សហរដ្ឋអាមេរិក ៖ តុលាការនៅរដ្ឋមីឈីហ្គែន សហរដ្ឋអាមេរិកបាន..កា..ត់..ទោ..ស..អ្នកស្រី Jennifer Crumbley អាយុ៤៥ឆ្នាំ មាន..ទោ..សពីបទ..ឃា..តក..ម្ម..ដោយអចេតនា ដោយសារអ្នកស្រីមានអាកប្បកិរិយាមិនអើពើចំពោះទង្វើខុសប្រក្រតីរបស់កូនប្រុសខ្លួន ហើយអ្នកស្រីពុំបានរកវិធីការពារហេតុការណ៍នេះទេ ។ អ្នកស្រី Jennifer Crumbley បានបណ្តោយឱ្យកូនប្រុសកា..ន់..អា..វុធ ថែមទាំងពុំបានហាមឃាត់ ឬដាស់តឿនកូនទៀតផង ។

ហេតុនេះ ការព្រងើយកន្តើយរបស់អ្នកស្រី Jennifer Crumbley បានធ្វើឱ្យកូនប្រុសរបស់គាត់បង្កហេតុការណ៍បាញ់ប្រហារនៅក្នុងសាលារៀនមធ្យមសិក្សា Oxford កាលពីថ្ងៃទី៣០ ខែវិច្ឆិកា ឆ្នាំ២០២១ ។ ហេតុការណ៍បាញ់ប្រហារនេះ បានបណ្តាលឱ្យកូនសិស្សស្លាប់ចំនួន៤នាក់ និងរងរបួស៧នាក់ទៀត ។ វាបានក្លាយជាករណីដំបូងគេនៅអាមេរិក ដែលយុវជនជាអ្នកប្រព្រឹត្តល្មើស ហើយអាណាព្យាបាលត្រូវទទួលទោសជាមួយកូនដែរ ។

លើសពីនេះ មិនមែនមានតែស្ត្រីជាម្តាយជនល្មើសប៉ុណ្ណោះទេដែលត្រូវទទួលទោស ប៉ុន្តែឪពុករបស់ជនល្មើស ឈ្មោះ James Crumbley ក៏ត្រូវបានតុលាការកាត់ក្តីឱ្យជាប់ទោសដូចគ្នាដែរ ដោយពួកគេត្រូវបានប្តឹងដាច់ដោយឡែកពីគ្នា ។ តុលាការនឹងចាប់ផ្តើមពិចារណារឿងក្តីនេះបន្តទៀតនៅខែមីនា ឆ្នាំ២០២៤ ហើយប្តី-ប្រពន្ធនេះអាចជាប់ពន្ធនាគាររហូតដល់១៥ឆ្នាំ ។

តុលាការអាមេរិកពិចារណារឿងក្តីថា ស្ត្រីជាម្តាយបាននៅស្ងៀម និងព្រងើយកន្តើយចំពោះអាកប្បកិរិយាខុសប្រក្រតីរបស់កូនប្រុស ឈ្មោះ Ethan Crumbley អាយុ១៥ឆ្នាំ ។ តុលាការមានភស្តុតាងសំខាន់ គឺកូនប្រុសបានផ្ញើសារប្រាប់ម្តាយថា រូបគេចង់ឱ្យឪពុក-ម្តាយជួយដល់ខ្លួន និងទទួលស្តាប់បញ្ហាផ្លូវចិត្តរបស់ខ្លួន ។

អ្នកស្រី Jennifer Crumbley បានបដិសេធថា គាត់ពុំបានដឹងថា កូនប្រុសកាន់កាំភ្លើងទៅបង្កហេតុនៅសាលារៀននោះទេ ។ ប៉ុន្តែស្វាមីរបស់គាត់ គឺជាអ្នកនាំកូនទៅទិញកាំភ្លើង ដើម្បីធ្វើជាកាដូថ្ងៃខួបកំណើត ។ តុលាការបញ្ជាក់ថា បើទោះជាស្ត្រីជាម្តាយបដិសេធយ៉ាងណាក្តី ក៏គាត់ពុំអាចគេចផុតពីការទទួលខុសត្រូវបានទេ ៕

បរទេស៖ ប៉ូលីសជប៉ុនបានចាប់ខ្លួនជនជាតិវៀតណាម ៤នាក់ ដែលត្រូវបានចោទប្រកាន់ពីបទលួ..ចសម្ភារៈជាបន្តបន្ទាប់នៅរោងចក្រ Uniqlo ក្នុងប្រទេសជប៉ុនជាមួយនឹងការខាតបង់ប៉ាន់ស្មានប្រមាណ ១៣៥,០០០ ដុល្លារអាមេរិក។

កាលពីថ្ងៃទី៧ ខែកុម្ភៈ ឆ្នាំ២០២៤ យោងតាម The Japan Times បានឱ្យដឹងថា ប៉ូលីសខេត្ត Fukuoka បានចាប់ខ្លួនពលរដ្ឋវៀតណាម ៤នាក់ ក្នុងនោះបុរស ២នាក់ និងស្ត្រី ២នាក់ ត្រូវបានចោទប្រកាន់ពីបទប្រព្រឹត្តអំពើចោរកម្មចំនួន ៦៧ ករណីនៅឯរោងចក្រ Uniqlo និងហាងលក់សំលៀកបំពាក់ផ្សេងទៀតក្នុងទីក្រុងតូក្យូ និងខេត្តចំនួនប្រាំពីរ រួមទាំង Osaka និង Fukuoka ផងដែរ។

ក្នុងចំណោមមនុស្សទាំង ៤នាក់នោះមានឈ្មោះ Nguyen Hoang Anh អាយុ ៣៨ឆ្នាំ ដែលអាស័យដ្ឋានបច្ចុប្បន្នមិនស្គាល់ និងស្ត្រីពីរនាក់ក្នុងវ័យ ៣០ ឆ្នាំ។ ក្រុមនេះត្រូវបានគេនិយាយថាបានលួចវត្ថុចំនួន ៥.២៣៧ រួមទាំងអាវប្រណិតៗជាច្រើនទៀត ក្នុងអំឡុងពេលពួកគេចូលក្នុងប្រទេសជប៉ុនតាំងពីខែធ្នូ ឆ្នាំ២០១៨ ដល់ខែតុលា ឆ្នាំ២០២៣។

នេះបើយោងតាមប៉ូលីសជប៉ុន បាននិយាយថា ជនជាតិវៀតណាម ៤ នាក់ក្នុងក្រុមបានសារភាពចំពោះការចោទប្រកាន់នេះ ដោយលើកឡើងពីបញ្ហាហិរញ្ញវត្ថុជាហេតុផលរបស់ពួកគេ។ ដូច្នេះរបស់របរដែលពួកគេលួច ភាគច្រើនត្រូវបានគេសង្ស័យថាបានលក់តាមទីផ្សារអនឡាញក្នុងប្រទេសវៀតណាម។

យោងតាមការស៊ើបអង្កេត ជនសង្ស័យបានកំណត់គោលដៅក្រុមហ៊ុន Uniqlo ព្រោះក្រុនហ៊ុននេះមានទំនិញជាច្រើនប្រភេទនៅក្នុងប្រទេសជប៉ុន។ ទោះជាយ៉ាងណាក៏ដោយ ប៉ូលីសនៃខេត្ត Fukuoka ដែលចាប់បានជនសង្ស័យ ក៏ទទួលបានដីកាចាប់ខ្លួនស្ត្រីអាយុ ៤០ ឆ្នាំរស់នៅក្នុងប្រទេសវៀតណាម ដោយចោទប្រកាន់នាងថាបានណែនាំជនសង្ស័យទាំង ៤ នាក់ខាងលើឱ្យប្រព្រឹត្តអំពើប្លន់ និងបានផ្តល់ការណែនាំដល់ក្រុម៕

ប្រទេសកូរ៉េខាងត្បូង ៖ វាជារឿងដ៏ក្រៀមក្រំយ៉ាងខ្លាំងសម្រាប់ក្រុមហ៊ុន Tesla នៅប្រទេសកូរ៉េខាងត្បូង ក្រោយពីក្រុមហ៊ុនលក់រថយន្តអគ្គិសនី (Electric Vehicle-EV) លំដាប់ពិភពលោកមួយនេះ មានចំនួនលក់រថយន្តប្រចាំខែមករា ឆ្នាំ២០២៤ ត្រឹមតែ១គ្រឿងប៉ុណ្ណោះនៅកូរ៉េខាងត្បូង ។

ក្រុមហ៊ុនស្រាវជ្រាវរបស់កូរ៉េខាងត្បូង និងក្រសួងពាណិជ្ជកម្មលើកឡើងថា ចំនួនការលក់រថយន្តអគ្គិសនីបានតែ១គ្រឿងនេះ គឺជាចំនួនលក់ដ៏អាក្រក់បំផុត បើគិតចាប់ពីក្រុមហ៊ុន Tesla បានលក់រថយន្តអគ្គិសនីនៅកូរ៉េខាងត្បូង តាំងពីកក្កដា ឆ្នាំ២០២២ ។ ពេលនោះ រថយន្តអគ្គិសនីរបស់ក្រុមហ៊ុន Tesla មិនបានលក់ដាច់សូម្បីតែ១គ្រឿង ។

មតិភាគច្រើនមានចម្ងល់ថា រថយន្តអគ្គិសនីមិនទទួលបានការពេញនិយមនៅប្រទេសកូរ៉េខាងត្បូង អាចបណ្តាលមកពីបញ្ហាសុវត្ថិភាព, តម្លៃ និងការខ្វះខាតស្ថានីយសាកថ្មរថយន្ត ។ កត្តាទាំងអស់នេះហើយ ទើបធ្វើឱ្យគ្មានតម្រូវការទិញរថយន្តអគ្គិសនីនៅកូរ៉េខាងត្បូង ។

បច្ចុប្បន្ន បណ្តាក្រុមហ៊ុនផលិតរថយន្តបានប្រឈមជាមួយឧបសគ្គ នៅពេលការពេញនិយមប្រើប្រាស់រថយន្តអគ្គិសនីធ្លាក់ចុះនៅកូរ៉េខាងត្បូង ពីព្រោះអត្រាការប្រាក់កាន់តែខ្ពស់ និងអត្រាអតិផរណាបានធ្វើឱ្យពលរដ្ឋកូរ៉េខាងត្បូងកាត់បន្ថយការចំណាយរបស់ពួកគេ ។ ជាមួយគ្នានេះ ពលរដ្ឋកូរ៉េខាងត្បូងបារម្ភអំពីភ្លើងឆេះថ្មរថយន្ត និងខ្វះខាតស្ថានីយសាកថ្មរថយន្តអគ្គិសនី ប្រភេទ Fast Charge ផងដែរ ។

មុននេះ ក្រុមហ៊ុន Tesla នៅកូរ៉េខាងត្បូងទទួលបានប្រាក់ឧបត្ថម្ភពីរដ្ឋាភិបាលកូរ៉េខាងត្បូង ដែលកំណត់ថា រថយន្តមានតម្លៃក្រោម៥៧លានវ៉ុន នឹងទទួលបានប្រាក់ឧបត្ថម្ភនេះ ។ ប៉ុន្តែកាលពីថ្ងៃទី៦ ខែកុម្ភៈ ឆ្នាំ២០២៤ រដ្ឋាភិបាលលើកឡើងថា នឹងកាត់បន្ថយចំនួនប្រាក់ឧបត្ថម្ភសម្រាប់រថយន្តដែលមានតម្លៃក្រោម៥៥លានវ៉ុន ។

ហេតុនេះ វាបានធ្វើឱ្យរថយន្ត Tesla ដែលបច្ចុប្បន្ន មានតម្លៃថោកជាងការកំណត់នេះ ទទួលបានប្រាក់ឧបត្ថម្ភពីរដ្ឋាភិបាលកូរ៉េខាងត្បូងចំនួនពាក់កណ្តាលប៉ុណ្ណោះ ។ លើសពីនេះ និន្នាការប្រឆាំងចិនរបស់កូរ៉េខាងត្បូង បានធ្វើឱ្យពលរដ្ឋកូរ៉េខាងត្បូងភាគច្រើនគិតថា រថយន្ត Tesla ដែលផលិតនៅប្រទេសចិន មិនគួរទិញយកមកប្រើប្រាស់នៅកូរ៉េខាងត្បូងទេ ។

ទោះយ៉ាងណា យើងត្រូវតាមដានបន្តទៀតថា តើក្រុមហ៊ុន Tesla នឹងដោះស្រាយបញ្ហាទាំងនេះដោយរបៀបណា? ហើយតើក្រុមហ៊ុននេះនឹងអាចវាយលុកទីផ្សារកូរ៉េខាងត្បូង ដែលគេចាត់ទុកថា ជាប្រភពបច្ចេកវិទ្យាកំពូលលំដាប់ពិភពលោក ដោយរបៀបណា?

ប្រទេសថៃ ៖ លោក Srettha Thavisin នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានទទួលស្វាគមន៍សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ក្នុងឱកាសសម្តេច និងលោកជំទាវ អញ្ជើញធ្វើដំណើរទស្សនកិច្ចជាផ្លូវការមកកាន់ប្រទេសថៃ និងចុះហត្ថលេខាលើ MOU ចំនួន៥ចំណុច ។

ក្នុងឱកាសនេះ ប្រទេសថៃប្រកាសថា នឹងមិនអនុញ្ញាតឱ្យអ្នកណាម្នាក់ប្រើប្រាស់ទឹកដីថៃធ្វើជាទីកន្លែងជ្រៀតជ្រែកកិច្ចការផ្ទៃក្នុងឡើយ ហើយប្រទេសថៃចង់ឃើញសន្តិសុខនៅប្រទេសមីយ៉ាន់ម៉ា ព្រមទាំងត្រៀមផ្តល់ជំនួយមនុស្សធម៌ដល់ពលរដ្ឋមីយ៉ាន់ម៉ាផងដែរ ។

នៅវេលាម៉ោង១០និង១០នាទីព្រឹក ថ្ងៃទី៧ ខែកុម្ភៈ ឆ្នាំ២០២៤ នៅបរិវេណទីលានមុខអគារ «ថៃឃូហ្វា» នៃវិមានរដ្ឋាភិបាលប្រទេសថៃ លោក Srettha Thavisin នាយករដ្ឋមន្ត្រីថៃ បានទទួលស្វាគមន៍សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ក្នុងឱកាសសម្តេច និងលោកជំទាវ អញ្ជើញធ្វើដំណើរទស្សនកិច្ចជាផ្លូវការមកកាន់ប្រទេសថៃ ក្នុងឋានៈជាភ្ញៀវរបស់រដ្ឋាភិបាលថៃ ។

លោក Srettha Thavisin នាយករដ្ឋមន្ត្រីថៃបានអញ្ជើញសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ថតរូបរួមគ្នានៅត្រង់ជណ្តើរនៃអគារ «ថៃឃូហ្វា» ។ បន្ទាប់មក លោកនាយករដ្ឋមន្ត្រីថៃបានអញ្ជើញសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ចុះហត្ថលេខាលើឯកសារ និងទស្សនាវត្ថុអនុស្សាវីរយ៍នៅបន្ទប់ខាងក្រៅនៃអគារ «ថៃឃូហ្វា» ។ ក្រោយមក ភាគីទាំងពីរបានពិភាក្សាគ្នានៅអគារមួយទៀត ។

ជាកិច្ចបន្ទាប់ នៅវេលាម៉ោង១១និង៤០នាទីព្រឹក លោក Srettha Thavisin នាយករដ្ឋមន្ត្រីថៃ និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានចុះហត្ថលេខា និងផ្លាស់ប្តូរអនុស្សរណៈយោគយល់ ចំនួន៥ចំណុច រួមមាន ៖

១-អនុស្សរណៈនៃការយោគយល់ ស្តីពី កិច្ចសហការកាត់បន្ថយគ្រោះមហន្តរាយ និងការទប់ស្កាត់ហេតុការណ៍អាសន្នរវាងប្រទេសថៃ និងកម្ពុជា
២-អនុស្សរណៈនៃការយោគយល់ ស្តីពី កិច្ចសហការផ្នែកវិទ្យាសាស្ត្រ និងបច្ចេកវិទ្យា រវាងក្រសួងអប់រំឧត្តមសិក្សា វិទ្យាសាស្ត្រ ស្រាវជ្រាវ និងការច្នៃប្រឌិតថៃ ជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងការច្នៃប្រឌិតរបស់កម្ពុជា
៣-អនុស្សរណៈនៃការយោគយល់ ស្តីពី ការដឹកជញ្ជូនទំនិញឆ្លងកាត់ព្រំដែនរវាងនាយកដ្ឋានគយប្រទេសថៃ និងអគ្គនាយកដ្ឋានគយ និងរដ្ឋាករកម្ពុជា
៤-អនុស្សរណៈនៃការយោគយល់ ស្តីពី ធនាគារសម្រាប់ការនាំចេញ និងនាំចូលរបស់ប្រទេសថៃ និងសភាពាណិជ្ជកម្មកម្ពុជា ដើម្បីជំរុញពាណិជ្ជកម្ម និងការវិនិយោគរវាងប្រទេសថៃ និងកម្ពុជា និង
៥-អនុស្សរណៈនៃការយោគយល់រវាងសភាពាណិជ្ជកម្មថៃ និងសភាពាណិជ្ជកម្មកម្ពុជា

ក្រោយមក លោកនាយករដ្ឋមន្ត្រីថៃ និងនាយករដ្ឋមន្ត្រីកម្ពុជា បានធ្វើសេចក្តីប្រកាសព័ត៌មានរួមគ្នា ដោយលោក Chai Watcharong មន្ត្រីនាំពាក្យទីស្តីការនាយករដ្ឋមន្ត្រីថៃលើកឡើងថា ៖ «ទំនាក់ទំនងរបស់ភាគីទាំងពីរបានបង្កើនកម្រិតទៅជាទំនាក់ទំនងដៃគូយុទ្ធសាស្ត្រ ហើយវានឹងបើកឱកាសឱ្យការធ្វើការកាន់តែជិតស្និទ្ធខ្លាំងឡើង និងលើកកម្ពស់សក្តានុពលរបស់ប្រទេសទាំងពីររួមគ្នា ។ ប្រទេសថៃនឹងបើកស្ថានកុងស៊ុលនៅខេត្តសៀមរាប ខណៈប្រទេសកម្ពុជានឹងបើកស្ថានកុងស៊ុលនៅខេត្តសុងក្លា នៅឆ្នាំ២០២៤» ។

លោក Chai Watcharong បន្តថា ចំណែកផ្នែកសន្តិសុខ ជាពិសេស នៅបរិវេណព្រំដែនថៃ និងកម្ពុជា គឺប្រទេសថៃនឹងមិនយល់ព្រមឱ្យអ្នកណាម្នាក់ប្រើប្រាស់ថៃ ធ្វើជាកន្លែងជ្រៀតជ្រែកកិច្ចការផ្ទៃក្នុង ឬធ្វើសកម្មភាពបង្កគ្រោះថ្នាក់ដល់ប្រទេសជិតខាងឡើយ ។ ក្រៅពីនេះ មេដឹកនាំប្រទេសទាំងពីរបានយល់ព្រមគ្នាពង្រឹងកិច្ចសហការប្រយុទ្ធប្រឆាំងនឹងឧក្រិដ្ឋកម្មឆ្លងដែន ជាពិសេស ការបោកប្រាស់តាមអនឡាញ ។

ចំណែកផ្នែកសេដ្ឋកិច្ចវិញ ប្រទេសថៃនឹងធ្វើជាម្ចាស់ផ្ទះរៀបចំកិច្ចប្រជុំគណៈកម្មការពាណិជ្ជកម្មរួម ថ្នាក់រដ្ឋមន្ត្រីក្រសួងពាណិជ្ជកម្ម លើកទី៧ នៅដើមខែមីនា ឆ្នាំ២០២៤ ដើម្បីបន្ថែមទំហំពាណិជ្ជកម្ម ជាពិសេស ពាណិជ្ជកម្មនៅតាមព្រំដែន ។ ក្រៅពីនេះ ប្រទេសទាំងពីរនឹងជំរុញពាណិជ្ជកម្ម និងការវិនិយោគរវាងគ្នា និងគ្នា ។

លោក Chai Watcharong បន្ថែមថា សម្រាប់បញ្ហាផ្សែងអ័ព្ទនៅតាមព្រំដែន ភាគីទាំងពីរបានព្រមព្រៀងគ្នាបង្កើតក្រុមការងាររួមគ្នា ។ រីឯផ្នែកកម្លាំងពលកម្មវិញ លោក Srettha Thavisin នាយករដ្ឋមន្ត្រីថៃបញ្ជាក់ថា ប្រទេសថៃបានផ្តល់ភាពសំខាន់លើការថែទាំពលករមកពីគ្រប់ប្រទេស រួមទាំងពលករខ្មែរនៅប្រទេសថៃផងដែរ ដើម្បីឱ្យពួកគេទទួលបានភាពយុត្តិធម៌ ។

េដឹកនាំប្រទេសទាំងពីររូបក៏បានពិភាក្សាគ្នាអំពីស្ថានការណ៍នៅប្រទេសមីយ៉ាន់ម៉ាផងដែរ ដោយប្រទេសថៃ និងកម្ពុជា ចង់ឃើញប្រទេសមីយ៉ាន់ម៉ា មានសុខសន្តិភាព និងស្ថិរភាព ។ ហេតុនេះ រដ្ឋាភិបាលថៃនឹងផ្តល់ជំនួយមនុស្សធម៌ដល់ពលរដ្ឋមីយ៉ាន់ម៉ា ព្រមទាំងជំរុញការដោះស្រាយបញ្ហាដោយសន្តិវិធី និងអនុវត្តកិច្ចសហការជាមួយអាស៊ាន ។

លោក Chai Watcharong បន្ថែមទៀតថា ជាកិច្ចបញ្ចប់ មេដឹកនាំប្រទេសថៃ និងកម្ពុជា បានសង្កត់ធ្ងន់ទៅលើសារៈសំខាន់ក្នុងការលើកកម្ពស់ទំនាក់ទំនងរវាងពលរដ្ឋប្រទេសទាំងពីរ ។ លើសពីនេះ នៅឆ្នាំ២០២៥ ថៃ និងកម្ពុជា នឹងរួមគ្នាប្រារព្ធខួប លើកទី៧៥ឆ្នាំ ដែលប្រទេសទាំងពីរបានបង្កើតទំនាក់ទំនងការទូតជាមួយគ្នា គឺផ្តោតលើសកម្មភាពលើកកម្ពស់ការយល់ដឹងរវាងពលរដ្ឋទាំងពីរប្រទេស ។ ថៃ និងកម្ពុជា នឹងជួបពិភាក្សាគ្នាជាបន្តបន្ទាប់ ដើម្បីពង្រឹងកិច្ចសហការឱ្យកាន់តែជិតស្និទ្ធបន្តទៀត ៕