បន្ទាប់ពី កុយ អេនណា បង្ហាញគោលបំណងចង់ចូលរួមប្រកួតកម្មវិធី Miss Grand Cambodia2024 ព្រមទាំងស្នើដល់អ្នករៀបចំកម្មវិធីអនុញ្ញាតឱ្យនាងចូលរួមប្រកួតនោះ ពេលនេះដឹងលទ្ធផលហើយគឺនាងមិនអាចចូលរួមប្រកួតក្នុងឆ្នាំនេះនោះទេ។ កុយ អេនណា ក៏បានបន្ថែមដែរថា នាងមិនច្បាស់ថាឆ្នាំណានាងនឹងចូលប្រកួតម្តងទៀតដែរ ខណៈពេលនេះនឹងបំពេញតួនាទីជាលំដាប់រងទី១ Miss Grand Cambodia 2023។
តាមរយៈវីដេអូ Live កាលពីពេលថ្មីៗនេះ កុយ អេនណា បាននិយាយថា «ឆ្នាំនេះនាងមិនបានចូលប្រកួតនោះទេដោយសារខាងក្រុមហ៊ុនក៏បានយល់ព្រមដែរដោយសារតែនាងស្ថិតនៅក្នុងកុងត្រាស្ថាប័ននៅឡើយ ព្រោះខ្លួននាងមិនបញ្ចប់តំណែងលំដាប់រងទី១ ដូច្នេះនាងនឹងបំពេញតួនាទីរបស់ខ្លួនឱ្យបានល្អបំផុតពេលដែលនាងស្ថិតនៅខ្មែរនេះ»។
កុយ អេនណា ក៏បង្ហាញដែរថានាងត្រៀមខ្លួនរួចរាល់ហើយក្នុងការប្រកួតប៉ុន្តែបើមួយឆ្នាំទៀតវារឹតតែល្អមិនជាបញ្ហាចោទនោះទេសម្រាប់ការមិនបានចូលរួមប្រកួតឆ្នាំនេះ ហើយនាងនឹងពង្រឹងខ្លួនឯងពីចំណុចខ្វះខាតរបស់ខ្លួន ហើយវានឹងកាន់តែល្អប្រសើរបើនាងនឹងចូលរួមប្រកួតនៅឆ្នាំណាមួយ។ ទោះយ៉ាងណា កុយ អេនណា បានបញ្ជាក់ប្រាប់អ្នកគាំទ្រថានាងមិនប្រាកដថាឆ្នាំណាដែលនាងនឹងចូលរួមប្រកួតម្តងទៀតនោះទេ។
ទោះយ៉ាងណា មតិរបស់អ្នកគាំទ្រវិស័យបវរកញ្ញាភាគច្រើនបានបង្ហាញការយល់ស្របមិនឱ្យ កុយ អេនណា ប្រកួតក្នុងឆ្នាំនេះដូចគ្នាដោយចង់ឱ្យនាងដកឃ្លានិងពង្រឹងសមត្ថភាពរបស់ខ្លួនកាន់តែខ្លាំងចូលប្រកួតម្តងទៀតបំបុកយកមកុដតែម្តង។
គួរបញ្ជាក់ផងដែរថា កុយ អេនណា បានចំណាយពេលមួយរយៈពេលខ្លីនៅលើ ទឹកដីនូវែលសេឡង់ (New Zealand) ហើយបានវិលមកប្រទេសកម្ពុជាវិញ។ រូបនាងបានចូលរួមក្នុងកម្មវិធីមួយដោយបានប្រាប់ដល់បណ្តាអ្នកសារព័ត៌មានថានាងមានបំណងចង់ចូលរួមប្រកួត Miss Grand Cambodia 2024 ប៉ុន្តែស្ថិតក្នុងដំណាក់កាលរង់ចាំអនុញ្ញាតពីស្ថាប័នជាមុនសិន ខណៈនាងបានស្នើសុំប្រកួតថ្មីជាច្រើនដងនិងបានលើកដៃស្នើសុំលោកស្រី អ៊ឹម សុគន្ធា ជួយបើកឱកាសឱ្យនាងប្រកួតផងដែរ៕
