សហរដ្ឋអាមេរិក ៖ កាលពីថ្ងៃទី២៦ ខែមីនា ឆ្នាំ២០២៤ លោក Kevin Cartwright ប្រធានផ្នែកទំនាក់ទំនងនៃភ្នាក់ងារពន្លត់អគ្គិភ័យប្រចាំទីក្រុង Baltimore រដ្ឋ Maryland សហរដ្ឋអាមេរិក លើកឡើងថា មានកបាល់ដឹកកុងតឺន័រដ៏ធំបានបើកបុកស្ពាន Francis Scott Key រហូតដល់បណ្តាលឱ្យតួស្ពានដែលមានប្រវែង៣គីឡូម៉ែត្រ បាក់ធ្លាក់ចូលទឹកទន្លេ ។ ហេតុការណ៍នេះធ្វើឱ្យមនុស្សជាច្រើននាក់ និងយានយន្តជាច្រើនគ្រឿងដែលកំពុងធ្វើដំណើរនៅលើស្ពាន ក៏បានធ្លាក់ចូលទឹកផងដែរ ។
ភ្នាក់ងារសង្គ្រោះមកពីស្ថាប័នផ្សេងៗបានរួមកម្លាំងគ្នាជួយសង្គ្រោះជនរងគ្រោះដោយសារហេតុការណ៍នេះ ប៉ុន្តែនៅពុំទាន់មានសេចក្តីការណ៍ពីចំនួនអ្នកស្លាប់ទេ ។ ភ្នាក់ងារសង្គ្រោះបានរាយការណ៍ព័ត៌មានបឋមថា ពួកគេប្រឹងប្រែងស្វែងរកជនរងគ្រោះប្រមាណ២០នាក់ និងយានយន្តមួយចំនួនដែលបានធ្លាក់ទៅក្នុងទឹកទន្លេ ប៉ុន្តែអាកាសធាតុត្រជាក់ខ្លាំង និងមានសីតុណ្ហភាព -១អង្សារសេ ។ ម្យ៉ាងទៀត ដោយសារភាពងងឹតធ្វើឱ្យក្លាយជាឧបសគ្គរបស់ក្រុមអ្នកជ្រមុជទឹកដើម្បីស្វែងរកជនរងគ្រោះ ។
ចំណែកក្រុមហ៊ុនដឹកជញ្ជូនទំនិញ Synergy Marine Group បញ្ជាក់ថា កប៉ាល់ដឹកកុងតឺន័រ Dali បានបើកបុកស្ពាននៅទីក្រុង Baltimore រដ្ឋ Maryland សហរដ្ឋអាមេរិក ហើយគេពុំទាន់ជ្រាបពីមូលហេតុនៅឡើយទេ ។ រីឯអ្នកជិះនៅលើកប៉ាល់នេះទាំងអស់មានសុវត្ថិភាព ។
កប៉ាល់ដឹកកុងតឺន័រដ៏ធំមានប្រវែង៣០០ម៉ែត្រ ដែលជាដើមហេតុរបស់គ្រោះថ្នាក់លើកនេះ មានឈ្មោះថា «Dali» គឺជាកប៉ាល់របស់ប្រទេសសិង្ហបុរី ។ បើតាមទិន្នន័យតាមដានការដឹកជញ្ជូនរបស់កប៉ាល់ឱ្យដឹងថា កប៉ាល់នេះបានធ្វើដំណើរចេញពីកំពង់ផែប្រ៊ីស ស្ថិតនៅទីក្រុង Baltimore រដ្ឋ Maryland សហរដ្ឋអាមេរិក នៅម៉ោងប្រមាណ១យប់ (ម៉ោងនៅសហរដ្ឋអាមេរិក) ដើម្បីទៅកាន់ទីក្រុងកូឡុំបូ ប្រទេសស្រីលង្កា ។
គួរបញ្ជាក់ថា ស្ពាន Francis Scott Key គឺជាស្ពានដែលមានប្រវែងវែងជាងគេស្ថិតក្នុងលំដាប់ទី៣ នៅលើពិភពលោក ដែលលាតសន្ធឹងពីទន្លេ Patapsco ទៅកាន់កំពង់ផែនៅទីក្រុង Baltimore ។ ក្រោយពីកប៉ាល់ដឹកកុងតឺន័របើកបុកស្ពានបានបណ្តាលឱ្យស្ពានដ៏វែងនេះធ្លាក់ចូលទៅក្នុងទន្លេ Patapsco ។ 
ស្ពាននេះត្រូវបានបើកឱ្យពលរដ្ឋធ្វើដំណើរឆ្លងកាត់កាលពីឆ្នាំ១៩៧៧ ហើយគេបានដាក់ឈ្មោះស្ពានតាមឈ្មោះរបស់អ្នកនិពន្ធភ្លេងជាតិអាមេរិក គឺលោក Francis Scott Key ដោយសារបាននិពន្ធបទចម្រៀង «The Star-Spangled Banner» ។ គេជឿថា លោក Francis Scott Key បានអង្គុយនៅជិតស្ពានពេលលោកឃើញការទម្លាក់គ្រាប់បែកមកលើបន្ទាយ Fort McHenry កាលពីឆ្នាំ១៨១៤ ទើបជំរុញឱ្យលោកនិពន្ធភ្លេងជាតិ ៕
