ប្រទេសជប៉ុន៖ Carolina Shiino ដែលជាបវរកញ្ញាថ្មីរបស់ប្រទេសជប៉ុនដើមកំណើតអ៊ុយក្រែនបានបោះបង់តំណែងរបស់នាងបន្ទាប់ពីមានរឿងអាស្រូវស្នេហា។

យោងតាមសមាគមបវរកញ្ញាជប៉ុន ដែលជាអ្នករៀបចំកម្មវិធីប្រកួតសម្រស់ក្នុងប្រទេសនេះ បានប្រកាសកាលពីថ្ងៃទី៥ ខែកុម្ភៈ ថាខ្លួនបានទទួលយកសំណើរសុំដកតំណែងបវរកញ្ញាថ្មី ខារ៉ូលីណា ស៊ីណូ អាយុ ២៦ឆ្នាំ ដែលបានគ្រងមកុដកាលពីខែមុន។ នេះបើតាមទស្សនាវដ្ដី Shukan Bunshun បានឱ្យដឹងថា ទំនាក់ទំនងស្នេហារបស់នាងជាមួយវេជ្ជបណ្ឌិតអនឡាញដ៏មានឥទ្ធិពលអាយុ ៤៥ ឆ្នាំគឺជិតរៀបការហើយ ដូច្នេះនាងមិនអាចបន្តកាន់តំណែងជាបវរកញ្ញាប្រចាំប្រទេសបានទេ។

ដំបូងឡើយ សមាគមសម្រស់បានការពារ Shiino ប្រឆាំងនឹងការចោទប្រកាន់នេះ បន្ទាប់ពីនាងបញ្ជាក់ថា នាងបានបញ្ចប់ទំនាក់ទំនងរួចអស់ហើយ ប៉ុន្តែបន្ទាប់មកនៅថ្ងៃទី៥ ខែកុម្ភៈ សមាគមបានបញ្ជាក់ថា ស៊ីណូ នៅតែបន្តណាត់ជួបគូរស្នេហ៍របស់នាង ហើយពួកគេនឹងជិតរៀបការជាមួយគ្នាទៀត។ ហេតុនេះហើយ សមាគមបានសុំទោសចំពោះភាគីពាក់ព័ន្ធក្នុងការប្រកួតប្រជែង រួមទាំងអ្នកឧបត្ថម្ភ និងចៅក្រម សម្រាប់តំណែងជារាជិនីសម្រស់នឹងនៅទំនេរសម្រាប់ឆ្នាំដែលនៅសេសសល់។

Shiino ក៏បានបង្ហោះសារសុំទោសនៅលើបណ្ដាញសង្គម ដោយនិយាយថានាងមិនអាចប្រាប់ការពិតបានទេ ដោយសារតែខ្លាចថាព័ត៌មានអំពីរឿងអាស្រូវស្នេហាបានរីករាលដាល។ នាងបានសរសេរថា៖ «ខ្ញុំពិតជាសោកស្ដាយចំពោះបញ្ហាដែលខ្ញុំបានបង្ក និងក្បត់អ្នកគាំទ្រខ្ញុំ»។ ទោះជាយ៉ាងណាក៏ដោយ ជ័យជម្នះរបស់បវរកញ្ញាជប៉ុនថ្មីៗនេះក៏មានភាពចម្រូងចម្រាសខ្លាំងណាស់ដែរកាលពីខែមុន ដោយសារតែនាងគឺជាបវរកញ្ញាស្របច្បាប់ដំបូងគេក្នុងប្រទេសដែលមានឪពុកម្តាយជាជនជាតិអ៊ុយក្រែន។

Shiino បានផ្លាស់ទៅប្រទេសជប៉ុនដើម្បីរស់នៅ Nagoya នៅពេលដែលនាងមានអាយុ ៥ ឆ្នាំ។ មនុស្សជាច្រើនបានពិភាក្សាគ្នាថាតើ Shiino ពិតជាមុខមាត់ដូចជនជាតិជប៉ុន ឬអត់ព្រោះនាងមិនមានឫសគល់ពីជប៉ុនទេ។ មនុស្សមួយចំនួនក៏បានចោទសួរទៀតថាតើការជ្រើសរើសគំរូដើមកំណើតអ៊ុយក្រែនជាការសម្រេចចិត្តនយោបាយឬអត់?

គួរបញ្ជាក់ដែរថា ក្នុងរយៈពេលប៉ុន្មានឆ្នាំចុងក្រោយនេះ ប្រទេសជប៉ុន បានបើកទូលាយដល់ជនបរទេសឱ្យក្លាយជាពលរដ្ឋស្របច្បាប់ក្នុងកិច្ចខិតខំប្រឹងប្រែងដើម្បីកែលម្អអត្រាកំណើតធ្លាក់ចុះរបស់ខ្លួន ដោយសារតែប្រទេសជប៉ុនមានអត្រាកំណើតទាបបំផុតមួយក្នុងពិភពលោក។ ដូច្នេះហើយ លក្ខណៈវិនិច្ឆ័យនៃការប្រកួតគឺផ្អែកលើការវាយតម្លៃគុណភាព រូបរាង និងសកម្មភាពរបស់បេក្ខជន ដោយបេក្ខនារីត្រូវតែមានសញ្ជាតិរបស់ប្រទេសនេះ មិនទាន់រៀបការ និងមានអាយុពី ១៧-២៦ ឆ្នាំទើបអាចដា

ប្រទេសថៃ ៖ កសិករដាំផ្កាស្បៃរឿងនៅខេត្តម៉ុកដាហាន ប្រទេសថៃ បានថែទាំដើមផ្កាស្បៃរឿងដែលពួកគេដាំនៅក្នុងផើងតូចៗ និងយកមកតម្រៀបដាក់លក់ឱ្យអតិថិជនពេលបុណ្យចូលឆ្នាំចិន ឆ្នាំ២០២៤ ។ កសិករនិយាយថា ពួកគេអាចរកប្រាក់ចំណូលបានជាច្រើនម៉ឺនបាតក្នុង១ថ្ងៃ ហើយអតិថិជនភាគច្រើនបានទិញផ្កាស្បៃរឿងយកទៅតុបតែងនៅមុខលំនៅឋាន ដើម្បីទទួលបានសំណាងល្អ និងចម្រុងចម្រើនក្នុងជីវិត ។

នៅពេលពិធីបុណ្យចូលឆ្នាំចិន បានធ្វើឱ្យទំនិញ ឬម្ហូបអាហារផ្សេងៗសម្រាប់សែនលក់ដាច់យ៉ាងខ្លាំង ហើយគេសង្កេតឃើញជនជាតិថៃកាត់ចិន ឬជនជាតិថៃកាត់វៀតណាម បានដើរទិញរបស់របរ និងម្ហូបអាហារសម្រាប់សែនដូនតារបស់ពួកគេតាមប្រពៃណីចិន ។ លើសពីនេះ ពិធីបុណ្យចូលឆ្នាំចិនក៏បានធ្វើឱ្យកសិករដាំផ្កាស្បៃរឿងនៅស្រុកមឿង ខេត្តម៉ុកដាហាន រកចំណូលបានច្រើនផងដែរក្នុង១ថ្ងៃៗ ។

ស្បៃរឿង ត្រូវបានជនជាតិថៃចាត់ទុកថា គឺជាផ្កានាំមកនូវសិរីសួស្តីដល់ក្រុមគ្រួសារ និងអាជីវកម្ម ។ ហេតុនេះ ជនជាតិថៃតែងយកដើមផ្កាស្បៃរឿងទៅតុបតែងតាមលំនៅឋាន, ហាងលក់ដូរ និងភោជនីយដ្ឋាន ដោយសារពួកគេមានជំនឿថា ផ្កានេះតំណាងឱ្យភាពរីកចម្រើននៅក្នុងក្រុមគ្រួសារ ឬការលក់ដូរ ។

អ្នកស្រី សុរ៉ាង បុណខាន់ ជាកសិករដាំផ្កាស្បៃរឿង នៅភូមិស៊ូនម៉ៃ ឃុំម៉ុកដាហាន ដែលជាតំបន់ដាំផ្កាស្បៃរឿងដ៏ធំជាងគេបានរៀបរាប់ថា អ្នកស្រី និងស្វាមី បានចាប់យកមុខរបរដាំផ្កាស្បៃរឿង អស់រយៈពេលជាង២០ឆ្នាំហើយ ។ អ្នកស្រីបានដាំផ្កាស្បៃរឿងនៅខាងក្រោយផ្ទះ ដែលមានផ្ទៃដីមិនដល់១ហិកតាទេ ហើយត្រូវចំណាយពេល៧០ថ្ងៃ ទើបវាចេញផ្កាអាចកាត់លក់បាន ។

កសិកររូបនេះបន្តថា បើអាកាសធាតុកាន់តែត្រជាក់នឹងធ្វើឱ្យដំណាំស្បៃរឿងដុះលូតលាស់បានលឿន និងចេញផ្កាស្អាតៗ ។ អ្នកស្រីបានដាំផ្កាស្បៃរឿង ប្រមាណ២.៥០០ដើម ហើយដើមនីមួយៗចេញផ្កាច្រើនគួរសម គឺចាប់ពី៨ផ្កា ទៅ១០ផ្កា ។ ហេតុនេះ វាចេញផ្កាច្រើនល្មមឱ្យអ្នកស្រីប្រមូលផ្កាលក់ក្នុងពិធីបុណ្យចូលឆ្នាំចិន ព្រោះមានអតិថិជនត្រូវការច្រើន ។

កសិករដដែលបញ្ជាក់ថា ផ្កាស្បៃរឿងដាំក្នុងផើង គឺមានក្រុមអាជីវករ, ពលរដ្ឋទូទៅ និងម្ចាស់អាជីវកម្មផ្សេងៗនាំគ្នាមកជ្រើសរើសទិញជាច្រើននាក់ ។ អ្នកស្រីបានលក់ក្នុងតម្លៃពី៣០បាត ទៅ៥០បាត សម្រាប់ផ្កាស្បៃរឿង១ផើង ហើយវាអាស្រ័យលើទំហំផ្កាតូច-ធំផងដែរ ។ បើតម្លៃលក់ដុំវិញ អ្នកស្រីបានលក់ក្នុងតម្លៃ១០០បាត សម្រាប់ផ្កាស្បៃរឿង ៣ផើង ។ ហេតុនេះ អ្នកស្រីមានប្រាក់បង្វិលពី១ម៉ឺនបាត ទៅ១ម៉ឺន៣ពាន់បាត ជារៀងរាល់ថ្ងៃ ដោយសារមុខរបរលក់ផ្កាស្បៃរឿង ៕

អ្នកនិយមលេងអ៊ីនធើណែតមានការចាប់អារម្មណ៍យ៉ាងខ្លាំង បន្ទាប់ពីអ្នកឡើងភ្នំមួយក្រុមបានពុះពារឡើងទៅដល់ខាងលើកំពូលភ្នំអេវឺរ៉េស កម្ពស់ ៨.៨៤៩ម៉ែត្រ ហើយក៏បានផ្តឹតយកនូវរូបភាព ឃើញភ្នំទាំងមូលជាមួយនឹងកាមេរ៉ា 360 ដឺក្រេ។ ទិដ្ឋភាពនៃកំពូលភ្នំនេះគឺបានធ្វើឱ្យអ្នកទស្សនាមានការរំភើបជាមួយនឹងភាពស្រស់ស្អាតដ៏អស្ចារ្យ ប្រៀបដូចទៅនឹងពិភពនិមិត្ត។

ខ្សែវីដេអូដែលថតដោយអ្នកជំនាញឡើងភ្នំមួយក្រុម បានផ្តល់នូវការមើលឃើញដែលមិនធ្លាប់មានពីមុនមកដ៏គួរឱ្យស្ញប់ស្ញែង និងកោតសរសើរចំពោះដំណើរផ្សងព្រេងដ៏លំបាករបស់ទៅគេទៅលើកំពូលភ្នំកម្ពស់ខ្ពស់មួយនេះ។

យោងតាមគណនី @aelzarka គឺបានធ្វើការបង្ហោះវីដេអូរបស់ខ្លួននៅលើសង្គម X ដែលទទួលបានការចូលមើលជាង ២៧០K ក៏បានធ្វើអ្នកនិយមលេងអ៊ីនធើណែតចូលមកបញ្ចេញមតិជាមួយនឹងអារម្មណ៍ចម្រុះជាច្រើន។ អ្នកខ្លះបានបង្ហាញទាំងការកោតសរសើរចំពោះភាពក្លាហាន និងភាពប៉ិនប្រសប់ផ្នែកបច្ចេកទេសនៃក្រុមដែលបានបានផ្តឹតយកនូវទិដ្ឋភាពជាមួយកាមេរ៉ា ៣៦០ ដឺក្រេ ឲ្យមើលឃើញនូវភាពស្រស់ស្អាតអស្ចារ្យនៃភ្នំហិមាល័យនេះ អមជាមួយនឹងភាពស្រៀវស្រាញនៃកំពូលភ្នំដ៏ខ្ពស់នេះ។

ទោះជាយ៉ាងណា ព្រមជាមួយនឹងអារម្មណ៍នៃភាពអស្ចារ្យ ខ្សែវីដេអូនេះក៏បានបង្កឲ្យមានការលើកឡើងអំពីគ្រោះថ្នាក់ និងបញ្ហាប្រឈមដែលអ្នកឡើងភ្នំជួបប្រទះនៅលើភ្នំអេវឺរេសផងដែរ ព្រោះថាពួកគេត្រូវប្រើប្រាស់រយៈពេលវែងឆ្ងាយសម្រាប់ឡើងលើភ្នំដ៏ខ្ពស់និងទំហំធំនេះ។ ម៉្យាងវិញទៀត ក៏នៅមានបញ្ហាអាកាសធាតុដែលមិនអាចទាយទុកជាមុនបាន ដែលជាហានិភ័យអាចនឹងកើតមានដោយចៃដន្យសម្រាប់ពួកគេផងដែរ៕

ប្រទេសចិន៖ ហាងកាហ្វេមួយកន្លែងនៅក្នុងប្រទេសចិនបានចេញមីនុយថ្មីជាមួយនឹងការលក់កាហ្វេទឹកកករសជាតិម្ទេស កំពុងទាក់ទាញការចាប់អារម្មណ៍ខ្លាំងនៅក្នុងប្រទេសចិន ដោយភេសជ្ជៈប្លែកៗនេះលក់បានរហូតដល់ ៣០០ ពែងក្នុងមួយថ្ងៃ។
កាលពីថ្ងៃទី៥ ខែកុម្ភៈ ឆ្នាំ២០២៤ យោងតាម South China Morning Post បានឱ្យដឹងថា ហាងកាហ្វេ Jingshi ស្ថិតនៅទីក្រុង Ganzhou ខេត្ត Jiangxi ភាគខាងកើតប្រទេសចិន បានបើកដំណើរការឡាតេហឹរតាំងពីខែធ្នូឆ្នាំមុនមកម្លេះ ប៉ុន្តែមីនុយកាហ្វេនេះទើបតែពេញនិយមខ្លាំងនាពេលថ្មីៗនេះនៅក្នុងប្រទេសចិន ដោយលក់បានរហូតដល់ ៣០០ ពែងក្នុងមួយថ្ងៃ។

យោងតាមវីដេអូឃ្លីបដ៏ល្បីមួយនៅលើ Douyin បានបង្ហាញឱ្យឃើញថា បុគ្គលិករបស់ហាងបានដាក់ម្ទេសហាន់ចូលទៅក្នុងពែងឡាតេទឹកកក បន្ទាប់មកចាក់ម្សៅម្ទេសចូលទៅក្នុងភេសជ្ជៈមុនពេលបម្រើដល់អតិថិជន។ កាហ្វេទឹកកករសជាតិម្ទេស ឬកាហ្វេហឹរ ជាទូទៅមានតម្លៃប្រហែល ២០ យន់ (ប្រមាណ ២.៨០ ដុល្លារអាមេរិក) ក្នុងមួយពែង ហើយត្រូវបានគេហៅថា Jiangxi Spicy Latte ។ កាហ្វេពិសេសពី Jingshi Coffee នេះបានបំពេញតាមរសជាតិរបស់អតិថិជននៅតំបន់អាហារដែលមានរសជាតិហិរបំផុតក្នុងប្រទេសចិន ដូច្នេះហើយតែងតែមានមនុស្សជាច្រើនមករីករាយជាមួយវាជារៀងរាល់ថ្ងៃ។

អតិថិជនភាគច្រើនបន្ទាប់ពីរីករាយជាមួយភេសជ្ជៈនេះបានផ្តល់មតិវិជ្ជមានថា “ខ្ញុំមិនគិតថាវាហឹរខ្លាំងទេ ផ្ទុយទៅវិញវាមានរសជាតិឆ្ងាញ់ ហើយកាហ្វេនេះមិនចម្លែកដូចមនុស្សគិតនោះទេ»។ អ្នកខ្លះទៀតក៏និយាយថា “ឡាតេថ្មីនេះមិនអាក្រក់ទេ វាមានរសជាតិហឹរ និងផ្អែមបន្តិច “។គួរបញ្ជាក់ដែរថា នេះមិនមែនជាមីនុយប្លែកជាងគេនោះទេ ការរួមផ្សំប្រកបដោយការច្នៃប្រឌិតនៃកាហ្វេ និងរសជាតិកម្របានបង្ហាញខ្លួននៅទូទាំងប្រទេសចិនក្នុងរយៈពេលប៉ុន្មានឆ្នាំចុងក្រោយនេះ។ នៅខែកញ្ញា ឆ្នាំ ២០២៣ មនុស្សជាច្រើនបានរង់ចាំជាជួរអស់រយៈពេលជាច្រើនម៉ោង ដើម្បីទិញកាហ្វេប្រភេទថ្មីលាយជាមួយស្រា Maotai។

ក្នុងឆ្នាំដដែលនោះ ហាងកាហ្វេមួយកន្លែងក្នុងខេត្ត Zhejiang បានលាយពងមាន់ដុតជាមួយកាហ្វេឡាតាំង ហើយហាងជាច្រើនទៀតមិនយូរប៉ុន្មានក៏ធ្វើតាម។ នៅឆ្នាំ ២០២១ ហាងកាហ្វេមួយនៅក្នុងខេត្ត Shanxi ក៏បានបន្ថែមទឹកខ្មេះទៅកាហ្វេ Americano របស់ខ្លួនផងដែរ ដោយសារតំបន់នេះល្បីល្បាញសម្រាប់ផលិតផលទឹកខ្មេះ ហើយមនុស្សជាច្រើនចូលចិត្តជ្រលក់អ្វីគ្រប់យ៉ាងនៅក្នុងអាហាររបស់ពួកគេជាមួយនឹងទឹកខ្មេះ៕

ប្រទេសឥណ្ឌូណេស៊ី ៖ ភ្ញៀវទេសចរបរទេសគ្រប់រូប រួមទាំងកុមារផងដែរ នឹងត្រូវចំណាយប្រាក់ក្នុងម្នាក់ចំនួន១៥ម៉ឺនរូពី (ឬស្មើជិត១០ដុល្លារអាមេរិក) សម្រាប់បង់ពន្ធទេសចរណ៍ នៅពេលពួកគេមកកម្សាន្តនៅកោះបាលីដ៏ល្បីល្បាញរបស់ប្រទេសឥណ្ឌូណេស៊ី រួមទាំងកោះតូចៗនៅជុំវិញកោះបាលីផងដែរ គិតចាប់ពីថ្ងៃទី១៤ ខែកុម្ភៈ ឆ្នាំ២០២៤ តទៅ ។ ការតម្រូវឱ្យភ្ញៀវទេសចរបរទេសបង់ពន្ធនេះ គឺឥណ្ឌូណេស៊ីនឹងយកប្រាក់នេះទៅប្រើប្រាស់លើការកែលម្អសេវាកម្មទេសចរណ៍ និងថែទាំបរិស្ថាន ។

Tjok Bagus Pemayun នាយកគ្រប់គ្រងផ្នែកទេសចរណ៍ប្រចាំកោះបាលីលើកឡើងថា ការទូទាត់ថ្លៃសេវាទេសចរណ៍នេះ ភ្ញៀវទេសចរបរទេសត្រូវទូទាត់ប្រាក់នៅអាកាសយានដ្ឋានឥណ្ឌូណេស៊ី ហើយពួកគេអាចចំណាយពេលវេលាមិនលើសពី២៣វិនាទីទេ ។

បើតាមព័ត៌មានចុងក្រោយរបស់មន្ត្រីឥណ្ឌូណេស៊ីបញ្ជាក់ថា ភ្ញៀវទេសចរបរទេសនឹងត្រូវបង់ពន្ធទេសចរណ៍តាមគេហទំព័រ Love Bali ឬក្នុងកម្មវិធីទេសចរណ៍ មុនពេលពួកគេធ្វើដំណើរទៅកាន់កោះបាលី ។ ក្រោយពេលពួកគេទូទាត់ប្រាក់រួចហើយ ពួកគេនឹងទទួលបានប័ណ្ណធ្វើដំណើរតាមអ៊ីម៉ែល បន្ទាប់មក ត្រូវថតប័ណ្ណនេះទុកក្នុងទូរស័ព្ទដៃសម្រាប់ការស្កេនពេលធ្វើដំណើរមកដល់អាកាសយានដ្ឋាន ឬកំពង់ផែកោះបាលី ។

មន្ត្រីប្រចាំកោះបាលីបញ្ជាក់ថា ប្រទេសឥណ្ឌូណេស៊ីនឹងប្រមូលប្រាក់បង់ពន្ធទេសចរណ៍នេះសម្រាប់ការកែលម្អ និងធ្វើឱ្យប្រសើរឡើងនូវសេវាកម្មទេសចរណ៍, ការថែរក្សាវប្បធម៌កោះបាលី និងការការពារបរិស្ថាននៅលើកោះផងដែរ ។

គួរបញ្ជាក់ថា កោះបាលី គឺជាតំបន់ទេសចរណ៍មួយដ៏ពេញនិយមរបស់ភ្ញៀវទេសចរនៅទូទាំងពិភពលោក ប៉ុន្តែរយៈពេលច្រើនឆ្នាំកន្លងមកនេះ កោះបាលីបានប្រឈមនឹងបញ្ហាការបំពុលបរិយាកាសជាច្រើន ជាពិសេស សំរាមផ្លាស្ទិកនៅតាមឆ្នេរសមុទ្រ ។

លើសពីនេះ ភាពតានតឹងរវាងពលរដ្ឋឥណ្ឌូណេស៊ីរស់នៅក្នុងតំបន់ និងជនបរទេស ក៏កើនឡើងខ្លាំងផងដែរ ដោយសារមានកំណើនភ្ញៀវទេសចរមកកម្សាន្តនៅកោះបាលី ជាពិសេស ភ្ញៀវទេសចរខ្វះគុណភាព, ចូលចិត្តបង្កបញ្ហា, បំផ្លាញតំបន់ទេសចរណ៍ដ៏សំខាន់, បើកបរយានជំនិះក្នុងអំឡុងពេលស្រវឹង និងបង្កបញ្ហាផ្សេងទៀត ។

នៅឆ្នាំ២០២៤ មន្ត្រីឥណ្ឌូណេស៊ីបានកំណត់គោលដៅថា នឹងមានភ្ញៀវទេសចរបរទេសមកកម្សាន្តនៅកោះបាលី ប្រមាណ៧លាននាក់ កើនឡើងពីចំនួន៥លាន២សែននាក់ នៅឆ្នាំ២០២៣ ។ ចំណែករដ្ឋាភិបាលរំពឹងថា នឹងមានភ្ញៀវទេសចរបរទេសមកប្រទេសឥណ្ឌូណេស៊ី សរុបប្រមាណ១៤លាននាក់នៅឆ្នាំ២០២៤ និងផ្តល់ប្រាក់ចំណូលយ៉ាងច្រើនចូលជាតិ ៕

ប្រទេសចិន៖ ក្រុមហ៊ុន China Mobile របស់ប្រទេសចិន បានសម្រេចនូវរបកគំហើញបច្ចេកវិទ្យាដ៏សំខាន់មួយ នៅពេលដែលវាបានបាញ់បង្ហោះដោយជោគជ័យនូវផ្កាយរណបដំបូងគេរបស់ពិភពលោក ដែលត្រូវបានរចនាឡើងដើម្បីសាកល្បងបណ្តាញ 6G ។

កាលពីថ្ងៃទី៥ ខែកុម្ភៈ ឆ្នាំ២០២៤ យោងតាម China Daily បានឱ្យដឹងថា ក្រុមហ៊ុនទូរគមនាគមន៍ចិន China Mobile ដែលជាប្រតិបត្តិករបណ្តាញដ៏ធំបំផុតរបស់ពិភពលោកទាក់ទងនឹងចំនួនអ្នកជាវទូរស័ព្ទចល័តបានបាញ់បង្ហោះដោយជោគជ័យនូវផ្កាយរណបដំបូងគេរបស់ពិភពលោកដែលត្រូវបានរចនាឡើងដើម្បីសាកល្បងបច្ចេកវិទ្យាបណ្តាញ 6G ដែលជាព្រឹត្តិការណ៍ដ៏សំខាន់មួយក្នុងកិច្ចខិតខំប្រឹងប្រែងដើម្បីស្វែងយល់ពីបច្ចេកវិទ្យាទំនាក់ទំនងក្នុងលំហ និងដីរួមបញ្ចូលគ្នា។

ផ្កាយរណបសាកល្បងគន្លងផែនដីទាបនេះគឺជាផ្កាយរណបដំបូងគេរបស់ពិភពលោកដែលប្រើប្រាស់បច្ចេកវិទ្យាបណ្តាញ 6G ហើយវាត្រូវបានបាញ់បង្ហោះដោយជោគជ័យកាលពីថ្ងៃទី ៣ ខែកុម្ភៈ ឆ្នាំ២០២៤ រួមជាមួយនឹងផ្កាយរណបមួយផ្សេងទៀតដែលបំពាក់ដោយបច្ចេកវិទ្យា 5G ពីក្រុមហ៊ុនចិន China Mobile ។ ប្រព័ន្ធនេះត្រូវបានបង្កើតឡើងដោយក្រុមហ៊ុន China Mobile និងវិទ្យាស្ថាន Microsatellite Innovation នៃបណ្ឌិត្យសភាវិទ្យាសាស្ត្រចិន។

ក្រុមហ៊ុន China Mobile បាននិយាយថា ប្រព័ន្ធនេះប្រើប្រាស់ផ្នែកទន់ និងផ្នែករឹងក្នុងស្រុក គាំទ្រការបង្កើតឡើងវិញនូវកម្មវិធីនៅលើគន្លង ការដាក់ពង្រាយដែលអាចបត់បែនបាននៃមុខងារបណ្តាញស្នូល និងការគ្រប់គ្រងដោយស្វ័យប្រវត្តិ ការកែលម្អប្រសិទ្ធភាពនិងភាពជឿជាក់ក្នុងប្រតិបត្តិការនៃបណ្តាញស្នូលផ្កាយរណបក្នុងគន្លង។ ដាក់នៅរយៈកម្ពស់គន្លងប្រហែល ៥០០km ផ្កាយរណបសាកល្បងទាំងនេះផ្តល់នូវអត្ថប្រយោជន៍ជាច្រើនដូចជា latency ទាប និងល្បឿនបញ្ជូនទិន្នន័យខ្ពស់ បើប្រៀបធៀបទៅនឹងផ្កាយរណបគន្លងកម្ពស់ខ្ពស់នៅរយៈកម្ពស់ ៣៦,០០០km។

យោងតាមក្រុមហ៊ុន China Mobile បានឱ្យដឹងទៀតថា ផ្កាយរណបក្នុងគន្លងផែនដីទាបត្រូវបានដាក់ជាវេទិកាដ៏សំខាន់សម្រាប់បណ្តាញអវកាស និងបណ្តាញដីរួមបញ្ចូលគ្នានាពេលអនាគត។ ផ្កាយរណបប្រភេទនេះអាចដោះស្រាយភាពទន់ខ្សោយនៃរលកសញ្ញាទូរគមនាគមន៍នៃបណ្តាញទូរស័ព្ទចល័តនៅលើដី ខណៈពេលដែលផ្តល់សេវាអ៊ីនធឺណិតតាមផ្កាយរណបកម្រិតបញ្ជូនខ្ពស់នៅទូទាំងពិភពលោក។ ក្រុមហ៊ុន China Mobile បានបន្ថែមថា ខ្លួនគ្រោងនឹងធ្វើការពិសោធន៍ក្នុងគន្លងតារាវិថី ដោយផ្អែកលើផ្កាយរណបសាកល្បងទាំងនេះ ដោយបង្កើនល្បឿននៃការធ្វើសមាហរណកម្ម និងការអភិវឌ្ឍន៍ឧស្សាហកម្មបច្ចេកវិទ្យាអវកាស-ដី៕