ប្រទេសថៃ ៖ គេហទំព័រម្ហូបអាហារល្បីឈ្មោះមួយនៅលើពិភពលោក បានចាត់ចំណាត់ថ្នាក់អាហារចៀនដ៏..អា..ក្រក់..បំផុតនៅតំបន់អាស៊ី និងលើពិភពលោក ក្នុងនោះដុកឌឿ មកពីប្រទេសថៃ បានជាប់ចំណាត់ថ្នាក់ទី២ ជាអាហារចៀន..អា..ក្រក់..បំផុតក្នុងតំបន់អាស៊ី ខណៈអាពីង របស់កម្ពុជា ជាប់ចំណាត់ថ្នាក់ទី១ ។

វាបានធ្វើឱ្យល្បីល្បាញក្នុងបណ្តាញសង្គមនៅប្រទេសថៃ ក្រោយពេលគេហទំព័រម្ហូបអាហារដ៏ពេញនិយមឈ្មោះ «TasteAtlas» បានចាត់ចំណាត់ថ្នាក់អាហារចៀនអាក្រក់បំផុតនៅលើពិភពលោក ចំនួន៧០មុខ ។ ចំណែកអាហារចៀនអាក្រក់បំផុតនៅតំបន់អាស៊ី អាហាររបស់កម្ពុជា និងថៃ ក៏បានជាប់ចំណាត់ថ្នាក់ជាអាហារអាក្រក់ដែរ ។

គេហទំព័រ TasteAtlas លើកឡើងថា អាហារដ៏ពេញនិយមនៅប្រទេសថៃ គឺដុកឌឿ ឬដង្កូវចៀន បានជាប់ចំណាត់ថ្នាក់ទី២ ជាអាហារចៀនអាក្រក់បំផុតនៅតំបន់អាស៊ី ។ រីឯអាហារចៀនមួយប្រភេទទៀត គឺអាពីង របស់ប្រទេសកម្ពុជា បានជាប់ចំណាត់ថ្នាក់ទី១ ។

គេហទំព័រនេះបញ្ជាក់ថា ដុកឌឿ ឬដង្កូវចៀន គឺជាអាហារបែបប្រពៃណីរបស់ថៃ ដែលទទួលបានការពេញនិយម ជាពិសេស នៅទីក្រុងបាងកក ។ អាហារប្រភេទនេះ គឺជាដង្កូវចៀន ហើយដាក់ផ្សំគ្រឿងដោយអំបិល និងម្រេច ។ ពេលខ្លះ គេបានផ្សំគ្រឿងវាដោយដាក់ទឹកជ្រលក់តាមរូបមន្តអាហាររបស់អាជីវករ ។ គេតែងប្រទះឃើញអាហារចៀននេះនៅគ្រប់ទីកន្លែងនៅប្រទេសថៃ ជាពិសេស គេដាក់លក់តាមរទេះរុញនៅតាមផ្លូវ ។

នៅពេលចៀនដុកឌឿរួចហើយ វានឹងមានភាពស្រួយ និងជាប់ខ្លាញ់ ហើយរសជាតិរបស់វាពេលខ្លះ អាចល្វីងបន្តិច ។ ចំណុចសំខាន់ ដុកឌឿ បានផ្តល់នូវអាហារូបត្ថម្ភផ្នែកអាហារ ដោយសារវាផ្តល់នូវប្រូតេអ៊ីនខ្ពស់ ។ អ្នកខ្លះជឿថា ដុកឌឿ បានផ្តល់នូវគុណសម្បត្តិសម្រាប់ធ្វើជាថ្នាំព្យាបាលទៀតផង ។

នេះជាប្រភេទអាហារចៀនអាក្រក់បំផុតលើពិភពលោក រួមមាន ៖
១-អាពីង (នៅប្រទេសកម្ពុជា)
២-ដុកឌឿ ឬដង្កូវចៀន (នៅប្រទេសថៃ)
៣-Khuushuur (នៅប្រទេសម៉ុងហ្គោលី)
៤-Steamed chicken feet (Feng zhao) (នៅប្រទេសចិន)
៥-Tokneneng (នៅប្រទេសហ្វីលីពីន)
៦-Murukku (នៅឥណ្ឌា)
៧-Sev (នៅឥណ្ឌា)
៨-Menchi katsu (នៅជប៉ុន)
៩-Vietnamese Crullers (Quẩy) (នៅវៀតណាម) និង
១០-Chargah (នៅប៉ាគីសា្ថន) ៕

ប្រទេសជប៉ុន៖ ពិធីបុណ្យ Sominsai ដែលជាពិធីបុណ្យបុរសអា..ក្រាត..កាយ..មានអាយុកាលជាង ១ ពាន់ឆ្នាំនៅក្នុងប្រទេសជប៉ុន ជាប្រពៃណីចុងក្រោយបង្អស់ដែលត្រូវបានប្រារព្ធនៅឆ្នាំនេះ ខណៈដែលឆ្នាំក្រោយៗលែងមានពិធីបុណ្យនេះទៀតហើយ ដោយសារតែអ្នកស្រុកកាន់តែមានវ័យចំណាស់មិនអាចគ្រប់គ្រងការងាររៀបចំបានទៀតទេ ចំពេលមានការព្រួយបារម្ភកាន់តែខ្លាំងឡើងអំពីចំនួនប្រជាជនវ័យចំណាស់ និងការថយចុះការសម្រាលកូន ពិធីបុណ្យជប៉ុនដ៏ចំម្លែកនេះនឹងត្រូវបានលុបចោលតែម្តងនៅឆ្នាំក្រោយ។កាលពីពេលថ្មីៗនេះយោងតាម The Japan Time ដែលបានចុះផ្សាយនៅថ្ងៃទី១៨ ខែកុម្ភៈ ឆ្នាំ២០២៤ ថាពិធីបុណ្យ Sominsai ដែលត្រូវបានចាត់ទុកថាជាពិធីបុណ្យចម្លែកបំផុតមួយនៅក្នុងប្រទេសជប៉ុនត្រូវបានប្រារព្ធជាលើកចុងក្រោយនៅឆ្នាំនេះកាលពីល្ងាចថ្ងៃទី១៧ ខែកុម្ភៈ ដោយមានបុរសអា..ក្រាត..កាយរាប់ពាន់នាក់ចូលរួមប្រកួតប្រជែងគ្នាដណ្តើមថង់ពិសិដ្ឋដែលមានវត្ថុធាតុឈើដ៏មានតម្លៃមួយ ដោយជឿជាក់ថា អ្នកឈ្នះនឹងទទួលបានពរជ័យពីទេវតាក្នុងឆ្នាំថ្មី ដែលពិធីនេះត្រូវបានប្រារព្ធឡើងនៅប្រាសាទ Kokuseki ក្នុងខេត្ត Iwate ភាគខាងជើងប្រទេសជប៉ុន។

ការរៀបចំព្រឹត្តិការណ៍នេះ បានទាក់ទាញអ្នកចូលរួមរាប់រយនាក់ និងភ្ញៀវទេសចររាប់ពាន់នាក់ជារៀងរាល់ឆ្នាំ ប៉ុន្តែត្រូវបានលុបចោលនៅឆ្នាំក្រោយៗ ដោយសារប្រជាជនកាន់តែចំណាស់ ហើយការរៀបចំព្រឹត្តិការណ៍ទ្រង់ទ្រាយធំបែបនេះគឺពិបាកណាស់។ លោក Toshiaki Kikuchi ដែលបានឈ្នះការប្រកួតដ៏ពិសិដ្ឋនេះនិងបានចូលរួមក្នុងការរៀបចំពិធីបុណ្យជាច្រើនឆ្នាំមកនេះ បានសម្តែងក្តីសង្ឃឹមថា ពិធីបុណ្យ Sominsai នឹងត្រឡប់មកវិញនាពេលអនាគត។ គាត់បាននិយាយថា “ខ្ញុំនៅតែចង់រក្សាប្រពៃណីនេះ ទោះបីជាវាប្រហែលជាត្រូវផ្លាស់ប្តូរទម្រង់នៃការរៀបចំក៏ដោយ។ អ្នកអាចយល់យ៉ាងច្បាស់ពីតម្លៃនៃសកម្មភាពជាច្រើន ប្រសិនបើអ្នកចូលរួមដោយផ្ទាល់” ។

អ្នកចូលរួមនិងអ្នកទស្សនាជាច្រើនក៏បានសម្តែងការសោកស្តាយផងដែរនៅពេលព្រឹត្តិការណ៍ត្រូវបានផ្អាក។ Yasuo Nishimura ជាគិលានុបដ្ឋាយិកាអាយុ ៤៩ ឆ្នាំមកពីទីក្រុង Osaka បាននិយាយថា នេះគឺជាពិធីចុងក្រោយនៃប្រពៃណីដ៏អស្ចារ្យមួយដែលមានរយៈពេលជាង ១,០០០ ឆ្នាំមកហើយ។ នាងបានបន្តទៀតថា ខ្ញុំពិតជាសោកស្តាយណាស់។គួរបញ្ជាក់ដែរថា ភាពចាស់នៃចំនួនប្រជាជននៅក្នុងប្រទេសជប៉ុន កំពុងកើតឡើងលឿនជាងមុនទ្វេដង។ ទិន្នន័យស្ថិតិពីក្រសួងកិច្ចការផ្ទៃក្នុងរបស់ជប៉ុនក្នុងខែកញ្ញា ឆ្នាំ ២០២៣ បានបង្ហាញថា ប្រទេសនេះជាលើកដំបូងបានកត់ត្រាមនុស្សចំនួន ១២.៥០ លាននាក់ដែលមានអាយុលើសពី ៨០ ឆ្នាំ ដែលស្មើនឹងជាង ១០% នៃចំនួនប្រជាជនសរុប។ ដូច្នេះចំនួនមនុស្សដែលមានអាយុលើសពី ៧៥ ឆ្នាំឡើងដល់ ២០ លាននាក់ ខណៈដែលសមាមាត្រនៃមនុស្សដែលមានអាយុលើសពី ៦៥ ឆ្នាំឡើងដល់កម្រិតខ្ពស់បំផុតគឺ ២៩.១%៕

ក្រុមហ៊ុន OpenAI បានបង្ហាញនូវគំរូបញ្ញាសិប្បនិម្មិត (Sora) គឺជាបច្ចេកវិទ្យា AI ថ្មីចុងក្រោយបង្អស់ ដែលវាអាចផ្លាស់ប្តូរពីអត្ថបទខ្លីៗឱ្យក្លាយជាវីដេអូមានគុណភាពខ្ពស់ (Text to Video) មានរយៈពេល១នាទី ។ វីដេអូបង្កើតឡើងដោយបច្ចេកវិទ្យាថ្មីនេះ គឺមានលក្ខណៈស្រដៀងគ្នានឹងវីដេអូដែលបង្កើតដោយមនុស្សដែរ ។ នេះបើតាមការចេញផ្សាយរបស់សារព័ត៌មានបរទេស កាលពីពាក់កណ្តាលខែកុម្ភៈ ឆ្នាំ២០២៤ ។

នៅពីក្រោយការប្រែក្លាយអត្ថបទទៅជាវីដេអូខ្លីនេះ គឺកើតចេញពីសមត្ថភាពរបស់គំរូបញ្ញាសិប្បនិម្មិត (Sora) ដែលវាអាចយល់ពីភាសា និងតួនាទីរបស់វត្ថុបានយ៉ាងល្អ ។ លើសពីនេះ បច្ចេកវិទ្យានេះក៏អាចយល់ពីបរិយាកាសនៅជុំវិញខ្លួន និងទីកន្លែងផ្សេងៗផងដែរ ទើបធ្វើឱ្យការធ្វើចលនានៅក្នុងវីដេអូដូចគ្នានឹងស្ថានការណ៍ពិតប្រាកដគ្រប់មុំនៃរូបភាព និងស្រមោល ។

វីដេអូដែលក្រុមហ៊ុន OpenAI បង្ហាញនេះ គឺគ្រាន់តែជាលទ្ធផលការងារមួយផ្នែកប៉ុណ្ណោះ ហើយក្រុមហ៊ុនកំពុងស្ថិតក្នុងដំណាក់កាលស្រាវជ្រាវ និងអភិវឌ្ឍន៍បន្ថែមទៀត ។ បច្ចុប្បន្ន ក្រុមហ៊ុនបានផ្តល់សិទ្ធិការប្រើប្រាស់បច្ចេកវិទ្យានេះសម្រាប់តែក្រុមសិល្បករ, អ្នករចនាម៉ូដ និងចាងហ្វាយផលិតកម្មភាពយន្តមួយចំនួនប៉ុណ្ណោះ ដើម្បីប្រមូលព័ត៌មានពីការប្រើប្រាស់សម្រាប់ការអភិវឌ្ឍគំរូបញ្ញាសិប្បនិម្មិតបន្ថែមទៀត ។

ក្រៅពីនេះ ក្រុមការងារកំពុងដោះស្រាយបញ្ហាចំណុចខ្វះខាតរបស់គំរូបញ្ញាសិប្បនិម្មិត (Sora) ដូចជា ៖ គំរូ Physics ដ៏ស្មុគស្មាញ, ការបង្ហាញទឹកមុខ និងក្រសែភ្នែករបស់មនុស្ស ដើម្បីប្រាប់ពីស្ថានការណ៍នានា ដែលគំរូបញ្ញាសិប្បនិម្មិតពុំទាន់អាចធ្វើចំណុចទាំងអស់នេះបានត្រឹមត្រូវទេ ។ ហេតុនេះ គំរូបញ្ញាសិប្បនិម្មិត (Sora) នឹងត្រូវរៀនសូត្របន្ថែមទៀតដើម្បីឱ្យវាកាន់តែឆ្លាតជាងមុន ។

សុវត្ថិភាពនៃការប្រើប្រាស់គំរូបញ្ញាសិប្បនិម្មិត (Sora) គឺជាអ្វីដែលក្រុមការងារអភិវឌ្ឍន៍ផ្តល់ភាពសំខាន់ជាចម្បង ដើម្បីការពារកុំឱ្យជនខិលខូចយកបច្ចេកវិទ្យាថ្មីនេះទៅប្រើប្រាស់ក្នុងផ្លូវខុស ដូចជា ៖ ការផលិតវីដេអូបោកប្រាស់, ការបង្កើតព័ត៌មានក្លែងក្លាយ, ការជំរុញអំពើហិង្សា និងការគំរាមកំហែង ឬបំពានផ្លូវភេទ ដើម្បីបង្កើតការស្អប់ខ្ពើម ឬមានគោលបំណងផ្សេងទៀត ។ ក្រៅពីនេះ ក្រុមហ៊ុនក៏បានសហការយ៉ាងជិតស្និទ្ធជាមួយអ្នកជំនាញ, និស្សិត និងអ្នកច្បាប់ ។

កាលពីចុងឆ្នាំ២០២២ ក្រុមហ៊ុន OpenAI ធ្លាប់បានបង្ហាញសេវាកម្ម ChatGPT ដែលបញ្ជាក់ពីសមត្ថភាពរបស់បញ្ញាសិប្បនិម្មិតលើសមុខងារជាច្រើន ដូចជា ៖ វាអាចសរសេរអ៊ីម៉ែល, សរសេរកូដកម្មវិធី និងកំណាព្យ ។ ហេតុនេះ ការបង្ហាញគំរូបញ្ញាសិប្បនិម្មិត (Sora) ដែលអាចបង្កើតវីដេអូមានគុណភាពខ្ពស់នេះ គឺជាការអភិវឌ្ឍបច្ចេកវិទ្យាដ៏សំខាន់របស់ក្រុមហ៊ុន ៕

ប្រទេសថៃ ៖ ប្រទេសថៃនៅតែជួបវិបត្តិបន្តទៀតពាក់ព័ន្ធនឹងបញ្ហាធូលីពុល ហើយបច្ចុប្បន្ន តំបន់ជាច្រើននៅប្រទេសថៃស្ថិតក្នុងស្ថានភាពធ្ងន់ធ្ងរ ។ ជាក់ស្តែង នៅទីក្រុងបាងកក និងខេត្តឈៀងម៉ៃ មានគុណភាពខ្យល់ជាប់ចំណាត់ថ្នាក់ក្នុងចំណោមប្រទេសមានការបំពុលខ្លាំងបំផុតលើពិភពលោក ។ នេះបើតាមការចុះផ្សាយរបស់សារព័ត៌មានថៃឈ្មោះ Nation កាលពីថ្ងៃទី១៦ ខែកុម្ភៈ ឆ្នាំ២០២៤ ។

លើសពីនេះ ស្ថានការណ៍នេះកាន់តែគួរឱ្យបារម្ភខ្លាំងឡើង នៅពេលមជ្ឈមណ្ឌលទំនាក់ទំនងការដោះស្រាយបញ្ហាបំពុលបរិយាកាស និងនាយកដ្ឋានគ្រប់គ្រងការបំពុលបរិយាកាសលើកឡើងថា ចាប់ពីថ្ងៃទី១៦ ខែកុម្ភៈ ដល់ថ្ងៃទី២២ ខែកុម្ភៈ ឆ្នាំ២០២៤ នៅគ្រប់តំបន់របស់ប្រទេសថៃ លើកលែងតែខេត្តភាគខាងត្បូង នឹងមានធូលីពុលកើនឡើង ។

ចំណែកមូលហេតុបណ្តាលឱ្យកើតធូលីនៅលើបរិយាកាសនោះ ក្រៅពីអាកាសធាតុតាមរដូវកាល គឺវាកើតឡើងដោយសារការដុតតាមធម្មជាតិ ជាពិសេស ការដុតភ្លើងរបស់មនុស្ស ។ បើតាមការត្រួតពិនិត្យក្នុងផ្កាយរណបបង្ហាញថា តំបន់របស់ប្រទេសថៃ និងប្រទេសជិតខាង មានចំណុចក្តៅកើតឡើងជាច្រើនកន្លែង ។ កត្តាទាំងនេះបានធ្វើឱ្យប្រទេសថៃមានបញ្ហាធូលីយ៉ាងខ្លាំង រហូតធ្វើឱ្យមតិនានាសួរថា តើពេលណាទើបប្រទេសថៃ និងប្រទេសជិតខាងសហការគ្នាដោះស្រាយបញ្ហាធូលី និងផ្សែងឆ្លងព្រំដែន?

ថ្មីៗនេះ មជ្ឈមណ្ឌលប្រឆាំងព័ត៌មានក្លែងក្លាយប្រទេសថៃលើកឡើងថា យោងតាមទិន្នន័យពីក្រសួងការបរទេសថៃឱ្យដឹងថា ក្រសួងការបរទេសថៃ និងកម្ពុជា នឹងសហការគ្នាបង្កើត Hotline ដើម្បីដោះស្រាយបញ្ហាធូលី និងផ្សែងឆ្លងព្រំដែន ។

លោក Srettha Thavisin នាយករដ្ឋមន្ត្រីថៃ និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានពិភាក្សាគ្នាអំពីការដោះស្រាយបញ្ហាធូលី និងផ្សែង ក្នុងអំឡុងពេលនាយករដ្ឋមន្ត្រីកម្ពុជាធ្វើដំណើរទស្សនកិច្ចមកប្រទេសថៃ កាលពីថ្ងៃទី៧ ខែកុម្ភៈ ឆ្នាំ២០២៤ ។ ភាគីទាំងពីរបានយល់ព្រមសហការគ្នាដោះស្រាយបញ្ហាធូលី PM2.5 ព្រមទាំងផ្តល់ភាពសំខាន់ដល់បរិស្ថាន និងខ្យល់អាកាសបរិសុទ្ធប្រកបដោយនិរន្តរភាព ។

លើសពីនេះ ប្រទេសថៃ និងកម្ពុជា នឹងសហការគ្នាបង្កើត Hotline និងក្រុមការងារចម្រុះរវាងក្រសួងធនធានធម្មជាតិ និងបរិស្ថានរបស់ថៃ ជាមួយក្រសួងបរិស្ថានរបស់កម្ពុជា ដើម្បីដោះស្រាយបញ្ហាបរិស្ថានដែលប៉ះពាល់ដល់សុខភាពពលរដ្ឋ តាមការស្នើឡើងរបស់ភាគីថៃ ។

ក្រៅពីនេះ ក្រសួងការបរទេសនឹងជំរុញកិច្ចសហការផ្សេងៗ ដូចជា ៖ ការផ្លាស់ប្តូរព័ត៌មានតំបន់ក្តៅ និងការអភិវឌ្ឍសក្តានុពលឧបករណ៍, ការពន្លត់ភ្លើង និងការគ្រប់គ្រងផ្នែកកសិកម្ម រួមទាំងការផ្លាស់ប្តូរចំណេះដឹង និងព័ត៌មាន Hotspot ផ្សេងៗ បន្ទាប់ពីការសន្ទនាពីចម្ងាយ ។ រីឯភាគីកម្ពុជាបានឯកភាពលើសារៈសំខាន់នៃការផ្លាស់ប្តូរព័ត៌មាន ព្រមទាំងត្រៀមខ្លួនចែករំលែកព័ត៌មានប្រចាំថ្ងៃ និងតែងតាំងមន្ត្រីសម្របសម្រួលបញ្ហានេះ ។

កាលពីថ្ងៃទី១៦ ខែកុម្ភៈ ឆ្នាំ២០២៤ ភ្នាក់ងារអភិវឌ្ឍន៍បច្ចេកវិទ្យាអវកាសបានបង្ហាញទិន្នន័យទទួលបានពីផ្កាយរណប (Suomi NPP) និងទិន្នន័យបានពីផ្កាយរណបជាច្រើនទៀតកាលពីថ្ងៃទី១៥ ខែកុម្ភៈ បង្ហាញថា ប្រទេសថៃមានតំបន់ក្តៅ រហូតដល់១.៨៧០តំបន់ ។

ទិន្នន័យពីផ្កាយរណបបញ្ជាក់ទៀតថា ចំណែកប្រទេសជិតខាង គឺប្រទេសកម្ពុជាមានតំបន់ក្តៅច្រើនជាងគេ ស្មើនឹង២.៣៤៨តំបន់, មីយ៉ាន់ម៉ា ១.៣៩៥តំបន់, ឡាវ ១.០៦៤តំបន់ និងវៀតណាម ៥៧៥តំបន់ ៕

ប្រទេសកូរ៉េខាងជើង ៖ អ្នកនាង គីម យ៉ូជុង គឺជាប្អូនស្រីរបស់លោក គីម ជុងអ៊ុន មេដឹកនាំប្រទេសកូរ៉េខាងជើង បានចេញសេចក្តីថ្លែងការណ៍មួយតាមរយៈទីភ្នាក់ងារព័ត៌មានកណ្តាលរបស់រដ្ឋាភិបាលកូរ៉េខាងជើង កាលពីថ្ងៃទី១៦ ខែកុម្ភៈ ឆ្នាំ២០២៤ ថា កូរ៉េខាងជើងនឹងបើកចំហក្នុងការពង្រឹងទំនាក់ទំនងជាមួយជប៉ុន ព្រមទាំងអញ្ជើញនាយករដ្ឋមន្ត្រីជប៉ុនមកទស្សនកិច្ចនៅកូរ៉េខាងជើងផងដែរ ។

អ្នកនាង គីម យ៉ូជុង ប្អូនស្រីរបស់មេដឹកនាំកូរ៉េខាងជើង បានបញ្ជាក់ក្នុងសេចក្តីថ្លែងការណ៍ថា គ្មានហេតុផលណាមួយដែលធ្វើឱ្យប្រទេសកូរ៉េខាងជើង និងជប៉ុន មិនអាចបង្កើតទំនាក់ទំនងជាមួយគ្នាបានទេ ដរាបណា ជប៉ុនមិនលើកឡើងពីបញ្ហាឧបសគ្គក្នុងការទំនាក់ទំនងរវាងប្រទេសទាំងពីរ ។ ជាក់ស្តែង បញ្ហាចោទប្រកាន់កូរ៉េខាងជើង រឿងការចាប់ខ្លួនជនជាតិជប៉ុន ។

ប្អូនស្រីមេដឹកនាំកូរ៉េខាងជើងសង្ឃឹមថា នៅថ្ងៃណាមួយ មេដឹកនាំប្រទេសជប៉ុននឹងធ្វើដំណើរមកទស្សនកិច្ចនៅកូរ៉េខាងជើង ប៉ុន្តែបច្ចុប្បន្ននេះ កូរ៉េខាងជើងពុំទាន់មានគម្រោងនៅឡើយទេ ក្នុងការពង្រឹងទំនាក់ទំនងជាមួយជប៉ុន ។ ហេតុនេះ កូរ៉េខាងជើងនឹងរង់ចាំមើលការតាំងចិត្តពិតប្រាកដរបស់លោក Fumio Kishida នាយករដ្ឋមន្ត្រីជប៉ុន ជាមុនសិន ។

កាយវិការដ៏កម្ររបស់កូរ៉េខាងជើង ដែលចង់ចងសម្ព័ន្ធភាពជាមួយជប៉ុនលើកនេះ បានកើតឡើងក្រោយពីជប៉ុនបង្ហាញនូវចំណុចសំខាន់ៗចំនួន២ គឺចំណុចទី១ លោក Fumio Kishida នាយករដ្ឋមន្ត្រីជប៉ុន ទើបតែបានលើកឡើងកាលពីដើមខែកុម្ភៈ ឆ្នាំ២០២៤ ថា លោកមានអារម្មណ៍ថា វាមានភាពចាំបាច់យ៉ាងខ្លាំងដែលត្រូវផ្លាស់ប្តូរទំនាក់ទំនងរវាងជប៉ុន និងកូរ៉េខាងជើង នាពេលបច្ចុប្បន្ន ។ លើសពីនេះ លោកនាយករដ្ឋមន្ត្រីជប៉ុនបានចាប់ផ្តើមធ្វើសកម្មភាពមួយចំនួនដែលពាក់ព័ន្ធនឹងគំនិតនេះផងដែរ ។

ចំណែកចំណុចទី២ សារព័ត៌មានជប៉ុនបានរាយការណ៍នៅខែកុម្ភៈ ឆ្នាំ២០២៤ ថា លោក Fumio Kishida នាយករដ្ឋមន្ត្រីជប៉ុន គ្រោងធ្វើដំណើរទស្សនកិច្ចទៅប្រទេសកូរ៉េខាងត្បូង នៅចុងខែមីនា ឆ្នាំ២០២៤ ហើយលោកនឹងចូលរួមកិច្ចប្រជុំកំពូលជាមួយប្រធានាធិបតីកូរ៉េខាងត្បូង លោក Yoon Suk Yeol ។ វាជាការធ្វើដំណើរមកកាន់ប្រទេសកូរ៉េខាងត្បូង លើកទី២ របស់លោក Fumio Kishida ៕