ប្រទេសចិន៖ ពិធីបុណ្យចូលឆ្នាំថ្មី នៅសល់មិនដល់មួយសប្តាហ៍ទៀតទេ ហើយប្រជាជនក្នុងប្រទេសជាច្រើននៅតែដើរទិញឥវ៉ាន់យ៉ាងសកម្ម ដើម្បីត្រៀមក្នុងឱកាសបុណ្យចូលឆ្នាំខាងមុខនេះ។ វត្ថុដ៏ពេញនិយមបំផុតមួយនៅក្នុងប្រទេសចិនក្នុងឱកាសនេះគឺគ្រឿងអលង្ការមាស នេះបើយោងតាមសមាគមមាសរបស់ប្រទេសចិន ការប្រើប្រាស់មាសក្នុងប្រទេសនេះបានលើសពី ១០០០ តោនឯណោះក្នុងឆ្នាំ ២០២៣។

កាលពីថ្ងៃទី៥ ខែកុម្ភៈ ឆ្នាំ២០២៤ យោងតាមសារព័ត៌មានអន្តរជាតិមួយបានឱ្យដឹងថា នៅផ្សារទំនើប Yuyuan ក្រុងសៀងហៃ តូបលក់មាសគឺមានការមមាញឹកខ្លាំងណាស់ ខណៈបុណ្យចូលឆ្នាំជិតចូលមកដល់។ មនុស្សជាច្រើនបានមកទីនេះដើម្បីទិញទំនិញមិនមែនសុទ្ធតែអ្នកនៅក្រុងសៀងហៃនោះទេ គឺមានអ្នកទេសចរ និងប្រជាជននៅតាមតំបន់នានាផងដែរ។

យោងតាមសមាគមមាសរបស់ប្រទេសចិន ការប្រើប្រាស់មាសក្នុងប្រទេសបានលើសពី ១,០០០ តោនកាលពីឆ្នាំមុន។ ជាពិសេស ប្រាក់ចំណូលគ្រឿងអលង្ការមាសរបស់ក្រុមហ៊ុនបានកើនឡើងប្រមាណ ៨%។ ភាពទាក់ទាញនៃមាសគឺមិនត្រឹមតែដោយសារតែរូបរាងទាក់ទាញរបស់វាប៉ុណ្ណោះទេប៉ុន្តែក៏មកពីតម្រូវការដើម្បីសន្សំប្រាក់ផងដែរ។

លោក Wang Lixin នាយកប្រតិបត្តិនៃក្រុមប្រឹក្សាមាសពិភពលោកនៅក្នុងប្រទេសចិនបាននិយាយថា “បើប្រៀបធៀបទៅនឹងទ្រព្យសកម្មផ្សេងទៀតជាច្រើន ការទិញមាសនាពេលបច្ចុប្បន្នគឺទទួលបានផលចំណេញតិចតួច។ ដូច្នេះហើយ ទោះបីជាតម្លៃគ្រឿងអលង្ការមាសកើនឡើងខ្ពស់បន្តិចក្នុងឆ្នាំនេះក៏ដោយ ក៏យុវវ័យជាច្រើននៅតែចង់ទិញវាដើម្បីទុកជាមធ្យោបាយសន្សំ»។

គួរបញ្ជាក់ដែរថា ចាប់តាំងពីចុងឆ្នាំមុនមក សេដ្ឋកិច្ចរបស់ប្រទេសចិនបានមើលឃើញសញ្ញាវិជ្ជមានជាច្រើន ជាពិសេសកំណើននៃការចំណាយរបស់អ្នកប្រើប្រាស់។ ដូច្នេះហើយ អាជីវកម្មគ្រឿងអលង្ការមាសអាចរំពឹងថានេះនឹងក្លាយជារដូវកាលដ៏ជោគជ័យសម្រាប់ពួកគេក្នុងអំឡុងពិធីបុណ្យចូលឆ្នាំថ្មីខាងមុខនេះ៕

បរទេស៖ នាវាមុជទឹកគ្មានមនុស្សបើកប្រវែង ៧ ម៉ែត្រដែលមានឈ្មោះថា Ran បានបាត់ខ្លួនយ៉ាងអាថ៌កំបាំងនៅក្រោមផ្ទាំងទឹកកកអង់តាក់ទិកក្នុងអំឡុងពេលបេសកកម្មជាមួយនាវាបំបែកទឹកកកកូរ៉េ RV/IB Araon ។
យានជំនិះក្រោមទឹកនេះត្រូវបានគ្រប់គ្រងដោយសាកលវិទ្យាល័យ Gothenburg គឺជាយានដែលមានសមត្ថភាពខ្ពស់បំផុតមួយក្នុងចំណោមយានជំនិះចំនួនបីនៅលើពិភពលោក ដែលត្រូវបានប្រើសម្រាប់ការស្រាវជ្រាវ និងរួមចំណែកដល់ចំណេះដឹងសំខាន់ៗជាច្រើននៅក្នុងសមុទ្រ។

Ran គឺជាយានជំនិះក្រោមទឹកគ្មានមនុស្សបើក (AUV) ដែលផ្ទុកទៅដោយបច្ចេកវិទ្យាទំនើប និងឧបករណ៍ចាប់សញ្ញាដែលអាចវាស់ស្ទង់ និងកត់ត្រាជុំវិញនៅក្នុងទឹក។ វាមានសមត្ថភាពអនុវត្តបេសកកម្មរយៈពេលវែងក្រោមទឹកកក ហើយត្រូវបានប្រើប្រាស់ដោយជោគជ័យនៅអង់តាក់ទិក ក្នុងចំណោមកន្លែងផ្សេងៗទៀត។
ទោះជាយ៉ាណា នាវាមុជទឹកនេះបានបាត់ខ្លួនដោយមិនដឹងមូលហេតុ អស់រយៈពេល ១ សប្តាហ៍ហើយនៅតែរកមិនឃើញ។ ការបាត់ខ្លួនរបស់ Ran គឺនៅក្នុងអំឡុងពេលនៃការមុជទឹកក្រោមទឹកកកក្រាស់ ២០០ – ៥០០ ម៉ែត្រ ដោយ Ran មិនបានបន្តទំនាក់ទំនងជាមួយកប៉ាល់ស្រាវជ្រាវ RV/IB Araon ទេ។

ក្រុមអ្នកស្រាវជ្រាវបាននិយាយថា “ការរកនាវាមុជទឹក Ran ដូចជាការស្វែងរកម្ជុលនៅក្នុងវាលស្មៅ ដោយមិនដឹងថាបាតនៅទីណា។ នៅពេលនេះ Ran អស់ថ្ម យើងដឹងទាំងអស់ថា នឹងមានរឿងចម្លែកបានកើតឡើងនៅក្រោមទឹកកក។ យើងក៏គិតដែរថា នាវាមុជទឹកនេះនឹងមានបញ្ហាអ្វីមួយបានរារាំងវាមិនឱ្យរត់គេចខ្លួនបាន»។
សាស្រ្តាចារ្យ Anna Wahlin នៅសាកលវិទ្យាល័យ Gothenburg បាននិយាយថា “ការបាត់បង់ Ran នៅក្នុងសមុទ្រទឹកកកនេះគឺអាចធ្វើឱ្យយើងពិបាកក្នុងការស្រាវជ្រាវសមុទ្របន្តទៀត” ព្រោះ Ran គឺមានតែមួយគត់នៅក្នុងពិភពលោក និងមានតម្លៃដ៏អស្ចារ្យសម្រាប់ការស្រាវជ្រាវអន្តរជាតិ។

យានជំនិះក្រោមទឹកគ្មានមនុស្សបើកនេះ បានក្លាយជាអ្នកស្រាវជ្រាវសមុទ្រទឹកកកដំបូងគេក្នុងពិភពលោកតាំងពីឆ្នាំ ២០១៩។ វាបានឃើញការរលាយ និងការផ្លាស់ទីលំនៅរបស់ទឹកកកពីទិន្នន័យផ្កាយរណប ដោយទទួលបានរូបភាពជិតស្និទ្ធនៃតំបន់ខាងក្រោមទឹកកក និងព័ត៌មានអំពីយន្តការពិតប្រាកដនៅពីក្រោយការរលាយ។ លោក Anna Wahlin បានបន្តទៀតថា យើងដឹងរួចហើយថាឧប្បត្តិហេតុបែបនេះអាចនឹងកើតឡើងនៅថ្ងៃណាមួយ ហើយក៏ជាទីបញ្ចប់សម្រាប់ Ran ដែរ។ ដូច្នេះហើយការបាត់បង់វាគឺធំធេងណាស់ ប៉ុន្តែទោះជាយ៉ាងណាក៏ដោយ ក្រុមស្រាវជ្រាវគ្រោងនឹងរកវិធីដើម្បីជំនួស Ran នាពេលអនាគត៕

តើដឹងឬទេថា នៅពេលយើងឆ្លុះកញ្ចក់យូរ វាគួរឱ្យភ័យខ្លាចយ៉ាងខ្លាំង? កាលពីឆ្នាំ២០១០ លោក ជីអរវ៉ាណូ ខាពូតូ ជាអ្នកចិត្តវិទ្យាជនជាតិអ៊ីតាលី បានសាកល្បងឱ្យអ្នកស្ម័គ្រចិត្តចំនួន៥០នាក់ ឆ្លុះកញ្ចក់រយៈពេល១០នាទី ហើយលទ្ធផលដែលគាត់ទទួលបាន គឺមនុស្សភាគច្រើនបានឃើញមុខរបស់ខ្លួនផ្លាស់ប្តូរមិនដូចពីមុន, ឃើញសត្វចម្លែកគួរឱ្យខ្លាច ឬឃើញមុខរបស់អ្នកបាត់បង់ជីវិតនៅក្នុងកញ្ចក់ ។

អ្នកចិត្តវិទ្យាអ៊ីតាលីបញ្ជាក់ថា វាបណ្តាលមកពីខួរក្បាលរបស់ពួកគេមិនអាចផ្តោតទៅលើអ្វីច្រើនយ៉ាងក្នុងពេលតែមួយបាន ហើយវាធ្វើឱ្យពួកគេមើលឃើញអ្វីដែលកំពុងគិតក្នុងចិត្ត ដូចជា ៖ ការមើលឃើញខ្មោច ឬព្រាយបិសាច ។ ហេតុនេះ យើងមិនគួរភ័យខ្លាចនៅពេលឆ្លុះកញ្ចក់នៅកន្លែងងងឹតទេ ។

ជាទូទៅ អ្នកកើតជំងឺខ្លាចកញ្ចក់ (Catoptrophobi) តែងតែមានអាការៈភ័យខ្លាចស្រមោលខ្លួនឯង ឬខ្លាចស្រមោលផ្សេងៗនៅក្នុងកញ្ចក់ ។ ហេតុនេះ ពួកគេតែងដើរគេចពីកញ្ចក់ ឬគេចពីវត្ថុផ្សេងទៀតដែលបង្ហាញស្រមោលចេញមក ។

*មូលហេតុនៃការខ្លាចកញ្ចក់ ៖
ជំងឺខ្លាចកញ្ចក់អាចបណ្តាលមកពីកត្តាជាច្រើន ប៉ុន្តែវាដូចគ្នានឹងជំងឺខ្លាចទូទៅដែរ ។ ជំងឺនេះភាគច្រើនកើតឡើងដោយសារហេតុការណ៍ប៉ះពាល់ផ្លូវចិត្តខ្លាំង, ខួរក្បាលធ្វើការខុសប្រក្រតី, បរិស្ថាននៅជុំវិញ ឬមនុស្សមួយចំនួនក៏អាចមានបញ្ហាសង្គមផងដែរ ដូចជា ៖ គ្មានទំនុកចិត្តលើខ្លួនឯង ។ រីឯអ្នកខ្លះទៀតអាចមានអាការៈ Spectrophobia ដែលបានកើតឡើងពេលនៅវ័យកុមារធ្លាប់ខ្លាចអ្នកណាម្នាក់នៅក្នុងកញ្ចក់ ។

ប្រសិនបើយើងវិភាគឱ្យលម្អិតបន្តិចឃើញថា ការភ័យខ្លាចស្រមោលនៅក្នុងកញ្ចក់ គឺមានច្រើនប្រភេទ ដូចជា ៖ មនុស្សមួយចំនួនមានអារម្មណ៍មិនសប្បាយចិត្ត និងមិនចូលចិត្តឃើញរូបភាពក្នុងកញ្ចក់ ដោយសារមើលទៅខុសពីការពិត ។ រីឯមនុស្សមានភាពខុសប្រក្រតីផ្នែករាងកាយ ក៏ខ្លាចភ័យផងដែរនៅពេលពួកគេឃើញរូបរាងខ្លួនឯងក្នុងកញ្ចក់ ខណៈមនុស្សខ្លះទៀតខ្លាចកញ្ចក់ ដោយសារមានជំនឿថា មានវិញ្ញាណទាក់ទងនឹងកញ្ចក់ ។

*រោគសញ្ញានៃការភ័យខ្លាចកញ្ចក់ ៖
អ្នកកើតជំងឺនេះតែងតែព្យាយាមចៀសវាងឆ្លុះកញ្ចក់ ឬមិនហ៊ានមើលវត្ថុដែលមានស្រមោលត្រឡប់មកវិញទេ ។ អ្នកខ្លះទៀតអាចបង្ហាញអាកប្បកិរិយាបារម្ភ និងការភ័យខ្លាចចេញមកក្រៅ ដូចជា ៖ ភ័យញ័រ, បែកញើស, បេះដូងលោតញាប់ និងភ័យស្លន់ស្លោ ជាដើម ។

តើគួរធ្វើដូចម្តេចនៅពេលយើងខ្លាចកញ្ចក់? បើយើងមានអារម្មណ៍ថា កញ្ចក់នឹងធ្វើឱ្យប៉ះពាល់ដល់ជីវិតរបស់យើងនោះ យើងគួរតែប្រឹក្សាយោបល់ជាមួយគ្រូពេទ្យ ដើម្បីស្វែងរកមូលហេតុ និងព្យាបាល ពីព្រោះជំងឺនេះកម្រកើតឡើងណាស់ ។

សរុបមក ជំងឺខ្លាចកញ្ចក់មិនមែនជាជំងឺគ្រោះថ្នាក់ខ្លាំងនោះទេ ហើយអ្នកជំងឺមួយចំនួនយល់ឃើញថា ការប្រឈមមុខដាក់គ្នា ឬសូម្បីតែការគិតអំពីការប្រឈមមុខនឹងស្ថានការណ៍គួរឱ្យភ័យខ្លាច បានធ្វើឱ្យពួកគេភ័យស្លន់ស្លោ និងបារម្ភយ៉ាងខ្លាំង ។ ហេតុនេះ ដំណោះស្រាយដើម្បីការពារជំងឺខ្លាចកញ្ចក់ គឺត្រូវព្យាយាមបង្កើតទំនុកចិត្តលើខ្លួនឯង និងបន្ធូរអារម្មណ៍នៅពេលប្រឈមមុខជាមួយស្ថានការណ៍ដែលធ្លាប់ខ្លាចពីមុន ឬទៅព្យាបាលផ្លូវចិត្ត ៕

ក្នុងឱកាសបុណ្យចូលឆ្នាំចិនខាងមុខនេះ ទំនៀមទំលាប់របស់ប្រជាជនចិនត្រូវបានគេចាត់ទុកជាទំនៀមទំលាប់ដើម្បីលើកតម្កើងលាភសំណាង ក៏ដូចជាបង្កើនសុភមង្គល និងទ្រពសម្បត្តិរបស់អ្នកពេញមួយឆ្នាំ ដោយប្រជាជនចិនតែងតែអនុវត្តទម្លាប់ទាំងនេះពីមួយជំនាន់ទៅមួយជំនាន់ផងដែរ ។ ដូច្នេះហើយ តើទំនៀមទម្លាប់អ្វីខ្លះដែលប្រជាជនចិនចូលចិត្តធ្វើក្នុងថ្ងៃចូលឆ្នាំថ្មី?

១.សែនដង្វាយដល់ព្រះ ដូនតា និងវត្ថុស័ក្តសិទ្ធ៖ ដំណើរការដ៏សំខាន់បំផុតមួយនៃ “បុណ្យចូលឆ្នាំចិន” គឺការគោរពដល់បុព្វបុរស វត្ថុពិសិដ្ឋ ព្រោះការថ្វាយបង្គំព្រះជាអ្វីដែលនៅជាមួយជនជាតិចិនជាយូរមកហើយ។ គ្រប់គ្រួសារនឹងរៀបចំដង្វាយរួមមានអាហារប្រៃ អាហារផ្អែម និងផ្លែឈើល្អៗ ដើម្បីប្រើប្រាស់ជាតង្វាយក្នុងឱកាសបុណ្យចូលឆ្នាំចិន ដែលត្រូវជាថ្ងៃសុក្រ ទី៩ ខែកុម្ភៈ ឆ្នាំ២០២៤។

២.ការឱ្យអាំងប៉ាវ៖ ការផ្តល់ស្រោមសំបុត្រក្រហម ឬគេហៅថាឱ្យអាំងប៉ាវ គឺជាអំណោយដែលមនុស្សចាស់ ឬមនុស្សធំ ឱ្យទៅមនុស្សដែលក្មេងជាងអ្នក។ សម្រាប់កូនៗ ឬចៅៗ ដែលទទួលបានអាំងប៉ាវពីសាច់ញាតិចាស់ទុំ ពួកគេត្រូវនិយាយពាក្យជូនពរទៅកាន់ចាស់ទុំថា ដែលមានន័យថា សូមឱ្យឆ្នាំថ្មីនេះ សម្រេចបាននូវរាល់បំណងប្រាថ្នារបស់អ្នក និងមានភាពចម្រុងចម្រើនជាដើម។

៣.ស្លៀកសម្លៀកបំពាក់ថ្មីៗ៖ ការស្លៀកសម្លៀកបំពាក់ពណ៌ភ្លឺថ្មីគឺដូចជាមានតែរឿងថ្មីៗ និងរឿងល្អៗក្នុងជីវិតពេញមួយឆ្នាំ ដែលពណ៌ពេញនិយមជាងគេគឺ “ក្រហម” មានន័យថា លាភសំណាង និងទ្រព្យសម្បត្តិ។

៤.ជួបជុំញាតិមិត្តគ្រួសារ៖ កិច្ចការដែលត្រូវធ្វើ និងចាត់ទុកថាមានសារៈសំខាន់បន្ទាប់ គឺការជួបជុំគ្រួសារ ព្រោះថ្ងៃចូលឆ្នាំចិនត្រូវបានគេចាត់ទុកជាថ្ងៃសម្រាប់ការជួបជុំបងប្អូនគ្រួសារ ញ៉ាំអាហាររួមតុជាមួយគ្នាជាដើម។

៥.ញ៉ាំអាហារបួស៖ នៅថ្ងៃចូលឆ្នាំចិន ប្រជាជនចិនតែងតែទទួលទានអាហាបួសនៅពេលព្រឹកដំបូងនៃថ្ងៃចូលឆ្នាំ ព្រោះគេជឿថាឆ្នាំថ្មីគួរតែចាប់ផ្តើមជាមួយរឿងល្អៗ ហើយការទទួលទានអាហារបួសជាអាហារដំបូង គឺជាវិធីដ៏ល្អបំផុតដើម្បីចាប់ផ្តើមឆ្នាំថ្មី ព្រោះអ្នកបួសទាំងអស់នឹងពេញចិត្តតាំងពីអាហារដំបូង។

ទោះជាយ៉ាងណា សម្រាប់តំណមដែលអ្នកមិនគួរធ្វើក្នុងថ្ងៃបុណ្យចូលឆ្នាំចិនរួមមាន៖
– ហាមបោសផ្ទះ
-ហាមបោកខោអាវ
-ហាមទិញស្បែកជើងថ្មី
-ហាមមិនអោយជេរ ឬវ៉ៃគ្នា
-បំណុលប៉ុន្មាន ត្រូវសងឱ្យអស់
-ហាមធ្វើឱ្យរបស់បែកបាក់
-ហាមកក់ ឬកាត់សក់
-ហាមបរិភោគបបរ
-ហាមប្រើប្រាស់របស់មុតស្រួច
-ហាមស្លៀកសម្លៀកបំពាក់ពណ៌ខ្មៅ
– ហាមចូលបន្ទប់អ្នកដ៏ទៃ៕

នៅយប់ថ្ងៃទី៤ ខែកុម្ភៈ វគ្គផ្តាច់ព្រ័ត្រនៃកម្មវិធីប្រកួត Miss Tiffany’s Universe លើកទី២៥ បានប្រព្រឹត្តទៅនៅទីក្រុងបាងកក ដោយមានការចូលរួមពីបេក្ខនារីចំនួន ៣០ នាក់ រកឃើញម្ចាស់មកុដហើយគឺបានទៅលើ Saruda Panyakham មកពីឈៀងម៉ៃ។ អ្វីដែលធ្វើឱ្យមហាជនទប់សំណើចមិនបាននោះគឺសកម្មភាពរបស់នាងនៅពេលដែលកម្មវិធីប្រកួតប្រកាសថានាងគឺជាម្ចាស់មកុដ។

សកម្មភាពរបស់ Saruda បានធ្វើឱ្យទស្សនិកជន និងបេក្ខនារីផ្សេងទៀតសើចឡើងហូរទឹកភ្នែកជាមួយនឹងការអបអរដ៏ពិសេសមួយ ។ ក្រោយដឹងលទ្ធផលចុងក្រោយថាខ្លួនឈ្នះ Saruda ទប់អារម្មណ៍មិនបានក៏ដួល និងដាល់ដីដើម្បីអបអរជ័យជម្នះរបស់ខ្លួន ។ នាងស្រក់ទឹកភ្នែក ហើយលើកដៃអរគុណម្តងហើយម្តងទៀត។ វាត្រូវចំណាយពេលបន្តិចសម្រាប់ Saruda ដើម្បីមានភាពស្ងប់ស្ងាត់ឡើងវិញ ហើយក្រោកឈរឡើងដើម្បីទទួលមកុដ។ ការប្រកួតឆ្នាំនេះធ្វើឡើងក្រោមប្រធានបទ «អនាគតគឺជារបស់អ្នក ពិភពលោកថ្មីដែលអ្នកកំណត់»។ ក្នុងរយៈពេលពីរខែចុងក្រោយនេះ បេក្ខនារីទទួលបានមេរៀនជាច្រើន ដើម្បីពង្រឹងសមត្ថភាពរបស់ពួកគេ និងឆ្លងកាត់ដំណើរការជ្រើសរើសដ៏លំបាកមួយ។

គួរបញ្ជាក់ថា Saruda Panyakham មានអាយុ ២៨ ឆ្នាំ កម្ពស់ ១.៧៨ ម៉ែត្រ ហើយបច្ចុប្បន្នជា ស្រ្តីកែភេទដំបូងគេដែលត្រូវបានគេទទួលធ្វើជាអ្នកបម្រើការលើយន្តហោះនៅ American Airlines ហើយនាងនឹងតំណាងឱ្យប្រទេសថៃក្នុងការប្រកួត Miss International Queen 2024 នៅទីក្រុង Pattaya ។ ក្រៅពីអាជីពបម្រើការងារនៅយន្តហោះនេះ Saruda ធ្វើជាតារាបង្ហាញម៉ូតផងដែរ ដោយនាងបានលេចមុខលើវិថីសិល្បៈធំៗក្នុងនិងក្រៅប្រទេសជាច្រើន៕ 

ប្រទេសថៃ ៖ នៅថ្ងៃទី៥ ខែកុម្ភៈ ឆ្នាំ២០២៤ សារព័ត៌មានថៃឈ្មោះ Thairath រាយការណ៍ថា លោក Srettha Thavisin នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានអញ្ជើញសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ធ្វើដំណើរទស្សនកិច្ចជាផ្លូវការនៅប្រទេសថៃ ក្នុងឋានៈជាភ្ញៀវរបស់រដ្ឋាភិបាលថៃ នៅថ្ងៃទី៧ ខែកុម្ភៈ នេះ ។ ដំណើរទស្សនកិច្ចនេះ គឺក្នុងគោលបំណងពង្រឹងកិច្ចសហការលើវិស័យផ្សេងៗ និងពង្រឹងទំនាក់ទំនងរវាងប្រទេសទាំងពីរ ។

នៅថ្ងៃទី៥ ខែកុម្ភៈ ឆ្នាំ២០២៤ លោក Chai Watcharong អ្នកនាំពាក្យទីស្តីការនាយករដ្ឋមន្ត្រីថៃលើកឡើងថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត នឹងធ្វើទស្សនកិច្ចជាផ្លូវការមកកាន់ប្រទេសថៃ នៅថ្ងៃទី៧ ខែកុម្ភៈ ឆ្នាំ២០២៤ ក្នុងឋានៈជាភ្ញៀវរបស់រដ្ឋាភិបាលថៃ តាមការអញ្ជើញរបស់លោកនាយករដ្ឋមន្ត្រី Srettha Thavisin ។

ការធ្វើដំណើរទស្សនកិច្ចជាផ្លូវការមកកាន់ប្រទេសថៃលើកនេះ គឺជាការមកកាន់ប្រទេសថៃជាលើកដំបូងរបស់នាយករដ្ឋមន្ត្រីនៃព្រះរាជាណាចក្រកម្ពុជា ។ វាជាឱកាសសម្រាប់ពង្រឹងកិច្ចសហការលើវិស័យផ្សេងៗ ដើម្បីជាប្រយោជន៍រួមគ្នារវាងប្រទេសកម្ពុជា និងថៃ ជាពិសេស ការអភិវឌ្ឍសេដ្ឋកិច្ចក្នុងតំបន់ព្រំដែន, ការបង្កើនទំហំពាណិជ្ជកម្ម និងការវិនិយោគ, ការលើកកម្ពស់ការតភ្ជាប់ផ្លូវដឹកជញ្ជូន និងជំរុញវិស័យទេសចរណ៍រួមគ្នា រួមទាំងការពង្រឹងទំនាក់ទំនងរវាងពលរដ្ឋប្រទេសទាំងពីរ ។

ចំណែកកាលវិភាគសំខាន់ៗរបស់នាយករដ្ឋមន្ត្រីនៃព្រះរាជាណាចក្រកម្ពុជា ក្នុងដំណើរទស្សនកិច្ចជាផ្លូវការនៅប្រទេសថៃ រួមមាន ៖ ជំនួបទ្វេភាគីជាមួយលោកនាយករដ្ឋមន្ត្រីថៃ, ការធ្វើជាសាក្សីក្នុងពិធីចុះហត្ថលេខាលើឯកសារសហការរវាងស្ថាប័ននានារបស់ប្រទេសកម្ពុជា និងថៃ, ការធ្វើសេចក្តីថ្លែងការណ៍រួមគ្នា ព្រមទាំងការទទួលទានអាហារថ្ងៃត្រង់ជាផ្លូវការ ។

ហេតុនេះ លោក Srettha Thavisin នាយករដ្ឋមន្ត្រីថៃ និងភរិយា នឹងធ្វើជាម្ចាស់ផ្ទះក្នុងការជជែកពិភាក្សាជាមួយប្រធានរដ្ឋសភា, ប្រធានសភាតំណាងរាស្ត្រ និងប្រធានព្រឹទ្ធសភា រួមទាំងធ្វើជាអធិបតីក្នុងពិធីបើកសិក្ខាសាលា ស្តីពីវិស័យអាជីវកម្មថៃ និងកម្ពុជា ។ នេះបើតាមការដកស្រង់តាមការចុះផ្សាយរបស់សារព័ត៌មានថៃឈ្មោះ Thairath ៕

កូរ៉េខាងជើង៖ ផលិផលដែលមានស្លាកថា Made in China បានជួយឱ្យសេដ្ឋកិច្ចរបស់ប្រទេសកូរ៉េខាងជើងងើបឡើងវិញកាលពីឆ្នាំមុន និងរកប្រាក់ចំណូលបាន ១៦៧ លានដុល្លារអាមេរិក ពីរោមភ្នែកក្លែងក្លាយដែលដាក់លក់ក្នុងហាងកែសម្ផស្សជុំវិញពិភពលោក។

យោងតាមទីភ្នាក់ងារព័ត៌មាន Reuters ដែលបានរាយការណ៍កាលពីថ្ងៃទី៤ ខែកុម្ភៈ ឆ្នាំ២០២៤ ថា ការកែច្នៃ និងការវេចខ្ចប់រោមភ្នែកក្លែងក្លាយរបស់កូរ៉េខាងជើង ដែលធ្វើឡើងដោយបើកចំហនៅក្នុងប្រទេសចិន ដែលជាដៃគូពាណិជ្ជកម្មដ៏ធំបំផុតរបស់ប្រទេសនេះ បានផ្តល់ឱ្យកូរ៉េខាងជើងនូវវិធីមួយដើម្បីគេចចេញពីការដាក់ទណ្ឌកម្មអន្តរជាតិ ដោយផ្តល់នូវប្រភពដ៏សំខាន់នៃរូបិយប័ណ្ណបរទេស។

ជាពិសេស ក្រុមហ៊ុនដែលមានមូលដ្ឋាននៅក្នុងប្រទេសចិនបាននាំចូលផលិតផលពាក់កណ្តាលសម្រេចពីប្រទេសកូរ៉េខាងជើង បន្ទាប់មកបញ្ចប់ និងវេចខ្ចប់វានៅក្នុងប្រទេសចិន។ រោមភ្នែកក្លែងក្លាយដែលបានបញ្ចប់នឹងត្រូវនាំចេញទៅកាន់ទីផ្សាររួមមានលោកខាងលិច ជប៉ុន និងកូរ៉េ។ ប្រទេសកូរ៉េខាងជើងគឺជាអ្នកនាំចេញរោមភ្នែកក្លែងក្លាយជាយូរមកហើយ ទោះជាយ៉ាងណាក៏ដោយ ការនាំចេញបានធ្លាក់ចុះក្នុងអំឡុងពេលជំងឺរាតត្បាត COVID-19 នៅពេលដែលកូរ៉េខាងជើងបិទព្រំដែនរបស់ខ្លួន។

យោងតាមឯកសារគយបានឱ្យដឹងថា ពាណិជ្ជកម្មរោមភ្នែកក្លែងក្លាយដែលផលិតដោយកូរ៉េខាងជើងតាមរយៈប្រទេសចិនបានដំណើរការឡើងវិញនៅឆ្នាំ ២០២៣។ ទិន្នន័យគយចិនក៏បានបង្ហាញដែរថា ការនាំចេញរបស់កូរ៉េខាងជើងទៅកាន់ប្រទេសចិនកើនឡើងទ្វេដងនៅឆ្នាំ ២០២៣ នៅពេលដែលព្រំដែនបានបើកឡើងវិញ។ ប្រទេសចិនគឺជាគោលដៅសម្រាប់ការនាំចេញស្ទើរតែទាំងអស់របស់កូរ៉េខាងជើងដែលបានប្រកាស។

រោមភ្នែក និងរោមភ្នែកក្លែងក្លាយមានចំនួនជិត ៦០% នៃការនាំចេញសរុបរបស់ប្រទេសកូរ៉េខាងជើងទៅកាន់ប្រទេសចិនកាលពីឆ្នាំមុន។ សរុបមក ប្រទេសកូរ៉េខាងជើងបាននាំចេញរោមភ្នែក ពុកចង្ការ និងសក់ពាក់ចំនួន ១,៦៨០ តោនទៅកាន់ប្រទេសចិនក្នុងឆ្នាំ ២០២៣ ដែលមានតម្លៃប្រហែល ១៦៧ លានដុល្លារអាមេរិក។ ក្នុងឆ្នាំ ២០១៩ នៅពេលដែលតម្លៃធ្លាក់ចុះ ប្រទេសនេះបាននាំចេញចំនួន ១,៨២៩ តោន ដែលមានតម្លៃ ៣១,១ លានដុល្លារ។

ទោះជាយ៉ាងណាក៏ដោយ បច្ចុប្បន្ន កូរ៉េខាងជើងមិនបានធ្វើអត្ថាធិប្បាយលើបញ្ហាខាងលើនោះទេ។ ទន្ទឹមនឹងនេះ ប្រទេសចិនបាននិយាយថា ទីក្រុងប៉េកាំង និងទីក្រុងព្យុងយ៉ាង “គឺជាអ្នកជិតខាងដ៏មិត្តភាព” ហើយ “កិច្ចសហប្រតិបត្តិការធម្មតារវាងប្រទេសទាំងពីរគឺស្របច្បាប់ និងអនុលោមតាមច្បាប់”៕