះនៃការលក់ច្រើនជាងគេ ដោយមិនរាប់បញ្ចូលប្រទេសមីយ៉ាន់ម៉ានោះទេ ព្រោះប្រទេសនេះមានមាត្រដ្ឋានលក់តិចតួចបំផុតតាំងពីពីរបីឆ្នាំមុនមកម្លេះ។

ទោះជាយ៉ាងណា ទីផ្សាររថយន្តវៀតណាមនៅតែឈានមុខគេក្នុងតំបន់ដោយវ៉ាដាច់ ទីផ្សាររថយន្តសិង្ហបុរី និងមីយ៉ាន់ម៉ា ហើយជាប់ចំណាត់ថ្នាក់លេខ ៥ នៅអាស៊ីអាគ្នេយ៍ បន្ទាប់ពីឥណ្ឌូនេស៊ី ម៉ាឡេស៊ី ថៃ និងហ្វីលីពីន។ ដោយលក់រថយន្តបាន ៣៤,៨៨៥ គ្រឿងនេះបើយោងតាម ក្រុមហ៊ុន VinFast ដែលទើបតែបានប្រកាសពីតួលេខសរុបជាសាកលនៅឆ្នាំ២០២៣។

ទីផ្សាររថយន្តរបស់វៀតណាមបានជួបប្រទះនឹងការប្រែប្រួលកាលពីឆ្នាំមុន ជាមួយនឹងការលក់ធ្លាក់ចុះយ៉ាងខ្លាំងបើធៀបទៅនឹងកំណត់ត្រាមុនជាង ៥០០,០០០ គ្រឿងដែលទើបតែបានកំណត់ក្នុងឆ្នាំ ២០២២។ មូលហេតុនៃការធ្លាក់ចុះនេះ គឺដោយសារការលំបាកម៉ាក្រូសេដ្ឋកិច្ច អត្រាការប្រាក់ធនាគារនៅតែខ្ពស់ ឧស្សាហកម្មដូចជាអចលនទ្រព្យ និងមូលបត្រកំពុងប្រឈមនឹងការលំបាក ដែលបានបង្កឱ្យប្រជាជនមានតម្រូវការរថយន្តធ្លាក់ចុះយ៉ាងខ្លាំង។

គួរបញ្ជាក់ដែរថា ប្រទេសឥណ្ឌូណេស៊ីនៅតែជាទីផ្សារប្រើប្រាស់រថយន្តថ្មីធំបំផុតនៅអាស៊ីអាគ្នេយ៍ជាមួយនឹងការលក់រថយន្តជាង ១ លានគ្រឿង។ ប្រទេសកោះនេះប្រាថ្នាចង់ក្លាយជាមជ្ឈមណ្ឌលផលិតរថយន្តថ្មីនៅក្នុងតំបន់ ជាពិសេសក្នុងវិស័យយានយន្តអគ្គិសនី។ នៅឆ្នាំ ២០២៣ រោងចក្រផលិតរថយន្តនៅក្នុងប្រទេសឥណ្ឌូនេស៊ីនឹងផលិតបានជិត ១.៤ លានគ្រឿងឯណោះ៕

ប្រទេសថៃ ៖ កាលពីថ្ងៃទី៦ ខែកុម្ភៈ ឆ្នាំ២០២៤ នៅឧទ្យានជាតិរ៉ាជ្ជផាក់ ស្ថិតក្នុងឃុំណងកេ ស្រុកហួហិន ខេត្តប្រាជួបសិរីខាន់ កងទ័ពជើងគោកថៃ រួមទាំងអាជ្ញាធរទេសចរណ៍ថៃ, អាជ្ញាធរកីឡាថៃ, ក្រសួងវប្បធម៌ និងស្ថាប័នផ្សេងៗបានប្រារព្ធទិវា «Muay Thai ល្បីល្បាញទៅកាន់ពិភពលោក ប្រចាំឆ្នាំ២០២៤ /Amazing MuayThai World Festival 2024» តាមការកំណត់របស់រដ្ឋាភិបាល គឺនៅថ្ងៃទី៦ ខែកុម្ភៈ ជារៀងរាល់ឆ្នាំ គឺជាថ្ងៃ Muay Thai ។

ការប្រារព្ធទិវា Muay Thai នេះ ដូចគ្នានឹងថ្ងៃសោយរាជ្យសម្បត្តិរបស់ព្រះមហាក្សត្រថៃ ព្រះនាម ព្រះចៅសឿ ដែលព្រះអង្គមានសមត្ថភាពផ្នែក Muay Thai ។ ហេតុនេះ វាជាការបន្តមរតក Muay Thai ទៅកាន់យុវជនជំនាន់ក្រោយ ខណៈ Muay Thai គឺជាមរតកវប្បធម៌ដ៏មានតម្លៃរបស់ប្រទេសជាតិ រហូតមកដល់សម័យបច្ចុប្បន្ន ។

កងទ័ពជើងគោកថៃបានមើលឃើញពីសារៈសំខាន់ថា Muay Thai មិនត្រឹមតែជាការហាត់ក្បាច់គុនប៉ុណ្ណោះទេ ប៉ុន្តែវាជាការបង្ហាញពីសិល្បៈវប្បធម៌ ប្រពៃណី និងអត្តសញ្ញាណរបស់ជនជាតិថៃផងដែរ ។ ការប្រារព្ធទិវានេះឡើងក្នុងគោលបំណងជំរុញឱ្យ Muay Thai ក្លាយជាកីឡាប្រចាំជាតិ និងមរតករបស់ជាតិ ក៏ដូចជាការផ្សព្វផ្សាយពីប្រវត្តិសាស្ត្រ ប្រពៃណី និងវប្បធម៌ដ៏ស្រស់ស្អាតទៅកាន់ពិភពលោក ។

លើសពីនេះ ប្រទេសថៃនឹងជំរុញ Muay Thai ឱ្យពិភពលោកបានស្គាល់ និងពង្រីកទេសចរណ៍វប្បធម៌តាមរយៈ Muay Thai ព្រមទាំងធ្វើឱ្យឧទ្យានជាតិរ៉ាជ្ជផាក់ ក្លាយជាទីកន្លែងតំណាងឱ្យ Muay Thai ដែលជនជាតិថៃ និងភ្ញៀវទេសចរបរទេសត្រូវមកកាន់ទីនេះ ។

ក្នុងឱកាសនោះ មានកងទ័ពជើងគោកចូលរួមសំពះគ្រូ Muay Thai ចំនួនជាង៣.០០០នាក់ រួមទាំងកីឡាករមកពីសមាគមប្រដាល់ព្រះចៅសឿ និងពលរដ្ឋទូទៅ សរុបស្មើជាង៥.០០០នាក់ ។ នៅចុងបញ្ចប់នៃកម្មវិធីនេះ មានការបាញ់កាំជ្រួចដើម្បីបង្ហាញពីសារៈសំខាន់ និងភាពអស្ចារ្យរបស់ពិធី ។

គួរបញ្ជាក់ថា លោក Srettha Thavisin នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានមកចូលរួមការប្រារព្ធទិវា Muay Thai ពិភពលោក ហើយលោកថ្លែងថា ប្រទេសថៃបានជំរុញឱ្យ Muay Thai ក្លាយជាគោលដៅសម្រាប់កីឡាករប្រដាល់នៅជុំវិញពិភពលោក ។

លោកនាយករដ្ឋមន្ត្រីថ្លែងថា ៖ «ខ្ញុំបានឃើញពីអំណាចរបស់ Muay Thai តាមរយៈការបង្ហាញរបស់អ្នកស្រឡាញ់ Muay Thai នៅទូទាំងពិភពលោក ស្មើជាង៥.០០០នាក់ ។ ហេតុនេះ កងទ័ពជើងគោកបានប្រារព្ធពិធីនេះឡើងយ៉ាងអធិកអធម ដើម្បីកត់ត្រាក្នុងហ្គីណេស World Record ជារៀងរាល់ឆ្នាំ ។ Muay Thai គឺជាមរតករបស់ប្រទេសថៃ ដែលយើងជាជនជាតិថៃបានរួមគ្នាថែរក្សា និងបន្តមរតកនេះពីជំនាន់មួយទៅជំនាន់មួយទៀតអស់រយៈពេលជាង៣០០ឆ្នាំ» ។

លោកនាយករដ្ឋមន្ត្រីបន្តថា ៖ «ថ្ងៃនេះ (ថ្ងៃទី៦ ខែកុម្ភៈ) យើងបានធ្វើឱ្យ Muay Thai ក្លាយជាមរតករបស់ពិភពលោក ។ កាលពីដើមសប្តាហ៍កន្លងមក យើងបានរៀបចំកម្មវិធី WBC Amazing Muay Thai ដែលមានកីឡាករចូលរួមជាង៦០ប្រទេស ។ ភាពអស្ចារ្យដែលយើងរួមគ្នាបន្តពីជំនាន់មុន និងភាពស្រស់ស្អាតរបស់ការសំពះគ្រូ Muay Thai បានធ្វើឱ្យថៃក្លាយជាប្រទេសគោលដៅរបស់កីឡាករប្រដាល់មកពីជុំវិញពិភពលោក ដែលត្រូវធ្វើដំណើរមកចូលរួមសំពះគ្រូ Muay Thai ឱ្យបានម្តងក្នុងមួយជីវិត» ៕