បរទេស៖ ក្រុមហ៊ុនធំៗមួយចំនួនដូចជា Apple, OPPO និង Vivo បានសម្រេចចិត្តដកខ្លួនចេញពីទីផ្សារទូរស័ព្ទដែលអាចបត់បាន ដោយសារតែជួបបញ្ហាលំបាកខ្លាំងពេកក្នុងការផលិត និងរចនា។កាលពីពេលថ្មីៗនេះយោងតាម Digital Chat Station (DCS) ដែលជាវេទិការព័ត៌មានបច្ចេកវិទ្យាល្បីឈ្មោះមួយរបស់ពិភពលោក បានឱ្យដឹងថា ទីផ្សារទូរស័ព្ទអេក្រង់បត់ ដែលធ្លាប់បានសាទរថាជារបកគំហើញបន្ទាប់នៅក្នុងឧស្សាហកម្មស្មាតហ្វូន កំពុងប្រឈមមុខនឹងបញ្ហាដែលមិននឹកស្មានដល់ ខណៈដែលក្រុមហ៊ុនធំៗចំនួនបីបានផ្អាក ឬពន្យារពេលក្នុងការផលិតទូរស័ព្ទអេក្រង់បត់។

លើសពីនេះ ក្រុមហ៊ុនពីរផ្សេងទៀតក៏បានផ្អាកគម្រោងផលិតទូរស័ព្ទអេក្រង់ដែលអាចបត់បានរបស់ពួកគេផងដែរ។ ទោះជាយ៉ាងណាក៏ដោយ ហេតុផលសម្រាប់ការផ្អាកគម្រោងទាំងនេះ មិនទាន់ត្រូវបានបង្ហាញឱ្យដឹងច្បាស់នៅឡើយទេ។ ប៉ុន្តែបើយោងតាមរបាយការណ៍ថ្មីៗនេះបាននិយាយថា ទាំង OPPO និង Vivo បានសម្រេចចិត្តដកខ្លួនចេញពីទីផ្សារទូរស័ព្ទដែលអាចបត់បាន។ មូលហេតុត្រូវបានគេនិយាយថាដោយសារតែចំណែកទីផ្សាររបស់ពួកគេនៅក្នុងផ្នែកនេះធ្លាក់ចុះយ៉ាងខ្លាំងកាលពីឆ្នាំមុន។

ខណៈដែលគម្រោងអេក្រង់បត់របស់ Apple ក៏ត្រូវបានគេនិយាយដែរថាកំពុងប្រឈមមុខនឹងបញ្ហាដោយសារតែភាពផុយស្រួយនៃអេក្រង់។ ទោះបីជាទូរស័ព្ទដែលអាចបត់បានផ្តល់នូវការរចនា និងសមត្ថភាពពិសេសក៏ដោយ ប៉ុន្តែពួកគេនៅតែមានតម្លៃថ្លៃ និងមានភាពផុយស្រួយ ហើយកម្មវិធីពិតជាមិនត្រូវបានធ្វើឱ្យប្រសើរនោះទេ។ ដូច្នេះហើយ បច្ចុប្បន្នទីផ្សារទូរស័ព្ទដែលអាចបត់បានគឺមានតែក្រុមហ៊ុន Samsung ប៉ុណ្ណោះ ដែលជាក្រុមហ៊ុនផលិតប្រព័ន្ធប្រតិបត្តិការ Android។

ដោយពួកគេបានកាន់កាប់ចំណែកទីផ្សារស្មាតហ្វូនដែលអាចបត់បានធំបំផុត ហើយត្រូវបានគេនិយាយថាកំពុងអភិវឌ្ឍទូរស័ព្ទអេក្រង់ជំនាន់ក្រោយដែលអាចបត់បានរហូតដល់ទៅ ៣ តង់ទៀតផង។ ខណៈដែលក្រុមហ៊ុន Huawei ក៏ត្រូវបានគេនិយាយដែរថានឹងកំពុងអភិវឌ្ឍទូរស័ព្ទដែលមានអេក្រង់អាចបត់បាន ៣ តង់ដូចទៅនឹង Samsung ផងដែរ៕

បរទេស៖ នៅក្នុងខែដំបូងនៃឆ្នាំ ២០២៤ ការលក់រថយន្តអគ្គិសនី និងរថយន្តកូនកាត់នៅទូទាំងពិភពលោកមានចំនួន ១.១ លានគ្រឿង កើនឡើង ៦៩% បើធៀបនឹងរយៈពេលដូចគ្នាកាលពីឆ្នាំមុន។
យោងតាមទិន្នន័យពីក្រុមហ៊ុនស្រាវជ្រាវទីផ្សារ Rho Motion ដែលបានរាយការណ៍កាលពីពេលថ្មីៗនេះថា ការលក់រថយន្តអគ្គិសនីនៅទូទាំងពិភពលោកបានកើនឡើងពីមួយឆ្នាំទៅមួយឆ្នាំក្នុងខែមករា ប៉ុន្តែបានធ្លាក់ចុះទៅវិញនៅក្នុងខែធ្នូ។ ការផ្លាស់ប្តូរនេះអាចមកពីកត្តាជាច្រើនដូចជាការកាត់បន្ថយការឧបត្ថម្ភធនសម្រាប់ការទិញរថយន្តអគ្គិសនី បទប្បញ្ញត្តិតឹងរ៉ឹងទាក់ទងនឹងយានជំនិះ/ការបំភាយអគ្គីសនី ឬគ្រាន់តែជាការធ្លាក់ចុះនៃការលក់តាមរដូវកាលជាដើម។

នៅក្នុងទីផ្សារសំខាន់ៗដូចជាប្រទេសអាល្លឺម៉ង់ បារាំង និងចិន រថយន្តអគ្គិសនី និងរថយន្តកូនកាត់សរុបចំនួន ១.១ លានគ្រឿងត្រូវបានលក់នៅទូទាំងពិភពលោកក្នុងខែមករា ឆ្នាំ ២០២៤។ ដោយតួលេខខាងលើមានការកើនឡើងគួរឱ្យកត់សម្គាល់ ៦៩% បើប្រៀបធៀបទៅនឹង ៦៦០,០០០ គ្រឿងដែលបានលក់ក្នុងខែមករា ឆ្នាំ ២០២៣។ ទោះជាយ៉ាងណាក៏ដោយ កម្រិតនៃការលក់នេះគឺទាបជាងក្នុងខែធ្នូ ២៦% ហើយក៏ទាបជាងខែមិថុនា សីហា កញ្ញា តុលា និងវិច្ឆិកា ក្នុងឆ្នាំ ២០២៣ ផងដែរ។ លោក Charles Lester អ្នកគ្រប់គ្រងទិន្នន័យនៅ Rho Motion បានពន្យល់ថា ការលក់រថយន្តអគ្គិសនីក្នុងប្រទេសអាល្លឺម៉ង់បានធ្លាក់ចុះប្រហែល ៥០% ក្នុងខែមករា ឆ្នាំ២០២៤ បើធៀបនឹងខែធ្នូ ឆ្នាំ២០២៣ នៅពេលដែលប្រទេសនេះបានដកប្រាក់ឧបត្ថម្ភរថយន្តអគ្គិសនី ហើយការធ្លាក់ចុះស្រដៀងគ្នានេះក៏បានកើតឡើងនៅក្នុងប្រទេសបារាំងផងដែរ។

ទោះជាយ៉ាងណាក៏ដោយ Lester នៅតែមានសុទិដ្ឋិនិយមអំពីអនាគតដោយព្យាករណ៍ថាការធ្លាក់ចុះនេះនឹងមានរយៈពេលខ្លី។ លោកបានបន្ថែមថា ក្រុមហ៊ុនផលិតរថយន្តទំនងជានឹងបង្កើនការចំណាយលើរថយន្តអគ្គិសនី ដើម្បីបំពេញតាមស្តង់ដារការបំភាយឧស្ម័នដែលកំណត់ដោយសហភាពអឺរ៉ុប។ សម្រាប់ទីផ្សារសហរដ្ឋអាមេរិក និងកាណាដា ការលក់ម៉ូដែលកូនកាត់អគ្គិសនី និងដោតឌុយអ៊ីនបានកើនឡើង ៤១% បើធៀបនឹងខែដូចគ្នាកាលពីឆ្នាំមុន ប៉ុន្តែបានថយចុះ ១៤% បើធៀបនឹងខែធ្នូ ឆ្នាំ ២០២៣។ ដូចគ្នានេះដែរនៅក្នុងប្រទេសចិន ការលក់បានកើនឡើងជិតពីរដងក្នុងខែមករា ប៉ុន្តែបានធ្លាក់ចុះ ២៦% បើធៀបនឹងខែធ្នូឆ្នាំមុន។

ម៉្យាងវិញទៀត យោងតាមសេចក្តីប្រកាសដ៏គួរឱ្យកត់សម្គាល់បំផុតមួយដែលបានធ្វើឡើងនៅក្នុងវិស័យរថយន្តកូនកាត់អគ្គិសនី និងដោតឌុយប៉ុន្មានសប្តាហ៍ថ្មីៗនេះ គឺក្រុមហ៊ុនរថយន្តយក្សរបស់អាមេរិក General Motors បាននិយាយកាលពីខែមុនថា ខ្លួននឹងចាប់ផ្តើមលក់រថយន្តកូនកាត់ដោតឌុយអ៊ីនមួយចំនួននៅក្នុងប្រទេស និងពង្រីកទីផ្សារ ដើម្បីអនុលោមតាមស្តង់ដារឥន្ធនៈ និងការបំភាយឧស្ម័នដ៏តឹងរ៉ឹង។ ការផ្លាស់ប្តូរនេះអាចជំរុញការលក់រថយន្តកូនកាត់នៅក្នុងសហរដ្ឋអាមេរិក ដោយដើរតួជា “ជំហានមួយ” ដើម្បីធ្វើឱ្យវាកាន់តែងាយស្រួលសម្រាប់មនុស្សក្នុងការផ្លាស់ប្តូរពីរថយន្តដែលប្រើម៉ាស៊ីនចំហេះខាងក្នុងទៅជារថយន្តអគ្គិសនីសុទ្ធ៕

ប្រទេសថៃ ៖ លោក Srettha Thavisin នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ លើកឡើងថា លោករីករាយនៅពេលអតីតនាយករដ្ឋមន្ត្រីប្រទេសថៃ លោក Thaksin Shinawatra បានត្រឡប់ទៅផ្ទះរបស់ខ្លួនវិញ ។ លោកនាយករដ្ឋមន្ត្រីថៃនឹងមានឱកាសចូលជួបលោក Thaksin ប៉ុន្តែលោកបញ្ជាក់ថា ប្រទេសថៃមាននាយករដ្ឋមន្ត្រីតែម្នាក់ប៉ុណ្ណោះ ។

កាលពីថ្ងៃទី១៨ ខែកុម្ភៈ ឆ្នាំ២០២៤ លោក Srettha Thavisin នាយករដ្ឋមន្ត្រីថៃ បានផ្តល់សម្ភាសន៍ទៅកាន់ក្រុមអ្នកសារព័ត៌មាន ដោយលោកបានបង្ហាញនូវក្តីរីករាយដែលអតីតនាយករដ្ឋមន្ត្រីថៃ លោក Thaksin បានទទួលការព្យួរទោស និងធ្វើដំណើរត្រឡប់ទៅផ្ទះរបស់ខ្លួនវិញ ។

លោក Srettha Thavisin បញ្ជាក់ថា គ្រប់យ៉ាងបានដំណើរការទៅតាមលក្ខខណ្ឌច្បាប់ ហើយលោកនៅតែបញ្ជាក់ពាក្យដដែលថា លោក Thaksin គឺជាអតីតនាយករដ្ឋមន្ត្រីថៃម្នាក់ ដែលមានចំណេះដឹង សមត្ថភាព និងទទួលបានការស្រឡាញ់ចូលចិត្តពីពលរដ្ឋថៃ ។ លោករីករាយណាស់នៅពេលលោក Thaksin ទទួលបានការព្យួរទោស ប៉ុន្តែលោកមិនបានទូរស័ព្ទទៅជជែកជាមួយអ្នកនាង Paetongtarn Shinawatra ប្រធានគណបក្សភឿថៃ នៅឡើយទេ ពីព្រោះបច្ចុប្បន្ននេះ លោកចង់ឱ្យពួកគេមានពេលវេលានៅជាមួយគ្នាជាលក្ខណៈគ្រួសារ ។

ទោះយ៉ាងណា លោកនាយករដ្ឋមន្ត្រីមិនបានបារម្ភអ្វីទេ ដោយសារលោក និងអ្នកនាង Paetongtarn បានយល់ពីគ្នាទៅវិញមកស្រាប់ហើយ ។ ប្រសិនបើមានឱកាស លោកនឹងចូលជួបលោក Thaksin ដូចលោកធ្លាប់ចូលជួបលោក ប្រាយុទ្ធ ចាន់អូចា អតីតនាយករដ្ឋមន្ត្រីថៃដែរ ។

នៅពេលអ្នកសារព័ត៌មានសួរថា ពេលនេះ អ្នកមានទស្សនៈខុសគ្នានិយាយថា អំណាចគ្រប់គ្រងនាពេលនេះ បានផ្លាស់ចេញពីវិមានរដ្ឋាភិបាលទៅកាន់លំនៅឋានរបស់លោក Thaksin វិញ តើលោកនាយករដ្ឋមន្ត្រីយល់ឃើញយ៉ាងណាដែរ?

លោក Srettha Thavisin ឆ្លើយថា លោកទទួលស្គាល់ពីទស្សនៈខុសគ្នា ប៉ុន្តែលោកមិនចង់ឱ្យយករឿងនេះមកធ្វើជាប្រធានបទទេ ពីព្រោះបើយោងតាមរដ្ឋធម្មនុញ្ញប្រទេសថៃចែងថា នាយករដ្ឋមន្ត្រីថៃមានតែម្នាក់ប៉ុណ្ណោះ ។

កាលពីថ្ងៃទី១៨ ខែកុម្ភៈ ឆ្នាំ២០២៤ អ្នកនាង Paetongtarn Shinawatra ប្រធានគណបក្សភឿថៃ បានបង្ហោះរូបភាពក្នុង Instagram ផ្ទាល់ខ្លួន អំពីលោក Thaksin អតីតនាយករដ្ឋមន្ត្រីថៃ អង្គុយលេងនៅបរិវេណអាងហែលទឹកក្នុងលំនៅឋាន ក្រោយពីលោកទទួលបានការព្យួរទោស ។ អ្នកនាង Paetongtarn បានសរសេរក្នុង Instagram ថា ៖ «ក្រោយពីមិនបានឃើញបរិយាកាស និងពន្លឺថ្ងៃនៅខាងក្រៅអស់ចំនួន១៨០ថ្ងៃ និងមិនបានវិលត្រឡប់មកផ្ទះមួយនេះអស់រយៈពេល១៧ឆ្នាំ នៅទីបំផុត លោកប៉ាក៏អាចមកអង្គុយនៅខាងក្រៅបែបនេះ» ។

គួរបញ្ជាក់ថា លោក Thaksin អតីតនាយករដ្ឋមន្ត្រីប្រទេសថៃ បានទទួលការព្យួរទោសកាលពីថ្ងៃទី១៨ ខែកុម្ភៈ ឆ្នាំ២០២៤ ក្រោយពីលោកទទួលទោសអស់ចំនួន១៨០ថ្ងៃ ។ នៅព្រឹកថ្ងៃទី១៨ ខែកុម្ភៈ លោកបានធ្វើដំណើរចាកចេញពីមន្ទីរពេទ្យប៉ូលិស និងជិះរថយន្តទៅផ្ទះរបស់លោក ដែលស្ថិតនៅផ្លូវចារឺនសានីតវង្ស តំបន់បាងផ្លាត់ ទីក្រុងបាងកក ៕

សហរដ្ឋអាមេរិក៖ ប្រិយមិត្តទាំងអស់គ្នាដែលជាអ្នកតាមដានផ្នែកអវកាសប្រាកដជាដឹងហើយថា កាលពីកន្លងទៅ NASA បានបញ្ជូនអ្នកវិទ្យាសាស្ត្រចំនួន ៤រូបទៅរស់នៅភពអង្គារសិប្បនិមិត្ត (Mars Dune Alpha) ដែលរៀបចំឡើងនៅលើភពផែនដីនោះទេ។ ទោះបីជាទីភ្នាក់ងារនេះមិនទាន់បញ្ជូនមនុស្សទៅកាន់ភពក្រៅពិតប្រាកដក៏ដោយ ក៏ NASA គ្រោងនឹងបញ្ជូននាវិកទៅរស់នៅភពអង្គារនាពេលអនាគត ដោយបច្ចុប្បន្នកំពុងរៀបចំសម្រាប់បេសកកម្មស្វែងរកអ្នកស្ម័គ្រចិត្តបន្ថែម ខណៈដែលវិទ្យាសាស្ត្រចំនួន ៤រូបនោះជិតដល់ថ្ងៃត្រឡប់មកវិញហើយ។

ដូច្នេះប្រសិនបើអ្នកមានបំណងចង់ផ្លាស់ប្តូរបរិយាកាសផែនដី ទៅរស់នៅភពអង្គារវិញ NASA នឹងមានការផ្តល់ជូនសម្រាប់អ្នក។ នេះបើយោងតាម Digital Trends ដែលបានចុះផ្សាយកាលពីថ្ងៃទី១៨ ខែកុម្ភៈ ឆ្នាំ២០២៤ ថា បេសកកម្មរស់នៅភពអង្គារសិប្បនិមិត្ត នៅក្នុងមូលដ្ឋាន Mars Dune Alpha មានគោលបំណងចង់ឱ្យមនុស្សចេះសម្របខ្លួន និងអភិវឌ្ឍការច្នៃប្រឌិត ក៏ដូចជាដោះស្រាយបញ្ហាដែលអាចកើតឡើងភ្លាមៗ នៅក្នុងបរិស្ថានស្មុគស្មាញ ដែលត្រូវបានរៀបចំឱ្យមានលក្ខណៈស្រដៀងនឹងភពអង្គារ។

Mars Dune Alpha គឺជាមូលដ្ឋានដែលមានទំហំ ១៥៨ ម៉ែត្រក្រលាកសាងឡើងដោយបច្ចេកវិទ្យាព្រីន 3D គឺជាការពិសោធន៍ផ្នែកសុខភាពរាងកាយ ស្មារតី និងការដោះស្រាយបញ្ហានានាពីសំណាក់ក្រុមអ្នកស្ម័គ្រចិត្ត ដោយមិនមានជំនួយពីមនុស្សនៅលើផែនដីនោះទេ។ ទោះជាយ៉ាងណា ក្រុមអ្នកវិទ្យាសាស្ត្រ ៤រូបនឹងត្រូវបញ្ចប់បេសកកម្មនៅប៉ុន្មានខែខាងមុខនេះ ដោយសារពួកគាត់បានសិក្សា និងរស់នៅភពអង្គារសិប្បនិមិត្តអស់រយៈពេល ១ឆ្នាំហើយ។ ហេតុនេះបច្ចុប្បន្ន NASA កំពុងជ្រើសរើសអ្នកស្ម័គ្រចិត្តមួយក្រុមទៀត ដើម្បីជំនួសអ្នកវិទ្យាសាស្ត្រពីមុន ក៏ដូចជាចូលរួមជាមួយក្រុមនាពេលអនាគតផងដែរ។

ដូច្នេះ NASA កំពុងសាកល្បងអ្នកវិទ្យាសាស្ត្រដែលមានសញ្ញាប័ត្រអនុបណ្ឌិតផ្នែក STEM ដូចជាជីវវិទ្យា គណិតវិទ្យា ឬវិស្វកម្ម ឬអ្នកបើកយន្តហោះដែលមានបទពិសោធន៍យ៉ាងហោចណាស់ ១,០០០ ម៉ោង ដើម្បីអាចជួយមនុស្សធម្មតាដែលមានឆន្ទៈចង់ចង់ចូលរួមបេសកកម្មនេះឱ្យទទួលបានជោគជ័យទាំងអ្នកវិទ្យាសាស្រ្ត និងអ្នកស្ម័គ្រ្គចិត្ត ក្នុងគោលបំណងជ្រើសរើសមនុស្សទាំងនេះទៅរស់នៅភពក្រៅជាមួយសមាជិកនាវិកនាពេលអនាគត។

គួរបញ្ជាក់ដែរថា អង្គការ NASA បានកំពុងស្វែងរកពលរដ្ឋអាមេរិកដែលមានសុខភាពល្អមាំមួន មានកម្លាំងចិត្តរឹងមាំ មិនចេះជក់បារី មិនផឹកស្រា ដែលមានអាយុពី ៣០-៥៥ ឆ្នាំ និងស្ទាត់ជំនាញភាសាអង់គ្លេសសម្រាប់ការទំនាក់ទំនងប្រកបដោយប្រសិទ្ធភាពរវាងនាវិក និងបេសកកម្ម។ អ្នកគ្រប់គ្រង NASA បាននិយាយថា “អ្នកដាក់ពាក្យសុំគួរតែមានបំណងប្រាថ្នាដ៏មុតមាំសម្រាប់ការផ្សងព្រេង និងចាប់អារម្មណ៍ក្នុងការរួមចំណែកដល់ការងាររបស់ NASA ដើម្បីរៀបចំសម្រាប់ដំណើរមនុស្សដំបូងទៅកាន់ភពព្រះអង្គារនាពេលអនាគត”៕

ប្រទេសថៃ ៖ ប្រទេសកម្ពុជា និងថៃ បានសហការគ្នាផ្សព្វផ្សាយគម្រោង «ប្រទេស២ គោលដៅ១» ដើម្បីទាក់ទាញភ្ញៀវទេសចរបរទេសធ្វើដំណើរមកប្រទេសទាំងពីរកាន់តែច្រើន ។ ការសហការគ្នាផ្សព្វផ្សាយគម្រោងនេះ កើតឡើងនៅពេលសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោក Srettha Thavisin នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានជួបពិភាក្សាគ្នានៅទីក្រុងបាងកក កាលពីដើមខែកុម្ភៈ ឆ្នាំ២០២៤ ហើយប្រទេសថៃបានព្យាយាមជំរុញគម្រោង «ទិដ្ឋាការមួយ» ជាមួយប្រទេស៣ទៀតនៅតំបន់អាស៊ាន ។

ប្រទេសកម្ពុជា និងថៃ បានយល់ព្រមស្វែងរកមធ្យោបាយ និងសម្រួលដល់វិស័យទេសចរណ៍ឆ្លងកាត់ព្រំដែនរវាងប្រទេសទាំងពីរ និងប្រទេសផ្សេងទៀតរួមគ្នា ។ ហេតុនេះ ក្រសួងទេសចរណ៍របស់ប្រទេសទាំងពីរនឹងផ្តល់ភាពសំខាន់លើប្រធានបទនេះនាពេលឆាប់ៗ ។

ក្រៅពីនេះ ប្រទេសថៃមានគម្រោងពិភាក្សាជាមួយប្រទេសកម្ពុជា, វៀតណាម, ឡាវ និងម៉ាឡេស៊ី ដើម្បីធ្វើកិច្ចព្រមព្រៀងឱ្យភ្ញៀវទេសចរដែលមានទិដ្ឋាការរបស់ប្រទេសណាមួយ អាចធ្វើដំណើរទៅកាន់ប្រទេសចំនួន៥ ទៀត ដោយពុំចាំបាច់ឆ្លងកាត់ការបំពេញឯកសារបន្ថែម ។

ទោះយ៉ាងណា ការបង្កើតគម្រោងនេះមិនមែនជាគំនិតថ្មីទាំងអស់ទេ ប៉ុន្តែគម្រោងនេះត្រូវបានគេលុបចោលកាលពីពេលកន្លងមក ដោយសារប្រទេសជាច្រើនមានលក្ខខណ្ឌកំណត់ និងតម្លៃជាក់លាក់ ។ បច្ចុប្បន្ន ប្រទេសថៃបានស្នើឱ្យភ្ញៀវទេសចររបស់ប្រទេសមួយចំនួន ដូចជា ៖ ភ្ញៀវទេសចរកូរ៉េខាងត្បូង និងរុស្ស៊ី អាចចូលប្រទេសថៃ រយៈពេល៩០ថ្ងៃ ដោយពុំចាំបាច់សុំទិដ្ឋាការ និងពុំចាំបាច់បង់ថ្លៃអ្វីទាំងអស់ ។ វិធានការនេះមានភាពខុសប្លែកគ្នាពីប្រទេសកម្ពុជា, ឡាវ និងវៀតណាម ។

លើសពីនេះ ប្រទេសថៃមានគម្រោងធ្វើកិច្ចព្រមព្រៀងទិដ្ឋាការសម្រាប់ប្រទេសចំនួន៥ នៅតំបន់អាស៊ាន ដើម្បីផ្សព្វផ្សាយពីវិស័យទេសចរណ៍ និងលើកលែងទិដ្ឋាការដល់ពលរដ្ឋមកពីប្រទេសជាសមាជិកសហភាពអឺរ៉ុប (EU) ចំនួន២៧ប្រទេស ។ ហេតុនេះ ភ្ញៀវទេសចរទាំងអស់ដែលមកពីសហភាពអឺរ៉ុប នឹងទទួលបាននូវភាពងាយស្រួលប្រហាក់ប្រហែលគ្នា ។

លោក ធួន ស៊ីណាន (Thourn Sinan) ប្រធានសមាគមទេសចរណ៍ អាស៊ីប៉ាស៊ីហ្វិកកម្ពុជា លើកឡើងថា វាជាវិធីសាស្ត្រសម្រាប់កិច្ចសហការផ្នែកទេសចរណ៍ក្នុងតំបន់ និងមានសក្តានុពលគ្រប់គ្រាន់សម្រាប់ប្រទេសកម្ពុជា, ថៃ និងបណ្តាប្រទេសក្នុងតំបន់អាស៊ានផ្សេងទៀតដែលចូលរួម ។

កាលពីឆ្នាំ២០២៣ ប្រទេសថៃអាចទាក់ទាញភ្ញៀវទេសចររហូតដល់២៧លាននាក់ ។ រីឯប្រទេសកម្ពុជា បានទទួលភ្ញៀវទេសចរជាង៥លាននាក់ ហើយក្រសួងទេសចរណ៍កម្ពុជា បានកំណត់គោលដៅទទួលភ្ញៀវទេសចរបរទេសឱ្យបានជាង៦លាននាក់ នៅឆ្នាំ២០២៥ និង៧លាននាក់ នៅឆ្នាំ២០២៦ ៕

អូស្ត្រាលី៖ កាលពីពេលថ្មីៗនេះ យោងតាមគេហទំព័រអន្តរជាតិមួយ បានឱ្យដឹងថា សាកលវិទ្យាល័យចំនួនប្រាំបី ទាំងរដ្ឋ និងឯកជន នៅក្នុងប្រទេសអូស្ត្រាលី បានលុបចោលសំណើរសុំចូលរៀនរបស់និស្សិតអន្តរជាតិ ក្នុងបរិបទដែលរដ្ឋាភិបាលរឹតបន្តឹងទិដ្ឋាការសិស្ស ដើម្បីកាត់បន្ថយការធ្វើអន្តោប្រវេសន៍។ក្នុងនោះសាកលវិទ្យាល័យដែលលុបចោលពាក្យសុំចូលរៀនរបស់និស្សិតអន្តរជាតិរួមមាន៖ Western Sydney, Macquarie, Wollongong, Latrobe, Deakin, Central Queensland, Edith Cowan និង Kaplan Business School (KBS) ដោយសាលាបាននិយាយថាពួកគេនឹងសងថ្លៃសេវាទាំងអស់ដែលបេក្ខជនបានបង់។

សម្រាប់សិស្សអន្តរជាតិដែលមិនទាន់ទទួលបានទិដ្ឋាការមានន័យថា សាលាបានលុបចោលសំណើរសុំចូលរៀនរបស់និស្សិតហើយ។ សាលាបានកំណត់ថាវាពិបាកសម្រាប់និស្សិតក្នុងការបំពេញតាមលក្ខណៈវិនិច្ឆ័យទិដ្ឋាការថ្មី ដូច្នេះសំបុត្រចូលរៀនរបស់និស្សិតនឹងត្រូវបានលុបចោល។ មូលហេតុដែលរដ្ឋាភិបាលអូស្ត្រាលីរឹតបន្ទឹងច្បាប់ទិដ្ឋាការថ្មីសម្រាប់និស្សិតអន្តរជាតិ គឺដោយសារនិស្សិតមុនៗធ្លាប់បានបំពានច្បាប់ទិដ្ឋាការ។ ទោះជាយ៉ាងណា និស្សិតដែលត្រូវបានសាលានៅក្នុងប្រទេសអូស្ត្រាលីលុបចោល ភាគច្រើនគឺជានិស្សិតអន្តរជាតិដែលមកពីប្រទេសឥណ្ឌា នេប៉ាល់ និងប៉ាគីស្ថាន។

គួរបញ្ជាក់ដែរថា នៅខែធ្នូ ឆ្នាំ ២០២៣ ប្រទេសអូស្ត្រាលីបានប្រកាសផែនការកាត់បន្ថយអន្តោប្រវេសន៍ពាក់កណ្តាលក្នុងរយៈពេលពីរឆ្នាំខាងមុខ ក៏ដូចជារឹតបន្តឹងទិដ្ឋាការសម្រាប់និស្សិតអន្តរជាតិផងដែរ។ តម្រូវការវិញ្ញាបនបត្រភាសាអង់គ្លេសសម្រាប់និស្សិតអន្តរជាតិក្នុងកម្មវិធីបរិញ្ញាបត្របានកើនឡើងពី ៥.៥ ទៅ ៦.០ IELTS សម្រាប់កម្មវិធីក្រោយឧត្តមសិក្សា តម្រូវការគឺ ៦.៥ ជំនួសឱ្យ ៦.០ ។ លើសពីនេះ និស្សិតអន្តរជាតិត្រូវតែធ្វើតេស្តថ្មីមួយដែលមានឈ្មោះថា The Genuine Student Test (GST) ដែលជំនួសរបាយការណ៍ចូលបណ្តោះអាសន្នចាស់ (GTE) ដើម្បីទទួលបានទិដ្ឋាការដែលប្រើប្រាស់សម្រាប់គោលបំណងសិក្សា។

លើសពីនេះ ការស្នើសុំទិដ្ឋាការទីពីររបស់សិស្ស ដើម្បីបន្តការស្នាក់នៅរបស់ពួកគេ នឹងត្រូវបានត្រួតពិនិត្យយ៉ាងជិតស្និទ្ធថែមទៀត។ បច្ចុប្បន្នប្រទេសអូស្ត្រាលី គឺជាគោលដៅសិក្សានៅបរទេសដ៏ពេញនិយមបំផុតមួយនៅក្នុងពិភពលោក បន្ទាប់ពីសហរដ្ឋអាមេរិក និងកាណាដា។ យោងតាមស្ថិតិរបស់ក្រសួងអប់រំអូស្ត្រាលី គិតត្រឹមខែតុលាឆ្នាំមុន ប្រទេសនេះមាននិស្សិតអន្តរជាតិប្រហែល ៧៦៨,០០០ នាក់ ដែលចំនួនច្រើនជាងគេគឺមកពីប្រទេសចិន ឥណ្ឌា និងនេប៉ាល់៕