ប្រទេសចិន ៖ វេជ្ជបណ្ឌិតម្នាក់ភ្ញាក់ផ្អើលយ៉ាងខ្លាំងនៅពេលបានឮអ្នកជំងឺម្នាក់ប្រាប់ថា នាងបានស៊ី..ស..ព..ទា..រ..ក អាយុ២ខែ ដោយនាងបានយកគាវមកខ្ចប់..សា..ច់..ស..ព ហើយស៊ីរយៈពេល៧ថ្ងៃជាប់ៗគ្នា ព្រោះជឿថា នាងនឹងមានផ្ទៃពោះតាមបំណងប្រាថ្នា ។ នេះបើតាមការចុះផ្សាយរបស់សារព័ត៌មានបរទេស នៅថ្ងៃទី៦ ខែកុម្ភៈ ឆ្នាំ២០២៤ ។

ហេតុការណ៍ដ៏រន្ធត់នេះបានធ្វើឱ្យមហាជនភ្ញាក់ផ្អើលយ៉ាងខ្លាំងនៅប្រទេសចិន ក្រោយពីនារីម្នាក់សារភាពថា នាងបានស៊ីសពទារក អាយុ២ខែ ដែលគេរំលូតចោល ដោយនាងស៊ីសពនេះជាមួយគាវ ។ នាងជឿថា ការស៊ីសពទារកនឹងធ្វើឱ្យនាងមានផ្ទៃពោះដូចបំណងប្រាថ្នា ហើយទេវតាបានប្រាប់រឿងនេះដល់នាង ។

វេជ្ជបណ្ឌិតផ្នែកសម្ភព និងរោគស្ត្រី ឈ្មោះ Dou ភ្ញាក់ផ្អើលយ៉ាងខ្លាំងក្រោយពីបានស្តាប់ការសារភាពរបស់អ្នកជំងឺថា នាងបានស៊ីសពទារកដែលគេរំលូតចោល ព្រោះជឿថា ការស៊ីសពទារកក្នុងផ្ទៃ ដែលមានអាយុប្រមាណ២ខែ នាងនឹងអាចមានកូនបាន ។ ហេតុនេះ នាងបានស៊ីសពទារក ចំនួន៣ដុំក្នុង១ថ្ងៃ ហើយស៊ីរយៈពេល៧ថ្ងៃជាប់ៗគ្នា ។

មុនដំបូង វេជ្ជបណ្ឌិតផ្នែកសម្ភព និងរោគស្ត្រី ឈ្មោះ Dou មិនជឿទេ ប៉ុន្តែគាត់ភ្ញាក់ផ្អើលយ៉ាងខ្លាំងពេលអ្នកជំងឺនិយាយបែបនេះ ។ វេជ្ជបណ្ឌិតសួរថា តើអ្នកណាប្រាប់គំនិតនេះទៅនាង? ហើយគាត់សួរទៀតថា តើនាងអាចលេបសពទារកចូលក្នុងមាត់យ៉ាងដូចម្តេច?

អ្នកជំងឺឆ្លើយថា នាងបានប្រើប្រាស់ម៉ាស៊ីនកិនសាច់ដើម្បីកិនសាច់ទារកឱ្យហ្មត់ ហើយនាងស៊ីសពទារកអស់៣នាក់ហើយ ។ ចំណែកមូលហេតុដែលនាងសារភាពប្រាប់គ្រូពេទ្យនោះ ដោយសារនាងមានអារម្មណ៍ថា ក្តៅខ្លួនខុសធម្មតា ។ បើតាមលទ្ធផលត្រួតពិនិត្យរាងកាយអ្នកជំងឺជំហានដំបូង ធ្វើឱ្យគ្រូពេទ្យសន្និដ្ឋានថា នាងបានឆ្លងមេរោគពីសាកសព ។

វេជ្ជបណ្ឌិត Dou មានបទពិសោធន៍ផ្នែកសម្ភព និងរោគស្ត្រីជាច្រើនឆ្នាំ និយាយថា បើទោះជាគាត់ធ្លាប់ជួបជាមួយអ្នកជំងឺប្លែកៗជាច្រើនករណីនាពេលកន្លងមក ប៉ុន្តែនេះជាលើកដំបូងហើយ ដែលគាត់បានជួបអ្នកជំងឺជឿអ្វីប្លែកៗបែបនេះ ។

ក្រៅពីនេះ វេជ្ជបណ្ឌិត Dou ក៏បានដាស់តឿនស្ត្រីខាងលើ អំពីផលប៉ះពាល់សុខភាពដែលអាចកើតឡើង និងការឆ្លងមេរោគពីសាកសព ។ ចុងក្រោយ គាត់បានណែនាំឱ្យនាងផ្តល់ភាពសំខាន់លើវិទ្យាសាស្ត្រច្រើនជាងជឿលើអបិយជំនឿ ៕

ប្រទេសឥណ្ឌា ៖ នារីឥណ្ឌាម្នាក់បានខឹងសម្បារយ៉ាងខ្លាំងនៅពេលដឹងថា ម្តាយក្មេកចូលចិត្តលួចប្រើប្រាស់គ្រឿងសម្អាងរបស់នាង ។ លើសពីនេះ ប្តីរបស់នាងបានកាន់ជើងម្តាយរបស់ខ្លួនទៀតផង ហើយតែងរករឿងឈ្លោះប្រកែកជាមួយនាង ដោយពុំព្រមស្តាប់ហេតុផលអ្វីទាំងអស់ ។ ហេតុនេះ នាងបានសម្រេចចិត្តថា សុំលែងលះគ្នាជាមួយប្តី ដោយសារមិនអាចរស់នៅជាមួយគ្រួសារខាងប្តីបន្តទៀតបាន ។

នារីភាគច្រើនចាត់ទុកថា គ្រឿងសម្អាង គឺជាសម្បត្តិដ៏មានតម្លៃ និងជារបស់ប្រើប្រាស់ផ្ទាល់ខ្លួន ។ ពួកនាងស្រឡាញ់ និងហួងហែងគ្រឿងសម្អាងយ៉ាងខ្លាំង ដូចគ្នានឹងនារីឥណ្ឌាម្នាក់នេះដែរ នាងសុខចិត្តលែងលះជាមួយប្តី ដោយសារតែមូលហេតុគ្រឿងសម្អាង ។

ហេតុការណ៍នេះបានកើតឡើងនៅទីក្រុង Agra រដ្ឋ Uttar Pradesh ក្រោយពីប្តី-ប្រពន្ធនេះបានរៀបការ និងរួមរស់ជាមួយគ្នាអស់រយៈពេល៨ខែ ។ រីឯប្អូនស្រីរបស់នាង ក៏បានរៀបការជាមួយបងប្អូនរបស់ស្វាមីនាងដូចគ្នាដែរ ហើយពួកនាងបានមករស់នៅផ្ទះខាងប្តីជាមួយគ្នា ។

ជីវិតគូរបស់ពួកនាងបានរស់នៅប្រកបដោយសុភមង្គល រហូតដល់ថ្ងៃមួយ នាងដឹងថា ម្តាយក្មេកបានលួចប្រើប្រាស់គ្រឿងសម្អាងរបស់នាងជាប្រចាំ ដោយគ្មានការអនុញ្ញាត ។ ក្រោយពីដឹងថា ម្តាយក្មេកធ្វើបែបនេះ នាងស្ទើរតែមិនយកគ្រឿងសម្អាងទាំងនេះមកប្រើប្រាស់ទៀតឡើយ ។

ក្រោយមក នាងក៏បានដាស់តឿន និងប្រាប់ម្តាយក្មេក កុំឱ្យប្រើប្រាស់គ្រឿងសម្អាងបន្តទៀត ប៉ុន្តែគាត់មិនស្តាប់ទេ ថែមទាំងប្រើពាក្យសម្តីខ្លាំងៗដាក់នាងទៀតផង ។ បន្ទាប់មក ម្តាយក្មេកក៏យករឿងនេះទៅប្រាប់កូនប្រុសរបស់ខ្លួន ហើយប្តីនាងក៏ចាប់ផ្តើមឈ្លោះជាមួយនាង ។ វាបានធ្វើឱ្យស្ថានការណ៍កាន់តែតានតឹងខ្លាំងឡើង រហូតដល់នាង និងប្អូនស្រី ត្រូវបានបណ្តេញចេញពីផ្ទះ ។

ចាប់តាំងពីថ្ងៃនោះមក នាង និងប្អូនស្រី បាននាំគ្នាមករស់នៅជាមួយម្តាយបង្កើតវិញ ហើយនាងក៏បានយករឿងនេះទៅពិភាក្សាជាមួយមជ្ឈមណ្ឌលផ្តល់ប្រឹក្សាបញ្ហាជីវិតគ្រួសារ ដើម្បីសុំលែងលះជាមួយប្តី ។ នាងយល់ឃើញថា វាមិនមែនជាការលួចប្រើប្រាស់គ្រឿងសម្អាងតែម្យ៉ាងទេ ប៉ុន្តែមានអំពើហិង្សាក្នុងគ្រួសារផងដែរ ។ ម្យ៉ាងទៀត ប្តីរបស់នាងតែងនិយាយពាក្យគំរោះគំរើយ និងស្តាប់សម្តីម្តាយរបស់ខ្លួនតែប៉ុណ្ណោះ ៕

សហរដ្ឋអាមេរិក ៖ អ្នកជំនាញលើកឡើងថា រដ្ឋកាលីហ្វ័ញ៉ារបស់សហរដ្ឋអាមេរិកនឹងប្រឈមជាមួយខ្យល់ព្យុះយ៉ាងខ្លាំងក្លា ដែលបណ្តាលឱ្យរដ្ឋនេះមានទឹកជំនន់ធ្ងន់ធ្ងរនៅតំបន់ជាច្រើន និងដាច់ចរន្តអគ្គិសនីជាច្រើនកន្លែង ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៥ ខែកុម្ភៈ ឆ្នាំ២០២៤ ។

Daniel Swain ជាអ្នកវិទ្យាសាស្ត្រផ្នែកបរិស្ថានបានប្រកាសដាស់តឿនឱ្យពលរដ្ឋអាមេរិកទាំងអស់ដែលរស់នៅរដ្ឋកាលីហ្វ័ញ៉ា ត្រៀមខ្លួនទប់ទល់ជាមួយខ្យល់ព្យុះយ៉ាងខ្លាំងក្លា ដែលវានឹងបក់សំដៅមកកាន់រដ្ឋនេះ ។ ដូច្នេះ ឥទ្ធិពលខ្យល់ព្យុះនឹងបណ្តាលឱ្យកើតទឹកជំនន់ និងបាក់ដីនៅតំបន់ជាច្រើន រួមទាំងអាចធ្វើឱ្យដាច់ចរន្តអគ្គិសនីជាច្រើនកន្លែង ។

រដ្ឋកាលីហ្វ័ញ៉ា នឹងប្រឈមជាមួយបាតុភូតឈ្មោះថា «Pineapple Express» ឬឈ្មោះមួយទៀតហៅថា «ទន្លេនៅក្នុងបរិយាកាស» លើកទី២ ក្នុងរយៈពេលឆាប់ៗខាងមុខនេះ ឬប្រមាណ១សប្តាហ៍ទៀត (បើគិតចាប់ពីថ្ងៃទី៥ ខែកុម្ភៈ ឆ្នាំ២០២៤) ។

ភ្នាក់ងារគ្រប់គ្រងអាកាសធាតុជាតិរបស់អាមេរិកបានចេញសេចក្តីប្រកាសដាស់តឿនពលរដ្ឋផងដែរ អំពីកម្រិតខ្យល់ព្យុះខ្លាំង ឬមានន័យថា គឺជាកម្រិតខ្យល់បក់ខ្លាំងក្នុងល្បឿនជាង១២៥គីឡូម៉ែត្រក្នុង១ម៉ោងឡើងទៅ សម្រាប់តំបន់ Big Sur និងតំបន់នៅក្បែរគ្នា ។

នៅតំបន់មួយចំនួនក្នុងទីក្រុង Santa Barbara និងទីក្រុង Los Angeles នឹងប្រឈមជាមួយទឹកជំនន់ធ្ងន់ធ្ងរ ។ ហេតុនេះ អាជ្ញាធរក្នុងតំបន់បានជួយគ្នាជម្លៀសពលរដ្ឋចេញពីតំបន់គ្រោះថ្នាក់ ដើម្បីត្រៀមខ្លួនទប់ទល់ជាមួយគ្រោះធម្មជាតិ ខណៈនៅតំបន់ភ្នំខ្ពស់ៗវិញ ទឹកភ្លៀងបានក្លាយទៅជាព្រិលយ៉ាងក្រាស់ ។

ចំណែកនៅរដ្ឋ Oregon វិញ ក៏បានប្រឈមនឹងភ្លៀងធ្លាក់យ៉ាងខ្លាំងក្លាផងដែរ ហើយគេរាយការណ៍ថា មានគ្រោះថ្នាក់ចរាចរណ៍ជាច្រើនករណីបានកើតឡើង ដោយសារផ្លូវរអិលខ្លាំងពេក ៕

ប្រទេសចិន ៖ បុគ្គលិកក្រុមហ៊ុន China Railway Kunming Group លើកឡើងថា រថភ្លើងល្បឿនលឿនធ្វើដំណើរឆ្លងកាត់ព្រំដែនចិន និងឡាវ បានត្រៀមកៅអីបន្ថែមទៀតសម្រាប់ទទួលអ្នកដំណើរបរទេស ដើម្បីបំពេញតម្រូវការការធ្វើដំណើររវាងប្រទេសទាំងពីរ ដែលអាចកើនឡើងពេលបុណ្យចូលឆ្នាំចិន នៅខែកុម្ភៈ ឆ្នាំ២០២៤ ។

កាលពីថ្ងៃទី២៦ ខែមករា ឆ្នាំ២០២៤ គឺជាថ្ងៃដំបូងដែលជនជាតិចិនជាច្រើននាក់ចាប់ផ្តើមធ្វើដំណើរតាមរថភ្លើងល្បឿនលឿន ហើយក្រុមហ៊ុន China Railway Kunming Group បានបន្ថែមកៅអីពី៥០ រហូតដល់៣៥០កៅអី សម្រាប់ភ្ញៀវទេសចរដែលធ្វើដំណើរឆ្លងកាត់ព្រំដែនរវាងទីក្រុងគុនមីង ខេត្តយូណាន ជាមួយទីក្រុងវៀងច័ន្ទ ប្រទេសឡាវ ។

រថភ្លើងល្បឿនលឿននេះបានផ្តល់សេវាកម្មធ្វើដំណើរទៅមករវាងទីក្រុងគុនមីង និងទីក្រុងវៀងច័ន្ទ ជារៀងរាល់ថ្ងៃ ហើយក្នុង១ថ្ងៃ រថភ្លើងនេះរត់១ជើង ។ ការធ្វើដំណើររវាងទីក្រុងទាំងពីរបានចំណាយពេលប្រមាណ៩ម៉ោងនិង៣០នាទី ។

បើតាមទិន្នន័យរបស់ក្រុមហ៊ុនរថភ្លើងនៅទីក្រុងគុនមីងបង្ហាញថា តម្រូវការធ្វើដំណើរឆ្លងកាត់ព្រំដែនតាមរថភ្លើងចិន-ឡាវ បានកើនឡើងខ្លាំងក្នុងអំឡុងពេលលំហូរចូលនៃភ្ញៀវទេសចរ ។ ហេតុនេះ ភ្ញៀវទេសចរបានរៀបចំគម្រោងការធ្វើដំណើររបស់ពួកគេទុកជាមុន ។

ទោះយ៉ាងណា ការជ្រើសរើសធ្វើដំណើរតាមរថភ្លើងពេលចូលឆ្នាំចិន គឺជាលើកដំបូងហើយ តាំងពីការផ្តល់សេវាកម្មដឹកអ្នកដំណើរឆ្លងប្រទេសរបស់រថភ្លើងចិន-ឡាវ ។ កាលពីខែមេសា ឆ្នាំ២០២៣ បុគ្គលិករថភ្លើងក៏បានត្រៀមខ្លួនផងដែរសម្រាប់ផ្តល់សេវាកម្មដឹកអ្នកដំណើរយ៉ាងច្រើននៅឆ្នាំ២០២៤ ។

យោងតាមទិន្នន័យរបស់ក្រុមហ៊ុន China Railway Kunming Group បង្ហាញថា រថភ្លើងបានដឹកអ្នកដំណើរឆ្លងប្រទេស ចំនួន១២ម៉ឺន៥ពាន់ជើងនាពេលកន្លងមក ហើយអ្នកដំណើរភាគច្រើនមកពីប្រទេសចិន, ឡាវ, ថៃ និងសិង្ហបុរី ៕

កូរ៉េខាងត្បូង៖ តារាសម្តែងវ័យចំណាស់ដ៏ល្បីល្បាញ Oh Young Soo ដែលដើរតួជា Oh Il Nam ដែលជាជីតានៅក្នុងរឿង Squid Game ទំនងជាត្រូវជាប់គុ..កមួយឆ្នាំពីបទរំ.លោ.ភ.ផ្លូវ.ភេទ.លើស្ត្រីអាយុ ២២ ឆ្នាំ នេះបើយោងតាម News Directory3 ដែលចុះផ្សាយនៅថ្ងៃទី៦ ខែកុម្ភៈ ឆ្នាំ២០២៤។

មនុស្សជាច្រើនប្រហែលជាស្គាល់មុខលោក Oh Young Soo ដែលដើរតួជា Oh Il Nam ឬ Grandfather ក្នុងរឿង Squid Game ដែលរឿងភាគនេះទទួលបានភាពជោគជ័យយ៉ាងខ្លាំងនៅទូទាំងពិភពលោក។ នៅឆ្នាំ ២០២១ គាត់គឺជាតារាសម្តែងប្រុសដំបូងគេនៅក្នុងប្រទេសកូរ៉េខាងត្បូងដែលបានឈ្នះពានរង្វាន់ Golden Globe។ អាជីពរបស់គាត់ក្នុងវិស័យនេះហាក់មានការរីកចម្រើនខ្លាំងណាស់។

ទោះជាយ៉ាងណាក៏ដោយ នៅឆ្នាំដដែលនោះ ស្ត្រីវ័យ ២២ ឆ្នាំម្នាក់បានដាក់ពាក្យបណ្តឹងទៅសមត្ថកិច្ច ដោយអះអាងថានាងត្រូវបានលោក Oh Young Soo អាយុ ៧៩ ឆ្នាំចាប់រំលោភតាមរយៈការស្ទាបអង្អែលខ្លួន។ ក្នុងនោះតារាសម្ដែងវ័យចំណាស់រូបនេះក៏បានឆ្លើយបដិសេធភ្លាមៗចំពោះរឿងនេះផងដែរ ដោយផ្តល់ហេតុផលថាវាជាការយល់ខុស យើងគ្រាន់តែដើរជុំវិញបឹងកាន់ដៃគ្នាប៉ុណ្ណោះ។

ប៉ុន្តែចំណាត់ការផ្លូវច្បាប់នោះ វាមានរយៈពេលរហូតដល់ឆ្នាំ២០២៤ ដោយនៅថ្ងៃទី ២ ខែកុម្ភៈ ថ្មីៗនេះព្រះរាជអាជ្ញាបានស្នើសុំឱ្យចៅក្រមកាត់ទោស ១ ឆ្នាំលើលោក Oh Young Soo ដោយសារតែគេបានរកឃើញថា នៅឯពិធីជប់លៀងមួយក្នុងឆ្នាំ ២០១៧ តារាសម្តែងវ័យ ៧៩ ឆ្នាំរូបនេះបានបង្ហាញពីចេតនារបស់គាត់ ឬបំណងប្រាថ្នាមួយចំនួនសម្រាប់ជនរងគ្រោះ។ ភាគីរងគ្រោះបានផ្ញើសារទៅកាន់តារាសម្ដែងជើងចាស់ ដើម្បីឱ្យគាត់សុំទោសនាង ប៉ុន្តែគាត់បានគេចពីការទទួលខុសត្រូវ ហើយប្រាប់ជនរងគ្រោះថា គាត់ទុកនាងត្រឹមតែជាកូនស្រីប៉ុណ្ណោះ។
មេធាវីរបស់តារាសម្ដែងជើងចាស់រូបនេះបានប្រកែកដូច្នេះថា មិនមានភស្តុតាងគ្រប់គ្រាន់ចំពោះអ្វីដែលបានកើតឡើងនោះទេ។ បន្ថែមពីលើការបញ្ជាក់របស់ជនរងគ្រោះតែម្នាក់ឯង មានភស្តុតាងតិចតួចណាស់ដែលសមនឹងករណីនេះ ដោយពិចារណាលើទីតាំង លក្ខខណ្ឌ និងពេលវេលានៃអំពើមិនសមរម្យ។ ដូច្នេះហើយ តុលាការនៅតែមានការសង្ស័យថាតើចុងចោទអាចប្រព្រឹត្តបទល្មើសឬយ៉ាងណា?

គួរបញ្ជាក់ដែរថា Oh Young Soo បានបដិសេធរាល់ការចោទប្រកាន់ទាំងអស់។ ទោះជាយ៉ាងណា ឱកាសថតរឿង Squid Game វគ្គ ២ របស់គាត់ដែលនឹងធ្វើឡើងម្តងទៀតនៅថ្ងៃទី ១៥ ខែមីនា ឆ្នាំ២០២៤ ត្រូវបានគេរាយការណ៍ថា ក្រុមការងាររបស់ផលិតកម្មបានលុបឈុតឆាកទាំងអស់ជាមួយ Oh Young Soo ហើយនឹងមានតែតារាសម្ដែងជើងចាស់ Lee Sun Jae មកធ្វើជាតួឯកប៉ុណ្ណោះ៕

ប្រទេសជប៉ុន៖ Carolina Shiino ដែលជាបវរកញ្ញាថ្មីរបស់ប្រទេសជប៉ុនដើមកំណើតអ៊ុយក្រែនបានបោះបង់តំណែងរបស់នាងបន្ទាប់ពីមានរឿងអាស្រូវស្នេហា។

យោងតាមសមាគមបវរកញ្ញាជប៉ុន ដែលជាអ្នករៀបចំកម្មវិធីប្រកួតសម្រស់ក្នុងប្រទេសនេះ បានប្រកាសកាលពីថ្ងៃទី៥ ខែកុម្ភៈ ថាខ្លួនបានទទួលយកសំណើរសុំដកតំណែងបវរកញ្ញាថ្មី ខារ៉ូលីណា ស៊ីណូ អាយុ ២៦ឆ្នាំ ដែលបានគ្រងមកុដកាលពីខែមុន។ នេះបើតាមទស្សនាវដ្ដី Shukan Bunshun បានឱ្យដឹងថា ទំនាក់ទំនងស្នេហារបស់នាងជាមួយវេជ្ជបណ្ឌិតអនឡាញដ៏មានឥទ្ធិពលអាយុ ៤៥ ឆ្នាំគឺជិតរៀបការហើយ ដូច្នេះនាងមិនអាចបន្តកាន់តំណែងជាបវរកញ្ញាប្រចាំប្រទេសបានទេ។

ដំបូងឡើយ សមាគមសម្រស់បានការពារ Shiino ប្រឆាំងនឹងការចោទប្រកាន់នេះ បន្ទាប់ពីនាងបញ្ជាក់ថា នាងបានបញ្ចប់ទំនាក់ទំនងរួចអស់ហើយ ប៉ុន្តែបន្ទាប់មកនៅថ្ងៃទី៥ ខែកុម្ភៈ សមាគមបានបញ្ជាក់ថា ស៊ីណូ នៅតែបន្តណាត់ជួបគូរស្នេហ៍របស់នាង ហើយពួកគេនឹងជិតរៀបការជាមួយគ្នាទៀត។ ហេតុនេះហើយ សមាគមបានសុំទោសចំពោះភាគីពាក់ព័ន្ធក្នុងការប្រកួតប្រជែង រួមទាំងអ្នកឧបត្ថម្ភ និងចៅក្រម សម្រាប់តំណែងជារាជិនីសម្រស់នឹងនៅទំនេរសម្រាប់ឆ្នាំដែលនៅសេសសល់។

Shiino ក៏បានបង្ហោះសារសុំទោសនៅលើបណ្ដាញសង្គម ដោយនិយាយថានាងមិនអាចប្រាប់ការពិតបានទេ ដោយសារតែខ្លាចថាព័ត៌មានអំពីរឿងអាស្រូវស្នេហាបានរីករាលដាល។ នាងបានសរសេរថា៖ «ខ្ញុំពិតជាសោកស្ដាយចំពោះបញ្ហាដែលខ្ញុំបានបង្ក និងក្បត់អ្នកគាំទ្រខ្ញុំ»។ ទោះជាយ៉ាងណាក៏ដោយ ជ័យជម្នះរបស់បវរកញ្ញាជប៉ុនថ្មីៗនេះក៏មានភាពចម្រូងចម្រាសខ្លាំងណាស់ដែរកាលពីខែមុន ដោយសារតែនាងគឺជាបវរកញ្ញាស្របច្បាប់ដំបូងគេក្នុងប្រទេសដែលមានឪពុកម្តាយជាជនជាតិអ៊ុយក្រែន។

Shiino បានផ្លាស់ទៅប្រទេសជប៉ុនដើម្បីរស់នៅ Nagoya នៅពេលដែលនាងមានអាយុ ៥ ឆ្នាំ។ មនុស្សជាច្រើនបានពិភាក្សាគ្នាថាតើ Shiino ពិតជាមុខមាត់ដូចជនជាតិជប៉ុន ឬអត់ព្រោះនាងមិនមានឫសគល់ពីជប៉ុនទេ។ មនុស្សមួយចំនួនក៏បានចោទសួរទៀតថាតើការជ្រើសរើសគំរូដើមកំណើតអ៊ុយក្រែនជាការសម្រេចចិត្តនយោបាយឬអត់?

គួរបញ្ជាក់ដែរថា ក្នុងរយៈពេលប៉ុន្មានឆ្នាំចុងក្រោយនេះ ប្រទេសជប៉ុន បានបើកទូលាយដល់ជនបរទេសឱ្យក្លាយជាពលរដ្ឋស្របច្បាប់ក្នុងកិច្ចខិតខំប្រឹងប្រែងដើម្បីកែលម្អអត្រាកំណើតធ្លាក់ចុះរបស់ខ្លួន ដោយសារតែប្រទេសជប៉ុនមានអត្រាកំណើតទាបបំផុតមួយក្នុងពិភពលោក។ ដូច្នេះហើយ លក្ខណៈវិនិច្ឆ័យនៃការប្រកួតគឺផ្អែកលើការវាយតម្លៃគុណភាព រូបរាង និងសកម្មភាពរបស់បេក្ខជន ដោយបេក្ខនារីត្រូវតែមានសញ្ជាតិរបស់ប្រទេសនេះ មិនទាន់រៀបការ និងមានអាយុពី ១៧-២៦ ឆ្នាំទើបអាចដា

ប្រទេសថៃ ៖ កសិករដាំផ្កាស្បៃរឿងនៅខេត្តម៉ុកដាហាន ប្រទេសថៃ បានថែទាំដើមផ្កាស្បៃរឿងដែលពួកគេដាំនៅក្នុងផើងតូចៗ និងយកមកតម្រៀបដាក់លក់ឱ្យអតិថិជនពេលបុណ្យចូលឆ្នាំចិន ឆ្នាំ២០២៤ ។ កសិករនិយាយថា ពួកគេអាចរកប្រាក់ចំណូលបានជាច្រើនម៉ឺនបាតក្នុង១ថ្ងៃ ហើយអតិថិជនភាគច្រើនបានទិញផ្កាស្បៃរឿងយកទៅតុបតែងនៅមុខលំនៅឋាន ដើម្បីទទួលបានសំណាងល្អ និងចម្រុងចម្រើនក្នុងជីវិត ។

នៅពេលពិធីបុណ្យចូលឆ្នាំចិន បានធ្វើឱ្យទំនិញ ឬម្ហូបអាហារផ្សេងៗសម្រាប់សែនលក់ដាច់យ៉ាងខ្លាំង ហើយគេសង្កេតឃើញជនជាតិថៃកាត់ចិន ឬជនជាតិថៃកាត់វៀតណាម បានដើរទិញរបស់របរ និងម្ហូបអាហារសម្រាប់សែនដូនតារបស់ពួកគេតាមប្រពៃណីចិន ។ លើសពីនេះ ពិធីបុណ្យចូលឆ្នាំចិនក៏បានធ្វើឱ្យកសិករដាំផ្កាស្បៃរឿងនៅស្រុកមឿង ខេត្តម៉ុកដាហាន រកចំណូលបានច្រើនផងដែរក្នុង១ថ្ងៃៗ ។

ស្បៃរឿង ត្រូវបានជនជាតិថៃចាត់ទុកថា គឺជាផ្កានាំមកនូវសិរីសួស្តីដល់ក្រុមគ្រួសារ និងអាជីវកម្ម ។ ហេតុនេះ ជនជាតិថៃតែងយកដើមផ្កាស្បៃរឿងទៅតុបតែងតាមលំនៅឋាន, ហាងលក់ដូរ និងភោជនីយដ្ឋាន ដោយសារពួកគេមានជំនឿថា ផ្កានេះតំណាងឱ្យភាពរីកចម្រើននៅក្នុងក្រុមគ្រួសារ ឬការលក់ដូរ ។

អ្នកស្រី សុរ៉ាង បុណខាន់ ជាកសិករដាំផ្កាស្បៃរឿង នៅភូមិស៊ូនម៉ៃ ឃុំម៉ុកដាហាន ដែលជាតំបន់ដាំផ្កាស្បៃរឿងដ៏ធំជាងគេបានរៀបរាប់ថា អ្នកស្រី និងស្វាមី បានចាប់យកមុខរបរដាំផ្កាស្បៃរឿង អស់រយៈពេលជាង២០ឆ្នាំហើយ ។ អ្នកស្រីបានដាំផ្កាស្បៃរឿងនៅខាងក្រោយផ្ទះ ដែលមានផ្ទៃដីមិនដល់១ហិកតាទេ ហើយត្រូវចំណាយពេល៧០ថ្ងៃ ទើបវាចេញផ្កាអាចកាត់លក់បាន ។

កសិកររូបនេះបន្តថា បើអាកាសធាតុកាន់តែត្រជាក់នឹងធ្វើឱ្យដំណាំស្បៃរឿងដុះលូតលាស់បានលឿន និងចេញផ្កាស្អាតៗ ។ អ្នកស្រីបានដាំផ្កាស្បៃរឿង ប្រមាណ២.៥០០ដើម ហើយដើមនីមួយៗចេញផ្កាច្រើនគួរសម គឺចាប់ពី៨ផ្កា ទៅ១០ផ្កា ។ ហេតុនេះ វាចេញផ្កាច្រើនល្មមឱ្យអ្នកស្រីប្រមូលផ្កាលក់ក្នុងពិធីបុណ្យចូលឆ្នាំចិន ព្រោះមានអតិថិជនត្រូវការច្រើន ។

កសិករដដែលបញ្ជាក់ថា ផ្កាស្បៃរឿងដាំក្នុងផើង គឺមានក្រុមអាជីវករ, ពលរដ្ឋទូទៅ និងម្ចាស់អាជីវកម្មផ្សេងៗនាំគ្នាមកជ្រើសរើសទិញជាច្រើននាក់ ។ អ្នកស្រីបានលក់ក្នុងតម្លៃពី៣០បាត ទៅ៥០បាត សម្រាប់ផ្កាស្បៃរឿង១ផើង ហើយវាអាស្រ័យលើទំហំផ្កាតូច-ធំផងដែរ ។ បើតម្លៃលក់ដុំវិញ អ្នកស្រីបានលក់ក្នុងតម្លៃ១០០បាត សម្រាប់ផ្កាស្បៃរឿង ៣ផើង ។ ហេតុនេះ អ្នកស្រីមានប្រាក់បង្វិលពី១ម៉ឺនបាត ទៅ១ម៉ឺន៣ពាន់បាត ជារៀងរាល់ថ្ងៃ ដោយសារមុខរបរលក់ផ្កាស្បៃរឿង ៕