ប្រទេសឥណ្ឌា ៖ នាយករដ្ឋមន្ត្រីប្រទេសឥណ្ឌា លោក Narendra Modi បានជ្រមុជទឹកទៅធ្វើពិធីគោរពសាសនាក្នុងវត្ត និងទីក្រុងបុរាណនៅក្រោមទឹក ឈ្មោះ «ថាវ៉ារ៉ាកា» ដែលស្ថិតនៅបរិវេណខាងក្រៅឆ្នេរសមុទ្រអារ៉ាប់ រដ្ឋឃូឆារ៉ាត កាលពីថ្ងៃទី២៥ ខែកុម្ភៈ ឆ្នាំ២០២៤ ។ លោកបានអង្គុយសមាធិ និងសូត្រធម៌នៅក្រោមទឹក ហើយលោកបានយកកន្ទុយក្ងោកទៅថ្វាយវត្ថុស័ក្តសិទ្ធផងដែរ ។

ចំណែកអ្នកមានជំនាញជ្រមុជទឹកជាច្រើននាក់ទៀតបានជួយការពារលោកនាយករដ្ឋមន្ត្រី និងមិនទៅឆ្ងាយពីលោកទេ ។ មេដឹកនាំឥណ្ឌា អាយុ៧៣ឆ្នាំ រូបនេះ បានចុះទៅក្រោមទឹកនៅបរិវេណដែលគេជឿថា គឺជាទីក្រុងបុរាណ ដោយលោកស្លៀកពាក់ឈុតប្រពៃណីឥណ្ឌា និងពាក់តែមួកប្រភេទ Diving Helmet ប៉ុណ្ណោះ ។

នាយករដ្ឋមន្ត្រីឥណ្ឌា លោក Narendra Modi បានធ្វើពិធីសូត្រធម៌ ដែលមានកន្ទុយសត្វក្ងោកសម្រាប់គោរពបូជាក្នុងវត្តហិណ្ឌូស័ក្តសិទ្ធស្ថិតនៅក្រោមទឹក ។ ជនជាតិឥណ្ឌាដែលគោរពសាសនាហិណ្ឌូជឿថា វាគឺជាផ្នែកមួយរបស់ថាវ៉ារ៉ាកា ឬទីក្រុងបុរាណនៅក្រោមទឹក ដែលត្រូវបានគេដាក់ឈ្មោះថា «ទីក្រុងអាឡែនទីសរបស់ឥណ្ឌា» ។

លោកនាយករដ្ឋមន្ត្រីឥណ្ឌាបានបង្ហោះសារក្នុងបណ្តាញសង្គម X ឬ Twitter ថា ៖ «នៅពេលខ្ញុំបានជ្រមុជទឹកដើម្បីសូត្រធម៌ និងគោរពបូជានៅទីក្រុងបុរាណថូវ៉ារ៉ាកា គឺជាបទពិសោធន៍ដ៏ល្អមួយ និងមានភាពស័ក្តសិទ្ធយ៉ាងខ្លាំង ។ ខ្ញុំមានអារម្មណ៍ថា ខ្ញុំកំពុងទំនាក់ទំនងជាមួយវត្ថុស័ក្តសិទ្ធនៅសម័យបុរាណ ហើយខ្ញុំសូមឱ្យព្រះប្រទានពរដល់អ្នកគ្រប់គ្នាផងដែរ» ។

ថាវ៉ារ៉ាកា គឺជាទីក្រុងបុរាណស្ថិតនៅបរិវេណខាងក្រៅឆ្នេរសមុទ្រនៃរដ្ឋឃូឆារ៉ាត និងជាប់សមុទ្រអារ៉ាប់ ។ ទីក្រុងនេះ គឺជាទីក្រុងស័ក្តសិទ្ធមួយក្នុងចំណោមទីកន្លែងស័ក្តសិទ្ធចំនួន៧ សម្រាប់អ្នកធ្វើបុណ្យសាសនាហិណ្ឌូគោរពប្រតិបត្តិជារៀងរាល់ឆ្នាំ ។ ទីក្រុងថាវ៉ារ៉ាកា បានបង្ហាញពីមហាទេពក្នុងសាសនាហិណ្ឌូ ឬមហាភារៈតៈ ថា គឺជារាជធានីរបស់ព្រះគីសាណៈ និងបានសាងសង់ឡើងនៅទន្លេ កុមទិ ។ ប៉ុន្តែទីក្រុងនេះបានធ្លាក់ទៅក្នុងទឹក ក្រោយពីការសោយទីវង្គតរបស់ព្រះគីសាណៈ ។

អ្នកបុរាណវិទ្យាបានប្រទះឃើញភស្តុតាងផ្សេងៗនៅក្រោមទឹក ហើយចាប់តាំងពីពេលនោះមក គេជឿថា បរិវេណនេះជាទីតាំងរបស់ទីក្រុងបុរាណថាវ៉ារ៉ាកា ។ ហេតុនេះ គេបានដាក់ឈ្មោះទីក្រុងនេះថា ទីក្រុងអាឡែនទីស របស់ប្រទេសឥណ្ឌា ។ អាឡែនទីស គឺជារឿងរ៉ាវរបស់ឋានសួគ៌នៅសម័យបុរាណ ដែលបានបាត់បង់នៅក្រោមសមុទ្រ ៕

សហរដ្ឋអាមេរិក ៖ ទាហានអាមេរិកម្នាក់បានសម្រេចចិត្ត ..ដុ..ត.. ខ្លួនឯងនៅបរិវេណខាងក្រៅស្ថានទូតអ៊ីស្រាអែលក្នុងទីក្រុងវ៉ាស៊ីនតោន សហរដ្ឋអាមេរិក កាលពីរសៀលថ្ងៃទី២៥ ខែកុម្ភៈ ឆ្នាំ២០២៤ ។ ចំណែកអាជ្ញាធរក្នុងតំបន់និយាយថា ការ ..ដុ..ត.. ខ្លួននេះ មើលទៅដូចជាការតវ៉ាប្រឆាំងនឹងសង្គ្រាមនៅតំបន់កាហ្សា ។

ទាហានអាមេរិក ..ដុ..ត.. ខ្លួនឯងនេះ ត្រូវបានគេបញ្ជូនទៅកាន់មន្ទីរពេទ្យមួយកន្លែងនៅក្នុងតំបន់ ក្រោយពីភ្នាក់ងារស៊ើបការណ៍សម្ងាត់របស់អាមេរិកជួយគ្នាពន្លត់ភ្លើង ។ រីឯមន្ត្រីនាំពាក្យស្នងការជាតិបានលើកឡើងនាពេលបន្ទាប់ថា ទាហានរូបនេះស្ថិតក្នុងស្ថានភាពធ្ងន់ធ្ងរនៅឡើយ ខណៈមន្ត្រីនាំពាក្យរបស់កងទ័ពអាកាសបញ្ជាក់ថា ហេតុការណ៍នេះពាក់ព័ន្ធនឹងកងទ័ពអាកាសម្នាក់របស់ពួកគេ ។

បើតាមការចុះផ្សាយរបស់កាសែត New York Times ឱ្យដឹងថា ទាហានដុតខ្លួននេះនិយាយថា រូបគេមិនចង់មានជម្លោះក្នុងការសម្លាប់ជាតិសាសន៍នៅតំបន់កាហ្សាបន្តទៀតទេ ។ រីឯវីដេអូមួយដែលទាហានរូបនេះបាន Live ផ្ទាល់តាមអ៊ីនធើរណេត គេបានឃើញគាត់ស្លៀកពាក់ឯកសណ្ឋានទាហាន ។

ទាហាននេះបានប្រើប្រាស់វត្ថុរាវចាក់ស្រោចលើក្បាល និងដុតភ្លើងខ្លួនឯង ព្រមទាំងស្រែកថា «សូមដោះលែងប៉ាឡេស្ទីន» ។ បើតាមការចុះផ្សាយរបស់កាសែត New York Times ឱ្យដឹងថា បច្ចុប្បន្ន អាជ្ញាធរក្នុងតំបន់ និងភ្នាក់ងារស៊ើបការណ៍សម្ងាត់របស់អាមេរិក បានស៊ើបអង្កេតដើម្បីស្វែងរកមូលហេតុដែលបណ្តាលឱ្យកើតហេតុការណ៍នេះ ។

ស្ថានទូតអ៊ីស្រាអែលបានក្លាយជាគោលដៅក្នុងការតវ៉ាប្រឆាំងនឹងសង្គ្រាមនៅតំបន់កាហ្សាជាបន្តបន្ទាប់ ខណៈសង្គ្រាមនៅតំបន់កាហ្សាធ្វើឱ្យមានការតវ៉ាម្តងហើយម្តងទៀតនៅអាមេរិកពីភាគីគាំទ្រប៉ាឡេស្ទីន និងអ៊ីស្រាអែល ។

ការប្រឆាំងតវ៉ាបានចាប់ផ្តើមកើតឡើងមិនយូរប៉ុន្មាន ក្រោយហេតុការណ៍ក្រុមហាម៉ាស់ដែលការពារតំបន់កាហ្សាវាយប្រហារប្រឆាំងនឹងអ៊ីស្រាអែល ។ ក្រុមនេះបានសម្លាប់មនុស្សប្រមាណ១.២០០នាក់ និងចាប់ខ្លួនចំណាប់ខ្មាំងប្រមាណ២៥០នាក់ ។ តាំងពីពេលនោះមក ទាហានអ៊ីស្រាអែលក៏បានសងសឹកវិញ ដោយការបើកប្រតិបត្តិការយោធាវាយលុកក្នុងតំបន់កាហ្សា ។ ទាហានអ៊ីស្រាអែលបានបំផ្លាញតំបន់ជាច្រើន ហើយរហូតមកដល់ដើមឆ្នាំ២០២៤នេះ មានមនុស្សស្លាប់ជិត៣ម៉ឺននាក់ ៕

ប្រទេសវៀតណាម ៖ ក្រុមហ៊ុនផលិតរថយន្តអគ្គិសនីវៀតណាម Vinfast បានប្រកាសពីការខាតទុនរបស់ខ្លួន ស្មើនឹងទឹកប្រាក់ជិត២.៤០០លានដុល្លារអាមេរិក នៅឆ្នាំ២០២៣ បើទោះជាក្រុមហ៊ុននេះទទួលបានប្រាក់ចំណូលកើនឡើងលើសឆ្នាំ២០២២ រហូតដល់៩០% ក៏ដោយ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២៦ ខែកុម្ភៈ ឆ្នាំ២០២៤ ។

ក្រុមហ៊ុន Vinfast សង្ឃឹមថា នឹងអាចបង្កើនសក្តានុពលប្រកួតប្រជែងរបស់ខ្លួនជាមួយម៉ាករថយន្តអគ្គិសនីលំដាប់ពិភពលោក ដូចជា Tesla ប៉ុន្តែទីបំផុត ក្រុមហ៊ុននេះមិនអាចលក់រថយន្តតាមគោលដៅទេ បើទោះជាប្រាក់ចំណូលនៅឆ្នាំ២០២៣ ស្មើនឹង១.១៩០លានដុល្លារអាមេរិក ហើយប្រាក់ចំណូលបានកើនឡើងរហូតដល់៩១% បើធៀបនឹងឆ្នាំ២០២២ ក្តី ។ ប៉ុន្តែក្រុមហ៊ុននេះនៅតែខាតទុន ស្មើនឹងទឹកប្រាក់២.៣៩០លានដុល្លារអាមេរិក ហើយចំនួននេះច្រើនជាងឆ្នាំ២០២២ ប្រមាណ១៤,៧% ។

ក្រុមហ៊ុន Vinfast អាចលក់រថយន្តអគ្គិសនីបានត្រឹមតែចំនួន៣៤.៨៥៥គ្រឿងប៉ុណ្ណោះ កាលពីឆ្នាំ២០២៣ ហើយចំនួននេះស្ថិតនៅក្រោមគោលដៅដែលក្រុមហ៊ុនកំណត់ថា នឹងលក់រថយន្តអគ្គិសនីឱ្យបានចំនួន៥ម៉ឺនគ្រឿង ។ ទោះយ៉ាងណា ក្រុមហ៊ុនមានគម្រោងថា នឹងលក់រថយន្តអគ្គិសនីឱ្យបានដល់១សែនគ្រឿង នៅឆ្នាំ២០២៤ ហើយក្រុមហ៊ុននឹងវាយលុកចូលទីផ្សារផ្សេងៗ ក្រៅពីសហរដ្ឋអាមេរិក, កាណាដា និងអឺរ៉ុប ។

កាលពីសប្តាហ៍ទី៣ ខែកុម្ភៈ ឆ្នាំ២០២៤ ក្រុមហ៊ុន Vinfast បានប្រកាសពីគម្រោងសាងសង់រោងចក្រផលិតរថយន្តអគ្គិសនីនៅរដ្ឋ Tamil Nadu ប្រទេសឥណ្ឌា ដែលបានចាប់ផ្តើម នៅថ្ងៃទី២៥ ខែកុម្ភៈ កន្លងមក ហើយក្រុមហ៊ុនប្រកាសថា រោងចក្រនេះនឹងអាចផលិតរថយន្តបានប្រមាណ១៥ម៉ឺនគ្រឿងក្នុង១ឆ្នាំ ។

ក្រៅពីនេះ ក្រុមហ៊ុនក៏មានគម្រោងវិនិយោគទុនស្មើនឹងទឹកប្រាក់យ៉ាងហោចណាស់ ១.២០០លានដុល្លារអាមេរិកផ្សេងទៀត ដើម្បីសាងសង់រោងចក្រថ្មីផលិតរថយន្តអគ្គិសនីនៅប្រទេសឥណ្ឌូណេស៊ី ។ លើសពីនេះ ក្រុមហ៊ុនចាប់អារម្មណ៍ពង្រីកការវិនិយោគទុនផ្នែករថយន្តនៅប្រទេសហ្វីលីពីនទៀតផង ។

Anh Nguyen ជាប្រធានផ្នែកហិរញ្ញវត្ថុរបស់ក្រុមហ៊ុន Vinfast លើកឡើងថា ៖ «យើងបានឃើញពីលទ្ធផលប្រតិបត្តិការគួរឱ្យពេញចិត្តនៅត្រីមាសទី៤ ឆ្នាំ២០២៣ ដោយក្រុមហ៊ុនមានប្រាក់ចំណូលកើនឡើង ហើយប្រាក់ចំណេញសុទ្ធ ក៏បានកើនឡើងផងដែរ» ។

Vinfast គឺជាក្រុមហ៊ុនរថយន្តអគ្គិសនីស្ថិតនៅក្រោមក្រុមហ៊ុន Vingroup ដែលបានបង្កើតឡើងកាលពីឆ្នាំ២០១៧ ហើយមានទីតាំងផលិតរថយន្តដ៏ធំនៅទីក្រុង Hai Phong ដែលជាទីក្រុងធំលំដាប់ទី៣ របស់ប្រទេសវៀតណាម ។

ក្រុមហ៊ុននេះបានចាប់ផ្តើមលក់រថយន្តអគ្គិសនីឱ្យអតិថិជននៅរដ្ឋកាលីហ្វ័រញ៉ា សហរដ្ឋអាមេរិក ចាប់តាំងពីខែមីនា ឆ្នាំ២០២៣ មកម៉្លេះ ហើយរហូតមកដល់ត្រីមាសទី៣ ឆ្នាំ២០២៣ ក្រុមហ៊ុនអាចលក់រថយន្តបានប្រមាណ២១.២០០គ្រឿង ។ នាយកគ្រប់គ្រងក្រុមហ៊ុន Vinfast បានកំណត់គោលដៅថា ការលក់រថយន្តរបស់ក្រុមហ៊ុននឹងឈានដល់ចំណុចកំពូល នៅឆ្នាំ២០២៥ ។

នៅដើមឆ្នាំ២០២៤នេះ ក្រុមហ៊ុន Vinfast បានបង្ហាញនូវគំនិតផលិតរថយន្តភីកអាប់អគ្គិសនី និងដំណើរការរោងចក្រផលិតរថយន្តនៅរដ្ឋ North Carolina សហរដ្ឋអាមេរិក ដើម្បីលក់រថយន្តអគ្គិសនីនៅសហរដ្ឋអាមេរិក ៕

ប្រទេសសិង្ហបុរី៖ តំបន់ Oases របស់ប្រទេសសិង្ហបុរីគឺជាកន្លែងដែលទាក់ទាញអ្នកទេសចរក្នុងស្រុក និងបរទេសពេញមួយឆ្នាំ ដោយសារទេសភាពសន្តិភាព និងសកម្មភាពរុករកធម្មជាតិចម្រុះរបស់ពួកគេ។ តំបន់នេះមានរមណីយដ្ឋានបៃតង និងសួនកម្សាន្តល្បីៗជាច្រើន ត្រូវបានចាត់ទុកថាជាឋានសួគ៌ ដោយសារកោះនីមួយៗផ្តល់នូវបទពិសោធន៍ដ៏គួរឱ្យរំភើប ដែលខុសគ្នាទាំងស្រុងពីសកម្មភាពនៅលើដីគោក។

នៅក្នុងតំបន់ Oases មានកន្លែងទាក់ទាញបែបបុរាណរបស់ Pulau Ubin ភាពបរិសុទ្ធខាងវិញ្ញាណរបស់ Kusu ភាពអស្ចារ្យខាងអេកូឡូស៊ីនៃ Sister Island ឬឆ្នេរដ៏ស្ងប់ស្ងាត់នៃ St. John’s, Lazarus…ជាដើម។ ទាំងអស់នេះផ្តល់នូវបទពិសោធន៍ដ៏គួរឱ្យរំភើបដែលមិនអាចបំភ្លេចបាន ដោយគ្រាន់តែជិះសាឡាងខ្លីពីកណ្តាលប្រទេសសិង្ហបុរីគឺទៅដល់ហើយ។ ដូច្នេះអ្នកទេសចរអាចមកទស្សនាកន្លែងដ៏ពេញនិយមនីមួយៗក្នុងតំបន់ Oases ដូចខាងក្រោម៖

១.កន្លែងទាក់ទាញបែបបុរាណរបស់ Pulau Ubin៖ Pulau Ubin មានទីតាំងនៅឆ្នេរសមុទ្រភាគឦសាននៃប្រទេសសិង្ហបុរី ត្រូវបានអ្នកស្រុកចាត់ទុកថាជាកន្លែងលាក់ខ្លួន ដ៏ស្ងប់ស្ងាត់ និងបរិសុទ្ធ ផ្ទុយពីទេសភាពទំនើបនៅកណ្តាលទីក្រុង ឬគេហៅថា “ឋានសួគ៌សម្ងាត់”។ នៅកំពង់ផែនេះ មានផ្លូវដើរដ៏ស្ងប់ស្ងាត់នៅក្រោមដើមឈើបៃតងត្រជាក់ ឆ្លងកាត់ផ្លូវក្តារឈើ ដោយអ្នកទស្សនាអាចគយគន់សួនផ្លែឈើ បន្លែ និងចម្ការម្នាស់តូចៗរបស់ប្រជាជនក្នុងតំបន់។ នៅទីនោះក៏មានភោជនីយដ្ឋាន ហាងលក់ទំនិញតម្លៃសមរម្យ និងហាងលក់ភេសជ្ជៈខ្នាតតូចផងដែរ។

២.កោះ Kusu៖ កោះ Kusu ដែលគេស្គាល់ថាជាកោះអណ្តើក គឺជាកន្លែងដែលរួមបញ្ចូលគ្នានូវវប្បធម៌ប្រជាប្រិយ និងតម្លៃបេតិកភណ្ឌទាំងពីប្រទេសចិន និងម៉ាឡេស៊ី។ រឿងព្រេងរបស់កោះនេះគឺនិយាយអំពីអណ្តើកយក្សមួយក្បាលដែលបានប្រែក្លាយទៅជាកោះមួយ ដើម្បីជួយសង្រ្គោះអ្នកនេសាទពីរនាក់ដែលលិចកប៉ាល់នោះគឺជនជាតិម៉ាឡេ និងជនជាតិចិន។ នៅពេលទៅដល់កោះអ្នកទស្សនានឹងឃើញ Wishing Well ដែលជាទីតាំងសម្រាប់បួងសួងអាចធ្វើឱ្យបំណងប្រាថ្នាក្លាយជាការពិត។ ប្រជាជននៅទីនេះក៏មានពិធីបោះកាក់ចូលទៅក្នុងអណ្តូងដើម្បីបន្លឺកណ្ដឹងសុំសេក្តីសុខផងដែរ។

៣.កោះ Sister’s Island៖ កោះ Sister’s Island ស្ថិតនៅក្នុងប្រជុំកោះភាគខាងត្បូងនៃប្រទេសសិង្ហបុរី គឺជាចង្កោមនៃកោះតូចៗចំនួនពីរ រួមមានកោះ Big Sister’s Island និង Little Sister’s Island ដែលបម្រើសម្រាប់តែការអភិរក្ស និងស្រាវជ្រាវប៉ុណ្ណោះ។ ដោយសារតែភាពស្ងប់ស្ងាត់ និងភាពស្រស់ស្អាតនៃព្រៃធ្វើឱ្យកន្លែងនេះជាកន្លែងសម្រាកឆ្ងាយពីជីវិតទីក្រុងដ៏អ៊ូអរ ហើយត្រូវបានគេហៅថាជា “ឋានសួគ៌សមុទ្រ”។

៤.ផ្លូវ John’s និងកោះ Lazarus៖ កោះ Lazarus និងឆ្នេរនៅលើកោះ St. John’s គឺជាកន្លែងដ៏ល្អសម្រាប់អ្នកដែលចូលចិត្តហែលទឹក ងូតទឹកក្រោមពន្លឺព្រះអាទិត្យ ឬសម្រាកកាយដោយរលកសមុទ្រ។ វាក៏មានកន្លែងពិកនិកជាច្រើនទៀតនៅលើកោះដែលមានកៅអីអង្គុយ និងតុអាហារ។ លើសពីនេះអ្នកទេសចរអាចស្វែងយល់ពីប្រព័ន្ធអេកូឡូស៊ីសមុទ្រដ៏សម្បូរបែបនូវជុំវិញកោះនេះបានផងដែរ។ ទន្ទឹមនឹងនេះកោះ St. John’s ក៏មានផ្តល់ជូននូវសកម្មភាពកីឡាក្នុងទឹកជាច្រើន រួមមានៈ យូហ្គាអណ្តែតទឹក ជិះកង់លើសមុទ្រ ក្រោកឈរឡើងជិះក្តារ និងជិះទូកកាយ៉ាក។ ដូច្នេះអ្នកអាចហាត់ប្រាណ សម្រាក និងគយគន់ទេសភាពដ៏សម្បូរបែបនៃប្រជុំកោះដ៏ស្រស់ស្អាតបំផុតមួយនៅភាគខាងត្បូង៕

ប្រទេសឥណ្ឌា ៖ សារព័ត៌មានបរទេសបានចុះផ្សាយ កាលពីថ្ងៃទី២៦ ខែកុម្ភៈ ឆ្នាំ២០២៤ ថា ភ្នាក់ងាររថភ្លើងប្រទេសឥណ្ឌាបានបញ្ជាឱ្យស៊ើបអង្កេតរកមូលហេតុជាបន្ទាន់ ក្រោយពីរថភ្លើងដឹកទំនិញមួយខ្សែបានរត់នៅលើផ្លូវដែកដោយគ្មានអ្នកបើកបរ ក្នុងចម្ងាយផ្លូវរហូតដល់៧០គីឡូម៉ែត្រ ។ បើតាមវីដេអូមួយដែលគេបានចែកចាយនៅប្រទេសឥណ្ឌាបង្ហាញថា រថភ្លើងនេះបានបើកបរឆ្លងកាត់ស្ថានីយផ្សេងៗក្នុងល្បឿនលឿន ។

ចំណែកសារព័ត៌មានឥណ្ឌារាយការណ៍ថា រថភ្លើងមួយខ្សែនេះបានរត់នៅលើផ្លូវដែកដោយគ្មានអ្នកបើកបរ គឺចាប់ពីទីក្រុង Jammu ទៅកាន់តំបន់ Hoshiarpur ស្ថិតក្នុងរដ្ឋ Punjab កាលពីថ្ងៃទី២៥ ខែកុម្ភៈ ឆ្នាំ២០២៤ ។ ចំណែកភ្នាក់ងាររថភ្លើងប្រទេសឥណ្ឌាបញ្ជាក់ថា នៅទីបំផុត រថភ្លើងនេះបានឈប់ដំណើរការដោយខ្លួនឯង ហើយគ្មានអ្នកណាម្នាក់រងរបួសទេ ។

សារព័ត៌មាន Press Trust of India (PTI) រាយការណ៍ថា បើតាមទិន្នន័យរបស់ភ្នាក់ងាររថភ្លើងបញ្ជាក់ថា ហេតុការណ៍នេះបានកើតឡើងចាប់ពីម៉ោង៧និង២៥នាទីព្រឹក រហូតដល់ម៉ោង៩ព្រឹក (ម៉ោងនៅប្រទេសឥណ្ឌា) ហើយរថភ្លើងនេះបានដឹកទំនិញចំនួន៥៣ទូរ ។ រថភ្លើងបានធ្វើដំណើរចាកចេញពីទីក្រុង Jammu ទៅកាន់រដ្ឋ Punjab ហើយរថភ្លើងបានមកឈប់នៅទីក្រុង Cathua ដើម្បីផ្លាស់ប្តូរបុគ្គលិកត្រួតពិនិត្យ ។

ក្នុងអំឡុងពេលរថភ្លើងឈប់នៅទីក្រុង Cathua ស្រាប់តែនៅសុខៗ វាក៏រត់នៅតាមផ្លូវដែកដែលមានលក្ខណៈជម្រាលដោយខ្លួនឯង ក្រោយពីអ្នកបើកបររថភ្លើង និងបុគ្គលិកជំនួយការចុះពីលើរថភ្លើងរួចរាល់ ។ បន្ទាប់មក រថភ្លើងនេះបានរត់ក្នុងល្បឿនលឿនក្នុងចម្ងាយផ្លូវជិត១០០គីឡូម៉ែត្រ និងឆ្លងកាត់ស្ថានីយផ្សេងៗប្រមាណ៥ស្ថានីយ មុននឹងវាឈប់ដំណើរការ ។

ក្រោយពីទទួលដំណឹងថា មានហេតុការណ៍រថភ្លើងរត់នៅលើផ្លូវដែកដោយខ្លួនឯងនេះ អាជ្ញាធរក៏បានបញ្ជាឱ្យបិទចំណុចឆ្លងកាត់ផ្លូវដែកគ្រប់កន្លែង ដើម្បីការពារគ្រោះថ្នាក់ផ្សេងៗ ។ ក្រោយមក អាជ្ញាធរក៏បានយកមែកឈើទៅដាក់បាំងនៅលើផ្លូវដែកដើម្បីកាត់បន្ថយល្បឿនរថភ្លើង រហូតដល់អាចបញ្ឈប់វាបាន ។

មន្ត្រីរថភ្លើងឥណ្ឌាបញ្ជាក់ថា ពួកគេបានព្យាយាមស៊ើបអង្កេតរកមូលហេតុឱ្យច្បាស់ថា ហេតុអ្វីបានជារថភ្លើងអាចបើកបរដោយខ្លួនឯងបាន ក្រោយពីអ្នកបើកបរបានចតរថភ្លើងនៅទីក្រុង Cathua ហើយអាជ្ញាធរនឹងការពារមិនឱ្យមានហេតុការណ៍បែបនេះកើតឡើងម្តងទៀតទេ ៕

ប្រទេសថៃ៖ ប្រទេសថៃបានវិនិយោគយ៉ាងខ្លាំងលើការផ្សព្វផ្សាយ ការលើកលែងទិដ្ឋាការ និងការបង្កើនផលិតផលសម្រាប់ស្ត្រី និងមនុស្សចាស់ ដើម្បីទាក់ទាញភ្ញៀវទេសចរអន្តរជាតិចំនួន ៣៥ លាននាក់នៅឆ្នាំនេះ រួមទាំងសង្ឃឹមថានឹងទាក់ទាញអតិថិជនពីទីផ្សារចំនួនពីរពាន់លានដុល្លារអាមេរិកពីប្រទេសចិន និងឥណ្ឌា។
នៅពេលដែលប្រទេសថៃត្រូវបានគេរំពឹងថានឹងស្វាគមន៍ភ្ញៀវទេសចរអន្តរជាតិចំនួន ៣៥ លាននាក់នៅឆ្នាំនេះ ប្រទេសចិន និងឥណ្ឌា ដែលជា “យក្ស” ពីរនៅក្នុងទីផ្សារបញ្ជូនភ្ញៀវទេសចរត្រូវបានគេរំពឹងថានឹងដើរតួយ៉ាងសំខាន់ក្នុងការបំពេញគោលដៅ។ ក្នុងអំឡុងពេលពីរខែដំបូងនៃឆ្នាំនេះ ទីផ្សារទេសចរចិនមានការចាប់ផ្តើមដ៏ល្អដោយមានអ្នកចូលទស្សនាជាងមួយលាននាក់ក្នុងប្រទេសថៃ។

លោក Thapanee Kiatphaibool ប្រធានអាជ្ញាធរទេសចរណ៍ថៃ (TAT) បាននិយាយថា “នេះជាលើកដំបូងបន្ទាប់ពីការរាតត្បាតដែលយើងបានស្វាគមន៍ភ្ញៀវទេសចរចិនជាងមួយលាននាក់ក្នុងរយៈពេលជិតពីរខែ” ។ កត្តាដូចជាបុណ្យចូលឆ្នាំថ្មី ការលើកលែងទិដ្ឋាការ ការផ្សព្វផ្សាយ និងកិច្ចព្រមព្រៀងសហប្រតិបត្តិការជាច្រើនជាមួយភ្នាក់ងារទេសចរណ៍ បានជួយប្រទេសថៃសម្រេចបានសមិទ្ធផលខាងលើ។ TAT រំពឹងថាប្រទេសចិននឹងក្លាយជាទីផ្សារប្រភពលេខមួយនៅឆ្នាំនេះដែលមានអ្នកទស្សនា ៨ លាននាក់។

រីឯប្រទេសឥណ្ឌាក៏ជាទីផ្សារដ៏ធំបំផុតដែល TAT រំពឹងទុកនៅឆ្នាំនេះផងដែរ ដោយរំពឹងថានឹងទទួលភ្ញៀវជាង ២ លាននាក់។ លោក Thapanee Kiatphaibool បាននិយាយថា “ប្រទេសឥណ្ឌាគឺជាទីផ្សារដែលមានគុណភាពខ្ពស់ និងចំណាយខ្ពស់” ។ នោះហើយជាមូលហេតុដែលយើងលើកលែងទិដ្ឋាការជាបណ្តោះអាសន្នសម្រាប់ទីផ្សារនេះ។ លើសពីនេះប្រទេសថៃក៏កំពុងពិចារណាលើគោលនយោបាយបន្ធូរបន្ថយបន្ថែមទៀត ដូចជាការលើកលែងទិដ្ឋាការអចិន្ត្រៃយ៍សម្រាប់ភ្ញៀវទេសចរឥណ្ឌា។

គួរបញ្ជាក់ដែរថា នៅខែកញ្ញា ឆ្នាំ២០២៣ ប្រទេសថៃបានប្រកាសកម្មវិធីលើកលែងទិដ្ឋាការឯកតោភាគីរយៈពេល ៥ ខែសម្រាប់ភ្ញៀវទេសចរចិន ហើយបន្ទាប់មកក៏មានការលើកលែងទិដ្ឋាការអចិន្ត្រៃយ៍ចាប់ពីថ្ងៃទី១ ខែមីនាសម្រាប់ភ្ញៀវទេសចរចិនផងដែរ។ នៅឆ្នាំ២០២៣ ប្រទេសចិនជាប់ចំណាត់ថ្នាក់លេខ ២ ក្នុងទីផ្សារកំពូលទាំង ៥ ដែលបញ្ជូនអ្នកទេសចរច្រើនជាងគេទៅកាន់ប្រទេសថៃដែលមានចំនួន ៣.៥ លាននាក់។ រីឯប្រទេសឥណ្ឌាជាប់ចំណាត់ថ្នាក់លេខ ៤ ដែលមានអ្នកទស្សនាចំនួន ១.៦ លាននាក់។ ចំពោះចំណាត់ថ្នាក់លេខ ១ វិញគឺប្រទេសអាមេរិកដែលមានអ្នកចូលទស្សនា ៤.៦ លាននាក់។ ដូច្នេះចំនួនភ្ញៀវទេសចរសរុបទៅប្រទេសថៃកាលពីឆ្នាំមុនមានចំនួន ២៨ លាននាក់៕

សហរដ្ឋអាមេរិក ៖ ភ្នាក់ងារយាមល្បាតនៅតាមព្រំដែនសហរដ្ឋអាមេរិកឱ្យដឹងថា នៅឆ្នាំ២០២៤នេះ មានជនភៀសខ្លួនចិនស្មើជាង២ម៉ឺននាក់ បានចូលមកកាន់ទឹកដីអាមេរិកដោយ ..ខុ..ស..ច្បា..ប់.. តាមរយៈទីក្រុងសាន់ទីអាហ្គោ រដ្ឋកាលីហ្វ័រញ៉ា ។ គេចាត់ទុកថា ចំនួនជនភៀសខ្លួនចិនបានកើនឡើងរហូតដល់៥០០% បើធៀបនឹងឆ្នាំ២០២៣ ។

ភ្នាក់ងារយាមល្បាតនៅតាមព្រំដែនសហរដ្ឋអាមេរិកលើកឡើងថា ជនជាតិចិនបានចូលមកអាមេរិកដោយខុសច្បាប់តាមតំបន់ភាគខាងត្បូងមានចំនួនកើនឡើងខ្លាំង គឺជនភៀសខ្លួនមួយចំនួនអាចធ្វើការជាភ្នាក់ងារស៊ើបការណ៍សម្ងាត់របស់គណបក្សកុម្មុយនិស្តចិន ។ ក្រៅពីជនជាតិចិនហើយ ក៏មានជនជាតិអាហ្វហ្គានីស្ថាន, រុស្ស៊ី, អាហ្វ្រិក និងជនជាតិផ្សេងទៀតបានភៀសខ្លួនចូលមកអាមេរិក ចាប់តាំងពីខែតុលា ឆ្នាំ២០២៣ ។

អាមេរិកប៉ាន់ស្មានថា នៅឆ្នាំ២០២៤ នឹងមានជនជាតិចិនភៀសខ្លួនដោយខុសច្បាប់ចូលមកកាន់ទឹកដីទឹកដីអាមេរិកបន្ថែមទៀត រហូតដល់ចំនួន១សែន៤ម៉ឺននាក់ ។ ហេតុនេះ វានឹងធ្វើឱ្យប៉ះពាល់ដល់ការគ្រប់គ្រងថវិការបស់អាជ្ញាធរក្នុងតំបន់យ៉ាងខ្លាំង ។ បើតាមទិន្នន័យរបស់រដ្ឋាភិបាលអាមេរិកបង្ហាញថា ជនភៀសខ្លួនជាច្រើននាក់មិនចូលមកអាមេរិកតាមរដ្ឋតិចសាស់ទេ ប៉ុន្តែពួកគេបានចូលមកអាមេរិកតាមភាគខាងលិចជំនួសវិញ ។

ចំណែកជនភៀសខ្លួនជនជាតិចិនភាគច្រើននិយាយថា មូលហេតុដែលពួកគេរត់មកកាន់ទឹកដីអាមេរិកនេះ ដោយសារពួកគេខ្វះខាតឱកាសផ្នែកសេដ្ឋកិច្ច និងបរិយាកាសនយោបាយនៅប្រទេសចិនកាន់តែយ៉ាប់យ៉ឺន ហើយពួកគេចង់មានសេរីភាពខាងគោរពសាសនា និងវប្បធម៌ឱ្យបានច្រើនជាងនេះ ។ រីឯជនភៀសខ្លួនចិនមួយចំនួនទៀតប្រាប់ថា ពួកគេរត់គេចពីការគំរាមកំហែងរបស់រដ្ឋាភិបាលចិន ។

បើតាមការត្រួតពិនិត្យនៅក្នុងបណ្តាញសង្គម TikTok របស់ប្រទេសចិនឃើញថា មានអ្នកប្រើប្រាស់ TikTok ជាច្រើននាក់បានសុំការណែនាំអំពីការទំនាក់ទំនងជាមួយអ្នកលួចដឹកទំនិញខុសច្បាប់ ។ រីឯអ្នកប្រើប្រាស់ TikTok មួយចំនួនទៀតបានស្វែងរកការណែនាំអំពីការឆ្លងកាត់ព្រំដែននៅទីក្រុងសាន់ទីអាហ្គោ រដ្ឋកាលីហ្វ័រញ៉ា ដើម្បីលួចចូលទឹកដីអាមេរិកដោយខុសច្បាប់ ៕